लाम लोहे दे चणे है पहिलवानी जिंद बक्करे वांग कोहाईदी ए

मुहड़के डोल्ह के विच्च अखाड़िआं दे जान मार के जान बणाईदी ए

मल्ल मुढ्ढ कदीम तों पंजाबीआं दे हीरो रहे हन। अज्ज वी किक्कर सिंघ, कल्लू, ग़ुलाम ते गामे होरां दीआं गल्लां करीए तां रुमांचिक जिहा हुल्हारा आ जांदै। मल्लां नूं लोक मिट्टी दे अखाड़िआं `च तप करन वाले तपस्सवी मंनदे रहे हन। उहनां दे दरशन करन, घोल वेखण ते उहनां जिहे बणना लोचदे रहे हन। दानी, भगत, सूरमे ते मल्लां नूं पंजाबीआं नें सदा सतिकार दी नज़र नाल वेखिआ है। गाइक, नचार, ऐकटर ते होर कलाकार पंजाबी मानसिकता विच्च मल्लां जिहा आदर हासल नहीं कर सके। मल्ल दा मतलब हुंदै, बाहूबल नाल घुलण वाला बलवान बंदा। उह हथिआर तों बिनां ही विरोधी नूं चित्त करदा है। उह अखाड़े `च ज़ोर कर के आपणे जुस्से नूं एना ताकतवर बणा लैंदा है कि उस दा जुस्सा ही हथिआर बण जांदा है। मल्लां बारे प्रो: करम सिंघ ते पहिलवान मिहर दीन नें बड़े सिफ़ती टप्पे जोड़े नें:

-देस महिफ़लां विआह शिंगारने नूं, बंदे मल्लां दा साथ बणांवदे नें।

मल्ल ख़ास शिंगार हन शहिनशाहां, रुसतम जाल सुहराब सजांवदे नें।

पहिलवानां `ते रब्ब दी मिहर सिध्धी, ख़ुशनसीबीआं रंग विखांवदे नें।

पहिलवान पहाड़ नें हिंमतां दे, घुलणा ज़िंदगी नाल सिखांवदे नें।

-किक्कर, कल्लू, ग़ुलाम, इमाम, गामा, छड्ड गए जहान निशानीआं नें।

ज़रा गौर करना सिआणे आखदे नें, बहुत औखीआं इह भलवानीआं नें।

इक समां सी जदों मल्लां दीआं गल्लां पंजाब दी हवा `च तारी सन। मिट्टी दे अखाड़िआं विच्च मल्लां दे ज़ोर हुंदे। मेलिआं विच्च छिंझां पैंदीआं ते परहिआं `च उनहां दीआं गल्लां हुंदीआं। उनहां दे अखाड़िआं `च कीते ज़ोर ते घुले घोलां दे किस्से छिड़दे। भलवानां दे मारे दाअ, कीतीआं झंडीआं ते जित्तीआं गुरजां दीआं बातां पैंदीआं। कुशती सदीआं पुराणी खेड है। इस दा इतिहास पंज हज़ार वरहे पहिलां तक दा खोजिआ गिआ है। मैसेपोटामीआ विचों 3000 पू: ई: दी बणी तांबे दी इक्क तशतरी मिली है जिस उते दो पहिलवान कुशती करदे उकरे होए हन। मिसर विच्च नील नदी दे कंढे बेनी हसन दे इक्क मकबरे दीआं कंधां उते कुशती करदे मल्लां दे चित्तर वाहे मिलदे हन। इनहां चित्तरां दी उमर साढे चार हज़ार साल अंकी गई है। भारत दे प्राचीन ग्रंथ रिग वेद, रामाइण ते महांभारत विच्च वी कुशतीआं दा ज़िकर आउंदा है। चीन `च 700 पू: ई: `च कुशती प्रचलत सी।

यूनान दे महांकवी होमर नें आपणे महांकावि इलीअद विच्च ओडीसस ते अजैकस दीआं कुशतीआं दा वरणन कीता है। 704 पू: ई: `च पुरातन ओलंपिक खेडां दी अठारवीं ओलिंपीअद विच्च करोटोन दा दिओ कद्द पहिलवान मीलो ओलंपिक चैंपीअन बणिआ सी। मित्थ है कि उह मुक्का मार के सानह नूं मार दिंदा सी। भारत `च साढे तिंन हज़ार साल पहिलां कुशतीआं शुरू हो चुक्कीआं सन। भीम सैन ते बल राम जोधे वी सन ते पहिलवान वी सन। मिथिहास है कि भीम सैन दे असमानां `च वगाहे हाथी हाले तक नहीं मुड़े। इरान दे रुसतम ते सोहराब दैवी शकतीआं वाले पहिलवान सन। शाहनामा फिरदौसी उनहां दी सूरमगती दीआं वारां नाल भरिआ पिआ है। कहिंदे हन कि रुसतम दी गुरज अठ्ठ बंदे मसीं चुक्कदे सन।

गुरू अंगद देव जी खडूर साहिब दे अखाड़े `च मल्लां दा ज़ोर करवाइआ करदे सन। उस जगहा हुण गुरदवारा मल्ल अखाड़ा साहिब सुभाइमान है:

-घोटा कूंडा बदाम लंगोट लैणे जो भलवानी दा मुढ्ढों दसतूर है जे।

ओथे जांदिआं `खाड़ा गुडवा लैणा अंगद साहिब जिओं विच्च खडूर है जे।

मुग़लां दे आउण नाल हिंदुसतान विच्च कुशती कला नूं तकड़ा हुल्हारा मिलिआ। बाबर ख़ुद तकड़ा पहिलवान सी। हिंद विच्च वरतमान कुशती दा मोढी उसताद नूरउदीन नूं मंनिआ जांदा है। दंद कथा तुरी आउंदी है कि उह नित्त पंज हज़ार डंड ते पंज हज़ार बैठकां कढ्ढदा सी ते घंटिआं बध्धी खूह गेड़दा सी। ख़लीफ़ा अबदुर्रहीम नें राह जांदिआं रुख्ख पुट्ट दित्ता सी जिथे हर साल मेला लग्गदा है ते भलवान दीआं निशानीआं दे दरशन कराए जांदे हन।

ख़लीफ़ा चरागउदीन देवे हिंद साढे सत्त फुट्टा सी ते रमज़ी अठ्ठ फुट्टा भलवान सी। उहनां नूं छिंझां `ते लिजांदिआं घोड़ीआं बदलणीआं पैंदीआं सन। बाबा फतिह सिंघ नें खूह `च डिग्गी डाची `कल्ले नें ही बाहर खिच्च लई सी। पहिलवान अलीए नें जूले जुड़ के खुभ्भिआ गड्डा कढ्ढ दित्ता सी। बलबीर सिंघ कंवल नें ‘भारत दे पहिलवान’ पुसतक विच्च मल्लां दीआं मूंहों मूंह तुरीआं आउंदीआं गल्लां दरज कीतीआं हन। पहिलवानां दे साबते बक्करे खाण, वीह वीह सेर मास दीआं यखणीआं पीण, धड़ी धड़ी दुध्ध ते सेर सेर घिउ इको चिघ्घी पी जाण दीआं गल्लां नाल पुसतक भरी पई है।

सदीका अंबरसरीआ वी बहुत तकड़ा पहिलवान सी। महाराजा शेर सिंघ नूं कुशतीआं दा बड़ा शौक सी ते उह ख़ुद मूंगलीआं फेरदा हुंदा सी। जिद्दण संधावालीआं नें शेर सिंघ दे गोली मारी उद्दण महाराजा शाह बलावल दे मकबरे लागे सदीके दा भुचाल नाल घोल वेख के फौज दी सलामी लै रिहा सी। सदीके बारे किहा जांदै कि उह मौरां उते झोटे नूं चुक्क के इक्क मील तुर सकदा सी। इक्क वार खोते दे सिर `च अजिहा मुक्का मारिआ कि खोता थाएं मर गिआ। लाहौर दे बूटे भलवान `च हाथी जिंना ज़ोर सी जिस नूं किक्कर सिंघ नें उसताद धारिआ। किक्कर सिंघ दा कद्द सत्त फुट्ट ते भार साढे सत्त मण सी। उह गल `च दो मण दा पुड़ पा के आपणे पिंड घणीएके तों करबाठ पिंड तक दौड़िआ करदा सी जिस करके उहदी धौण उते कंनहा पिआ होइआ सी। कदे कदे किक्कर सिंघ हासा मखौल वी कर लैंदा सी। उह मिलण गिलण आए शुकीन दे चादरे दा लड़ खिच्च दिंदा ते कहिंदा, “लै पई जुआनां, तेरा माल मत्ता डिग्ग चल्लिआ ई!”

आपणे अड़ब सुभाअ कारन किक्कर सिंघ विदेशां विच्च कुशती लड़न नां जा सकिआ। 1889 `च पंडत मोती लाल नहिरू नें पैरिस दी नुमाइश `ते जाणा सी जिथे कुशतीआं वी होणीआं सन। उस नें किक्कर सिंघ नूं नाल चल्लण लई किहा पर उह अगाऊं इक्क लख्ख रुपिआ लैण लई अड़ गिआ। अख़ीर नहिरू नें पहिलवान ग़ुलाम नूं नाल तोर लिआ जिस नें पैरिस विच्च रुसतमे ज़मां दा ख़िताब जित्तिआ जो किक्कर सिंघ नें वी जित्त जाणा सी। ग़ुलाम कल्लू दा वड्डा भरा सी जो एना निमर सी कि हर आए गए नूं आखदा, “मैं ही तुहाडा ग़ुलाम आं, सेवा दस्सो।” कलकत्ते दी मशहूर गाइका गौहर जान ग़ुलाम `ते मरदी सी पर ग़ुलाम दे दिल विच्च मैल नहीं सी। उह दरबार साहिब मत्था टेक के कुशती लड़न जांदा सी ते मुड़ के शुकराना करन आउंदा सी।

ग़ुलाम दे उलट कल्लू चक्कवीं गल्ल करदा सी। उहने पेलड़े भलवान दे पुत्तर करीम नूं तनज़ मारी सी कि औह पेलड़े दी बुलबुल चल्ली ए। फिर उही करीम बख़श 1992 `च इंगलैंड दे टाम कैनन नूं ढाह के रुसतमे ज़मां बणिआ। कल्लू नें मंनही पहिलवान रैणी वाले नूं लाहौरीआं दी बुलबुल कहि के गल पुआ लिआ सी ते चंगी खुंभ ठपाई सी। मंनही दीआं उंगलां सरीए वरगीआं सन जिस करके जिथे हत्थ पाउंदा सी जंबूर वांग मास उधेड़ दिंदा सी। उह बाई साल दी उमर विच्च मर गिआ अते गुंगा ते हमीदा वी जुआन उमर `च मरे। गुंगा अंम्रितसरों लाहौर नूं बस्स चहड़िआ सी ते अगली सीट `ते बैठा सी। अग्गों इक्क बच्ची सड़क `ते भुकाना उडाउंदी आ गई। गुंगे नें बच्ची दी जान बचाउण लई उच्ची देणे आं आं कीती। घबराहट `च डराईवर तों बस्स टाहली नाल जा वज्जी ते गुंगा गंभीर ज़ख़मी हो गिआ। उथों उस नूं हसपताल लै गए पर उह बच नां सकिआ। गुंगे दे वियोग विच्च उहदा पहिलवान पिओ गामूं रो रो के अंनहां हो गिआ ते छेती मर गिआ।

गामे दा कद्द तां पंज फुट्ट सत्त इंच सी पर भार 250 पौंड सी। उहदी छाती दा घेरा 56 इंच ते डौले 17 इंच सन। उह 1910 विच्च लंडन गिआ ते जानह बुल्ल वरलड चैंपीअनशिप जित्त के विशव विजेता बणिआ। उह महाराजा पटिआला दा पहिलवान सी जो देश दी वंड पिछों लाहौर चला गिआ। उथे उह 23 मई 1960 नूं बड़ी मंदी हालत विच्च गुज़रिआ। उस नें 1928 `च विशव चैंपीअन ज़बिसको नूं ते 1929 `च सवीडन दे नामी पहिलवान पीटरसन नूं पटिआले विच्च पटका के आपणी ताकत दा लोहा मंनवाइआ सी। उहदा भरा इमाम बख़श वी बड़ा तकड़ा पहिलवान हो गुज़रिआ जीहनूं इक्क वार दौधरीए गुरबख़शे नें वंगारिआ पर उहनां दा घोल नां हो सकिआ। गुज्जरांवाले दा गामा सणे सवारीआं यक्का मोढिआं `ते चुक्क लैंदा सी जिस करके लोक उस नूं यक्का भलवान कहिण लग्ग पए सन।

दारे दुलचीपुरीए नूं जेल्ह `चों हत्थकड़ीआं ला के अखाड़े विच्च लिआंदा जांदा सी ते कुशती लड़ाउण पिछ्छों मुड़ हत्थकड़ीआं ला लईआं जांदीआं सन। उह कतल दे जुरम विच्च सज़ा भुगत रिहा सी। रूस दे बुलगानिन नें दिल्ली लागे सोनीपत `च उहदी कुशती वेख के उहदे `ते रहिम करन नूं किहा तां पंजाब दे मुख्ख मंतरी भीम सैन सच्चर नें दारे दी सज़ा मुआफ़ कराउण `च मदद कीती। फिर उह फिलमां `च किंगकांग नाल कुशतीआं विखाउण लग्गा। रामाइण `च हनूमान दा रोल करन वाला ते राज सभा दा मैंबर बणिआ दारा सिंघ दूजा है। उह वड्डे दारे नालों दस साल छोटा है। उनहां दोहां नें फिलम सैमसन विच्च कुशती विखाई सी। दूजा दारा फरी सटाईल कुशतीआं दा रुसतमे ज़मां रिहा ते कई फिलमां दा निरमाता है। वड्डा दारा दुलचीपुर दा सिध्धू जट्ट सी ते छोटा दारा धरमूचक्क दा रंधावा जट्ट है। वड्डे दा कद्द छे फुट्ट सत्त इंच सी ते छोटे दा छे फुट्ट दो इंच है। हुण सुर सिंघ दा करतार सिंघ आपणी उमर दा विशव चैंपीअन है। नामी इनामी पहिलवानां दी लड़ी बहुत लंमी है ते उनहां दीआं गल्लां दा वी अंत नहीं।

वीहवीं सदी दे पहिले अध्ध तक पंजाब दा शाइद ही कोई शहिर गरां होवे जिथे ज़ोर करन लई अखाड़े नां होण। कुशती नाल संबंधित अनेकां कहावतां ते मुहावरे पंजाबी विच्च प्रचलत हन। पंजाबी लोक पहिलवानां दे किस्से गाउंदे ते सुणदे रहे हन। करम सिंघ दा बंद है:

-मल्ल देश ते दुनी दी शान हुंदे, जिथे जंमे जाए शहिरां गामां दी जे।

ज़ोर रज्जवें खुल्ल्ही खुराक मल्लां, ढेरां दुध्धां ते घिओ बदामां दी जे।

होण उंगलां पूरन ते जाण चंनण, वेखे जांदे मैं मंडी सुनामां दी जे।

हरन विच्च डरां करम मल्ल तुरदे, दाउगीरां दी मल्ली वरिआमा दी जे।

किस्साकार रीटा दीन लिखदा है:

-मख्खण मलाई तिओड़ पीण यखणी, इज़्ज़त, वडिआई सांभ सांभ रख्खणी।

मावां भैणां देख घत्तदे नें नीवीआं, मल्लां, साधां, सूरिआं नूं पट्टण तीवीआं।

सरड़ सरड़ यारो डंड कढ्ढदे, पट्टां दे शपट्टे हाहड़ी जट्ट वढ्ढदे।

बैठकां ते डंड यारो ख़ूब पेलदे, पासे हो के वेखो जां इंजण रेल दे।

रीटे दीना मल्लां दीआं सुणावां गल्लां जी, नदीआं ते हंस शेर विच्च झल्लां जी।

हुण कबड्डी दे टूरनामैंट वधेरे हुंदे हन जद कि पहिलां छिंझां वधेरे पैंदीआं सन। पिंडां दे लोक आपो आपणे मल्ल पालदे सन। आपणे पिंडां दे पहिलवानां नाल टोलीआं दीआं टोलीआं छिंझां `ते जांदीआं। मैं बचपन `च उनहां छिंझां दे नज़ारे ख़ुद तक्के नें। दूरों ढोल वज्जदे सुण के ई पता लग्ग जांदा सी कि अखाड़ा बझ्झ रिहै जां घोल चल्ल पए नें? ढोलां दी ताल ई दस्स दिंदी सी कि छिंझ किस पड़ाअ उते है? उनहीं दिनीं मल्ल दरशकां दे साहमणे ही चादरे दी बुक्कल ओड़ के जांघीए बंनहदे ते लंगोट लाउंदे। फिर जै अली ते जै बली करदे अखाड़े वल्ल वधदे। उनहां दे तेल नाल गुंनहे पिंडे लिशकां मारदे ते घोल मिट्टी दे अखाड़े विच्च हुंदे। मल्ल मिट्टी विच्च नहाते जांदे। जिंना चिर किसे दी कंड नां लग्गदी कुशती चलदी रहिंदी सी। कई कुशतीआं घंटिआं बध्धी चलदीआं ते आख़र पहिलवान बराबरी उते छडाउणे पैंदे। फिर पहिलवान अखाड़े दी फेरी लाउंदे ते दरशक उनहां नूं इनाम दिंदे।

इक समां सी जदों `कल्ले लाहौर शहिर `च ही पंजाह तों वध्ध अखाड़े सन। अंम्रितसर वी अखाड़िआं नाल भरिआ पिआ सी। उथे हुण वी चलदे चौवी अखाड़िआं दा वेरवा पिआरा सिंघ रछीन नें पुसतक ‘कुशती अखाड़े’ विच्च दित्ता है। उस नें पंजाब दे सौ कु अखाड़िआं दी जाण पछाण कराई है। पंजाब दे प्रसिध्ध अखाड़िआं विच्च आलमगीर, सेरों, अंम्रितसर गोल बाग, सुर सिंघ, शाहकोट, हीरों झाड़ों, जलंधर नाथां दी बगीची, घुंगराणा, डूंमछेड़ी, ढिलवां, सैदोके, पटिआला, रौणी, फगवाड़ा, बरनाला, फरीदकोट, बटाला, बठिंडा, भट्टीआं, माछीवाड़ा ते मलेरकोटला आदि हन। मंनणहाणा, शंकर, बब्बेहाली, दिआलपुर ते हकीमपुर दे पुरेवाल खेड मेले दीआं छिंझां मशहूर हन। आधुनिक कुशतीआं वधेरे कर के हंस राज सटेडीअम जलंधर विच्च हुंदीआं हन ते अनंदपुर साहिब दे होले महल्ले `ते कुशतीआं दा दंगल हुंदा है।

अखाड़िआं बारे अनेकां वहिम भरम ते विसवाश चलदे रहे हन। इक्क विसवाश इह वी रिहा पई जे कोई पठ्ठा अखाड़े दी मिट्टी `च चीची दा थोहड़ा जिहा खून छिड़क देवे तां उस अखाड़े `च किसे दे सट्ट नहीं लग्गदी। अखाड़िआं दी मिट्टी विच्च हलदी ते रगड़े होए निंम दे पत्ते मिलाउण दा उपाअ कीता जांदा रिहा तां जो किसे दे रगड़ वज्ज जावे तां उह पक्के नां। अखाड़े `च जुत्ती सणे कोई नहीं जा सकदा। अखाड़े नूं पवित्तर जगहा समझिआ जांदै। वहिम वरगा इक्क विसवाश इह वी है कि काली बिल्ली दीआं मुछ्छां दे वाल लंगोट विच्च सिओंते होण जां शेर दे खून दीआं कुझ्झ बूंदां लंगोट रंगण वेले पाईआं होण तां उह लंगोट लाउण वाले नूं हार नहीं आउंदी।

कुशतीआं नाल डंड बैठकां, तेल दीआं मालशां, बदामां दीआं शरदाईआं, मखणीआं मलाईआं, मास दीआं यखणीआं, दुध्ध घिओ, जांघीए ते लंगोट, अखाड़िआं दी मिट्टी, छिंझां ते दंगल, झंडीआं, मालीआं, रुमालीआं, गुरजां, ढोली, लाकड़ी, मुनसिफ़, ख़लीफ़े, पीर, उसताद, पठ्ठे, मंनतां, या अली, जै बजरंग बली, थापीआं, जोड़, लत्त फेरनी, मोढिआं `तों चुक्कणा ते अखाड़े दी गेड़ी जां फेरी लाउण वरगे जुमले ते लफ़ज़ ओत पोत हन। घुलण समें दाअ मारन दा बड़ा महत्तव है। असल विच्च कुशती है ही दाअ मारन ते रोकण दी खेड। कहिंदे हन कि उसताद नूरउदीन नें कुशतीआं दे 360 दाअ चालू कीते सन।

कलाजंग मारना, रेला करना, ढाक चाहड़ना, पुठ्ठी, सावीं, दसती, मोड़ा, तेगा, पुठ्ठा कलाजंग, मुलतानी, सालतू, अंदर टंगी, बाहर टंगी, धोबी पटड़ा, सूतने हत्थ पाउणा, अंदरली ते बाहरली मारनी, सुट्ट करनी, ठिब्बी लाउणी, करची मारनी, मुंना फेरना, पट्टीं लग्गणा, कुड़ंगा, जूड़ मारना, खुच्चीं लग्गणा, कुल्ला, चौमुखीआ, बागड़ी, राम बाण, पौड़ी, कुंडा, इक्क टंगी, सवारी, रेहड़, चरखा, जनेऊ, करास, किल्ली लाउणा, रोम, सफाल सुट्टणा, बाहां बंनहणीआं, भंन के ढाहुणा, झोली करनी, गफूआ मारना, नकालों पुट्टणा, घोड़ी पाउणी, मछ्छी गोता, गोडा टेकणा, बगलां भरनीआं ते बुहड़का कढ्ढणा आदि अनेकां दाअ हन जो कुशती नूं कलामई ते मनमोहणी बणाई आ रहे हन।

अजोकी कुशती वज़न वरगां विच्च वंडी गई है ते खुल्ल्हे समें दी थां बझ्झवें मिंटां दे दौर बण गए हन। मिट्टी दे अखाड़े अलोप हो रहे हन ते उनहां दी थां गद्दे विछ रहे हन। घंटिआं बध्धी मिट्टी नाल मिट्टी हुंदे मल्लां दा समां लद्द गिआ है। हुण मल्लां दे घोलां दा उह रुमांस नहीं रिहा जीहदा वरणन धनी राम चात्रिक नें ‘मारदा दमामे जट्ट मेले आ गिआ’ कविता विच्च कीता सी। हुण तां उस रुमांस दे गुआच जाण दीआं गल्लां ही कीतीआं जा सकदीआं हन।