ਫ਼ਾਸਲੇ
April 2022
ਫ਼ਾਸਲੇ ਵਧਦੇ ਰਹੇ ਇਓਂ ਦਰਮਿਆਨ
ਦੋਸ਼ ਕਿਸਦਾ ਹੈ ਕਿਸੇ ਨੂੰ ਕੀ ਕਹਾਂ
ਆਪ ਹੀ ਵਿੱਛੜੇ ਅਸੀਂ ਛੱਡ ਕਾਰਵਾਂ
ਇੱਕੋ ਹੀ ਅਹਿਸਾਸ ਵੱਖ ਹੋ ਗਈ ਜ਼ਬਾਨ
ਧਰਤ ਜੋਬਨ ਆਇਆ ਭਰ ਗਏ ਸਭ ਗਰਾਂ
ਪੱਤਾ ਪੱਤਾ ਕਰ ਹੋਏ ਸਭ ਫਿਰ ਰਵਾਨ
ਜ਼ਿੰਦਗੀ ਦੇ ਸਾਰ ਵਿੱਚ ਮੈਂ ਕੀ ਲਿਖਾਂ
ਕੁਝ ਪਲਾਂ ਦੀ ਹੈ ਏਹਿ ਵੀ ਦਾਸਤਾਨ
ਕਿੰਨੀ ਸ਼ਿੱਦਤ ਨਾਲ਼ ਉੱਸਰੇ ਸੀ ਮਕਾਨ
ਰੁੱਤ ਬਦਲੀ ਕਦ ਲੈ ਕਰਵਟ ਮੌਸਮਾਂ
ਭੋਰਾ ਵੀ ਬੇਥਾਹ ਜੇ ਚਾਹ ਵਿੱਚ ਸੀਮਤਾਂ
ਤੂੰ ਤੂੰ ਮੈਂ ਮੈਂ ਕਰਦੇ ਮਿਟ ਜੇ ਨਾਂ ਨਿਸ਼ਾਨ
ਜ਼ਿੰਦਗੀ ਦੇ ਅਰਥ ਲੱਭੇ ਕੁੱਲ ਜਹਾਨ
ਮੈਂ ਨਿੱਕੇ ਜਿਹੇ ਦਵੰਧ ਵਿੱਚ ਫਸਿਆ ਫਿਰਾਂ
ਬਾਲ ਜੋ ਕੱਠੇ ਹੋਏ ਸੀ ਨੌਜਵਾਨ
ਕਦ ਗਏ ਵੰਡੇ ਦੋ ਧਾੜਾਂ ਦਰਮਿਆਨ
ਫ਼ਾਸਲੇ ਵਧਦੇ ਰਹੇ ਇਓਂ ਦਰਮਿਆਨ
ਦੋਸ਼ ਕਿਸਦਾ ਹੈ ਕਿਸੇ ਨੂੰ ਕੀ ਕਹਾਂ
ਆਪ ਹੀ ਵਿੱਛੜੇ ਅਸੀਂ ਛੱਡ ਕਾਰਵਾਂ
ਇੱਕੋ ਹੀ ਅਹਿਸਾਸ ਵੱਖ ਹੋ ਗਈ ਜ਼ਬਾਨ
**************************
ਇਨਕਲਾਬ
April 2022
ਸਿਰ ਚੁੱਕ ਕਿਰਤੀਆ ਲਾ ਨਾਅਰਾ
ਸੁਲਘੇਗਾ ਕਦ ਤੱਕ ਅੰਗਿਆਰਾ
ਅੰਬਰ ਚੜ੍ਹਿਆ ਸੁਰਖਾ ਤਾਰਾ
ਲਾ ਇਨਕਲਾਬ ਦਾ ਜੈਕਾਰਾ
ਦਲ ਬਦਲੂ ਨੇਤਾ ਆਖੇ ਸੁਣ
ਹਰ ਮੁਕਤੀ ਦਾ ਹਾਂ ਮੈਂ ਸਰਗੁਣ
ਤੂੰ ਬੁਧੀ ਹੀਣ ਤੇ ਮੈਂ ਸੁਰਜਣ
ਹੈ ਇਨਕਲਾਬ ਦੀਵਾਨਾਪਣ
ਪਰ ਸੁਣ ਤੂੰ ਮੇਰੀ ਵੀ ਗੱਲ ਨੂੰ
ਹੈਂ ਇਨਕਲਾਬ ਦਾ ਦਰਪਣ ਤੂੰ
ਹੈ ਇਨਕਲਾਬ ਹੈ ਇਨਕਲਾਬ ਹੈ ਇਨਕਲਾਬ ਬੱਸ ਤੂੰ ਹੀ ਤੂੰ
ਕਰ ਦੇ ਬੁਲੰਦ ਤੂੰ ਅਪਣਾ ਪਣ
ਪੂਰਬ ਪੱਛਮ ਉੱਤਰ ਦੱਖਣ
ਕਹਿ ਦੇ ਮੈਂ ਹੁਣ ਕੁਝ ਸੁਨਣਾ ਨਹੀਂ
ਇਹ ਛਲ਼ ਫ਼ਰੇਬ ਵਿੱਚ ਰਹਿਣਾ ਨਹੀਂ
ਮੈਨੂੰ ਹੈ ਪਤਾ ਹੇਰਾ ਫੇਰੀ
ਹੈ ਯਾਰ ਕਿਹੜਾ ਕਿਹੜਾ ਵੈਰੀ
ਇਹ ਸਮਾਂ ਹੈ ਹੁਣ ਬੱਸ ਨਿਖੜਨ ਦਾ
ਖਿੱਚ ਕੇ ਲੀਕਾਂ ਬੱਸ ਵਿੱਛੜਨ ਦਾ
ਹੁਣ ਹੋਰ ਊਂਘਦੇ ਰਹਿਣਾ ਨਹੀਂ
ਬਿਨ ਇਨਕਲਾਬ ਕੁਝ ਕਹਿਣਾ ਨਹੀਂ
ਸਰਮਾਇਆ ਹੈ ਸਭ ਚੋਰਾਂ ਦਾ
ਸੰਸਦ ਕੋਠਾ ਬਦਖੋਰਾਂ ਦਾ
ਖ਼ਬਰੀ ਝੋਲ਼ੀ ਚੁੱਕ ਦੋਵਾਂ ਦਾ
ਥਾਣਾ ਹੈ ਵਲੇਵਾਂ ਜੋਰਾਂ ਦਾ
ਫਰਿਆਦ ਕਰੇ ਕੋਈ ਕਿਸ ਤਾਈਂ
ਕਾਜ਼ੀ ਹੈ ਗਵਾਹ ਖੁਦ ਹੋਰਾਂ ਦਾ
ਹਰ ਰੋਜ ਹੈ ਰੋਜ਼ੀ ਦਾ ਮਸਲਾ
ਇਹ ਢਿੱਡ ਹੈ ਰੋਟੀ ਦਾ ਪਗਲਾ
ਇਸ ਅਰਥਚਾਰੇ ਦਾ ਹੀ ਬਦਲਾ
ਹੈ ਇਨਕਲਾਬ ਸਰਬੱਤ ਦਾ ਭਲਾ
ਦੱਸ ਦੇ ਤੈਨੂੰ ਕੀ ਚਾਹੀਦਾ
ਉਸ ਮੰਜ਼ਿਲ ਦਾ ਹੈ ਕੀ ਰਸਤਾ
ਬਸ ਇਨਕਲਾਬ ਬਸ ਇਨਕਲਾਬ ਬਸ ਇਨਕਲਾਬ ਹੀ ਹੈ ਉਹ ਦਵਾ
ਦੱਸ ਦੇ ਤੈਨੂੰ ਕੀ ਚਾਹੀਦਾ
ਤੇਰੀ ਕਿਸਮਤ ਦਾ ਹੈ ਕੀ ਬਦਲਾਅ
ਬਸ ਇਨਕਲਾਬ ਬਸ ਇਨਕਲਾਬ ਬਸ ਇਨਕਲਾਬ ਹੀ ਹੈ ਬਦਲਾਅ
ਦੱਸ ਦੇ ਤੈਨੂੰ ਕੀ ਚਾਹੀਦਾ
ਕੀ ਆਖਰੀ ਹੱਲ ਹਰ ਮਸਲੇ ਦਾ
ਬਸ ਇਨਕਲਾਬ ਬਸ ਇਨਕਲਾਬ ਬਸ ਇਨਕਲਾਬ ਦੁਹਰਾਈ ਜਾ
*****************************************
ਸੁੰਦਰ ਮੁੰਦਰੀਏ
April 2022
ਸੁੰਦਰ ਮੁੰਦਰੀਏ ਹੋ!
ਤੇਰਾ ਕੌਣ ਵਿਚਾਰਾ ਹੋ!
ਦਾਤੀ ਥੌੜੇ ਵਾਲ਼ਾ ਹੋ!
ਹਾਲ਼ੀ ਫ਼ਸਲ ਉਗਾਈ ਹੋ!
ਸੀਰੀ ਮਿਹਨਤ ਪਾਈ ਹੋ!
ਹਾਲ਼ੀ ਨੂੰ ਘਾਟਾ ਹੀ ਘਾਟਾ ਹੋ!
ਸੀਰੀ ਦਾ ਝੱਗਾ ਪਾਟਾ ਹੋ!
ਨਿਗਮਾਂ ਨੂੰ ਵਾਧਾ ਈ ਵਾਧਾ!
ਕਿਰਤੀ ਨੇ ਚੂਰੀ ਕੁੱਟੀ! ਨਿਗਮਾਂ ਨੇ ਉਹ ਵੀ ਲੁੱਟੀ!
ਕਿਰਤੀ ਤੇ ਹਾਲੀ ਆਏ!
ਨੇਤੇ ਨੇ ਘੇਰੇ ਪਾਏ!
ਲੋਕੀ ਭੋਲ਼ੇ ਹਾਏ!
ਮੀਡੀਏ ਉਂਗਲ਼ ਲਾਏ!
ਲੈਣੀ ਹੱਕਾਂ ਦੀ ਲੋਹੜੀ, ਡੁੱਬੇ ਨਿਗਮਾਂ ਦੀ ਜੋੜੀ!
ਸਾਡਾ ਏਕਾ ਏ ਅਮਿਟ, ਭਾਵੇਂ ਰੋ ਤੇ ਭਾਵੇਂ ਪਿੱਟ!
****************************
ਪ੍ਰਤੀਰੋਧ
April 2022
ਕਾਲ਼ੇ ਬੱਦਲ ਸੂਰਜ ਕੱਜਿਆ
ਹਵਾ ਸਰਦ ਕਿੰਝ ਝੱਲੀਏ
ਬਾਗੀ ਟੋਲਾ ਮਾਰੇ ਹਾਕਾਂ
ਚੱਲ ਦਿੱਲੀ ਨੂੰ ਚੱਲੀਏ ਨੀ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਚੋਰ ਉਚੱਕੇ ਬਹਿ ਗਏ ਆ ਦਰ
ਆਖਣ ਘਰ ਤੇਰਾ ਮੱਲੀਏ
ਤਰਕ ਗਿਆਨੀ ਪਏ ਸਮਝਾਵਣ
ਹਿੱਤ ਇਹ ਸਭ ਮੇਰੇ ਵੱਲੀਏ ਨੀ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਆਖਣ ਸਾਨੂੰ ਸਾਰੇ ਨਾਬਰ
ਜਦ ਵੀ ਹੱਕ ਲਈ ਲੜੀਏ
ਅਪਣੀ ਭੌਂ ਤੇ ਬਣਨ ਤੋਂ ਨੌਕਰ
ਪਹਿਲਾਂ ਹੀ ਲੜ ਮਰੀਏ ਨੀ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਜਿਸ ਥਾਂ ਤੇ ਅਸੀ ਲੜੀਏ ਮਰੀਏ
ਪਾਕ ਪਵਿੱਤਰ ਕਰੀਏ
ਇੱਕ ਇੱਕ ਕਰ ਅਸੀਂ ਲੱਖ ਹਜ਼ਾਰਾਂ
ਫੁੱਲ ਰੋਹ ਦੇ ਬਣ ਖਿੜੀਏ ਨੀ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਆਉਂਦੀਆਂ ਨਸਲਾਂ ਕਰਨ ਸਲਾਮਾਂ
ਆਖਣ ਅਸੀਂ ਵੀ ਅੜੀਏ
ਕੰਡਿਆਲੀ ਕਿਸੇ ਥੋਹਰ ਦਾ ਬਣਕੇ
ਫੁੱਲ ਰਾਜੇ ਰਾਹ ਖਿੜੀਏ ਨੀ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਬੱਲਿਆ ਵੇ ਵੇ ਬੱਲਿਆ
ਆਪਾਂ ਦੋਵੇਂ ਮਿਲ਼ ਕੇ ਚੱਲੀਏ
ਬੱਲੀਏ ਨੀ ਨੀ ਬੱਲੀਏ
ਕਰ ਵਿਦਾ ਕਬੂਲ ਤੂੰ ਬੱਲੀਏ
ਬੱਲਿਆ ਵੇ ਵੇ ਬੱਲਿਆ
ਆਪਾਂ ਦੋਵੇਂ ਮਿਲ਼ ਕੇ ਚੱਲੀਏ
***********************
ਕਾਲ਼
April 2022
ਤੁਹਾਡਾ ਕਾਲ਼ ਓਦੋਂ ਨਿਸ਼ਚਿਤ ਨਹੀਂ ਹੁੰਦਾ
ਜਦ ਤੁਹਾਡੇ ਨਾਮ ਤੇ ਕੋਈ ਅਤਿਆਚਾਰ ਕਰੇ
ਤੇ ਤੁਸੀਂ ਕੁਝ ਨਾ ਕਹੋ
ਤੁਹਾਡਾ ਕਾਲ਼ ਓਦੋਂ ਵੀ ਨਿਸ਼ਚਿਤ ਨਹੀਂ ਹੁੰਦਾ
ਜਦ ਤੁਹਾਡੇ ਰਾਜ ਵਿਚ
ਮਾਸੂਮ ਤੇ ਲਾਚਾਰ ਦਾ ਕਤਲ ਆਮ ਹੋ ਜਾਵੇ
ਤੁਹਾਡਾ ਕਾਲ਼ ਓਦੋਂ ਵੀ ਨਿਸ਼ਚਿਤ ਨਹੀਂ ਹੁੰਦਾ
ਜਦ ਤੁਹਾਡੀ ਪਰਜਾ ਭੁੱਖੀ ਨੰਗੀ ਸੜਕ ਤੇ ਹੋਵੇ
ਤੇ ਤੁਸੀਂ ਨਿਤ ਨਵੀਂ ਪੌਸ਼ਾਕ ਪਾ ਆਸਮਾਨ ਵਿੱਚ ਉਡੋਂ
ਤੁਹਾਡਾ ਕਾਲ਼ ਓਦੋਂ ਵੀ ਨਿਸ਼ਚਿਤ ਨਹੀਂ ਹੁੰਦਾ
ਜਦ ਭੁੱਖੇ ਵਿਲਕਦੇ ਬੱਚੇ ਦੇ ਮੂੰਹ ਦੀ ਬੁਰਕੀ
ਕਿਸੇ ਧਨਾਢ ਦੀ ਤਿਜੌਰੀ ਵਿੱਚ ਕੈਦ ਹੋ ਜਾਵੇ
ਤੁਹਾਡਾ ਕਾਲ਼ ਓਦੋਂ ਨਿਸ਼ਚਿਤ ਹੈ
ਜਦ ਹਰ ਵਿਰੋਧੀ ਆਵਾਜ
ਕਾਲ਼ ਕੋਠੜੀ ਵਿੱਚ ਬੰਦ ਹੋ ਜਾਵੇ
ਜਦ ਹਰ ਸਵਾਲ ਖੁਦ ਜਵਾਬ ਬਣ ਜਾਵੇ
ਜਦ ਹਰ ਲਫ਼ਜ਼ ਆਤਮ ਸੰਵਾਦ ਬਣ ਜਾਵੇ
ਤੁਹਾਡਾ ਕਾਲ਼ ਓਦੋਂ ਨਿਸ਼ਚਿਤ ਹੈ
ਜਦ ਤੁਹਾਡਾ ਆਪਣਾ ਹੀ ਭਾਈਵਾਲ
ਤੁਹਾਡਾ ਨੰਗੇਜ ਢੱਕਣ ਤੋਂ ਖੌਫ਼ ਖਾਵੇ
ਜਦ ਤੁਸੀਂ ਅਵਾਜ ਲਗਾਓ
ਤੁਹਾਨੂੰ ਆਪਣੀ ਹੀ ਆਵਾਜ ਦੀ ਗੂੰਜ ਸੁਣਾਈ ਦੇਵੇ
********************************
ਦੋਸਤੀ
December 2020
ਪਾ ਕੇ ਪੈਮਾਨੇ ਫ਼ਰਜ਼ਾਂ ਦੇ ਦੁਨੀਆਂ ਲਈ
ਨਾਮ ਰੱਖਦੇ ਮੁਹੱਬਤ ਦੇ ਲੋਕੀ ਕਈ
ਦੋਸਤੀ ਤੋਂ ਬਿਨਾਂ ਪਿਆਰ ਕੁਝ ਵੀ ਨਹੀ
ਨਾਮ ਰੱਖਦੇ ਮੁਹੱਬਤ ਦੇ ਲੋਕੀ ਕਈ
ਪਿਆਰ ਮਾਸ਼ੂਕ ਦਾ ਪਿਆਰ ਧੀ ਦਾ ਹੈ ਕੀ
ਦੋਵੇਂ ਦਸਤੂਰ ਨੇ ਇਹ ਬਿਨਾਂ ਦੋਸਤੀ
ਕਿਹੜੀ ਕੁੱਖੋਂ ਜਣੇ ਓਹਦੇ ਰਿਸ਼ਤੇ ਬਣੇ
ਦੋਸਤੀ ਨਾ ਜਣੇ ਕੋਈ ਕੁੱਖ ਵੀ
ਨਾਮ ਰੱਖਦੇ ਮੁਹੱਬਤ ਦੇ ਲੋਕੀ ਕਈ
ਦਿਲ ਦਾ ਮਾਲਿਕ ਬਣੇ ਕੋਈ ਇੱਕੋ ਘੜੀ
ਕੋਈ ਯਾਦ ਵੀ ਨਾ ਆਵੇ ਪੂਰੀ ਜ਼ਿੰਦਗੀ
ਪਿਆਰ ਦਾ ਅਰਥ ਕੀ ਇਸਦਾ ਪਰਵਰ ਹੈ ਕੀ
ਇਹ ਬੁਝਾਰਤ ਨਾ ਸੁਲ਼ਝੇ ਬਿਨਾਂ ਦੋਸਤੀ
ਨਾਮ ਰੱਖਦੇ ਮੁਹੱਬਤ ਦੇ ਲੋਕੀ ਕਈ
ਹਰ ਘੜੀ ਜਿਸਦੀ ਆਮਦ ਹੋਵੇ ਸ਼ਗਨ ਦੀ
ਜਦ ਮਿਲ਼ੇ ਇੰਜ ਲੱਗੇ ਜ਼ਿੰਦਗੀ ਮਿਲ਼ ਗਈ
ਨਾਮ ਰਿਸ਼ਤੇ ਦਾ ਇਸਨੂੰ ਨਾ ਦੇਵੋ ਕੋਈ
ਦੋਸਤੀ ਨੂੰ ਕਹੋ ਬਸ ਸਿਰਫ਼ ਦੋਸਤੀ
ਨਾਮ ਰੱਖਦੇ ਮੁਹੱਬਤ ਦੇ ਲੋਕੀ ਕਈ
ਕਿਸਦੀ ਹਸਤੀ ਹੈ ਕੀ ਕੌਣ ਹੈ ਕੀਮਤੀ
ਇਹ ਹਿਸਾਬਾਂ ਕਿਤਾਬਾਂ ਕਰੇ ਮਤਲਬੀ
ਪਿਆਰ ਦੀ ਕਿਸਮ ਕੀ ਪਿਆਰ ਦੀ ਜ਼ਾਤ ਕੀ
ਦੋਸਤੀ ਤੋਂ ਬਿਨਾਂ ਪਿਆਰ ਕੁਝ ਵੀ ਨਹੀ
ਨਾਮ ਰੱਖਦੇ ਮੁਹੱਬਤ ਦੇ ਲੋਕੀ ਕਈ
ਦੋਸਤੀ ਤੋਂ ਬਿਨਾਂ ਪਿਆਰ ਕੁਝ ਵੀ ਨਹੀ
***************************
ਕਾਹਤੋਂ
October 2020
ਜਦ ਹੋਣ ਸੱਧਰਾਂ ਸਭੇ ਪੂਰੀਆਂ
ਕਦੇ ਹੋਣ ਹੀ ਨਾ ਸੱਜਣਾਂ ਤੋਂ ਦੂਰੀਆਂ
ਫਿਰ ਤਾਂਘ ਤੇ ਦਿਲਾਂ ਦੀ ਮਜਬੂਰੀਆਂ
ਜ਼ਿਕਰ ਅਸੀਂ ਕਿੰਜ ਕਰੀਏ
ਚੜ੍ਹ ਪਿਆਰ ਤੇ ਮੋਹੱਬਤਾਂ ਦੀ ਪੌੜੀਆਂ
ਜਿੰਦਾਂ ਇਸ਼ਕੇ 'ਚ ਗੰਢ ਗਈਆਂ ਗੂੜ੍ਹੀਆਂ
ਫਿਰ ਰੱਬ ਦੀਆਂ ਕਰ ਕੇ ਇਬਾਦਤਾਂ
ਦੁਆਵਾਂ ਅਸੀਂ ਕੀ ਮੰਗੀਏ
ਲੱਗ ਉਮਰਾਂ ਦੇ ਚਰਖੇ ਦੀ ਗੇੜੀਆਂਤੰਦਾਂ ਉਲਝੀਆਂ ਜਾਣ ਨਾ ਉਧੇੜੀਆਂ
ਤੇਰੇ ਮੇਰੇ ਦੀਆਂ ਹੋਈਆਂ ਜੋ ਨਬੇੜੀਆਂ
ਕਿੰਨਾ ਕੁ ਕੀਹਦਾ ਕੀ ਗਿਣੀਏ
ਰੱਜ ਮਾਣ ਕੇ ਅਉਧ ਦੀਆਂ ਰਹਿਮਤਾਂ
ਲੱਗਾ ਖ਼ਿਜ਼ਾਂ 'ਚ ਵੀ ਹੋਵੇ ਜਦ ਕਹਿਕਸ਼ਾਂ
ਵੇਖ ਲੰਘ ਜਾਂਦਾ ਜੋਬਨਾਂ ਦਾ ਕਾਰਵਾਂ
ਗਿਲਾ ਅਸੀਂ ਕੀ ਕਰੀਏ
*********************
ਅੰਮੜੀ
May 2020
ਕੋਈ ਮੈਨੂੰ ਪਿਆਰ ਦੇ ਨਾਲ਼ ਗੋਦ ਆਪਣੀ ਵਿਚ ਬਿਠਾਏ
ਲੋਰੀਆਂ ਗਾਏ
ਮੈਨੂੰ ਪੁਚਕਾਰ ਕੇ ਘੁੱਟ ਗਲ਼ ਨੂੰ ਲਾਏ
ਵਕਤ ਰੁਕ ਜਾਏ
ਬਹੁਤ ਸਮਿਆਂ ਪੁਰਾਣੀ ਯਾਦ ਹੈ ਪਰ ਕੱਲ੍ਹ ਦੀ ਲਗਦੀ ਹੈ
ਕਿਸੇ ਅਣਭੋਲ ਨਾਜ਼ੁਕ ਬਾਲ ਦੀ ਜ਼ਿੱਦ ਮਾਂ ਨੂੰ ਠੱਗਦੀ ਹੈ
ਸਭੇ ਕੰਮ ਕਾਰ ਛੱਡ ਕੇ ਆਟੇ ਦੀ ਇੱਕ ਚਿੜੀ ਬਣਾਏ
ਵਕਤ ਰੁਕ ਜਾਏ
ਦਿਨਾਂ ਦੇ ਸਾਲ ਸਾਲਾਂ ਦੇ ਦਹਾਕੇ ਉਮਰ ਬਣਦੇ ਨੇ
ਜਿਨ੍ਹਾਂ ਦੀ ਯਾਦ ਦੇ ਵਿੱਚ ਆਹ ਨਿਕਲੇ ਦਿਨ ਉਹ ਬਚਪਨ ਦੇ
ਕਦੇ ਕੋਈ ਕੱਜ ਲਵੇ ਅੱਖੀਆਂ ਕਦੇ ਫੇਰ ਝਾਤ ਪਾਏ
ਵਕਤ ਰੁਕ ਜਾਏ
ਕਹਾਣੀ ਏਸ ਜੀਵਨ ਦੀ ਕਿੰਨੀ ਗੁੰਝਲ਼ ਕਿੰਨੀ ਲੰਮੀਂ
ਤੇਰੀ ਸਾਖੀ ਕਿਓਂ ਸਿਮਟੀ ਦੋ ਪਲਾਂ ਦੇ ਵਿੱਚ ਮੇਰੀ ਅੰਮੀ
ਕੱਟੇ ਵੱਛਿਆਂ ਦੀ ਕੋਈ ਬਾਤ ਪਾ ਕੇ ਗੁਦਗੁਦਾਏ
ਵਕਤ ਰੁਕ ਜਾਏ
ਜਦੋਂ ਮੈਂ ਡਿੱਗ ਪਵਾਂ ਤਾਂ ਕਿਓਂ ਉਠਾਵੇਂ ਨਾਂ ਨੀ ਮਾਂ ਅੜੀਏ
ਨੀਂ ਲਾਰਾ ਲਾ ਕੋਈ ਆ ਕੇ ਵੰਡਾ ਇਹ ਦਰਦ ਘੱਟ ਕਰੀਏ
ਕੀੜੀ ਦਾ ਆਟਾ ਡੁੱਲ੍ਹਿਆ ਕਹਿ ਕੇ ਕੋਈ ਫਿਰ ਵਰਾਏ
ਵਕਤ ਰੁਕ ਜਾਏ
ਮਿਟੇ ਨਾ ਬੇਕਰਾਰੀ ਵੇਖ ਕੇ ਤੇਰੀ ਜੜੀ ਮੂਰਤ
ਨਾ ਇਸ ਵਿੱਚ ਮੁਸਕਰਾਹਟ ਤੇਰੀ ਨਾ ਘੂਰੀ ਵੱਟੇ ਸੂਰਤ
ਮੈਨੂੰ ਤੇਰੇ ਪਿਆਰ ਵਾਲ਼ਾ ਨਾਮ ਲੈ ਕੋਈ ਬੁਲਾਏ
ਵਕਤ ਰੁਕ ਜਾਏ
ਤੇਰੀ ਸੂਰਤ ਜੜੀ ਮੂਰਤ ਹਕੀਕੀ ਮੁਸਕਰਾਏ
ਵਕਤ ਰੁਕ ਜਾਏ
ਕੋਈ ਮੈਨੂੰ ਪਿਆਰ ਦੇ ਨਾਲ਼ ਗੋਦ ਆਪਣੀ ਵਿਚ ਬਿਠਾਏ
ਲੋਰੀਆ ਗਾਏ
*******************************
ਤੇਰੇ ਬਿਨ
May 2020
ਤੇਰੇ ਬਿਨ ਹੁਣ ਦਿਲ ਨਹੀਓਂ ਲੱਗਦਾ ਨੀ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਬੂਟੇਆਂ ਦੇ ਉੱਤੇ ਅਜੇ ਪੱਤਾ ਕੋਈ ਕੋਈ ਏ
ਰੁੱਤ ਇਹ ਬਸੰਤ ਅਜੇ ਸੋਲ੍ਹਵੇਂ ਦੀ ਹੋਈ ਏ
ਪੀਲ਼ੇ ਫ਼ੁੱਲ ਦਿੰਦੇ ਮੈਨੂੰ ਤੇਰਾ ਝਲਕਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਤੇਰੇ ਬਿਨ ਹੁਣ ਦਿਲ ਨਹੀਓਂ ਲੱਗਦਾ ਨੀ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਟਾਹਣੀਆਂ ਤੇ ਨੱਚੇ ਇੱਕ ਚਿੜੀਆਂ ਦਾ ਜੋੜਾ ਨੀਂ
ਮੌਸਮੀ ਖ਼ੁਮਾਰ ਵੇਖ਼ ਚੜ੍ਹੇ ਥੋੜ੍ਹਾ ਥੋੜ੍ਹਾ ਨੀਂ
ਮੈਨੂੰ ਹਿਜਰਾਂ ਦਾ ਨਾਗ ਪਿਆ ਡੱਸਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਤੇਰੇ ਬਿਨ ਹੁਣ ਦਿਲ ਨਹੀਓਂ ਲੱਗਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਗਾਲ੍ਹੜਾਂ ਨੇ ਖੇਡ ਛੂਹਣ ਛੂਹਣ ਵਾਲ਼ੀ ਪਾਈ ਏ
ਕੋਇਲਾਂ ਜੁਦਾਈ ਵਾਲ਼ੀ ਹੂਕ ਕੁਰਲਾਈ ਏ
ਵੇਖ ਵੇਖ ਮੈਨੂੰ ਜੱਗ ਪਿਆ ਹੱਸਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਤੇਰੇ ਬਿਨ ਹੁਣ ਦਿਲ ਨਹੀਓਂ ਲੱਗਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਦਿਨ ਰਾਤ ਤੂੰ ਹੀ ਮੇਰੇ ਸਿਰ ਤੇ ਸਵਾਰ ਨੀਂ
ਰੋਕਿਆਂ ਵੀ ਰੁਕਦੀ ਨਹੀਂ ਚੰਦਰੀ ਫੁਹਾਰ ਨੀਂ
ਇਹ ਉਡੀਕਣਾ ਨਾ ਰਿਹਾ ਮੇਰੇ ਵੱਸ ਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਤੇਰੇ ਬਿਨ ਹੁਣ ਦਿਲ ਨਹੀਓਂ ਲੱਗਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਪੌਣ ਮੈਨੂੰ ਲੱਗਦਾ ਪੁਆਧ ਹੋ ਕੇ ਆਈ ਏ
ਮ੍ਹਾਰਾ ਥਾਰਾ ਕਰਦੀ ਨੇ ਸੀਨੇ ਅੱਗ ਲਾਈ ਏ
ਜਿੱਥੇ ਵੇਖਾਂ ਦਿਖੇ ਮੁਖ ਤੇਰਾ ਹੱਸਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
ਤੇਰੇ ਬਿਨ ਹੁਣ ਦਿਲ ਨਹੀਓਂ ਲੱਗਦਾ ਨੀਂ ਅੰਬਰਾਂ ਚੋਂ ਮੀਂਹ ਵਰ੍ਹਦਾ
*************************************
ਨਜ਼ਾਰਾ
April 2020
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ ਨਜ਼ਾਰਾ ਝਾਤੀਆਂ ਮਾਰੇ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਜ਼ਰਾ ਪਲਕਾਂ ਨੂੰ ਉੱਠਣ ਦੇ ਤਬਾਹੀ ਹੋਣ ਦੇ ਦਿਲ ਦੀ
ਪਪੀਹਾ ਬੂੰਦ ਦਾ ਪਿਆਸਾ ਕਿਨਾਰੇ ਹੀ ਨਾ ਮਰ ਜਾਏ
ਮਟਕ ਕੇ ਜ਼ੁਲਫ ਨਾ ਸਾਂਭੀ ਧੌਣ ਕਿਤੇ ਮੋਚ ਨਾ ਖਾ ਜਾਏ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ ਨਜ਼ਾਰਾ ਝਾਤੀਆਂ ਮਾਰੇ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਬੇਸ਼ਰਮ ਬੁੱਲੇ ਜ਼ੁਲਫਾਂ ਨਾਲ ਰਹਿਣ ਅਠਖੇਲੀਆਂ ਕਰਦੇ
ਕਦੇ ਸਰਸ਼ਾਰ ਅੱਖੀਆਂ ਦੇ ਕਦੇ ਰੁਖ਼ਸਾਰ ਦੇ ਝਲਕੇ
ਰੂਬਰੂ ਜਲਵਾ ਹੁਸਨ ਦਾ ਬਖਸ਼ ਦੇ ਸਾਨੂੰ ਆਏ ਹਾਏ ਹਾਏ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ ਨਜ਼ਾਰਾ ਝਾਤੀਆਂ ਮਾਰੇ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਉਜਾਲ਼ਾ ਜ਼ੁਲਫ ਚੋਂ ਕਿਰਦਾ ਵਾਕ ਜਿਓਂ' ਪਹੁ ਫੂਟੇਰੇ ਦਾ
ਕਦੇ ਇਕਰਾਰ ਦੇ ਝਲਕੇ ਕਦੇ ਇਨਕਾਰ ਦੇ ਝਲਕੇ
ਨਜ਼ਰ ਇੱਕ ਵੇਖ ਲੈ ਭਰ ਕੇ ਸਿਦਕ ਮੇਰਾ ਨਾ ਉੱਠ ਜਾਏ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ ਨਜ਼ਾਰਾ ਝਾਤੀਆਂ ਮਾਰੇ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਇਜਾਜ਼ਤ ਹੋ ਜਾਵੇ ਜੇ ਤੇਰੀ ਜ਼ੁਲਫਾਂ ਨੂੰ ਸਵਾਰਨ ਦੀ
ਮੇਰੀ ਵੀ ਭਾਲ਼ ਮੁੱਕ ਜਾਵੇ ਮੇਰੇ ਜੀਵਨ ਦੇ ਕਾਰਨ ਦੀ
ਦੀਵਾਨਾ ਗੌਲ਼ੇ ਅਣਗੌਲ਼ੇ ਤੇਰੀ ਖੇਡ ‘ਚ ਹੀ ਨਾ ਮਰ ਜਾਏ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ
ਤੇਰੀ ਜ਼ੁਲਫਾਂ ਦੇ ਵਿਚੋਂ ਦੀ ਨਜ਼ਾਰਾ ਝਾਤੀਆਂ ਮਾਰੇ
ਤੇਰੀ ਜ਼ੁਲਫਾਂ ਦੇ ਵਿਚੋਂ