जिउं ही सूरज दूर पछ्छम विच, उच्चे लंमे रुख्खां विचों दी हेठां ते फेर होर हेठां होण लग्गा तां मेरा दिल वी जिवें ‘धक्क’ करके हेठां बैठण लग्गा सी ।

मैं कदी घड़ी वल्ल, कदी बस्स दी चाल अते बस्स दे डराईवर वल्ल ते फेर बाहर पसर रहे शाम दे हनेरे वल्ल वेख रिहा सां । सज्जे हत्थ नाल दी सीट 'ते बैठे जुगल किशोर दे चिहरे वल्ल वेख के, उहदे चिहरे तों भैअ अते चिंता दे चिंनह तलाश करन लग्गा तां उह अग्गों मुसकरा पिआ सी।

“...इह डरैवर वी बड़ी कुत्ती शैअ वे । अग्गों कोई चीज़ आउंदी है तां हौळी कर लैंदा मां नूं । जिवें अगले नूं आखदा होवे, ‘महाराज ! पहिलां तुसीं लंघा लो... मैं— आखो तां पासे करके रोक दिंदां, हूंअ किसे बक्करी दी औलाद !"

ते उसने नां-पसंदगी दे अंदाज़ विच पासे नूं सिर मारिआ।

उसदी गल्ल दा जवाब देण दी थां मैं बस्स विचलीआं पग्गां वालीआं अते पटिआं वालीआं सवारीआं दी गिणती करन लग्गा। पग्गां वालीआं सवारीआं गिणती विच दो वध्ध सन। मैं परेशान जिहा हो गिआ। इंज लग्गा जिवें काहली अते भुलेखे विच सवाल गलत निकल गिआ होवे। रकम मेट के मैं इक वार फेर गिणती कीती। हुण दोवें तरहां दीआं सवारीआं बराबर-बराबर सन। मैं जिवें हारदा हारदा बच गिआ सां सुख दा साह लै के इक पल सीट नाल ढोअ ला लई अते जेब विचों छोटी कंघी कढ्ढ के वालां विच फेरन लग्गा।

फेर कंघी जेब विच पा के, बारी विच्चों बाहर फ़ैल रहे शाम दे घुसमुसे विच नज़र गड्ड दित्ती।

हनेरे वल्ल वेखदिआं ही जिवें पल भर लई मिले सुख उते फिर सिआही फ़ैल गई सी।

सूरज डुब्बे तों बाअद बस्स विच सफ़र करना तां मौत दे नाल तुरना सी।

ते फेर एस दिशा विच ?

पिछले दिनी दिल्ली रहिंदे मेरी भूआ दे पुत्त राकेश दी चिठ्ठी आई सी। उस लिखिआ सी: जी तां बड़ा करदा सी कि शीला दे विआह 'ते हाज़र हुंदा। पर भरावा! सच्ची पुछ्छें तां पहिली गल्ल पंजाब आउंदिआं ही डर लग्गदै ते पंजाब विच अग्गे अंम्रितसर आउणा तां छोटे हुंदिआं नानी कोलों सुणी चौथी कूट वाली उस बात दी याद दिवा दिंदा है। याद है नां तैनूं उह बात ? आपां कठ्ठिआं रजाई दी बुक्कल विच बैठ के उस तों कई वारी सुणी सी। उदों जदों चौथी विच पहड़दिआं मैं तिंन महीने तुहाडे कोल अंम्रितसर रिहा सां। मैनूं मिआदी बुख़ार हो गिआ सीराज़ी होण 'ते मैनूं नानी दरबार साहिब मत्था टिका के लिआई सी। सरोवर विच इशनान करवा के वी... ‘दुख-भंजनी बेरी हेठां। शामीं सौण लग्गिआं, दिने उठ्ठण लग्गिआं, रोटी खाण लग्गिआं, उह ‘धंन गुरू रामदास धंन गुरू रामदास' करदी रहिंदी सी। जी ते करदा उस दैवी सूरत दे दरशन कर जावां । पता नहीं होर साल है कि छे महीने । बस्स भरावा! डरदा नहीं आ रिहा। बहाना होर कोई नहीं। ऐह पंज सौ रुपै दा डराफ़ट भेज रिहां । भैण नूं मेरे वल्लों कोई चीज़ लै दईं। ते मामे मामी कोलों मेरे वल्लों माफ़ी मंग लईं । उंज, बंदा भावें किड्डा वी किउं नां हो जावे, नानके आउण नूं भला कीहदा जी नहीं करदा! पर ...

मेरे मन विच छोटे हुंदिआं दादी तों सुणी, राजकुमार वाली उह बात घुंम रही सी, जिस अग्गे इह शरत ला दित्ती गई सी कि उह तिंने कूटां वल्ल तां बेफ़िकरी नाल जा सकदा सी, पर चौथी कूट वल्ल नहीं। किउंकि चौथी कूट वल्ल जाइआ, पैर पैर ते मोड़ मोड़ ते उसदी जान नूं ख़तरा सी। चौथी कूट वल्ल गिआ तां उह जिऊंदा वापस नहीं सी आ सकदा।

पर उस राजकुमार दी जगिआसा अते बहादरी उस नूं चौथी कूट वल्ल लै ही तां गई सी।

ते उह सभ ख़तरिआं नाल इकल्ला ही जूझ के, सिरफ़ जिऊंदा ही वापस नहीं सी परतिआ, कई कुझ अणमुल्ला प्रापत करके वी परतिआ सी।

नां नूं तां मेरा नां वी राजकुमार सी पर मैं बातां वाला राजकुमार थोहड़ा सी! मैं तां अंम्रितसर ज़िले दे, दूर बारडर दे, इक पिंड दे हाई सकूल दा कलरक सां-जिसदे मन विच सिरफ़ एनी जगिआसा सी कि बस्स छेती तों छेती जलंधर पहुंचे... घट्टो घट्ट आख़री गड्डी तों पहिलां जो जलंधरों अंम्रितसर नूं चलदी है।

ते बहादरी !

...उंज जिनहां पिंडां विच जा के मैं डिऊटी दिंदा, उथे डिऊटी देणा वी साडी दिख्ख दे बंदिआं लई बहादरी तों घट्ट नहीं। नाले काहदी बहादरी हुण ? पता नहीं तुहाडे सज्जिओं खब्बिओं कदों किसे नें, किस नूं गोली मार देणी है। तुहानूं दुशमण दा, उहदी दा, उहदे हमला करन दे वेले दा कुझ वी तां पता नहीं।

मेरे ऐन सिर दे उत्ते बस्स दी बत्ती जग पई तां उस दे नाल ही छत्त 'ते लिखीआं लाईनां उघ्घड़ आईआं।

‘सवारी आपणे समान दी आप ज़िंमेवार होवेगी।'

लाईनां पहड़ के मैं जुगल वल्ल वेख के मुसकराइआ ते कितिउं पहड़ी गल्ल उस नूं सुणाई।

"एथे हुण इह वी लिख छड्डणा चाहीदा ऐ... सवारी आपणी जान दी वी आप ज़िंमेवार होवेगी।”

जुगल हस्स पिआ ते उस छत्त दे दूजे पासे लिखी इक होर सतर वल्ल इशारा कीता ते फेर पहड़न लग्गा, “सिर अते बाज़ू बाहर नां कढ्ढो जी।” ते उह फिर बस्सां विच आ वड़न वाले पिसतौल-धारीआं दे हवाले नाल उहनां वल्लों ही आखण लग्गा, "सिर अते बाज़ू बाहर नां कढ्ढो जी... असीं अंदर ही आ जांदे हां..."

असीं आपणे आप 'ते हस्सण दा यतन कीता, पर साडे हासे विच वी सहिम रलिआ होइआ सी।

चंडीगहड़ डी. पी. आई. दे दफ़तरों जुगल दा कंम करवा के अड्डे 'ते पहुंचे तां पंज मिंट पहिलां अंम्रितसर नूं जाण वाली आख़री बस्स चल्ल चुक्की सी। आखरी बस्स लंघ जावे ते रहिण लई कोई ठाहर नां होवे तां साडे वरगे लोकां लई जो मुशकल बणदी है, उसदा अनुमान लाउणा औखा नहीं। ख़ास तौर 'ते अजोके समिआं विच, जदों रहिण दी ही नहीं, जान बचाउण दी समस्सिआ वी सिर 'ते आण खहड़ी हुंदी है।

रात नूं अंम्रितसर पुज्जणा लाज़मी सी। अज्ज घर मुड़ आउण दी पक्की करके आए सां। रात घर नां पहुंचण दा मतलब सी, दोहां घरां दे जीआं नूं सारी रात भैअ ते चिंता दी सूली 'ते टंगी रख्खणा । शादी ग़मी 'ते जाण तों बिनां मैं तां हुण कदी रात बाहर ही नहीं सां ठहिरदा । सूरज डुब्बण ’ते अंदर वड़ के घर दे दरवाज़े बंद कर लईदे सन। इक गल्ल होर वी सी—सवेरे ही मेरे कुलीग मासटर हरचरन दी कुड़ी दा विआह वी सी। हरचरन चंगा बंदा सी । मेरी भैण शीला दे विआह 'ते उस नें दस हज़ार रुपैआ मैनूं हत्थ हुदार दित्ता सी, जो मैं अजे वी उस नूं मोड़ना सी। उंज वी उस तों तेल कढाउण लई तोरीआ, बासमती दे चौल, गुड़ गंने लोड़ अनुसार लै आईदे सन । आपां वी कदी उस नाल बाऊआं वाली गल्ल नहीं कीती। ऐफीशी बार दा केस होवे जां डी. ई. ओ. दफ़तर कोई कंम होवे, आप करवा के दईदा... बिनां पैसिआं तों । हुण जे सवेरे नां पहुंचदा तां उस आखणा सी... उस की आखणा सी। मेरा मन ई नहीं मंनदा कि धी धिआणी नूं शगन पाउण वी नां पहुंचां।... उंज वी रात होटलां विच ठहिरन दी साडे बाऊ लोकां विच पहुंच किथे !

"राजू! वेख लै उह वी दिन सन, जदों कंम मुका के हलका जिहा पैग्ग ला के फ़िलम वेख के रात चंडीगहड़ बस्स 'ते चल्ल के अंम्रितसर पहुंच जाईदा सी ते घड़ी पल ठुका ला के वी सवेरे डिऊटी 'ते जाण लई तिआर-बर-तिआर होईदा सी।”

मैनूं जापिआ, उह पंजाब तां हुण बीते दी कहाणी हो के रहि गिआ सी। इक सुपने वांग दूर बहुत दूर किधरे पिछ्छे वल्ल।

किसे दस्सिआ जलंधर नूं आखरी बस्स अजे जाणी सी; जे असीं उस 'ते चहड़ जाईए तां जलंधरों अंम्रितसर नूं जाण वाली आखरी गड्डी मिल सकदी सी।

…. ते सारा राह मेरा मन बस्स दी सपीड दे नाल-नाल ही नहीं सगों उस तों वी किते तेज़ दौड़दा रिहा सी। मैं बार-बार घड़ी उत्तों टाईम देखदा ते गड्डी चल्लण दे समें तक्क, बाकी बचे समें नूं तकसीम करके, इक शहिर तों दूजे शहिर तक्क खरड़, रोपड़, नवां शहिर,बंगा, फगवाड़ा—बस्स दे पहुंचण दा वकत मन ही मन निसचित करदा आ रिहा सां, पर हरेक थां 'ते बस्स मेरे अनुमानत समें तों पछड़के ही पहुंचदी रही सी। इंझ मैनूं आपणी अते गड्डी विच ली वित्थ वधदी जांदी जापदी। मैनूं घबराहट होण लग्गी सी, जे जलंधर वी वेले सिर नां पहुंच सके तां ?

मेरे मन नें विचों' ही किहा जलंधर वेले सिर नहीं, सगों सुख सुखां नाल पहुंचण दी गल्ल सोच। मैनूं जापिआ हुणे ही कोई जणा डराईवर दी पुड़पुड़ी 'ते पिसतौल दी ठंढी नाळी रखेगा ते उस नूं किसे पिंड दी लिंक रोड वल्ल बस्स मोड़न लई आखेगा ते दूजे ही पल मेरे पिछ्छे बैठा सरदार आपणा अज्ज शाम दा ‘सकोर’ शुरू करन लई मेरे तों ही आपणा ‘खाता' खोल्हेगा।

जुगल फेर दिनां दा रोणा लै बैठा, “वेख ला ! उह वी दिन सन जदों बस्स लंघ जावे तां लोक जित्थे जीअ करे सिरहाणें बांह दे के सौं जांदे सन। इह इहनां नें की कर ता ?”

मैं उसदी हां विच हां मिलाई। अचानक मेरे ज़िहन दी गरारी उसदे आख़री वाक उत्ते अड़ गई, “इह इहनां नें की करता ?” मैं आपणे मन नूं पुछ्छिआ, “इह कौण सन, जिनहां नें इह सभ कुझ कर दित्ता सी ?” पर मेरे मन तों पहिलां ही साडे सकूल दा अंम्रितधारी डी. पी. ई. बोल पिआ, “बाहमण... होर कौण ?” उह हिंदू ही नहीं आखेगा। ‘बाहमण’ आखेगा- बड़ा घरोड़के। फेर आखेगा, ‘लुटेरा कौम, झूठी ते बेईमान, मीसणी ते धोखेबाज़, इहनां दा वसाह नहीं कीता जा सकदा कदी पहिलां आंहदे सन साडे नाल रहो, आज़ाद हो लईए... तुहाडे रहिण लई इक खित्ता दिआंगे आज़ादी दी निघ्घ मानण लई .. ते आज़ाद हुंदिआं ई... अखे तुसीं तां जरैम -पेशा कौम ओ... ते निघ्घ दित्ता नें बळदे टैर गळां 'च पा के... फेर समझौते करदे नें... मुक्कर जांदे नें... जे सिंघ खड़का दड़का करदे नें तां चीकदे नें... सारा हिंदुसतान सिर 'ते चुक्कणा लिआ।...”

सच्ची गल्ल है; आपां तां कदी अग्गों बोले ही नहीं। जिहड़ा बोले अग्गों 'जी जी' कर छड्डीदा है। गुस्सा तां आउंदा है; जदों सारी कौम नूं ‘बेईमान’ आखदा है। पर होर कोई सटाफ़ मैंबर वी तां नहीं बोलदा। सारे उसदी गल्ल नूं टालदे ही हन। नाले बोल के कौण मौत नूं सद्दा देवे। हुण तां साडे सकूलों पहड़ के गिआ इक मुंडा वी ‘उधर’ रल गिआ सी। अजे चार महीने वी नहीं होए, साडे सकूल दे लागले पिंड दे हाई सकूल 'च दनदनाउंदे आए सन ते मिंटां विच ही तिंन मासटरां नूं गोलीआं नाल दिन-दिहाड़े भुंन के बच के निकल गए सन।

बस्स हुज्जके नाल रुकी। इह जलंधर कैंट सी । असीं सोचिआ, इथों गड्डी फड़न विच सौख अते समें दी बच्चत हो जावेगी। सटेशन दीआं पौड़ीआं 'ते खड़ोते किसे विअकती नूं पुछ्छण ते पता लग्गा कि गड्डी तां लंघ चुक्की सी। उसने किहा, “थरी वीलर लै लओ। हिंमत करो तां जलंधरों गड्डी मिल सकदी है... अजे थोहड़ा चिर होइआ एथों लंघी नूं..."

बस्स दे डराईवर नूं गाळां दिंदे, काहली काहली थरी वीलर लै के जदों जलंधर रेलवे सटेशन 'ते पहुंचे तां पता लग्गा, गड्डी उथों वी तुर चुक्की सी।

मैं निराशा विच मत्थे 'ते हत्थ मारिआ।

"हुण फिर ?”

जुगल दा इह सहिमिआ होइआ सवाल तां पहिलां ही मेरे अंदर बरछे वांग खुभ्भिआ पिआ सी जिसदा जुआब लभ्भण लई मैं आपणे अंदर दौड़-दौड़ के हफ-थक्क चुक्का सां।

"हुण तां इहो ही हो सकदा कि बातां वाले पऊए होण पैरीं जां होवे कोई उडण-खटोला-जिस विच बैठ के, असमान राहीं उड्डके पहुंच जाईए अंबरसर..."

पलैटफ़ारम उतले लक्कड़ दे बैंच 'ते बैठदिआं मैं महिसूस कीता कि मेरे बोलां विच बेमलूमी खिझ्झ वी सी।

जुगल मैनूं कुझ कहिण दी थां सरकार नूं बुरा-भला कहिण लग्गा, जिसने हनेरा होण तों बाअद बस्सां दे नाल नाल, अंम्रितसर नूं-इक निशचित समें तों बाअद-गड्डीआं दा जाणा वी बंद कर दित्ता होइआ सी।

थोहड़े चिर पिछ्छों इक गड्डी लुधिआणे वल्लों आई ते पलैटफारम 'ते आ लग्गी। मैं आस जिही विच बैंच तों उठ्ठ के खड़ो गिआ। उस विचों सवारीआं उत्तरनीआं शुरू हो गईआं। मेरे तों पहिलां ही चुगल नें इस सवारी नूं पुछ्छ लिआ, "इह अंबरसर जाणी ऐं ?"

"नहीं जी-मेरा खिआल ऐ... इर इत्थे तक्क दी ऐ.."सवारी स निकल गई ते साडे अंदर चल्लण लग्गा अनार इकदम बुझ गिआ।

गड्डी विचों उत्तरीआं सवारीआं हौली हौली बाहर हो गईआं सन। असीं निराश, उदास ते घबराए होए पलैटफारम 'ते खहड़त सी।

कुझ सुरख्खिआ करमचारी-जिनहां विच रेलवे पुलस, सी.आर.पी. ऐफ्फ अते पंजाब पुलिस दे बंदे वी सन-ख़ाली हो चुक्की गड्डी दे डब्बिआं विच वड़ के उहनां दी चैकिंग कर रहे सन। किधरे कोई समाज-दुशमण अनसर विच वड़ के नां बैठा होवे । नाल दे नाल उह गड्डी दे खिड़कीआं दरवाज़ वी बंद करवा रहे सन।

"अंबरसर जाणा जे बाऊ जी?" इक अधखड़ उमर दा सरदार जिसदे हत्थ विच छोटा जिहा सूटकेस फहड़िआ होइआ सी, साडे कोल आ के खड़े गिआ। उह पहिलां वी सानूं गड्डी दी पुछ्छ-पड़ताल करदिआं वेख चुक्का सी।

मैं उस सरदार नूं सिर तों पैरां तक्क गहु नाल वेखिआ। सच्ची गल्ल तां इह है कि शक्क नाल वेखिआ। पर दूजे पल ही मेरा शक्क दूर हो गिआ।

"मैं वी अंबरसर जाणा, पछड़ गिआं... बस ग़लती हो गई... आह गड्डी उं अंबरसर नूं ई जाणी आं ऐथों अग्गे ख़ाली ही जांदी ऐ... सवारी नही कोई लिजांदी जे भला तरला मिंनत कर वेखीए किसे दा..."

उह किसे होर पासिओं आ रहे पाणी दे वहिण वांग, साडे मन दे वहिण विच सुभावक ही आ शामल होइआ ते इक पल विच साडी सांझी लोड़ नें सानूं इक दूजे दे नेड़े लै आंदा।

"कीहनूं पुछ्छीए फेर ?" मैं उस नूं सवाल कीता।

"जिहड़ी गारद गड्डी दे नाल जांदी ऐ... उहनां 'च किसे नूं पुछ्छ वेखीए... भला किसे दे मन मिहर पै जावे.."

साहमणे डब्बे दे बाहर पंजाब पुलिस दा इक हवालदार खड़ोता सी। ते अंदर वड़े सिपाही नूं आख रिहा सी।

"छिंदिआ! सीटां दे हेठां उत्ते चंगी तरहां वेख लईं उए।”

असीं उस हवालदार नाल गल्ल करन दी सोची। मैं ते जुगल दो कदम पिछ्छे खड़ोते रहे । सरदार हवालदार नूं पुछ्छण लई सरदार ही ढुकवां बंदा सी।

“साअब बहादर... असीं तिंन सवारीआं... अंबरसर जाणां जिवें वी होवे साडी मदद करो तुहाडी सरदी बणदी सेवा वी कर दिआंगे..” मैनूं लग्गा, 'सेवा' वाली गल्ल सरदार नें बहुत ढुक्कवीं कीती सी। असीं हवालदार दे मूंह वल्ल वेख रहे सां

“... नां ओ नां.. भा.. असीं पंजाब पुलस वाले तां अग्गे ई बड़े बदनाम आं... अखे इह पैसे लै के सवारीआं लै जांदे आ... किसे होर नूं पुछ्छो जी..." ते फिर उह साडे वल्ल बिनां धिआन दित्तिआं डब्बे विचों उतरदे सिपाही नूं पुछ्छण लग्गा, "ठीक ठाक ऐ नां सभ ?”

“बस्स ऐं... फी आई टी-फिट्ट आ” सिपाही नें मोड़वां जवाब दित्ता ते उह हस्सदे होए परहां खड़ोते इक होर सिपाही वल्ल तुर गए।

असीं तिंनों इक-दूजे दे मूंह वल्ल देखण लग्गे।

"मैं पता करदां।” इह कहिंदा होइआ जुगल रेलवे पुलस दे इक करमचारी वल्ल गिआ। थोहड़ी देर पिछ्छों वापस आइआ तां साडे पुछ्छण तों पहिलां आप ही हस्सदा होइआ आखण लग्गा, "सभ कंजरदीन नें... कोई पल्ला नहीं फड़ाउंदा बुरे फसे!”

उहो हवालदार फेर साडे कोल दी लंघिआ। ऐतकी मैं तरला जिहा लिआ, "करो सरदार जी किरपा साडे 'ते।”

"किरपा नूं... बाऊ जी... गड्डी किहड़ी मेरे पिउ दी आ...” उह थोहड़ा जिहा खिझ्झ गिआ सी । पर थोहड़ा जिहा अग्गे जा के उसने आखिआ, "गारड नाल गल्ल कर वेखो”

असीं आस नाल गारड दे डब्बे वल्ल तुर पए । उह बाहर किसे बंदे नाल गल्लीं लग्गा होइआ सी। असीं कुझ कदम उरहां खलो गए। शिसटाचार वजों । उह बंदा तां उस नाल गल्लां करनों हट्ट ही नहीं सी रिहा। इंज किंना कु चिर खड़ोते रहांगे। किते उह नां होवे कि गड्डी तुरन दा वेला हो जावे ते असीं अजे गल्ल वी नां कर सकीए।

बाऊ जी तुसीं करो गल्ल” गारड दी बाहरी दिख्ख देख के ही शाइद सरदार नें मैनूं प्रेरना दित्ती।

मैं अग्गे वध के झिजकदिआं गल्ल शुरू कीती,"सर! बड़ी परौबलम ’च फस गए आंचंडीगहड़ बस्स 'ते तुरे सां! सोचिआ जलंधरों गड्डी फड़ लांगे। पर गड्डी पहिलां ही लंघ गई... अंबरसर लै जावो बड़ी मिहरबानी होवेगी तुहाडी मुशकल 'च बंदा ई बंदे दी दारू हुंदा ... तुहाडे डब्बे 'च खड़ो खड़ा के चले जांगे।"

वेखण नूं तां गारड चिहरे तों साऊ बंदा जापदा सी। मैं उसदे मिहरबान बुल्ल्ह खुल्ल्हण दी उडीक कर रिहा सां

"स्रीमान जी... उतों माहौल तां वेखो किहो जिहा वाधू बंदा लिजाणा... आपणी नौकरी ख़तरे विच पाउणा रादर आपणी जान ख़तरे विच पाउणा .. पता नहीं किहड़ा बंदा कौण ऐं किसे दा की भरोसा .... जे माहौल ठीक हुंदा तां गड्डी ख़ाली किउं लिजाणी पैंदी। अकसर कुझ सोच के ही तां अगलिआं नें बंद कीतीआं नें... मैं तुहाडी तकलीफ़ समझदां हमदरदी ऐ मैनूं.. पर मैं ज़िंमेवारी नहीं लै सकदा... माहौल करके आई ऐम सौरी..” उह कोल खड़ोते बंदे नाल हत्थ मिला के डब्बे विच वड़ गिआ।

“मामा माहौल दा” जुगल हस्सिआ ते फिर उह साडी गली दे पंडत राम चंद दे हवाले नाल गल्ल करन लग्गा, जिहड़ा अज्जकल्ल्ह अकसर कहिंदा रहिंदा सी“माहौल बड़ा ख़राब ऐ जी... एस माहौल 'च तां सोचवान बंदे दा जीणा मुशकल होइआ पिऐ... उह माहौल ई नहीं रहि गिआ, जदों लोक भरावां वांग इक दूजे दे कंम आ के गळे मिल के खुश हुंदे सनलीडरां नें, कुरसी दे भुख्खिआं नें माहौल विच ज़हिर घोल दित्ता है... कोई किसे 'ते जकीन नहीं करदा... बंदा बंदे दे लहू दा तिहाइआ फिरदा उह महौल ई नहीं रहि गिआ जी..!”

लोकां नें पंडत राम चंद दा नां 'पंडत महौल' रख्ख दित्ता सी। उह उस नूं छेड़दे, "पंडत महौल जी... इह महौल कदों बदलूगा हुण ?”

जुगल कहिण लग्गा, “इह ‘गारड महौल कित्थों आ गिआ?” उसे हवालदार नें गारड नूं आ के सूचना दित्ती, “ओ. के. सर... रैडी”

"बंदे बैठ गए तुहाडे ?”

"जी जी..", हौलदार नें सुभावक ही सलूट दे अंदाज़ विच हत्थ चुक्किआ।

गारड नें बारी 'च खड़ो के हरी बत्ती हिलाई। गड्डी नें विसल दित्ती ते फेर गड्डी हुजका मार के हिल्ली।

हुण की चारा हो सकदा सी ?

मैं फटाफट बारी नूं जा हत्थ पाइआ। गारड अग्गे खड़ोता सी।

“की करदे ओ बाऊ जी... पिछ्छे हटो..."

मैं दो कदम नाल तुरदिआं तरला लिआ, “सर पलीज़! तुहाडे हिंदू भरा आं.. तुसीं नां करो हमदरदी तां होर कौण करू तरस करो साडे 'ते" मैं महिसूस कीता, उसदे वतीरे विच थोहड़ी जिही लचक आ गई सी। मैं पाइदान 'ते पैर धरिआ ते डब्बे दे अंदर हो गिआ। मेरे पिछ्छे ही अंदर आ वड़े जुगल नूं गारड हरख के आख रिहा सी:

“वेखो ओए की करदे ओ... अकल करो कोई..”

एने चिर विच गड्डी हौळी हौळी तुर पई सी । सूटकेस वाला अध्धखड़ सरदार नाल नाल दौड़ रिहा सी ते तरले वी कर रिहा सी। गारड नें बारी रोकी होई सी।

"नहीं जी... सरदार जी..."

"रब्ब दा वासता ई.. मेरे नाल भार तां नहीं लग्गण लग्गा गड्डी नूं... तेरे बच्चे जिऊण"

पहिलां तां मैं डरदा चुप्प रिहा कि किधरे गारड सानूं वी नां उतार दवे । पर फेर मैनूं उस सरदार दी आपणे प्रती अपणत्त दा खिआल आइआ। “कोई नहीं... आपणा बंदा आ लैण दिओ.” अंदर हो के मैनूं जापदा सी जिवें मेरा वी गड्डी 'ते कोई हक्क बणदा सी ते गारड 'ते वी।

"बहुती हमदरदी ऐ तां तुसीं वी थल्ले हो जो...” गारड मेरे वल्ल मूंह करके झिड़क के पिआ । एने चिर विच सरदार उहदी बांह हेठों धौण कढ्ढ के, बदो-बदी अंदर आ वड़िआ सी।

गारड विचारगी विच कहि रिहा सी, “हद्द हो गई यार! कमाल ऐ तुहाडी... इह कोई तरीका ” उह साडे तिंनां 'ते बुड़बुड़ा सी। एने चिर विच गड्डी पलैटफारम तों अग्गे निकल चुक्की सी।

"तरीका तां इह है कि बुटारी वरगे सटेशन कोल गड्डी रोक के तुहाडे वरगिआं नूं राह 'च उतार दित्ता जावे । आपणा तां इहनां नूं है ई । नहीं, किसे दा वी कोई ख़िआल नहीं। इक्क नूं राह दित्ता तां तिंन अंदर आ वड़े लिहाज़ नूं कोई थां ई नहीं । चलो रता अग्गे... वेखदे आं.. '

उहदे 'चलो रता अग्गे.. वेखदे आं' शबदां विच बड़ी भिआनक चितावनी सी। मैनूं जापिआ जिवें उह बिआस दरिआ दे कंढे 'ते गड्डी खड़ी करेगा ते सानूं धक्के दे के हेठां उतार देवेगा। उच्चे लंमे बूझिआं विच जित्थे अत्तवादी लुके हुंदे नें जां जित्थे पुलस तों पिशाब करन दे बहाने ‘बच’ के भज्ज जांदे नें।

“कोई नहीं भापे... कोई नहीं....” जुगल नें उहदे गोडिआं नूं हत्थ लाइआ।

"ऊंह” उहने गुस्से अते नफ़रत विच सिर हिलाइआ। हरफलिआ अते घबराइआ होइआ जदों मैं थोहड़ा आपणे आप विच आइआ तां निक्के जिहे डब्बे विच चार चुफ़ेरे वेखिआ। चार जणे डब्बे विच होर सन । दो जणे तां सामान रख्खण वाली सीट विच अड़ के बैठे होए सन ते दो जणे परहे पई इक लक्कड़ दी पेटी उत्ते। उहनां विचों साडी गल्लबात विच कोई नहीं बोलिआ। शाइद उह वी साडे वरगे सन। उहनां दी चुप्प दसदी सी जिवें आपणे आप नूं कहि रहे होण:

'तूं आपणी निबेड़ तैनूं किसे नाल की?'

लौढे वेले तों ही काहळी, हफ़ड़ा दफ़ड़ी, भैअ अते सहिम दे संग-संग चल्लदे रहिण करके मेरा सिर सुंन जिहा होइआ पिआ सी। मैं डब्बे विच ले हरेक बंदे दे चिहरे वल्ल बड़े गहु नाल झाकणा शुरू कीता। सामान वाली सीट विच धौणां नीवीआं कीती बैठे दोवें हिंदू सज्जण शाइद रेलवे दे ही कोई करमचारी सन। गारड नाल उहनां दी गल्ल बात तों इहो ही परगट हुंदा। सी । परहे लक्कड़ी दी पेटी 'ते जुड़ के बैठे दो सिख्ख नौजवान सनइक्क मुछ्छ फुट्टदी ते निक्की-निक्की उत्तरदी दाहड़ी वाला पतला जिहा मुंडा, जिसदे सिर ’ते पोच के बझ्झी होई उनहाबी पग्ग सी। कालजीएटां वरगी। दूसरा उस तों पंज सत्त साल वड्डा सी। भारे जुस्से दा। सिर ’ते बझ्झी नीली पग्ग ते भरवीं खुल्ल्ही दाहड़ी। उह कोई गल्लबात नहीं सन कर रहे। इक्क दूजे नाल लग्ग के चुप्प- चाप बैठे सन।

मैनूं उहनां दी चुप्प वी साज़शी जिही जापी। इंज चुप्प कीते ही इहो जिहे लोक चीते वांग शहि ला के बैठे रहिंदे हन ते फेर योग मौका वेख के घातक हमला करन लई झपट पैंदे हन।

मैं रता होर धिआन नाल वेखिआं तां वड्डा जुआन मैनूं आपणे सकूल दे डी.पी.ई. वरगा लग्गा। उह वी मेरे वल्ल घूर घूर वेख रिहा सी। घट्टो घट्ट मैनूं तां इंज ही लग्गा सी।

उहदे चिहरे वल्ल वेखिआं मैनूं जापिआ जिवें उह कोई गल्ल करन लई अहुलदा होवे । शाइद उह हुणे आखेगा डी. पी. ई. दे बोलां विच:

“आ गई गंगू बाहमण दी औलाद काबू अज्ज बच के जाओ कित्थे जाणा जे पुत्त... हरमंदर दी वारता सीने विच रड़के... कोई नां अज्ज तक्क जित्तिआ सिंघां नाल लड़ के..."

ते मैं इकवारगी कंब ही तां गिआ, जदों उस नौजवान नें मैनूं ही उच्ची आवाज़ विच किहा, "बाऊ जी..”

मैं बच्चिआं वांग पुछ्छण दे अंदाज़ विच सिर हिलाइआ।

“ऐथे इक जणा साडे कोल आ जाओ... अड़ उड़ के बहि जांदे आं... दो जणे हाअ टरंक पिआ तुहाडे कोल उहदे 'ते बैठ जाओपैंडा वाहवा. घंटा सवा घंटा लग्ग जाणा अजे... खलोते खलोते तां थक्क जाओगे...”

इक पल तां मैनूं जापिआ, मैं ऐवें डरिआ होइआ रस्सीआं दे सप्प बणाई जा रिहा सां। उस नौजवान दे बोलां विच ली अपणत्त वेख के मैनूं शरम जिही वी आई, पर फेर वी मेरा उस कोल जाण नूं जीअ नां कीता। मैं उस अधखड़ सरदार नूं उहनां कोल जाण लई आखिआ।

"जिऊंदे रहो! जिऊंदे रहो. शावा शे” सरदार नें उहनां नाल अड़के बैठदिआं उनहाबी पग्ग वाले नौजवान दी पिठ्ठ थापड़ी।

मैं जुगल नूं टरंक उत्ते बैठण दा इशारा कीता। जुगल नें गारड वल्ल इशारा कीता जिहड़ा बारी तों बाहर संघणे हो गए हनेरे अते दूर जग रहीआं बत्तीआं नूं घूर-घूर वेख रिहा सी । मैं उसनूं बैठण लई अख्ख दब्बी। असीं बैठे ही सां कि दोवां करमचारी जापदे बंदिआं 'चों इक बोल पिआ, “वेखिउ किते भार नाल टरंक नां तोड़ दिओ..”

टरंक काफ़ी भारी अते मज़बूत सीपर उस नें साडे प्रती गारड दा रुख़ वेख के उहनूं खुश करना चाहिआगारड नें सानूं टरंक 'ते बैठिआं वेख के फिटकारन दे लहिजे विच आखिआ:

“तोड़ दिओ... तोड़ दिओ... कोई भला नां करिओ ...” जिवें अधिआपक दे दबके तों सहिम के विदिआरथी खड़े हो जांदे सन, मैं इकदम उठ्ठ के खड़ो गिआ।

“बहि जाह... बहि जाह हुण” उस नें फ़ैसला सुणाउंदिआं हत्थ हेठां नूं कीता। मैं सिखाए होए पालतू वांग फेर चुपके जिहे टरंक उत्ते बैठ गिआ। मैनूं जापिआ जिवें मैं तां चाबी वाला कोई खिडौणा सां दिल दिमाग़ तों बिनां। लहू मास तों बिनां रबड़ दी इक मशीन जिही।

इस तरहां दीआं भिआनक अते सहिम दा फ़न फैलाई सिर 'ते खड़ोतीआं रातां मेरी ज़िंदगी विच बहुत घट्ट आईआं सन । ला-पा के इक रात मेरे चेते विच उत्तर आई सी। दस कु साल पहिलां मेरी पतनी दे पेके, उहदी भैण दे विआह, रामपुर गए सां। उस दिन हैडमासटर नाल तनख़ाह कढवाउण चला गिआ सां फेर मासटरां नूं तनख़ाह वंडदिआं कवेला हो गिआ। मैनूं वी तां तनख़ाह चाहीदी सी। तनख़ाह तों बिनां विआह काहदा! जदों शहिर पहुंच के पतनी अते छोटे नीटू नूं नाल लै के बस्स 'ते चहड़िआ तां सिआली दिनां दे साढे पंज वज्ज चुक्के सन । पर उदों दिन चंगे सन। अड्डे 'ते उतरे तां सूरज काफ़ी देर दा डुब्ब चुक्का सी । रामपुर नूं जाण वाली सड़क मील कु दा फ़रक पा के किसे होर पिंड विचों दी वल पा के लंघदी सी। दूजा राह सी, एस दूजे पिंड दे खेतां विचों दी पंझी तीह किल्ले अग्गे जा के रामपुर दी ज़मीन विचों निकलदी कच्ची सड़क जो सिध्धी रामपुर दी फिरनी 'ते जा चहड़दी सी । एधर पैंडा घट्ट होण करके मैं नीटू नूं चुक्की पतनी नूं पिछ्छे आउण लई आख के खेतां विचों दी वट्टो वट्ट तुर पिआ। हनेरी रात सी। वट्टां 'ते तिलकदे, डिग्गदे असीं इक सेध विच तुरे जा सां । मेरी पतनी मेरे 'ते खिझ्झ रही सी जिस नें एना कवेला कर दित्ता सी। उहदे गल गहिणा सी। साडे कोल पैसे सनजे कोई उहो जिहा बंदा टक्कर जाए तां जाह जांदीए हो जावे। पर मैं उसनूं हौसला दे रिहा सां। मेरे मन विच सी कि साहमणे जिहड़ा बलब जग रिहा सी, उह उस बहिक दा सी, जिस दे ऐन कोलों रामपुर नूं कच्ची सड़क निकलदी सी।

जदों मैं उस बलब कोल पहुंचिआ तां उत्थे उह मकान है ही नहीं सी, जिसदे बाहरवार दो वड्डीआं किक्करां सन, जिनहां दे कोलों रामपुर नूं कच्ची सड़क शुरू हुंदी सी। इह तां बंबी दा इक्को इक्क पक्का कोठा सी, जिसदे सिर 'ते बलब जग रिहा सी। कोठे विचों गल्लां करन दी आवाज़ आ रही सी। बलब दी मध्धम रोशनी विच सलेटी धूंआं हवा विच उठ रिहा सी ते ताज़ा निकल रही शराब दी बू सारे महौल विच फ़ैली होई सी। शराबी बंदे मेरे निहत्थे दे नाल इकल्ली ज़नानी मेरे मन विच इकदम कई सैंकड़े भैड़े भैड़े खिआल आउण लग्गे। मैं कंब गिआ।

असीं राह भुल्ल गए सां । मैं पतनी दे बुल्ल्हां ते उंगलां रख्ख के उहनूं चुप्प रहिण लई किहा। दूर परहे अठ्ठ दस किल्लिआं दी वित्थ 'ते इक सज्जे हत्थ ते इक खब्बे हत्थ बलब जग रहे सन। शाइद असली बहिक उहनां विचों ही कोई होवेगी। मैं पिछ्छे बस्सां दे अड्डे वल्ल, फेर सज्जे अनुमान लगा के सोचिआ कि खब्बे हत्थ वाला बलब उस बहिक दा होवेगा।

खेतां दे वट्टे बंनिआं तों हुंदे, डिग्गदे ढहिंदे, डरे ते सहिमे असीं उस बलब दी सेध विच तुरे जा रहे सां ते आसे-पासे खुहड़क वी रख्ख रहे सां। सानूं हौली-हौली डरी आवाज़ विच गल्लां करदिआं सुण के नीटू वी डर के हटकोरे भरन लग्गा। उस बहिक ’ते पहुंचे तां उत्थे वी कोई किक्कर दा रुख्ख नज़र नहीं सी आ रिहा। असीं इह किहड़े रसते पै गए सां ? मेरी पतनी रोणहाकी हो गई। खाल विच डिग्ग पैण करके उहदे सैंडल अते पैर गारे नाल लेथू पेथ हो गए सन।

“अज्ज मैनूं खुहा के जाओगे तुसीं ” उस नें हिरख के आखिआ ते बुसकण लग्ग पई। मेरे अंदर डर ते सहिम नाल झरनाहट छिड़ गई। पर हौसला करके उस नूं आखिआ, "कमल नां कुदा...”

"एथे घर 'च वाज मार के वेखां पशू डंगर हैगे नें परिवार रहिंदा होऊ कोई..."

"नां... नां... नां... वेखिओ किते” पतनी नें चितावनी दित्ती। उह डर रही सी।

"कोई नहीं... तूं नीटू नूं फड़ ज़रा। मैं कल्ला वेख के आउंदा चिप्लां..."

मैं बाहरों आवाज़ दित्ती तां अंदरों कुत्ता भौकिआं ते नाल ही कोई अंदरों बोलिआ:

"किहड़ै बई ?”

इक तीह पैंती साल दा जुआन दुरवाज़े 'च आइआ।

"भा जी.. असल 'च गल्ल इह है कि मैं रामपुर जाणां पंडत रामनाथ दे घर.. मैं उहनां दा जुआई आं। सड़के जाण दी थां वट्टे वट्ट कच्ची सड़क दा रुख़ कर बैठा आपणी वल्लों । पर राह भुल्ल गिआ..."

"हछ्छा! उह सड़क तां औह पासे रहि गई चहड़दे वल्ल । तुसीं तां ऐधर लहिंदे नूं आ गए..." नौजवान दरवाज़े 'च ही खड़ा सी।

"वे कौण ऐं सुरजीत ?” अंदरों कोई ज़नाना आवाज़ आई। नौजवान नें मेरे बारे दस्सिआ तां पंजाह-पचवंजा साल दी इक ज़नानी विहड़े विच आ गई,“पुत्त! इहनूं अंदर लै आ राम नाथ दा जवाई की ते साडा जवाई की। पुत्तर साडा पिंड वी रामपुर ई आ.. दूर ज़मीन होण करके एथे ही आ वस्से आं। तूं वड्डी दुलारी दा प्राहुणै ?”

"नहीं जी... छोटी पारवती दा जिहड़ी शहिर विआही आ...”

"ते लंघ आ नां अंदर। वे सुरजीत! तूं तां उहदा राह रोक के खड़ा एं... पासे हो वे..."

सुरजीत हस्स के पासे हो गिआ। कोई ख़तरा नां जाण के मैं पिछ्छे आ खड़ोती पारवती नूं पहिलां अंदर लंघण लई किहा।

"लै कुड़े पारो! तेरे ताए दा घर उहने अग्गे वध के पारवती दा सिर पलोसिआ। कमलो। बाहर खलोती एं..”

उसने अग्गे वध्ध के पारवती दा सिर पलोसिआ।

ते फिर सानूं मंजिआं 'ते बिठा, पाणी गरम करके ताई करतार कौर नें पारवती दे लिब्बड़े पैर धुआए।

“हाए कमली! पुत्त सुवख्खते नहीं तुरीदा चंगा भैण दा विआह वेखण आई एं कुड़ीआं दो-चार दिन पहिलां आउंदीआ सगों कंम धंदा करन... पर भैणांतूं तां शहिरन होई हुण... तैनूं टैम काहनूं लग्गदा...” ते फेर साडे रोकदिआं-रोकदिआं वी ताई नें आपणी नूंह नूं साडे लई दुध्ध गरम करन दा आदेश दे दित्ता।

दुध्ध पिआ के उसने सुरजीत नूं साडे नाल जाण लई किहा, “मैं तां आंहदी सी पुत्त! एथे ही पए रहिंदिओपर अज्ज मेल दा दिन करके, तुहाडे नां पुज्जण 'ते मिसर हुणीं फ़िकर करनगे जाह वे सुरजीतपिंड तक्क कर आ इहनां नूं..."

सुरजीत इक्क हत्थ डांग अते इक्क हत्थ बैटरी लै के साडे कोल आण खड़ोता, “लिआ भैणां ! भणेवां साडा मैनूं चुका देह... आ उए शहिरी बाबू” उहने नीटू वल्ल हत्थ वधाए ओपरा बंदा अते डांग वाला हत्थ अग्गे वधिआ वेख नीटू डर गिआ ते मां दे मोढे नाल लग्ग गिआ।

“कोई नहीं भरा जी..." पारवती नें किहा।

“गंदू! इह डांग किते तैनूं डराउण लई थोहड़ी ऐ इह तां..." सुरजीत नें गल्ल विच ही छड्ड दित्ती।

ते फिर सुरजीत नें बैटरी जगाई ते साडे अग्गे अग्गे, वट्टां ख़ालां 'ते खलो के चानण करदा, राह विखाउंदा तुरिआ गिआ ते सानूं पिंड दी फिरनी 'ते चहड़ा के वापस मुड़िआ।

खड़क्क... धड़च्च... खड़क्क, गड्डी बिआस दे पुल उपरों दी लंघ रही सी ते उस दे खड़ाके नें मेरी सोच परताई।

"तुसीं इह बहुत गलत बात कीती ज़बरदसती गड्डी विच चहड़न वाली...” गारड फेर मैनूं मुख़ातब सी।

"मैं तुहानूं गड्डी चों उतार दिआं जां ग्रिफ़तार करवा दिआं?”

उस नें इक होर हथौड़ा सिर विच दे मारिआ। इसदी अजे कसर बाकी सी। "सर! माफ़ी दिओ, साडी मज़बूरी सी..” उहदे रुख्खे ते ख़ुशक होए। वतीरे तों जापदा सी कि उह कुझ वी कर सकदा सी।

"तुहानूं आपणी मज़बूरी दा तां अहिसास है, पर साडी दा कोई। नहीं... जे मैं फड़िआ जावां तुहानूं लिजांदा होइआ... मेरी तां नौकरी गई । नां ? फेर उत्तों दिन किहो जिहे नें ? महौल किहो जिहा ए ? ... की पता तुहाडे विचों कोई कौण है ते किस तरहां दा है... नें जाणीएं कोई उहो जिही गल्ल है जावे... मैं कीहदी मां नूं मासी आखूं ?"

उहदा आपणा तरक ठीक सी । मैं डी. पी. ई. नाल मिलदे चिहरे वाले नौजवान वल्ल वेखिआ। 'नें जाणीए, किते इह ही उहो जिहे नां होण '

मैनूं उहनां वल्ल तक्कदा वेख गारड नें शाइद समझिआ कि जिवें मैं जानणा चाह रिहा होवां कि गारड उहनां बारे किउं चुप्प सी । उहने तरक दा' पल्लड़ा सावां करना चाहिआ।

"हुण इहनां सरदारां नें गल्ल ई इहो जिही दस्सी आ कि मैं नांह नहीं कर सकिआ। इक अध्ध बंदा तां चलो होइआ" ते गारड चुप्प कर गिआ।

वड्डा नौजवान बोलिआ, “बड़ी मिहरबानी तुहाडी... असीं तुहाडे देणदार आं जी..."

फिर कुझ चिर डब्बे विच चुप्प वरती रहीगड्डी चल्लण दा खड़का मेरे ज़िहन विच खड़क रिहा सी। मैं होर वी शशोपंज विच पै गिआ सां। 'इहनां सरदारां नें भला किहो जिही गल्ल कीती होऊ? की आखिआ होऊ गारड नूं ?

गारड बाहर नूं वेख रिहा सी। साडे नाल चहड़न वाले अध्धखड़ सरदार नें हौळी जिही, पर गारड नूं सुणा के, अध्धा कोल बैठे जुआनां नूं ते अध्धा साडे वल्ल वेखदिआं किहा, “आपां नूं थोहड़ी बहुत सेवा तां करनी बणदी है। घट्टो घट्ट किराए जोगी तां...”

उसने जेब विचों दसां दा नोट कढ्ढिआ। मैं ते जुगल नें वी दस दस रुपए कढ्ढ के सरदार नूं फड़ाए । खुल्ल्ही दाहड़ी वाले नौजवान नें वीह दा नोट कढ्ढ के उस सरदार वल्ल वधाइआ।

गारड हुण साडे वल्ल वेख रिहा सी । नौजवान नूं नोट फड़ाउंदिआं वेख उसने किहा, “रहिण दिओ इहनां दे मोड़ दिओ वीह दा नोट...”

सरदार तीह रुपै फड़ाउण गारड वल्ल वधण ही लग्गा सी कि गारड नें दोहां करमचारीआं विचों इक्क नूं आखिआ, “मुरारी फड़ लै..”

मुरारी नें तीह रुपए फड़ के जेब विच पा लए। उस दी जेब विच पैसे पैंदिआं ही इक पल लई मैं तणाउ-मुकत होइआ। अख्खां मीट के निशचिंत होण दा यतन कीता । पर शक्क दी इक चंगिआड़ी मेरे अंदर धुखण लग्ग पई सी। किते इह गारड इहनां तों डरदा तां नहीं..? किते इह...? पैसे वी मोड़ दित्ते नें... उहनां नूं कहिंदा वी कुझ नहीं।

ते मैनूं लग्गा, उस नौजवान ते डी. पी. ई. दा चिहरा आपस विच घुलदा-मिलदा ते फ़ैलदा जा रिहा ते वड्डा हुंदा जा रिहा सी ते उस चिहरे नें सारे डब्बे नूं मल्ल लिआ सी । मेरे कंनां विच डी. पी. ई. दे बोल गूंजे, "साडे वी होणगे बोल-बाले कदी अकसर तां ?”

हरचरन ते दूजे सिख्ख मासटर घट्ट ही किसे नूं चुभवीं गल्ल आखदे सन। आपस विच जो मरज़ी कहिंदे रहिंदे होण, पर सांझी मेज़ 'ते सांझीआं गल्लां ई करदे सन। आपस विच तां सारे ई करदे सन। पर डी. पी. ई. वांग शरहेआम कोई घट्ट ही बोलदा सी। उस दिन कहि रिहा सी, "हुण पुलस झूठे मुकाबले बणा के नौजवानां नूं मार रही है मीर मनूं वांग, पर भा, जिउं जिउं मनूं वढ्ढदा इह दूणे चौणे होए... कानूंन ते अदालतां किधर गईआं? . पुलस ही विधान पुलस ही गवाह, पुलस ई जज्ज... पुलस ई.. जल्लाद, इह जे लोक राज ।”

उस दिन डी. पी. ई. दी ‘बोल-चाले' वाली गल्ल सुण के हिसाब मासटर नरेश मैनूं वख्खरा हो के कहिण लग्गा, "इह ऐवें पिट्टी जांदे आ... पुलस नूं, गवाहां नूं जज्जां नूं, सभ नूं तां मारी जांदे नें... इहनां नूं अदालतां 'चों तां सज़ा होणों रही फिर ... ते रही गल्ल इहनां दे बोलबालिआं दी ? ... पंजाब 'च पारटी कोई अग्गे आवे, मुख्ख मंतरी इहनां दा बणदा... राशटरपती इहनां दा सदा सैंटर विच इक दो महत्तवपूरन मनिसटरीआं इहनां कोल रहीआं। फ़ौजां 'च, पुलिस 'च वड्डे अफ़सर इहनां दे….. इहनां दी गिणती वेखो ते अहुदिआं दी प्रसैंटेज वेखो..."

उहदी गल्ल मुक्कदी नां वेख के मेरे मूंहों हस्सदिआं निकल गिआ, "हुण तां भरावा दिन रात बोल-बाला ई इहनां दा किते औह मारता.... किते औह... ठाह... ठू..."

साहमणे बैठे दोवें नौजवान चुप्प-चाप सन। छोटा तां शाइद सारे सफ़र दौरान इक अध्धी वार ही बोलिआ सी! उहनां तों कलपिआ ख़तरा मैनूं निरमूल जापिआ।

पर ख़तरा तां सिर 'ते होर आ खड़ा होइआ सी । जदों मानांवाला लंघदिआं ही गारड नें आख दित्ता

“तुहानूं असीं सटेशन ’ते नहीं उतार सकदे । उरहे उतरना पवेगा। सटेशन ते उतरदिआं साडी तुहाडी दोहां धिरां दी पुछ्छ-गिछ्छ होऊ... ऐवें किते धर लए जाओगे...”

अंम्रितसर दी जूह वड़दिआं ही गड्डी हौळी होणी शुरू हो गई। जिउं ही गड्डी जौड़े फाटक लंघ के गोलडन ऐवेनिऊ कोल पहुंची तां उसदी रफ़तार काफ़ी धीमी हो गई सी

"चल्लो जी चल्लो... उठ्ठो बाऊ जी... उतरन लई ऐह थां वधीआ पध्धरी ऐ..." भावें निंमही जिही चंन चानणी वी पसर रही सी, पर उसने सरच लाईट मार के सानूं पध्धरी पटड़ी विखाई ते छाल मारन लई किहा।

"छेती करो... छेती..."

बारी कोल सभ तों अग्गे मैं ही सांमैं बारी दा डंडा फड़ के पाइदान 'ते संभल के पैर धरिआ ते फिर जिसम संभालदा अग्गे नूं मूंह करके पटड़ी 'ते हौळी जिही उतर गिआ। दस पंदरां गज़ दी वित्थ 'ते जुगल वी उतर गिआ। थोहड़ी थोहड़ी विथ 'ते होर जणे वी उतर रहे सन। पर सानूं उहनां नूं वेखण अते उडीकण दी कोई लोड़ नहीं सी। रात नूं रेलवे लाईन दे नाल नाल चल्लणा वी कोई घट्ट ख़तरे वाली गल्ल नहीं सीऐवें कोई आख दए, "रेलवे लाईन उखेड़न लग्गे सन। गड्डी उलटाउण लग्गे सन..”

मैं जुगल नूं आखिआ, “पटड़ी तों उतर के ऐं सिध्धे डांडे मींडे हो जाईए, आबादी वल्ल....”

ते असीं तेज़-तेज़ कदमीं तुर पए। सच्ची गल्ल तां इह सी कि मैं अजे वी उहनां सिख्ख नौजवानां तों डर रिहा सीकी पता कौण सन ? भेद-भरे। रहस्समई । ... चुप्प गड़ुप्प...

तुरे जांदिआं मैं पिछ्छा भौं के वेखिआ। उह दोवें गड्डीउं उतर के पिछ्छे मुड़ के साडे वल्ल ही आ रहे सन। अधखड़ सरदार शाइद अग्गे किधरे उतरिआ सीउहनां नूं तेज़ तेज़ कदमीं आपणे वल्ल वधदिआं वेख के मेरा दिल धड़किआ। मैं जुगल नूं होर तेज़ तुरन लई किहा।

“मैनूं तां ख़तरनाक बंदे लगदे नें..."

एने चिर विच उहनां दे तेज़ कदमां दे खड़ाक नाल उहनां दे हौली हौली गल्लां करन दी आवाज़ सुणाई दित्ती।

इक कहि रिहा सी, “भज्ज के मिल पैंदे आं ।" इह आवाज़ शाइद छोटे दी सी। मेरे तां सिर तों लै के पैरां तक्क पसीना छुट गिआ । मैनूं लग्गा, हुणे भज्ज के मिंट विच उह साडी मोरीं आ चहड़नगे ते फेर इक्क छिण विच 'ठाह। ठाह!' करदीआं गोलीआं साडी पिठ्ठ वल्लों हुंदीआं, छाती चीरदीआं आर-पार हो जाणगीआं। मैं पिछों आउंदी आवाज़ वल्ल धिआन दित्ता, "नहीं, वाज मार लैंदे आं..." वड्डा नौजवान कहि रिहा सी।

डरे होए असीं आपस विच कोई गल्ल वी नहीं सां कर रहे। उहनां दे होर वी तेज़ हो जाण नाल साडी वित्थ होर वी घट गई सी । मैं जुगल नूं दौड़न वासते ही कहिण लग्गा सां कि पिछ्छों आवाज़ आई, "बाऊ जी... ।” सहिम नाल मेरे पैरां नूं जिवें ज़ंजीर ही तां वज्ज गई सी । जुगल वी खड़ो गिआ।

"तुसीं तां भज्ज ई उठ्ठे... सानूं नाल ई नहीं लिआ..." वड्डा नौजवान कहिण लग्गा, "असल 'च मेरी चाची, इहदी छोटे दी मदर दी डैत्थ अज्ज शामीं तिंन कु वजे हो गई सी। मैं इहनूं लैण गिआ सां जलंधरों। बस्स जांदिआं आउंदिआ कवेला हो गिआ। गारड विचारे नूं बेनती कीती ते उह मंन गिआ।”

मैनूं कोई गल्ल अहुड़ नहीं सी रही। मैं अजे भैअ दे शिकंजे विचों पूरी तरहां नहीं सां निकल सकिआ। “चलो तुरो...” उस नें आखिआ । मैं अजे वी डरिआ खड़ोता सां । मैनूं खड़ोता वेख वड्डा नौजवान कहिण लग्गा, “असल 'च गल्ल इह है कि असीं दोवें डरदे आं कि किते सी. आर. पी. जां पुलिस 'चों किसे नें वेख लिआ तां सानूं शकलों सिख्ख वेख के गोळी नां मार देण अज्ज कल्ल्ह बंदा मारन लग्गिआं पुछ्छगिछ्छ कौण करदा ऐ जी... तुसीं नाल होवोगे तां कोई मिलिआ वी तां तुहाडे करके साडा बचा हो जाऊगा...”

उह बोल रिहा सी ते मेरे मन विचों तणाओ अते सहिम दी धुंद हौळी हौळी दूर हुंदी जा रही सी। मेरीआं नाड़ां विच जंमिआ होइआ खून फेर पंघर के तुर पिआ सी।

मैं निसचिंत हो के उहनां दे अग्गे-अग्गे तुर पिआ ते उहनां नूं बेफ़िकर रहिण लई आखिआ।

मैं अग्गे अग्गे तुरिआ जा रिहा सां ते मैनूं जाप रिहा सी जिवें मैं सुरजीत होवां अते मेरे हत्थ विच डांग अते बैटरी फड़ी होवे।

ते मैं जिसदा सिरफ़ नां राजकुमार सी, चौथी कूट वल्ल हिक्क ताणी तुरिआ जा रिहा सां।