रुलदू नें दिहाड़ी गए नें नाल दे कामिआं दे मूंहों वड्डे वड्डे कहिंदे कहाउंदे घरां दीआं कुड़ीआं बारे सुणिआ कि किवें आपणे आप विआह करा लैंदीआं नें । उह वी घरों भज्ज के । मापिआं दी पत्त ठाणिआं च रुलदी है ते लोक जिहड़े मूंह जोड़ जोड़ गल्लां करदे नें उह वख्ख, नां किते खहड़न जोगे, नां बैठण जोगे। किहो जिही पुठ्ठी 'वा वग पई मां-पिउ, भैण-भाई सभ दा पिआर मिंटां 'च भुल्ल जांदीआं नें मर जाणीआं। रुलदू तां जिवें सुंन हो गिआ सी सुण के । उस दी आपणी धी वी सी सोलां सतारां कु सालां दी रुलदू दे दिमाग़ विच्च इक्क चिंता उभ्भर आई। जदों उह शाम नूं घर आइआ तां उस नें देखिआ गुआंढीआं दा चार पंज साल दा मुंडा गोलू उस दी धी निक्की कोल खहड़ा सी। उह बड़े पिआर नाल उस नूं कुझ कहि रही सी। जदों निक्की नें रुलदू नूं देखिआ तां फटाफट मुंडे दे हत्थ कुझ्झ फड़ाइआ। मुंडे नें आपणा हत्थ बुनैण हेठ लुको लिआ ते भज्ज गिआ।

"की लैण आइआ ती उए ?" रुलदू गोलू दी बांह फड़न लग्गिआ पर उह हत्थ नहीं आइआ।

"कुस नी बापू ऊईं खेडदा खेडदा आ गिआ।" रुलदू दी तसल्ली नां होई। पर उह चुप्प कर गिआ।

"तेरी मां कित्थे है?"

"उह तां मासी दा पता लैण गई ऐ, दस्स के तां गई ऐ तैनूं...... सत्ते नूं नाल लै गी कहिंदी तड़के सदेहां आ जूं।"

" एहनां दे पतिआं नें अड्ड मार ले.......जाण दी की लोड़ ती... फून कर के पुछ्छ लैंदी। इक्क तां ऊं चंदरा टैम आ गिआ.... दुनीआं कहिंदी ऐ घरों बाहर नां निकलो। कंम ऐ ...उह मसां मिलदै....एहनूं पता नी कदों मत्त आऊ।"

रुलदू बुड़बुड़ करदा हत्थ पैर धो के चुल्ल्हे मूहरे फट्टी ते बैठ गिआ। कुड़ी नें तिंन-चार रोटीआं 'कठ्ठीआं ही थाळी विच्च रख्ख के फड़ाईआं। पाणी दा कौला भर के कोळ रख्ख दित्ता रुलदू नें रोटीआं देख के किहा,

"मैं नी रोटी होर लैणी, तूं वी खा लै।"

"कोई नां बापू मैं फेर खा लऊं ।"

धी वल्ल देखदिआं उह सोच रिहा सी निक्की सिआणी तां बथेरी ऐ। पर की पता बुध्धी किहड़े वेले पुठ्ठे पासे घुंम जावे। पिउ नूं रोटी फड़ा के कुड़ी नें बठ्ठळ चुक्क के पौड़ी दे डंडे 'ते पैर रख्खिआ। रुलदू नूं कंबणी जिही छिड़ी।

" बापू मैं पाथीआं लिआवां कोठे ते सुक्कणीआं रख्खीआं होईआं नें।" उस नें कोई जवाब नां दित्ता। निक्की छेती ही पाथीआं लै के हेठां आ गई।

रुलदू तों सारीआं रोटीआं नहीं खाधीआं गईआं उस नें इक्क रोटी बीही विच्च बैठे कुत्ते नूं पा दित्ती।

" रोटी कुत्ते नूं काहनूं पा ती बापू..?"

" दरवेश ऐ विचारा इहने किहड़ा आखणै बी मैनूं रोटी दे दो ।" रुलदू थोहड़ा चिर बाहर ई बैठा रिहा। अज्ज उस नूं बीही विच्चों लंघदे मुंडे वी विहु वरगे लग्ग रहे सन। जे कोई उहनां दे घर वल्ल देखदा तां उस नूं हौली जिही गाल्ह कढ्ढदा ते कल्ला ही बैठा बुड़बुड़ाउंदा।

" बापू ! आह खेसी दी बुक्कल मार लै.... ठंढ हो गी।" निक्की नें खेसी फड़ाउंदिआं किहा।

" तूं कंम नबेड़ लै पहिलां...।" उह खिझ के बोलिआ।

" मैं सारे कंम नबेड़ ले ।" रुलदू नें आले दुआले देखिआ...सच्ची सारे कंम निब्बड़े होए सन। उह उठ्ठ के अंदर चला गिआ।

रुलदू नूं नींद नहीं सी आ रही। उस दे दिमाग विच्च कामिआं दीआं कहीआं गल्लां घुंम रहीआं सन। फिर निक्की नें गोलू नूं कागज़ दा टुकड़ा फड़ाइआ सी। उहदे विच्च की लिखिआ होऊ? कीहनूं भेजिआ होऊ? उस दा जीअ करदा सी कुड़ी दा गला घुट्ट देवे। बदनामी नालों तां चंगा ई ऐ मर जावे। निक्की नूं वी नींद नहीं सी आ रही। उस नें उठ्ठ के पाणी पीता ते बत्ती बुझा दित्ती।

बीही वालीआं लाईटां दा चानण दरवाज़े दीआं झीथां विच्च दी अंदर आ रिहा सी। उह मंजे ते किंनी देर बैठी रही। रुलदू थोहड़ा खंघिआ कुड़ी चुप्प करके लेट गई। वार वार पासे परतदी रही। अग्गे तां कदे नहीं सी करदी इस तरहां। कुझ्झ देर बाअद कुड़ी दी हिलजुल बंद होई। रुलदू दा मन वी टिक गिआ। थक्किआ होण करके उस दी अख्ख लग्ग गई। अध्धी कु रात नूं खड़का होइआ तां रुलदू दी अख्ख खुल्ल्ह गई। इक्क परछावां उहनां दे टरंकां वाले पासे नज़रीं पिआ। उस नें मंजे दी बाही नाल बिसतरे हेठां रख्खे गंडासे नूं हत्थ पाइआ। धिआन नाल देखण ते औरत दा आकार लग्गिआ होर नीझ नाल देखिआ तां निक्की सी। उह टरंक नूं थोहड़ा कु खोल्ह के उस विच्चों कुझ कढ्ढ रही सी ते फिर मंजे ते आ पई। रुलदू नूं सिरफ़ कागज़ां दा खड़ाक ही सुणिआ उह सुंन हो गिआ। उस तों बाअद रुलदू नहीं सुत्ता। उठ्ठ के बूहे नूं अंदरों ही जिंदा ला दित्ता ते चाबी आपणे कोल रख्ख लई। कुड़ी नें इक्क दो वार उठ्ठ के पाणी पीता। उह सवेरे थोहड़ा देर नाल उठ्ठी। उस दे उठ्ठण तों पहिलां रुलदू नें जिंदा खोल्ह दित्ता। उह सोटी चुक्क के बाहर खेतां वल्ल नूं हो तुरिआ। पता नहीं की दिमाग विच्च आइआ। रसते विच्चों ही मुड़ आइआ। घरे आ के देखिआ बूहे नूं कुंडा लग्गिआ सी कुड़ी घरे नहीं सी। रुलदू दीआं लत्तां उस दे सरीर दा भार झल्लण तों मुनकर होण लग्गीआं अख्खां अग्गे नहेरा आउण लग्गा धरती घुंमदी जापी। अख्खां बंद कर के दोवें हत्थां नाल सोटी घुट्ट के फड़ लई मत्था सोटी नाल ला के बैठ गिआ। ज़मीन फटण दी उडीक करन लग्गिआ जां शाइद दुआ वी कर रिहा सी। आपणे आप नूं लाहनतां पा रिहा सी उह किउं घरों गिआ।

"बापू की हो गिआ....ऐंह काहतों बैठ गिआ?" निक्की नें कोल नूं हो के पुछ्छिआ।

" किधर गई ती तूं ?" रुलदू थोहड़ा संभलिआ।

" आटा लैण गई ती गोलू के घरों ..आपणे है नी पिहाउण आळै।"

गोळू दा नां सुण के उस नूं कचीची जिही चहड़ी। निक्की रोटी पाणी दा आहर करन विच्च रुझ्झ गई। रुलदू अंदरों छोटी जिही मंजी चुक्क लिआइआ अते उस उत्ते ही टेढा जिहा हो के पै गिआ। फिर उठ्ठ के अंदर चला गिआ। आटे वाले पीपे विच्च हत्थ मारिआ, सच्चीं खाली सी। ऐने नूं रुलदू दी घरवाली कैलो आ गई। आउंदिआं ही रुलदू नूं बोली,

" दिहाड़ी ते नी गिआ ?"

" अज्ज चित्त नी राजी।" उह बेचैनी विच्च कदे अंदर जावे ते कदे बाहर।

"जे चित्त नी राजी दवाई लिआ...... पै जा टिक के।" कैलो नें देखिआ पाणी वाले भांडे वी खाली पए सन।

"नां पाणी भरिआ अज्ज.... इक्क दिन वग जां किते..... सारे टब्बर नूं मौज लग्ग जांदी ऐ.... कंम छड्ड छड्ड बहि जांदे नें सारे।"

"बेबे! मैं पाणी भरन जाण लग्गी ती बापू कहिंदा टूटी 'ते बाहळी भीड़ ऐ..... अजे नां जाह।" निक्की नें बालटी चुक्कदिआं किहा।

"जाह वे... अजे हैगा टैम भज्ज जा सकूल नूं। सारा दिन पैर मारदा फिरेंगा एथे। मासटर विचारे घरों लैण आउणगे नहीं तां फेर । " मुंडे दा बसता फड़ाउंदिआं किहा।

" सकूलां दा किहड़ा पता लग्गदै.... कदों बंद कर देण।" कैलो नें शाइद आपणे आप नूं आखिआ।

"रोटी तां खा लैण दे उहनूं।" रुलदू नें मुंडे वल्ल देख के किहा।

"रोटी खवा के भेजे आं एहदी मासी नें।"

कुड़ी पाणी लैण चली गई ते मुंडा सकूल। रुलदू नें मौका देख के कैलो नूं कल्ल्ह सुणीआं सारीआं गल्लां सुणा दित्तीआं।

" मैनूं पतै सारीआं गल्लां दा..... भावें पंजे उंगलां बराबर नी हुंदीआं फेर वी आपां धीआं भैणां वालिआं नूं इह गल्लां सोंहदीआं नी।"

रुलदू हैरानी नाल देख रिहा सी कि औरतां दे गल्ल पचदी तां नी हुंदी। पता नी इहने किवें पचा ली।

कैलो गुस्से वाली तां ज़रूर सी पर घर परिवार संभाल के रख्खण वाली औरत सी। कंम नूं तां हत्थां पैरां नाल ला के लै जांदी। जिंना कंम करदी ओना ही वध्ध गुस्सा आउंदा।

"तूं होर नां किसे कोले भकाई मार दीं।" उस नें रुलदू नूं ताड़ना कीती। इस तों बाअद रुलदू नें पता नहीं की किहा उह मत्था फड़ के बहि गई। इंने नूं कुड़ी पाणी लै के आ गई ते पाणी तौड़े विच्च पा दित्ता।

"लिआ फड़ा उरहां बालटी.... मैं लिआउनी आं पाणी।" उहने कुड़ी हत्थों बालटी खिच्च लई। कुड़ी दा हत्थ सूतिआ गिआ उस नें लाल होईआं उंगलां नूं झटकिआ ते मां वल्ल हैरानी नाल तक्किआ। कैलो बहुत बेचैन सी टूटी तों पाणी दी बालटी भर के लिआउण तक्क उस दे अंदर पता नहीं की घमसान मच्चिआ होइआ सी। अंदर दा फिकर चिहरे 'ते साफ़ झलक रिहा सी। उस नें रुलदू कोल जा के हौली देणे पुछ्छिआ,

"तैनूं पक्का पतै बई निक्की नें गोलू नूं कुस फड़ाइआ ती।"

"हां....... उहने बुनैण हेठां लुको लिआ अते मैनूं कागत लग्गिआ...... तैनूं किहा ती, कुड़ी नूं नां पहड़ा। अखे चार अख्खरां दी सिआणू हो जू पंज सत्त जमातां करा लैने आं। हुण सांभ लै आवदी नूं पता नीं कीहनूं पाउंदीऐ चिठ्ठीआं....।"

"जे हुण बोलिऐं सीरमे पी जूं...... पहिलां तेरे.... फिर तेरी धी दे।" रुलदू दी गल्ल पूरी होण तों पहिलां ही कैलो नें पूरे गुस्से नाल दंद करीचदिआं पर दबवीं आवाज़ 'च किहा।

कैलो नंगे पैरीं ही गोलू हुरां दे घर वल्ल तुर पई।

" हे सच्चे पातशाह! लाज रख्खीं।" असमान वल्ल देख के दोवें हत्थ जोड़े।

गोलू दी मां बिमार सी उह हौली हौली भांडे मांज रही सी ते नाले हूंगर जिही मार रही सी । कैलो विहड़े वड़दिआं ही इधर उधर देखण लग्गी। उस दीआं नज़रां गोलू नूं लभ्भ रहीआं सन।

"होर ठीक ऐं भैणे.....?" उस नें गोलू दी मां दी हालत देख के पुछ्छिआ। गोलू दी मां नें तकलीफ़ हुंदिआं वी 'हां' विच्च सिर हिला दित्ता।

"कल्ल्ह आथणे गोलू रोवे..... कहिंदा भुख्ख लग्गी ऐ.... मैथों उठ्ठिआ नी गिआ ताप चहड़िआ पिआ ती अंतां दा। फिर बाहर नूं तुर गिआ रोंदा रोंदा। बचारी निक्की नें रोटीआं कागत 'च लपेट के दे 'तीआं अंब दे 'चार नाल..... उही खा के सौं गिआ।" बोलदिआं बोलदिआं उह खंघण लग्गी। गोलू दी मां दी गल्ल सुण के कैलो दा मन शांत हो गिआ।

" कोई नां भैणे रोटी दी की गल्ल ऐ, जुआकां तों भुख्ख नी झल्ली जांदी। साडी निक्की ते उहदा पिओ वी भुख्ख नी झल्ल सकदे।" कैलो नूं गोलू बारे पुछ्छण दी ज़रूरत ही नां पई।

"भैणे तूं टीका टूका लवा लै। कंम करन नूं तां मैं निक्की नूं भेज दिंनी आं। तूं पै जा 'राम कर। इक्क तां आह नपुत्ते दी कनोना कनूना नवीं बिमारी चल्ल पी.... लोकां दीआं गल्लां सुण सुण के ई दिल बैठण लग्ग जांदै....।" कैलो काहले कदमीं आपणे घरे आ गई उस नें निक्की नूं कंम करन लई गोलू दे घरे भेज दित्ता। रुलदू अंदर बैठा दंद करीच रिहा सी। कैलो नें अंदर आ के रुलदू नूं रोटीआं देण बारे दस्स दित्ता।

" पर उहने लुकोईआं किउं... नाळे मैनूं देखण सार भजा 'ता।"

" ओहनूं पतै ...बई मेरा पिओ किसे नूं पिंडे दी जूं दे के तां राजी नी....डर गी होऊ बी तूं कलेश करेंगा फेर ।"

" टरंक किउं खोल्हिआ फेर ? "

इस गल्ल नें कैलो नूं वी थोहड़ा फिकर विच्च पा दित्ता। बिसतरिआं वाले मंजे दी खल्ल विच्च टरंक पिआ होइआ सी। कैलो बुड़बुड़ करदी पहिलां बिसतरे सुआरहे कर के रख्खण लग्गी। बिसतरे विच्चों रेता जिहा झड़िआ।

" बिसतरे तां झाड़ के रख्ख दिआ करो।" उस नें रुलदू नूं खिझदिआं आखिआ।

" तूं जिहड़ा कंम करनै उह कर पहिलां।" रुलदू वी अग्गों खिझ के पिआ।

कैलो नें कुज्जे विच्चों चाबी चुक्की टरंक नूं लग्गी जिंदी खोल्हण लग्गी। पर उह तां पहिलां ई खुल्ल्ही होई सी।

" आह देख लै.... जिंदी वी खुल्ल्ही होई ऐ।" रुलदू नूं आपणी गल्ल दा जिवें सबूत मिल गिआ होवे।

" देख के कोई मुंडा.... जिहा जा वी मिलदा एस कुड़ी दा रस्सा तां लबहेट दिंने आं ऐतकीं। "

" तूं चुप्प कर के खहड़ा रहि।"

" तूं टरंक विच्च समान देख। " दोवें इक्क दूजे नूं खिझ्झ खिझ्झ पै रहे सन।

"टरंक 'च दस्स तेरा की रख्खिआ होइआ... दो चार कप्पड़े नें.....।" टरंक फरोलदिआं कैलो बोल रही सी। पर अंदरों उह वी डरी होई सी।

" सारा समान पिऐ..... आह इक्क दो चांदी दीआं टूंमड़ीआं करा के रख्खीआं होईआं नें उह वी पईआं नें।" कैलो इक्क दम त्रभकी। टरंक खुल्ल्हा छड्ड के उस नें कुड़ी दा बिसतरा झाड़िआ भोरा चूरा जिहा झड़िआ। उस नें उंगलीआं नाल चुक्क के देखिआ। उस दे चिहरे दे हाव-भाव बदल रहे सन।

" की डरामे जे करी जानी ऐं.... दस्स तां सई की नी हैगा एहदे 'च ?"

कैलो नें टरंक विच्चों बिसकुटां दी डब्बी कढ्ढी जो आए गए वासते लुको के रख्खी होई सी। डब्बी खुल्ल्ही होई सी।

" की होइआ? " रुलदू नें काहली विच्च पुछ्छिआ।

" तूं अजे वी नी समझिआ ? निक्की नें आवदीआं रोटीआं गोलू नूं दे 'तीआं ते आप सारी रात भुख्खी .......ओ मेरिआ रब्बा एस पापी नें की कुफर तोलिआ।" कैलो उत्थे ही कंध नाल ढोअ ला के बैठ गई ते रुलदू बाहर नूं खिसक गिआ ।