आख़र मदन नूं दफ़तरों दो छुट्टीआं मिल ही गईआं। इह छुट्टीआं उस नूं कई महीनिआं दे लगातार कंम पिछों मिलीआं सन, लगातार कंम जो उस दे दिमाग़ नूं घुटदा रिहा सी ते सरीर नूं सुकड़ांदा रिहा सी। कंम करदिआं ते उस नूं इह ख़िआल नहीं सी कि इस दा कोई इस किसम दा असर है। इह ते उस नूं उदों ही पता लगा जदों इनहां दो छुट्टीआं नूं आपणे सरीर दे अंग अंग पोटे पोटे विच वसा के उह घर नूं जाण लग्गा। दफ़तर विच वी जे कोई झाड़ां झपाड़ां नां पैण तां जिंद वाहवा सुखी जापदी पर झाड़ां तों बचणा कुझ औखा ही सी। टाईप करन विच कोई ग़लती हो जांदी, कोई काग़ज इधर उधर हो जांदा जां कोई चीज़ वकत सिर लभ्भदी नां ते फिर जान उते बड़ी औखी बणदी।

पर हुण ते आख़र छुटीआं मिल गईआं सन। दो छुटीआं लैण लई भावें उस नें की बहाना कीता होवे, असल विच उस नूं कोई ख़ास कंम नहीं सी। उह ते केवल छुटीआं मानणा चाहुंदा सी, घर जा के, ते घर जाण लई उह सटेशन वल तुर पिआ।

इनहां रसतिआं ते उह पहिलां वी कई वेर लंघिआ सी, पर अगे नां ते कदी उस नूं एना कुझ नज़रीं पिआ सी ते नां ही आला-दवाला कदी एना सवादी लग्गा सी। अज ते हर शै ते इक नवीं रंगत चहड़ी होई सी, इक नवीं दुनीआं पई वसदी सी।

सड़क दे इक पासिओं कुझ नच्चण गौण दी आवाज़ आ रही सी जिस तरहां कोई सिनमा घर होवे। किसे सिगरट बीड़ी दा प्रापेगंडा हो रिहा सी।

गले को है साफ़ करती, मज़े की यिह बात है।

एक बार पी के देखो, सी.पी. की सुगात है।

गाउण वाली इक पारटी हारमोनीअम नाल बड़ा पिआरा गउं रही सी ते नाल इक छोटी जिही कुड़ी घुंगरू पाई फेरीआं लै लै के नच्च रही सी। ढेर सारे मज़दूर, पिंडां विचों आए होए जट्ट, फ़रंतू मुंडे इह गौण सुण रहे सन। मदन वी सुनण लई खलो गिआ। किंना वधीआ गौं रहे सन इह ते उह घुंगरूआं वाली कुड़ी किस तरहां ताल बंनह के नच्च रही सी। जिस किसे नूं विहल होवे उह इनहां दा गाणा सुण सकदा सी। ‘‘इस दुनीआं विच किंनीआं मौजां नें’’ मदन नें सोचिआ।

गाउण वालिआं फिर गाउणा बंद कर दिता। कोल दी पानां वाली हट्टी तों उह पान लै के खाण लग पए ते मदन वी अगांह टुर पिआ। इक आदमी सड़क ते गा गा के किस्से वेच रिहा सी, जानदार पेंडू कवीआं दे लिखे होए मज़ेदार किस्से, जिनहां उते ऐकट्रैसां दीआं मूरतां बणीआं होईआं सन। वेचण वाला ‘‘नूंह सौहरा’’ ते ‘‘निक्का खसम ते वड्डी वहुटी’’ दे किस्सिआं विचों चोणवें बैंत पहड़ पहड़ के इस तरहां दी हवा बंनह रिहा सी जिवें लुचपुणे तों बिनां किसे नूं होर कोई कंम ही नहीं। चार आने दे उस इह दोवें किस्से ख़रीद लए ते पहड़दा पहड़दा अगहां टुरी गिआ।

सटेशन दे नेड़े पेशावर मंगतिआं दे बच्चे खेड रहे सन। आपणीआं तरसयोग शकलां तिआग के उह इस वेले हस्सूं हस्सूं पए करदे सन ते बड़े पिआरे लगदे सन। अध्धे इक पासे हो के पाकिसतानी बणे होए सन ते अध्धे दूजे पासे हो के हिंदुसतानी, ते दरख़्ख़तां नालों सजरे तोड़े होए पतरां वाले छापिआं नाल लड़ रहे सन। मदन वी खड़ा हो के उनहां दी लड़ाई वेखण लग पिआ।

‘‘आज तुम मांगने किउं नहीं गए’’? मदन नें उनहां तों हिंदुसतानी विच पुछिआ किउंकि उह हिंदुसतानी विच ही लड़ रहे सन।

‘‘अगर हम हर वकत मांगते ही रहें, बाबू जी, तो हम भी ऐसी मोटरों में चहड़े फिरें।’’ इक मंगते मुंडे नें कोलों लंघदी इक कार वल हत्थ करके किहा, ‘‘दो तीन घंटे मांगना किआ थोहड़ा होता है?’’

‘‘दो तीन घंटे मांगने की भी किआ ज़रूरत है’’ इक होर कांटे जिहे मुंडे नें गल्ल फड़ी, ‘‘आज कल सरदीओं में पतला सा कपड़ा ले कर ठिठरते हूए सटेशन के रासते पर बैठ जाओ, आधे घंटे में पैसे ही पैसे हो जाएंगे।’’ ते फिर उह आपो विच लड़न विच जुट गए।

मदन हैरान सी कि इह दुनीआं की तमाशा है! जद ग़रीब अमीर सारे ही नच्च रहे सन, खेड रहे सन तां फिर इह वध्ध घट्ट पैसा होण दा की रौला है? इह तरक्की ते सारिआं लई आज़ादी दी गल्ल की है? इह उतहां नूं चहड़ण बारे इंनी घबराहट किउं है?

सटेशन ते अपड़ के उस बुक सटाल तों अंगरेज़ी कहाणीआं दा संग्रहि ख़रीदिआ ते गड्डी विच बैठदिआं सार ही उह कहाणीआं पहड़न विच जुट गिआ। घर अपड़ के वी दोवें छुटीआं उह कहाणीआं पहड़न विच ही मसत रिहा।

इनहां कहाणीआं विच होर ही तरहां दीआं गल्लां लिखीआं होईआं सन। लेखक दे ख़िआल विच उह आदमी दुनीआं विचों वधेरे खटदा सी जो आज़ादी ते बेफ़िकरी नाल आपणीआं रुचीआं पिछे जांदा सी, जो ज़िंदगी नूं दोहां हत्थां विच फड़ के उस नूं आपणी इछ्छा अनुसार ढालदा सी। वडे आदमी उह सन, जिनहां जो मरज़ी आई उह कीता, भावें उह औखे होए, भावें सौखे। पातर जरनैलीआं छड्ड के खुल्हा डुल्हा जीवन बितांदे ते अख़ीर ते जदों सारे जीवन दा हिसाब किताब करदे तां इही कहिंदे कि नफ़े विच ही रहे हां। उहनां दे जीवन, मदन दे ख़िआल विच, सच्ची मुचीं ही बड़े वधीआ सन। पिआर दे जीवन, मन-मरज़ी दे जीवन, भला इनहां नाल किसे होर जीवन दा की टाकरा सी? मदन नूं इस तरहां लगा जिवें उह हुण तक किसे ग़लत रसते ते घुंमदा रिहा होवे ते फेर घुंमण घुंमाण पिछों ठीक रसता अज उस दी नज़रीं पै गिआ होवे। इस नवें रसते ते टुरन दा उस नूं बड़ा चाअ सी।

छुट्टीआं तों वापस आ उह फिर आपणे सटेशन ते उतरिआ ते घर जाण लई टांगे ’ते बैठ गिआ। अज उह हर बंदे दा दोसत सी ते हर इक विच डूंघी दिलचसपी रखदा सी। टांगे विच बैठ के उह टांगे वाले नाल गल्लां करन लग पिआ।

‘‘जी टांगा चलाण ते रब्ब दुशमण नूं वी नां लाए’’ टांगे वाला दिल दी भड़ास कढण लगा, ‘‘चूहड़ा होवे उस दे वी तरले करो ते उहदा भार चुको। दो पैसे दा सिपाही हुंदा ए, जदों उहदा जी करे, साडी पग्ग लाह दिंदा ए। मैं ते ऐवें वेखो वेखी फस गिआ जे, भला मैं की लैणा सी एस कंम विचों। जिदहे पल्ले गुण होवे, उहनूं टांगा वाहुण दी की लोड़ ए। मैं ते चंगा भला बालटीआं बणांदा सां जे, हुण वी ओसे ई कंम ते टुर जाणा ए। जदों जी कीता बुकल मार के लग गए, जिंना कंम कीता ओने पैसे लै के लौढे वेले घर आ गए। कोई वाधा नहीं घाटा नहीं, चाकरी नहीं, मुथाजी नहीं।’’

‘‘सारी दुनीआं चाकरी ते बझेवें तों ख़लासी करा रही है, कोई आदमी बंदश विच नहीं रहिणा चाहुंदा’’ मदन सोच रिहा सी। ‘‘पर मैं थोड़े जिहे पैसिआं लई रोज़ झाड़ां खांदा हां। मैं वी कल दफ़तर नहीं जावांगा’’, उस नें अख़ीर फ़ैसला कीता।

उह नहीं जाणदा सी कि जे उह दफ़तर नां गिआ तां होर की कंम करेगा शाइद उस दा ख़िआल होवे कि उह वी कोई इहो जिहा कंम सोच लएगा, जिस विच बझेवां नां होवे, जिस विच किसे दा डर नां होवे, पैसे भावें थोड़े ही होण।

अगले दिन उह दफ़तर लई तिआर नां होइआ। रज़ाई विच पिआ ही कहाणीआं दी किताब पहड़दा रिहा। ‘‘जी अज दफ़तर नहीं जाणा?’’ उस दी वहुटी नें हैरान हो के पुछिआ।

‘‘नहीं’’।

‘‘जी, किउं नहीं जाणा?’’ उह जाणदी सी कि छुटीआं ख़तम हो गईआं हन।

‘‘बस हम नहीं जाएंगे,’’ मदन नें आकड़ के उरदू विच जवाब दिता ते फिर किताब पहड़न लग पिआ।

उस दे बच्चे उस दे दुआले खेडदे पए सन, पर अज उह इनहां तों खिझ्झदा नहीं सी, सगों उस नूं उह डाहढे पिआरे लगदे सन। उस नूं इस तरहां जापदा सी जिवें उस दी अकल तों कोई पुराणा परदा लहि गिआ होवे। अज उह आले दुआले दे हर इसतरी मरद नूं आपणा जीवन सवादला बनाण बारे सलाह दे सकदा सी। उस दा जी करदा सी कि लोकां दे घरीं जा के आखे, ‘‘मैनूं जीवन दा असली भेद लभ्भ पिआ है, तुहाडे भले लई मैं तुहानूं वी दसण आइआ हां।’’

पिछले दिनीं आंढ-गुआंढ होईआं घटनावां उस नें इस नवीं आई अकल ते जाचणीआं शुरू कीतीआं।

‘‘इह साहमणे घर वाली कुड़ी जे उस दिन आपणे दोसत नाल दौड़ जांदी ते दुनीआं तों डर के उहनूं नांह नां करदी तां बाकी दी उमर बड़ी सौखी कटदी।’’ मदन नें दिल विच फ़ैसला दिता। ‘‘इस नवें विआहे मुंडे नें बड़ी भारी ग़लती कीती है जो चोखे दाज पिछे पै के आपणे पिआर वाली कुड़ी छड्ड के दूसरी नाल विआह कराइआ।’’ उस नें इक होर मुआमले ते आपणी सिआणी राए प्रगट कीती।

किताब ख़तम करके उस दुपहिर दी रोटी खाधी ते फिर सोचण लगा कि उस नें अगों की करना है, रात तक उह सोचदा रिहा, पर सुझिआ कुझ नां ते अख़ीर इह फ़ैसला कीता कि अजे दफ़तर ही जाओ ते जदों कदी होर कोई कंम सुझ्झेगा तां नौकरी छड्ड देवांगा।

अगली सवेर दफ़तर जांदिआं मदन दे दिल विच डर सी कि कल दी ग़ैर हाज़री दा की बणेगा? दफ़तर विच वी उस दे मित्तरां दे दिल विच घबराहट सी कि पता नहीं मदन नूं की सज़ा मिले। साढे दस वजे मदन नूं सुपरिटैंडैंट वलों सद्दा आ गिआ।

सुपरैंटैंडैंट साहिब आपणे दफ़तर विच कुरसी नाल ढो लाई खड़े सन। हत्थ विच उनहां मघिआ होइआ सिगरट फड़िआ होइआ सी।

‘‘कल किउं नहीं आए तुसीं?’’

मदन चुप सी, ‘‘इह वी ते आख़र सरकारी दफ़तर है, इह ते नहीं नां हो सकदा कि जदों मरज़ी होवे आ जाउ ते जदों मरज़ी होवे नां आओ।’’ ‘‘जी, इक वारी मेरा कसूर मुआफ़ कीता जाए’’, मदन नें बड़े औखे हो के संघों आवाज़ कढ्ढी, पर उस दा अंदर घिर रिहा सी। उस नूं इस तरहां लगदा सी जिवें उस नूं बड़ी तेह लगी होई है ते जे झट पट पाणी नां मिलिआ तां उह खड़ा नहीं रहि सकेगा।

‘‘कसूर मुआफ करना ते मेरे वस्स दी गल्ल नहीं, तैनूं पता है कि मैं तैनूं सीनीअर कलरक बणाए जाण लई सिफ़ारश कीती सी। उह गल्ल ते हुण गई। तैनूं सज़ा की मिलणी है इह फ़ैसला डिपटी सैकरेटरी साहिब नें करना है। पर मुशकल है ते इह है कि इनहां कच्चीआं नौकरीआं विच अफ़सर जो सज़ा चाहे दे सकदा है। नौकरीउं जवाब मिल जाणा कोई वड्डी गल्ल नहीं। मैं हैरान हां कि तुसां लोकां नूं आपणे आप दा आपणे बाल बच्चे दा रती फ़िकर नहीं।’’

मदन दे लत्तां पैर निघर चुके सन। उस नूं आपणे साहमणे हनेरा लग रिहा सी। इस तरहां जापदा सी जिवें उस दी छातीं विचों किसे रुग्ग भर के आंदरां कढ्ढ लईआं होण ते उस दा सारा दिल नचोड़ लिआ होवे। उह ढहिण लग्गा पर सुपरिटैंडैंट साहिब दे दोहां मोढिआं नूं हत्थ पा के उनहां दी छाती ते ढो ला के डिगनों बच गिआ। उस नूं एना समझण दी होश अजे बाकी सी कि इस तरहां खड़े होणा बड़ी बदतमीजी है, पर उह भों ते डिगणा नहीं चाहुंदा सी।