ਹਰ ਕਿਸੇ ਦੀ ਪੀੜ ਨੂੰ ਅਪਨਾਅ ਕੇ ਦੇਖ।
ਜ਼ਿੰਦਗੀ ਮਜ਼ਲੂਮ ਲੇਖੇ ਲਾ ਕੇ ਦੇਖ।
ਚੁੱਪ ਰਹਿ ਕੇ ਬੋਲਣਾ ਸਿੱਖ ਜਾਇਂਗਾ,
ਪਰਬਤਾਂ ਦੀ ਚੁੱਪ ਨੂੰ ਅਪਣਾਅ ਕੇ ਦੇਖ।
ਦੂਜੇ ਤਾਈਂ ਧੋਖਾ ਦੇਵੀਂ ਫੇਰ ਤੂੰ,
ਦੇਖ ਪਹਿਲਾਂ ਆਪ ਧੋਖਾ ਖਾਕੇ ਦੇਖ।
ਹੈ ਜ਼ਰੂਰੀ ਤੁਰਦੇ ਰਹਿਣਾ ਸੋਚ ਦਾ,
ਬੱਸ ਜ਼ਰਾ ਚਿੰਤਾ ਨੂੰ ਚਿੰਤਨ ਲਾ ਕੇ ਦੇਖ।
ਕਹਿਣਗੀਆਂ ਜੀ ਆਇਆਂ ਪਗਡੰਡੀਆਂ,
ਪੈਰਾਂ ਦੇ ਛਾਲੇ ਜ਼ਰਾ ਚਮਕਾ ਕੇ ਦੇਖ।
ਸਾਰੇ ਦੀਵੇ ਸਾਥ ਤੇਰਾ ਦੇਣਗੇ,
ਚਾਨਣਾਂ ਦਾ ਗੀਤ ਕੋਈ ਗਾ ਕੇ ਦੇਖ
ਝੀਲ ਮਿੱਠੀ ਤਾਈਂ ਭੁੱਲਣ ਵਾਸਤੇ,
ਸਾਗਰ ਖਾਰੇ ਤਾਰੀ ਲਾ ਕੇ ਦੇਖ।
ਚੁਣ ਕੇ ਤਾਰੇ ਭਰ ਲੈ ਝੋਲ਼ੀ ਆਪਣੀ,
ਇੱਕ ਤਾਰਾ ਮੱਥੇ ’ਤੇ ਚਮਕਾ ਕੇ ਦੇਖ।