ऐतवार, पंदरां अपरैल, कानफ़रंस दा तीसरा दिन सी। असीं कानफ़रंस ‘चों घुसाई मारन दा फ़ैसला कर लिआ।
डा. जगतार दे मित्तर उमर गनी दी जहाज़ जिड्डी कार सी। पेंडू पहिरावे वाले डराईवर नाल अगली सीट उते डा. जगतार बैठा सी, पिछ्छे उमर गनी, ‘रवेल’ दा नौजवान ऐडीटर रिज़वान अहिमद ते मैं। किसे बैंकिंग अदारे विचों बहुत वड्डे अहुदे तों रिटाइर होइआ उमर गनी पाकपटन तों जगतार दे बुलावे उते उचेचा इथे आइआ सी सानूं लाहौर दी सैर कराउण। साडे पासपोरट उत्ते ‘सिरफ लाहौर’ लिखिआ होण करके सरकारी तौर ‘ते सानूं लाहौर तों बाहर जाण दी आगिआ नहीं सी। फौजी हकूमत सी ते दोवां देशां दे सबंध वी अणसुखावें सन, इस लई चाह के वी पाकपटन नां जा सकण ‘ते पंजाबी दे पहिले महान शाइर बाबा फ़रीद दे नतमसतक नां हो सकण दा विगोचा सानूं दुखी कर रिहा सी।
‘‘अछ्छा, जदों मेरे बाबे दी मरज़ी होई उहने आपे बुला लैणै आपणे कोल,’’ डा. जगतार नें इक तरहां हउका लिआ।
‘‘चलो वरिआम नूं इथे वाले बाबे नूं तां मिलाईए।’’
कार दा रुख़ उस इलाके वल्ल हो गिआ जिथे महान सूफी शाइर शाह हुसैन दा मज़ार है। डा. जगतार नें तां लाहौर अनेकां वार वेखिआ सी ते सारीआं दरशनी थावां वी। उह मेरी अगवाई करके मैनूं इमारतां तों पार जा के इतिहास विच लुकिआ लाहौर वी दिखाउणा चाहुंदा सी।
‘‘पहिला शालामार बाग़ वी विखा लईए इहनूं, नाल ही पैंदा एथे।’’
सबंधित इलाके विच वड़दिआं ही जगतार दी हदाइत दी पालणा करदिआं डराईवर नें गड्डी शालामार बाग़ दे बाहरवार खहड़ी कर दित्ती।
अंदर दाख़ल हुंदिआं ही उस विशाल बाग़ विच दूर तक झाती मार के पुर-सकून साह लिआ। इमारतां ते बाग़ां दा सिरजणहार शहिनशाह शाहजहान चेते आइआ। गुरबख़श सिंघ प्रीत लड़ी दा लेख ‘शालामार बाग़ विच डेलीआ’ ते इस बाग़ नाल जुड़िआ होर बहुत कुझ चेते ‘चों लंघिआ। लाहौर टी.वी. तों कई वार इस बाग़ बारे वेखी होई दसतावेज़ी फिलम याद आई ते डरामिआं विच लए इस बाग़ दे द्रिश वी याद आए ; आपणे पिंड दे ग़दरी प्रेम सिंघ दा शालामार बाग़ विच लग्गे मेले समें ग़दरीआं दे दुशमण इक थाणेदार उते बंब सुट्टणा वी चेते ‘चों लंघिआ।
तां इह है लाहौर दा शालामार बाग़। असीं बाग़ दा चक्कर लाउण लग्गे। साडीआं पग्गां देख के दो लड़के दूरों उचेचे चल के साडे वल्ल आए। दस गिआरां साल दी उमर होवेगी। शाइद ऐतवार दी छुट्टी मानण ते मटरगशती करन लई बाग़ विच चले आए होणगे। जगतार ते मैं उनहां दा हाल-चाल पुछ्छिआ। उनहां मुसकरा के, ‘‘ठीक है, बहुत वधीआ है,’’ आखिआ ते साडे नाल नाल ही तुर पए।
असीं आपणीआं गल्लां विच रुझ्झ गए। पर उह छोटे बच्चे धौणां टेढीआं ते उचीआं करके साडे मूंहां वल्ल वेखदे जिवें साडे मूंहों किर रहे बोलां नूं बोच लैणा चाहुंदे होण। उह मेरे सज्जे हत्थ मेरे नाल नाल सन ते मैं उनहां दे चिहरिआं दे हाव-भाव जानण दी कोशिश कर रिहा सी।
‘‘बेलीओ! तुहाडा नां की है?’’ मैं रुक के उनहां नूं पुछ्छिआ। इक नें बड़े उतशाह नाल दस्सिआ, ‘‘मेरा नां आमिर है ते इहदा अदनान।’’
उनहां दे चिहरिआं उते चमक सी। मैं आपणे साथीआं तों पिछ्छे रहि के उनहां नाल निक्कीआं निक्कीआं गल्लां ‘च रुझ्झ गिआ। उनहां दस्सिआ कि उह पंजवीं जमात दे विदिआरथी हन। दरमिआने दरजे दे किसे पबलिक सकूल दे विदिआरथी। मैं नवीं सिख्खी शाहमुखी लिपी दे माधिअम राहीं उनहां नाल जुड़ना चाहिआ ते आपणी कलम नाल उनहां दे हत्थां दीआं तलीआं उते उनहां दे नां लिखे। इह उनहां लई अलोकारी गल्ल सी। उह ख़ुशी नाल आपणीआं खुल्ल्हीआं तलीआं ‘ते लिखे मेरेे अख्खर देख रहे सन ते मेरेे वल्ल वेख के मुसकरा रहे सन।
‘‘अछ्छा आमिर मीआं! दस्सो भारती फ़िलमां देखदे हुंदे ओ।’’
‘‘वेखदे हुंदे आं…’’ उनहां दा सांझा उतशाही जुआब सी।
‘‘किहड़ी हीरोइन चंगी लग्गदी है सभ तों वध्ध।’’
‘‘सारीआं ही।’’
मैं हस्स के किहा, ‘‘सारीआं नहीं, जे किसे इक अध्धी दा नां लवो तां तेरे कोल भेज दिआंगे। सारीआं तां नहीं असीं देण लग्गेे।’’
उह खिड़-खिड़ा के हस्से ते अदनान नें फिर किहा, ‘‘नहीं सारीआं ही चंगीआं नें।’’
उनहां नाल तुरिआं जांदिआं मैं बाग़ दे आसे-पासे झाती वी मार रिहा सी। हरे मैदान ते हरे भरे रुख्ख तां सन पर बाग़ विचलीआं निक्कीआं नहिरां ‘ते फुहारिआं विच पाणी नहीं सी। शाइद गरमीआं दे मौसम दा असर सी, दिल नूं धूह पाउण वाले फु्ुलां दी ख़ूबसूरती वी ग़ैर-हाज़र सी। फिर वी मन नूं अथाह ख़ुशी सी इस इतिहासक बाग़ विच इनहां छोटे बच्चिआं दे अंग-संग तुरदिआं।
मैं रुक के उनहां दोहां नूं सांझा सुआल कीता, ‘‘अछ्छा! इह दस्सो पहिलां कदी साडे वरगे पग्गां ते दाहड़ीआं वाले सिख्ख वेखे जे?’’
‘‘ऐस तरहां नहीं ; टी.वी. उते वेखे होए नें,’’ अदनान नें आखिआ।
‘‘ऐस तरहां पहिली वार आहमो साहमणे वेख के तुहानूं सिख्ख किहो जिहे लग्गे नें?’’ मैं औखा जिहा सुआल पा दित्ता।
‘‘अंगरेज़ां तों कई गुणां वध के चंगे,’’ आमिर दा जुआब वी औखा सी ते मैं इस दे अरथ समझण दी कोशिश विच ही सां कि उस नें आप ही इस दी विआखिआ कर दित्ती, ‘‘अंगरेज़ तां बोलदे ही गिटमिट गिटमिट नें। उनहां दी बोली ही समझ नहीं आउंदी। तुसीं तां बिलकुल साडे वांग ही बोलदे हो।’’
असल विच असीं पहिले सिख्ख हां जो उनहां दे संपरक विच आए सां। उनहां लई तां सिख्ख ‘विदेशी’ सन। जिवें अंगरेज़ ‘विदेशी’ सन। ते अंगरेज़ विदेशीआं दी ‘गिट मिट’ उनहां नूं आम पंजाबी विदिआरथीआं वांग समझणी मुशकल सी पर उनहां लई इह हैरानी भरी ख़ुशी दी गल्ल सी कि साडे रूप विच विदेशी लोक उनहां दी आपणी बोली पंजाबी विच ही गल्लां कर रहे सन, बिलकुल उनहां वांग ही। उनहां नूं शाइद पहिलां इस गल्ल दा इलम ही नहीं सी कि साडे लोकां दी ज़बान वी पंजाबी ही है। उनहां बच्चिआं दे मिलाप नें दस्स दित्ता सी कि ज़बान दी सांझ किवें तुरत इक दूजे नूं देशां ते धरमां दे हद्दां बंने तोड़ के नेड़े कर सकदी है। मैनूं हुण ख़िआल आइआ कि उह साडी ज़बान सुणन लई ही साडे नाल नाल तुरे सन। असीं ओपरे ते पराए हो के वी उनहां नूं आपणे आपणे लग्गे होवांगे।
मैं सांझी ज़बान दी करामात बारे सोचदा होइआ उनहां नाल तुरिआ जा रिहा सां कि अचनचेत अदनान नें मेरी उंगल फड़ लई। मैं रुक के उहदे चिहरे वल्ल वेखिआ।
‘‘अंकल! इक गल्ल दस्सोगे?’’ उह शाइद पुछ्छण लई आपणे मन नाल घोल कर रिहा सी।
‘‘पुछ्छो बेटा! ज़रूर पुछ्छो,’’
ते अटक अटक के उस नें सुआल पुछ्छ ही लिआ।
‘‘तुसीं भला अल्ल्हा नूं मंनदे हो?’’
पहिलां तां मैं उस दे सुआल उते हैरान होइआ ते फिर ख़ुश हो के दस्सिआ, ‘‘किउं नहीं पुत्तर! अल्ल्हापाक परवरदगार तां साडा सांझा है सभ दा। असीं भला किउं नां मंनणा होइआ! असीं मंनदे हां। बड़े अदब नाल मंनदे हां।’’
मेरा जुआब सुणदे सार ही उस नें मैनूं चकाचौंध कर देण वाला जुआब दित्ता, ‘‘अंकल! जे तुसीं अल्ल्हा नूं मंनदे जे तां फिर असीं वी भगवान नूं मंनदे आं।’’
मैं तां उस नूं छोटा जिहा भोला-भाला बच्चा समझ रिहा सां। मासूम ते निक्कचू जिहा। उस नें तां बहुत वड्डी गल्ल कीती सी। सिआणिआं तों वी सिआणी। मैं उस दा सिर आपणी वख्खी नाल घुट्ट लिआ।
मां बोली दी आपसी अपणत्त ‘चों पैदा हो सकण वाले अते अल्ल्हा ते भगवान नूं आपणे समझ के इनहां दे नां उते लड़न दी थां आपसी सहिहोंद ते सतिकार वाले राह दा पता सानूं इनहां छोटे बच्चिआं नें किंनी सादगी नाल समझा दित्ता सी।
मैं उतशाह विच भर के अग्गे जांदे आपणे साथीआं नूं आवाज़ दे के रोकिआ, ‘‘ज़रा खलो के मेरे नाल तुरे आउंदे इनहां ‘बाबे बुढ्ढिआं’ दी तां सुणो। इह बच्चे नहीं जे, इह तां पंजाब दी सिआणप नें, सिआसतां तों पार जा के समुच्चे पंजाबीआं नूं जोड़न वाली।’’
ख़ुशी भरी हैरानी नाल जगतार ते उमर गनी नें उनहां छोटे बच्चिआं नूं लाड लडाइआ।
मैं आपणे आप नूं आखिआ, ‘‘इह गलत गल्ल है कि शालामार बाग़ विच फुल्ल नहीं दिसदे। असली फुल्ल तां मेरे साहमणे खलोते सन। आमिर ते अदनान! हरे-भरे रंग बरंगे महिकां वंडदे। साडे सुपनिआं दे पंजाब नूं ठंडीआं छावां देण वाले पौदिआं दी नंनही पनीरी।… रब्ब करे! इह वड्डे होण, वधण फुल्लण, छावां वाले बूटे बणन।
अचनचेत मैनूं डराउणा ख़िआल आइआ, ‘‘इनहां पौदिआं नूं हरा-भरा रख्खण लई ‘‘नहिरां’’ विच पाणी किउं नहीं?’’
कित्थे लग्गा होइआ सी मुहब्बत दे पाणी नूं बंनह?
शाह हुसैन दे मज़ार वल्ल जांदिआं असीं इक भीड़े जिहे बाज़ार विचों लंघदे पए सां। उमर गनी कल्ल्ह पाकपटन तों आइआ सी। ‘घर दे फ़िकर नां करदे होण,’ इस लई उह उनहां नूं फ़ोन करना चाहुंदा सी। ऐतवार होण दे बावजूद इह बाज़ार खुल्ल्हा होइआ सी। दरमिआने लोकां दा इलाका सी। पेंडू लग्गदे लोक सौदा-सुलफ ख़रीद रहे सन। इक पी.सी.ओ वेख के असीं कार खहड़ी कर लई। उमर गनी ते रिज़वान फ़ोन करन लई अंदर गए। जगतार वी उनहां दे नाल सी। मैं जाणबुझ्झ के बाहर खड़ोता रिहा। लोकां दा प्रतीकरम जानण अते वेखण वासते। इक दो वडेरी उमर दे बज़ुुरग आए। सलाम कीती। हाल चाल पुछ्छिआ।
हौली हौली नौजुआनां दी भीड़ मेरे दुआले इक्कठी हो गई।
‘‘अंकल चाह पाणी पीवो! बोतलां मंगवाईए?’’ उह ज़ोर दे रहे सन।
‘‘नहीं बेटे! असीं हुणे चले जाणै। तुहाडा शुकरीआ! होर सुणाओ! की हाल चाल नें?’’
‘‘अंकल बहुत वधीआ। आपणी सुणाओ!’’
उह इकठ्ठे बोले।
एने चिर नूं उनहां दा इक नौजवान साथी परिओं तेज़ तेज़ आइआ ते आउंदिआं ही सुआल दाग दित्ता, ‘‘की गल्ल सिख्ख जी!… साडे नाल क्रिकट नहीं जे खेडी! हुण डर गए जे? पता सी नां हार जाणै! हुण आखदे नें असीं पाकिसतान नाल क्रिकट नहीं खेडण।’’ उहदी आवाज़ विच पराइआपण सी।
‘‘पहिलां आपणी ज़बान दरुसत कर उए!’’ उहदे ही किसे लंगोटीए नें उहनूं झिड़किआ, ‘‘सिख्ख जी नहीं, सरदार जी आखीदा ए।’’
मै आखिआ, ‘‘पुत्तर! इह किहड़े साडे तुहाडे फैसले नें। भावें खेडणा होवे ते भावें नां खेडणा होवे; भावें लड़ना होवे ते भावें सुल्हा-सफाई करनी होवे, इह उतलिआं लोकां दा कंम है। वड्डे लोकां दां। साडा तुहाडा इहदे विच की वस्स चल्लदा ए।’’
साथी दी झिड़क ते मेरे जुआब नाल उह थोहड़ा ढिला जिहा हो गिआ। ऐतकीं उहदी आवाज़ विच अपणत्त सी। ‘‘सरदार जी! तुसीं पंजाबी कानफ़रंस ‘ते आए ओ? की आंहदी ए इह पंजाबी कानफ़रंस? बड़ा रौला गौला ए एहदा?’’
पंजाबी कानफ़रंस दा ज़िकर उनहां तक्क वी पुज्ज चुक्का सी। अख़बारां ते टी.वी. वालिआं नें इस कानफ़रंस नूं बहुत महत्तव दित्ता सी। इहदे हक्क विच वी लिखिआ जा रिहा सी ते विरोध विच वी पर इस नें खलोते पाणीआं विच भारी पत्थर सुट्ट के हलचल वी पैदा कर दित्ती सी।
‘‘कानफ़रंस इहो ही आखदी ए, आपस विच लड़ीए भिड़ीए नां, पिआर मुहब्बत नाल सारे मसले हल्ल करीए। इक दूजे नूं मिलीए गिलीए। दुख्ख-सुख्ख सुणीए, नेड़े होईए।’’
उह मुंडा दूजिआं दा आगू लगदा सी। गल्लबात दी वागडोर उस नें संभाल लई सी, ‘‘अंकल! करो नां फिर कोशिश। असीं वी इंडीआ वेख सकीए।’’
‘‘सिख्ख जी, ‘सरदार जी’ ते ‘अंकल जी’ तक पुज्जदिआं उह मेरे नाल जुड़ गिआ सी।
‘‘अंकल! मैं हिंदी सिख्खणी चाहुंदां!’’
उस नें आखिआ तां मैं उहदा हत्थ फड़ के उस दी तली उते उस दा नां लिख दित्ता ते नाल ही उरदू विच, ‘‘मैं हिंदी सीखना चाहता हुं’’
उस नें तली फैला के आमिर ते अदनान वांग मेरी हत्थ लिखत पहड़ी अते उतशाह नाल बोलिआ। ‘‘अंकल! चाह पीते बिनां नहीं जाण देणा!’’
मेरे साथी बाहर आ के कार वल्ल वध चुक्के सन। मैं उहदी पिठ्ठ थापड़दिआं कलावे विच लिआ, ‘‘नहीं पुत्तरो! हुण टाईम नहीं! बस्स जिउंदे वस्सदे रहो! असलामा लेकिम।’’
‘‘वा लेकम असलाम।’’ सभ दी सांझी आवाज़ गूंजी। मैं कार विच बैठ गिआ तां पिछों उस नौजुआन दी मोह भिज्जी अवाज़ आई। ‘‘अंकल! सानूं याद रख्खिओ! भुल्लिओ नां!’’
आपणी सीट उते बैठा मैं सोच रिहा सी आपस विच मिलण नाल किंनीआं ग़लतफ़हिमीआं ते दूरीआं दूर हुंदीआं हन। इस नौजवान नूं मिलदिआं मैं भारत दी सरकार दा प्रतीनिध उहदा दुशमण सां पर कुझ पलां दी गल्लबात तों पिछ्छों मैं उहदा ‘अंकल’ हो गिआ सां। उह इंडीआ वी आउणा चाहुंदा सी। हिंदी वी सिख्खणी चाहुंदा सी। सांझ दे किंने आधार सन जिनहां उते उसारी करन लई सभ दे मन विच किंनी जगिआसा सी पर मौका तां मिले, मिलण गिलण दा।