मैं मेरी कलम नूं आखिआ, "सरब सांझे गुरू नानक साहिब दा प्रकाश पुरब मनाइआ जा रिहा है। सारी दुनीआं गुरू साहिब दे सनेह विच्च भिज्जी उहनां बारे कुझ नां कुझ आख रही है ..... चल्ल आपां वी आपणे वल्लों कुझ्झ लिखीए... मेरी कलम हस्स पई ते सवाल कीता.. औकात है आपणी लिखण दी? "
" मतलब ?" मैं पुछ्छिआ।
" मतलब.... गुरू नानक साहिब नूं पहड़िऐ ?" उस नें सवाल कीता।
" हां.... गुरू नानक साहिब तां सभ दे सांझे नें। उनहां नूं तां सारे पहड़दे नें।"
" तूं पहड़िआ ?"
" हां .... बचपन तों पहड़दे आ रहे आं। जदों तों अख्खरां दी पछाण होई जां फिर इह वी आख सकदे आं कि जदों अख्खरां दी पछाण वी नहीं सी होई उदों वी.... बापू जी ...आपणे ढिड्ड ते बिठा के कंठ करवाउंदे सी गुरू साहिब दी बाणी। " मैं आखिआ।
"वाह जी वाह! ......चलो इह वी दस्स दिओ कि गुरू नानक साहिब नूं अंदर किंना उतारिआ? "
" उह तां सभ दे दिलां दे अंदर वसदे नें..... सभ दे सांझे.. जिवें सूरज नूं बुक्कल विच्च नहीं लुकोइआ जा सकदा इसे तरहां गुरू साहिब दी रूहानी रौशनी नूं वी कोई लुको नहीं सकदा कोई । उह किसे खास दी जागीर नहीं सभ दे सांझे नें.....।" मैं अजे गल्ल पूरी वी नहीं सी कीती। उस नें खिझ के आखिआ,
"मैं सिरफ़ तेरी गल्ल करदी आं, तूं सिरफ़ आपणी समझ दे अधार ते जवाब दिआ कर। "
मैं संभलण दी कोशिश कीती। मैनूं लग्गिआ कलम मैनूं उलझा रही है।
" गुरू नानक साहिब बारे तुसीं काफ़ी कुझ्झ जाणदे ओ।" उस नें फिर किहा।
" नहीं... थोहड़ा जिहा। " मैं सोच के किहा । मैं समझ लिआ सी कि मैनूं ओना कुझ्झ नहीं पता जिंना मैं सोच रख्खिआ सी।
" गुरू नानक साहिब नूं किवें जाणिआ जा सकदा है । उह तां खुद लिख गए नें.... 'एवडु ऊचा होवै कोइ तिसु ऊचे को जाणै सोइ।।' मैं किहा। उह सिरफ़ मुसकराई ।
मैनूं पता सी उह की सवाल करेगी। मैं आपणे आप ही कहिणा शुरू कर दित्ता..
" गुरू साहिब भावें इत्थे प्रमातमा दी गल्ल करदे नें... पर मैं इस लई आखिआ है कि गुरू साहिब नूं समझण लई वी उहनां वरगी उच्च अवसथा दी ज़रूरत ऐ। उस अवसथा दे नेड़े तेड़े वी नहीं ढुक सकदी मैं। "
" चलो..... इह दस्सो... गुरू नानक साहिब दे दरशन करदे ओ? "
" हां। " मैं किहा।
" कित्थों ? " उस फिर पुछ्छिआ।
" धारमिक सथानां ते, दुकानां ते, घरां दीआं कंधां 'ते , किताबां विच्चों, मोबाईल विच्चों नैट्ट खोल्ह के कर लईदे नें रोज़। "
" उहनां दे असल दरशन पतै कित्थों हुंदे नें? " उह गंभीर हो के बोली। मैं चुप्प कर के उस वल्ल वेख रही सी।
" उहनां दे असल दरशन उहनां दी बाणी विच्चों हुंदे नें.... दूसरे उहनां बारे की लिखदे नें, की बोलदे नें, की तसवीरां विच्च दिखाउंदे नें, इही देखदे ओ नां तुसीं ? पर जो उह कहि गए नें उस बाणी विच्चों दरशन कीते कदी? " मैं चुप्प सी कुझ्झ नहीं सी सुझ्झ रिहा।
" गुरू नानक साहिब दी बाणी कंठ होवेगी.... पहड़दे सुणदे वी होवोगे। आपणे सुविधा अनुसार मतलब वी कढ्ढ लैंदे होवोगे।"
" हां। " मेरीआं नज़रां झुकीआं होईआं सन। उस नें शाइद मेरी हालत भांप लई सी।
" चलो छड्डो..... बहुते लोकां दा इही हाल ऐ। लोकां दा ई नहीं कई वड्डे वड्डे भाशण देण वाले वी अमलां वाले पासिओं खोखळे हुंदे नें। तैनूं शाइद इह वी नहीं पता होणा जिहड़े आपणे आप नूं गुरू नानक साहिब दे बहुते नेड़े होण दा दिखावा करदे नें... उह वी खाली पीपिआं दी तरहां खड़कणा ही जाणदे नें बस। उहनां नें जो बोलणा हुंदै, उह वी उहनां दे आपणे विचार नहीं हुंदे किसे होर दे हुंदे नें।" उस दीआं गल्लां सुण के मैं वी नज़रां उप्पर नूं चुक्कीआं।
" सारे इक्क वरगे नहीं हुंदे..... बथेरे बहुत चंगे वी हुंदे नें।" मैं किहा।
" हां हुंदे नें... तैनूं पतै असीं बड़ीआं टौहरां मारदे आं...गुरू नानक साहिब साडे नें। पर असीं उहनां दे बणीए तां गल्ल बणे । जे असीं उहनां दे बणे हुंदे तां किरत दा मुल्ल पैंदा। किरत सभ्भिआचार नूं खोरा नां लग्गदा। किरत करन वाले आपणे हक्कां लई संघरश दे राह ते तुर होए नें। गरमीआं सरदीआं सड़कां 'ते गुज़ारन लई मजबूर नें। बाबे नानक नूं सिर झुकाउण वाले, उहनां दे जनम दिन 'ते सारे जगत नूं वधाईआं देण वाले उहनां दे किरतीआं नूं रोल रहे नें...... है नां कमाल दी गल्ल।"
" हां..... दुखदाई वी ऐ इह सभ ।" मैं किहा।
" दुनीआं दी कहिणी ते करनी विच्च फरक आ गिआ। लोक दिखावा कुझ होर करदे नें... हुंदे कुझ होर नें। कई वार तां सारी उमर आपणे आप नूं उही समझ बैठदे नें जो उह नहीं हुंदे। जदों सुरत आउंदी ऐ उदों पछताउंदे नें। " उह गंभीर सी।
" आपां लिखीए हुण कुश .....।" मैं मुसकराउंदिआं किहा। उस नें हैरानी नाल वेखिआ ते बोली, " अजे वी लिखण दा सोच रही एं ? "
" हां। " मैं किहा।
" की लिखणा चाहुंदी एं ? "
" सच्च। "
" हिंमत है? " उस दा सवाल सी।
" हां.... सच्च लिखणा औखा नहीं... झूठ नूं सच्च दे लेप चहड़ा के लिखणा औखा हुंदै ।" मैं किहा।
" की लिखीए?"
" उही जो हुणे गल्लबात कीती। "
" मतलब? " उह हैरानी नाल तक्क रही सी।
" मतलब कि असीं फोकीआं फहड़ां मारन वाले आं.... असीं गुरू बाबे दी गल्ल मंनण नूं तिआर नहीं। असीं कहिंदे कुझ होर 'ते करदे कुझ होर हां। दिखावे ते शोहरत लई बहुत कुझ अजिहा कहिंदे जां करदे हां जो सानूं खुद नूं वी ठीक नहीं लग्गदा हुंदा कई वार। पता वी होवे कि गलत बोल रहे हां तां वी बोली जांदे हां ।पता होवे कि गलत बंदे दी तारीफ़ करदे हां तां वी करी जांदे आं। पता होवे गलत बंदे दे नाल तुरदे हां फिर वी नहीं रुकदे । आपणे आप नूं दुनीआं तों वख्खरा रख्ख के सोचदे हां कि गुरू साहिब दे सिधांतां ते आपणे आप नूं तोरना ज़रूरी नहीं समझदे। इही सोचदे आं कि बाकी दुनीआं नूं चल्लणा चाहीदा है। गुरू साहिब दे उपदेश पहड़ के सुणाउण नाल ही आपणी ज़िंमेवारी तों मुकत हो जांदे हां। अमल करन लई दूसरिआं नूं आखदे हां। " मैं पता नहीं किंना कु बोलदी। उस नें मैनूं रोकदिआं आखिआ,
" चल बस कर। "
उस दे बुल्ल्हां ते वड्डी सारी मुसकान आई। मैं उस दे चिहरे वल्ल देखिआ उस दीआं अख्खां वी मुसकरा रहीआं सन। असीं घुट्ट के जफ्फी पाई। मैं उस दा मत्था चुंमिआ ते उह कागज़ां नूं सजदा कर के अख्खरां नूं मोतीआं वांग प्रोण लग्गी।