किसे थां नूं भाग हुंदे हन कि उत्थे सदा ही रौणकां लग्गीआं रहिंदीआं हन। जदों दा पिछले चार कु सालां दा आह संतरिआं वाला बाग़ लिआ उस दिन तों लै के अज्ज तक्क शाइद ही कोई वेला होवे जदों मैं इत्थे होवां ते प्राहुणे नां आउण। सो अज्ज वी पहिलां समराले वाला छोटा वीर तेजिंदर आपणे परिवार नाल आ गिआ। उह गिआ तां जसविंदर अते चीमा बाई आ गए। नाल उहनां दे ऐडीलेड वाला विकी बाई वी सी। मुक्कदी गल्ल बठिंडे आळी चाह दी पतीली ठंढी नहीं होण दित्ती सारा दिन।

दूजे पासे संतरिआं दी तुड़वाई चल्ल रही सी। ऐतकीं कामिआं दी घाट कारन काफ़ी दिक्कतां आ रहीआं हन। जिहड़ा कंम दो दिनां 'च हो सकदा सी उस लई दुग्गणे पैसे ते हफ़ते लग्ग रहे हन। जे अठ्ठ दस्स कु कामे लग्गे होण तां बिंन चक्क-धर करदे टरैकटर वाले दी आथण नूं भूतनी भूला दिंदे हन। अज्ज सिरफ़ तिंन कु कामे सन ते आपां वी वकत जिहा पास कर रहे सी। पर आथणे जिहे जदों मैं कतारां 'चों बिंन बाहर कढ्ढ रिहा सी तां अचानक दो अधखड़ जिही उमर दे गोरे संतरिआं दे विच वड़े फिरन। इत्थे ज़िकरयोग है कि आसट्रेलीआ 'च बिनां इजाज़त दे कोई किसे दे खेत 'चों लंघदा वी नहीं। उहनां मैनूं देख के हत्थ चक्किआ। आपां वी इह सोच के टरैकटर बंद कर लिआ कि लगदा होर प्राहुणे आ गए! मैं टरैकटर तों उत्तर के उहनां कोल आ गिआ। उहनां 'चों इक कहिंदा माफ़ करना असीं तां कंम चलदा देख के हस्सदे हस्सदे एधर नूं आ गए।

मेरे 'कोई नां' कहिण ते जदों नूं उह गल्ल अग्गे तोरदे मेरे ज़िहन 'च अचानक दो गल्लां चेते आ गईआं। इक तां इह कि शिकार आप ही पिंजरे 'च आ गिआ। उहनां नूं नहीं सी पता कि मैनूं जे दो कु घंटे मग़ज़ खाण नूं सरोता नां मिले मैं तां भुख्खा मर जावां।

दूजे मैनूं पंजाब दे उस बुरे दौर दी गल्ल चेते आ गई जदों पंजाब दी जवानी नूं सरकार गिरझां वांग पैंदी सी। वेले-कुवेले तां दूर दी गल्ल दिन ढलदे वी कोई परिवार आपणे जवान पुत्तर नूं बाहर नां जाण दिंदा। पर जवानी अत्थरी हुंदी है उह कित्थे रोकिआं रुकदी। इक दिन मेरा हाणी भूआ दा पुत्त बब्बी चठ्ठा अते उहदे मित्तर नीटा सरदार अते शेखर तलवंडी जो अज्ज कल्ल्ह इक सथापित गीतकार है। 'साबो की तलवंडी' दे बाहर-बाहर इक मैदान 'च कसरत करन बहाने इकठ्ठे जा पुज्जे। मैदान दे दख्खण आळे पासे सी.आर.पी.ऐफ्फ. दा कैंप लग्गिआ हुंदा सी। कैंप चों कुक्कर दीआं सीटीआं सुण के बब्बी कहिंदा आजो ओए फ़ौजीआं कोलों मीट-शीट खा के आईए। नीटा बाई कहिंदा उह तां किते तेरा कौला नां भर देण, मरवाएंगा कि? पर गल्लां बातां 'च बब्बी नूं जित्तणा औखा, सो उस नें दो चार उदाहरनां मौके ते घड़ सुणाईआं ते चलो जी गल्लां करदे कराउंदे उत्थे पहुंच गए। सी.आर.पी .आळिआं नें अणजाण जिहे गभ्भरू निधड़क ही कैंप 'च वड़दे देख बंदूकां तण लईआं , कहिंदे कर लवो ओए हत्थ खहड़े। दो चार कु मिंटां 'च जदों उहनां आळे दुआळे गेड़े जिहे खा के देखिआ वी लगदे तां शरीफ़ज़ादे ही आ, उहनां दा अफ़सर गहड़क के बोलिआ किस के आदमी हो? किस नें भेजा तुमे कैंप मैं? तुमाहरे हथिआर कहां है? चौधरीआं दे मुंडे शेखर नें सोचिआ कि चलो अफ़सर दी हिंदी दा जवाब इहनां 'चों मैं ही वधीआ दे सकदा। तां अफ़सर नूं मुख़ातब हुंदिआं कहिंदा जनाब हम तो ऊंई हासते-हासते इध्धर को चले आए। नीटा सरदार विचों टोकदा कहिंदा ऊई तां नहीं आए जी आह चठ्ठा लै के आइआ, कहिंदा तुसीं मीट बहुत सवाद बणाउंदे हो ते खाण नूं वी वड्डे-वड्डे कौलिआं 'च दिंदे हो। सारिआं दे हासे नें माहौल ख़ुशगवार कर दित्ता ते सानूं ताअ ज़िंदगी लई इह डाइलाग मिल गिआ। अकसर हुण वी जदों असीं जुंडी दे यार इकठ्ठे हुंदे हां तां इस गल्ल दा ज़िकर करना नहीं भुल्लदे कि "ऊंई हासते-हासते इध्धर को चले आए।"

खहड़ जो यार! मेरे 'च वी इह कमी आ। विशे तों भटक जाणा। गल्ल रिवरलैंड तों तोर के साढे तिंन दहाके पिछ्छे 'तलवंडी साबो की' लै वड़िआ। चलो मुद्दे ते आउंदे हां। जदों मैनूं अहिसास होइआ कि इह सज्जण वी ऊई हासते-हासते आपणे कोल आ ही गए हन तां इहनां दी सेवा करनी बणदी है। मीट दे कौले नहीं तां आपां चाह पाणी तां छका ही सकदे हां। जदों मैं उहनां नूं किहा कि मेरा नां मिंटू बराड़ है ते दस्सो, मैं तुहाडी की सेवा कर सकदा हां। तां, मैनूं उहनां चों इक नें आपणा नाम जौन अते दूजे नें पाल दस्सदिआं, कहिंदे असीं सैलानी हां पछ्छमी आसट्रेलीआ तों आए हां। परथ तों वी अगांह नैरोजन शहिर दे लागे पिसेविल साडा पिंड है। घरों निकलिआं नूं तां कई हफ़ते हो गए पर इत्थे पिछले दो कु दिनां तों तुहाडे इस पिंड दे कैरेवान पारक 'च ठहिरे होए हां। असल 'च कित्ते वजों असीं वी किसान हां। सो किसानीअत दा रिशता सानूं खिच्च के तेरे टरैकटर दी आवाज़ कोल लै आइआ। (इत्थे ज़िकरयोग है कि इह कैरेवान पारक मेरे खेत दी चहड़दे पासे आळी गुठ्ठ दे नाल लगदा।)

उहनां दी इह खिच्च मेरे वी धुर अंदर तक्क लहि गई। इक-इक कर के उध्धड़न लग्ग पए असीं तिंने। वपारीआं कोल वपार दीआं गल्लां, जुआरीआं कोल जूए दीआं ते किसान दुनीआ दे भावें किसे वी कोने 'च होवे उहनां कोल अखीर बहुमुल्लीआं फ़सलां दी पैंदी घट कीमत दीआं गल्लां, दिनों दिन हुंदी महिंगी मज़दूरी दीआं गल्लां अते अखीर सरकारां लई बददुआवां ही हुंदीआं हन।

जौन जो कि भेडां दा फारम चलाउंदा है कहिंदा पिछले वरहे इक भेड दी मुनाई डूढ डालर सी ते ऐतकीं साढे चार दित्ते आ मैं। कामां तां आथण नूं दो सौ भेडां मुंन के अठ्ठ-नौं सौ बणा लैंदा ते साडे सारा साल भेडां नाल घुल के वी पल्ले एदूं घट्ट पैंदे हन। पाल जो कि कणक अते सरहों आदि दी खेती करदा कहिंदा, कारपोरेट घराणे सिरे दी अते इक सार फ़सल भालदे आ। कोई पुछ्छे उहनां नूं वी इह किहड़ा किसे फ़रमे 'च पा के बणदी आ इह तां कुदरत दी खेड आ मोटी बरीक वी हो सकदी है ते विंगी टेढी वी हो सकदी है। मैं विच्चे टोक के किहा हां आही कसूर ऐतकीं साडीआं मिरचां तों हो गिआ उह थलों चुंझ जिही विंगी कर गईआं ते बज़ार आळे कहिंदे इह तां किसे कंम दीआं नहीं बिंन 'च मारो। हार के खहड़ीआं वाहुणीआं पईआं।

जौन कहिंदा लोक ख़बरां सुण के पुछ्छ लैंदे हन कि ऐतकीं तां कणक दा भाअ 280 डालर नूं टन है, सोहणे पैसे बण गए होणगे? पर उहनां नूं की दस्सीए वी 280 नूं तां उह कणक विकदी आ जो देखण नूं बस्स मोतीआं वरगी होवे। पर जदों पक्की फ़सल 'ते चार कणीआं पै जांदिआं हन तां उह भाअ च पंजाह फ़ीसदी काट ला के लैंदे हन। अते जे थोहड़ा जिहा वध्ध मींह पै जावे पक्की फ़सल 'ते, तां पहिली गल्ल तां फ़सल ही अध्धी हुंदी है ते जिहड़ी हुंदी है उस नूं ख़रीदण तों नांह कर दिंदे हन ते उह रहि जांदी है पशूआं दी ख़ुराक दे भाअ दी। आख़िर नूं किसान उतांह नूं मूंह चक्क के कहिंदा रहि जांदा कि जदों लोड़ सी कणीआं पाईआं नहीं ते जदों चार दाणे पक्के तां तेरे याद आ गिआ।

गल्लां करदे-करदे उह कहिंदे तुहाडे पाणी दा की साधन आ। मैं किहा आजो उध्धर मोटर आळे पासे नाले तुहानूं बठिंडे वाली चाह बणा के पिआउणा। कहिंदे नहीं असीं तेरा कंम नहीं खहड़ाउणा तूं अंदरों सानूं गाळा देवेगा कि विहलड़ आ गए कंम रोकण। मैं किहा नहीं भले मानसो मैं तां शुकर मनाइआ तुहाडे आउण ते। मैं उत्थों कुझ संतरे तोड़ के मज़ाक 'च किहा कि पहिला तुसीं हासते-हासते इध्धर आए सी हुण आह खांदे-खांदे मेरे मोटर वाले कोठे ते आजो बहि के होर दुख्ख-सुख्ख करांगे। उहनां नें इक-इक संतरा फड़ लिआ ते इक-इक जेब 'च पा के कहिंदे साडे घर वालीआं वी नें नाल असीं जा के उहनां नूं देवांगे। मैं किहा कोई नां जांदे उहनां लई झोली भर के होर लै जाइओ।

चलो उह खेत दी दख्खणी गुठ्ठ ते बणी मोटर वल्ल तुर पए ते मैं टरैकटर नाल दूजा बिंन चुक्कण तुर पिआ। असीं इकठ्ठे जिहे मोटर ते पुज्जे मैं चाह बणाउणी चाही कहिंदे नहीं असीं अज्ज आपणीआं घर वालीआं नाल किते शाम दा खाणा खाण जाणा, सो हाले इत्थे ही हां इक दो दिन, चाह फेर पी के जावांगे। कुझ देर गल्लां मार लैंदे हां होर।

मैं छेती दिने मंजा ढाइआ ते कोल दो कुरसीआं कर लईआं। जौन कुरसी ते बहि गिआ पर पाल मंजे नूं देख बड़ा ख़ुश होइआ कहिंदा इह बड़ा वधीआ है। ते उह आ के मेरी पैंद उत्ते बैठ गिआ। मैं किहा पैंद ते काहनूं बहिणा, एधर नूं हो जा। उह कहिंदा किउं इत्थे की आ? मैं हुण उस नूं की दस्सां वी साडी वड्डी अंबो कहिंदी हुंदी सी बई आए महिमान नूं पैंद ते नहीं बहाउंदे हुंदे, इह उस दा निरादर हुंदा। मैं पाल नूं किहा आरामदाइक नहीं होवेगी सो तूं जा के कहेगा कि पंजाबीआं दे मंजे 'ते बैठणा तां बहुत औखा। गल्ल मंजे दी तुर पई उहनां दी जिगिआसा सी कि इह कित्थे, किउं अते काहतों वरतदे हन? मैं सोचिआ जे ज़िआदा खुल्ल्ह के दस्सण लग्ग पिआ तां मेरी अंगरेज़ी मुक्क जाणी आ। सो एस रस्से दी सिरे आळी गंढ इह है कि जदों असीं इस ते बहि जांदे हां तां बाई मख्खण बराड़ दी लिखत वांग आपणे आप नूं नवाब जिहा समझण लग्ग पैंदे हां। उह हैरान जिहे हो के कहिंदे तूं कहिंदा कि इह मंजा हर घरे हुंदा अते इक घरे कई-कई हुंदे आ? मैं किहा हां। उह कहिंदा फेर तां "Too Many" नवाब होणे आ तुहाडे पंजाब 'च तां! इह कहि के ज़ोर दी हस्स पए। मैं की दस्सां कि बस्स आह नवाबी वाला भरम ही तां है साडे पल्ले!

माहौल हलका फुलका बण गिआ सी पर उह बैठण दी थां अच्चवीं जिही कर रहे सन ते बार बार कहि रहे सन असीं तेरा कंम खहड़ा दित्ता, सानूं हुण जाणा चाहीदा।

मैं गल्ल छेड़ी पछ्छमी आसट्रेलीआ दे इक वड्डे ज़िमींदार ते 'सपड्ड शैड्ड' जरनल सटोरां दी लड़ी दे मालक टोनी गुल्हाटी बारे। जदों मैं जाणना चाहिआ तां उह कहिंदे बंदे दी सिरड़ अते मिहनत वड्डे-वड्डे पहाड़ चीर दिंदी है। टोनी नें जित्थे मुफ़त 'च आलू वंड के वड्डे घरानिआं नूं वकत पा दित्ता सी, उत्थे सरकार दी धौण 'ते गोहड़ा रख्ख के आपणी होंद मनवाउण 'च वी कामयाब होइआ। उह असल च इक दलेर,सादा अते मिहनती इनसान है ते अज्ज वी तुसीं उस नूं काली लंमी निक्कर पाइआ आपणे किसे खेत जां वपार 'ते मिहनत करदा देख सकदे हो। भावें हुण उह इक सामराज दा मालक है पर उस नें कदे आपणे पैर ज़मीन तों नहीं चक्के। (इत्थे ज़िकरयोग है कि टोनी इक सधारन ज़िमींदार सी ते उस नें आपणी मिहनत नाल उगाई फ़सल मंडीआं 'च रोलण दी थां सिध्धी लोकां 'च मुफ़त वंडण नूं तरजीह दित्ती ते अज्ज उह 'सपड्ड शैड्ड' नां दे सटोरां दी इक लड़ी दा मालक है जिस विच तुसीं सिध्धे खेतों पैदा कीतीआं ताज़ीआं चीज़ां बिना विचोलिआं दे मुनाफ़े तों ख़रीद सकदे हो)

तुरदे तुरदिआं नूं मैं पुछ्छिआ कि तुहाडे पछ्छमी आसट्रेलीआ 'च तां सी.बी.ऐच्च. गरुप्प किसानां दा आपणा गरुप्प है ते मैं सुणिआ जदों दा उह होंद 'च आइआ किसान सौखे हो गए? कहिंदे! हुंदा सी कदे, हुण तां बलड्डी कारपोरेट घरानिआं दे हत्थ चहड़ गिआ। हुण तां जो उह कहिंदे आ उही करदे आ। मेरे मूंहों अचनचेत निकल गिआ कि अछ्छा इत्थे वी अडानी ते अंबानी आ गए। उह मेरे वल्ल अजीब जिहा मूंह बणा के कहिंदा नहीं 'तुहाडा' अडानी तां कोले दीआं ख़ानां 'च मूंह मारदा फिरदा। इत्थे तां कणक अते दालां 'च होर ही अडानी पैदा होए फिरदे हन। पिछले दिनां 'च सी.बी.ऐच्च. गरुप्प बारे काफ़ी कुझ चंगा सुणिआ सी पर कहिंदे हन कि राह पए जाणीए जां वाह पए। जौन कहिंदा मैनूं तां लगदा गिआन साडी कुआलिटी लाईफ़ नूं खा गिआ। साडे पिओ दादे अनपहड़ सन। उहनां कोल भावें वसीलिआं दी घाट सी पर चंगी सिहत अते शाही ज़िंदगी सी। जौन दीआं गल्लां दा दरद अज्ज कल पहड़-लिख गिआनवान कहाउंदी पीहड़ी 'ते सवालीआ निशान ला रिहा सी।

अडानी दी गल्ल आउण ते मैं किहा कि उह तां वपारी आ पर जिस नें उस नूं इह वणज शुरू करवाउण 'च दलाली खाधी है उस दा तां छेती ही मूंह काला होवेगा। किउंकि मेरा मंनणा है कि कहावतां कदे झूठीआं नहीं हुंदीआं। उह हैरान जिहे हो के कहिंदे तूं जाणदा उस दलाल नूं? मैं किहा हां उसे दे सताएं साडे किसान नूं वी सत्त महीने हो गए सड़कां ते रुलदे नूं। उह कहिंदे की इह सच्च है कि उह सिरफ़ दो घरानिआं दा प्रधान मंतरी है। मैं किहा नहीं इह सच्च नहीं असल 'च तां उह सारे भारत दा प्रधान मंतरी है पर पालतू सिरफ़ दो घरां दा। दिल्ल्ही दीआं सरहद्दां ते बैठे किसानां दी गूंझ इहनां दे कंनां तक्क पहिलां ही पुज्ज चुक्की सी।

जौन ते पाल सिर मार के (गोरिआं दा किसे गल्ल प्रती हमदरदी जताउण दा इह वख्खरा अंदाज़ है) आपणे भाव प्रगटाउंदे होए वाहे वाहण विच दी तुर पए। मैं नाल तुर पिआ गिठ्ठ गिठ्ठ लंमीआं मिरचां मिट्टी 'च दब्बीआं देख के कहिंदे अछ्छा हुण इत्थे दफ़ना दित्तिआं विंगीआं मिरचां? इह सुण असीं सारे दरद नाल लबरेज़ हासा हस्स पए ते हासते-हासते संतरिआं कोल आ गए। मैं किहा संतरे लैंदे जाओ। उह कहिंदे हैगे साडी जेब 'च। मैं किहा इक-इक नाल की बणू ? मैं तोड़ के दिंदा तुहानूं, मिठ्ठे जिहे। मैं तोड़ी जावां ते उह कही जाण बस्स बहुत आ, पहिलां ही इस बार तेरा खरचा तुड़वाई 'ते बहुत होइआ। मैं आला दुआला देख रिहा सी कि काहदे 'च पावां तां जौन नें आपणी कोटी दी झोली बणा लई मैं उस दी झोली 'च संतरे पा के उहनां नूं अलविदा कही ते सोच रिहा सी दुनीआ 'च सभ तों पहिलां सारे रिशते इनसानीअत दे हुंदे हन। फेर उह रिशते कित्तिआं दे हिसाब 'च जोखे जांदे हन अते उहनां 'चों ही इक 'किसानीअत' दा रिशता जौन ते पाल नूं मेरे कोल खिच्च लिआइआ सी।