ਨਾਦਿਰ
April 2017
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
ਦਿਲ ਜਲੇ ਨੂੰ ਮੇਰੇ ਨਾ ਸਹਾਰਾ ਦਵੋ
ਵੇਖ ਕੇ ਮੈਨੂੰ ਲਾਹਨਤ ਕੋਈ ਦੇ ਦਓ
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
ਮੈਨੂੰ ਗਮ ਦੀ ਖੁਸ਼ੀ ਵਿੱਚ ਤੜਪ ਲੈਣ ਦਓ
ਪੋਟੇ ਪੋਟੇ ਨੂੰ ਕੱਟ ਕੇ ਤਸੀਹੇ ਦਵੋ
ਅੱਧ ਮਰੇ ਨੂੰ ਸਦੀਵੀ ਭਟਕ ਲੈਣ ਦਓ
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
ਇਹ ਘੜੀ ਦਰਦ ਦੀ ਦਰ ਖੜੀ ਰਹਿਣ ਦਓ
ਦਿਲ ਦੀਆਂ ਧੜਕਨਾਂ ਨੂੰ ਰੁਕਣ ਨਾ ਦਵੋ
ਇਹ ਨੂੰ ਯਾਦਾਂ ਦੇ ਗਲ਼ ਲੱਗ ਸਿਸਕ ਲੈਣ ਦਓ
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
ਮੇਰੇ ਅਪਣੇ ਨੂੰ ਬੇਗਾਨਾ ਕਹਿ ਲੈਣ ਦਓ
ਰਿਸ਼ਤਿਆਂ ਨੂੰ ਬਦਲ ਨਾਮ ਕੋਈ ਦਵੋ
ਬੇ-ਗਰਜ਼ ਬੇ-ਦਿਲਾ ਬੇ-ਵਫ਼ਾ ਕਹਿਣ ਦਓ
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
ਮੇਰੇ ਵੇਹੜੇ 'ਚ ਨ੍ਹੇਰੇ ਨੂੰ ਰਹਿ ਲੈਣ ਦਓ
ਖੁਸ਼ਕ ਦੀਵੇ ਦੀ ਬੱਤੀ ਨੂੰ ਲੋ ਨਾ ਦਵੋ
ਬਲ਼ ਸਕੇ ਨਾ ਕਦੇ ਇਹ ਸੁਲਗ ਲੈਣ ਦਓ
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
ਮੇਰੀਆਂ ਹਸਰਤਾਂ ਨੂੰ ਨਾ ਫੁੱਲ ਪੈਣ ਦਓ
ਕੱਟ ਦਵੋ ਟਾਹਣੀਆਂ ਛਾਂਗ ਮੁੱਢ ਤੋਂ ਦਵੋ
ਫੇਰ ਮੁੜ ਕੇ ਨਾ ਮੇਰਾ ਕਦੇ ਨਾ ਲਓ
ਮੈਨੂੰ ਬਿਰਹੌ ਦੀ ਅੱਗ ਵਿੱਚ ਝੁਲ਼ਸ ਲੈਣ ਦਓ
**********************************
ਮਾਹੀ
April 2017
ਚਿੜੀਆਂ ਨੇ ਚਹਿਕ ਲਾਈ, ਤੇਰੀ ਹਾਸੀ ਹੱਸ ਕੇ
ਭੌਰਿਆਂ ਨੇ ਗੁਣ ਗੁਣਾਏ, ਤੇਰੇ ਗੁਣ ਰੱਟ ਕੇ
ਟਾਹਣੀਆਂ ਨੇ ਸਿਰ ਨਿਵਾਏ, ਤੇਰੇ ਵੱਲ ਝੁੱਕ ਕੇ
ਫੁੱਲ ਗੁਲਾਬ ਸਾੜ ਖਾਏ, ਤੇਰੇ ਵੱਲ ਤੱਕ ਕੇ
ਘੁੱਗੀਆਂ ਨੇ ਬਾਤ ਪਾਈ, ਤੇਰੀ ਗੱਲ ਦੱਸ ਕੇ
ਟੋਟਰੂ ਨੇ ਹੂੰਗ ਲਾਈ, ਦਿਲ ਤੇ ਹੱਥ ਰੱਖ ਕੇ
ਕਾਟੋਆਂ ਨੇ ਖੇਢ ਪਾਈ, ਕੰਧ ਕੋਠੇ ਟੱਪ ਕੇ
ਸੇਹੜ੍ਹੀਆਂ ਨੇ ਬੁੜ ਬੁੜਾਈ, ਦੱਸ ਤੇਰੇ ਨੱਖਰੇ
ਬਣ ਪੰਜੇਬ ਨੱਚਾਂ ਮਸਤ, ਪੈਰ ਤੇਰੇ ਲੱਗ ਕੇ
ਇੱਕ ਵਾਰੀ ਕਹਿ ਕੇ ਮਾਹੀ, ਸਾਨੂੰ ਜ਼ਰਾ ਸੱਦ ਦੇ
ਬੀਂਡਿਆਂ ਨੇ ਹੇਕ ਲਾਈ, ਕੰਨ ਹੱਥ ਰੱਖ ਕੇ
ਗੌਣ ਤੇਰੀ ਹੀ ਰੁਬਾਈ, ਵਿੱਚ ਬਹਿ ਕੇ ਸੱਥ ਦੇ
ਫੁੱਲ ਰਸ ਲੈ ਕੇ ਮੱਖ, ਆਓਂਦੇ ਤੇਰੇ ਦਰ ਤੇ
ਸ਼ਹਿਦ ਬਣਾਓਂਦੇ, ਲੈ ਕੇ ਜਾਂਦੇ ਤੇਰੇ ਝਲਕੇ
ਫੁੱਲ ਬਹਿਣ ਰਾਹੀਂ ਤੇਰੇ, ਸਜ ਸਜ ਫੱਬ ਕੇ
ਮਹਿਕ ਉਧਾਰੀ ਲੈਣੀ, ਦੇਵੇਂ ਜੇ ਤੂੰ ਕੱਢ ਕੇ
ਤਿਤਲੀਆਂ ਡੌਰ ਭੌਰ, ਹੋਈਆਂ ਉੱਡ ਉੱਡ ਕੇ
ਮੰਗਦੀਆਂ ਰਸ ਤੇਰਾ, ਤੈਨੂੰ ਲੱਭ ਲੱਭ ਕੇ
ਬਣ ਪੰਜੇਬ ਨੱਚਾਂ ਮਸਤ, ਪੈਰ ਤੇਰੇ ਲੱਗ ਕੇ
ਇੱਕ ਵਾਰੀ ਕਹਿ ਕੇ ਮਾਹੀ, ਸਾਨੂੰ ਜ਼ਰਾ ਸੱਦ ਦੇ
ਬੱਦਲਾਂ ਨੇ ਨੀਵੀਂ ਪਾਈ, ਸੂਰਜਾਂ ਨੂੰ ਢੱਕ ਕੇ
ਕਿਰਨਾਂ ਨੇ ਝਾਤ ਪਾਈ, ਇੱਕ ਅੱਖ ਦੱਬ ਕੇ
ਕਣੀਆਂ ਨੇ ਗੀਤ ਗਾਏ, ਬੁੱਲ੍ਹ ਚੱਬ ਚੱਬ ਕੇ
ਪੌਣ ਫਿਰੇ ਗੇੜੇ ਖਾਈ, ਸਵਾਦ ਤੇਰਾ ਚੱਖ ਕੇ
ਢਲ਼ ਸੂਰਜਾਂ ਦੇ, ਪਰਛਾਵੇਂ ਵੀ ਨੇ ਲੱਥ ਗੇ
ਵੱਜ ਵੱਜ ਟੱਲ, ਬੌਲਦਾਂ ਦੇ ਗਲ਼ ਥੱਕ ਗੇ
ਲਾਰਿਆਂ ਨੇ ਲਾਰਿਆਂ ਨੂੰ, ਲਾਰੇ ਲਾਏ ਲੱਪ ਕੇ
ਆਜੜੀ ਵੀ ਘਰ ਨੂੰ ਆਏ, ਸਾਰਾ ਦਿਣ ਖੱਪ ਕੇ
ਬਣ ਪੰਜੇਬ ਨੱਚਾਂ ਮਸਤ, ਪੈਰ ਤੇਰੇ ਲੱਗ ਕੇ
ਇੱਕ ਵਾਰੀ ਕਹਿ ਕੇ ਮਾਹੀ, ਸਾਨੂੰ ਜ਼ਰਾ ਸੱਦ ਦੇ
ਨ੍ਹੇਰਿਆਂ ਨੇ ਰਾਤ ਪਾਈ, ਰਾਹ ਤੇਰੇ ਥੱਕ ਗੇ
ਤਾਰਿਆਂ ਨੂੰ ਤੌਣੀ ਆਈ, ਰਾਤ ਗਲ਼ ਲੱਗ ਕੇ
ਜੁਗਨੂਆਂ ਨੇ ਟਿਮ ਟਿਮਾਈ, ਚੇਤੇ ਤੇਰੇ ਲੱਗ ਕੇ
ਚੰਨ ਫਿਰੇ ਰੌਸ਼ਨਾਈ, ਧੁੱਪ ਚੁੰਮ ਚੱਟ ਕੇ
ਭੋਰ ਹੋਣ ਨੂੰ ਹੈ ਆਈ, ਤਾਰੇ ਸਾਰੇ ਭੱਜ ਗੇ
ਯਾਦ ਤੇਰੀ ਸਾਨੂੰ ਆਈ, ਅੱਖ ਕਿਵੇਂ ਲੱਗ ਜੇ
ਪਾਠ ਤੇਰੇ ਪਾਠ ਵਾਂਗੂ, ਪੜ੍ਹ ਪੜ੍ਹ ਪੜ੍ਹ ਤੇ
ਮੰਗ ਲੈਣਾ ਨਾਮ ਤੇਰਾ, ਰੱਬ ਕੋਲ਼ੋਂ ਲੜ ਕੇ
ਬਣ ਪੰਜੇਬ ਨੱਚਾਂ ਮਸਤ, ਪੈਰ ਤੇਰੇ ਲੱਗ ਕੇ
ਇੱਕ ਵਾਰੀ ਕਹਿ ਕੇ ਮਾਹੀ, ਸਾਨੂੰ ਜ਼ਰਾ ਸੱਦ ਦੇ
ਸੁਣ ਕੇ ਆਸ਼ਿਕਾਂ ਦੀ ਗੱਲ, ਦੰਦ ਕਾਹ ਤੋਂ ਕੱਢ ਤੇ
ਹੋਲ਼ੀ ਹੌਲ਼ੀ ਮਾਰਦੀ ਐਂ, ਇੱਕੋ ਵਾਰੀ ਵੱਢ ਦੇ
ਲੋਕ ਮੈਨੂੰ ਆਖਦੇ ਨੇ, ਇਹ ਦਾ ਖਹਿੜਾ ਛੱਡ ਦੇ
ਨਾਮ ਲਿਖ ਲਾ ਤੂੰ ਮੈਨੂੰ, ਮੇਰਾ ਫਾਹਾ ਵੱਢ ਦੇ
ਇੱਕ ਵਾਰੀ ਗੱਲ ਮੇਰੀ, ਸੁਣ ਜ਼ਰਾ ਗੌਰ ਕੇ
ਤੇਰੀ ਕਰਾਂ ਮੈਂ ਚਕਾਰੀ, ਹੱਥ ਮੇਰੇ ਹੱਥ ਦੇ
ਬਣ ਮਹਿਬੂਬ ਸਾਡੀ, ਖ਼ਾਬ ਸੱਚ ਕਰ ਦੇ
ਨਹੀਂ ਹੱਥ ਆਪਣੇ ਤੂੰ, ਜਿੰਦ ਸਾਡੀ ਕੱਢ ਦੇ
ਬਣ ਪੰਜੇਬ ਨੱਚਾਂ ਮਸਤ, ਪੈਰ ਤੇਰੇ ਲੱਗ ਕੇ
ਇੱਕ ਵਾਰੀ ਕਹਿ ਕੇ ਮਾਹੀ, ਸਾਨੂੰ ਜ਼ਰਾ ਸੱਦ ਦੇ
************************************
ਬਹਾਰ
April 2017
ਆਈ ਰੁੱਤ ਏ ਬਹਾਰ
ਮੀਂਹ ਵਰ੍ਹੇ ਬੰਨ੍ਹ ਧਾਰ
ਤੇਰਾ ਇਸ਼ਕ ਖੁਮਾਰ
ਹੋਇਆ ਮਨ ਤੇ ਸਵਾਰ
ਕਦੇ ਬਣ ਕੇ ਪੁਰਾ ਵਗ ਜਾ ਸੱਜਣਾ
ਮੋਰ ਨੱਚੇ ਪੱਬ ਭਾਰ
ਉੱਡੇ ਚਿੜੀਆਂ ਦੀ ਡਾਰ
ਕਰੇ ਦਿਲ ਬੇਕਰਾਰ
ਮੈਨੂੰ ਤੇਰਾ ਇੰਤਜ਼ਾਰ
ਕਦੇ ਬਣ ਕੇ ਘਟਾ ਚੜ੍ਹ ਜਾ ਸੱਜਣਾ
ਵੱਜੇ ਰਾਗ ਮਲਹਾਰ
ਛੇੜੇ ਮਨ ਦੀ ਸਿਤਾਰ
ਲੱਗ ਗਲ਼ ਮੇਰੇ ਯਾਰ
ਤਪੇ ਦੇਹ ਜਿਓਂ ਬੁਖਾਰ
ਕਦੇ ਬਣ ਕੇ ਬੱਦਲ ਵਰ੍ਹ ਜਾ ਸੱਜਣਾ
ਦਿਨ ਜ਼ਿੰਦਗੀ ਦੇ ਚਾਰ
ਚੱਲ ਬੱਦਲਾਂ ਦੇ ਪਾਰ
ਕਰਾਂ ਰੱਜ ਮੈਂ ਪਿਆਰ
ਲਾਹਾਂ ਤੇਰੇ ਮੈਂ ਉਧਾਰ
ਕਦੇ ਬਣ ਕੇ ਕਣੀ ਛੂਹ ਜਾ ਸੱਜਣਾ
ਮੈਨੂੰ ਆਵੇ ਨਾ ਕਰਾਰ
ਤੇਰਾ ਹੋਇਆ ਨਾ ਦੀਦਾਰ
ਅੱਗ ਲੱਗਣੀ ਫੁਹਾਰ
ਚੁੰਮੇ ਮੇਰੇ ਰੁਖ਼ਸਾਰ
ਮੇਰਾ ਮਦਨ ਮੋਹਨ ਬਣ ਜਾ ਸੱਜਣਾ
***************************
ਪੁਕਾਰ
March 2017
ਐ ਮਾਂ
ਮੈਂ ਗੁੱਡੀ ਕਿੰਜ ਚਾੜ੍ਹਾਂ
ਅੰਬਰ ਕਿਹੜੇ ਦੇ ਵਿੱਚ ਤਾਰਾਂ
ਹੁਣ ਕੀਹਦੇ ਪਿਆਰ ਦਾ ਮੈਂ ਮਾਂਜਾ
ਡੋਰ ਤੇ ਮਾਰਾਂ
ਐ ਮਾਂ
ਲੇਟੀ
ਚੇਤਾ ਤੇਰਾ ਮੈਂ ਪਾ ਕੇ ਘੋਲ਼ਦਾ
ਤੀਲ੍ਹੇ
ਬਾਂਸ ਦੇ ਝਾੜੂਆਂ ਦੇ ਟੋਲ਼ਦਾ
ਤੇਰੀ ਯਾਦਾਂ ਦਾ ਬੁੱਲਾ ਫਿਰੇ ਝੋਲਦਾ
ਕੰਨੀ ਦੇ ਦੇ ਨੀ ਮਾਏ ਬੋਲਦਾ
ਗੁੱਡੀ ਲੁੱਟੀ ਤੇ ਜੇ ਰੋਵਾਂ ਤਾਂ
ਕੋਈ ਨਹੀਂ ਗੌਲ਼ਦਾ
ਐ ਮਾਂ
ਸੁਨੇਹਾ
ਦਿਲਾਂ ਦਾ ਡੋਰਾਂ ਨਾਲ਼ ਵਲ਼ਦਾ
ਤੈਨੂੰ
ਰਹਾਂ ਮੈਂ ਰੋਜ ਘੱਲਦਾ
ਕਾਟਾ ਪਿਆ ਇਹਾ ਅਜਲ ਦਾ
ਹੁੰਗਾਰਾ ਆਵੇ ਨਾ ਤੇਰੇ ਵੱਲ ਦਾ
ਕੁੰਗੜ ਕੀਹਦੀ ਪੈਂਦ ਪੈ ਜਾਵਾਂ
ਵੇਲਾ ਆਵੇ ਜਦ ਸੌਣ ਦਾ
ਐ ਮਾਂ
ਮੂਰਤ
ਬਣ ਕੇ ਤੂੰ ਬਹਿ ਗਈ ਕਿਓਂ ਦੀਵਾਰ ਤੇ
ਹੰਝੂ
ਵੀ ਰੁਕ ਗਏ ਮੇਰੇ ਹਾਰ ਕੇ
ਹੌਂਕੇ ਦਸਤਕ ਦਿੰਦੇ ਮੇਰੇ ਦੁਆਰ ਤੇ
ਗੁੱਡੇ ਲੁਟ ਗਏ ਨੇ ਸਾਰੇ ਪਿਆਰ ਦੇ
ਮੁੜ ਕੇ ਨਾ ਆਵੀਂ ਬੁਲਾ ਜਾ ਇੱਕ ਵਾਰ
ਵਾਜਾਂ ਮਾਰ ਕੇ
ਐ ਮਾਂ
ਐ ਮਾਂ
ਮੈਂ ਗੁੱਡੀ ਕਿੰਜ ਚਾੜ੍ਹਾਂ
ਅੰਬਰ
ਕਿਹੜੇ ਦੇ ਵਿੱਚ ਤਾਰਾਂ
ਹੁਣ ਕੀਹਦੇ ਪਿਆਰ ਦਾ ਮੈਂ ਮਾਂਜਾ
ਡੋਰ ਤੇ ਮਾਰਾਂ
ਐ ਮਾਂ
***********************
ਹਾਲਾਤ
February 2017
ਔੜਾਂ ਭਰਿਆ ਮਨ ਦਰਿਆ
ਵਿੱਚ ਵਗਦਾ ਸੁੱਕਾ ਪਾਣੀ
ਬਿਨ ਮਤਲਬ ਦੇ ਉਲ਼ਝੇ ਫਿਰਦੇ
ਮਾਅਨੇ ਸਭ ਬੇਮਾਨ੍ਹੀ
ਪਰਛਾਵੇਂ ਜਿਹੇ ਬੰਦਿਆਂ ਮੂਰ੍ਹੇ
ਹਉਮੈਂ ਹੈ ਜਿਸਮਾਨੀ
ਪੜ੍ਹ ਲਿਖ ਕੇ ਵੀ ਅਨਪੜ੍ਹ ਐਥੇ
ਅਨਪੜ੍ਹ ਬ੍ਰਹਮ ਗਿਆਨੀ
ਨਿਰਮਲਤਾ ਤੇ ਕੋਮਲਤਾ
ਉਪਦੇਸ਼ ਦਵੇ ਅਭਿਮਾਨੀ
ਮਕਰੇ ਬੈਠੇ ਗੁਰ ਘਰ ਸਾਂਭੀ
ਦੁਨੀਆਂ ਹੋਈ ਦਿਵਾਨੀ
ਹਰ ਮਨ ਦੇ ਦਰਵਾਜ਼ੇ ਹੁੰਦੀ
ਝੂਠਾਂ ਦੀ ਅਗਵਾਨੀ
ਸੱਚ ਬੋਲੇ ਤਾਂ ਕੀਕਣ ਬੋਲੇ
ਚੜ੍ਹਿਆ ਝੂਠ ਜ਼ੁਬਾਨੀਂ
ਤਰਕ ਤਾਂ ਤੋਲੇ ਸਾਵਾਂ ਸਾਵਾਂ
ਕੁਤਰਕ ਬੇ ਰੋਕ ਬਿਆਨੀ
ਸਿੰਘਾਸਣ ਤੇ ਸਜ ਸਜ ਬੈਠੇ
ਪੱਲੇ ਅਕਲ ਦੁਆਨੀ
ਧਰਤੀ ਉੱਤੇ ਲੀਕਾਂ ਵਾਹ ਕੇ
ਬਣ ਗਏ ਦੁਸ਼ਮਣ ਜਾਨੀ
ਪਰਲੇ ਪਾਸੇ ਰਾਕਸ਼ ਵੱਸਦੇ
ਉਰਲੇ ਦਿਲਬਰ ਜਾਨੀ
ਧਰਤੀ ਵੰਡੀ ਪਾਣੀ ਵੰਡਿਆ
ਹਵਾ ਨੀ ਵੰਡੀ ਜਾਣੀ
ਆਹ ਵੀ ਮੇਰਾ ਔਹ ਵੀ ਮੇਰਾ
ਦੋ ਦਿਨ ਦੇ ਸੈਲਾਨੀ
ਧਰੀ ਧਰਾਈ ਰਹਿ ਜਾਣੀ ਹੈ
ਸਾਰੀ ਬੁੱਧੀਮਾਨੀ
ਆਦਮ ਜਾਤ ਨੂੰ ਲੈ ਕੇ ਡੁੱਬੂ
ਆਪਣੀ ਹੀ ਸ਼ੈਤਾਨੀ
***************************
ਬਿਰਥੇ
February 2017
ਦਿਲ ਬੇਕਰਾਰ ਮੇਰਾ
ਕਦੋਂ ਦਾ ਬੀਮਾਰ ਤੇਰਾ
ਤੇਰੀਆਂ ਨੇ ਯਾਦਾਂ ਆਓਂਦੀਆਂ
ਰਵੇ ਇੰਤਜ਼ਾਰ ਤੇਰਾ
ਹੋਵੇ ਨਾ ਦੀਦਾਰ ਤੇਰਾ
ਥੱਕ ਗਈ ਪਓਂਦੀ ਔਂਸੀਆਂ
ਝਾਕ ਦੀਆਂ ਰਾਹਾਂ ਉੱਤੇ
ਬਿਰਥਾ ਦਾ ਪਹਿਰਾ ਲੱਗੇ
ਪੀੜਾਂ ਨੰਗੇ ਹੋ ਕੇ ਨ੍ਹਾਓਂਦੀਆਂ
ਘੁੱਪ ਮੱਸਿਆ ਦਾ ਨ੍ਹੇਰਾ
ਹੋਵੇ ਨਾ ਕਦੇ ਸਵੇਰਾ
ਤਾਂਘਾਂ ਮੈਨੂੰ ਲਾਰੇ ਲਾਓਂਦੀਆਂ
ਆਈ ਨਾ ਘਟਾ ਚੜ੍ਹ
ਉਮਰਾਂ ਵੀ ਗਈਆਂ ਹੜ੍ਹ
ਹਿਜਰਾਂ ਨੇ ਪੈਲਾਂ ਪਾਓਂਦੀਆਂ
ਆਸਾਂ ਦੇ ਬਨੇਰੇ ਮੇਰੇ
ਕਾਵਾਂ ਨੇ ਲਾਏ ਨਾ ਫੇਰੇ
ਗੂੰਗੀਆਂ ਨੇ ਕੋਇਲਾਂ ਗਾਓਂਦੀਆਂ
ਦਿਲ ਵੀ ਨਾ ਧੜਕੇ ਇਹ
ਅੱਖ ਵੀ ਨਾ ਫੜਕੇ ਇਹ
ਬਿੜਕਾਂ ਵੀ ਨਹੀਓਂ ਆਓਂਦੀਆਂ
ਬਣ ਕੇ ਭੁਲੇਖੇ ਜਿਹੇ
ਅਣਹੋਣੀਆਂ ਦੇ ਟੋਲੇ
ਬੂਹਾ ਮੇਰਾ ਖੜਕਾਓਂਦੀਆਂ
ਵੰਗਾਂ ਦੇ ਪਏ ਟੋਟੇ
ਟੁੱਟਦੇ ਨਾ ਮੈਥੋਂ ਛੋਟੇ
ਤਾਕ ਤੇਰੀ ਮਾਰੇ ਝੱਲੀਆਂ
ਪੱਤੀਆਂ ਵੀ ਫੁੱਲ ਦੀਆਂ
ਵੈਰਨਾ ਨੇ ਬਣ ਗਈਆਂ
ਨਾਂਹ ਤੇ ਆ ਕੇ ਮੁੱਕ ਜਾਂਦੀਆਂ
ਬਿਰਹੌ ਵੀ ਅੜ ਅੜ
ਬਹਿੰਦੀ ਡਟ ਮੇਰੇ ਦਰ
ਪੱਕੀਆਂ ਬਰੂਹਾਂ ਮੱਲੀਆਂ
ਭਰਮਾ ਨੇ ਆਓਣਾ ਛੱਡ
ਸੁਪਨੇ ਬਣਾਓਣਾ ਛੱਡ
ਮੁੱਕਣ ਨਾ ਰਾਤਾਂ ਲਮੀਆਂ
ਦਿਲ ਬੇਕਰਾਰ ਮੇਰਾ
ਕਦੋਂ ਦਾ ਬੀਮਾਰ ਤੇਰਾ
ਤੇਰੀਆਂ ਨੇ ਯਾਦਾਂ ਆਓਂਦੀਆਂ
ਰਵੇ ਇੰਤਜ਼ਾਰ ਤੇਰਾ
ਹੋਵੇ ਨਾ ਦੀਦਾਰ ਤੇਰਾ
ਥੱਕ ਗਈ ਪਓਂਦੀ ਔਂਸੀਆਂ
*********************
ਚਿੱਬ
February 2017
ਵੇਖ ਕਦੇ ਤਾਂ ਚੁੱਕ ਕੇ ਸਿਰ ਨੂੰ
ਮਾਰ ਕੇ ਵੇਖ ਕਦੇ ਲਲਕਾਰ
ਪੈਰ ਕੱਢ ਕੇ ਵੇਖ ਕਦੇ ਤਾਂ
ਕਾਇਦੇ ਦੇ ਦਾਇਰੇ ਤੋਂ ਬਾਹਰ
ਦੁਨੀਆਂ ਦੇ ਕਾਨੂਨਾਂ ਥੱਲੇ
ਦੱਬੇ ਕੁਚਲੇ ਮਣ ਮਣ ਭਾਰ
ਕਿਸ ਨੇ ਇਹ ਕਾਨੂਨ ਬਣਾਏ
ਪੁੱਛ ਕੇ ਵੇਖ ਕਦੇ ਤਾਂ ਯਾਰ
ਰਾਜੇ ਮਾਹਰਾਜੇ ਸਭ ਤੁਰ ਗਏ
ਝੁਕਣਾ ਛੱਡ ਹੁਣ ਬਰਖੁਰਦਾਰ
ਸਾਂਭੀ ਬੈਠੇ ਸੰਸਦ ਤੇਰੀ
ਚੋਰ ਉਚੱਕੇ ਸਰਮਾਏਦਾਰ
ਕੁਝ ਵੀ ਆਖਣ ਸਿਰ ਮੱਥੇ ਤੇ
ਕਦੇ ਤਾਂ ਕਰ ਕੁਝ ਸੋਚ ਵਿਚਾਰ
ਭੇਡਾਂ ਦਾ ਇਹ ਇੱਜੜ ਛੱਡ ਕੇ
ਕੱਲਾ ਵੇਖ ਦੜੰਗੇ ਮਾਰ
ਗੁੰਡੇ ਨੇਤਾ ਪੁਲਿਸ ਰਾਜ ਦਾ
ਬੱਸ ਕਰ ਸਹਿਣਾ ਅਤਿਆਚਾਰ
ਖੋਹ ਕੇ ਵੇਖ ਇਨ੍ਹਾ ਦੇ ਹੱਥੋਂ
ਕਦੇ ਤਾਂ ਇਨ੍ਹਾ ਦੇ ਹਥਿਆਰ
ਹੰਭਿਆ ਵਕਤ ਤੇਰੇ ਵੱਲ ਝਾਕੇ
ਵਾਜੋਂ ਤੇਰੇ ਹੈ ਲਾਚਾਰ
ਰੰਗ ਲਾ ਫੇਰ ਬਸੰਤੀ ਚੋਲੇ
ਇਨਕਲਾਬ ਲਈ ਹੋ ਤਿਆਰ
ਬ੍ਰਹਿਮੰਡਾਂ ਦੇ ਸਾਹਵੇਂ ਭਾਵੇਂ
ਕੁਝ ਵੀ ਨਾ ਤੇਰਾ ਆਕਾਰ
ਪਾ ਜਾ ਫਿਰ ਵੀ ਇਸ ਤੇ ਅਪਣੇ
ਨਿੱਕੇ ਨਿੱਕੇ ਚਿੱਬ ਹਜ਼ਾਰ
*********************
ਤਦ ਤਕ
February 2017
ਬੀਤ ਜਾਵਾਂਗਾ ਮੈਂ ਵੀ ਇੱਕ ਦਿਣ
ਢਲ ਜਾਵੇਗਾ ਸੂਰਜ ਤੇਰਾ
ਪਰ ਜਦ ਸੀਤ ਹਵਾ ਉਮਰਾਂ ਨੇ
ਠੰਡਾ ਕੀਤਾ ਪਿੰਡਾ ਤੇਰਾ
ਕੱਜ ਕਲੇਵਰ ਗਰਮਾਵੇਗਾ
ਨਿੱਘਾ ਜਿਹਾ ਅਲਿੰਗਨ ਮੇਰਾ
ਚਾਨਣ ਜਦ ਧੁੰਦਲ਼ਾ ਜਾਵੇਗਾ
ਲੋ ਤੜਫੇਗੀ ਭੋਰਾ ਭੋਰਾ
ਉੱਖੜੇ ਉੱਖੜੇ ਸਾਹਾਂ ਦੇ ਵਿੱਚ
ਦਿਲ ਧੜਕੇਗਾ ਥੋੜ੍ਹਾ ਥੋੜ੍ਹਾ
ਮਨ ਤੇਰੇ ਨੂੰ ਸਹਲਾਵੇਗਾ
ਅਣਥੱਕ ਸਾਥ ਭਰੋਸਾ ਮੇਰਾ
ਨਰਮ ਰੁਪਹਿਲੇ ਕੇਸਾਂ ਦੇ ਵਿੱਚ
ਵਾਲ਼ ਕੋਈ ਕੱਲਮ ਕੱਲਾ ਕਾਲਾ
ਸੱਜਰੇ ਵਾਹਣ ਦੇ ਵਾਂਗਰ ਖਿੜਿਆ
ਸੋਹਣਾ ਰਹਿਮਤ ਮੁਖੜਾ ਤੇਰਾ
ਖੁਸ਼ਕ ਲਬਾਂ ਨੂੰ ਨਰਮਾਵੇਗਾ
ਨਾਜ਼ੁਕ ਸਿੱਲ੍ਹਾ ਚੁੰਮਣ ਮੇਰਾ
ਯਾਦ ਵੀ ਇੱਕ ਦਿਨ ਬਹਿਕਾਵੇਗੀ
ਬੋਝੇ ਚਾਬੀ ਗੁੰਮ ਜਾਵੇਗੀ
ਕਿਸ ਸੂਰਤ ਦਾ ਨਾਮ ਹੈ ਕਿਹੜਾ
ਭੁੱਲਿਆ ਕੰਮ ਸੀ ਕਰਨਾ ਜਿਹੜਾ
ਤਦ ਵੀ ਪੂਰਨ ਚੰਦਰਮਾ ਬਣ
ਰੋਸ਼ਨਾਵਾਂਗਾ ਵਿਹੜਾ ਤੇਰਾ
ਜਦ ਤੱਕ ਸਾਹ ਵਿੱਚ ਸਾਹ ਹੈ ਬਾਕੀ
ਤਾਕਤ ਇੱਕ ਵੀ ਕਦਮ ਚੁੱਕਣ ਦੀ
ਸੌਣ ਤੋਂ ਪਹਿਲਾਂ ਹੱਥ ਫੜਨ ਦੀ
ਸੁਬ੍ਹਾ ਨੂੰ ਫਿਰ ਤੋਂ ਤਾਂਘ ਮਿਲਨ ਦੀ
ਤਦ ਤਕ ਹਰ ਇਕ ਸੰਝ ਸਵੇਰਾ
ਪਾਵਾਂਗਾ ਮੈਂ ਤੈਨੂੰ ਘੇਰਾ
***************
ਖੜੋਤ
January 2017
ਜਦ ਬਹੇ ਉਲਟੀ ਗੰਗਾ, ਭਰ ਜੇ ਪਾਪਾਂ ਦਾ ਘੜਾ
ਫੇਰ ਸੋਧਾਂ ਦੀ ਦਵਾ, ਰਾਸ ਨਾ ਆਏ
ਗੂੰਗੀ ਜਦ ਹੋ ਜੇ ਅਵਾਜ, ਬੇ-ਇਮਾਨ ਦਾ ਹੋ ਜੇ ਤਾਜ
ਝੂਠ ਦਾ ਆ ਜੇ ਰਿਵਾਜ, ਡਾਂਗ ਬਣ ਜਾਵੇ ਸਮਾਜ
ਨ੍ਹੇਰਾ ਸੂਰਜ ਖਾ ਲਵੇ, ਤਰਕ ਫਾਹਾ ਲਾ ਲਵੇ
ਸਬਰ ਦਾ ਬੰਨ੍ਹ ਟੁੱਟ ਜੇ, ਆਸ ਦਾ ਦਮ ਘੁੱਟ ਜੇ
ਗਰਕ ਜਾਵੇ ਜਦ ਸਮਾਜ, ਰੋਗ ਬਣ ਜੇ ਲਾ-ਇਲਾਜ
ਫੇਰ ਸੋਧਾਂ ਦੀ ਦਵਾ, ਰਾਸ ਨਾ ਆਏ
ਚੋਰ ਦਾ ਹੋ ਜੇ ਨਿਜ਼ਾਮ, ਰਾਜ ਗੁੰਡਾ ਬੇਲਗਾਮ
ਭੀੜ ਦੇ ਹੱਥ ਹੋ ਨਿਆਂ, ਲੁਕਣ ਨੂੰ ਲੱਭੇ ਨਾ ਥਾਂ
ਹੱਕ ਨੂੰ ਲੁੱਟ ਲਏ ਵਿਧਾਨ, ਭੁੱਖਾ ਮਰ ਜਾਵੇ ਕਿਸਾਨ
ਜ਼ਿੰਦਗੀ ਦੇ ਬੋਝ ਨੂੰ, ਚੁੱਕਦਾ ਥੱਕ ਜੇ ਜੁਆਨ
ਕਦਰ ਆਪੋ ਧਾਪ ਦੀ, ਲੋਕ ਸੇਵਾ ਗਾਲ਼ ਜਿਹੀ
ਫੇਰ ਸੋਧਾਂ ਦੀ ਦਵਾ, ਰਾਸ ਨਾ ਆਏ
ਵੇਖ ਸੱਚ ਸੁੱਤਾ ਪਿਆ, ਹਰ ਸਮੇਂ ਦਾ ਬਾਦਸ਼ਾਹ
ਭੇਸ ਵੱਟ ਦਰਵੇਸ਼ ਦਾ, ਨਾਅਰਾ ਲਾਵੇ ਦੇਸ਼ ਦਾ
ਭੁੱਖ ਮੰਗੇ ਰੋਜ਼ੀਆਂ, ਰੁੱਝੇ ਵਿੱਚ ਇਹ ਸਿਆਸਤਾਂ
ਵਾਦ ਤੇ ਵਿਵਾਦ ਕੀ, ਜੁਮਲਾ ਘੜਦੇ ਨਿੱਤ ਨਵਾਂ
ਆਮ ਜਦ ਕੋਈ ਆਤਮਾ, ਬਣ ਬਹੇ ਪਰਮਾਤਮਾ
ਫੇਰ ਸੋਧਾਂ ਦੀ ਦਵਾ, ਰਾਸ ਨਾ ਆਏ
ਧੀਆਂ ਭੈਣਾ ਔਰਤਾਂ, ਵੇਖ ਰਾਹ ਵਿੱਚ ਕੱਲੀਆਂ
ਹਰ ਕੋਈ ਬਣ ਜੇ ਹੈਵਾਨ, ਖਾਣ ਨੂੰ ਪੈ ਜੇ ਸ਼ੈਤਾਨ
ਕਿਹੜੇ ਵੇਲ਼ੇ ਆਣ ਇਹ, ਕਿਹੜੇ ਵੇਲ਼ੇ ਜਾਣ ਇਹ
ਕਿਹੜੇ ਕੱਪੜੇ ਪਾਣ ਇਹ, ਜਿਓਣ ਜਾਂ ਮਰ ਜਾਣ ਇਹ
ਪਾਕ ਪਾਵਨ ਖਸਲਤਾਂ, ਸਨਦ ਦੇਵਣ ਵਹਿਸ਼ਤਾਂ
ਫੇਰ ਸੋਧਾਂ ਦੀ ਦਵਾ, ਰਾਸ ਨਾ ਆਏ
ਦੁਨੀਆਂ ਦੇ ਇਸ ਇੰਤਜ਼ਾਮ, ਬੰਦਾ ਬਣ ਜਾਵੇ ਗੁਲਾਮ
ਕੁਝ ਕੁ ਇੱਕ ਦੀ ਐਸ਼ ਲਈ, ਵਿਅਸਤ ਹੋ ਸਾਰਾ ਜਹਾਨ
ਗੁਰਬਤਾਂ ਹੋ ਕਾਰੋਬਾਰ, ਲੁੱਟ ਖੋਹ ਬਣ ਜੇ ਵਪਾਰ
ਮਾਰ ਕੇ ਆਪਣੀ ਜ਼ਮੀਰ, ਵਿਕ ਜੇ ਹਰ ਕੋਈ ਬਜ਼ਾਰ
ਵੇਖ ਜੇ ਕੋਈ ਇਹ ਕਹੇ, ਇਹ ਸਦਾ ਹੀ ਇਓਂ ਰਹੇ
ਫੇਰ ਸੋਧਾਂ ਦੀ ਦਵਾ, ਰਾਸ ਨਾ ਆਏ
***************************
ਪੰਜਾਬਣ
January 2017
ਕਾਲ਼ੀ ਬੋਲ਼ੀ ਰਾਤ ਤਿਲਕਵੇਂ ਵਾਲ਼
ਧੁੱਪ ਚ ਰੜ੍ਹਿਆ ਮੁਖੜਾ ਭੂਰਾ ਲਾਲ
ਬੁੱਲ੍ਹੀਆਂ ਅੱਲ੍ਹੜ ਪੱਤੀਆਂ ਰੰਗ ਗੁਲਾਲ
ਜਲਵਾ ਹਰ ਇੱਕ ਨਦਰੀ ਨਦਰ ਨਿਹਾਲ
ਲਟਕੀ ਵੱਟੋ ਵੱਟ ਚੱਲ ਕੇ ਚਾਲ
ਥਿਰਕੇ ਅੰਗ ਅੰਗ ਮਸਤ ਮੌਜ ਦੇ ਨਾਲ਼
ਲੱਕ ਹੁਲਾਰੇ ਖਾਵੇ ਵਾਂਗ ਭੁਚਾਲ਼
ਥਪਕੇ ਪਿੱਛਾ ਸਹਿਜ ਪਰਾਂਦਾ ਲਾਲ
ਨੱਕ ਕੰਨ ਵਿੰਨਿਆ ਸੂਲ਼ ਕਿੱਕਰ ਦੀ ਨਾਲ਼
ਕੋਕਾ ਘੜ ਕੇ ਪਾਇਆ ਨਿੱਮ ਦੀ ਡਾਲ਼
ਗੁੰਦਿਆ ਛੱਲਾ ਘਾਹ ਦਾ ਸਧਰਾਂ ਨਾਲ਼
ਨਜ਼ਰਾਂਵੱਟੂ ਗੱਲ੍ਹ ਤੇ ਕਰੇ ਕਮਾਲ
ਤੁੰਨ ਤੁੰਨ ਭਰਿਆ ਨੱਕੋ ਨੱਕ ਜਮਾਲ
ਛੱਲ ਛੱਲ ਡੁੱਲ੍ਹਦਾ ਰੂਪ ਹਰੇਕ ਉੱਛਾਲ਼
ਲੰਘ ਜੇ ਜਿੱਥੋਂ ਪੈਂਦਾ ਰਹੇ ਧਮਾਲ
ਸੁੱਧ ਬੁੱਧ ਖੋ ਜੇ ਉੱਡ ਜੇ ਹੋਸ਼ ਹਵਾਲ
ਸੋਹਣੀ ਸੂਰਤ ਫੱਬਤ ਬੋਲ ਤੇ ਚਾਲ
ਅਕਲ ਸ਼ਕਲ ਦਾ ਦੁਰਲਭ ਮੇਲ ਮਿਸਾਲ
ਸੂਰਜ ਫਿੱਕਾ ਪੈਦਾ ਵੇਖ ਜਲਾਲ
ਕੁੜੀ ਪੰਜਾਬਣ ਪਰਤੱਖ ਇੰਦਰ ਜਾਲ
***********************
ਛੁੱਟੀ
January 2017
ਆ ਅੱਜ ਆਪਾਂ ਦੋਵੇਂ ਮਿਲ਼ ਕੇ
ਐਤਵਾਰ ਦੀ ਛੁੱਟੀ ਮਨਾਈਏ
ਦੇਰ ਸਵੇਰ ਤੱਕ ਤਾਣ ਕੇ ਲਮੀਆਂ
ਘੇਸਲ਼ ਵੱਟੀਏ ਤੇ ਸੁਸਤਾਈਏ
ਗੋਡੇ ਗੋਡੇ ਸੂਰਜ ਚੜ੍ਹ ਜੇ
ਫਿਰ ਰਲ਼ ਦੋ ਕੱਪ ਚਾਹ ਬਣਾਈਏ
ਵਿਚ ਵਰਾਂਡੇ ਬਹਿ ਕੇ ਦੋਨੇ
ਲੰਮੇ ਲੰਮੇ ਸੁੜ੍ਹਕੇ ਲਾਈਏ
ਲੰਘਦਾ ਵੇਖ ਕੇ ਸਬਜ਼ੀ ਵਾਲਾ
ਰੁਕ ਜਾ ਭਾਈ ਵਾਜ ਲਗਾਈਏ
ਕਿੱਲੋ ਗਾਜਰ ਤੇ ਕਿੱਲੋ ਮਟਰ ਦਾ
ਠੀਕ ਠੀਕ ਜਿਹਾ ਭਾਅ ਲਗਵਾਈਏ
ਧੁੱਪ ਚ ਡਾਹ ਕੇ ਵਾਣ ਦਾ ਮੰਜਾ
ਤੇਲ ਸਰ੍ਹੋਂ ਦਾ ਕੌਲ ਚ ਪਾਈਏ
ਇੱਕ ਦੂਜੇ ਦੇ ਕੱਢ ਚੀਰਮੀ
ਧੌਲ਼ੇ ਪੱਟੀਏ ਝਾਸੇ ਲਾਈਏ
ਬੰਨ੍ਹ ਕੇ ਸਿਰ ਫਿਰ ਦੋਨੋ ਜੂੜੇ
ਕੌਫੀ ਦੀ ਫੁਰਮਾਇਸ਼ ਲਗਾਈਏ
ਚਾੜ੍ਹ ਪਤੀਲਾ ਪਾਣੀ ਚੂਲ੍ਹੇ
ਗਾਣੇ ਇਸ਼ਕ ਮੁਹੱਬਤ ਗਾਈਏ
ਪੰਝੱਤਰ ਮਾਡਲ ਦਾ ਲਮਬਰੇਟਾ
ਧੋ ਕੇ ਪਾਲਸ਼ ਲਾ ਚਮਕਾਈਏ
ਨਵਾ ਧਵਾ ਰਾਂਝੇ ਦੀ ਸਵਾਰੀ
ਲੂਨਾ ਤੇਰੀ ਨਾਲ਼ ਖੜ੍ਹਾਈਏ
ਕੋਸੇ ਕੋਸੇ ਪਾਣੀ ਦੇ ਨਾਲ
ਵਾਰੀ ਵਾਰੀ ਦੋਨੇ ਨ੍ਹਾਈਏ
ਗੰਦੇ ਮੰਦੇ ਕਪੜੇ ਧੋ ਕੇ
ਚੂੰਢੀ ਲਾ ਲਾ ਸੁੱਕਣੇ ਪਾਈਏ
ਖੁੱਲ੍ਹੇ ਛੱਡ ਫਿਰ ਵਾਲ਼ ਪਿਛਾਂਹ ਨੂੰ
ਸਬਜ਼ੀ ਗਾਜਰ ਮਟਰ ਬਣਾਈਏ
ਗਰਮਾ ਗਰਮ ਤਾਜ਼ੀ ਮੱਕੀ ਦੀ
ਦੇਸੀ ਘੇ ਪਾ ਰੋਟੀ ਖਾਈਏ
ਤਿੰਨ ਤੋਂ ਛੇ ਸਿਨਮਾ ਵੇਖਣ ਦਾ
ਝੱਟ ਪੱਟ ਜਹੇ ਪ੍ਰੋਗ੍ਰਾਮ ਬਣਾਈਏ
ਕਾਹਲ਼ੀ ਕਾਹਲ਼ੀ ਕੰਮ ਮੁਕਾ ਕੇ
ਕੱਪੜੇ ਸੋਹਣੇ ਸੋਹਣੇ ਪਾਈਏ
ਮਾਰ ਪਲਾਕੀ ਬਹਿ ਲਮਬਰੇਟੇ
ਸਿਨਮਾ ਘਰ ਨੂੰ ਸਰਪਟ ਜਾਈਏ
ਕੋਨੇ ਦੀਆਂ ਦੋ ਸੀਟਾਂ ਲੈ ਕੇ
ਹੱਥ ਚ ਪਾ ਹੱਥ ਇਸ਼ਕ ਲੜਾਈਏ
ਇੰਟਰਵਲ ਵਿੱਚ ਜਾ ਕੇ ਬਾਹਰ
ਲਿਮਕੇ ਦੇ ਨਾਲ਼ ਟਿੱਕੀਆਂ ਖਾਈਏ
ਇੱਕ ਦੂਜੇ ਨੂੰ ਭਰ ਭਰ ਅੱਖੀਆਂ
ਫਿਲਮੀ ਰੌਂ ਵਿੱਚ ਡੁੱਬਦੇ ਜਾਈਏ
ਡੁੱਬਿਆ ਸੂਰਜ ਦੇਖ ਕੇ ਬਾਹਰ
ਛੇਤੀ ਛੇਤੀ ਘਰ ਨੂੰ ਜਾਈਏ
ਫਿਲਮ ਦੇ ਨਿਰਦੇਸ਼ਕ ਨੂੰ ਭੰਡੀਏ
ਨਾਇਕ ਤੇ ਨਾਇਕਾ ਵਡਿਆਈਏ
ਤਾਰ ਤੋਂ ਸਿੱਲ੍ਹੇ ਕਪੜੇ ਲਾਹ ਕੇ
ਗਰਮ ਪ੍ਰੈੱਸ ਦੇ ਨਾਲ਼ ਸੁਕਾਈਏ
ਅਗਲੇ ਐਤਵਾਰ ਤੋਂ ਪਹਿਲਾਂ
ਕੰਮ ਮੁਕਾਓਣ ਦੀ ਵਿਓਂਤ ਬਣਾਈਏ
ਛੇ ਦਿਣ ਹਰ ਹਫਤੇ ਦੇ ਵਿੱਚੋਂ
ਵਾਂਗ ਭਮੀਰੀ ਘੁਮੀ ਜਾਈਏ
ਹਰ ਦਿਣ ਐਤਵਾਰ ਬਣ ਜਾਵੇ
ਛੇ ਦਿਣ ਬਹਿ ਇਹ ਆਸਾਂ ਲਾਈਏ
*********************
ਅਪਵਾਦ
December 2016
ਕਿ ਕੀਤਾ ਭੌਰ ਫੁੱਲਾਂ ਨੇ ਸ਼ੁਦਾਈ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
ਵਿਚਾਰਾ ਭੌਰ ਤਾਂ ਲੱਭਦਾ ਸੀ ਮਨ ਦਾ ਮੇਲ ਦੂਨੀਆਂ ਚੋਂ
ਵਟਾ ਕੇ ਭੇਸ ਮਹਿਬੂਬਾ ਦਾ ਫੁੱਲਾਂ ਮੋਹ ਲਿਆ ਉਸ ਨੂੰ
ਝਲਕ ਰੰਗਾਂ ਦੀ ਫੁੱਲਾਂ ਐਸੀ ਪਾਈ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
ਇਹ ਕਾਲ਼ਾ ਭੌਰ ਹੀ ਹੋਣਾ ਜੋ ਕਲੀਆਂ ਵਰਗਲਾਓਂਦਾ ਏ
ਕਿ ਪੀ ਕੇ ਰਸ ਇਹ ਰੂਪਾਂ ਦਾ ਉਜਾੜੇ ਬਾਗ ਪਾਓਂਦਾ ਏ
ਜੇ ਦੂਨੀਆਂ ਵੇਖ ਕੇ ਰੰਗ ਮਨ ਬਣਾਏ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
ਕਲਮ ਇੱਕ ਪਾਸੜੀ ਫੁੱਲਾਂ ਦੇ ਦਿਲ ਦੀ ਗੱਲ ਦੱਸਦੀ ਏ
ਇਹ ਹਰ ਇੱਕ ਭੌਰ ਨੂੰ ਸੰਗ ਦਿਲ ਫਰੇਬੀ ਕਹਿ ਕੇ ਸੱਦਦੀ ਏ
ਜੇ ਦੂਨੀਆਂ ਦੋਸ਼ ਮਰਜ਼ੀ ਦੇ ਲਗਾਏ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
ਬਣਾ ਕੇ ਭੌਰ ਨੂੰ ਕਮਲ਼ਾ ਇਹ ਫੁੱਲ ਜਦ ਖਿੜ ਖਿੜਾਓਂਦੇ ਨੇ
ਤੋੜ ਕੇ ਪਿਆਰ ਦੇ ਰਿਸ਼ਤੇ ਇਹ ਜਦ ਇਲਜ਼ਾਮ ਲਾਓਂਦੇ ਨੇ
ਦਰਦ ਰੂਹਾਂ ਤੇ ਕਿੰਨੇ ਨੇ ਹੰਢਾਏ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
ਇਹ ਦੁਨੀਆਂ ਭੌਰ ਦੀ ਗੂੰਜਣ ਕਦੇ ਨਾ ਸਮਝ ਸਕਦੀ ਏ
ਹਵਸ ਦੇ ਸ਼ੀਸ਼ਿਆਂ ਚੋਂ ਹੀ ਮੁਹੱਬਤ ਨੂੰ ਇਹ ਤੱਕਦੀ ਏ
ਕਿਸੇ ਨੇ ਕੌਲ ਕਿੰਨੇ ਨੇ ਨਿਭਾਏ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
ਜੇ ਦੁਨੀਆਂ ਦੋਸ਼ ਭੌਰਾਂ ਤੇ ਹੀ ਲਾਏ
ਭੌਰ ਕੀ ਆਖੇ
ਬਾਗ ਵੀ ਫੁੱਲ ਦੀ ਦੇਵੇ ਗਵਾਹੀ
ਭੌਰ ਕੀ ਆਖੇ
***********************
ਖ਼ਾਹਸ਼
October 2016
ਜਦ ਮਿਲ਼ੇ ਤਦ ਮਿਲੇ, ਜਦ ਮਿਲ਼ੇ ਤਦ ਮਿਲ਼ੇ
ਜਦ ਮਿਲ਼ੇ ਮੈਨੂੰ ਤੇਰਾ ਸਹਾਰਾ ਮਿਲ਼ੇ
ਜਦ ਮਿਲ਼ੇ ਤਦ ਮਿਲ਼ੇ … … …
ਤੇਰੀਆਂ ਅੱਖੀਆਂ ਸਾਡੇ ਦਿਲ ਦੀ ਜ਼ੁਬਾਨ
ਤੇਰੇ ਹੀ ਮੈਂ ਖਿਆਲਾਂ ਚ ਰੁੱਝਿਆ ਰਹਾਂ
ਜਦ ਮਿਲ਼ੇ ਮੈਨੂੰ ਤੇਰਾ ਨਜ਼ਾਰਾ ਮਿਲ਼ੇ
ਜਦ ਮਿਲ਼ੇ ਤਦ ਮਿਲੇ … … …
ਤੇਰੀਆਂ ਆਹਟਾਂ ਦਿਲ ਦੀਆਂ ਧੜਕਨਾਂ
ਤੇਰੇ ਵਾਜੋਂ ਨਾ ਕੋਈ ਮੇਰਾ ਮਿਹਰਬਾਨ
ਜਦ ਮਿਲ਼ੇ ਮੈਨੂੰ ਤੇਰਾ ਹੁੰਗਾਰਾ ਮਿਲ਼ੇ
ਜਦ ਮਿਲ਼ੇ ਤਦ ਮਿਲੇ … … …
ਤੇਰੀਆਂ ਖ਼ਾਹਸ਼ਾਂ ਸਾਡੀਆਂ ਨੀਅਤਾਂ
ਤੇਰੀਆਂ ਕਲਪਨਾ ਵਿੱਚ ਮੈਂ ਡੁੱਬਿਆ ਰਹਾਂ
ਫੇਰ ਮੁੜ ਕੇ ਨਾ ਮੈਨੂੰ ਕਿਨਾਰਾ ਮਿਲ਼ੇ
ਜਦ ਮਿਲ਼ੇ ਤਦ ਮਿਲੇ … … …
ਚੰਚਲ ਇਹ ਅਦਾ ਤੇਰੀਆਂ ਸ਼ੋਖ਼ੀਆਂ
ਤੇਰੇ ਜ਼ੁਲਫਾਂ ਦੇ ਪੇਚਾਂ ਚ ਗੁਮਿਆ ਰਹਾਂ
ਪਿਆਰ ਮੈਨੂੰ ਹੀ ਤੇਰਾ ਇਹ ਸਾਰਾ ਮਿਲ਼ੇ
ਜਦ ਮਿਲ਼ੇ ਤਦ ਮਿਲੇ … … …
ਮੇਰੀਆਂ ਹਸਰਤਾਂ ਤੇਰੀਆਂ ਚਾਹਤਾਂ
ਤੇਰਾ ਹੋਣ ਤੇ ਟਿਕਿਆ ਮੇਰਾ ਇਹ ਜਹਾਨ
ਬਿਨ ਤੇਰੇ ਨਾ ਮੇਰਾ ਹੁਣ ਗੁਜ਼ਾਰਾ ਹੋਵੇ
ਜਦ ਮਿਲ਼ੇ ਤਦ ਮਿਲੇ … … …
ਜਦ ਮਿਲ਼ੇ ਤਦ ਮਿਲੇ, ਜਦ ਮਿਲ਼ੇ ਤਦ ਮਿਲ਼ੇ
ਜਦ ਮਿਲ਼ੇ ਮੈਨੂੰ ਤੇਰਾ ਸਹਾਰਾ ਮਿਲ਼ੇ
ਜਦ ਮਿਲ਼ੇ ਤਦ ਮਿਲ਼ੇ … … …
****************
ਦਾਸਤਾਨ
ਪਾਪ ਦਿਨ ਪਰ ਦਿਨ ਵਧੇ
ਭੋਲ਼ੇ ਕਲ਼ਯੁਗ ਆਖਦੇ
ਕੁਝ ਕੂ ਦੁਸ਼ਮਣ ਆਸ ਦੇ
ਮਿਹਨਤਾਂ ਨੂੰ ਹੜਪ ਦੇ
ਭੁੱਖ ਦੀ ਅਪਣੀ ਹੀ ਹੋਣੀ ਏ ਕੋਈ ਤਾਂ ਦਾਸਤਾਨ
ਐਵੇਂ ਕੋਈ ਚੋਰੀ ਨਹੀ ਕਰਦਾ ਰੋਟੀਆਂ ਇਨਸਾਨ
ਸਰਹੱਦਾਂ ਤੇ ਕੁਝ ਖੜ੍ਹੇ
ਰੋਜ਼ੀਆਂ ਦੇ ਵਾਸਤੇ
ਅਫਸਰਾਂ ਦੇ ਅਰਦਲੀ
ਬਣ ਗਏ ਅਣਖ ਬਾਪ ਦੇ
ਗੁਰਬਤਾਂ ਦੀ ਵੀ ਤਾਂ ਹੋਣੀ ਏ ਕੋਈ ਤਾਂ ਦਾਸਤਾਨ
ਐਵੇਂ ਕੋਈ ਮੌਤ ਨਹੀਂ ਮੰਗਦਾ ਗੁਆਂਢ ਦੀ ਇਨਸਾਨ
ਥੱਕ ਗਏ ਰਾਖੀਆਂ ਖੜ੍ਹੇ
ਕਰਜ਼ ਦੀ ਫਸਲ ਪਾਲ਼ਦੇ
ਪਿੰਡ ਦੀ ਜੂਹ ਬਿਰਖ ਤੇ
ਲਾਸ਼ ਬਣ ਕੇ ਲਟਕਦੇ
ਬੇਵੱਸੀ ਦੀ ਵੀ ਤਾਂ ਹੋਣੀ ਏ ਕੋਈ ਤਾਂ ਦਾਸਤਾਨ
ਐਵੇਂ ਕੋਈ ਆਪ ਨਹੀਂ ਮਰਦਾ ਸ਼ੁਗਲ ਨੂੰ ਇਨਸਾਨ
ਕੁਝ ਕਤਾਰਾਂ ਵਿੱਚ ਖੜ੍ਹੇ
ਨੌਕਰੀ ਦੀ ਆਸ ਤੇ
ਬਾਕੀ ਨਸ਼ਿਆਂ ਦੀ ਬਲੀ
ਚੜ੍ਹ ਗਏ ਨੇ ਭਟਕਦੇ
ਨਾਉਮੀਦੀ ਦੀ ਵੀ ਹੋਣੀ ਏ ਕੋਈ ਤਾਂ ਦਾਸਤਾਨ
ਭਰ ਜਵਾਨੀ ਦੇ ਵਿੱਚ ਨਾ ਲੱਗੇ ਬੇਵਜ੍ਹਾ ਦੂਨੀਆਂ
ਠੇਕਿਆਂ ਤੋਂ ਧਰਮ ਦੇ
ਨਫਰਤਾਂ ਨੇ ਵਰਤਦੇ
ਗਾਵਾਂ ਨੂੰ ਮਾਂ ਆਖਦੇ
ਖਾਣ ਮਾਂਵਾਂ ਚੂੰਡ ਕੇ
ਸਹਿਮ ਤੇ ਡਰ ਦੀ ਵੀ ਹੋਣੀ ਏ ਕੋਈ ਤਾਂ ਦਾਸਤਾਨ
ਐਵੇਂ ਕੋਈ ਅਪਣੇ ਹੀ ਘਰ ਬੈਠਾ ਨਾ ਡਰੇ ਇਨਸਾਨ
ਵਕਤ ਜੇ ਇਓਂ ਹੀ ਰਹੇ
ਤੁਰ ਪੈਣੇ ਬਣ ਕਾਫਲੇ
ਝੁੱਲ ਜਾਣੇ ਜਬਰ ਤੇ
ਬਣ ਕੇ ਨ੍ਹੇਰੀ ਇਹ ਕਦੇ
ਜ਼ੁਲਮ ਦਾ ਲੱਭਣਾ ਨਹੀਂ ਮੁੜ ਕੇ ਫੇਰ ਨਾਮੋ ਨਿਸ਼ਾਨ
ਐਵੇਂ ਨਿੱਤ ਸੁੱਤਾ ਨਹੀਂ ਰਹਿੰਦਾ ਦੱਬਿਆ ਇਨਸਾਨ
*********************************
ਖੇੜੇ
October 2016
ਸਾਡੇ ਵਿਹੜੇ ਫੁੱਲ ਖਿੜਿਆ, ਫੁੱਲ ਖਿੜਿਆ ਉਮੰਗਾਂ ਦਾ
ਨਿੱਕੇ ਨਿੱਕੇ ਅੰਗ ਇਹ ਦੇ, ਭੋਲ਼ੇ ਭੋਲ਼ੇ ਢੰਗ ਇਹ ਦੇ
ਚਾਹਤ ਦੇ ਰੰਗ ਰੰਗਿਆ
ਸਾਡੇ ਵਿਹੜੇ ਫੁੱਲ ਖਿੜਿਆ, ਫੁੱਲ ਖਿੜਿਆ ਉਮੰਗਾਂ ਦਾ
... … …
ਸਾਡੇ ਦਿਲਾਂ ਦੀ ਹੈ ਜਾਨ ਇਹ, ਪੂਰਾ ਹੋਇਆ ਸਾਡਾ ਅਰਮਾਨ ਹੈ
ਗੋਡੇ ਗੋਡੇ ਚਾ ਚੜ੍ਹਿਆ, ਸਾਡੇ ਦਰ ਇਹ ਜਦ ਵੜਿਆ
ਧੁੱਪ ਵਾਲ਼ਾ ਰੰਗ ਲੈ ਕੇ, ਇਤਰ ਸੁਗੰਧ ਲੈ ਕੇ
ਸਿਰ ਸਾਡੇ ਨੂੰ ਚੜ੍ਹਿਆ
ਸਾਡੇ ਵਿਹੜੇ ਫੁੱਲ ਖਿੜਿਆ, ਫੁੱਲ ਖਿੜਿਆ ਉਮੰਗਾਂ ਦਾ
... … …
ਕੁਦਰਤ ਦਾ ਹੋਇਆ ਅਹਿਸਾਨ ਇਹ, ਦੁਨੀਆਂ ਦਾਰੀ ਤੋਂ ਨਾਦਾਨ ਇਹ
ਚਾਉ ਨੂੰ ਝੱਲ ਚੜ੍ਹਿਆ, ਖੁਸ਼ੀਆਂ ਸਾਡਾ ਪੱਲਾ ਫੜਿਆ
ਤੇਰੇ ਮੇਰੇ ਪਿਆਰ ਦਾ ਇਹ, ਗੁਲ ਇਤਬਾਰ ਦਾ ਇਹ
ਮੱਸਿਆ ਨੂੰ ਚੰਨ ਚੜ੍ਹਿਆ
ਸਾਡੇ ਵਿਹੜੇ ਫੁੱਲ ਖਿੜਿਆ, ਫੁੱਲ ਖਿੜਿਆ ਉਮੰਗਾਂ ਦਾ
... … …
ਆਓਂਦੇ ਸਮੇਂ ਦੀ ਪਹਿਚਾਣ ਇਹ, ਜਾਂਦੇ ਵੇਲ਼ੇ ਦੀ ਮੁਸਕਾਨ ਇਹ
ਜਦ ਦਾ ਸਾਨੂੰ ਮਿਲ਼ਿਆ, ਦਿਨ ਰਹਿੰਦਾ ਜਿਵੇਂ ਚੜ੍ਹਿਆ
ਪੁਨਰ ਜਨਮ ਸਾਡਾ, ਹੋਇਆ ਜਿਵੇਂ ਪੂਰਾ ਵਾਅਦਾ
ਸੁਪਨੇ ਨੂੰ ਬਾਂਹੋਂ ਫੜਿਆ
ਸਾਡੇ ਵਿਹੜੇ ਫੁੱਲ ਖਿੜਿਆ, ਫੁੱਲ ਖਿੜਿਆ ਉਮੰਗਾਂ ਦਾ
... … …
**********************************
ਵਕਤ
May 2016
ਉਂਜਲ਼ਾਂ ਭਰਿਆਂ ਵਕਤ ਨੀ ਰੁਕਦਾ
ਵਗ ਜੇ ਉਂਗਲ਼ਾਂ ਥਾਣੀ
ਪਲ ਪਲ ਕਰ ਕੇ ਵਗ ਜਾਂਦਾ
ਫੜਿਆ ਨਾ ਜਾਵੇ ਪਾਣੀ
ਔਹ ਜੋ ਲੰਘ ਗਿਆ
ਉਹਦਾ ਇੱਕੋ ਹੀ ਮਤਲਬ ਹੈ
ਆਹ ਜੋ ਲੰਘ ਰਿਹੈ
ਜੀਵਨ ਦਾ ਇਹੋ ਸੱਚ ਹੈ
ਜਨਮ ਤੋਂ ਪਹਿਲਾਂ ਵੀ ਕੱਲ੍ਹ ਸੀ
ਤੇ ਮੌਤ ਤੋਂ ਬਾਅਦ ਵੀ ਕੱਲ੍ਹ ਹੈ
ਅੱਜ ਦੇ ਵਿੱਚ ਹੀ ਜੀਵਨ ਹੈਂ
ਵਿੱਚ ਕੱਲ੍ਹ ਦੇ ਮੌਤ ਜੀਵਤ ਹੈ
ਕੱਲ੍ਹ ਨੇ ਤੇਰੇ ਆਓਣਾ ਨਾਹੀਂ
ਜਦ ਹੋਣਾ ਹੁਣ ਹੋਣਾ
ਹੁਣ ਹੀ ਕੱਲ੍ਹ ਸੀ ਹੁਣ ਹੀ ਅੱਜ ਹੈ
ਹੁਣ ਹੀ ਕੱਲ੍ਹ ਬਣ ਜਾਣਾ
ਜਨਮ ਤੋਂ ਪਹਿਲਾਂ ਵੀ ਕੁਝ ਨਾਹੀਂ
ਮੌਤ ਤੋਂ ਬਾਅਦ ਵੀ ਨਾਹੀਂ
ਜੀਵਨ ਦਾ ਮਤਲਬ ਹੀ ਅੱਜ ਹੈ
ਕੱਲ੍ਹ ਦਾ ਮਤਲਬ ਨਾਹੀਂ
ਵਕਤ ਹੈ ਜੀਵਤ ਇਸ ਦਮ ਹੀ
ਸਭ ਅੱਗੇ ਪਿੱਛੇ ਮਰਿਆ
ਕਿਸ ਲਮਹੇ ਦੀਆਂ ਕਰੇਂ ਉਡੀਕਾਂ
ਆ ਗਿਆ
ਆਹ ਗਿਆ
ਔਹ ਗਿਆ
*****************
ਤਨਹਾਈ
May 2016
ਪਲ ਦੋ ਪਲ ਦੀ ਖੇਡ ਹੈ ਸਾਰੀ
ਏਨੀ ਗੂੜ੍ਹੀ ਲਾਈ ਕਿਓਂ ਯਾਰੀ
ਮੌਤ ਨੇ ਕੀਤੀ ਹੈ ਦਿਲਦਾਰੀ
ਆਈ ਸਾਨੂੰ ਵਾਰੋ ਵਾਰੀ
ਪਲ ਦੋ ਪਲ ਦੀ...
ਦੁਨੀਆਂ ਦੌੜੀ ਫਿਰਦੀ ਸਾਰੀ
ਜਾਵੇ ਲੰਘਦੀ ਮਾਰੋ ਮਾਰੀ
ਜੀਵਨ ਕੁਝ ਪਲ ਵਾਂਗ ਉਧਾਰੀ
ਮੁੜ ਨਾ ਆਵੇ ਵਾਰੀ ਵਾਰੀ
ਪਲ ਦੋ ਪਲ ਦੀ...
ਲੱਭਦੀ ਫਿਰਦੀ ਚੀਜ਼ ਪਿਆਰੀ
ਖੋਲ ਨਾ ਦੇਖੇ ਆਪਣੀ ਪਟਾਰੀ
ਵਕਤ ਨੇ ਕਰਨੀ ਹੈ ਹੁਸ਼ਿਆਰੀ
ਧੂਆਂ ਆਰੀ ਧੂਆਂ ਪਾਰੀ
ਪਲ ਦੋ ਪਲ ਦੀ...
ਨਿੱਕੀ ਨਿੱਕੀ ਪਿਆਰੀ ਪਿਆਰੀ
ਗੱਲ ਹੁਣ ਤੇਰੀ ਜਾਵੇ ਨਾ ਮਾਰੀ
ਦੁਨੀਆਂ ਦੀ ਇਹ ਖੇਡ ਨਿਆਰੀ
ਯਾਦਾਂ ਮਾਰਨ ਚੋਭ ਕਟਾਰੀ
ਪਲ ਦੋ ਪਲ ਦੀ...
ਜਿੰਦ ਤੇਰੀ ਮੇਰੀ ਅੱਡ ਅੱਡੇਰੀ
ਵੰਡੀ ਨਾ ਜਾਵੇ ਅੱਧ ਅੱਧਾਰੀ
ਤੇਰੇ ਸਾਹਾਂ ਪਹਿਲਾਂ ਮਾਰੀ
ਮੇਰੇ ਸਾਹਾਂ ਹੁਣ ਮੈਂ ਮਾਰੀ
ਪਲ ਦੋ ਪਲ ਦੀ...
ਲੰਘ ਗਈ ਕਿੰਜ ਇਹ ਸਾਰੇ ਦੀ ਸਾਰੀ
ਇਕ ਵੀ ਅਸਾਂ ਅਜੇ ਪਲਕ ਨੀ ਮਾਰੀ
ਰਾਹ ਤੇਰਾ ਦੇਖਾਂ ਥੱਕੀ ਹਾਰੀ
ਮਾਰ ਗਿਓਂ ਕਿਓਂ ਕੱਲਾ ਉਡਾਰੀ
ਪਲ ਦੋ ਪਲ ਦੀ...
ਜਦ ਵੀ ਉੱਠਾਂ ਤੜਕੇ ਸਾਰੀ
ਦੋ ਕੱਪ ਚਾਹ ਦੇ ਕਰਨ ਤਿਆਰੀ
ਕੱਲ੍ਹ ਦੋ ਪੀਤੇ ਅੱਜ ਇੱਕ ਵੀ ਨਹੀਂ
ਕਿਓਂਕੇ ਅੱਜ ਸੀ ਤੇਰੀ ਵਾਰੀ
ਪਲ ਦੋ ਪਲ ਦੀ...
ਮਘ ਜਾਂ ਕਿੰਜ ਵਿੱਚ ਦੁਨੀਆਂ ਦਾਰੀ
ਮੇਰੀ ਦੁਨੀਆਂ ਤੂੰ ਸੀ ਸਾਰੀ
ਹਾੜ੍ਹ ਮਹੀਨੇ ਸਿਖਰ ਦੁਪਹਰੀ
ਤੇਰੇ ਹਓਂਕੇ ਨੇ ਮੈਂ ਠਾਰੀ
ਪਲ ਦੋ ਪਲ ਦੀ...
ਪਲ ਦੋ ਪਲ ਦੀ ਖੇਡ ਹੈ ਸਾਰੀ
ਏਨੀ ਗੂੜ੍ਹੀ ਲਾਈ ਕਿਓਂ ਯਾਰੀ
ਮੌਤ ਨੇ ਕੀਤੀ ਹੈ ਦਿਲਦਾਰੀ
ਆਈ ਸਾਨੂੰ ਵਾਰੋ ਵਾਰੀ
ਪਲ ਦੋ ਪਲ ਦੀ…
**********************
ਅਸਮਰਥ
April 2016
ਔੜਾਂ ਦੇ ਸੈਲਾਬ ਨੇ ਮੇਰਾ
ਤਨ ਮਨ ਜਲ ਥਲ ਕਰਿਆ
ਤੇਰਾ ਪਾਸਾ ਹਰਿਆ ਭਰਿਆ
ਮੇਰਾ ਕਣ ਕਣ ਸੜਿਆ
ਕਿੰਜ ਲਿਖਾਂ ਤੇ ਕੀਕਣ ਗਾਵਾਂ
ਮਿੱਠੜੀ ਬਾਤ ਸੁਣਾਵਾਂ
ਬਾਤ ਮੇਰੀ ਦੇ ਵਿੱਚੋਂ ਛਲਕੇ
ਬਿਹਬਲ ਮਨ ਅੱਧ ਭਰਿਆ
ਸੋਚਾਂ ਦੀਆਂ ਕਲਮਾਂ ਨੂੰ ਮੇਰੇ
ਸਵਾਦ ਦਾ ਪਿਓਂਦ ਨੀ ਚੜ੍ਹਿਆ
ਪੁੱਠਾ ਸਿੱਧਾ ਤਿੱਖਾ ਖੁੰਢਾ
ਹਰ ਜੀ ਲਾ ਇਸ ਘੜਿਆ
ਦਵੋ ਦਲੀਲਾਂ ਪਿਓ ਮੇਰੇ ਨੂੰ
ਵਿਆਹ ਦੂਜਾ ਜਿਸ ਕਰਿਆ
ਛੋਟੀ ਉਮਰੇ ਮਾਂ ਮਤੇਈ
ਕੁੱਛੜ ਮੈਨੂੰ ਧਰਿਆ
ਮਨ ਮੇਰੇ ਚੋਂ ਇੱਕ ਇੱਕ ਕਰਕੇ
ਹਰਫ਼ ਦਾ ਰੌਲ਼ਾ ਕਿਰਿਆ
ਕਈ ਘੰਟੇ ਦੀਆਂ ਮਸ਼ਕਾਂ ਪਿੱਛੋਂ
ਛੰਦ ਇੱਕ ਵੀ ਨਾ ਸਰਿਆ
ਚੇਤਨਤਾ ਦਾ ਇਸ ਤੇ ਮੈਥੋਂ
ਸੁਘੜ ਪਾਣ ਨਾ ਚੜ੍ਹਿਆ
ਰੂਹਾਂ ਰੱਬਾਂ ਵਾਲ਼ਾ ਸੂਫ਼ਈ
ਵਰਕ ਨਾ ਜਾਵੇ ਮੜ੍ਹਿਆ
ਕਿਸ ਜਜ਼ਬੇ ਤੇ ਤੁਹਮਤ ਲਾਵਾਂ
ਕਿਸ ਨੂੰ ਲਾਹਨਤ ਪਾਵਾਂ
ਜਿਸ ਨੇ ਹਾਲ ਨਾ ਪੁੱਛਿਆ ਮੇਰਾ
ਜਾਂ ਆਪਣਾ ਨਾ ਦੱਸਿਆ
ਖੁਸ਼ੀਆਂ ਖੇੜੇ ਮਨ ਦੀ ਗੱਠੜੀ
ਰੋਜ਼ੀ ਰੋਟੀ ਹਰਿਆ
ਰਹਿੰਦ ਖੂੰਦ ਨੁਮਾਇਸ਼ਾਂ ਲਾ ਕੇ
ਦਿਲ ਨੂੰ ਹਲਕਾ ਕਰਿਆ
ਮੈਲ਼ੇ ਮਨ ਨੂੰ ਚਾਦਰ ਪਾ ਕੇ
ਸਾਹਵੇਂ ਸਭ ਦੇ ਧਰਿਆ
ਪਰ ਜਿਸ ਨੇ ਵੀ ਪੱਲਾ ਫੜਿਆ
ਖਿਚ ਕੇ ਨੰਗਾ ਕਰਿਆ
ਵਾਕ ਮੇਰੇ ਦਾ ਅੱਖਰ ਅੱਖਰ
ਜੂਠਾ ਕਰ ਕਰ ਧਰਿਆ
ਆਪਣੀ ਹੀ ਤਹਿਜ਼ੀਬ ਸਜਾ ਕੇ
ਮਨ ਦਾ ਮਾਅਨਾ ਘੜਿਆ
ਭਿੱਟੇ ਮਨ ਫਿਰ ਨਵ੍ਹਾ ਧੁਆ ਕੇ
ਦਾਨਸ਼ ਟਿੱਲੇ ਖੜਿਆ
ਕੋਤਰ ਸੌ ਚੋਂ ਸਵਾ ਲੱਖ ਨੇ
ਹੀ ਹੈ ਰਮਜ਼ ਨੂੰ ਫੜਿਆ
ਹਵਨ ਕਰੋ ਕੋਈ ਮੱਤ ਮੇਰੀ ਲਈ
ਅਕਲ ਦਾਨ ਵਰਤਾਵੋ
ਪਿਆਰ ਮੁਹੱਬਤ ਸੂਝ ਸਮਝ ਦਾ
ਇਸ ਨੂੰ ਭੋਗ ਲਗਾਵੋ
ਮੇਰੇ ਮਨ ਦੀ ਤਹਿ ਵਿੱਚ ਛੁੱਪੇ
ਸ਼ਬਦਕੋਸ਼ ਵਰਜਾਵੋ
ਆਪਣੀਆਂ ਸੋਚਾਂ ਇਸ ਨੂੰ ਲਾ ਕੇ
ਡੂੰਘੀ ਗੱਲ ਅਖਵਾਵੋ
ਪੁਤਨਾ ਦੇ ਇਸ ਜਿਹਨੀਂ ਵੱਸੇ
ਜ਼ਹਿਰ ਨੂੰ ਮਣੀਆਂ ਲਾਵੋ
ਮਾਂ ਮੇਰੀ ਦਾ ਫਿਰ ਤੋਂ ਮੇਰੇ
ਅਮ੍ਰਿਤ ਮੂੰਹ ਵਿੱਚ ਪਾਵੋ