आपणे ढिड्ड तों दो-तिंन दिन प्रेशान रहिण पिछ्छों मैं लभ्भ-लभा के इक्क दिन ढिड्ड दा (आपणे जाणे) मुबाईल मिलाइआ। किसे नें अग्गिओं सतिकार नाल हैलो किहा पर मैं औखा जिहा हो के पुछ्छिआ, “सुणा बई ढिड्ड सिआं, की हाल ऐ तेरा? कई दिनां तों मैनूं प्रेशान करीं जाना ऐं।”

अग्गिओं जवाब आइआ, “दस्सो जनाब, कीहदे नाल गल्ल करनी ऐं? ढिड्ड विच्च तां असीं कई जणे आं। जिगर ऐ, गल्ल-बलैडर ऐ, पित्ता, मिहदा, छोटी आंत, गुरदा ते होर कई कुछ, फेफड़िआं तों लै के थल्ले तक, तुहाडा मोहरला हिस्सा सभ ढिड्ड है। कोई इस नूं पेट वी कहिंदा है ते कोई ऐबडोमन वी।”

थोहड़ी जिही किरकिरी होई देख के मैं किहा, “उह तां ठीक ऐ, मेरा मतलब उस भले-माणस तों ऐ, जिहड़ा मेरे खाणे नूं हज़म करदा ऐ।”

जवाब आइआ “पर इह कंम वी कोई इक्क जणा नी करदा, इस कंम वासते वी कई अंगां दी इक्क टीम ऐ। मूंह तों लै के थल्ले तक इस टीम दे कई अंग नें, जिहड़े खाणे नूं चित्थण तों लै के मल खारिज होण तक आपो-आपणी भूमिका नभाउंदे नें। इहनूं ‘पाचन-प्रणाली’ जां ‘पाचन-’सिसटम” कहिंदे नें। मैनूं लगदा ऐ तुसीं मिहदे दी, ‘सटौमक’ दी गल्ल करदे ओं किउंकि बहुते लोक इसे नूं ढिड्ड समझी जांदे नें। मैं तुहाडी उहदे नाल गल्ल कराउना।”

नमोशी दे मारे दा मेरा दिमाग वी थोहड़ा ठिकाणे आ चुक्किआ सी ते मिहदा वी पूरी नरमाई नाल बोलिआ, “शुकर ऐ जनाब, मैं वी तुहानूं याद आइआ। तुसीं सुण ई लिआ ऐ कि मैं तां खाणे दे ‘पाचन-सिसटम’ दा इक्क हिस्सा आं। सरीर विच्च ‘पाचन-सिसटम’ वरगे दस-गिआरां होर सिसटम कंम करदे नें: दिमाग दे ताणे-बाणे दा सिसटम, साह दा सिसटम, खून दे दौरे दा, हड्डीआं दे ढांचे दा, पिशाब खारिज करन दा सिसटम आदि। पर तुसीं गल्ल प्रेशानी तों शुरू कीती ऐ। प्रेशान तुहानूं मैं नहीं करदा, इहदे ज़िंमेवार तां तुसीं आप ओं। जिस नूं तुसीं प्रेशानी समझदे ओं इह तां मेरे सुनेहे नें कि संभळ जाओ ... नाळे सुनेहा वी उदों ई भेजीदा ऐ, जदों गल्ल बसों बाहर हो जावे। जदों कदे तुहानूं ऐं लगदा ऐ कि मैं प्रेशान कर रिहा आं तां समझ लवो कि इह दिक्कत किते होर ऐ। कई वार तां लोक दिल दे दौरे तक नूं मेरा दरद समझ के अण-गौळिआ कर दिंदे नें। इसे तरहां ‘गल्ल-बलैडर’ दे दरद नूं वी लोक नी समझ सकदे।”

मैं फिर तड़ी दिखाउणी चाही, “कमाल करदैं, मेरा ई कसूर कढ्ढी जानै। मेरा बहुता वाह तां तेरे नाल ई पैंदा ऐ, इसे कर के कदे तैनूं किसे गल्लों विरवा नी रख्खिआ। दिन दे घंटे चौवी हुंदे नें ते भोजन तैनूं छत्ती प्रकार दे खवाईदे नें।”

मिहदा मेरे वल्ल सिध्धा हो गिआ, “बहुत भुलेखे विच्च ओं जनाब. जिनहां नूं तुसीं छत्ती प्रकार दे भोजन कहिने ओं, ओही तां मेरी जान दा खौअ बणे होए नें। नाळे इह किहड़ा जनाब तुसीं मेरे वासते करदे ओं, इह तां तुसीं आपणी लाडली जीभ वासते करदे ओं। उहनूं तुसीं ऐना सिर चहड़ा रख्खिआ ऐ कि उहदी हर छोटी-वड्डी रिहाड़ पूरी करन लई कौड़ा-कसैला, चंगा-मंदा मूंह विच्च तुंनी जांदे रहिंदे ओ। जीभ नें तां कोई चीज़ आपणे कोल रख्खणी नी हुंदी, बस्स सुआद लिआ, अगांह मेरे हवाले कर’ती। खैर रख्खणा तां कुछ मैं वी आपणे कोल नी हुंदा पर मैं आपणी पूरी वाह लाके बणदी कारवाई करके ई सभ कुछ अग्गे छोटी आंत नूं भेजदां।”

मैं ढैळा जिहा हो के बोलिआ, “आह जीभ आळी गल्ल तां तेरी ठीक ऐ। रिहाड़ण तां खैर इह शुरू तों ई ऐ, मैं मंनदां, पर हुण तां गल्ल मेरे वी बस्स तों बाहर होई जांदी ऐ।”

मिहदा होर करड़ा हो गिआ, “छत्ती प्रकार दे भोजन खा-खा के किहड़ा उह रिहाड़ करनों हट’गी। उहनूं तां जिंना चंभलाई जावोंगे, ओना ई होर चांभळू। नां उह किसे नूं सिध्धा बोलदी ऐ, अखे चंगा खाणा ते मंदा बोलणा। पर इह कंम हुण बहुती देर चल्लणा नी, करड़े हो के उह नूं समझाउणा पैणा ऐ। पर उहनूं समझा तद सकोंगे जे पहिलां आपणे-आप ’ते काबू करोंगे। मेरीआं गल्लां कौड़ीआं नें पर सरीर-परिवार दे भले लई समझणीआं पैणीआं नें, मंनणीआं पैणीआं नें।”

मैं गंभीर हो गिआ, “जरूर मंनांगे, पर पहिलां समझा तेरा कंम की ऐ?”

मिहदा समझाउण लग्गिआ, “सरल शबदां विच्च मेरा कंम मां वरगा ऐ। सरीर दे सारे अंगां वासते खुराक तिआर करनी। इह ऊुरजा विच्च तबदील हुंदी ऐ, जिस नाल सारिआं नूं आपो-आपणा कंम करन दी शकती मिलदी ऐ। जो कुछ वी तुसीं मूंह विच्च पाउने ओं, उहदा किणका-किणका खाणे दी नाळी राहीं मेरे विच्च आउंदै ते मैं इहनूं ‘सटोर’ करदां। इस विच्च लोड़ींदा तजाब ते कुछ होर रसां नूं मिलाउना। इस इकठ्ठे होए सारे खाणे नूं सहिज-मते नाल हिला-हिला के इक्क-रस कहड़ी वरगा कर लैना ते इहनूं हज़म होण जोगा करदां। फिर थोहड़ा-थोहड़ा कर के हेठां छोटी आंत विच्च भेजदा रहिना ते आप पूरा विहला हो जाना। हाजमे दा बहुता कंम तां छोटी आंत विच्च हुंदा ऐ। भावें मैं आपणा सारा कंम बहुत वधीआ ढंग नाल करदां पर खुराक तिआर तां उसे समगरी विच्चों करनी हुंदी ऐ, जिहड़ी तुसीं खाने ओं। मैनूं दुख्ख हुंदा ऐ जदों मैं तुहाडा खाधा अवळा-सवळा अग्गे भेजदां। किउंकि मैं मां दी भूमिका नभाउना, इसे करके मैनूं सारे अंगां बारे फिकर ऐ, गिआन ऐ।”

मैं हरानी नाल पुछ्छिआ, “आह तजाब आळी गल्ल तां बहुत औखा कंम ऐ। इह तैनूं नी कुछ कहिंदा।”

मिहदा हौसले विच्च बोलिआ, “औखा कंम तां है ई पर डिऊटी तां फिर डिऊटी ई ऐ जनाब। तजाब तों बगैर खाणा हज़म ई नी हो सकदा। मेरे विच्च रब्ब नें बरकत पाई ऐ कि मैं एहनूं संभाळ सकदां, इहदी वरतों कर सकदां। जे इह तजाब किते वापस खुराक दी नाळी विच्च जां हेठां छोटी आंत विच्च चलिआ जावे तां बहुत खराबी करदा ऐ। इसे करके जदों मैं खाणे नूं रळगड्ड करदा आं तां आपणे दोनो पासे दे ‘वालव’ बंद रख्खदां। पर जे ऐं ई धक्का हुंदा रिहा तां इह पूरा कंम करनों हट जाणगे। खट्टे डकार, छोटी आंत विच्च ‘अलसर’ ते फिर होर वड्डीआं बिमारीआं।”

मैं अधीनगी जिही नाल पुछ्छिआ, “मेरी खाधी खुराक विच्च तैनूं की गलत लगदा ऐ?”

मिहदा चहड़त विच्च बोलिआ, “अज्ज दी घड़ी तां बहुता गलत ई लगदा ऐ। तुसीं आपणी पटरोल दी कार विच्च कदे डीज़ल नी पवाउंदे पर मेरे नाल इस तरहां दा धक्का रोज़ करदे ओं। जिहड़ा कुछ मैनूं दरकार ऐ, उह तुसीं खांदे नी, ऐधरला-ओधरला खांदे रहिने ओं ते खा-खा के कुख्खां बाहर कढ्ढ लैने ओं। इस तरहां सभ तों वध्ध धक्का ते बदसलूकी तुसीं मेरे नाल करदे ओं। इह तां सदके उप्पर आळे दे कि उहने मैनूं बणाइआ ई ऐना सखत-जान ऐ कि मैं इह धक्का-धोड़ा बरदाशत करन जोगा हां। थोहड़े कीतिआं भावें मैनूं कुछ नी हुंदा, पर मेरी वी कोई हद्द ऐ।”

मैं गल्ल अग्गे तोरी, “फेर मैं की खावां ते की छड्डां?”

ऐने थोहड़े समें विच्च मैं थोनूं इह सभ नी दस्स सकदा, इह तां आपणे-आप विच्च इक्क वड्डा विशा ऐ। इस वासते तां बड़े सिआणे सलाहकार, डाकटर ते ‘डाईटीशीअन’ मिल जांदे नें। होर ऐनीआं किताबां, नावल, किस्से, कहाणीआं पहड़दे ओं। ऐधरलीआं-ओधरलीआं वीडीओआं देखदे ओं, कदे मेरे बारे जां मेरे होर भैणां-भरावां बारे वी कोई चंगी किताब पहड़ लिआ करो। इह तां थोडी ज़िंमेवारी ऐ, किसे नें थोनूं घरे बैठिआं नूं तां दस्सण आउणा नी। सिहतमंद खाणा खाणा ते ठीक मिकदार विच्च खाणा तां थोडी ज़िंमेवारी ऐ ते थोडे हत्थ विच्च ऐ। अमरीका दे मशहूर डाकटर ऐंडरिऊ वील दा कहिणा ऐ कि दवाई ते ज़हिर विच्च मातरा तों बगैर होर बहुता फरक नी हुंदा। हफते विच्च इक्क वार मैनूं छुट्टी मिलजे तां कंम बागो-बाग ऐ।”

मैं भंबळभूसे विच्च पै गिआ ते किहा “तूं बड़ा कुछ दस्सीं जांदा ऐं, मैं कदे इनहां गल्लां बारे बहुता सोचिआ ई नी, नां इह मेरे समझ विच्च आ रहीआं नें।”

मिहदे नें दिलासा दित्ता, “मेरे अंदर की कुदरती वरतारे वरतदे नें उह तुहानूं समझ नी आ सकदे, इह तां डाकटरां दा कंम ऐ। ते तुहानूं इह सभ समझण दी लोड़ वी नी। उदाहरण वजों कार दी अंदरली मशीनरी बारे किहड़ा तुसीं कुछ जाणदे ओं। उहदे सिरफ पंज-सत्त जंतरां नूं जाणदे ओं, ओनहां दे सिर ’ते कार भजाईं फिरदे ओं। मुबाईल दी उदाहरण वी ढुकदी ऐ। इही गल्ल सरीर दी ऐ, थोनूं एहदे बारे खोजां करन दी लोड़ नी। जाणकारां नें पहिलां ई बथेरीआं कर रख्खीआं नें जिहड़े सरीर नूं तंदरुसत रख्खण दे गुर दस्सदे आ रहे नें, उनहां नूं जाणो ते पूरा पहिरा दिओ।”

मैं होर जाणन लई काहळा हो गिआ, “इह गल्ल तां मैं समझ गिआ, अग्गे दस्स कि मेरे हत्थ-बस्स होर की ऐ?”

मिहदे नें अगली मत्त दित्ती, “तुसीं खाणे नूं चंगी तरहां चित्थ सकदे ओं। माहरां दा कहिणा है कि इक्क बुरकी नूं 40-45 वार चित्थो पर तुसीं बुरकी नूं पंज-सत्त बार दरड़-फरड़ कर के मेरे हवाले कर दिंदे ओं। पहिली बुरकी मूंह विच्च चित्थ हो रही हुंदी ऐ, दूजी तुसीं हत्थ विच्च फड़ के मूंह कोल पहुंचाई हुंदी ऐ। समझण दी लोड़ ऐ कि मेरे अंदर कोई बिजली दी मधाणी तां लग्गी नी होई कि वड्डे-वड्डे टुकड़िआं नूं पीह सकां। नाळे इह कंम मेरा है ई नी, मेरे करन आळे मेरे आपणे कंम बथेरे नें। मैं आपणे कंम करां कि दंदां दा कंम करां? मैं तां आए खाणे नूं सहिज-मते नाल मिलाउना आं जिवें कि हत्थ दीआं चार उंगलां ते अंगूठे विचाळे किसे गिल्ली चीज़ नूं पोले-पोले मसळीदा ऐ।”

मैं आपणी जाणकारी लई पुछ्छिआ, “तूं शुरू विच्च सरीर दे 11-12 सिसटमां दी गल्ल कीती सी, उनहां बारे वी कुछ समझा दे।”

मिहदा आपणी गल्ल समझाउण लग्गा, “इह सभ ‘सिसटम’ बणाए तां कुदरत दे होए नें, डाकटरां नें सरीर दी ‘अनाटमी’ समझण-समझाउण लई इनहां नूं 12 सिसटमां विच्च वंड लिआ है। हर ‘सिसटम’ दे अग्गे अनेकां अंग नें ते सारे अंगां दा आपस विच्च पूरा तालमेल ऐ। अग्गे सारे सिसटमां दा आपस विच्च पूरा ताल-मेल ऐ। मनुख्खी सरीर दा सारी स्रिशटी विच्च कोई जोड़ नी। इह तां कुदरत दी अदुत्ती बणत ऐ, लौकिक पख्खों वी ते अलौकिक पख्खों वी। सरीर दी तां गल्ल ई वड्डी ऐ, इहदे किसे इक्क अंग दा वी कोई जोड़ नी। तुसीं सतिंदर सरताज दा गाणा सुणदे ई ओं कि ‘बंदे दे हत्थां वरगा कोई औज़ार नी बणिआ …’ सरीर दे हर अंग वासते इस तरहां दा गाणा लिखिआ जा सकदा ऐ।”

मैं पुछ्छिआ, “ऐनी मिहनत करके किंना कु फैदा होजू?”

मिहदा बोलिआ, “मेरी गरंटी ऐ कि जे मेरे आखे लग्ग जावों तां तुहाडीआं कई बिमारीआं दा इलाज हो सकदा ऐ।”

मैं हैरान होके किहा, “ऐना कुछ करके तां सरीर दीआं सभ बिमारीआं दा इलाज होणा चाहीदै?”

मिहदे नें असलीअत समझाई, “नहीं, नहीं, इस वासते तां होर वी बड़ा कुछ करना पैंदा ऐ। इह गल्ल पल्ले बंनह लवो कि चंगी खुराक दी पूरी सिहत लई ‘लोड़’ ऐ पर ‘मुकंमल’ नी। सरीर दे हर अंग दी यथायोग कसरत ते मन दी साधना वी इंनीआं ई ज़रूरी गल्लां नें। इहनां तिंने गल्लां नाल तुहाडा काइआ-कलप हो जाऊ ते तुसीं सरीरक पख्खों वी ते मानसिक पख्खों वी इक्क दे दो बणजोंगे।”

मैं आपणे अंदर दा पाळा सांझा कीता, “तेरीआं गल्लां नें तां मेरीआं अख्खां खोल्हतीआं पर आदतां बदलणीआं बहुत औखीआं लग्गदीआं नें।”

मिहदे नें सिरे दी सलाह दित्ती, “कोई औखीआं नी, सिरड़ ते अभिआस नाल कोई कंम इक्क महीना कर लउ, ओही नवीं आदत बण जांदी ऐ। नाळे आपणे वासते करनै। ‘मंदा चंगा आपणा आपे ही कीता पावणा।’ इक्क ज़रूरी बेनती होर ऐ कि जिवें मेरे नाल अज्ज गंभीरता नाल गल्ल कीती ऐ, ओवें होर अंगां नाल वी ज़रूर करिआ करो। इहनूं नेम ई बणा लउ ते सिख्खे सबकां ’ते अमल वी करो। थोडा लोक तां संवरू ई संवरू, रब्ब नूं मिलण दा राह वी पध्धरा हो जू।”

अखीर विच्च मैं टिच्चर कीती, “तूं तां बहुत वधीआ पंजाबी बोलदा ऐं ते अंगरेज़ी वी खासी जाणदैं।”

मिहदे नें फड़क्क जवाब दित्ता, “चौवी घंटे तुहाडे नाल रहीदै जनाब। खरबूजे नूं देख के खरबूजा रंग फड़ ई लैंदा ऐ। तुसीं देखिओ, तुहानूं देख के तुहाडे संगी-साथी, हाणी-बेली वी तुहाडे वाले राह ’ते चल्ल पैणगे ...।”

पर मैं पूरी तरहां गंभीर ते सरीर दी रब्बी रहिमत दी सुहिरदा नाल संभाळ करन लई द्रिहड़-संकलप सी।