“तुसीं वीर जी ऐनीआं किताबां पहड़ीआं … … ऐना गिआन भंडार थोडे अंदर ऐ … … तुसीं लिखदे किउं नी?” मैं आखिआ।

“मैं सोचदा आं कि लोकां नें बहुत वधीआ, बा-कमाल लिखिआ ऐ। जे उहनां दीआं लिखतां नूं सांभ के इक्क थां कर देईए, पाठक सौखे तरीके नाल पहड़ लैण … इह वी वधीआ कंम ऐ।” वीर जी नें आखिआ।

इक्क वार किसे चैनल वालिआं उहनां दी इंटरविऊ लैणी सी, वीर जी आखण लग्गे, “मैनूं समझ नी लगदी मैं इंटरविऊ किवें दिआंगा, आपां तां आम जिहीआं गल्लां कर सकदे आं। जे किसे नाल विचारक मत्तभेद होण तां गुस्सा वी आ जांदा ऐ। हस्सण वालीआं गल्लां ’ते हस्सदे वी खुल्ल्ह के आं। उत्थे फिर बुरा नां लग्गू?”

वीर जी साडी राए जाणना चाहुंदे सन। असीं चुप्प सां। पर हासा आ रिहा सी, जिवें छेवीं सत्तवीं वाले निआणे प्रैकटीकल देण वेले करदे हुंदे नें।

“मैनूं तां इह नी पता लगदा उह मैनूं की पुछ्छ लैण?” उह जमहां बच्चिआं वांग गल्लां कर रहे सी।

“हाए रब्बा, कमाल दी गल्ल ऐ, तुसीं ऐना वड्डा कंम कर रहे ओ, किंनीआं सारीआं किताबां हत्थ नाल टाईप कर के आपणी साईट ’ते सांभीआं नें, जिंनी जाणकारी थोनूं है, उह कल्ल्ह दे जंमे पत्तरकारां नूं कित्थे होऊ? उह तां आप थोडे कोलों सिख्ख के जाणगे।” मैं आखिआ।

पिछले गिआरां बारां सालां तों वीर जी आपणी साईट पंजाबी-कविता डौट कौम (Punjabi-kavita.com) ’ते पंजाबी साहित सांभ के रख्ख रहे हन, इक्क सिआणे सुलझे दूरअंदेशी विदवान वांग। इक्क वार उहनां आखिआ, “मैं गूगल ’ते सरच मारी, धनी राम चात्रिक साबह दी सिरफ़ इक्क कविता लभ्भी मैनूं।”

इह गल्ल सुण के बड़ा अजीब जिहा लग्गिआ कि ऐनीआं साहित सभावां बणीआं होईआं नें, मां बोली ’ते समागम हुंदे नें, मां बोली नूं किवें बचाइआ जावे, इस गल्ल ’ते विचारां हुंदीआं नें पर ऐडे कमाल दे कवी दी सिरफ़ इक्क कविता लभ्भी। फिर सारे मां बोली नूं बचाउण लई कर की रहे हन? विचार चरचावां करना चंगी गल्ल है, साहित दी रचना वी ज़रूरी है पर ओना ही ज़रूरी है विरासत नूं सांभणा। चात्रिक साबह हुरीं साडे वड्डे वडेरे हन, जिहड़े सानूं कमाल दा साहित विरसे विच्च दे गए। उस विरसे नूं संभालणा साडा नैतिक फरज़ है। - मैं सोच रही सी।

इस तों बाअद वीर जी वीह वीह साल पुराणीआं सिलेबस विच्च लग्गीआं किताबां फरोल के, ऐधरों ओधरों हत्थ पैर मार के जिउं लग्गे उहनां दीआं रचनावां टाईप कर कर के रख्खण, चंदनवाड़ी, केसर किआरी, नवां जहान, सूफ़ीख़ाना अते लाला धनी राम चात्रिक दी मिली जुली कविता सिरलेख हेठ उनहां आपणी साईट ’ते आपणे विरसे नूं संभाल लिआ। जे हुण देखिआ जावे तां उ तों व तक तरतीब दे के सैंकड़े साहितकारां दी रचनावां नूं उनहां बड़े सुलझे अते सुचज्जे तरीके नाल रख्खिआ होइआ है।

वीर जी जदों वी रचनावां साईट ’ते रख्खदे हन फिर उहनां नूं दिन रात दा कोई फ़रक नहीं पैंदा। कई वार रात नूं इक्क वजे वी उहनां दे कमरे दी जगदी लाईट तों पता लग्ग जांदा है कि उह आपणे कंम नूं किंनी शिद्दत नाल सिरे चहड़ाउंदे हन। उहनां नूं पता है कि हर दिन दी सारथक वरतों किवें करनी है। जे किते सरदा होवे तां रिशतेदारी विच्च जाण लग्गिआं परिवार नूं आख देणगे, “तुसीं जा आओ, मैं पिछ्छों आपणा कंम कर लवांगा।”

हुण कोई वी गूगल ’ते वेखे तां इस तरहां महिसूस हुंदा है कि भटकणा ख़तम हो गई। इस साईट तों ही बड़ा कुझ मिल जांदा है। कहाणीकार जसवीर सिंघ राणा नें इक्क वार आखिआ सी, “करमजीत सिंघ गठवाला नें साहित दा यग्ग लाइआ होइआ है … …।” उस समें तां मैं बहुती गंभीरता नाल नहीं लई उहनां दी कही गल्ल। सोचिआ कि हरेक लेखक दा आपणा अंदाज़ हुंदा है तारीफ़ करन दा पर अज्ज जदों मैं लिखण बैठी तां महिसूस होइआ कि किंना सच्च सी उहनां दे कहिण विच्च, सच्चीं यग्ग ही तां है इह। इत्थे बंदे दी रूहानी भुख्ख शांत हुंदी है, साहित बारे जाणन दी इछ्छा त्रिपत हुंदी है। इस यग्ग विच्च हर साहितकार नूं आपणा योगदान पाउण दी पूरी खुल्ल्ह है। योगदान तों मतलब कोई वी चंगे साहित नूं पिआर करन वाला उहनां कवीआं, लेखकां दीआं रचनावां भेज सकदा है, जिहनां नें कमाल दा साहित लिखिआ है, भावें उह छपे हन जां किते छपे नहीं। पर अफसोस इस तरहां दी निसुआरथ सेवा करन वाले इक्का दुक्का ही होणगे। इह नहीं कि कोशिश नहीं हो रही, कोशिशां हो रहीआं नें पर सौखे तरीके नाल पाठकां तक साहित नहीं पहुंच रिहा।

थोहड़े साल पहिलां मेरे वरगिआं नें वी जदों गूगल ते कुझ वी खोजणा हुंदा तां पता नहीं किंनी वार कलिक्क करदे पर विशे संबंधी पंज चार सतरां ही लभ्भदीआं जां फिर अगले तुहाडी पछाण मंग लैंदे। कोई बहुती जाणकारी वी नहीं सी हुंदी ते निराश जिहे हो के उत्थों ही वापस मुड़ आउणा। इही सोचणा कि आपणी पछाण दे के होर ई नां मुसीबत सहेड़ लईए।

वीर जी हुरां दी कोशिश हुंदी है कि पाठकां तक सौखे तरीके नाल साहित किवें पहुंचे। जदों वी उहनां नूं कोई नवीं तकनीक बारे कितों पता लगदा है तां उह पाठकां दी पहुंच नूं होर सुखाला बणा दिंदे हन। किंने खोज करन वाले विदिआरथी, किंने ही लेखक आपणी लेखणी नूं, भाशणकार आपणे भाशण नूं प्रभावशाली बणाउण लई उहनां दी साईट तों मदद लैंदे हन। कई वार मदद लैण वाले साईट दा ज़िकर वी कर दिंदे हन। कई ज़िकर करना ज़रूरी नहीं समझदे। ख़ैर हरेक दा आपणा आपणा सुभाअ हुंदा। जिंना वीर जी नें कंम कीता है, उस नूं थोहड़े कु शबदां विच्च समेटणा बहुत औखा है। इस लई अजे बस्स इंना ही।