‘‘संधू नूं पहिलां जहांगीर ते नूरजहां दा मकबरा दिखा लिआईए। गुरदुआरा डेरा साहिब ते शाही किले वल्ल पिछ्छों आउंदे हां’’ डा. जगतार नें अगला प्रोगराम उलीकिआ।
डराईवर नें कार उधर मोड़ लई। पता लग्गा कि जहांगीर ते नूरजहां दा मकबरा रावीओं पार शाहदरे विच सी। रावी दा नाम सुणदिआं ही मेरे अंदर इक झुणझणी आई। लाहौर दी वख्खी नाल खहि के लंघदी रावी सदीआं तों पंजाबीआं दे लोक मनां विच लिशकदी आई है। मन दीआं धुर डूंघाणां ‘चो लोक-गीत दीआं सतरां तैर के मेरे बुल्ल्हां उते आ गईआं।
उचे बुरज लाहौर दे
ते हेठ वगे दरिआ।
मैं मछली दरिआ दी
किते बगला बण के आ।
इक होर बहुत ही ख़ूबसूरत द्रिश मेरीआं अख्खां अग्गे आ के सथिर हो गिआ। लाहौर दी समुच्ची ख़ूबसूरती दो सतरां विच मच्च मच्च मघ रही सी:
सक्क मलदीआं रावी दे पत्तणां नूं
अग्ग लाउण लाहौरनां चल्लीआं नें।
मैं रुमांचित हो उठिआ सां ते विभिंन लोक गीत फुल्लां वांग मेरे चेतिआं विच तैरन लग्गे। वगदी होई रावी विच कदी गनेरीआं, कदी ‘दो फुल्ल पीले’ ते कदी कुझ होर सुट्टदी होई गोरी आपणे ढोल नूं संबोधत हुंदी है:
वगदी ए रावी
विच बूटा फलाही दा ढोला!
मैं नां जंमदी तूं
किद्दां विआही दा ढोला!
वगदी वे रावी
विच दो फुल्ल पीले ढोला!
इक फुल्ल मंगिआ
किउं पिउं दलीले ढोला!
रावीं नहीं, इह तां साडी विरासत दी धारा वगदी पई सी रावी दे रूप विच।
‘‘लै बई आ गिआ रावी दा पुल’’, अगली सीट ‘ते बैठे जगतार नें मैनूं सुचेत कीता। मैं उतसुकता नाल धौण अग्गे उलारी।
मैं वगदी होई रावी विच तरदे होए ‘पीले फुल्ल’ वेखणा चाहुंदा सां। लाहौरनां दे हुसन दी लाली दे सेक दे सनमुख्ख होणा चाहुंदा सां।
पर इह की? मेरा तां सारा उतशाह ही मारिआ गिआ। रावी तां सुक्की होई सी। चांदी रंगे कलपत वहाओ दी थां शहिर दा गंदा ते काला पाणी इक छोटे जिहे गंदे नाले दे रूप विच वहि रिहा सी ते आसे पासे फैली भखदी रेत आपणी किसमत नूं रो रही सी। मैनूं रणधीर सिंघ चंद दा शिअर चेते आइआ:
आपणा पिंड साड़न लग्गी आपणी रेत
इक दिन इह वी होणी सी दरिआवां नाल।
दूर परहे मुंडे रावी दी रेत उते क्रिकट खेड के उस दा मख़ौल उडा रहे सन।
‘‘पंजाब दे दरिआवां विच अज्ज कल्ल्ह पाणी नहीं रहि गिआ’’, मेरे कोल बैठे उमर गनी नें किहा।
‘‘लोकां दे मनां ‘चों मुक्कदी जांदी मुहब्बत वांग’’, मैं हौली जिही फुसफुसाइआ।
मैं हकीकत दे रूबरू हो के आखिआ, ‘‘इह रावी तां ख़ुदकुशी करन वालिआं दी वी कोई मदद नहीं कर सकदी होणी।’’
मैनूं रावी दे इसे पुल अते देविंदर सतिआरथी नाल जुड़ी कहाणी याद आई जिहड़ी कई साल पहिलां ख़ुद ही सतिआरथी नें आपणे विशेश अंदाज़ विच सुणाई सी।
सतिआरथी दे भर जवानी दे दिनां दी गल्ल है। उह लाहौर विच रहिंदा सी। उस दी ज़िंदगी विच उतोड़िती कुझ अजिहीआं नां-ख़ुशगवार घटनावां वापरीआं कि उह ज़िंदगी तों उकता गिआ। अजिही बदतर ज़िंदगी जिऊण नालों उस नें मर जाण नूं पहिल दित्ती ते ख़ुदकुशी करन दा इरादा बणा लिआ। ख़ुदकुशी करन लई सभ तों बिहतर तरीका इहो सी कि रावी दे पुल तों दरिआ विच छाल मार दित्ती जावे ते बस्स कंम ख़तम!
इक सवेरे, जदों लोक रावी दे पुल उपर सवेर दी सैर कर रहे सन ; सतिआरथी नें मुनासब मौका वेखिआ ते पुल ‘ते लग्गे लोहे दे जंगले उपरों हो के दरिआ विच छाल मारन लई अहुलिआ। ऐन इसे मौके, हिंदी फिलमां दी कहाणी वांग, दो नौजवानां नें लक्क तों जफ्फा मार के सतिआरथी नूं हेठां उतार लिआ।
‘‘इह की लोहड़ा मारन लग्गा साएं।’’
उनहां दे पुछ्छण उते सतिआरथी नें आपणी ख़ुदकुशी दी योजना बारे उनहां नूं दस्सिआ ‘जान लख्खीं नां हज़ारीं’ कहि के उनहां नें सतिआरथी नूं समझाइआ। पर चंगी सिख्ख-मत्त देण लई उह उस नूं नज़दीक रहिंदे किसे दानशवर बज़ुरग कोल लै गए। उह दानशवर बज़ुरग उरदू दा प्रसिध्ध शाइर डा. सर मुहंमद इकबाल सी। नौजवानां तों सतिआरथी दी सारी कहाणी सुणन उपरंत डा. इकबाल नें सतिआरथी नूं पुछ्छिआ:
‘‘हिंदू होण करके तेरा पुनर-जनम विच तां विशवास होवेगा?’’
सतिआरथी नें ‘हां’ विच सिर हिलाइआ तां डा. इकबाल नें किहा, ‘‘ख़ुदकुशी करन पिछों ते दूजा जनम लैण पिछ्छों तेरीआं तिंन हालतां हो सकदीआं नें।’’
‘‘इक तां, जिंनी भैड़ी हालत तों तंग आ के तूं ख़ुदकुशी करन लग्गा एं, तेरी एनी ई भैड़ी हालत हो सकदी है। दूजा इह वी हो सकदै कि उस जनम विच तैनूं इहो जिही ज़िंदगी नसीब होवे जो तेरी हुण वाली ज़िंदगी नालों वी बदतर होवे ते तीजा इह वी हो सकदै कि तूं उस जनम विच हुण नालों वधीआ ज़िंदगी जीवें।’’
एनी गल्ल कहि के डा. इकबाल नें हुक्के दा कश गुड़गुड़ाइआ ते मुसकराउंदिआं तिख्खीआं नज़रां नाल सतिआरथी वल्ल वेख के आखिआ, ‘‘इस सूरत विच, मरन तों बाअद वी, चंगी ज़िंदगी जिऊण दी आस इक तिहाई ही है। जे मैनूं इक बटा तिंन आस उते ख़ुदकुशी करनी होवे तां मैं तां कदी नहीं करन लग्गा! हुण तूं जे इक तिहाई आस उते ख़ुदकुशी करना चाहुंदा एं तां तेरी मरज़ी।’’
हुक्के दा कश ला के उस नें बड़े इतमीनान नाल पिछ्छे पए तकीए नाल ढोअ ला लई।
सारी गल्ल सुणा के सतिआरथी नें आपणे विलख्खण अंदाज़ विच तोड़ा झाड़िआ, ‘‘डा. इकबाल दी गल्ल सुणन तों बाअद मै सोचिआ इक बटा तिंन आस उते ख़ुदकुशी करन दा सच्चमुच कोई लाभ नहीं अते मैं ख़ुदकुशी करन दा इरादा तिआग दित्ता।’’
पुल पार करन ही वाले सां कि अग्गे खड़ोते पुलसीआं नूं वेख के जगतार नें इक होर चिंता दा प्रगटावा कीता, ‘‘आपां नूं तां सिरफ़ लाहौर विच रहिण दी इजाज़त मिली है ते रावी पार दा इह इलाका तां दूजे ज़िले शेख़ूपुरे विच पै जांदा ए।’’
गल्ल वाकिआ ही चिंता वाली सी। बिगाने मुलक विच कानूंन दी ख़िलाफ़वरज़ी ‘अंदर’ वी करवा सकदी सी। ते उथे साडा कौण वाली—वारिस सी।
पर रिज़वान अहिमद सवेर तों ही कहि रिहा सी कि उस दी गल्ल हो चुक्की है। सानूं कोई कुझ नहीं आखण लग्गा। निसचे ही उस नें किसे उपरले अधिकारी नाल गल्ल कीती होवेगी, तदे ही तां उह एने विशवास नाल कहि रिहा सी, ‘‘फिकर नां करो। मैं बैठा हां।’’
‘‘चल्ल वेखी जाऊ!’’ जगतार नें किहा ते साडी कार पुलीस दे कोलों अग्गे लंघ गई। उंज किसे वेले वी घेर के पुछ्छ गिछ्छ कीते जाण दा डर सानूं अंदरो अंदर कुतरदा ही रिहा।
सड़कां उतों धूड़ उड रही सी। लाहौर शहिर दा बाहरला इलाका ते शाहदरे दा इह इलाका फलैटीज़ होटल दे चौगिरदे नालों भिंन सी। इथे मध्ध-शेणी ते हेठली मध्ध-शे्रणी दे लोक वसदे सन। माल रोड ते माडल टाऊन ते गुलबरग वाली अमीरी ठाठ इथे नहीं सी।
असीं विशाल चारदीवारी अंदर घिरे घाह दे लाअनां विच जहांगीर दे मकबरे अंदर फिरदिआं उस समें विच उतरन दा यतन कीता। जहांगीर दी आशक-मिज़ाजी ; अनार कली ते नूरजहां दा इशक, हिंदुसतान दी बादशाहत ते जहांगीरी अदल दीआं कहाणीआं चेते आईआं। इसे ‘अदल’ दे प्रसंग विच गुरू अरजन देव दी शहीदी याद आई जिस दी ‘झूठ दी दुकान’ बंद करवाउण दी ‘चिंता’ दा ज़िकर जहांगीर दी सवै-जीवनी, ‘तुज़के जहांगीरी’ विच वी आउंदा है। संगमरमर दी सिल उते संन हिजरी 1037 विच, ‘मरकदे मुनव्वर आल्हा हज़रत गुफराना-पनाह नूर-उ-दीन मुहंमद जहांगीर बादशाह’ दे इस संसार तों कूच कर जाण दा ज़िकर दरज सी। मेरे अंदरों बाबा फरीद बोलिआ:
कोठे मंडप माड़ीआं उसारदे वी गए।
कूड़ा सौदा कर गए गोरीं जा पए।
मैनूं ‘सच्चा सौदा’ करन वाले दी पंजवीं जोत दा मोह जागिआ जिस नें गुरू ग्रंथ साहिब नूं संपादत करन समें बाबा फरीद नूं नमसकार करके उनहां दी बाणी गुरू ग्रंथ साहिब विच दरज करदिआं इह संदेश दित्ता सी कि सच्चा मुसलमान ते सच्चा हिंदू कोई अलग्ग नहीं सगों सच्ची सुच्ची इनसानीअत दा इको रूप हन ते उहनां नपीड़े लताड़े लोकां दी इक आपणी धिर है जिहड़ी धिर मनुख्खी हित पालण दा सच्चा सौदा कर रही है ते उहदा कूड़ा सौदा करन वालिआं नाल कोई वासता नहीं।
गरमी ज़ोर फड़ रही सी। डराईवर नें दस्सिआ ‘महिमानां’ करके कार पारकिंग वाले नें पैसे नहीं लए। हुण असीं नूरजहां दे मकबरे वल्ल तुरे। उच्ची लाईन तों परले पार नूरजहां दा मकबरा दिस्स रिहा सी, मसां पंजाह ग़ज़ दी वित्थ ‘ते। जगतार अते उमर गनी हुरां दी उस नूं देखण दी तांघ नहीं सी। उह तां कई वार देख चुक्के सन। जगतार नूं उंज वी साह दी तकलीफ़ सी।
उस नें मैनूं किहा कि मैं उतर के लाईनों पार जा के मकबरे ‘ते झाती मार आवां। जहांगीर दे मकबरे नालों उस विच कोई अलोकार गल्ल नहीं। मेरे मन विच सी कि ज़िआदा थकावट हो जाण दे डरों जगतार किते वापसी दा ऐलान नां कर देवे। मैं अज्ज गुरदुआरा डेहरा साहिब ज़रूर वेखणा चाहुंदा सां। अगले दिनां विच पता नहीं मौका लग्गे जा नां लग्गे। मेरे हत्थां विच शाह हुसैन दी मज़ार ‘ते साईं लोक वलों दित्ता फुल्ल पत्तीआं दा लिफ़ाफ़ा वी सी जो मैं शाह दे समकाली गुरू अरजन देव दे हज़ूर पेश करना चाहुंदा सां। गुरू ग्रंथ साहिब दे रचनहारे ते गुरू ग्रंथ साहिब दे साहमणे। भारत तक जादिआं इह फुल्ल कुमला जाणे सन ते मैं इनहां दी महिक मरन नहीं सां देणी चाहुंदा। साईं लोक अग्गे वी झूठा नहीं सां होणा चाहुंदा। गुरू ग्रंथ साहिब अग्गे ही इह फुल्ल भेटा करना चाहुंदा सां।
नूरजहां दा मकबरा मैनूं दिस्स रिहा सी ते मोहन सिंघ दी कविता वी ज़िहन ‘चों गुज़र रही सी। नूरजहां दी आपणी कबर ‘ते लिखवाइआ निरमाण शिअर वी चेते आ रिहा सी, पर मैं इह सभ कुझ मन ही मन कलप के इकल्ले नें अग्गे जाणों इनकार कर दित्ता।
वापसी उते रावी दे पुल तों गुज़रदिआं इक होर लोक बोली मेरी सुरत विच गूंजी :
रावी किनारे घुग्गीआं दा जोड़ा
इक घुग्गी उडगी पै गिआ विछोड़ा
उड्ड गई घुग्गी मैं ते जगतार सां, पिछ्छे रही घुग्गी उमर गनी ते रिज़वान सन। उड्ड गई घुग्गी सतिआरथी, पिछ्छे रही घुग्गी डा. इकबाल। उड्ड गई घुग्गी माधो लाल, पिछ्छे रही घुग्गी शाह हुसैन। उड्ड गई घुग्गी बाबा नानक, पिछ्छे रही घुग्गी बाबा फ़रीद। काश! रावी वगदी रहे, मोह मुहब्बत नाल भरी ते विछड़ीआं घुग्गीआं दा कदे मेल हो सके!
गुरदुआरा डेहरा साहिब पहुंच के असीं वेखिआ गुरदुआरे दे बाहर अते अंदर नीलीआं, पीलीआं, लाल ते चिट्टीआं दसतारां इक भीड़ दे रूप विच नज़र आ रहीआं सन। जिवें अंम्रितसर ते तरन तारन विच दीवाली, विसाखी जां मस्सिआ दे मेले उते घुंम रहे होईए। असल विच पंजा साहिब दी विसाखी मनाउण लई श्रोमणी गुरदुआरा प्रबंधक कमेटी दुआरा भेजिआ जथा ‘पंजा साहिब’ दे दरशनां उपरंत लाहौर पहुंच चुक्का सी ते कल्ल्ह तों गुरदुआरा डेरा साहिब विच उतारे कीते होए सन। जथे दी रिहाइश लई लोड़ींदा प्रबंध नां होण करके गुरदुआरे नाल लग्गदी गराऊंड विच टैंट अते कनातां ला के छोटे छोटे कमरे जिहे बणाए होए सन जिनहां विच जथे दे लोक आपो आपणे साथ विच ठहिरे होए सन।
लाऊड सपीकर ‘ते टेप रिकारडर विचों बोलदे कवीशरी जथे दी उच्ची आवाज़ लाहौर दे बाज़ारां विच दूर ताईं गूंज रही सी। सिंघां नें लाहौर नूं आनंदपुर साहिब बणाइआ होइआ सी।
गुरदुआरे तों वीह पंझी फुट्ट दी वित्थ उते सी लाहौर दा शाही किला। इक छोटी जिही सड़क सी दोहां दरमिआन। शाही किले दी विशाल इमारत दे साहमणे गुरदुआरा बहुत छोटा जिहा लग्ग रिहा सी। मैं डा. जगतार नाल गल्ल कीती तां उस नें हामी भरदिआं नाल ही जहांगीर दे मकबरे उते मेरेे वलों आखी बाबा फरीद दी ‘कूड़ा सौदा कर गए गोरीं जा पए’ वाली गल्ल दुहराई ते नाल ही फ़रीद दे ख़िआलां दे पैरोकार मुसलमान साईं सूफी फकीर हज़रत बाहू दा कलाम चेते करदिआं गुरू अरजन देव नूं नमसकार कीती :
नाम फ़कीर तिनहां दा बाहू
कबर जिनहां दी जीवे हू
शहीद हो के वी गुरू अरजन देव जिउंदे हन। उनहां जिहे होर महांपुरशां दे उरस ‘ते बरसीआं मनाईआं जांदीआं सन। हज़ारां दीआं भीड़ां जुड़दीआं सन। की जहांगीर दी याद वी इंज ही मनाई जांदी सी?
असीं गुरदुआरे दे अंदर जाण लई वधे तां बाहर खलोते पाकि-पुलीस दे चिट कप्पड़ीए सिपाहीआं नें उमरगनी ते रिज़वान नूं रोक लिआ। उह अंदर नहीं सन जा सकदे। मैं सोचिआ रिज़वान ‘उते होई गल्ल’ उनहां नाल सांझी करेगा पर उह इक पासे छित्था जिहा हो के खलो गिआ। उनहां दे रोके जाण वाली गल्ल सानूं चंगी नां लग्गी। गुरू घर तां सभ दा दाख़ला परवान सी पर अगलिआं मुताबक कोई ‘गलत अनसर’ अंदर जा के गड़बड़ कर सकदा सी।
असी हुणे ही मत्था टेक के वापस परतण दा धरवास दे के छोटी जिही डिऊड़ी दे बाहर जुत्तीआं उतारीआं ते गुरदुआरे दे निक्के जिहे सिहन विच दाख़ल होए। गुरदुआरे विच पाठ हो रिहा सी। संगतां बिराजमान सन। मैं मत्था टेकिआ ते शाह हुसैन दी मज़ार उते साईं वलों भेट कीतीआं गुलाब दीआं फुल्ल-पत्तीआं वाला लिफ़ाफ़ा गुरू ग्रंथ साहिब दे साहमणे मूधा कर दित्ता। गुलाब दे फुल्लां दी मिठ्ठी ख़ुशबो माहौल विच फैली। मैनूं लग्गा शाह हुसैन ते गुरू अरजन देव इक दूजे दी संगत विच इकठ्ठे बैठ के बचन बिलास कर रहे होण ‘ते चुफ़ेरे उनहां दे बोलां दी सुगंधी पसर गई होवे।
गुरदुआरे दे पिछले दरवाज़े विचों निकल के असीं अंदर गए। ख़ालिसतानी जथेबंदीआं ‘दल ख़ालसा’, ‘ख़ालिसतान कमांडो फोरस’ ते ‘बब्बर ख़ालसा’ आदि दे बैनर लग्गे होए सन। इनहां जथेबंदीआं ‘चों ही किसे इक वलों मिठ्ठे पाणी दी छबील लग्गी होई सी।
‘‘इत्थे गुरदुआरे विच उनहां दे बंदे पक्के तौर ‘ते रहिंदे वी नें।’’ जगतार नें आखिआ। जिनहां कमरिआं विच उनहां दी रिहाइश दा अंदेशा जगतार नूं सी, उनहां कमरिआं विच इस वेले श्रोमणी कमेटी दे अधिकारी बैठे होए सन। शाइद इह कमरे उनहां नूं अलाट होए सन।
उंज दल ख़ालसा दा गजिंदर सिंघ ते उस दे दो तिंन होर साथी रोज़ ही कानफ़रंस विच हाज़र हुंदे ते किसे नां किसे नुक्कर विच खलोते जा लौबी विच बैठे आपणी ‘चोण’ दे बंदिआं नाल गल्लबात कर रहे हुंदे। सैशन ख़तम होण उपरंत जाणू बंदिआं दे राहीं आम डैलीगेटां नाल वी हत्थ मिलाउंदे हाल-चाल पुछ्छ रहे हुंदे। इक दिन लाअन विच खड़ोती भीड़ विच मैं वी उनहां दे कोल जिहे करके ही खड़ोता सां। इक जणे नें किसे डैलीगेट नाल जाण पछाण करवाउण लई जदों गजिंदर सिंघ नाल खड़ोते इक नौजवान बारे कुझ दस्सणा चाहिआ तां उस नौजवान नें आपणी पछाण लुकाई रख्खण लई विचोले नूं अख्ख नप्पी। पर गजिंदर सिंघ बारे तां मैनूं वी पता सी। उह भारती हवाई जहाज़ अगवा करके पाकिसतान लै जाण वाले टोले दा आगू सी। हाई जैकिंग दी निसचित सज़ा भुगतण पिछों अज्ज कल्ल्ह पाकिसतान विच ही रहि रिहा सी।
दरमिआने कद्द वाले गजिंदर सिंघ नें कोका कोला रंग दी नोकदार पग्ग सवार के बध्धी होई सी। फिक्के मध्धम रंग दी कमीज़ ते नसवारी जिही पैंट। गोरा रंग, तिख्खे नकश। खुल्ल्ही दाहड़ी चिट्टी हो चल्ली सी। मैं जदों वी वेखदा उह चुप्प-चाप गंभीर मुदरा ‘च खलोता हुंदा। घट्ट गल्ल करदा जापदा। भीड़ विच इधर-उधर तुरिआ फिरदा। पीली पग्ग ते भारी खुल्ले दाहड़े वाला उस दा इक साथी ते उह नौजवान अकसर हस्स हस्स के दूजिआं नाल गल्लां करदे नज़र आउंदे। पर गजिंदर सिंघ दे चिहरे ‘ते मैनूं अजिहा हासा नज़र नहीं सी आउंदा। कदी कदी मेरे मन विच वी आउंदा कि ‘दल खालसा’ दे इस आगू नाल गल्लबात करके उस दे मन दी अवसथा जाणां पर फिर आप ही संकोच कर जांदा। हो सकदै कोई भारती गुपतचर इह मिलणीआं नोट कर रिहा होवे जां गजिंदर सिंघ ही मेरे नाल दिल दी गल्ल करनी मुनासब नां समझदा होवे। उंज उथे वसदे पहड़े लिखे पंजाबीआं विच वी उहदी चंगी जाण-पछाण सी। लाअन विच खड़ोते गजिंदर सिंघ नूं गल नाल ला के अफज़ल अहिसन रंधावा नूं इह कहिंदिआं मैं आप कंनीं सुणिआ ‘‘तूं तां साडा शेर ऐं… शेर…।’’
पिछ्छे खलोता इलिआस घुंमण कहि रिहा सी, ‘‘किउं नहीं। किउं नहीं।’’ इस लई कोई वड्डी गल्ल नहीं जे किसे पाकिसतानी शाइर नें साडे लोकां दे दस्सण मुताबक मुशाइरे विच इह कविता पहड़ दित्ती होवे। ‘‘गजिंदर सिंघ! असीं तेरे नाल हां।’’ मैं इह कविता सुणन तों पहिलां ही मुशाइरे विचों उठ आइआ सां। पर इस विच तां कोई शक्क नहीं सी कि पाकिसतान दी सरकार ते उथों दे बहुते लोकां दा नज़रीआ गजिंदर सिंघ दे नाल ही सी। उह सभ रल के ‘ख़ालिसतान’ दे अंगूर डिग्गण दी उडीक विच सन।
जगतार कहिण लग्गा, ‘‘वरिआम! ऐह नाल ही पौड़ीआं चहड़ के देख आ। महाराजा रणजीत सिंघ दी समाध है। मैथों तां चहड़िआ नहीं जांदा। नाले मैं चाहुंनां तूं कोई चीज़ वेखणों रहि नां जावें।’’
गुरदुआरे दे नाल ही लग्गदीआं पौड़ीआं चहड़ के मैं उपर गिआ। जथे नाल आए बहुत सारे लोक समाध दुआले बणी परिकरमा विच लेटे होए सन। विचकार उच्चा थहड़ा है, समाधी दे रूप विच। इथे पंजाब दा महाराजा सदा दी नींद सुत्ता पिआ है। मैनूं आपणे इलाके दे सवरगवासी ढाडी पिआरा सिंघ पंछी दी कविता याद आई। शाइर सुपने विच महाराजा रणजीत सिंघ दी समाध उते जांदा है तां महाराजे दी महड़ी उस नूं सुआल करदी है :
‘‘कहिंदी खालसा, धरम
नहीं इह सिख्ख दा,
धोखा देणा मित्तरां नूं
तुसीं आप तां आज़ाद हो के बैठ गए
मैनूं छड्ड गैरां गोचरा
राज करूगा जहान उते खालसा
उच्ची उच्ची नाअरे लाउंदे जे।’’
रणजीत सिंघ दे राज गवाचण दा झोरा सदा ही पंजाबीआं नूं सताउंदा रिहा है।
हेठां आइआ तां जगतार नें दस्सिआ, कि औह साहमणा दरवाज़ा हज़ूरी बाग़ दा प्रवेश दुआर है।
‘‘की इह उह दरवाज़ा तां नहीं जिस दा छज्जा डेग के कंवर नौनिहाल सिंघ नूं मरवाइआ गिआ सी?’’
‘‘हां! इही है।’’
इतिहासकारां अनुसार महाराजा रणजीत सिंघ तों पिछ्छों उस दा पोतरा कंवर नौ निहाल सिंघ ही इस योगता दा मालक सी जो पंजाब दी वागडोर संभाल सकदा सी। पर धिआन सिंघ डोगरे दी बदनीती नें उस दी जान लै लई। जदों उह आपणे पिता खड़क सिंघ दा ससकार करके परत रिहा सी ते ऐन जदों किल्हे दे इस साहमणे दरवाज़े विचों गुज़र रिहा सी तां पहिलां ही निसचित साज़िशी योजना तहित बारूद भरिआ इस दरवाज़े दा छज्जा कंवर नौनिहाल सिंघ ‘ते सुट्ट दित्ता गिआ।
‘सिख्ख राज किवें गिआ’ सुणाउंदा, सोहण सिंघ सीतल पुकारिआ, ‘‘किल्हे दे दरवाज़े दा उह छज्जा उस दिन कंवर नौनिहाल सिंघ ‘ते नहीं डिग्गा सगों पंजाब दी किसमत ‘ते डिग्गा सी। उस समें पंजाब दा होणहार वारिस उस कोलों खोह लिआ गिआ सी ते समु्ुचा पंजाब साज़िशां दे हवाले हो के रहि गिआ।’’
छज्जा डिगिआ किसमत पंजाब दी ‘ते
फट्टड़ महाराजा नौनिहाल होइआ।
बेड़ी डुब्बी वज़ीर धिआन सिंघ दी
लागू जान दा जिहड़ा चंडाल होइआ।
मैं कलपना विच डिगदे छज्जे, खिलरदीआं इट्टां ते उड्डदी धूड़ नूं वेखिआ ते धूड़-मिट्टी ‘च ज़मीन ‘ते डिग्गा कंवर नौनिहाल तक्किआ।
‘‘चल्ल चल्लीए! आपणे बंदे बाहर उडीक रहे नें।’’
जगतार नें याद दुआइआ।
मत्था टेकिआ ते असीं बाहर आ गए।
साडे साथी कंध दी छां दी ओट विच खलोते सानूं उडीक रहे सन। मैनूं गुस्सा आइआ कि पुलिस नें साडे बंदे तां रोक लए गए सन पर कई मुसलमान अंदर फिर तुर रहे सन जिनहां बारे दस्सिआ गिआ कि उह जथे दे बंदिआं वलों लिआंदीआं चीज़ां वसतां बारे सौदे वी करदे फिरदे सन।
पर साडा की ज़ोर सी! ज़ोर तां ‘ज़ोर’ वाले रिज़वान दा नहीं सी चल्लिआ।
सिखर दुपहिर सिर ‘ते सी। डा. जगतार थक्क गिआ सी। गुरदुआरे दी सड़क लंघ के असीं अंदरवार होए। खब्बे हत्थ किल्हे दी विशाल इमारत सी। सज्जे हत्थ पारक तों पार सी विशाल जामा मसजिद ते उहदे पैरां विच डा. इकबाल दा मकबरा।
‘‘इह सभो कुझ नूं अज्ज बाहरो-बाहर झाती मार लै, अंदरों इनहां नूं कल्ल्ह वेखांगे।’’
असीं जगतार दे फ़ैसले नाल सहिमत सां। वापस परत रहे सां तां मैं किल्हे वल्ल इशारा करके किहा, ‘‘किल्हे दी ऐस कंध उतों ही भाई बिधी चंद नें घोड़े दी छाल दरिआ विच मरवाई सी?’’
उदों रावी दरिआ किल्हे दे नालो-नाल वगदा हुंदा सी। तत्ती लोह ‘ते बैठण ते सिर विच सड़दी-बलदी रेत पवाउण उपरंत एथे ही गुरू अरजन देव जी रावी दे पाणीआं विच इशनान करके जोती-जोत समाए सन।
इहो जिहे असहि ते अकहि दुख्ख सहिण दी इतिहासक उदाहरण काइम करन पिछ्छों ही गुरू घर नें मीरी-पीरी दीआं तलवारां पहिनण दा फ़ैसला कीता सी ते मीरी-पीरी दे मालक गुरू हरिगोबिंद नूं भेटा करन लिआंदे घोड़े शाहजहां दीआं फ़ौजां नें खोह लए सन। इहो घोड़े ही सुर सिंघीआ, मेरा वडेरा गराईं, इक वार घाही बण के ते दूजी वार नजूमी बण के इसे किल्हे विचों उडा के लै गिआ सी अते गुरू दे हज़ूर जा अरपण कीते सन।
बड़ा अजीब इतफ़ाक सी। मैं भाई बिधी चंद बारे सोच ही रिहा सां कि मेरे साहमणे सड़क ‘ते तुरे आउंदे मेरे ही पिंड दे पंज-छे जुआनां दा इक टोला सानूं अग्गों टक्कर गिआ। उनहां विचों बहुते सुर सिंघ हाई सकूल विच मेरे पहड़ाउण समें दे विदिआरथी सन। उह मेरे गोडिआं नूं सतिकार वजों हत्थ ला रहे सन। निहंगी बाणे ते नीले चोले वाला इक नौजवान मेरे गोडिआं वल्ल झुकिआ तां मैं उहनूं गल नाल ला लिआ। इह सुखदेव सिंघ सी, मेरा रहि चुक्का विदिआरथी ते भाई बिधी चंद दी गिआरहवीं अंस दा चशमो-चिराग़। दसवीं थां गद्दी ‘ते बैठे बाबा दइआ सिंघ दे वड्डे भरा दा पोतरा।
मैं हस्स के आखिआ, ‘‘ऐहनां सड़कां ‘ते ही आपणा बाबा कदी घाही बण के घाह वेचदा रिहा होणै। ते आह ई किल्हा जिस ‘चों आपणे बाबे नें घोड़े भजाए सन।’’
इक पल लई लग्गा जिवें असीं सुर सिंघ विखे भाई बिधी चंद दी याद विच लग्गदे भादरों दे मेले ‘ते इकठ्ठे होए होईए ते कोई ढाडी बिधी चंद दे घोड़िआं दा प्रसंग सुणा रिहा होवे।
साहमणे आण खड़ोती कार नें चेता कराइआ कि असीं सुर सिंघ विच नहीं लाहौर विच हां। ते लाहौर आपणा हो के वी हुण आपणी नहीं। असीं तां इथे महिमान सां, केवल कुझ दिनां लई। असीं कानफ़रंस ‘ते आए सां ते सुखदेव हुरीं जथे नाल।…कुझ दिनां तक लाहौर छड्ड जाण ते आपणे मुलक परत जाण लई।
नां किल्हा साडा सी, नां लाहौर साडा सी‥पर गुरू तां साडा सी, शाह हुसैन ते फ़रीद तां साडे सन। रावी सुक्क चुक्की सी पर सुक्क के वी ‘वगदी’ पई सी। घुग्गीआं दा जोड़ा बेशक्क विछड़ गिआ सी पर रावी विच ‘दो फुल्ल पीले’ ‘सूफ़ी मत ते गुरमत’ तरदे पए सन।
मैं तुरदिआं मन ही मन इहनां पीले फुल्लां ते मुहब्बत दी वगदी रावी नूं फिर नमसकार कीती।