कई सालां बाअद इक्क दिन मैनूं आपणे पुराणे कालज जाण दा सबब बणिआ। दोसतां दीआं शरारतां दीआं यादां सज्जरीआं हो गईआं। शरतां ला के सभ तों वध केले जां समोसे खाण दे मुकाबले – लगिआ कल दी गल है। प्रोफैसर - जिनहां नूं मुंडिआं नें, आपसी गलबात लई, आलफ़ा, बीटा, गामा, थीटा दे नां दित्ते होए सी। अचानक अख्खां अग्गे उस बज़ुरग सेवादार दा चिहरा आ गिआ जिस नूं कालज विच हर कोई “रब्ब जी” कहि के बुलाउंदा हुंदा सी। उस दी डिऊटी हर 45 मिनटां बाअद तिंन वार “टंन-टंन” दी घंटी वजाउण दी सी जिस नाल इक्क पीरिअड खतम हो के दूजा शुरू हो जांदा सी। कदी कदी “रब्ब जी” किसे कंम गए होणे तां किसे मुंडे नें जा के 15-20 मिनटां बाअद ही घंटी वजा के भज्ज जाणा।

“रब्ब जी” बज़ुरग सन पर कदी बैठे नहीं सी दिसदे, फिरदे-तुरदे रहिंदे। सवेरे बरांडिआं विच मशक नाल पाणी दा छिड़का करदे, फिर नौं वजे इक्क लंमी घंटी खड़का के पहड़ाई शुरू करन दा ऐलान कर दिंदे। इट्टां दे फरश तों ताज़गी दी वख्खरी महिक महिसूस होणी। कोलों लंघदिआं हरेक नें उनहां नूं फतिह बुलाउंणी अते हाल-चाल पुछणा। मुसकरांदा जवाब मिलणा – “शुकर है”। शामी चार वजे सवेर वरगी लंमी घंटी वजा दिंदे।पित्तल दे इक्क गोल तवे जिहे उते लक्कड़ दे हथौड़े नाल सट्ट मारन दा उनहां दा वख्खरा अंदाज़ सी।

उह कालज दीआं गरांऊंडां दे लागे इक्क कोठड़ी विच इकल्ले रहिंदे सन जिथे लागे इक्क टिऊब-वैल ् हुंदा सी। कोठड़ी विच इक्क टीन दा पुराणा टरंक पिआ दिसदा सी जिस विच उह दसदे सन कि बदलण लई सिरफ इक्क जोड़ा कपड़े ते इक्क चिट्टी दसतार सीं। इक्क दिन असीं पुछिआ – बाबा जी तुसीं विआह किउं नहीं कराइआ? कहिंदे - इह कालज मेरा परवार है, तुसीं मेरे इस परवार दे ही जीअ हो। वंड वेले मेरी मंगणी होई सी। हुण नां उस बीबी दा कोई पता है, नां मेरे मां-पिओ दा – की जाणां जींदे वी हैण कि नहीं। शाम नूं उह लंगर-हाल विच सानूं दाल, सबज़ी, परशादे वरताउण दी सेवा करन लग पैंदे। प्रबंधकां नें आप सतिकार नाल उनहां लई खाणा लिआ के साहमणे रख्खणा।

इक्क वार कुझ प्रोफैसरां नें उनहां नूं पुछिआ - बाबा जी तुहाडा नां ते बोहड़ सिंघ है पर तुहानूं लोक “रब्ब जी” किउं कहिण लग पए। हस्स के कहिण लगे – मैनूं शुरू विच लोक “रिफूजी” कहिंदे हुंदे सन। इथे आउण तों पहिले मैं इक्क बिरध घर विच कुछ साल सेवा करदा सी। उथे ही इक्क बहुत बीमार ते कमज़ोर बज़ुरग नें किते कहि दित्ता – तूं रिफूजी नहीं, तैनूं ते रब्ब जी नें पुत्तां तों वध साडी देखभाल करन लई ही साडे कोल भेजिआ लगदा है। उस दिन तों सभ नें, मेरे रोकण दे बावजूद, मैनूं “रब्ब जी” कहिणा शुरु कर दित्ता।

कालज दे इक्क पुराणे मुलाज़म नूं मैं पुछिआ – उह बाबा जी किथे नें जिनहां नूं लोक “रब्ब जी” किहा करदे सन। बड़े दुख भरे लहिज़े विच उस नें जवाब दित्ता – जी, उनहां दी सारी उमर दी मिहनत दी कमाई तां किसे नें डाका मार के लुट्ट लई।। मेरी हैरानी दी हद्द नां रही। मेरे मूहों निकल गिआ - भाई उह तां कोई सतजुगी जीव सी, उस नाल वी इस तरहां हो सकदा है? भरी अवाज़ विच उह मुलाज़म बोलिआ – सतजुगी जीवां नाल कलजुग विच इहो हो रिहा है। कालज दे लागे इक्क दिन उह इक्क पंसारी दी दुकान तों कुझ खरीदण गए। दुकानदार नें गल्लां करदिआं ऐवें पुछ लिआ – बाबा जी खरचा तां तुहाडा कोई खास नहीं, फिर तनखाह दा की करदे हो। बाबा जी कहिण लगे –, सोचिआ है किसे दिन अम्रितसर जा के जो कुझ कोल है पिंगलवाड़े दे आवांगा। मैं पैसे की करने?

लागे इक्क अजनबी जिहा बंदा खड़ा सी। दुकानदार नूं कहिण लगा – मैं इथे नवां आइआ हां, नौकरी लभ्भ रिहा हां। बच्चिआं लई कुझ ज़रूरी सौदा लैणा है, उधार दे दिउगे? मैं जलदी तों जलदी तुहाडे पैसे दे दिआंगा। दुकानदार दे साफ़ इनकार करन ते उह मुड़न ही लगा तां बाबा जी दुकानदार नूं बोले – कोई लोड़वंद गरीब जापदा है, चलो दे दिओ। नहीं दवेगा तां कोई फिकर नां करना, मैथों लै लैणा। बाबा जी दे पैरीं हथ ला के धंनवाद करदा होइआ उह आदमी समान खरीद के चला गिआ। उसे दिन शाम नूं जद बाबा जी आपणी कोठड़ी विच पुज्जे तां वेखिआ सारा समान खिल्लरिआ होइआ सी। गरांउंडा नूं पाणी लाउण गए मुलाज़म नें आ के दस्सिआ कि बाबा जी दी कोठड़ी विचों कोई उनहां दा सारा पैसा लै गिआ है। इक्क दम चार चुफेरे संनाटा फैल गिआ ते कालज दा हर बंदा उनहां दी कोठड़ी वल दौड़ उठिआ। पता लगिआ कि बाबा जी दी तनखाह दे सारे जमां कीते पैसे कोई दिने-दिहाड़े लुट्ट के लै गिआ है। लोक कहि रहे सन कि 90 साल दे इक्क नेक बुढ्ढे बाबे ते वी उस बंदे नूं दइआ नहीं आई। पुलस दा कहिणा सी इह डाका उस अजनबी आदमी दा कंम सी जिस दी इक्क दिन पहिले बाबा जी नें मदद कीती सी। अखीर, पुलस वलों फड़े कुझ शक्की नशेड़ीआं विचों उस अजनबी दी दुकानदार दी मदद नाल पछाण हो ही गई। इक्क दिन बाबा जी नें किसे नाल गल्लां करदिआं किहा – मैनूं पैसे जाण दा दुख नहीं, मैनूं पैसे दी लोड़ नहीं सी। दुख सिरफ इस गल दा है कि मैं आपणी बचत उनहां लावारिसां तक नहीं पुजा सकिआ जिनहां नूं असल विच इस दी ज़रूरत सी। कुझ दिनां बाअद “रब्ब जी” दुनीआं छड के आपणे असली घर पुज गए।

अज होरना वांग मैं वी हैरान हां - की सचमुच “रब्ब जी” दे घर विच वी चोरी हो सकदी है?