फाज़िलका कालज विच्च पहड़दिआं मैनूं पंजाब यूनीवरसिटी दे हाकी कोचिंग कैंप अते हाईकिंग ट्रैकिंग टूर लाउण दे मौके मिले। इओं मेरा बाहरले कालजां दे मुंडिआं नाल मेल जोल होइआ ते बाहरली दुनीआ दिसी। घरों, पिंडों ते आपणे दाइरे `चों निकलण नाल विदिआरथी वधेरे कुझ्झ सिख्खण ते आतम निरभर होण लग्गदे हन। जिहड़े इको थां बैठे जां इको जगहा रही जांदे होण उनहां दा जीवन अनुभव सीमत रहि जांदा है। खूह दे डड्डू दी मिसाल इसे परसंग विच्च दित्ती जांदी है।
जदों इतिहास `ते नज़र मारीदी है तां पता लग्गदै कि उही बंदे वधेरे कामयाब होए जिहड़े घरों बाहर निकले ते दूर दुराडीआं थांवां तक पहुंचे। घरों उठ्ठ के धावे करन वालिआं नें ही हिंदोसतान उते सदीआं-बध्धी राज कीता। अंगरेज़ घरों निकले ते इक्क समें उनहां दे राज विच्च सूरज नहीं सी छिपदा। कोलंबस नें समुंदर `च बेड़ा ठेल्ह के ही अमरीका वरगा मुलक लभ्भिआ सी।
सतंबर 1960 विच्च पंजाब यूनीवरसिटी दे कालजां `चों चोणवें हाकी खिडारीआं ते अथलीटां दा इक्क कोचिंग कैंप गौरमिंट कालज लुधिआणे लग्गा। फाज़िलका कालज तों मैं ते राम सिंघ कैंप लई चुणे गए। मैं हाकी लई ते राम सिंघ अथलैटिकस लई। उंज असीं दोवें हाकी वी खेडदे सां ते अथलैटिकस वी करदे सां। साडे कालज दी हाकी टीम दा पहिला मैच नवें बणे गौरमिंट कालज मुकतसर दी टीम नाल होइआ करदा सी।
उदों मुकतसर दा सरकारी कालज गुरदवारा टिब्बी साहिब वल्ल सी। उहदे नाल दी सूआ लंघदा सी। जदों मैच दी तरीक दा पता लग्गदा तां मुकतसरीए दो दिन पहिलां हाकी दे गराऊंड नूं पाणी ला दिंदे। असीं रड़े मैदान `ते खेडदे होण कारन घाह वाले सिल्ल्हे मैदान उते हार जांदे। उदों मुकतसर कालज दे प्रिंसीपल, बाअद विच्च सिख्ख महानकोश तिआर करन वाले प्रो.हरबंस सिंघ सन। असीं रेल गड्डी `ते आउंदे सां जिस विच्च कई मुंडे बेटिकटा सफर कर जांदे। इक्क वार फुटबाल दा साडा टुंडा खिडारी रात दे हनहेरे विच्च टीटी मूहरे भज्जदा सिगनल दीआं तारां `च अड़क के डिग्ग पिआ। टीटी दे हत्थ टुंडी बांह ही आ गई। टुंडे नें किहा, “हाए, मेरी बांह दुखाती।” टीटी तों सहि सुभाअ बांह छड्डी गई। टुंडा फिर दौड़ गिआ ते मुड़ के हत्थ नां आइआ।
लुधिआणे दे कोचिंग कैंप विच्च हाकी ते अथलैटिकस दे पंजाह कु मुंडे सन। वधेरे मुंडे खालसा कालज अंम्रितसर, महिंदरा कालज पटिआला ते डी.ए.वी.कालज जलंधर दे सन। साडा टिकाणा पुराणे होसटल विच्च सी जिस दे खुल्ल्हे कमरिआं विच्च कई कई मंजे डहि गए। हाकी दा मैदान होसटल दे मूहरे ही सी जिस दे चौहां कोनिआं उपर बोरडां `ते लिखिआ होइआ सी, “डू नाट करास दा हाकी फीलड।” थाली वरगे गराऊंड दे इकसार कट्टे घाह उते मल्लोमल्ली खेडण नूं दिल करदा सी। टरैक रता हटवां सी जिथे अथलीटां दी प्रैकटिस चलदी। सवेर वेले साडी `कठ्ठिआं दी कसरत हुंदी ते हफ़ते `च इक्क वार लंमी करास कंटरी लुआई जांदी। इक्क करास कंटरी असीं मुल्लांपुर तक वी लाई ते मुड़ के मसां होसटल विच्च पुज्जे। जिथे हुण पंजाब खेतीबाड़ी यूनीवरसिटी है उथे उदों उजाड़ थां पई हुंदी सी। अजे इको इमारत बणी सी जिस विच्च खेतीबाड़ी कालज शुरू होइआ सी। उहदे कोल दी दौड़दे होए असीं सिध्धवां नहिर `ते जा चहड़दे।
फाज़िलका साडी बल्ले बल्ले सी पर कोचिंग कैंप `च असीं किसे गिणती विच्च नहीं सां। हाकी खेडण वालिआं विच्च हरबिंदर सिंघ तों इलावा दो बलबीर संसारपुर दे सन जो बाअद विच्च ओलंपिक खेडां दे मैडल जित्ते। उह उस भारती हाकी टीम दे वी शिंगार सन जिस नें 1966 विच्च एशिआई खेडां `चों पहिली वार सोन तमग़ा जित्तिआ। कैंप `च गुरदीप सिंघ मान वी सी जो बाअद विच्च उचकोटी दा कोच साबत होइआ। रेशम सिंघ ते संतोख सिंघ वरगे खिडारी सन जो कई साल पंजाब दी टीम वल्लों खेडदे ते नैशनल चैंपीअनशिपां जित्तदे रहे। अंबरसरीआ वीर सिंघ हाकी वी खेडदा सी ते लंमी दौड़ वी लाउंदा सी।
मैनूं उनहां खिडारीआं नाल खेड के बहुत कुझ्झ सिख्खण दा मौका मिलिआ। चंगा खिडारी बणन दी चेटक मैनूं उस कैंप नें लाई। उथे अजाइब सिंघ ते बलवंत सिंघ वरगे अथलीट सन जो उसे साल जलंधर दीआं नैशनल खेडां `च पोल वालट ते 400 मीटर हरडलज़ दौड़ दे नैशनल चैंपीअन बणे। डिकैथलोन करन वाला हरनेक सिंघ सी जो अथलीट होण दे नाल चंगा सकालर वी सी। 800 मीटर वाला जरनैल सिंघ इक्क लत्त `ते टरैक दा चक्कर ला लैंदा सी। बाअद विच्च उह रेलवे `च भरती हो गिआ ते नैशनल चैंपीअन बणिआ। जदों उहदी बदली बीकानेर दी होई तां दिल्ली आ के किहा करे, “नां ओथे पाणी ते नां कोई कुड़ी। मैं ओथे गंजा नां हुंदा तां होर की हुंदा? आह माड़ी जिही जूड़ी पता नहीं किवें बच गई?”
जरनैल सिंघ लहिरी अथलीट सी। मुकलावा लैण गिआ तां आपणे सहुरे पिंड रात दे हनहेरे `च दौड़न दी प्रैकटिस करन लग्ग पिआ। उहदी किसमत चंगी सी पई किसे नूं पता नां लग्गा नहीं तां अगलिआं नें चोर समझ के ढाह लैणा सी। 1966 `च मैं उहदे बारे उलीके शबद चित्तर दा नां ‘कलहिरी मोर’ रख्खिआ सी। कुझ्झ साल बाअद उहदी सिध्धवां नहिर उते करास कंटरी लाउंदिआं मौत होई तां मैं उहदे बारे ‘अखाड़े दा शहीद’ सिरलेख अधीन आरटीकल लिखिआ जो पंजाब सकूल सिख्खिआ बोरड दी इक्क पाठ पुसतक विच्च पहड़ाइआ जांदा रिहा।
कैंप विच्च असीं इह वी सिख्खिआ कि आपणा समान चोरी होण तों बचा के किवें रख्खणा है? आपणा साबण तेल ते खाण पीण दा समान खिडारी आपणे हत्थ हेठां रख्खदे। भेती मुंडिआं नें दस्सिआ कि अखीरले दिन कछ्छे बुनैणां ते तौलीआं दी वी ख़ैर नहीं इस लई सुक्कणे पाउण दी थां गिल्ले ई वल्हेट लैणे। इक्क दूजे दा घिओ ते बदाम खा लैणे जां लुका देणे चोरी नहीं सी समझे जांदे। हिट्ट मार के गुआई ते पिछ्छों लभ्भी गेंद वी चोरी नहीं सी गिणी जांदी। हाकी मंग के मोड़ नां सकणी आम गल्ल सी। किसे कोल घड़ी जां कोई होर महिंगी चीज़ वसत हुंदी तां चोरां दी निगहा उहदे `ते ही हुंदी। इह ऐवें कहिण दीआं गल्लां नें कि पुराणे विदिआरथी आदरशक सन।
इक दिन अंबरसरीए भाऊआं दे किते संतरिआं दा बाग़ नज़रीं पै गिआ। रसे होए संतरे जिवें उनहां नूं ही उडीकदे होण। बस्स लग्ग गई नज़र चंगे भले बाग़ नूं। जदों सारे सौं जांदे तां उनहां दा जथा रात नूं बाग़ वल्ल जांदा ते कच्चे पक्के संतरिआं दा बैग भर लिआउंदा। अख़ीर संतरिआं दे छिल्लड़ां नें पैड़ कढाई पर भाऊ पैरां `ते पाणी नां पैण देण। साडे वरगिआं `ते ऐवें ई शक्क होई जावे। `कल्ले कारे जु होए! पर भला होवे गुरबचन सिंघ रंधावे दे वड्डे भरा हरभजन सिंघ रंधावे दा। फिर वी गुरू की नगरी तों आइआ सी। अख़ीरले दिन उहने कोच नूं दस्स ई दित्ता, “सुंना बाग़ वेख के साथों रहि नहीं होइआ। बथेरा मन नूं समझाइआ पर किथे! संतरे साथों ई खाधे गए नें। भुल्ल चुक्क दी माफी दिओ। जे डंन लाए बिनां नहीं सरदा तां साडे कछ्छे बुनैणां ई रख्ख लओ! पैसे हुंदे तां चोरी किओं करदै?”
कैंप विच्च असीं बलदेव सिंघ पत्तो वाला ते जसकरन सिंघ रुड़का डिसकस सुट्टदे वेखे। बलदेव सिंघ उदों रेलवे `च भरती होइआ सी। फौज `चों दलजीत सिंघ आपणे पिंड ललतों छुट्टी कट्टण आइआ होइआ सी। उह वी लुधिआणे चार सौ ते अठ्ठ सौ मीटर दी दौड़ लाउण आ जांदा। बाअद विच्च मैं बलदेव सिंघ ते दलजीत सिंघ दे रेखा चित्तर लिखे। कैंप तों मैं हाकी खेडण दे कई गुर सिख्खे ते नवें उतशाह नाल फाज़िलका मुड़िआ। काफी समां मैनूं कैंप याद आउंदा रिहा।
कालज दी अथलैटिक मीट विच्च इक्क ईवैंट `चों फसट आउण दे पंज, सैकंड दे तिंन ते थरड दा इक्क अंक गिणिआ जांदा सी। जिंने अंक कोई अथलीट हासल करदा ओने रुपए उस दा इनाम बण जांदा सी। इक्क वार मेरे इनाम दे एने कु रुपए बण गए जिनहां दी हाकी जां लोहे दा गोला लिआ जा सकदा सी। हाकी मेरे कोल पहिलां ही सी इस लई मैं गोले दा इनाम मंगिआ। जिद्दण उह गोला मैनूं मिलणा सी मैं साईकल उते कालज जाण दी थां तुर के गिआ किउंकि मुड़दिआं मै उह गोला सारे राह सुट्टदा आउणा सी। आपणा गोला मिलण दी मैनूं एनी ख़ुशी सी कि गोला सुटदिआं ही मैं पिंड पुज्जा। फिर मैं घर दे खुल्ल्हे विहड़े विच्च इट्टां गड्ड के गोले दा दाइरा बणा लिआ ते सुट्टां वाले पासे वी मिणती दीआं पक्कीआं निशानीआं ला लईआं। अज्ज मैं सोचदां कि लोहे नाल मत्था मारन दा इह कैसा जनूंन सी?
गरमीआं दीआं छुट्टीआं विच्च मई दे महीने साडा हाईकिंग ट्रैकिंग दा टूर लग्गा। उदों पंजाब यूनीवरसिटी पठानकोट तों गुड़गाओं ते फाज़िलका तों कुल्लू कांगड़े तक हुंदी सी। साडा टूर कुल्लू तों शिमला तक पहाड़ां उते हाईकिंग ट्रैकिंग करन दा सी। फाज़िलका कालज तों मैं `कल्ला ही सां। दूर दुराडे कालजां दे वीह कु विदिआरथी रोपड़ दे कालज विच्च `कठ्ठे होए। उथों दे इक्क प्रोफैसर नें सानूं आपणे नाल लै के जाणा सी। उस दा नां बचित्तर सिंघ सी। साडे पिंड दा प्रो.भाग सिंघ सिध्धू उस दा कुलीग सी। इओं मेरी उस नाल चंगी नेड़ता बण गई। बाअद विच्च उह जगराओं दे साइंस कालज दा डाइरैकटर बणिआ जिथे मैं वी कुझ्झ समां पहड़ाइआ ते हाईकिंग ट्रैकिंग टूर दीआं यादां ताज़ीआं कीतीआं।
रोपड़ तों बस्स चहड़ के असीं बिलासपुर गए। उथों सुंदर नगर विच्च दी मंडी पहुंचे। मैं पहिली वार पहाड़ वेख रिहा सां। कोई पासा खुशक सी ते कोई हरिआ भरिआ। सुंदर नगर पध्धरी वादी `च वसिआ होइआ सी जिथे मैदानां वरगीआं ही फसलां सन। मंडी दे नाल दरिआ वहि रिहा सी। कुल्लू ठहिरन दी थां असीं मनाली जा के ठहिरे। फिर रोहतांग पास तक गए ते चार चुफेरे पईआं बरफां उते फोटो खिच्चे। उथे प्रो.बचित्तर सिंघ नें बंसरी उते पहाड़ी धुन वजाई जिस नाल पहाड़ीआं गूंज पईआं। मुड़दिआं इक्क पहाड़ी रैस्सट हाऊस विच्च रात कट्टी। मनाली कोल गरम पाणी दे चशमे विच्च नहाते जिस बारे किहा जांदै कि उथे नहाउण नाल चमड़ी दे रोग दूर हो जांदे हन। मनाली उदों निक्का जिहा कसबा सी जो हुण बहुत वड्डा सैलानी केंदर बण चुक्कै।
वापस कुल्लू मुड़ के असीं शिमले वल्ल नूं तुरना शुरू कीता। असीं पहाड़ी राहां दीआं चहड़ाईआं ते उतराईआं उते नित्त दस कु मील तुरदे। इक्क पहाड़ी तों दूजी पहाड़ी नेड़े जिही दिसदी पर उह काफी दूर हुंदी। इओं लग्गदा जिवें अगला मुकाम बस्स आ ही गिआ होवे पर उथे पुज्जदिआं लत्तां दी बस्स हो जांदी। पहाड़ां दे नज़ारे बड़े हुसीन सन। किते भेडां बक्करीआं चरदीआं दिसदीआं ते पहाड़नां लेले चुक्की फिरदीआं। उह कालजीएट मुंडिआं नूं खहड़ खहड़ के वेखदीआं। असीं तां ख़ैर वेखणा ई सी। असीं तुरदे होए बोलीआं पाई जांदे ते गाणे गाई जांदे। कदे वैसे ही इक्क दूजे नाल खहिण लग्गदे। शाम नूं जिथे टिकाणा हुंदा उथे कैंप फाइर हुंदी यानी गाउण वजाउण ते लतीफ़िआं दा शुगल मेला हुंदा ते भंगड़ा पैंदा। कुल्लू तों शिमला पहाड़ां विच्च दी सिध्धा सौ कु मील सी। असीं पड़ाअ करदिआं दसां कु दिनां विच्च मंज़ल सर कर लई। राह विच्च रामपुर आइआ जिथे राजे दे महल्ल वेखे ते पहाड़नां नच्चदीआं वेखीआं।
शिमले असीं माल रोड `ते गेड़े दित्ते। रिज्ज उते इक्क समागम सी जिस विच्च मुहंमद रफी गा रिहा सी-मुंडा मोह लिआ तवीतां वाला दमड़ी दा सक्क मल के। पहिलां असीं उहदे गाणे फिलमां विच्च ही सुणे सन। उथे लाहौर तों लिआंदा लाला लाजपत राए दा बुत्त लग्गा होइआ सी। बाअद विच्च मैं लाला जी दे जनम सथान पिंड ढुड्डीके दे कालज विच्च लंमा समां पहड़ाइआ। शिमले रात कट्ट के असीं सोलन ते कालका विच्च दी हुंदे होए पंजाब यूनीवरसिटी चंडीगहड़ दे इक्क होसटल विच्च पुज्जे। पहाड़ां दी ठंढ माण के आइआं नूं चंडीगहड़ दीआं लूआं बहुत गरम लग्गीआं। चंडीगहड़ मैं पहिली वार गिआ सां।
होसटल विच्च समान रख्ख के ते नहा धो के असीं चंडीगहड़ दी सैर नूं निकले। उदों चंडीगहड़ बहुत विरला सी। सैकटरां विच्च दी डंडीआं पईआं होईआं सन ते वधेरे थां खाली पई सी। रुख्ख अजे नां मातर सन। शाइद सिनमा वी इको होवे जिथे असीं छे तों नौं वाली फिलम वेखी। होसटल विच्च मुड़े तां साडा समान फरोलिआ पिआ सी। कपड़े तां किसे दे नहीं सी चुक्के गए पर कैमरे ते कीमती चीज़ां ग़ाइब सन। मेरा किउंकि लुधिआणे दे कोचिंग कैंप दा तजरबा सी इस लई मेरी कोई चीज़ किसे दे हत्थ नहीं लग्गी। मैं हुण वी किसे खेड मेले `ते जावां तां भावें निऊयारक दे होटल विच्च ठहिरां भावें शिकागो दे मोटल विच्च कदे आपणा पासपोरट, नकदी ते कीमती चीज़ वसत होटल `च छड्ड के नहीं जांदा। तदे तां लिखिऐ कि बंदा घरों बाहर निकल के बड़ा कुझ्झ सिख्खदै।