26

शहिर विच्च अजिहे नेतावां दी बहुत कमी सी, जिहड़े दड़दड़ांदे थाणे चले जाण अते बिनां रोक-टोक बेकसूर बंदे नूं छुडा लैण।

कुझ्झ गिणवें-चुणवें बंदिआं विच्च बाबू जी दा नंबर सभ तों उपर सी। कोई थाणेदार आवे कोई जावे, उहनां दी चौधर हमेशा बणी रहिंदी सी। बाबू जी नूं तां लोकां विच्च आपणी शाख़ बणाई रख्खण लई पुलिस दी ज़रूरत सी ही, पुलिस नूं वी उहनां दी ज़रूरत सी।

पारटी विच्च बाबू जी दी पहुंच केंदर तक्क सी। उह ज़िल्हे दे प्रधान सन अते आल इंडीआ कमेटी दे मैंबर। पारटी विच्च एडे अहुदे ’ते पहुंच के वी उहनां नें लोकां नालों नाता नहीं सी तोड़िआ। कार हुंदे होए वी आपणा पुराणा साईकल नहीं सी छड्डिआ। सारा दिन आपणे साईकल ’ते शहिर ’च घुंमदे रहिंदे। पंजीं-सत्तीं दिनीं दो-चार पिंडां दा दौरा वी कर आउंदे। दौरे दा उहनां नूं दुहरा फ़ाइदा हुंदा। असर रसूख़ तां वधदा ही सी, नाल वकालत करदे जवाई लई केस वी तिआर कर आउंदे।

वैसे तां थाणे लिजाण वाला कोई नां कोई उहनां दे दरां ’ते बैठा ही रहिंदा। उस नाल थाणे जाण दा मौका मिल जांदा। किसे दिन सुख-शांती हुंदी तां उह आप गेड़ा मार आउंदे। बहाना घड़दे संगरूर पुलिस कपतान दे आए सुनेहे दा। उस नें कपतान नूं मिलण जाणा है, किसे दा कोई कंम-कार अड़िआ हुंदा, नोट कर लैंदे। कोई हवालात विच्च बंद कीता मुजरम दिख जांदा, उस दी तकलीफ़ पुछ्छदे। घरदिआं नूं बुला के केस रफ़ा-रफ़ा करदे जां जवाई बाबू नूं आख के कचहिरीउं ज़मानत करवा दिंदे।

पुलिस वल्लों फड़े बहुत बंदे बाबू जी राहीं ही रिहाअ हुंदे। शहिर नालों पेंडू मसलिआं वल्ल उह बहुता धिआन दिंदे। पेंडू पैसे वी खुल्ल्ह के ख़रचदे, अहिसान वी सारी उमर मंनदे। शहिरी नाले कंम करा लैंदे नाले उलांभा दिंदे, ज़िआदा पैसे ख़रचा दित्ते।

इस वार बाबू जी बेवस्स सन। नवें सटाफ़ नें उहनां नूं कोई अहिमीअत ही नां दित्ती। इक्क वार थाणे गए तां किसे नें कुरसी तक नां पुछ्छी। खड़े-खड़े ही मुड़ना पिआ। धानकिआं दे पप्पू नूं छुडाउण दी गल्ल तोरी तां लाल सिंघ कुद्द के पिआ।

“लीडरां दा फ़रज़ है पुलिस दी सहाइता करना, नां कि पुलिस दे कंमां विच्च दख़ल देणा। उस नूं हाले थाणे लिआंदा वी नहीं गिआ कि तुसीं पहिलां आ धमके। इक्क पासे तां तुसीं सिफ़ारशां करदे नहीं थक्कदे, दूजे पासे उलांभे दिंदे हो कि पुलिस दोशीआं नूं नहीं फड़दी। इस तरहां पुलिस किवें कंम करे?”

बाबू जी मूंह लटका के आ गए। शुकर सी उस समें कोई बाहरला बंदा थाणे हाज़र नहीं सी, नहीं तां उहनां दी सारी इज़्ज़त मिट्टी विच्च मिल जाणी सी। पहिलां ही अकाली पारटी दा ज़ोर इको गल्ल ते लग्गा होइआ सी कि केंदर पंजाब विच्च अकाली सरकार नूं गेरना चाहुंदा सी। इह सारी गड़बड़ कांगरस दी कराई होई सी। किसे विरोधी नूं पता लग्ग गिआ कि बाबू जी किसे नूं छुडाउण आए सन तां उस नें शहिर विच्च ढंडोरा पिट्ट देणा सी। बाबू दा नां कतल वरगे नाज़ुक मसले नाल जुड़ सकदा सी। आपणी पारटी दे बंदिआं नें ही उस दी सिआसी ज़िंदगी नूं तबाह करन दीआं कोशिशां आरंभ देणीआं सन।

घर अग्गे जुड़दी भीड़ नूं थाणे जाण तों असमरथता प्रगट करन लई बाबू जी कोल कोई बहाना नहीं सी। सरकारे-दरबारे कोई सुणदा नहीं सी। विरोधी पारटी दा राज सी। उंझ वी इह मुख्ख मंतरी दा इलाका सी। हर अफ़सर पुठ्ठे-सिध्धे ढंग नाल उस दा रिशतेदार बणिआ बैठा सी। बाबू जी ग्रहि मंतरी तक पहुंच तां कर सकदे सन, पर इस नाज़ुक मसले विच्च केंदर वी मुख्ख मंतरी तों उपर दी नहीं सी चल्ल सकदा।

लोकां तों खहिड़ा छुडाउण लई उहनां नूं इको राह लभ्भिआ। पुलिस इस तरहां समझण वाली नहीं। इक्क-दो बंदे फड़े होण तां उह छुडा लैण। उहनां नें तां सारा इलाका ही बगल लिआ है। उह ग्रहि मंतरी नूं मिलण दिल्ली जा रहे हन। थाणेदार दे तबादले लई उहनां ’ते ज़ोर पाउणगे। जिंना चिर इस दा तबादला नहीं हुंदा, उह शहिर नहीं वड़नगे।

दिल्ली किस भड़ूए नें जाणा सी। आपणे दोसतां कोल चंडीगहड़ जा बैठे। जदों टिक-टिका हो गिआ, मुड़ आउणगे।

बाबू पिछ्छों वारी आउंदी सी भारती जनता पारटी दे पंडत दीन दिआल जी दी। थाणे कचहिरी विच्च रसूख़ रख्खण लई उह वी मशहूर सन। शहिर दीआं बहुतीआं गड़बड़ां उहो दबाउंदा सी। बाबू जी ग़ाइब होए तां लोक उधर नूं झुक गए।

दीन दिआल जी दा मन कातलां नूं ग्रिफ़तार कराउण विच्च सी। उह फड़-फड़ाई नूं जाइज़ मंनदे सन। पुलिस किसे तों पुछ्छेगी नहीं तां कातल किथों फड़ेगी? उह किसे नूं वी छुडाउण दे हक्क विच्च नहीं सन। नाले फड़े वी तां छोटीआं-मोटीआं जातां दे बंदे गए सन। उहनां नूं छुडाए कांगरस जां कमिऊनिसट पारटी। जे लाले फड़े जाण तां उस दा जाणा बणदा सी।

मजबूर हो के किसे लई जाणा पिआ तां उहो घड़िआ घड़ाइआ जवाब पल्ले पिआ ।

“प्रधान जी, सोथों तां इह उमीद नहीं सी। जे तुसीं इहो चाहुंदे हो तां असीं सारे बंदे छड्ड दिंदे हां। हत्थां ’ते हत्थ धर के बैठ जांदे हां। भोग तक तां फेर बंदे तुसीं ही फड़ सकदे हो, पुलिस तां नी फड़ सकदी।”

प्रधान दा कोई तरक नहीं सी सुणिआ गिआ। इक्क दी सौ-सौ सुणा के बेरंग मोड़ दित्ता। बहुती ‘तूं-तूं मैं-मैं’ करनी प्रधान नूं ख़तरनाक लग्गी।

हरख़ी पुलिस दा की है? विचे उलझा लए। उस दे ख़िलाफ़ उलट-पुलट प्रचार ही कर देवे।

प्रधान दी पग्ग तां ही बची रहि सकदी सी कि जे दो-चार दिन इधर-उधर टले रहिण। कप्पड़ा ख़रीदण दे बहाने उह रातो-रात बंगलौर वाली गड्डी चहड़ गए।

बंदे छुडाउण लई तां विउपार मंडल दा प्रधान अते मासटर वी हाज़र सन, पर उह पैसे तों बिनां गल्ल नहीं सी करदे। पैसे चल्लण दी हाले संभावना नहीं सी।

दूसरे तीसरे नंबर दे नेतावां कोल नां कोई जांदा सी नां उह किसे नूं हुंगारा भरदे सन। उह साफ़ आख दिंदे सन कि इस पुलिस तों बंदा छुडाउणा उहनां दे वस्स दा नहीं। साफ़ गल्ल कहिण नाल उहनां दा लूण नहीं टिरकदा।

मजबूर होए लोकां नूं समझ नहीं सी आ रही कि उह किधर जाण।

पुलिस सी कि छोटे-छोटे बहाने ला के बंदे चुक्की जा रही सी।

डंगरां वाले हसपताल दे आले-दुआले जमांदारां दे घर सन। उहनां नूं इस बहाने चुक्किआ गिआ सी कि बंटी दे कातल जां तां इहनां विच्च ही लुके रहे जां फेर उहनां नें कातलां नूं ज़रूर इथे घुंमदे-फिरदे देखिआ होणा है। प्रदेसों आ के वस्से इहनां जमांदारां दी आपणी वख्खरी भाशा है, वख्खरा पहिरावा है अते वख्खरी डील-डौल। आपणी बरादरी तों बाहरले बंदे नूं इह झट पहिचाण लैंदे हन। दस्सण कातल कौण सी?

जमांदारां दे चौधरी नें बथेरी हाल-दुहाई पाई। उहनां कोल अजिहा कुझ्झ सोचण दी विहल किथे? उहनां दी सवेर लोकां दीआं टट्टीआं विच्च गुज़रदी है, दुपहिर घरो-घरी रोटीआं मंगण विच्च अते शाम बठ्ठल पीपे साफ़ करन विच्च।

किसे नें चौधरी दी इक्क नां सुणी। उस नूं बसती विच्च ही ठुड्डे पैणे शुरू हो गए।

अगली सवेर कई बंदिआं नूं मंदर अग्गे कुट्ट गए। किसे दे ढिड्ड विच्च ठुड्डे मारे गए सन। उस नूं उलटीआं आ रहीआं सन। किसे दे पैरां दीआं तलीआं सुज्जीआं होईआं सन अते किसे दे चड्डिआं विच्च दरद सी।

वाण वट्टणिआं नूं इस लई घेरिआ गिआ सी, किउंकि सकूल दा इक्क रिकशा चालक वाण वट्टणा सी। कोई वसाह नहीं, किसे नें रिकशे वाले नूं वरगला लिआ होवे। रिकशे वाला वी फ़रार सी। हो सकदै कोई रिकशे वाले दा अता-पता दस्स सके। उहनां दा हमाइती जथेदार वी किधरे जा के सौं गिआ लग्गदा सी।

कई वाण वट्टणिआं नूं अगले दिन हसपताल दाख़ल कराइआ गिआ। तारा गुंम पिआ सी। कदे-कदे ही पाग़लां वांग दो-चार चीकां मार सकदा। फेर लंबी चुप्प धार लैंदा। छज्जू दा गिट्टा उत्तर गिआ सी। उस नूं पलसतर लाइआ गिआ सी। जग्गू नूं कुझ्झ दिखाई नहीं सी दे रिहा। उस दीआं अख्खां विच्च जलन सी।

लाला जी दे गुआंढ विच्च वी भली नहीं सी गुज़ारी गई। जिस किसे दा वी जे कदे लाला जी जां उस दी नूंह नाल मूंह मोटा होइआ सी, उस नूं वी बुला लिआ गिआ सी। औरतां दा ग़ुस्सा भैड़ा हुंदा है। कुझ्झ बांझ औरतां ’ते वी पुलिस दा नज़ला झड़िआ। पुत्तर दी प्रापती लई कीते जाण वाले टूणे-टामणां लई वी कई वार बच्चे चुक्के जांदे हन। किसे नें आपणा ग़ुस्सा बच्चे ’ते नां ढाल दित्ता होवे। इस तत्थ दी खोज लई पहिलां घरां दे नौकर-चाकर बुलाए गए। नौकरां बिनां अजिहे कारज सिरे नहीं चहड़दे।

लाला जी दे विरोधीआं ’ते वी पुलिस दी अख्ख सी। समाज सेवी संसथावां विच्च गुट्टबंदी सी। चार वोटां वध्ध लैण दी झाक नाल सिआसतदान इहनां ’ते काबज़ होण लई हमेशा जूझदे रहिंदे सन। पिछलीआं चोणां विच्च इहनां संसथावां नें खुल्ल्ह के हिस्सा लिआ सी। किसे नें लाला जी दा लक्क तोड़न लई इह कारा कीता होवे, इह वी अतिकथनी नहीं सी। लाला जी दे विरोधीआं दी लिसट बणा के पुलिस नें पहिलां चेले-चपटे बुलाए।

जिहड़ा वी इक्क वार थाणे बुला लिआ, उह सुक्का वापस नहीं आइआ। किसे दी बांह ’ते पलसतर सी तां किसे दे गिट्टे ’ते पट्टी।

लोकां नूं इको फ़िकर खा रिहा सी। जे इसे तरहां लोकां दीआं लत्तां-बाहां टुट्टदीआं रहीआं तां शहिर दिनां विच्च लूल्हा-लंगड़ा हो जाणा सी।

सभ तों वड्डी बीमारी इह सी कि उहनां दे दुख्खड़े सुणन वाला कोई वी नहीं सी। नेता लोक किधरे छाईं-माईं हो गए सन।

लोक इक्क होर वड्डी बीमारी दा शिकार हो रहे सन। बाहर-अंदर जाणा दुभ्भर होइआ पिआ सी। कोई इक्क-दो दिन लई वी बाहर चला जावे तां पुलिस उस नूं भगौड़ा करार दे दिंदी सी। आउंदिआं ही उस नूं ढाअ लिआ जांदा सी जां पिछ्छों वारिसां नूं बगल लिआ जांदा सी। पुलिस आखदी सी कि जे किसे नें शहिर छड्डणा है तां इस दी इजाज़त पुलिस तों पहिलां लई जावे। इजाज़त लैण गए बंदे नूं उह बिठा लैंदे सन। कई-कई दिन बिठाई रख्खदे। डरदा कोई थाणे वी नहीं सी जा सकदा। कोई करे तां की करे?

जदों भैण नूं पंजीरी दे के मुड़े अशोक नूं इसे जुरम विच्च फड़िआ गिआ तां सथिती नें इक्क नवां मोड़ कट्टिआ।

बाबा गुरदित्त सिंघ आपणे घर दे विहड़े विच्च बैठा अख़बार पहड़ रिहा सी, जदों अशोक दी सहिमी मां नें उस नूं इह भैड़ी ख़बर सुणाई।

बाबे नूं पता सी अशोक तिंन दिनां दा चंडीगहड़ गिआ होइआ सी। मुड़ तां उस नें शाम नूं ही आउणा सी, पर प्राहुणे नें ज़िद कर के रख्ख लिआ सी। उस दा हुणे-हुणे चंडीगहड़ तबादला होइआ सी। उह अशोक नूं चंडीगहड़ घुमाउणा चाहुंदा सी।

बाबे लई इह ख़बर असहि सी। हुण तक उह पुलिस अत्तिआचार बरदाशत करदा आ रिहा सी। उस दा ख़ून तां ख़ौलदा रिहा सी, पर उह बहुता कुझ्झ नहीं सी कर सकिआ। पुलिस नें अजिही दहिशत पाई सी कि डरदा कोई बाबे कोल खड़ोन नूं तिआर नहीं सी। जथेबंद हो के संघरश दी तां गल्ल ही दूर सी।

बाबे नें लाला जी नाल वी गल्ल कीती सी। उस दा मरन वाला तां मर गिआ। ग़रीबां दे पुत्तां नूं तां नां कुटावे। सारा शहिर त्राह-त्राह कर रिहा सी। सारी लोकाई लाला जी नूं गाल्हां कढ्ढ रही सी। पुलिस अत्तिआचार लई उह लाले नूं ज़िंमेवार ठहिरा रहे सन।

लाला भुब्बां मार के रो पिआ। उस नूं बंटी दे कातलां दी लोड़ नहीं सी। उह तां ख़ुद पुलिस नूं कई वार बेनती कर चुक्का सी। लोकां दे पुत्तां दे हड्ड कुट्ट के उस दे पोते दी आतमा नूं कशट नां दिओ। लोकां दीआं दुरसीसां पोते नूं सवरग विच्च वी चैन नहीं लैण देणगीआं।

पर उह की करे? उस दी कौण सुणदा सी? पुलिस इह आख के टाल दिंदी है कि इस तरहां आखणा लाला जी दी वडत्तण दा सबूत है। पुलिस दा वी कोई फ़रज़ है। मुख्ख मंतरी जी उहनां दे मोढिआं ’ते बहुत वड्डी ज़िंमेवारी पा गए हन। पुलिस नें बंटी दे भोग तों पहिलां-पहिलां कातलां नूं लभ्भणा ही लभ्भणा है।

लाला बाबे दा हर तरहां नाल सहियोग देण नूं तिआर सी। पुलिस अत्तिआचार हर हालत विच्च बंद होणा चाहीदा सी।

इकल्ला बाबा की करे? लोक बिलकुल ही सहियोग देण लई तिआर नहीं सन।

बाबे दे किसे वी कारकुन नूं भीड़ पई तां बाबा शेर वांग गरजिआ सी। जदों पंजाब सटूडैंटस यूनीअन दे शामू ’ते झूठा मुकद्दमा बणाउण दी कोशिश कीती गई सी तां उहनां दीआं सारीआं जथेबंदीआं हरकत विच्च आ गईआं सन। शामू दे नाल-नाल कई होरां दा वी खहिड़ा छुट्ट गिआ सी।

अशोक दी ग्रिफ़तारी बाबे लई इक्क चैलिंज सी। हुण चुप्प बैठे रहिणा असंभव सी। अशोक उस नूं पुत्तां नालों वध्ध पिआरा सी। पुत्तर इकल्ले उहो नहीं हुंदे, जिहड़े बंदे दे तुख़म तों पैदा होए हुंदे हन। असल पुत्तर उह हुंदे हन, जिहड़े बंदे दी सोच नूं अग्गे तोरदे हन।

बाबे दी सोच नूं अग्गे लिजाण वाले नौजवानां विच्च अशोक बड़ी अहिम थां रख्खदा सी।

अशोक दे मोढिआं ’ते दो महत्तवपूरन संसथावां दा बोझ सी। लैनिन नाटक कला केंदर दा उह संचालक सी अते भगत सिंघ नौजवान सभा दा सूबा सकत्तर।

अज्ज दे काले दिनां विच्च जदों कि वड्डे-वड्डे समाज-सुधारक अते लीडर दहिशतगरदां दे ख़िलाफ़ इक्क शबद बोलण तों वी डरदे हन, इह दोवें संसथावां मोढे नाल मोढा जोड़ के कंम कर रहीआं सन। लोकां नूं फ़िरकाप्रसती अते मूलवादी शकतीआं पिछ्छे कंम करदे सवारथां नूं समझाउण लई उह पिंड-पिंड जा के डरामे करदे अते गीत गाउंदे हन। सभिआचारक सांझ दा सुनेहा देण वाले, लोक-दुशमणां ’ते उंगल धरन वाले अते समुच्ची कौम दी मुकती दी गल्ल करन वाले नौजवान दहिशतगरद किवें हो सकदे हन?

बाबे नूं ग़ुस्सा आ रिहा सी। की सी.आई.डी.दीआं रिपोरटां किधरे गुआच गईआं सन? की उहनां नूं नहीं पता कि भगत सिंघ नौजवान सभा जां लैनिन नाटक कला केंदर नें ही नहीं, सगों बाबे दी पारटी नाल संबंधत हर संसथा नें बंटी दे कतल दी सख़त शबदां विच्च निंदा कीती सी अते रैलीआं वी कीतीआं सन। इकल्ले बंटी दे कतल दी ही नहीं, उह तां दहिशतगरदी दी हर घटना दी निंदा करदे सन। उहनां दे कई वरकर शहीदीआं वी पा चुक्के सन।

इस तों पहिलां कि अशोक दी हड्डी-पस्सली इक्क हो जावे, बाबे दा थाणे जाणा बहुत ज़रूरी सी।

पुराणे दिन हुंदे तां बाबे नें तुफ़ान वांग झुल्ल जाणा सी। बुढापे कारन हुण ओनी चुसती नहीं सी रही। हड्ड-गोडे जवाब दे गए सन। जवानी ’च पुलिस हत्थों खाधी मार हुण रंग दिखा रही सी। कंन साथ छड्डदे जा रहे सन। अख्खां वी पहिलां वाले जौहर नहीं सी दिखाउंदीआं। जे कोई साथ दे रिहा सी तां उह सी बाबे दा दिमाग़। उह तां सगों होर वी दूर दी सोचण लग्गा सी। दिनो-दिन सिआणा हुंदा जा रिहा सी।

इक्क उह वी समां सी, जदों बाबे दे इसे दिमाग़ नूं इक्क छोटी जिही पहेली सुलझाउण लई कई वरहे लग्ग गए सन।

गल्ल उहनां दिनां दी सी जदों बाबा रईसां वरगी ज़िंदगी जिऊंदा सी। इक्क काबल डाकटर दे मुंडे नूं फ़िकर वी किस गल्ल दा हो सकदा सी। जो मरज़ी खाए, जो मरज़ी हंढाए।

उहनां दा बंगला सटेशन तों दो मील दूर सी।

इक्क वार गरमीआं दीआं छुट्टीआं कट्टण आए गुरदित्त सिंघ नूं बापू जी गड्डी भेजणा भुल्ल गए। बंगले पहुंचण लई उस नूं रिकशे ’च चहड़ना पिआ।

रिकशे वाला गल्लां तां बड़े चाअ नाल कर रिहा सी, पर उस दे सवाल बाबे नूं चिड़ा रहे सन। उस नें की लैणा सी कि बाबा किथों आइआ है अते की करदा है? उह लाहौर इंजीनीअरी करदा है। पहिले सवाल दा जवाब तां उस नें दे दित्ता। अगले सवाल ’ते झिड़क के चुप्प करा दित्ता। उसनूं गुरदित्त सिंघ दी निज्जी ज़िंदगी विच्च झाकण दा कोई हक्क नहीं सी।

बंगले पुज्ज के जदों रिकशे वाले नें मज़दूरी लैणों नांह कर दित्ती तां गुरदित्त दीआं अख्खां खुल्ल्हीआं। उह तां उस दा बचपन दा दोसत छांगा सी। उह अंगरेज़ बणे गुरदित्त नूं देख के डाहडा ख़ुश होइआ सी। इसे लई गुरदित्त सिंघ बारे जाणन लई उतावला सी।

उसे दिन गुरदित्त सिंघ अंदर इक्क सवाल खड़ा हो गिआ सी। आख़र छांगा इंना किउं पछ्छड़ गिआ?

छोटा हुंदा छांगा जमात दा मनीटर सी। उसताद उस दी समझ अते याददाशत ’ते हैरान सन। इक्क वार इशारा वी कर दिओ, झट्ट गल्ल समझ जांदा सी। उसताद तां आखदे सन, उस नें इक्क दिन बहुत वड्डा आदमी बणना है।

पर उह रिकशा-चालक ही मसां बण सकिआ सी, किउंकि उस दा बाप इक्क मज़दूर सी। गुरदित्त दे बाप वांग डाकटर नहीं सी। छांगे दा बाप छांगे दे जवान होण तों पहिलां ही बुढ्ढा हो गिआ सी। मां दा गोहा-कूड़ा करना वी चुल्ल्हा मघदा रख्खण विच्च सहाई नहीं सी हो सकिआ। पहड़ के किहड़ा छांगे नें डी.सी.बण जाणा सी। ख़ाली पेट नूं रोटी दी फौरी ज़रूरत सी। उह सालां-बध्धी छांगे दे मूंह वल्ल नहीं सी देख सकदे। पहिलां छांगे नें होटल ’ते भांडे मांजे। हुण रिकशा चला रिहा सी।

छांगा भूत बण के बाबे नूं चंबड़ गिआ। आख़िर छांगे नूं उन्नती करन दा मौका किउं नां मिलिआ? उह गुरदित्त वांग इंजीनीअर जां डाकटर किउं नहीं बण सकिआ? मज़दूर दा पुत्तर मज़दूर किउं? डाकटर दा पुत्तर डाकटर किउं? राजे दा पुत्तर राजा किउं?

इस सवाल दा जवाब लभ्भण लई बाबे नें ढेर किताबां दा पहड़िआ।

जदों दा जवाब लभ्भा है, सारी ज़िंदगी इसे लेखे ला रख्खी है।

छांगे वरगे करोड़ां दी मुकती लई गुरदित्त नें कालज विच्च ही डरामे लिखणे अते खेडणे शुरू कर दित्ते सन।

इंजीनीअर बणिआ तां अफ़सरां नूं ख़ुश रख्खण दी थां उह लेबर नूं ख़ुश रख्खण दे यतन करदा रहिंदा।

सभ तों पहिली बग़ावत उस नें आपणे बाप विरुध्ध कीती। उह गुरदित्त सिंघ नूं जगीरदारां दे विआहुणा चाहुंदे सन। गुरदित्त नूं अजिही साथण दी ज़रूरत सी, जिहड़ी मालदार नहीं, समझदार होवे। अजिही साथण उहनां आपणी नाटक-मंडली विचों लभ्भी। घर विच्च हंगामा होइआ सी। कुड़ी नीवीं जात दी तां सी ही, अपंग वी सी। बाबे नूं कोई परवाह नहीं सी।

बलराज साहनी नूं भाशा विभाग नें पंज हज़ार रुपिआ इनाम ’च दित्ता तां उह सारी रकम बाबे दे हवाले कर गिआ।

बाबे नें झट्ट लोक-पख्खी अते जुझारू साहित छापण दा प्रोजैकट बणा लिआ। पुंगरदे अगांहवधू लेखकां नूं हल्लाशेरी देण लई अते लोकां विच्च निग्गर साहित पहड़न दी रुची पैदा करन लई इक्क मासिक पत्तर कढ्ढणा शुरू कर दित्ता। हुण तक उह सैंकड़े पुसतकां वी छाप चुक्के हन अते वीसीआं लेखकां नूं पहिली कतार विच्च खड़े होण विच्च सहाई हो चुक्के हन।

इनकलाबी दौर आइआ तां बाबा नौजवानां वल्ल झुक गिआ। उह हथिआरबंद इनकलाब दा हामी सी।

लहिर खेरूं-खेरूं होई तां उहनां दीआं आसां वी ढहि-ढेरी हो गईआं।

बाबा हिंमत हारन वाला नहीं सी। लोक-आधार बणाउण लई उहनां कई उपराले अरंभे। नाटक मंडलीआं बणाईआं। सभिआचारक मंच काइम कीते। *तीकारी सभा दी सथापना कीती। तरकशीलां नूं अग्गे लिआंदा।

सूबे विच्च काली हनेरी झुल्लण लग्गी तां होर दलेरी नाल लड़न लग्गे। थां-थां नाटक खेडे, भाशण दित्ते, रैलीआं कीतीआं अते मारच कीते।

थाणे जांदे बाबे नूं लग्ग रिहा सी, हुण पुलिस नाल टक्करन दा मौका आ गिआ सी।

तुफ़ान वांग चहड़ आए बाबे नूं संतरी दी रोकण दी हिंमत नहीं सी।

पूरे माण नाल पहिलां संतरी नें सिर झुकाइआ अते फेर बंदूक नूं मोढे ’ते रख्ख के इउं सलामी दित्ती बाबा जिवें मुख्ख मंतरी होवे।

बाबे दे उपाशकां दी शहिर विच्च कोई कमी नहीं सी। उह किहड़ा बंदा सी, जिस दी कदे नां कदे उस नें सहाइता नहीं सी कीती। किसे अपंग नूं उहनां टराई-साईकल लै के दित्ता, किसे नूं बुढापा पैनशन लगवाई अते किसे होणहार बच्चे नूं वज़ीफ़ा लगवाइआ। सारा शहिर ही उस अग्गे सिर झुकाउंदा सी।

थाणे अंदर सटाफ़ नूं बाबे दी अहिमीअत दरसाउण लई संतरी दा सलूट ही काफ़ी सी।

भैअ-भीत जिहे होए मुलाज़म थाउं-थाईं खड़े हो गए। सारे थाणे विच्च संनाटा छा गिआ।

अशोक पिप्पल हेठां बैठा सी। उस नूं हाले लाल सिंघ दे पेश करिआ जाणा सी। ऐस.ऐच.ओ.किसे होर मुसतवे दी पुछ्छ-गिछ्छ विच्च रुझ्झा होइआ सी।

बाबे नूं थाणे आइआ देख के अशोक खड़ा हो गिआ।

बाबा बिनां किसे दी इज़ाजत लए थाणेदार दे दफ़तर विच्च जा वड़िआ। अशोक पिछ्छे-पिछ्छे तुर पिआ।

दफ़तर विच्च बैठे सारे सिपाहीआं नें खड़े हो के बाबे दा सवागत कीता। इक्क सिपाही नें झुक के गोडे हत्थ लाए। पूरे माण-सतिकार नाल उस नूं कुरसी ’ते बिठाइआ गिआ।

“हां जी … सरदार जी … । मेरे इस मुंडे नूं किस जुरम विच्च लिआंदा गिऐ?” इस तों पहिलां कि लाल सिंघ नूं समझ पैंदी कि इह बुढ्ढा कौण है, मुलाज़मां नें झुक-झुक के सलाम किउं कीता है, बाबे दी गड़कवीं आवाज़ विच्च आपणे अंदर बलदी अग्ग बाहर उगली।

अचानक होए इस सवाल तों लाल सिंघ भवंतर गिआ। पहिलां उस नें अशोक वल्ल तक्किआ अते फिर कोल खड़े हौलदार वल्ल।

“सिर किउं सुट्ट लिआ? दस्स इहनां नूं किउं बुलाइऐ?” लाल सिंघ नूं खहिड़ा छुडाउणा मुशकिल हो रिहा सी। उह सारा बोझ हौलदार दे मोढिआं ’ते सुट्टण लग्गा।

अग्गों हौलदार वी घट्ट नहीं सी। आपणे मोढे ’ते रख्ख के बंदूक चलवा देण वाला उह वी नहीं सी। उस नें भार नाज़र वल्ल नूं खिसका दित्ता।

नाज़र नूं लभ्भिआ गिआ, उह किधरे नहीं सी।

बाबे नूं उडीक करन दा हुकम होइआ। जे मुंडा ‘साफ़’ होइआ तां उस नूं बाबे दे पिछ्छे-पिछ्छे भेजण दा यकीन दिवाइआ।

“इस दा बस्स इंना कसूर है कि तिंन दिन घरों बाहर रिहै … । मेरी गल्ल धिआन नाल सुण लओ … । कतल नाल इस दा कोई लागा-देगा नहीं। असीं तां इस जबर दे विरुध्ध लड़न वाले हां। मैं इस नूं लै चल्लिआ हां। जे इस दे ख़िलाफ़ कोई सबूत मिलिआ तां मैनूं सुनेहा भेज देणा। मैं मुंडा हाज़र कर दिआंगा।” आख के बाबे नें अशोक दी बांह फड़ी अते उस नूं लै के बाहर नूं तुर पिआ।

बाबे नूं रोकण दी किसे दी हिंमत नां पई। सभ इक्क-दूजे वल्ल तक्कदे ही रहि गए। मुलाज़मां दे मोन नूं देख के लाल सिंघ वी बुत्त बण गिआ। लाल सिंघ तां शहिर ’च नवां आइआ सी, पर सिपाही तां पुराणे सन। बुढ्ढा मुसतवा छुडा के लै गिआ, पर उह डरने बणे देखदे रहे। बुढ्ढा ज़रूर कोई शैअ होवेगी। बिनां सोचे-समझे मुसीबत सहेड़न वाला लाल सिंघ वी नहीं सी। बज़ार दी भीड़ विच्च लोप हुंदी जोड़ी नूं उह चुप्प-चाप देखदा रिहा।

बाबे दी कारवाई जंगल दी अग्ग वांग सारे शहिर विच्च फैल गई।

लोकां नूं जिवें नवां राह लभ्भ गिआ। उह तां भुल्ले ही बैठे सन। बाकी लीडर तां पत्तरा वाच गए। बाबा पिठ्ठ दिखाउण वाला नहीं सी। नां बाबे दे साथी-संगी। उह तां लड़न-मरन लई हमेशा तिआर रहिंदे सन।

बाबे दे घर वल्ल लोक इउं वहीरां घत्त के तुर पए, जिवें उथे कोई अजिहा अंम्रित-कुंड प्रगट हो गिआ होवे, जिस नें लोकां दी मुरदा रूह विच्च नवीं ताकत फूक देणी होवे।

बाबा कोई मैदान छड्डण वाला सी? लोक तिआर हन तां उह सभ तों पहिलां कुरबानी देण लई तिआर है।

उसे शाम नहिरू पारक विच्च जलसा रख्खिआ गिआ। उहनां सैंकड़े मुंडिआं नूं मंच ’ते पेश कीता गिआ, जिनहां ’ते पुलिस नें जबर ढाहिआ सी।

लोकां नें तां आपणे दुखड़े रोण लई जलसे ’च पुज्जणा ही सी, अंदरख़ाते सिआसी लोकां दे सुनेहे वी आउण लग्गे। जे कोई सांझा फ़रंट बणा लिआ जावे तां उह वी पुलिस विरुध्ध आवाज़ उठाउण लई तिआर सन। विरोधी पारटीआं नें तां आउणा ही सी, इक्क दो जथेदार वी गरम होए फिरदे सन। बेशक्क मुख्ख मंतरी नराज़ हो जावे, उह होर अत्तिआचार बरदाशत नहीं कर सकदे। चुप्प बैठे रहे तां पिछ्छों लोकां नूं की मूंह दिखाउणगे?

बाबे नूं की इतराज़ सी? जलसे विच्च ‘लोक संघरश संमती’ दे गठन दा ऐलान कर दित्ता गिआ। उहनां संमती विच्च कुझ्झ सिआसी बंदे शामल तां कीते, पर बहुमत्त आपणे समरथकां दा ही रख्खिआ। पता सी, लोड़ पैण ’ते सिआसी बंदिआं नें पूछ दबा के भज्ज जाणा सी।

अगले दिन झंडा मारच करन दा ऐलान होइआ। ओना चिर संघरश जारी रहेगा, जिंना चिर थाणे बैठा इक्क-इक्क बेकसूर बंदा छड्ड नहीं दित्ता जांदा।

बाबे नें आपणीआं सारीआं जथेबंदीआं नूं हदाइतां जारी कीतीआं। नाटक केंदर, संगीत मंडलीआं अते तरकशील हाल दी घड़ी आपणे प्रोगराम ठप्प कर देण। उह सभ शहिर पुज्जण अते लोक संघरश नूं संभालण। इनकलाबी साहित सभा नूं वी बुलाइआ गिआ। साहित फेर रचिआ जावे, पहिलां इतिहास सिरजिआ जावे।

बाबे नें *तीकारी फ़रंट दे कुझ्झ अंडर-गराऊंड साथीआं नूं वी सद्दिआ। किसे समें हथिआरबंद संघरश दी ज़रूरत वी पै सकदी है। पेंडू इकाईआं अते भगत सिंघ नौजवान सभा पहिलां ही चौकस सी। बाबे दे इशारे ’ते पिंडां ’चों लोक वहीरां घत्त के आउण नूं तिआर सन।

दो दिनां ’च ही संमती नूं कामयाबी हासल हो गई।

कोई नवां बंदा तां की फड़ना सी, इक्क-इक्क कर के पुलिस नूं पहिले वी छड्डणे पए।

 

 

27

जिस तरहां पुलिस दी दो दिनां दी फड़-फड़ाई नें लोकां विच्च सहिम पैदा कीता सी, उसे तरहां संमती दे दो दिनां दे संघरश नें पुलिस दीआं लगामां कस्स दित्तीआं।

डरी पुलिस नें ख़ास-ख़ास मुसतवे जां तां दूर-दुराडे वाले थाणिआं विच्च भेज दित्ते जां आपणे मुख़बरां दे घरीं छुपा दित्ते।

जिनहां दी कोई ज़रूरत नहीं सी जां जिनहां दे मामूली सट्टां सन, उहनां नूं रिहाअ करन लई पुलिस काहली पैण लग्गी। पुलिस नूं डर सी कि जे सारे ही मुसतवे इकदम छड्ड दित्ते गए तां उहनां नूं संमती नें संभाल लैणा सी अते उहनां दा डाकटरी मुआइना करा-करा पुलिस नूं वखत पा देणा सी। अख़बारां पहिलां ही ज़हिर उगल रहीआं सन। उहनां नूं होर मसाला मिल जाणा सी।

पुलिस अजिहे सिफ़ारशी दी ताक विच्च रहिंदी सी, जिहड़ा इह यकीन दिवा देवे कि मुसतवा नां संघरश संमती कोल जाएगा अते नां ही पुलिस ख़िलाफ़ कोई कारवाई करेगा। इह भरोसा दिवा के भावें कोई सारे बंदे छुडा के लै जावे, पुलिस नूं कोई इतराज़ नहीं सी।

बुढ्ढा बलवंत ग़ुस्से नाल पाग़ल होइआ फिरदा सी। पैसे कमाउण दा इंना वधीआ मौका सी, पर उस दे पल्ले हाले तक दुआनी नहीं सी पई।

नवें सटाफ़ ’ते बलवंत नूं लोकां जिंना ही ग़ुस्सा सी।

पैंती साल हो गए सन बलवंत नूं भरती होइआं। कुझ्झ साल छड्ड के बाकी दी सारी नौकरी इसे थाणे दी सी। जिस तरहां दाई तों पेट नहीं लुकोइआ जा सकदा, इसे तरहां मुजरम बलवंत तों अख्ख नहीं सी चुरा सकदा। मुजरम हाले पेट विच्च ही हुंदे सन कि बलवंत नूं ख़बर पहिलां पहुंच जांदी सी।

सी तां बलवंत भावें अनपहड़ ही, पर उस दी चहड़त डिपटी जिंनी सी। वरदी तां उह कदे-कदाईं ही पाउंदा सी। कुझ्झ लोक उस नूं थाणेदार समझदे सन अते कुझ्झ हौलदार। उस नूं वरदी पाउण दी की ज़रूरत सी? जिहड़ा कंम वरदीआं वाले दस सिपाही नहीं सी कर सकदे, उह इकल्ला बलवंत कर दिंदा सी। उस दे इलाके विच्च ‘कनटैकट’ ही इंने सन।

जदों वी कोई नवां थाणेदार आउंदा, बलवंत दे ख़िलाफ़ उस दे कंन भरे जांदे। थाणेदार बलवंत नूं दूर-दूर रख्खदा। उस नूं बंबई, कलकत्ते दे संमन दे के दस-वीह दिनां लई खहिड़ा छुडाउण दे यतन कीते जांदे। बलवंत ख़ुशी-ख़ुशी तमाशा देखदा रहिंदा। जदों तफ़तीश दे पहीए जाम हो जांदे तां धक्का लाउण लई बलवंत नूं बुलाउणा ही पैंदा।

बलवंत अज्ज-कल्ल्ह दे सिपाहीआं वरगा नहीं सी बई मोटर-साईकल बिनां कदम नहीं पुट्टणा। मोटर-साईकल ’ते तां घंटे विच्च सारे इलाके दा गेड़ा लग्ग जांदै। इउं कोई मुख़बरी मिलदी है? बलवंत साईकल ’ते निकलदा है। किसे दे खेतों गंने चूप लए, किसे दे रोटी खा लई अते किसे दे घर रात कट्ट लई। किसे नाल पैग्ग सांझा कर लिआ अते किसे कोल कबीलदारी छेड़ के बैठ गए। गल्लां-गल्लां विच्च सारे पिंड दी ख़बर मिल जांदी है। आपणी इसे चलाकी दे आधार ’ते बलवंत नें कई वार बड़ीआं गुंझलदार तफ़तीशां नूं चुटकी ’च सिरे ला दित्तै। जदों तफ़तीशी किसे सिट्टे ’ते नहीं पुज्ज सकदे तां बलवंत दी शरन विच्च आउंदे हन। उह पहिले हल्ले ही दुखदी रग ’ते हत्थ रख्ख दिंदै।

नवें सटाफ़ कोल वी उस दी चुगली होई। इस वार दोश गंभीर सन। उह चार पैसिआं बदले पुलिस दीआं योजनावां लीक करन दा आदी है। इस दोश नूं साबत करन लई कुझ्झ सबूत वी दित्ते गए। कुझ्झ कमज़ोर मुजरम छित्तरां तों डरदे झट्ट मंन गए कि उह बलवंत दे कहिण ’ते घरों भज्जे सन।

विहला बैठा बलवंत नवें सटाफ़ दी बेवकूफ़ी ’ते झूर रिहा सी। बंदे फटाफट छड्डे जा रहे सन। उहनां मूरखां नूं कोई पता नहीं सी कि किहड़ी असामी किंने पैसे देण वाली है? पंज हज़ार वाले तों पंज सौ अते पंज सौ वाले तों दस हज़ार मंगिआ जा रिहा सी। हर वार रट्टा पै जांदा सी। बलवंत होवे तां मजाल है कोई कुसक वी जावे।

बलवंत सबर दी घुट्ट भरी बैठा रिहा। उस नूं इस विचों वी भला ही नज़र आ रिहा सी। पुलिस इउं पैसे इकठ्ठे कर रही सी, जिवें दो-चार दिनां नूं रिटाइर हो के घर नूं तुर जाणा होवे।

इह चंम दीआं बहुती देर चल्लण वालीआं नहीं सन। लोक भड़के पए सन। थाणे बैठ के उह लख्ख गरंटीआं दिंदे रहिण कि उह पुलिस दे ख़िलाफ़ इक्क शबद नहीं बोलदे, पर बाहर निकलदिआं ही उहनां संमती कोल चले जाणा सी। कौण बिनां कसूर नाले हड्ड तुड़ाए, नाले पंज-पंज हज़ार रुपिआ देवे।

अग्ग सुलग रही सी। इस नें भांबड़ बणना ही सी। बलवंत पैसे दे चक्कर विच्च पै गिआ तां सेक उस नूं वी लग्गणा सी।

दिहाड़ी तां उस दी फेर वी बण रही सी। सटाफ़ दी सख़ती दा थोहड़ा जिहा फ़ाइदा तां होइआ ही सी। इस वार जिहड़ा इक्क वार चुक्किआ गिआ मुड़ उस दी सूह नहीं सी निकलदी, उह किथे है? जिऊंदा वी है जां मार दित्ता। जिऊंदा है तां किथे अते किस हालत विच्च है? बलवंत सुख्ख-सांद दस्सण दी फ़ीस लै रिहा सी।

पर इस तरहां मिलदी थोहड़ी जिही फ़ीस नाल उस नूं सबर नहीं आउंदा। उह गफ्फे लाउण दा आदी सी। हिसाब-किताब ’च ईमानदार होण करके सारे थाणेदार उस ’ते विशवास करदे सन। मुजरमां दा तां उह मसीहा सी। बिनां किसे डर-डुक्कर दे पैसे फड़ा दिंदे सन। पता सी कंम हो गिआ तां ठीक, नहीं पाई-पाई वापस कर देवेगा। बोतल तक दे पैसे वी नहीं रख्खेगा। इसे विशवास कारन सारे थाणे दीआं ‘मंथलीआं’ उह इकठ्ठीआं करदा सी। दसवें दसौंद नाल ही उह वड्डे थाणेदार जिंने पैसे कमा लैंदा सी।

पुलिस नें जिस ढंग नाल लीडरां दी लाह-पाह कीती सी, उस तों डरदे पेशेवर लीडर तां थाणे वल्ल मूंह नहीं सी करदे। अग्गे कदे कोई कांगरसी आ रिहै, कदे भारती जनता पारटी वाला अते कदे कोई संघी। चुप्प कर के थाणेदार नूं कुआरटर लै गए, गिटमिट कीती अते बंदा छुडा लिआ। मरज़ी होई किसे होर नूं दस रुपए दिवा दित्ते, नां मरज़ी होई तां चुप्प कर के तुर गए।

हुण जदों कि लीडरां दी कमी सी तां बलवंत नें ही उहनां दी थां लैणी सी। नाल दे सिपाहीआं नें लाल सिंघ नूं अजिही गिद्दड़सिंगी सुंघाई कि उह बलवंत नूं कोल खहड़ाउण तक तिआर नहीं। ‘गल्ल’ करन दी गल्ल तां दूर रही।

लोकां नें बंदे तां छुडाउणे ही सन। लीडर मैदान छड्ड गए तां होर बथेरे राह सी।

बलवंत भावें खूंजे लग्गा होइआ सी, फेर वी उस नूं सभ पता लग्ग रिहा सी, किहड़ा किवें छुट्ट रिहा है।

जीवन आहड़तीआ मोटी आसामी सी। वीह-तीह हज़ार आराम नाल दे जांदा। उह सारे अफ़सरां नाल बणा के रख्खदा सी। किसे तों सिफ़ारश करवाउण नालों पैसे ख़रच दे कंम करवाउणा चंगा समझदा सी।

उस दा मुंडा टीटू फड़िआ गिआ सी। मामूली जिहा दोश सी। उस दी जट्टां दे मुंडिआं नाल यारी सी। उस दे यार घरों फ़रार सन। हो सकदै उस कोल आउंदे-जांदे होण।

पहिली पुलिस नें तां जीवन दा मुंडा फड़ना ही नहीं सी। इस थाणेदार दे अड़ीअल सुभाअ नूं देख के ही उस नूं जज्ज दे बूहे ’ते दसतक देण दी लोड़ पई होणी है। बलवंत नाल ऐस.ऐच.ओ.ठीक हुंदा तां इह खरी आसामी सी।

थाणेदार नें नहीं लए तां जज्ज नें लै लए होणगे। जज्ज ऐवें तां थाणे चल्ल के आइआ नहीं होणा। पैंती सालां दी नौकरी विच्च बलवंत नें पहिली वार देखिआ सी कि मामूली जिहे कंम लई जज्ज नूं ख़ुद थाणे आउणा पिआ सी। अज्ज तक तां पुलिस जज्ज दे इशारे ’ते ही बंदा छड्ड दिआ करदी सी।

जज्ज शाइद डरदा होवे। फ़ोन ’ते ऐस.ऐच.ओ.नें राह नहीं देणा। पहिलां वी उस नें इक्क वार फ़ोन कीता सी। उलटा सिध्धा जवाब दे के लाल सिंघ नें जज्ज नूं टरका दित्ता सी।

आप थाणे आइआ है तां ज़रूर मोटी फ़ीस लई होएगी। पहिले जज नाल तां जीवन दी रिशतेदारी सी। उह तां जीवन दे आखे फाहे लग्गण नूं वी तिआर सी। इह बिनां पैसे लए कंम करन वाला नहीं।

जीवन आखदा हुंदा सी कि उह पहिले जज्ज दे पतिओरे दी थां लग्गदा सी। खोजां कढ्ढण वाले कुझ्झ होर ही दस्सदे सन। जज्ज जैन सी अते जीवन अगरवाल। उहनां दी रिशतेदारी किवें पै सकदी सी? असल गल्ल इह सी कि जीवन दी दूजी पतनी अपश्शरा वरगी सी। जज्ज वी अंगरेज़ां वरगा सी। उहनां दा टांका फिट्ट सी। बलवंत नूं टांके वाली गल्ल सच्ची लग्गदी सी। बलवंत जदों वी उहनां लई सिनेमे विच्च बाकस बुक्क करा के आउंदा तां देखदा, फ़िलम देखण वालिआं विच्च जीवन दी वहुटी ज़रूर हुंदी।

जज्ज हफ़ते ’च घट्टो-घट्ट तिंन-चार वार जीवन दे घर खाणा वी खांदा। दोवें परिवार सैर लई तुरे ही रहिंदे। जीवन दी मारूती हर समें जज्ज दी सेवा विच्च हाज़र रहिंदी।

जैन तां दो सौ किलोमीटर दूर लग्गा होइआ सी। जांदा होइआ उह इस जज्ज नाल वाकफ़ीअत करा गिआ सी। इह जज्ज जैन वांग तां जीवन नाल नहीं सी घुलिआ मिलिआ, पर जीवन राहीं लैण-देण कर लैंदा सी। कई असामीआं दे कंम बलवंत नें जीवन राहीं कराए सन।

जे जज्ज जीवन नाल थाणे आइआ है तां थाणेदार नूं बंदा छड्डणा ही पैणा सी। बदले हालात विच्च टाल-मटोल संभव नहीं सी। जज्ज तां पहिली टाल-मटोल ’ते ही बहुत ग़ुस्से सी।

कल्ल्ह जदों उह चिमने दा रिमांड लैण कोठी गए तां उह घंटा कोठीउं नां निकलिआ। सारी पुलिस बाहर खड़ी बेइज़्ज़त हुंदी रही। नां किसे नें बैठण लई कुरसी भेजी नां पाणी पिलाइआ। पुलिस मुजरमां वांग खड़ी रही।

घंटे बाअद सुनेहा आ गिआ। मुजरम दा वकील नहीं आइआ। इस लई मुजरम नूं कल्ल्ह कचहिरी विच्च पेश कीता जावे।

चिमने नूं कचहिरी विच्च पेश करनों ही तां पुलिस डरदी सी। उस दा पट्ट टुट्ट चुक्का सी। जे चौदां दिनां दा पुलिस रिमांड मिले तां ही उह तुरन फिरन जोगा हो सकदा सी। जे रिमांड नां लिआ तां संमती नें इस दी ज़मानत करा के इस नूं पुलिस ख़िलाफ़ वरतणा सी।

जज्ज अड़िआ रिहा। जिंना चिर लाल सिंघ ख़ुद हाज़र हो के मुआफ़ी नहीं मंगदा, जज्ज रिमांड नहीं देवेगा।

पूरीआं मिंनतां करवा के मसां चार दिनां दा रिमांड दित्ता। होर रिमांड वधाउणा है तां जज्ज दी मंनणी ही पैणी सी।

इथे ही बस्स थोहड़ा सी। जिस हिसाब नाल बंदे कुट्टे सन, उस हिसाब नाल तां जज्ज दी पैर-पैर ’ते लोड़ सी। संमती नें पंज-चार वकील आपणे ’च शामल कर लए सन। जिस मुजरम नूं वी पेश करो, उह पहिलां ही डाकटरी मुआइने दी दरख़ासत दे दिंदे सन। जे जज्ज मुआइने दी इजाज़त दिंदा रहे तां पुलिस दे ख़िलाफ़ इंने इसतगासे दाइर हो जाणे सन कि सारी उमर पेशीआं भुगतदे फिरना सी।

इक्क वार तां जज्ज डाकटरी दा हुकम कर दिंदा सी। मुजरम नूं वापस जीप ’च बिठाउंदिआं ही पुलिस ताड़ दिंदी। जे मुआइना कराइआ तां खल्ल लाह दिआंगे। उह डरदा बिआन दे दिंदा। मुआइना नहीं कराउणा। जज्ज नराज़ होवे तां बिआन लिखणो नांह कर के पुलिस नूं वखत पा सकदै।

टीटू नूं जज्ज नाल तोरन तों सिवा पुलिस कोल कोई चारा नहीं सी। दूजी सिफ़ारश डाकरट दी सी।

प्रितपाल उहनां दी नरस दा मुंडा सी। सिआणे डाकटर नें जज्ज वाली नहीं सी कीती, पर जिहड़े पैसे भेजे सन, उह लाल सिंघ दे नक्क हेठ नहीं सी आए। सप्प दे मूंह ’च आई कोहड़ किरली वांग नां हज़ार रुपिआ उह रख्ख सकदा सी नां वापस ही करन नूं दिल करदा सी।

बलवंत नूं पता सी प्रितपाल दी मां भावें नरस सी, पर उस दा बाप बैंक मैनेजर सी। उह वड्डे-वड्डे कारख़ानेदारां नूं करोड़ां रुपए दे करज़े मनज़ूर करदा सी। लख्खां रुपए दी आमदन सी। पंज-सत्त हज़ार नूं उह की समझदा सी।

प्रितपाल भलामाणस वी नहीं सी। पिछ्छे जिहे जदों सटेशन फूकण दीआं वारदातां होईआं सन तां उह साड़-फूक करन वालिआं दा मोहरी सी। उह अकसर भड़काऊ पोसटर लाउंदा अते भाशण दिंदा रहिंदा सी। अज्ज-कल्ल्ह भावें उह अकाली दल दे यूथ विंग दा कारकुंन सी, पर पुराणे कारनामे तां नहीं भुलाए जा सकदे। उस तों पुछ्छ-गिछ्छ करनी बहुत ज़रूरी सी। मुंडे दा रिकारड वी माड़ा होवे अते बाप वी लख्खपती होवे तां बलवंत दस-पंदरां हज़ार लाह सकदा सी। थाणेदार हुण हज़ार रख्खे जां मोड़े, उस दी मरज़ी।

डाकटर सरकारी सी, इस लई उस नूं नांह नहीं सी कीती जा सकदी। इक्क वार उह डाकटर नूं नांह कर वी चुक्के सन। बाबे नें जिहड़ा पुलिस नूं झटका दित्ता सी, उस नाल पुलिस दीआं जहड़ां पोलीआं हो गईआं सन। इस भैड़े समें विच्च डाकटर दी किसे वी समें लोड़ पै सकदी सी।

कई लावारिस मुसतविआं नूं उहनां बीमार आख के हसपताल दाख़ल करवाउणा सी। कईआं विरुध्ध मन-मरज़ी दा डाकटरी मुआइना लैणा सी। किसे बीमार नूं तंदरुसत बणाउणा सी अते किसे तंदरुसत नूं बीमार। की पतै पुठ्ठा लटकदा-लटकदा कदों कोई दम तोड़ जाए। उस समें डाकटर नें ही कंम आउणा सी। डाकटर नें ही लिख के देणा सी कि मरन वाला दिल दा मरीज़ सी। उह सट्टां कारन नहीं, दिल फ़ेल्ह होण कारन मरिआ सी।

इक्क वार लालच ’च आ के पैसे रख्ख लए तां डाकटर नूं हर कंम बदले फ़ीस देणी पिआ करेगी। कौड़ा घुट्ट भर के लाल सिंघ नूं नाले प्रितपाल नूं छड्डणा पिआ, नाले पैसे मोड़ने पए।

बलवंत बड़ा ख़ुश होइआ। लै लिआ बलवंत नूं दूर रख्खण दा सुआद? प्रितपाल दा बाप बलवंत दा वाकिफ़ सी। उस कोल आइआ वी सी। बलवंत नें मोड़ दित्ता सी। थाणेदार दी खुस्सदी फ़ीस देख-देख बलवंत ख़ुश हो रिहा सी।

सरकारी वकील वी वगदी गंगा विच्च गोता ला गए। उहनां नाल वी नित्त वाह पैणा सी। उह भावें पुलिस दा कुझ्झ नहीं विगाड़ सकदे, पर जदों माहौल ख़राब होवे तां बलदी ’च फूस ज़रूर पा सकदे हन। मिसलां तिआर करदिआं वीह नुकस रहि जांदे हन। नां मंनो तां कचहिरी गिआं नूं सूई बघिआड़ी वांग पैंदे हन। बंदे तां पुलिस नें छड्डणे ही सन। दो उहनां दे आखे छड्ड दित्ते। फेर किहड़ा पहाड़ गिर गिआ। इंने ’च ख़ुश होए कचहिरी गिआं दी इज़्ज़त तां करनगे ही, नाले आपे जज्ज तों कंम वी करा देणगे।

होर तां ठीक सी पर जिहड़ा भानी दाअ मार गई सी, इस ’ते बलवंत हैरान सी। उस बदमाश नूं कौण नहीं जाणदा? थाणे दा किहड़ा सिपाही है, जिस दी लत्त हेठ दी उह नहीं लंघी? पंजाहां दे एड़-गेड़ ’च सी। विधवा हो के वी बिंदी-सुरख़ी ला के रख्खदी सी। नाले आखदी सी फौजी पुत्तर नें उस नूं घरों निकलणा बंद कर दित्ता। हुण उह नवीआं कुड़ीआं फसाउण दा कंम छड्ड गई सी।

सिआणे अफ़सर उस दा उल्लू बणाउंदे रहे। हाड़ी-साउणी उस दा कोई कंम मुफ़त ’च कर देणा। बाकी सारा साल उस तों मुख़बरी लैंदे रहिणा। उह चंगे-चंगे बदमाशां दे भेत दे सकदी सी। कई वार अफ़सरां नूं ख़ुश करन विच्च वी सहाई हुंदी।

मुंडे-खुंडे सिपाही उस ’ते लालां सुट्टी रख्खदे हन। थाणे पिछ्छों वड़दी ते भौरिआं वांग दुआले पहिलां हो जांदे हन। बलवंत नूं पता नहीं सी लग्गा, उस नें किस राहीं इंसपैकटर नाल यारी पाई सी। उदों ही पता लग्गा सी कि जदों हिक्क ताण के बराबर आ बैठी सी।

जैले नूं छुडाउण लई उस नें मिंट लाइआ। जैले दी भैण दा सौदा होइआ जां मां दा, इह वी पता नां लग्गा। जैले दी मां पैसे देण जोगी तां है नहीं सी। बिनां कुझ्झ दित्ते-लए छुट्टण दा सवाल ही पैदा नहीं हुंदा। जदों भानी आवे तां किसे दी धी-भैण दा सौदा ही हुंदा है। उहो होइआ होएगा।

मुफ़त ’च बंदे छड्ड-छड्ड थाणेदार वी अक्क गिआ लग्गदा सी। जिस रफ़तार नाल संघरश चल्ल रिहा सी, उस हिसाब नाल तां इंसपैकटर नूं घर वी बैठणा पै सकदा सी। चार पैसे पल्ले होण तां सभ ठीक हो जांदा है।

पैसे कमाउण दा उस नें उहो घसिआ-पिटिआ राह लभ्भिआ।

थाणे दी जीप दे नवें टाइर लाह के अंदर रख्ख लए। पुराणे टाइर चहड़ा के विहड़े ’च खड़ी कर दित्ती। जीप दे नवें टाइरां लई ‘टाइर फंड’ इकठ्ठा होणा शुरू होइआ।

जिस नाल लैण-देण दी गल्ल सिरे चहड़ गई, उस नूं ‘टाइर फंड’ मुआफ़। किसे नूं मुफ़त ’च छड्डणा पिआ तां टाइर बदलाउण दे बहाने पैसे मंग लए। अजिहे ‘सांझे’ कंम लई तां वड्डे तों वड्डा अफ़सर वी नांह नहीं करदा, सगों उस नूं पैसे ख़रचाउण दा बहाना मिल जांदा है।

पिछले ऐस.ऐच.ओ.नें थमला फंड शुरू कीता सी। मींहां विच्च थाणे दा थमला काहदा गिर गिआ, पुलिस नूं मौजां लग्ग गईआं। पुराणा थाणेदार सी। पहिलां रज्जवीं फ़ीस लैंदा। जांदे मुसतवे नूं वगार वी पा दिंदा। अमन-अमान दे दिन सन तां वी शाम तक चार-पंज सौ बण जांदा सी। जदों थोक दे भाअ बंदे फड़े होण तां पैसे वी थोक दे भाअ इकठ्ठे होणे चाहीदे सन। बलवंत दा अंदाज़ा सी कि इस बहाने हुण तक लाल सिंघ दस-बारां हज़ार तां इकठ्ठा कर ही चुक्का होणा है। बहाने नाल जीवन आहड़तीए नूं थाणे बुला के उहनूं वी वगार पा चुक्का सी।

लाल सिंघ दी चुसती ’ते बलवंत हैरान सी। हाड़ी दे दिनां ’च थाणे वाले लंगर दे नां ’ते कणक इकठ्ठी करदे तां देखे सन। मैस दे बहाने हर पिंड विचों घट्टो-घट्ट पंज बोरीआं इकठ्ठीआं करन दा टीचा हुंदा सी। कई-कई टरक्क कणक इकठ्ठी हो जांदी। इंनीआं कु बोरीआं तां पंच-सरपंच ही दे जांदे। बाकी दे चौधरी जगीरदारां तों अलग्ग।

नां थमला डिग्गा सी नां हाड़ी दे दिन सन, फेर वी पैसे इकठ्ठे हो रहे सन।

इस फंड दा खाता वेदू सट्टे वाले तों खुल्ल्हिआ। थाणेदार नूं तां पता नहीं की दित्ता, पर आपणे तिंनां बंदिआं वल्लों दो-दो सौ फंड ज़रूर जमहां कराइआ।

वेदू दी इक्क वार अजिही बुक्कल सांझी होई कि उह मिंट-मिंट बाअद थाणे आउण लग्गा।

बलवंत नूं उस ’ते डाहडा ग़ुस्सा सी। उहो वेदू, जिस नूं कदे ज़मानत देण लई ज़ामन लहीं सी लभ्भदे हुंदे, हुण चौधरी बणिआ फिरदा सी। टाइर फंड विचों सिपाहीआं नूं कुझ्झ मिलणा सी जां नहीं, इस दा हाले कोई पता नहीं सी। पहिला थाणेदार तां दरजा-ब-दरजा हिस्से पाउंदा सी। लाल सिंघ दे रवई्ईए तों तां लग्गदा सी, उह इकल्ला ही पैसे खावेगा।

इह दिन सदा तां रहिणे नहीं सन। मुड़ जदों बलवंत दी वारी आई, उस नें वेदू नूं ज़रूर सबक सिखाउणा सी।

साथी, निंदर अते मुरली लई ठेकेदार आ धमके। पहिलां इह शराब ज़रूर कशीद करदे सन। जदों दे गुड़ दे भाअ असमानी चहड़े हन, नाजाइज़ शराब दे धंदे विचों कख्ख नहीं बचदा। इह हुण ठेकेदारां दी शराब वेचदे हन। ऐकसाईज़ महिकमे नाल मिल के ठेकेदार कई पिंडां विच्च ठेके नहीं खुल्ल्हण दिंदे। उथे आपणे बंदे बहा के शराब वेचदे रहिंदे हन। ज़रूरी तां नहीं सरकार दे ख़ज़ाने भरे जाण। उहनां विचों कुझ्झ ऐकसाईज़ वालिआं नूं देवो, कुझ्झ पुलिस नूं अते बाकी आप खावो। आपणे करिंदिआं लई उह कोई वी जुरमाना भरन लई तिआर सन।

ठेकेदार कोई छोटी असामी सी? जिंनी मरज़ी वगार पा दिंदे, फसे होए हन। वज़ीर दा नां वी नहीं लै सकदे। बलवंत सिपाही ठेकेदार नाल खार खांदा सी। वड्डे अफ़सरां दीआं वगारां तां करदे सन, पर सिपाहीआं नूं टिच्च समझदे सन। महीने बाअद मिलण वाली इक्क बोतल वी तड़ी झल्ल के लैणी पैंदी सी। अग्गों-पिछ्छों लोड़ पै जाए तां दो रुपए दी वी रिआइत नहीं करदे।

बलवंत नूं उदों मौजां लग्गीआं सन जदों ‘डराई-डे’ चल्लदे सन। हफ़ते ’च दो दिन ठेके बंद करने पैंदे। ठेकेदारां नें नख़रा कीता नहीं कि उहनां दे ठेके अग्गे डेरे लाए नहीं। उहनां दे खड़े मजाल है कोई पऊआ वी ख़रीद जाए। गाहक देख के सिपाही पहिलां ही खंघूरा मार दिंदे।

हुण उलटा ज़माना है। पुलिस ठेकिआं ’ते खड़ो के ख़ुद शराब विकाउंदी है। सरकारी हुकम हन। ठेकेदारां दी दहिशतगरदां तों हिफ़ाज़त कीती जावे। ठेकेदारां नूं की लोड़ है, सिपाहीआं दा माण-ताण करन दी?

लाल सिंघ नें चंगा कीता। पूरे टाइर दी ही वगार पा दित्ती। ठेकेदारां नें बथेरे हाहड़े कढ्ढे। करिंदे ग़रीब हन। थाणेदार अड़िआ रिहा। हार के दे गए।

दरशन भुक्की वाला, बंतू अते जस्से लई आइआ। दरशन नें सारी ज़िंमेवारी आपणे मोढिआं ’ते लई। उह होर चाहे कुझ्झ वी सन, पर अतिवादी नहीं सन। उहनां दा बहुत कुटापा हो चुक्का सी। थाणे पए रहे तां कोई अंग नकारा हो जाणा सी। इलाज करवाउण लई उहनां नूं हसपताल लै जाणा ज़रूरी सी। इक्क टाइर दा ख़रचा दरशन नें ख़ुशी-ख़ुशी दे दित्ता।

मज़ार ’ते सहुं खुआ के थाणेदार नें उहनां दा रस्सा वी खोल्ह दित्ता।

साधू नूं सबज़ी वाला भापा छुडा के लै गिआ।

भापे नें दो दिनां विच्च ही इंसपैकटर दा मन मोह लिआ सी। थाणेदार नूं नवें तों नवें अजिहे फ़रूट खुआए कि उह टाइर फ़ंड मंगणा वी भुल्ल गिआ।

भापे विच्च करामात ही अजिही सी। शहिर दी सबज़ी मंडी दा उह मालक सी। सारीआं तिंन दुकानां सन। मन-मरज़ी दी उह आहड़त तां लैंदे ही सन, हर ढेरी विचों काट वी कट्टदे सन। इक्क-इक्क दाणा वी जे फ़रूट वाली पेटी विचों कढ्ढिआ जावे तां वी टोकरा भर जांदा सी। दूजे आहड़तीए तां वाधू सबज़ी नूं टोकरिआं ’च पा के वेच दिंदे, पर भापा इंझ नहीं सी करदा। भापा सबज़ी दे झोले भरदा, अफ़सर दे रुतबे मुताबक फ़रूट अते सबज़ी नाल भरिआ झोला कोठी पहुंचदा। डिपटी तों लै के हौलदार तक। जज्ज तों लै के नाज़र तक। ई.टी.ओ.तों लै के कलरक तक। सभ दे घरीं उस दी सबज़ी जांदी। छोटे मुलाज़म नूं लोड़ हुंदी तां मंडी जा के लै आउंदा।

जिस बंदे दा हर रोज़ मुफ़त ही खाईए जे उस नूं कदे कंम पै जाए तां वगार किहड़े मूंह पाईए? लाल सिंघ नें इसे झेप विच्च खुल्ल्हदिली दिखाई। साधू जे उस दी सबज़ी-मंडी विच्च कंम करदा है अते बंटी दे कातलां नाल उस दा कोई संबंध नहीं तां उह साधू नूं लिजा सकदा है।

इक्क-इक्क करके लगभग सारे ही मुसतवे जा चुक्के सन। थाणे विच्च इको-इक्क बंदा कंम दा बचिआ सी। उह वी बलवंत दी नालाइकी करके। उह बलवंत दे मामे दे सांढू दा पुत्त सी। बस्स निकल जाण करके सटेशन ’ते सौं गिआ सी। गशती पारटी उस नूं फड़ लिआई सी।

मिठ्ठू दे मापिआं नूं कल्ल्ह ही पता लग्गा सी। पैसिआं दा झोला भर के उह रात ही बलवंत कोल आ गए सन।

सारी रात मामा बलवंत दे हाहड़े कढ्ढदा रिहा। गऊ वरगा मुंडा है। जिंने मरज़ी पैसे लग्ग जाण, उह छुट्टणा चाहीदा है।

अंदरों बलवंत डरदा सी। उस दी नवें थाणेदार नाल बुक्कल नहीं सी खुल्ल्ही। सिध्धी गल्ल करन दी उह हिंमत नहीं सी कर रिहा।

उह मामे नूं मोड़ना वी नहीं चाहुंदा। टाली रख्खण लई इक्क-दो बहाने घड़े। थाणेदार अड़ीअल है, किसे दी नहीं मंनदा। जे मंन वी गिआ तां थब्बा नोटां दा लएगा।

पंज हज़ार तां उहनां बलवंत नूं फड़ा ही दित्ते। पंज हज़ार होर ख़रचण लई हरी झंडी दे दित्ती।

रिशवत दे धंदे विच्च उधार नहीं चल्लदा। इह सोच के बलवंत नें मिठ्ठीआं- मिठ्ठीआं गल्लां राहीं मामे नूं समझाइआ। दस हज़ार वाली गुट्टी दे के थाणेदार तों नांह नहीं होणी। पंज हज़ार थोहड़ा सी।

आहड़तीआं कोल जांदे मामे नूं उस नें छोटा जिहा सवाल होर पा दित्ता। मुनशी मुसद्दी वी माण नहीं हुंदे। थोहड़ा बहुत हत्थ उहनां नूं वी झाड़ना पएगा। हज़ार दो हज़ार होर फड़ी आवे।

थाणेदार नाल मिठ्ठू बारे गल्ल करन दा इह वधीआ मौका सी। लाल सिंघ घबराइआ होइआ सी। लग्गदे वाह किसे मुलाज़म नूं तंग नहीं सी करदा। नां पहिलां वांग पुठ्ठा बोलदा सी।

थाणा लगभग विहला हो चुक्का सी। पाले अते मीते वरगिआं नूं किस नें छुडाउण आउणा सी? पाले लई जीवन आ सकदा सी। जीवन दा आपणा मुंडा मसां छुट्टिआ सी। अगांह टाइर फंड वी शुरू हो चुक्का सी। कई वार इह टाइर सिफ़ारशीआं दे गल वी पै सकदा सी। सिआणे सेठां नें दड़ वट्ट लई होणी है।

बलवंत नें हाले तक मिठ्ठू दा कोई सिफ़ारशी वी थाणे नहीं सी आउण दित्ता। थाणेदार नूं लग्गदा होणा है, जिवें उह वी लावारिस ही सी।

“सरदार जी मिठ्ठू मेरी रिशतेदारी ’चों है … आह पंज सौ टाइर लई अते पंज सौ … ।” विहले बैठे थाणेदार अग्गे पंज सौ धर के बलवंत नें गल्ल छेड़ी।

“जे तेरा बंदा सी तां पहिलां ही दस्स दिंदा … आह की करी जानैं? रहिण दे … ।” बलवंत जदों पंज सौ उस दी जेब ’च पाउण लग्गा तां लाल सिंघ नें उपरले मनों पोचा मारिआ। मिठ्ठू नूं छड्डणा ही सी, छड्ड दित्ता।

मिठ्ठू नूं बलवंत नाल जांदा देख के मुनशी दे सत्तीं कप्पड़ीं अग्ग लग्ग गई।

“ओए बई मैस दा ख़रचा तां दिवा दे … ।” मिठ्ठू नूं गेट कोल घेर के मुनशी नें बलवंत नूं ताड़िआ।

“इह मेरा रिशतेदार है। पंज सौ टाइर फंड दे ‘ता। होर किंने बणदे नें? ‘

“तिंन दिन हो गए थाणे बैठे नूं। तिंन सौ बणदै।” मुनशी नें अख्ख मार के बलवंत नूं समझाइआ। उह बलवंत नाल अध्धो-अध्ध करन नूं तिआर सी।

“सौ रुपए दिहाड़ी नूं अगांह इह गरीन होटल है? नाले जिवें अगले नूं मुरग़ा परोसदे सी? भुख्ख तां अगले दी उंझ ही मर जांदी है, डंडा परेड हुंदी देख के। तैनूं आखता इह मेरा रिशतेदार है। जिंनीआं हाज़रीआं बणन मेरे खाते लिख देईं।” हैंकड़ दिखाउंदा बलवंत मिठ्ठू नूं थाणे ’चों बाहर लै गिआ।

मुनशी नाल बलवंत नूं कोई हमदरदी नहीं सी। बथेरी लुट्ट पा रख्खी सी। पंज सौ रुपए मैस दे बणदे नहीं हुंदे, पंज सौ मंग के खड़ो जांदा सी। लोकां दीआं जामा- तलाशीआं ही नहीं माण। किसे बटूए ’च पंजाह होण जां पंज हज़ार। इह सभ हड़प्प कर जांदै। आख ही देणै। इंने ही निकले सन। कई तां डरदे घड़ीआं छापां वी लैण नहीं आउंदे।

पहिलां उह बलवंत नूं भुल्लिआ बैठा सी? कदे इक्क धेला नहीं दिवाइआ। कोई असामी बलवंत दे अड़िक्के आ गई तां मूंह ’च पाणी आ गिआ।

मिठ्ठू नूं मामे हवाले कर के बलवंत दी हिक्क चौड़ी हो गई। रिशतेदारां विच्च उस दी धांक तां जंमी ही सी नाले गिआरां हज़ार दे कड़-कड़ करदे नोट वी बोझे पै गए सन।

नवें सटाफ़ ’ते हुण उस नूं कोई गिला नहीं सी।

 

 

28

किसे हत्थों होई बेइज़्ज़ती तां माड़े तों माड़े बंदे नूं वी चुभ्भदी रहिंदी है। पुलिस दी डिकशनरी विच्च तां इस नां दे शबद दा नां निशान ही नहीं। हर समें ‘जी हज़ूर, जी हज़ूर’ अखवाउण वाले नूं कोई खरीआं-खरीआं वी सुणा जावे अते बंदा वी छुडा लए, इह उस लई मरन वाली गल्ल सी।

गल्ल सहे दी नहीं, पहे दी वी सी। अज्ज बाबा छुडा के लै गिआ, कल्ल्ह नूं किसे जथेदार नें आ जाणा सी अते परसों नूं किसे जनसंघी नें। इस तरहां वापरदा रिहा तां पुलिस दी दहिशत तां दिनां विच्च ही ख़तम हो जाणी सी।

बग़ावत दे रौं विच्च होए लाल सिंघ नें सारे शक्की बंदिआं दे रस्से खोल्ह दित्ते। उह पाले अते मीते नूं वी नहीं सी रख्खणा चाहुंदा। पुराणा मुनशी गल पै गिआ। उस नें नवें मुनशी नूं चारज देणा सी। बहुत सारा माल तिआर करन वाला रहिंदा सी। पाला अते मीता थाणे दे कंमां-कारां दे भेती सी। पहिलां वी जदों फड़े जांदे, मुनशी नाल कंम कराउंदे रहिंदे। नां ही उहनां दा कोई पिछ्छा करन वाला सी। भावें महीना थाणे बैठे रहिण, किसे नें नहीं सी पुछ्छणा। मुनशी दीआं मिंनतां अग्गे लाल सिंघ नूं झुकणा पिआ।

पिछले दो दिनां ’च मेज़ ’ते लत्तां रख्ख के अख़बार पहड़न तों सिवा लाल सिंघ नें कोई कंम नहीं सी कीता।

जे सरकार नूं कातल फड़न दी कोई काहल नहीं तां लाल सिंघ नूं आपणी नौकरी ख़तरे ’च पाउण दी की चट्टी पई है? सिआसतदानां दा की है? जदों आपणा सिंघासण डोलण लग्गदा है तां किसे नां किसे नूं बली दा बक्करा बणा दित्ता जांदा है। इक्क पासे उस ’ते ज़ोर पै रिहा है कि कातलां नूं हर हालत विच्च भोग तों पहिलां-पहिलां फड़िआ जावे। दूजे पासे उस दी तफ़तीश विच्च रोड़ा ही नहीं, चट्टान बणे खड़े बाबे दा कोई हीला नहीं कीता जा रिहा।

जिहो जिहा रुख़ उच्च अधिकारीआं नें अपणा रख्खिआ सी, उहो जिहा लाल सिंघ नें अपणा लिआ। बंटी वाली तफ़तीश बंद कर के उस नें आम जुरमां वल्ल धिआन देणा शुरू कीता। पुलिस दा सारा धिआन कातलां वल्ल होण कारन बाकी जुरमां दी रफ़तार तेज़ हो गई सी। भुक्की दे शरेआम विकण दीआं मुख़बरीआं आ रहीआं सन। ठेकेदार चीक रहे सन। घर-घर नाजाइज़ शराब कशीद हो रही है। सट्टे वाले नें आपणे करिंदिआं दी गिणती दुगणी कर दित्ती है। इक्क-दो लड़ाईआं हो चुक्कीआं सन।

लाल सिंघ चुप्प होइआ तां सारे पासे शांती वरत गई। नां फड़-फड़ाई, नां पुछ्छ-गिछ्छ, नां कोई जलसा जलूस। शहिर जिवें सुखी वस्सण लग्गा सी।

नवें कपतान नूं जिवें होर कोई कंम ही नहीं सी। वार-वार रिपोरट मंग रिहा सी। उस नूं फ़िकर सी कि भोग विच्च कुझ्झ दिन बाकी सन। मुख्ख मंतरी भोग विच्च शामल होणा चाहुंदा सी। उह भोग विच्च तां ही शामल हो सकदा सी जे कातलां नूं भोग तों पहिलां फड़िआ जावे।

पुलिस नूं उतशाहत करन लई सरकार नें कातलां दे सिर ’ते पंजाह-पंजाह हज़ार दे इनाम वी रख्ख दित्ते। पुलिस मुलाज़मां नूं इक्क-इक्क तरक्की देण दा ऐलान वी कीता। इह मुख्ख मंतरी दे वाअदे सन, किसे अफ़सर दे नहीं। मुख्ख मंतरी नें रैंक वधाउण लग्गिआं किसे तों पुछ्छण नहीं जाणा। आप ही घुग्गी मारनी सी।

लाल सिंघ चुप्प कीता सभ कुझ्झ देख रिहा सी। पुलिस कोल किहड़ा अलादीन दा चिराग़ सी बई फूक मार के जिंन नूं हाज़र करो अते मुजरमां नूं फड़ लिआउण दा हुकम सुणा दिओ। किसे नतीजे ’ते पुज्जण लई शक्की बंदिआं दी पुछ्छ-गिछ्छ ज़रूरी सी। किसे दे मूंह ’ते तां लिखिआ नहीं हुंदा कि उह कसूरवार है जां बेकसूर। तफ़तीश करन लग्गिआं थोहड़ा-बहुता धक्का वी हो जांदा है। जिंना चिर बाबे वाला कंडा कढ्ढ के लाल सिंघ नूं तफ़तीश करन दीआं खुल्ल्हां नहीं दित्तीआं जांदीआं, लाल सिंघ किसे वी शक्की बंदे नूं थाणे नहीं बुलाएगा। इह उस दा आख़री ते पक्का फ़ैसला सी।

कपतान नूं लाल सिंघ सारी रिपोरट दे आइआ सी। बाबा कोई माड़ी-मोटी हसती नहीं। उह तां अंतर-राशटरी पध्धर दा बंदा है। लाल सिंघ नें आपणी पध्धर ’ते उस नूं हत्थ पा लिआ तां सारे देश विच्च वा-वरोला खड़ा हो जाणा सी। बाबे दी ग्रिफ़तारी लई घट्टो-घट्ट मुख्ख मंतरी दा इशारा होणा ज़रूरी सी।

लाले वांग बाबे दे हमाइतीआं दी गिणती शहिर तक ही सीमत नहीं सी। उस नें तां आपणीआं टंगां सारे सूबे विच्च पसार रख्खीआं सन। लाले वांग उस दे समरथकां विच्च धनाढ, कारख़ानेदार, विउपारी जां खस्सी होए धारमिक नेता नहीं हन। उस दे समरथक तां सिरां ’ते कफ़न बंनही फिरदे कालजां-यूनीवरसिटीआं दे विदिआरथी, फ़ौलादी डौलिआं वाले किरती, भोले-भाले किसान अते सारी उमर लोकां दे पैरां ’च रुलण वाले दलित सन।

जे बाबे नें आपणी सारी ज़िंदगी उहनां दे लेखे लाई सी तां उह वी बाबे लई हर तरहां दी कुरबानी लई तिआर सन।

लाल सिंघ नें तां बाबे दी सारी हिसटरी इस लई दस्सी सी तां जो कपतान लाल सिंघ दी मजबूरी नूं समझे, पर लाल सिंघ नूं लग्गा जिवें कपतान नूं आपणा फ़िकर पै गिआ होवे। उह ग्रिफ़तारी दे आरडर दिंदा-दिंदा गल्ल टाल गिआ सी।

लाल सिंघ नूं हुकम होइआ सी कि उह पहिलां बाबे दे ख़िलाफ़ कोई केस दरज करे। फिर अदालत विचों ग्रिफ़तारी वारंट हासल करे। इंने विच्च उह मुख्ख मंतरी तों हुकम प्रापत कर लएगा।

मुकद्दमा दरज करना किहड़ा औखी गल्ल सी? थाणे पुज्जदिआं ही लाल सिंघ नें झट्ट वड्डी सारी ऐफ़.आई.आर.कट्ट दित्ती। दोश वी सच्चे। पुलिस मुलाज़मां नूं सरकारी डिऊटी करन तों रोकिआ। पुलिस हिरासत विचों बंदा छुडाइआ। सरकारी मुलाज़मां दी तौहीन। बिनां आगिआ तों थाणे ’च प्रवेश। वीह दफ़ावां लाईआं लाल सिंघ नें।

परचे ’ते साहिब दी तसल्ली नां होई। कहाणी मन-घड़त जिही लग्गदी सी। इस तों पुलिस दी कमज़ोरी वी साबत हुंदी सी। उह पुलिस टट्टू दी होई जिहड़ी इक्क बुढ्ढे बंदे तों वी आपणी हिफ़ाज़त नां कर सकी। इस परचे नें तां सगों बाबे नूं हीरो बणा देणा सी। उह इस उमर विच्च वी थाणिउं बंदा छुडाउण दी हिंमत रख्खदा सी।

कोई होर परचा दरज कीता जावे। किसे सच्ची घटना ’ते आधारित कीता जा सके तां बहुत बिहतर। घटना वी इस तरहां दी रची जावे, जिस नाल लोकां ’च बाबे दा वकार वी घटे अते उस नालों लोक टुट्ट वी सकण।

किसे बंदे नूं बदनाम करन दे दो ही तरीके हुंदे हन। ज़नानीबाज़ी जां फंडां विच्च हेरा-फेरी। बाबे दी उमर ज़नानीबाज़ी वाली तां रही नहीं। संमती नें कोई फंड वी इकठ्ठा नहीं कीता कि उस ’ते हेरा-फेरी दी गल्ल उडाई जा सके। नाले जिस बंदे नें सारी उमर ’च धेला पल्ले नां रख्खिआ होवे, सगों आपणी सारी जाइदाद अते कमाई लोकां दे लेखे ला दित्ती होवे, उस ख़िलाफ़ हेरा-फेरी दा इलज़ाम किस नें मंनणा सी। उलटा दोश लाउण वाले दी खिल्ली उड्डणी सी।

लाल सिंघ नूं इको हल्ल सुझ्झ रिहा सी। किवें नां किवें बाबे दे ख़िलाफ़ जलूस कढ्ढिआ जावे। जलूस ’च गड़बड़ कराई जावे। गड़बड़ दे सारे दोश बाबे सिर महड़े जाण। फेर बाबे नूं ग्रिफ़तार करना आसान सी, पर जलूस कढ्ढे कौण? इह समझ नहीं सी आ रिहा।

सुसत होई पुलिस ’ते संघ बहुत दुखी सी। सवेरे शाम जदों वी उह तफ़तीश दी प्रोगरैस पुछ्छण आउंदे, लाल सिंघ घड़िआ-घड़ाइआ इको जवाब दिंदा ।

“असीं आपणे सटार नहीं लुहाउणे। तुहाडा बाबा तफ़तीश अग्गे नहीं तुरन दिंदा। जिस शक्की बंदे नूं वी फड़दे हां, उसे नूं छुडा के लै जांदा है। सरदार वी चुप्प बैठा है। लग्गदै बाबे तों डरदे दी मोक निकलदी है।”

फेर संघ कोल इस दा की हल्ल सी? जे बाबा किसे नूं छुडा के लै गिआ तां उह ज़रूर निरदोश होएगा। बाबा दहितशगरदां दी हमाइत करन वाला थोहड़ा है।

लाल सिंघ नें संघ नूं अंदर वड़ के समझाइआ।

बाबे दा रिकारड ठीक नहीं। किसे समें उह मार-धाड़ करन वाले गरम-ख़िआलां वाले मुंडिआं दा मोहरी हुंदा सी। उहो मुंडे हाले वी बाबे दीआं जथेबंदीआं विच्च मोहरी हन। इह कारा बाबे दी किसे समरथक जथेबंदी दा वी हो सकदा है। तरकशील साधां संतां दे पिछ्छे पए होए हन। टूणे-टामणां जां पुछ्छां देण वालिआं नूं वंगारदे हन। इह सारा टोला ही नासतकां दा है। की पतै लाला जी दे धरम परचार ’ते चिड़दे होण? बाबे दा मक्कू ठप्पिआ ही जाणा चाहीदा है।

संघ नूं लाल सिंघ दी गल्ल जच गई। नहीं तां बाबे नूं इड्डा वड्डा जहाद खड़ा करन दी की लोड़ सी?

“जे गल्ल संघ दी समझ आ गई तां पुलिस दी मदद करो।” जलूस कढ्ढण लई लाल सिंघ नूं संघ ही सही धिर लग्गी।

संघ पुलिस दी मदद तों कदों इनकारी है। उहनां नूं कातल चाहीदे सन। संघ हर कुरबानी लई तिआर सी।

कुरबानी तां पुलस ही देवेगी। संघ केवल मदद देवे।

बाबे दा मनोबल गेरन लई ज़रूरी सी कि उस दे ख़िलाफ़ इक्क भरवां जलूस कढ्ढिआ जावे । लोकां नूं बाबे दीआं कारवाईआं बारे दस्सिआ जावे। लोकां दा ग़ुस्सा ही बाबे नूं पुलिस नाल पंगा लैणों रोक सकदा है।

बाबे दे ख़िलाफ़ जलूस कढ्ढणा संघ दे वस्स दा रोग नहीं सी। बाबे दे उपाशकां दी गिणती संघ नालों कई सौ गुणा ज़िआदा सी। अध्धिआं नालों वध्ध संघ दे वरकर बाबे दे समरथक सन। नाले बाबे दे कुझ्झ साथी अंडर-गराऊंड हन, किसे वी समें संघ दे वरकरां नूं गोली मार सकदे हन।

लाल सिंघ नें बहुते वरकरां तों की कराउणै? जिंने आ सकण, उने ही ठीक हन। जलूस विच्च बंदे इकठ्ठे करना लाल सिंघ दी ज़िंमेवारी सी। पुलिस नूं केवल नाहरे मारन वाले बंदिआं दी ज़रूरत सी।

उह अंडर-गराऊंड साथीआं तों वी नां डरन। पुलिस जलूस दे नाल होएगी। पुलिस दी अगवाई लाल सिंघ ख़ुद करेगा। मजाल है कोई संघ वल्ल झाक वी जावे।

पर इह कंम फौरी होणा चाहीदा सी। इस तों पहिलां कि बाबे दे समरथकां नूं इस दी सूह लग्गे, । जलूस निकल जाणा चाहीदा सी।

जे संघ दे नेतावां नें इकल्ले नाहरे ही मारने हन तां जलूस किसे वकत वी कढ्ढिआ जा सकदा सी।

उहनां शाम नूं चार वजे ही जलूस कढ्ढण दा प्रोगराम बणा लिआ।

जलूस भगत सिंघ दे बुत्त तों शुरू होणा सी अते बज़ारां विच्च दी हुंदा होइआ बाबे दे घर पुज्जणा सी।

संघ नें बड़ा नरम प्रोगराम रख्खिआ सी। सीमित जिहे नाहरे मारने सन।

घर पुज्ज के बाबे नूं बेनती कीती जाणी सी। उह पुलिस दे कंमां विच्च दख़ल नां देवे। पुलिस नूं कातल फड़न देवे। संघ नूं यकीन सी, बाबे नें इस जाइज़ मंग नूं हर हालत विच्च मंन लैणा सी।

जदों जलूस बुत्त तों रवाना होइआ तां गिणती पंझी-तीह तों वध्ध सी। पुलिस दी गिणती वरकरां नालों कई गुणा ज़िआदा सी।

दरशन नूं फ़िकर लग्गा होइआ सी। बाबे दे घर तक पहुंचदे-पहुंचदे तां उह दो-चार ही रहि जाणे सन।

जलूस जिउं-जिउं अग्गे वधदा गिआ, समरथकां दी गिणती वी वधदी गई। गली दे हर मोड़ तों दस-वीह बंदे जलूस विच्च रल जांदे। वध रही भीड़ नूं देख के दरशन दा जोश वी वधदा गिआ। उस दे नाअरिआं दी आवाज़ उच्ची हुंदी गई। नाअरिआं दे हुंगारे तों दरशन नूं लग्गदा सी, जिवें सारा शहिर बाबे दे ख़िलाफ़ सी, कातलां नूं फड़न लई इक्क-मुठ्ठ सी।

हौली-हौली जलूस दे तेवर बदलण लग्गे। दरशन दे नाअरिआं वल्ल कोई धिआन नहीं सी दे रिहा। भीड़ विचों ही कोई नाअरे लाउण लग्गा सी। नाअरे वी उह नहीं सन, जिहड़े संघ नें चुणे सन। इह नवीं ही तरहां दे सन ।

“बंटी दा कातल … कुत्ता बाबा … “

“बाबे नूं … फाहे लाओ … “

“कातलां दे राखे बाबे नूं … ग्रिफ़तार करो … ग्रिफ़तार करो … “

“फूक दिआंगे … फूक दिआंगे। कातल बाबे नूं फूक दिआंगे … “

बज़ार दे आख़री मोड़ ’ते अजीब-अजीब किसम दे बंदे जलूस विच्च शामल हो गए। किसे कोल डांग सी, किसे कोल गंडासा अते किसे कोल नंगी तलवार। कईआं दे हत्थां विच्च इट्टां रोड़े सन। इक्क दे कोल तेल वालीआं पीपीआं वी दिखाई दिंदीआं सन।

“चक्क दिओ … फूक दिओ … मार दिओ … बाबे ग़दार नूं … कातल नूं …”  अजीब- अजीब जिहे आवाज़े कस्से जा रहे सन।

घबराए दरशन दे पैर तां पिछांह वल्ल जा रहे सन पर लाल सिंघ काहल कर रिहा सी।

दरशन नूं कुझ्झ वी समझ नहीं सी आ रही कि जलूस विच्च शामल लोक कौण सन? नां उह संघ दे वरकर सन, नां ही शहिर दे निवासी। फेर वी चिहरे देखे-भाले जिहे ज़रूर सन।

दरशन दी ख़ामोशी नूं देख के इक्क नवां नेता रिकशे ’ते चहड़ गिआ। उस नें माईक दरशन हत्थों फड़ लिआ। नवां नेता उच्ची-उच्ची नाअरे लाउण लग्गा। युवा संघ दे हक्क विच्च, लाला जी दे हक्क विच्च अते पुलिस दे हक्क विच्च।

रिकशे ’चों उतर के दरशन नें सुख दा साह लिआ। किसे होर नें राम सरूप नूं वी रिकशे ’चों लाह दित्ता सी। उह वी दरशन नाल आ रलिआ।

उह बिटर-बिटर तक रहे सन। जलूस उहनां हत्थों निकल चुक्का सी। अग्गों की होण वाला है, किसे नूं कुझ्झ नहीं सी पता।

लाल सिंघ नें नवें नेतावां दे कंन विच्च फूक मारी। उह जलूस तेज़ी नाल बाबा जी दे घर वल्ल लिजाण लग्गे।

लाल सिंघ नूं मुख़बरी मिली सी कि बाबे दे ख़िलाफ़ निकल रहे जलूस दी ख़बर शहिर दी गली-गली विच्च तां फैल ही गई सी ते इह पिंडां विच्च वी पहुंच गई सी।

कई जथेबंदीआं बाबे दे हक्क विच्च जलूस कढ्ढण दीआं तिआरीआं कर रहीआं सन।

सांसीआं दीआं कुल्लीआं वल्लों पंजाब सटूडैंटस यूनीअन दे शामू दी अगवाई विच्च औरतां-मरदां दा इक्क टोला चल्ल वी चुक्का सी। उहनां दे हत्थां विच्च तकले, दातीआं अते खुरपे सन।

उहनां नूं रसते विच्च ही काबू करन लई इक्क पुलिस दा दसता भेजिआ जा चुक्किआ सी।

धागा मिल्ल विच्च हड़ताल हो गई सी। मज़दूरां नूं अशोक लीड कर रिहा सी। उह कुहराम मचाउंदे आ रहे सन।

*तीकारी फरंट दे कुझ्झ कारकुन हथिआरां समेत बाबे दे घर पहुंच चुक्के सन।

तरकशील अगवाड़ वाली धरमशाला विच्च इकठ्ठे हो रहे सन। उथों बाबे दा घर नेड़े ही सी। किसे वी समें उह जलूस नाल टकरा सकदे सन।

कई पिंडां विच्च लाऊड-सपीकरां ’ते लोकां नूं टरालीआं विच्च बैठ के शहिर पुज्जण दे सद्दे दित्ते जा चुक्के सन। नाल दे पिंडां ’चों लोकां दीआं भरीआं कुझ्झ टरालीआं शहिर वल्ल कूच कर चुक्कीआं सन।

गड़बड़ दी संभावना नूं मुख्ख रख्खदिआं सारा बज़ार बंद हो चुक्का सी।

लाल सिंघ नूं ख़तरा सी। सच्चमुच्च टकरा हो सकदा सी। इस तरहां हो गिआ तां लाल सिंघ नूं लैणे दे देणे पै सकदे सन।

उह जलूस विच्च तेज़ी नाल घुंम रिहा सी। जलूस विच्च शामल बंदिआं नूं उह कुझ्झ समझा रिहा सी।

बाकी दा पैंडा जलूस नें कुझ्झ मिंटां विच्च ही मुका लिआ।

बाबे दे घर अग्गे पुज्जदिआं ही इट्टां-रोड़िआं दी बारिश शुरू हो गई। डांगां- गंडासिआं नाल दरवाज़े तोड़न दे यतन होण लग्गे।

“वड्डिआ इनकलाबीआ हिंमत है तां बाहर आ … “

“देखदे हां तूं कातलां नूं घरे बहा के किवें बचाउनैं?”

“भुंन दिओ ग़दार नूं … फूक दिओ सारे परिवार नूं … ।” इट्टां रोड़िआं दे नाल-नाल नाअरे वी उच्चे हुंदे गए।

तेल दीआं पीपीआं वालिआं नें फुरती नाल तेल दरवाज़िआं ’ते छिड़क दित्ता। कोई तेल नूं तीली दिखाउण ही लग्गा सी कि कोठे तों बाबा गड़किआ ।

“बेवकूफ़ संघ वालिओ तुसीं किथे हो? … तुहानूं दिस्सदा नहीं इह सारे बंदे पुलिस दे करमचारी हन जां भाड़े ’ते ख़रीदे टट्टू … तुहाडी अकल किथे गई? … इह पुलिस दी सानूं आपस विच्च टकराउण दी साज़िश है … ।”

बाबे दी गहड़क नाल सारा जलूस सहिम गिआ। डांगां अते गंडासे उथे ही रुक गए। कुझ्झ कु मूंह लुकाउण दा यतन करन लग्गे।

बाबा कोठे ’ते चहड़िआ खड़ा सी। पंज-छे हथिआरबंद नौजवान उस दे आले-दुआले खड़े सन। उहनां आपणे निशाने भीड़ दे चुणवें बंदिआं ’ते सिंनहे होए सन।

“किसे नें होर अग्गे वधण दी कोशिश कीती तां ‘कल्ले-’कल्ले नूं भुंन दिआंगे।” बंदूकां ताणी जदों इक्क नौजवान कड़किआ तां तेल वाले हत्थों पीपी छुट्ट गई। अध्धा तेल उस दे कप्पड़िआं ’ते पै गिआ।

जलूस दे साहमणे वाले पासिउं अग्गे वध रहे तरकशीलां दे जलूस दे नाअरे सुणाई देण लग्गे।

इस तों पहिलां कि तरकशील साहमणे आउंदे, भीड़ विचों किसे नें हवाई फ़ाइर कर दित्ता।

कोठे तों वी धड़ा-धड़ हवाई फ़ाइर होण लग्गे।

देखदे-देखदे सारी भीड़ छाईं-माईं हो गई। पिछ्छे किसे दी जुत्ती रहि गई, किसे दी पग्ग अते किसे दा चादरा।

पंज-चार फ़ाइर कर के दोवें धिरां शांत हो गईआं।

इंने ’च ही लाल सिंघ दा मसला हल्ल हो गिआ। उस नें इक्क वार फिर ढेर सारीआं दफ़ावां ला के बाबे अते उस दे समरथकां दे ख़िलाफ़ परचा दरज कीता। नाजाइज़ हथिआर रख्खण दी दफ़ा, दोहां फ़िरकिआं विच्च नफ़रत फैलाउण दी दफ़ा, मुजरमां नूं पनाह अते हल्लाशेरी देण दी दफ़ा, भीड़ ’ते गोली चला के कातलाना हमला करन दी दफ़ा। सरकारी करमचारीआं नूं डिऊटी तों रोकण दी दफ़ा अते सरकार विरुध्ध बग़ावत दी दफ़ा।

इस मुकद्दमे ’ते वी साहिब ख़ुश नहीं सी होइआ। इह तां कोई मनघड़त कहाणी नहीं सी। सारे शहिर नें वाका अख्खीं देखिआ सी। फ़ोटोग्राफ़रां नें फ़ोटोआं लईआं सन अते पत्तरकारां नें रिपोरटां लिखीआं सन। लोक वी बाबे नाल नाराज़ सन। उस नूं निहत्थी भीड़ ’ते गोली नहीं सी चलाउणी चाहीदी।

साहिब नें लाल सिंघ नूं केवल यकीन ही दिवाइआ। अजिहे मुकद्दमे ग्रिफ़तारी दा हुकम दिंदिआं सरकार नूं की इतराज़ हो सकदा सी?

इस वाके नूं वी दूजा दिन सी। बाबे दे समरथकां दा प्रापेगंडा बड़ा तेज़ सी। दो दिनां विच्च ही उहनां लोकां नूं समझा दित्ता कि इस जलूस दा प्रबंध पुलिस नें कीता सी। बंदे वी पुलिस दे सन अते योजना वी। उहनां फ़ोटोआं वड्डीआं करा-करा के लोकां विच्च वंडणीआं शुरू कर दित्तीआं सन, जिनहां विचों पुलिस मुलाज़मां दे चिहरे साफ़ दिखाई दे रहे सन।

संमती नें दरशन अते राम सरूप नूं वी भरमा लिआ। उहनां भरी महिफ़ल विच्च ग़लती मंन लई। इह वी इकबाल कीता कि उहनां इह करतूत पुलिस दे कहिण ’ते कीती सी।

सरकार दी ख़मोशी तों लाल सिंघ नूं लग्गदा सी, जिवें पासा पुठ्ठा पैण वाला सी।

लाल सिंघ नें कंनां नूं हत्थ लाए। खूह ’च पए इहो जिही तफ़तीश। भठ्ठ ’च पए मुख्ख मंतरी दा वाअदा। जदों मुख्ख मंतरी नूं ही कोई फ़िकर नहीं तां पुलिस नूं की?

लोकां विच्च वध रहे रोह नूं देखदिआं लाल सिंघ नें दस दिनां दी छुट्टी भेज दित्ती। भोग पिछ्छों देखी जाएगी।

छुट्टी दी थां जदों बाबे दी ग्रिफ़तारी दी प्रवानगी आई तां लाल सिंघ दी जान विच्च जान आई।

मुख्ख मंतरी वल्लों लाल सिंघ नूं खुल्ल्ही छुट्टी सी। उह बाबे नूं वी ग्रिफ़तार कर सकदा सी अते उस दे समरथकां नूं वी। जे ज़मानत हुंदी दिसे तां राशटरी सुरख्खिआ कानूंन दी वरतों वी कीती जा सकदी सी।

लाल सिंघ ख़ुश सी। हुण उस नूं आपणे जौहर दिखाउण दा मौका मिलिआ सी।

 

 

29

जे बाबे दी ग्रिफ़तारी दे हुकम नां आउंदे तां पाले अते मीते नूं उस शाम रिहाअ कर दित्ता जाणा सी।

उहनां नाल फड़े सारे बंदे घरो-घरी जा चुक्के सन। उहनां नूं थाणे बिठाई रख्खण दे दो ही कारन सन। पहिला इह कि उहनां दा कोई वारिस उहनां नूं छुडाउण नहीं सी आइआ। मीते दा तां कोई है ही नहीं सी। पाले दी मां थाणे बाहर बैठ-बैठ मुड़ गई, उस दी किसे नें सुणी ही नां। दूजा कारन इह सी कि तफ़तीश समें उह नाज़र दी मदद तां करदे ही सन, विहले समें माल-मुकद्दमा तिआर करन विच्च मुनशी दा हत्थ वी वटाउंदे सन।

तफ़तीश लई तां कोई मुसतवा थाणे ’च नहीं सी रिहा, पर मुनशी दा कंम बहुत रहिंदा सी। नवां मुनशी कई दिनां दा आइआ बैठा सी। चारज देण लई पुराणे मुनशी नूं इक्क-इक्क मद्द तिआर करनी पै रही सी।

लाल सिंघ नूं तां उहनां दी कोई ज़रूरत नहीं सी। उहनां दी रिहाई दे अधिकार मुनशी कोल सन। जदों मुनासब समझे, मुनशी उहनां नूं छड्ड देवे।

मुनशी रिहाई नूं टालदा आ रिहा सी। लग्गदा सी जिवें सारा माल-मुकद्दमा ही तिआर करन वाला रहिंदा सी। उह इक्क कंम मुका के हट्टदे तां मुनशी दूजा अग्गे कर दिंदा।

“इहो कंम बाकी रहिंदै। करो ते भज्ज जाओ।”

चाईं-चाईं उह कंम ’च जुट्ट जांदे।

पहिले दिन उहनां सैंकड़े बोतलां अते बीसीआं वड्डीआं केनीआं पाणी नाल भरीआं। उहनां दे मूंह ’ते कप्पड़े बंनह के धागा लपेटिआ गिआ। धागे दीआं गंढां ’ते लाख ला के मोहरां दे निशान लाए। फेर माल नूं किसे मुजरम नाल सबंधत करन लई उस दा नां पता अते मुकद्दमा नंबर लिखिआ गिआ। बोतलां ते केनीआं दे बाहर लिखिआ गिआ ‘नाजाइज़ शराब’।

बोतलां दा कंम मुक्का तां बोरीआं भरन दा कंम शुरू हो गिआ। लक्कड़ दे बूर दा टरक्क आरे तों आइआ। बोरीआं जीवन आहड़तीए नें भेजीआं। बोरीआं विच्च बूर इउं तोल-तोल भरिआ गिआ, जिवें उह बूर नां हो के पिसता होवे। मजाल है अध्ध पा वी घट्ट-वध्ध हो जावे। बोरीआं दे बाहर लिखिआ गिआ ’चूरा पोसत’।

बोरीआं नाल माल-ख़ाना नक्को-नक्क भर गिआ। तिल सुट्टण दी थां वी नां रही। हुण तां मुनशी रिहाअ करेगा ही। इह सोच के उह हड्ड-तोड़वीं मिहनत करदे रहे। दुपहिर नूं थोहड़ा जिहा थकेवां महिसूस होइआ तां मुनशी नें भोरा-भोरा अफ़ीम खुआ दित्ती। मुड़ सारा दिन उह ढग्गे वांग बहड़कां मारदे रहे।

जदों घर जाण दी छुट्टी लैण लई मुनशी दे पेश होए तां पीले जिहे दंदां नूं बाहर कढ्ढ के उह भैड़ी जिही हासी हस्सिआ ।

“किउं घरे जा के तहिसीलदारी करनी ऐ? खाओ पीओ मौज करो।”

इह ठीक सी कि हुण थाणे विच्च उहनां नूं कोई तकलीफ़ नहीं सी। जिहड़ी झाड़-झंब होणी सी, हो चुक्की सी। हुण उह सटाफ़ मैंबरां वांग ही थाणे विच्च विचरदे सन। घुंमण-फिरन ’ते कोई पाबंदी नहीं सी। खाण-पीण दी खुल्ल्ह सी। मैस ’च जा के जिस मरज़ी चीज़ नूं मूंह मार लैण, कोई नहीं सी टोकदा।

रात नूं उहनां दी डिऊटी कुआरटरां विच्च हुंदी। उह थाणेदारां नूं विसकी वरताउंदे। बची-खुची आप पींदे।

इंनीआं मौजां बाहर नहीं सन। फेर वी पिंजरे ’च ताड़े पंछी वांग थाणे दी घुटण उहनां नूं चुभदी रहिंदी सी। उह आपणीआं झौंपड़ीआं विच्च जाण लई काहले सन।

बस्स मुनशी दा इक्क कंम होर रहिंदा सी। रातो-रात अफ़ीम तिआर कर के डब्बे भरने सन। कल्ल्ह तां मुनशी नें वी चारज छड्ड देणा सी। उह दब्ब के मिहनत करन अते सवेर हुंदिआं ही घर दा रसता फड़न।

उहनां दे चिहरिआं ’ते थकेवें अते निराशा दे चिंनह पहड़ के मुनशी नें इक्क वार फेर रहिम कीता। दो पुड़ीआं अफ़ीम दीआं उहनां दे हवाले कीतीआं। तकड़ी जिही चाह बणा के छक आउण। नां थकेवां होएगा, नां घर दी याद सताएगी।

अफ़ीम दा कंम मुक्किआ तां चाकूआं, पसतौलां दा ढेर लग्ग गिआ। हर इक्क ’ते परची चिपकाओ। झाड़-झंब के ख़ानिआं ’च सजाओ … ।

मुनशी नें खहिड़ा छड्डिआ तां थाणेदारां नें घेर लए। किसे दे बूट पालिश करन वाले रहिंदे सन अते किसे दे कप्पड़े मैले सन।

पाले अते मीते नूं कप्पड़े धोंदे देख के सिपाहीआं नें वी आपणे कछ्छे-बुनैणां उहनां अग्गे लिआ सुट्टे।

सरकारी वकील गुरमीत दे थाणे आउण तक उह इस चुरासी दे चक्कर ’चों निकलण दीआं सारीआं आसां छड्ड चुक्के सन। सवेर तों उहनां घर जाण दी गल्ल ही नहीं सी छेड़ी। उहनां नूं महिसूस होइआ सी, जिवें पुलिस वाले उहनां दी मजबूरी दा नाजाइज़ फ़ाइदा उठा रहे सन। जिउं ही उह घर जाण दी मंग लै के उहनां अग्गे पेश हुंदे, उह कोई नां कोई कंम उहनां हवाले कर दिंदे। उह फटा-फट कंम नबेड़दे। इक्क निबड़दा तां दूजा तिआर हो जांदा। कोई मुफ़त दे नौकरां नूं हत्थों गवाउणा नहीं सी चाहुंदा।

चाहां वाले ख़ाली गलास चुक्कदे मीते नूं गुरमीत नें पछाण लिआ।

उह इथे किवें? मीते नूं तां कदों दा उह इस चक्करविऊ विचों कढवा चुक्का सी।

मीते नूं इंने दिन थाणे बिठाई रख्खण दा मुनशी कोल कोई जवाब नहीं सी।

वापस जांदे गुरमीत नें मुनशी नूं हुकम दित्ता, शाम तक दोहां नूं हर हालत विच्च छड्ड दित्ता जाए।

शाम होई तां पुलिस बाबे दी ग्रिफ़तारी विच्च उलझ गई।

बाबे दी ग्रिफ़तारी नाल इक्क वार फेर थाणे विच्च गहिमा-गहिमी हो गई।

बाबे तों पुछ्छ-गिछ्छ तां बहुत होई पर उस नें कोई राह नां दित्ता। उस नूं थाणे विच्च रख्खणा ख़तरे तों ख़ाली नहीं सी। इस लई रातो-रात उस नूं जेल्ह भेज दित्ता गिआ।

पुलिस कोल समां घट्ट सी। उह शक्की बंदिआं नूं जलदी तों जलदी ग्रिफ़तार करना चाहुंदे सन।

सारी रात योजनावां बणदीआं अते फड़-फड़ाई हुंदी रही।

लाल सिंघ दा विचार सी कि दहिशतगरदी विच्च दो तरहां दे लोक हिस्सा लै रहे सन। ज़िआदा गिणती पेशेवर मुजरमां दी सी। उहनां साधारन पेशे छड्ड के इह धंदा अपणा लिआ सी। पैसा सौखी तरहां बण रिहा सी, सिआसी शरन सी अते कुझ्झ लोकां दी हमदरदी वी। भाईचारे दा खेतर विशाल हो गिआ सी। हथिआर वी आसानी नाल मिल रहे सन। डरदी पुलिस जलदी-जलदी हत्थ वी नहीं सी पाउंदी। लोकां विच्च दहिशत सी। सभ कुझ्झ जाणदे-बुझदे वी उह मुख़बरी नहीं सी करदे। इस तरहां दे दहिशतगरदां नूं पुलिस पहिले दौर विच्च फैंटा चाहड़ चुक्की सी।

दूजा इक्क अजिहा गरुप्प उहनां विच्च शामल सी, जिनहां नूं पैसे दी थां चौधर दी ज़िआदा भुख्ख सी। ज़िमींदारां अते सरदारां दे काके इसे गरुप्प विच्च आउंदे सन।

पहिले तबके तों तां कुझ्झ हासल नहीं सी होइआ। इस समें पुलिस दी अख्ख दूजे तबके ’ते सी।

बाबे नूं जेल्ह भेज के जिथे पुलिस दे हौसले बुलंद होए सन, उथे पुलिस दा विरोध करन वालिआं नूं भाजड़ां पै गईआं सन। इस दा सभ तों वड्डा सबूत कालज दा प्रिंसीपल सी। पुलिस नूं शक्क सी, दहिशतगरदां दा वड्डा अड्डा कालज सी। होसटलां विच्च दहिशतगरदां दे लुके रहिण दी संभावना नूं रद्द नहीं सी कीता जा सकदा। प्रिंसीपल पैरां ’ते पाणी नहीं सी पैण दिंदा। पुलिस नूं कालज ’च दाख़ल होण दी इजाज़त नहीं सी दे रिहा। उस नूं मुख्ख मंतरी दा जमाती होण दा हंकार सी। उस वरगे अड़ीअल टट्टूआं दा हंकार दूर करन लई पुलिस नें मुख्ख मंतरी दे उस हुकम दा दब्ब के प्रचार कीता सी, जिस विच्च उहनां आखिआ सी, इस गंभीर मसले विच्च जे उस दा कोई ख़ास हमाइती वी टंग अड़ावे तां उस नूं वी नां बख़शिआ जावे। बाबे नूं उह सबक सिखा चुक्के सन। हुण वारी प्रिंसीपल दी सी।

कालज ’च मुंडिआं वल्लों कीतीआं जांदीआं सरगरमीआं दी पुलिस कोल कोई ठोस रिपोरट नहीं सी। बस्स एना कु पता सी कि कालज विच्च कई यूनीअनां बणीआं होईआं सन। कांगरस पख्खी वी, भारती जनता पारटी पख्खी वी अते अकाली पख्खी वी, पर इह फ़सली बटेरिआं वांग ख़ास-ख़ास मौकिआं ’ते ही दिखाई दिंदीआं सन। अख़बारां ’च ख़बरां छपवा के जां किसे नेता नूं ख़ुश कर के ख़ामोश हो जांदीआं सन।

मुख्ख जथेबंदीआं दो ही सन। इक्क खाड़कू जथेबंदी अखवाउंदी सी। इह उहनां योधिआं दी समरथक सी, जिहड़े सिख्ख कौम दी आज़ादी लई जूझ रहे सन। इह खाड़कूआं वल्लों दित्ते जांदे हर प्रोगराम ’ते अमल करदी सी।

दूजी पंजाब सटूडैंटस यूनीअन सी। उह मारकसी विचारधारा विच्च विशवास रख्खदी सी। खाड़कू जथेबंदी नूं उह फ़िरकू दस्सदे सन अते उहनां दे हर धरम प्रचार दे प्रोगराम नूं तारपीडो करन दे यतन करदे सन। उह आपणी सेध बाबे तों लैंदे सन।

दोहां जथेबंदीआं दा कई वार टकरा हो चुक्का सी। इस वार गोली वी चल्ली सी। कई मुकद्दमे पुलिस कोल दरज सन। दोहां धिरां दा इट्ट-कुत्ते वाला वैर सी।

पुलिस कोल उहनां मुंडिआं दी सूची वी सी, जिहड़े पुलिस नूं इहनां केसां विच्च लोड़ींदे सन। प्रिंसीपल होर सूचना देण नूं तिआर नहीं सी।

किहड़ा मुंडा किस जथेबंदी विच्च शामल सी, किंना कु ख़तरनाक सी अते किहड़ीआं-किहड़ीआं वारदातां कर चुक्का सी, हैड्ड कलरक कोल इस दी पूरी सूची सी।

इसे इतलाह दे आधार ’ते पुलिस ग्रिफ़तारी कर रही सी।

बंटी दे कतल वरगीआं कारवाईआं नाल पंजाब सटूडैंटस यूनीअन दा कोई संबंध नहीं सी। फेर वी पुलिस लई उहनां दी ग्रिफ़तारी बहुत ज़रूरी सी। उह बाहर रहि गए तां बाबे दी रिहाई लई जह्हाद खड़ा कर सकदे सन। पुलिस नूं तां तरकशीलां, *तीकारी फ़रंट दे कारकुनां अते नौजवान सभा दे नेतावां दी वी भाल सी। उह लोक संघरश संमती दा नां निशान ही मिटा देणा चाहुंदे सन।

खाड़कूआं दी ग्रिफ़तारी उस तों वी अहिम सी। दो दिनां दे थोहड़े जिहे समें विच्च कातलां दा ग्रिफ़तार होणा ज़रूरी सी। मुख्ख मंतरी ग्रिफ़तारी लई काहल कर रिहा सी।

दोहां जथेबंदीआं दे प्रमुख्ख नेता पहिलां ही फ़रार हो चुक्के सन।

दूजे दरजे दे कारकुनां तों ही पुलिस नूं कंम चलाउणा पै रिहा सी।

पोज़ीशन पहिलां वाली ही सी। फ़ोरस घट्ट अते बंदे ज़िआदा।

अजिहे हालात विच्च पाले अते मीते दी रिहाई दा सवाल ही पैदा नहीं सी हुंदा। उह इक्क आम सिपाही जिंना कंम दे रहे सन।

नाज़र दी सिफ़ारश ’ते लाल सिंघ नें दोहां दी रिहाई ’ते पाबंदी ला दित्ती सी। इक्क-दो दिनां दा मसला सी। कातलां दी ग्रिफ़तारी पिछ्छों पुलिस नें उहनां तों की कराउणा सी?

वैसे वी थाणे विच्च रौणक नूं देख के उहनां दोहां दा मन लग्ग गिआ सी। हुण उह पहिलां वांग विहले नहीं सन।

 

 

30

ऐस.ऐच.ओ.नें बुढ्ढे बलवंत सिपाही दी सिआणप नूं मानता दे दित्ती। सच्चमुच्च उस तों वध्ध काबल सिपाही कोई सारे ज़िल्हे विच्च नहीं सी। इह गल्ल पक्की सी कि नां उस तों वध्ध कोई मुख़बरी हासल कर सकदा सी अते नां ही उस तों वध्ध कोई पैसे बटोर सकदा सी।

लाल सिंघ नें जे भोग तों पहिलां कातल लभ्भणे हन तां उस नूं बलवंत दी सहाइता लैणी ही पैणी सी। इस लई उस नें बलवंत नूं पुचकार लिआ सी अते आपणे सभ तों नेड़ले बंदिआं दा ख़िताब बख़श दित्ता सी।

बलवंत दी मरज़ी अनुसार पुछ्छ-गिछ्छ लई उस नूं सरदारां अते सेठां दे दस-बारां मुंडिआं दी उह टोली मिली सी, जिनहां दा किसे धड़े नाल कोई वासता नहीं सी। उहनां दा इको-इक्क कंम कंटीन विच्च बैठ के काफ़ी पीणा अते कुड़ीआं छेड़ना सी।

अजिहे मुंडिआं नूं दो कारनां करके फड़िआ गिआ सी। पहिला । उहनां दे मापिआं तों पैसे इकठ्ठे करना। दूजा। पुलिस नूं निरपख्ख साबत करन लई उहनां नूं कुझ्झ ही घंटिआं बाअद छड्ड दित्ता जाणा सी। उह वी प्रैस रिपोरटरां दी हाज़री विच्च।

मुंडिआं दे सोहल सरीरां अते मापिआं दे रुतबिआं नूं धिआन विच्च रख्खदिआं बलवंत नें तफ़तीश दे हलके-फुलके तरीके ही वरतणे शुरू कीते सन।

भलेमाणस बलवंत नें पहिलां उहनां नूं इक्क लाईन विच्च बिठा के ‘सच्च बोलण’ दा मौका दित्ता। जे उह सही-सही गल्ल दस्स देण तां बलवंत कुझ्झ नहीं आखेगा। सरकार वल्लों मिलण वाला सारा इनाम वी मुख़बर नूं मिलेगा अते थाणेदारी वी।

जदों सारिआं नें ही सिर फेर दित्ते तां बलवंत नूं ग़ुस्सा चहड़न लग्गा।

“नहीं पता तां कोई नहीं। देखदे जाओ किवें याद आउणगे बापां दे नां फटाफट हरामज़ादिओ जे थोडी रेल गड्डी नां बणा दित्ती तां मेरा नां वी बलवंत नहीं।”

आखदे बलवंत नें पहिलां बाणीआं दे यश नूं बोदीआं तों फड़ के बाहर धूहिआ।

“उह दो दिन थोडे कारख़ाने विच्च रहे … तूं रोटी टुक्क पहुंचांदा रिहा … हुण आखदै कुझ्झ नी पता … दस्स किथे छड्ड के आइऐ आपणे बापां नूं?” बिनां जवाब उडीके बलवंत नें अठ्ठ-दस थप्पड़ उस दीआं गल्ल्हां ’ते जड़ दित्ते।

यश दीआं लत्तां कंबण लग्गीआं। चीकां मारदा जदों उह बलवंत दे पैरीं पैण लग्गदा तां बलवंत मुड़ बोदीआं तों फड़ के उस नूं उपर नूं धूह लैंदा। धौल-धफ्फा करदा मुड़ उहो प्रशन दुहराउंदा।

“देवी दी सहुं मैनूं कुझ्झ नहीं पता … ।” भुब्बां मार-मार सपश्शटीकरन दिंदे यश दा गला बैठ गिआ। गल्ल्हां लाल हो गईआं, कंन सुज्ज गए। पिशाब निकलण कारन पैंट गिल्ली हो गई। टट्टी दी हाज़त होण लग्गी।

होर पए दो थप्पड़ां नें उस दा सिर चकरा दित्ता। सिर नूं चहड़दीआं घुंमण-घेरीआं यश नूं धरती ’ते डिग्गण लई मजबूर करन लग्गीआं।

यश दी पैंट लुहा के मीते नूं फड़ाई गई। उह पैंट दीआं मूरीआं नूं आपस विच्च बंनह के पहिलां इस दा हार बणाए अते फेर उस विच्च रेत भर लए। उह हार यश दे गल विच्च पा के डंड कढाएगा। जिंनी देर ’च हार तिआर हुंदा है, ओनी देर ’च पाला उस नूं टट्टीआं ’च लिजा के हाजत मिटा लिआए।

यश तों विहला हो के बलवंत जीती अते नीनू वल्ल होइआ।

उहनां दा रंग तां पहिलां ही पीला भूक होइआ होइआ सी। बलवंत दे नेड़े पुज्जदिआं ही उहनां नूं पसीने छुट्ट पए।

उहनां दीआं पैंटां लुहा के खुल्ल्हे-खुल्ल्हे पजामे पाए गए। पजामिआं विच्च चूहे छड्डे गए। चूहिआं दीआं नहुंदरां अते दंदीआं उहनां नूं हालों-बेहाल करन लग्गीआं। इक्क-दो वार उहनां चूहे काबू करन दी कोशिश कीती तां बलवंत दे डंडिआं नें उंगलां सुजा दित्तीआं।

यश वांग उह वी चीक-चिहाड़ा पाउण लग्गे।

सेठां दे मुंडिआं दीआं पईआं पदीड़ां देख-देख पाला अते मीता मुसकड़ीए हस्स रहे सन। नौकरां नूं गाल्हां कढ्ढ के बुलाउण वाले अते शुगल-शुगल विच्च ही ठुड्डे मार देण वाले नवाबां नूं हुण पता लग्गा होणा है कि ठुड्डा किवें धुर अंदर तक मार करदा है? उह मुंडिआं दा तमाशा बड़े सुआद नाल देख रहे सन।

जीती अते नीनू नूं कुझ्झ देर सुसताउण दा वकत दे के बलवंत थर-थर कंबदी बाकी ढाणी वल्ल होइआ।

मुंडिआं नूं आपणी-आपणी थां मूधे पैण दी हदाइत होई। पहिलां पोले-पोले चित्तड़ां ’ते चार-चार छित्तरां दा प्रशाद वरताइआ गिआ। फेर उहनां नूं पुठ्ठिओं-सिध्धे अते सिध्धिओं-पुठ्ठे हो के लोटनीआं खाण दा हुकम होइआ। इस तरहां लिटदे-लिटदे उहनां विहड़े दे इक्क खूंजे तों दूजे खूंजे तक जाणा सी। फेर उधरों पहिले खूंजे वल्ल आउणा सी।

महिंगे-महिंगे कप्पड़े अते बणा-संवार के रख्खे पटे मिंटां विच्च मिट्टी ’च मिट्टी वरगे हो गए। गोडिआं अते कूहणीआं ’चों ख़ून सिंमण लग्गा। मिट्टी नाल मूंह भर जाण कारन कईआं नूं उथू छिड़ पए।

रफ़तार मठ्ठी करन वालिआं लई बलवंत दा डंडा हाज़र सी। जिउं ही डंडा गिट्टिआं ’ते वज्जदा, झट्ट उहनां दी रफ़तार तेज़ हो जांदी।

उहनां विचों कोई-कोई बेहोश होण लग्गा।

उंज तां उहनां दी सुरत टिकाणे लिआ के बलवंत दी तफ़तीश मुकंमल हो चुक्की सी। फेर वी मुंडिआं नूं मानसक तणाओ विच्च रख्खण लई उहनां नूं कप्पड़े झाड़ के दुबारा तिआर रहिण दा हुकम होइआ।

बलवंत दा अगला कंम मुंडिआं दे सिफ़ारशीआं नूं मिलणा सी। संतरी दस्स रिहा सी कि पहिलवान दे ढाबे तों लै के पांधे अरज़ी नवीस तक सभ दुकानां सिफ़ारशीआं नाल भरीआं पईआं सन। उह जाए अते उहनां नाल संपरक काइम करे।

थाणिउं बाहर जांदा बलवंत मुंडिआं नूं इक्क वार फेर ताड़न लग्गा।

“तुसीं दम मार लओ। कातलां बारे सोच लओ। कुझ्झ दस्सणा होवे तां दस्स देणा। नहीं अगले दौर दी तफ़तीश लई तिआर रहिणा।”

अगला दौर की होवेगा, इस दी झलक उहनां नूं नाज़र कोलों मिल सकदी सी, जिहड़ा खाड़कूआं नाल नजिठ्ठ रिहा सी।

खाड़कूआं विचों नाज़र नूं केवल उही गरुप्प दित्ता गिआ सी, जिहड़े जथेबंदी दे अहुदेदार सन जां फेर आपणे आप नूं कारवाईआं लई सही ठहिरा रहे सन।

उह सारे मुंडे जिहड़े पुलिस दे पहिले दबके नाल ही आपणा संतुलन गवा बैठे सन अते जथेबंदी विच्च शामल होण दे आपणे उदेश नूं फटा-फट दस्स चुक्के सन, उहनां नूं इक्क पासे कर लिआ गिआ सी।

पास कीते गए मुंडिआं विचों इक्क नें दस्सिआ कि उस दा कप्पड़े वाले भापे दी कुड़ी नाल इसक सी। बलबीरो परीआं वरगी कुड़ी सी। हत्थ लाइआं मैली हुंदी सी। बलबीरो नूं हीरो मारका मुंडे पसंद सन। मुंडा कोई होर मारका मारन दे तां काबल नहीं सी, उह जथेबंदी विच्च शामल हो गिआ। बलबीरो नूं दिखाउण लई उह जथेबंदी दे उहनां सारे कंमां विच्च वध-चहड़ के हिस्सा लैंदा सी, जिथे बलबीरो हाज़र हुंदी सी। जथेबंदी दे गुपत प्रोगरामां विच्च उस नें कदे हिस्सा नहीं लिआ। जदों दी बलबीरो बी.ए.कर के यूनीवरसिटी चली गई सी, उस नें वी जथेबंदी छड्ड दित्ती सी।

दूजे दे हिसाब दे लैकचर घट्ट सन। हिसाब वाला प्रोफ़ैसर किसे तरहां वी हाज़रीआं पूरीआं करन नूं तिआर नहीं सी। किधरे इमतिहान विच्च ही बैठण तों नां रहि जाए, इस लई उह जथेबंदी विच्च शामल हो गिआ। डरदे प्रोफ़ैसर नें लैकचर पूरे कर दित्ते। हुण उह जथेबंदी नूं भुला के पहड़ाई विच्च मसरूफ़ सी। उह साइंस दा विदिआरथी सी। पहिलां ही बथेरा नुकसान हो गिआ सी।

नाज़र हवाले होए मुंडे कुझ्झ वी दस्सण नूं तिआर नहीं सन। उह अडोल अते शांत-चित्त खड़े सन।

नाज़र दी डिऊटी उहनां दे मूंह खुल्हाउण दी सी।

“मैं चाहुंदा सां कि तुसीं बिनां नाज़र दे हत्थ देखे ही सभ कुझ्झ बक देवो। मैं हिसाब दा प्रोफ़ैसर तां हां नहीं बई सोथों डर जाऊंगा। मैं तां थोडे अंदरले भूत बुला के ही छड्डूं।”

सोचण दा कुझ्झ वकत दे के नाज़ुर कुआरटर चला गिआ। ख़तरनाक जथेबंदी दे कारकुनां दी तफ़तीश लई हौसले दी ज़रूरत सी। हौसले लई विसकी दा सहारा लैणा पैणा सी। उस नें दो वड्डे सारे पैग्ग अंदर सुट्टे अते नमकीन पकौड़ीआं चबाउंदा उहनीं पैरीं वापस मुड़ आइआ।

“लै बई प्रधान, पहिलां फेर तूं ही तिआर हो।” डंडे दे इशारे नाल उस नें इक्क सोहणे-सुनख्खे अते सरू दे कद्द वरगे उच्चे-लंबे मुंडे नूं अग्गे बुलाइआ।

मुंडा बिनां झिजक नाज़र वल्ल वधिआ।

“कप्पड़े लाह ते कंबल वल्ल हो … ।”

“तूं मीतिआ, उह किल्लोमीटर लिआ …”  रुक-रुक के नाज़र नें दोहां नूं हुकम सुणाए।

मुंडा कप्पड़े लाहुण नूं तिआर नहीं सी। मीता किल्लोमीटर नां दा इक्क फट्टा चुक्क लिआइआ सी। पाले नें कंबल विछा दित्ता सी। दो-तिंन सिपाही कंबल दुआले आ खड़ोते सन।

“अंडर-वीअर अते बनैण वी लाह दे …”  नाज़र दे इस हुकम दी प्रधान नें कोई प्रवाह नां कीती।

प्रधान दा शरमाकल सुभाअ सारे कालज विच्च मशहूर सी। पंजां भैणां दे इको-इक्क भरा विच्च बहुतीआं आदतां कुड़ीआं वालीआं ही सन। कदे पिंजणी वी नंगी हो जावे तां उह पाणी-पाणी हो जांदा। आपणे जमातीआं साहमणे अलफ़-नंगा होण नालों उस लई मरना चंगा सी।

“असीं फेर दूजे लोट वी लाह दिआंगे … ।” आपणे हत्थ ’च फड़े डंडे नूं प्रधान दे अंडर-वीअर विच्च अड़ाउंदे नाज़र नें सख़ती वरतणी शुरू कीती। विसकी आपणा रंग दिखाउण लग्गी सी। उस दे हौसले बुलंद सन।

“जिहड़ी-जिहड़ी कारवाई साडी जथेबंदी नें कीती है, उह सारी मैं दस्स चुक्का हां। साडा बंटी दे कतल नाल कोई संबंध नहीं। नां ही कोई सच्चा सिख्ख मासूमां दा कतल कर सकदै … । इह किसे मुजरम दा कंम है … ।” आपणे पहिले बिआन नूं प्रधान नें फेर दुहराइआ।

उह पहिलां ही दस्स चुक्का सी कि उहनां दी जथेबंदी नें सिगरटां दीआं दुकानां बंद करवाउण, मीट वालिआं नूं कित्ता बदलण अते शराब दे ठेकेदारां नूं शराब वेचणों हटण दीआं धमकीआं ज़रूर दित्तीआं हन। उह बरात दी गिणती दसां बंदिआं तों वधाउण दे हक्क विच्च ही नहीं सन।

जिहड़े दुकानदारां नें उहनां दी धमकी दी परवाह नहीं कीती, उहनां नूं जथेबंदी नें ज़रूर सोधिआ सी। ठेके लुट्टे सन, खोखे साड़े सन अते सिगरटां वालिआं नूं शहिरों भजाइआ सी। इक्क-दो बरातां नूं बरंग भिजवाइआ सी।

खाड़कूआं दी होर किसे योजनां ’ते उहनां नें धिआन नहीं सी दित्ता। नां किसे तों फरौती मंगी सी, नां किसे नूं इस लई तंग कीता सी कि उह किसे इक्क ख़ास तबके नाल संबंध रख्खदा सी।

इसे लई शहिर विच्च अमन सी।

इस बिआन ’ते नां ऐस.ऐच.ओ.दी तसल्ली होई, नां नाज़र दी होई। उहनां नूं इको तसल्ली सी कि मुंडे इकबाल करन लग्गे सन। थोहड़ी जिही सख़ती नाल बंटी दा कतल वी निकल आउणा सी।

‘किल्लोमीटर’ लाउण दीआं सारीआं तिआरीआं मुकंमल सन। इह देख के नाज़र नें पाले नूं प्रधान दा अंडर-वीअर लाहुण दा हुकम दित्ता।

जिउं ही अग्गे वध के पाला प्रधान दे अंडर-वीअर नूं हत्थ पाउण लग्गा, इक्क करारा जिहा थप्पड़ उस दी सज्जी गल्ल्ह ’ते पिआ

टीं-टीं करदे कंन नाल पाला पिछांह हट गिआ।

नाज़र नूं लग्गा जिवें इह थप्पड़ पाले दे नहीं, उस दी आपणी गल्ल्ह ’ते पिआ सी। कोई साधारन मुजरम हुंदा तां नाज़र नें हुण ताईं उस नूं बोक वांग ढाहिआ हुंदा। खाड़कू जथेबंदी दे प्रधान नाल वाह पैण करके उस नूं ग़ुस्सा पीणा पिआ।

“नहीं लाहुंदा नां सही।” मन नाल समझौता कर के नाज़र नें प्रधान नूं कंबल ’ते बैठ के टंगां सिधीआं करन दा हुकम दित्ता।

प्रधान हर तरहां दे तसीहे सहिण लई तिआर सी।

आम तौर ’ते किल्लोमीटर लाउण लग्गिआं केस खुल्हा लए जांदे हन। जूड़ा खोल के केसां नूं इक्क सिपाही आपणे हत्थां विच्च फड़ लैंदा है तां जो तकलीफ़ होण ’ते छटपटाउंदे बंदे नूं काबू रख्खिआ जा सके। अंडर-वीअर दे तजरबे तों घबराए नाज़र दी हिंमत नहीं सी पई कि उह प्रधान दे केसां नूं हत्थ ला जाए। उह प्रधान दी पग्ग लुहाउण तों वी झिजकिआ।

प्रधान दे हत्थां नूं ढूही ’ते लिजा के बंनह दित्ता गिआ। गुट्टां ’ते बंनहे परने नूं इक्क सिपाही नें चंगी तरहां फड़ लिआ।

किल्लोमीटर प्रधान दे पट्टां ’ते रख्खिआ गिआ।

फट्टे दे दोहां सिरिआं ’ते पहिलां दो मोटे सिपाहीआं नें चहड़ना सी। जे बहुता नहीं तां उहनां दा भार कुइंटल-कुइंटल ज़रूर होएगा। जिवें उहनां नूं इसे कंम लई पालिआ गिआ सी।

प्रधान दे खब्बे-सज्जे खड़े सिपाहीआं नें पहिलां इक्क-इक्क पैर फट्टे ’ते धरिआ। इक्क-इक्क दो-दो जंप मार के उह इकदम फट्टे ’ते चहड़ गए।

दरद नां सहारदे होए प्रधान दीआं सारीआं नसां कस्सीआं गईआं। सारा सरीर सूहा हो गिआ। अख्खां विच्च पाणी सिंम पिआ। दिल दी धड़कण साफ़ सुणाई देण लग्गी।

प्रधान दा पूरा ज़ोर लग्गा होइआ सी कि मूंह विचों कोई चीक नां निकल सके। उह दंदां हेठ जीभ लई पाठ करदा रिहा। उह काफ़ी हद्द तक कामयाब सी। फेर वी कदे-कदे कराहुण दी आवाज़ निकल ही जांदी।

“कुझ बकदैं … जां होर नज़ारा देखणै …”  प्रधान नूं केसां दी थां गले तों फड़ के नाज़र नें आपणा प्रशन दुहराइआ।

“जो सी दस्स दित्ता … होर कुझ्झ नहीं पता …”

“चलो बई तुसीं वी …”  पाले अते मीते नूं बाहों फड़-फड़ फट्टे ’ते चहड़ाउंदे नाज़र नें सख़ती वधाई।

फट्टे हेठ किड़-किड़ होण लग्गी। मीते नूं लग्गा, प्रधान दीआं हड्डीआं टुट्ट रहीआं सन। उह डरदा हेठां उतर गिआ। पिछ्छे ही सिपाही वी उतर गए। प्रधान बेहोश होण वाला ही सी।

मुड़ उहो कारवाई दुहराई गई। पट्टां ’ते तेल दीआं मालिशां, दुध्ध दा गलास अते सिपाहीआं दे मोढिआं दे सहारे थाणे दे चक्कर।

दूजे कारकुनां ’ते होए तशद्दद वी विअरथ गए।

हंभ के नाज़र बैठ गिआ। उस नूं घबराहट होण लग्गी। लग्गदा सी बलड्ड प्रैशर ज़िआदा ही हाई हो गिआ सी। कहाणी तां अग्गे तुर ही नहीं सी रही। कुझ्झ घड़ीआं सुसताउण लई उह आपणे कुआरटर चलिआ गिआ।

प्रगतीवादीआं दुआले लाल सिंघ ख़ुद होइआ होइआ सी।

उह मुंडिआं नूं अजिहा सबक सिखाउणा चाहुंदा सी कि मुंडे तां वी, उहनां दीआं आउण वालीआं नसलां वी पुलिस नाल पंगा लैण दी जुरअत नां करन।

इस जथेबंदी दे अठ्ठ मुंडे पुलिस दे हत्थ आए सन। नां पता पुछ्छण ’ते पता लग्गा, कोई सांसीआं दा मुंडा सी, कोई मिसतरीआं दा, कोई पंडतां दा अते कोई सिख्खां दा। लाल सिंघ नूं यकीन नहीं सी आइआ। देखण नूं सभ इको जिहे लग्गदे सन। सभ दे केस कट्टे होए अते दाहड़ी थोहड़ी-थोहड़ी वधाई होई सी। केस दाहड़ी दा सटाईल उहनां बंदिआं नाल हू-ब-हू मिलदा सी, जिहड़े उस दिन बाबे दुआले बंदूकां ताणी खड़े सन। फ़रक सी तां केवल उमर विच्च। इह अल्ल्हड़ सन, पर उह पक्की उमर दे सन।

लाल सिंघ नूं गोली चलाउण वालिआं ’ते बहुत ग़ुस्सा सी, पर उह सन कौण, इस दा थहु पता नहीं सी लग्ग रिहा। नां बाबे नें ज़ुबान खोल्ही सी, नां इहनां मुंडिआं नें कोई राह दित्ता सी। इक्क वार उह मिल जांदे तां लाल सिंघ मार-मार के उहनां नूं नहिरां ’च किहड़ा नां सुट्ट आउंदा। उहनां नें पुलिस दी सारी योजना मिट्टी विच्च मिला दित्ती सी। मुड़ बाबा हीरो बणदा जा रिहा सी।

लाल सिंघ नूं बंटी दे कातलां संबंधी तां इहनां तों पुछ्छ-गिछ्छ करन दी कोई ज़रूरत नहीं सी। उह बाबे दे समरथकां दे नां पते पुछ्छण अते पुलिस दा विरोध करन दा सुआद ही उहनां नूं चखाउणा चाहुंदा सी।

शराफ़त नाल कोई कुझ्झ वी दस्सण नूं तिआर नहीं सी। जिस नूं वी लाल सिंघ नें पुछ्छिआ, उह पारटी दा संविधान सुणाउण लग्गा।

उहनां दी जथेबंदी जात दे आधार ’ते नहीं, समाज दे आधार ’ते समाज नूं दो हिस्सिआं विच्च वंडदी है। उह उपरली जमात वल्लों हेठली जमात दी लुट्ट दे ख़िलाफ़ सन। उह मिहनतकशां नूं आपणा हक्क दिवाउण लई जूझ रहे सन। इस लकश दी प्रापती लई उह लोक-पख्खी साहित दा प्रचार करदे सन। उहनां आपणे दफ़तर विच्च इक्क छोटी जिही लाइबरेरी खोल्ही होई है। उथे बलराज साहनी यादगारी प्रकाशन तों इलावा गोरकी अते चैखोव वरगे महान साहितकारां दीआं पुसतकां रख्खीआं होईआं हन। उह लच्चर अते गंदे गीतां दी थां पलस मंच दीआं भरीआं टेपां लोकां ’च वंडदे हन।

उहनां तरकशील सोसाइटी वी बणाई होई है। लोकां नूं टूणे-टामणां अते वहिमां- भरमां तों सुचेत करन लई उह साधां-संतां नूं वंगारदे हन। बहुत लोकां नूं उह सिध्धे राह पा चुक्के हन। दो महीने पहिलां ही उहनां उह टाहलीआं पुट्ट के सुट्टीआं हन,’ जिनहां बारे मशहूर सी कि उथे पंज पीर रहिंदे सन। जिहड़ा वी टाहली नूं पुट्टू, उस नूं उथे ही चित्त कर देणगे। करामात दिखा के कोई वी सोसाइटी तों दस हज़ार हासल कर सकदा है।

उह खाड़कू जथेबंदीआं वांग धरम-प्रचार नहीं करदे। उह तां गुरशरन भाअ दे डरामे करा के लोकां नूं लोक-मुकती दा राह दस्सदे हन।

लाल सिंघ उहनां दीआं सपीचां सुण-सुण अक्क गिआ सी। उस नूं बंटी दे कातलां बारे दस्सिआ जावे जां फेर उहनां बंदिआं बारे जिनहां नें जलूस नूं तितर-बितर करन लई पुलिस अते जलूस ’ते गोली चलाई सी।

तरकशीलां दा प्रधान मेघ राज इस दा उत्तर उसे भाशा विच्च दे रिहा सी। सी.आई.डी.दीआं रिपोरटां देखीआं जाण। उहनां दीआं सारीआं जथेबंदीआं नें कतल दी विरोधता कीती है। खाड़कू जथेबंदी दी हर फ़िरकू मंग दी पंजाब सटूडैंटस यूनीअन नें विरोधता कीता है। वरसदीआं डांगां विच्च उहनां हड़तालां दा बाईकाट कर के कलासां लाईआं हन।

पुलिस किस आधार ’ते इह आख रही है कि बंटी दे कतल नाल उहनां दा कोई संबंध है?

पिआर मुहब्बत नाल इह मंनण वाले नहीं सन। लाल सिंघ नें कदे वी इस दलील विच्च विशवास नहीं सी कीता कि मुजरमां तों सख़ती तों बिनां वी इकबाल कराइआ जा सकदा है। इहनां दा मूंह खुल्हाउण लई डंडा परेड ज़रूरी सी।

इस समें इह गल्ल महत्तवपूरन नहीं सी कि उह सच्चे सन जां झूठे। इस समें इको गल्ल महत्तवपूरन सी। उह सी लाल सिंघ दे सीने अंदर जलदी उस अग्ग नूं शांत करना, जिहड़ी बाबे नें पुलिस दी तौहीन कर के बाली सी। इह तां ही हो सकदा सी, जे बाबे दे हड्ड-गोडे तोड़े जाण।

लाल सिंघ जथेबंदी दे कारकुनां ’ते लग्गे दोश दस्सण लग्गा।

कातलां नें जिहड़े संद हसपताल दी ताकी दे सरीए कट्टण लई वरते सन, उह अजीत सिंघ दी वरकशाप दे सन। पुलिस नूं इह संद हसपताल दे लागले खेतां विचों मिले सन। अजीत सिंघ दे बाप नें उहनां नूं आपणा होणा शनाख़त कर लिआ सी। बुढ्ढा आप तां गिआनी धिआनी बंदा है। रब्ब तों डरन वाला। उस दे बाप दा बिआन है कि उस दा मुंडा रब्ब नूं नहीं मंनदा। उस दे वस्सों बाहर है। इह संद अजीत सिंघ नें वरते सन जां किसे नूं वरतण लई दित्ते सन। अजीत सिंघ दस्से उह संद उथे किवें पुज्जे?

अजीत सिंघ नें जो बोलणा सी, उह बोल चुक्का सी। इहनां झूठे दोशां लई उस कोल कोई सफ़ाई नहीं सी।

लाल सिंघ कोल वी होर कोई रसता नहीं सी। ‘संदां’ दा भेत खोल्हण लई उस नूं अजीत सिंघ दे कुरसी लाउणी ही पैणी सी।

अजीत सिंघ नूं बिनां बाहां वाली कुरसी ’ते बिठाइआ गिआ। अजीत सिंघ दी ढूही नूं कुरसी दी ढोअ नाल ला के बाहां पिछ्छे कराईआं गईआं। दोहां गुट्टां नाल परना बंनहदे सिपाही दे हत्थ कंबण लग्गे। कई वार परना हेठां गिरिआ, कई वार गंढ ढिल्ली पई।

उस नूं पिछांह हटा के दूजे सिपाही नूं अग्गे कीता गिआ। नवें सिपाही नें गंढां नूं मज़बूत कीता। दोहां गुट्टां विचकार रहि गए फ़ासले वाले परने विच्च इक्क रूल पा के हौली-हौली रूल घुमाउण लग्गा। जिउं-जिउं रूल गेड़े खांदा गिआ, तिउं-तिउं परना सुंघड़दा गिआ अते गुट इक्क दूजे दे नेड़े होण लग्गे।

“मैं इक्क वार फेर आखदा हां। साडा बंटी दे कातलां नाल कोई संबंध नहीं। असीं तां इस समुच्ची लड़ाई दे ख़िलाफ़ हां।”

पर अजीत सिंघ दे तरक दा किसे ’ते कोई असर नहीं सी। उस नूं कुरसी लाई ही जाणी सी।

सिपाही डंडा घुमाई जा रिहा सी। अजीत सिंघ दे मौर कुरसी नाल चिपक चुक्के सन। जोड़ां ’ते पैंदी खिच्च कारन मौरां दे कड़ाके पैण लग्गे। लग्गदा सी हड्ड मास नूं चीर के बाहर आ जाणगे।

अजीत सिंघ नें अख्खां मीच लईआं। चिहरे तों वहि तुरे पसीने दी उस नूं कोई परवाह नहीं सी।

जदों अजीत सिंघ कुझ्झ नां बोलिआ तां उस दीआं बाहां ढिल्लीआं कराईआं गईआं। कुझ्झ घड़ी आराम दिवा के उहो कारवाई गिट्टिआं ’ते परना बंनह के चड्डे पाड़न लई दुहराई गई।

अजीत अजित्त रिहा। उस दे होशो-हवास गुंम ज़रूर होए, पर उस नें हज़ार वार आखण ’ते वी लाल सिंघ तों मुआफ़ी नहीं सी मंगी।

तरकशीलां दे प्रधान मेघ राज ’ते इलज़ाम सी कि कुझ्झ देर पहिलां उहनां नें गीता भवन विच्च ठहिरे इक्क जोतशी दे ख़िलाफ़ शहिर विच्च इशतिहार लाए सन। उहनां जोतशी नूं ‘उपाअ’ कर के सटारां दी गती बदलण दी विधी नूं चुणौती दित्ती सी। जोतशी दे नाल-नाल गीता भवन दे प्रबंधकां नूं वी धमकी दित्ती गई सी कि अजिहे पखंडीआं नूं शरन नां देण। गीता भवन दे प्रबंध दा सिध्धा संबंध लाला जी नाल सी। पुलिस नूं पूरा यकीन सी, इह कंम तरकशीलां दा ही सी।

मेघ राज नें कोई दलील नहीं सी दित्ती। उहनां नूं लोक संघरश संमती दा मैंबर होण बदले सज़ा मिलणी ही मिलणी सी। इस लई उह चुप्प कर के अगनी-प्रीखिआ विच्च बैठण लई तिआर सी।

मेघ राज ’ते झुरलू फेरिआ गिआ। मिरचां नाल लिब्बड़ी इक्क डांग उस दे अंदर घसोड़ी गई। अंदर जांदी डांग दा दरद सैंकड़े चाकूआं नाल कट्टे जा रहे मास नालों वी भिआनक सी।

शामू सांसी ’ते दोश सी कि उस दी प्रेरना ’ते बंटी दा कतल सांसीआं दे इक्क टोले नें कीता सी। उहनां सांसीआं दा पता शामू ही दस्स सकदा सी। नाले उह तकले अते खुरपे बरामद कराए, जिहड़े उहनां बाबे दे हक्क विच्च जलूस कढ्ढदिआं हत्थां विच्च फड़े होए सन।

शामू ’ते ग़ुस्सा कढ्ढण लई उस नूं रस्सा लाइआ गिआ।

सारे प्रगतीवादीआं नूं अध्ध-मोइआं कर के ही लाल सिंघ नूं वी रोटी सुआद लग्गी।

 

 

31

जदों वरंट अफ़सर थाणे आइआ, उस समें इकल्ला लाल सिंघ ही हाज़र सी।

घुसमुसा हो चुक्का सी। सारा दिन मार-कुटाई हुंदी रही सी। रात नूं फेर झुट्ट लाई जाणी सी। ताज़ा दम अते इक्क-इक्क पैग्ग ला के रोटी खाण जोगे होण लई सारे हौलदार, सिपाही आपणे-आपणे कुआरटरां नूं चले गए सन।

तरकशीलां अते *तीकारी फ़रंट दे बंदिआं नूं अध्धी रात तों बाअद फड़िआ गिआ सी। होसटल ’ते रेड सवेरे कीता गिआ सी।

लाल सिंघ दे चित्त-चेते वी नहीं सी कि संमती वाले इंनी फुरती नाल हरकत विच्च आ जाणगे। ग्रिफ़तार बंदिआं दी सूची तिआर करनी, चंडीगहड़ पुज्ज के रिट्ट दाइर करनी अते वरंट अफ़सर ताइनात करा के इथे पुज्ज वी जाणा कोई ख़ाला जी दा वाड़ा नहीं सी। इह कंम दो-चार बंदिआं दे वस्स दा नहीं सी। लग्गदा सी, संमती दीआं जहड़ां चंडीगहड़ तक फैलीआं होईआं सन। सारे कंम फ़ोन राहीं होए होणगे।

हाई कोरट दे रेड लाल सिंघ लई कोई नवें नहीं सी। अजिहे वीह रेड उह भुगत चुक्का सी, पर इह कुझ्झ आपणी तरहां दा रेड सी। अग्गे रेड बउरीए कराउंदे जां कोई नामी समग्गलर। रेड करवाउण वालिआं दा इको मकसद हुंदा, आपदा बंदा छुडाउणा। बंदा छुट्टदे ही उह पत्तरा वाच जांदे। किसे नूं इह वी ख़िआल नां रहिंदा कि वरंट अफ़सर नूं चंडीगहड़ वाली बस्स वी चहड़ाउणा है।

बंदा वारिसां दे हवाले कर के वरंट अफ़सर थाणे ही टिक जांदे। चार पैसे लै के उवें रिपोरट कर दिंदे, जिवें थाणेदार आखदा। इह लिखण नाल कि बंदा थाणे हाज़र नहीं सी, थाणेदार हाईकोरट ’च पैण वालीआं पेशीआं तों बच जांदे। दोहां पासिआं तों फ़ीस लै के वरंट अफ़सर वी ख़ुश ते पारटीआं वी।

कोई पारटी बहुत अड़ीअल हुंदी तां वी अफ़सर रोज़नामचा पूरा करन दा वकत दे दिंदे। पुलिस बंदे नूं किसे छोटे-मोटे केस विच्च ग्रिफ़तार दिखा के आपणी जान बचा लैंदी। आपणे रोज़नामचे नाल कंम चला लैंदे।

थाणेदार दे बचाअ दा इंतज़ाम वरंट अफ़सर आप ही करदे। जांदे होए आपणे पते वाला कारड फड़ा जांदे। पुठ्ठी-सिध्धी रिपोरट कर के पहिली पेशी बरी करा दिंदे।

इंनी नौकरी विच्च केवल इक्क अड़ीअल अफ़सर नाल ही वाह पिआ सी। उह आखदा सी, सज़ा करा के छड्डूं। लाल सिंघ नूं तां जदों सज़ा होणी सी, उदों होणी सी। लाल सिंघ नें पहिलां उसे नूं झोटीआं चुंघाईआं।

पहिचाण पत्तर अते वरंट फड़ के दराज़ ’च रख्ख लए। वरंट अफ़सर कोल की सबूत सी कि उह सच्च-मुच्च वरंट अफ़सर सी। इहनां दिनां विच्च दहिशतगरद वीह तरहां दीआं चालां चल्लदे हन। की पतै मुजरमां नूं छुडाउण दी इह कोई नवीं चाल होवे।

जिंनी देर ’च वरंट अफ़सर नें लाल सिंघ नूं यकीन दिवाइआ, उनी देर ’च उस दे चुसत सिपाहीआं नें मुसतविआं नूं कार ’च बिठा के थाणिउं बाहर लिजा सुट्टिआ। मुदई्ई अते वरंट अफ़सर चीकदे ही रहि गए।

इस वरंट अफ़सर अग्गे लाल सिंघ दी कोई पेश नहीं सी जा रही।

लाल सिंघ नें वारंट अफ़सर नूं इक्क पासे लिजा के इकल्ले गल्ल करन दी कई वार कोशिश कीती सी। उस नाल आए बंदे दाल गलण नहीं सी दिंदे। उहनां नाल जिहड़ा इक्क पत्तरकार सी, उह बहुत ही चुसत सी। झट्ट वरंट अफ़सर नूं कोल बिठा लैंदा।

बेवस्स होइआ लाल सिंघ संतरी ’ते खिझ रिहा सी।

रात दा समां सी। अजिहे समें उस नूं की ज़रूरत सी, ओपरे बंदिआं नूं अंदर भेजण दी? अजिहे समें तां थाणे नूं जिंदरा मार के अंदर बैठे रहिण दा सरकारी हुकम है। दहिशतगरद कई वार पुलिस नूं धोखा दे चुक्के हन। उह छोटी-मोटी वारदात करदे हन तां जो पुलिस फटा-फट मौके ’ते पुज्जे। आप रसते विच्च मोरचा ला के बैठ जांदे हन। पुलिस दे कई अफ़सर भंग दे भाड़े जान गवा बैठे सन।

लाल सिंघ नें साफ़ शबदां विच्च हदाइत कीती होई है, कोई वी बंदा अंदर आउणा चाहे तां पहिलां संतरी उस दा पूरा नां पता दरिआफ़त करे। पूरी तसल्ली होण ’ते ही बंदे अंदर भेजे जाण। जे थोहड़ा जिहा वी शक्क पए तां उस नूं सवेरे आउण लई आखिआ जावे।

मौके ’ते फौरी तौर ते पहुंच के पुलिस नें किहड़ा किसे दा फंनह खोह लैणा हुंदा है। पुलिस कोल उस समें इतलाह पुज्जदी है, जदों सारा वाका हो चुक्का हुंदा है। लड़ाई होई होवे तां मुजरम हथिआरां नूं धो-संवार के रिशतेदारीआं नूं तुर चुक्के हुंदे हन। चोरी होई होवे तां चोर माल वेच वट्ट के पैसे डकार चुक्के हुंदे हन। कतल होइआ होवे तां ज़ख़मी रब्ब नूं पिआरा हो चुक्का हुंदा है। पोसट-मारटम ही कराउणा हुंदा है। दो घंटे पहिलां हो गिआ कि पिछ्छों? की फ़रक पैंदा है? कोई शराब कढ्ढदा होवे तां वी की है? सवेरे जा के जदों दो धौण ’च धरीआं, अगला आपे भांडा ठीक अग्गे लिआ रख्खदै।

पर संतरी नें पंजाह दा नोट जेब ’च पैंदिआं ही सारीआं हदाइतां इक्क पासे रख्ख दित्तीआं। उलटा बूथड़ चुक्क के नाल आ गिआ। अखे इह शरीफ़ बंदे हन। इहनां दा सकूटर किसे नें खोह लिआ। रिपोरट लिख लओ।

इह नहीं सी पता कि उह लाल सिंघ दे ख़िलाफ़ ही रिपोरट दरज कराउण आए हन।

लाल सिंघ दा मत्था तां उस समें ही ठणक गिआ सी, जदों उस नें इहनां नूं थाणे अंदर वड़दे देखिआ सी। उहनां विचों बहुतिआं दे हुलीए जाणे-पहिचाणे सन। भावें कुझ्झ नें पग्गां बंनह रख्खीआं सन, पर लाल सिंघ दी याददाशत इंनी कमज़ोर नहीं सी कि उह उहनां नूं पहिचाण नां सके। उह उहो सन, जिहड़े जलूस वाले दिन बाबे दुआले बंदूकां ताणी खड़े सन।

लाल सिंघ दा अंदाज़ा ग़लत नहीं सी। रिपोरट दरज कराउण दी थां जदों वरंट अफ़सर नें आपणा पहिचाण-पत्तर अते सरच वरंट दिखाए तां लाल सिंघ दा सिर चकरा गिआ। उहनां विचों इक्क किसे अंगरेज़ी अख़बार दा पत्तरकार वी सी। बाकीआं नें नाजाइज़ तौर ’ते हिरासत विच्च रख्खे मुंडिआं दी पहिचाण करनी सी।

बचण दा कोई रसता नहीं सी। रोज़नामचा सत्त दिनां तों बंद सी। मुनशी कल्ल्ह दा फरलो ’ते सी। उह हाज़र हुंदा तां शाइद कुझ्झ बण ही जांदा।

पत्तरकार काहला पिआ होइआ सी। समां बहुत हो गिआ सी। उस नें आपणी रिपोरट भेजणी सी। होर लेट हो गई तां अख़बार छप जाणा सी। बेही ख़बर दा उस नूं कोई लाभ नहीं सी होणा।

वरंट अफ़सर रोज़नामचे दे वरके पलटण लग्गा। इह देख के लाल सिंघ नूं नाज़र ’ते ग़ुस्सा चहड़िआ। उस नें नाज़र नूं कई वार समझाइआ सी कि दोवें धिरां ख़तरनाक हन। किसे पुराणे केस विच्च उहनां दी ग्रिफ़तारी पा लई जावे। संमती दे बंदिआं दी ग्रिफ़तारी विच्च तां कोई दिक्कत नहीं सी। लाल सिंघ नें बाबे वाला परचा बड़े ढंग नाल कट्टिआ सी। बाबे तों सिवा किसे दा नां रिपोरट विच्च दरज नहीं सी। इकल्ले हुलीए दित्ते गए सन। संमती दे हर वरकर दा हुलीआ उस हुलीए नाल मिलदा-जुलदा सी। नाज़र बिनां मतलब टलदा रिहा। उस नूं यकीन सी कि मुंडे बाबे दे बाडीगारडां दा नां दस देणगे। उह असली बंदिआं दी ग्रिफ़तारी पाउणा चाहुंदा सी। हुण कर लए घिओ नूं भांडा। आप तां सभ टल गए, फसेगा तां लाल सिंघ। उह ऐस.ऐच.ओ.वी सी अते इस समें थाणे विच्च हाज़र वी।

कोई होर पारटी हुंदी, लाल सिंघ वरंट अफ़सर नूं विच्च पा के समझौता कर लैंदा। इहनां भड़ूआं नें किथे मंनणा सी? उह तां पहिलां ही लाल सिंघ नूं हवालात दिखाउण दीआं धमकीआं दे रहे सन। हिरासत विच्च लए कई मुंडिआं दे सट्टां वी लग्गीआं होईआं सन। उहनां दे मुआइने वी कराउणगे अते हाईकोरट ’च पैरवाई वी करनगे। आम लोकां वांग नां इहनां नूं वकीलां दीआं फ़ीसां दा डर सी, नां पुलिस दा।

लाल सिंघ नूं लग्ग रिहा सी हुण ख़ैर नहीं सी।

बाबे हत्थों इह लाल सिंघ दी तीजी हार सी।

हार के लाल सिंघ नें उहनां मुंडिआं दे नां पुछ्छे, जिनहां दी वरंट अफ़सर नूं ज़रूरत सी।

अठ्ठां मुंडिआं दे नां सुण के लाल सिंघ दा ग़ुस्सा पाग़लपन दी हद्द तक जा पुज्जा। इस दा मतलब सी कोई थाणे विचों ही बाहर इतलाह दे रिहा सी। वरंट विच्च नां किसे दा नां वध्ध सी, नां घट्ट। किसे सिपाही नें जे इहनां नूं मुंडिआं दे नावां दी सूची दित्ती सी तां बाकी गल्लां वी दस्सीआं होणगीआं।

“इहनां विचों इक्क वी मुंडा साडे कोल नहीं है। उह बुलाए ज़रूर सी, पर कदों दे छड्ड दित्ते। आओ हवालात दिखावां।”

“ख़ाली हवालात असीं देख आए हां।” प्रैस रिपोरटर नें आपणी पड़तालीआ सूझ दा सबूत दित्ता।

“फेर तां ठीक है। कोई होर शक्क?” कुझ्झ पलां लई लाल सिंघ दी बेचैनी घटी।

“की तुसीं उह कमरा खोल्ह सकदे हो?” मुनशी दे दफ़तर दे नाल वाले कमरे, जिथे ‘तफ़तीशी कमरा’ लिखिआ होइआ सी, वल्ल इशारा करदे होए प्रैस रिपोरटर नें विअंग-मई बेनती कीती।

“नहीं, उह थाणेदार दा दफ़तर है। उह जिंदा ला के बाहर गिआ होइआ है। मैं उस दी ग़ैर-हाज़री विच्च कमरा नहीं खोल्ह सकदा।” निमरता नाल लाल सिंघ नें मजबूरी दस्सी।

“इह झूठ है। साडे बंदे उसे कमरे विच्च बंद हन। तुसीं आवाज़ मार के देख सकदे हो।” हुण तक ख़ामोश रहे चारां विचों इक्क नें चुप्प तोड़ी।

“मेघ राज पुत्तर रामजी दास, अजीत सिंघ पुत्तर नत्था सिंघ, शामू पुत्तर बूआ जी, बलकार सिंघ पुत्तर दिआ सिंघ, किते होण तां आवाज़ देण … “

वरंट अफ़सर नें आवाज़ तां मारी पर उस विच्च जान नहीं सी।

प्रैस रिपोरटर दी तसल्ली नहीं सी होई। उस नें शनाख़त लई आए बंदिआं नूं उच्ची आवाज़ां मारन लई आखिआ

“नछत्तर, अमरपाल, सुखदेव, किशन … बोलो किथे हो?” चारां दीआं आवाज़ां नाल सारा थाणा गूंजण लग्गा।

वरंट अफ़सर नें दरवाज़े नूं कंन ला के सुणिआ। अंदरों कोई कराह रिहा सी।

मजबूर होए लाल सिंघ नूं कमरा खोल्हणा पिआ। जिनहां नूं संमती दे बंदिआं नें आवाज़ां मारीआं सन, उह चारे इसे कमरे विच्च बंद सन।

बाकी दे चारां बारे नछत्तर नें दस्सिआ। उह लाल सिंघ दे कुआरटर विच्च रख्खे गए हन।

संमती दे सारे कारकुनां नूं रिहाअ करदा लाल सिंघ सारी पुलिस नूं गाल्हां कढ्ढण लग्गा। मुंडिआं नूं तफ़तीशी कमरे विच्च बंद करिआं घंटा वी नहीं सी होइआ। इतलाह बाहर पुज्ज वी गई सी।

लाल सिंघ पूरी तरहां मायूस हो चुक्का सी। जदों घर दा भेती ही लंका ढाहुण लग्गे तां जित्त किवें हासल हो सकदी सी?

लाल सिंघ नूं यकीन हो गिआ कि वरंट अफ़सर नूं थाणे दी हर छोटी-वड्डी कारवाई दा इलम सी। होर लुका-छुपी करन दा कोई फ़ाइदा नहीं सी।

चुप्प कर के उस नें मुंडे वारिसां दे हवाले कीते अते हाईकोरट दे संमन लै लए। जो होएगा, सो देखी जाएगी।

 

 

32

भोग विच्च कल्ल्ह दा दिन बाकी सी।

अध्धे नालों वध्ध शहिर कुट्टिआ जा चुक्का सी। इलाके दा हर बदमाश लोड़ों वध्ध इंटैरोगेट हो चुक्का सी। जिस ’ते मामूली जिहा शक्क वी कीता जा सकदा सी, उस नूं वी नहीं सी बख़शिआ गिआ। इंझ लग्गदा सी, मुजरम जिवें भूतां-प्रेतां वांग असमानो उतरे होण अते कारा कर के मुड़ किधरे छाईं-माईं हो गए होण।

कातलां बारे तां की पता लग्गणा सी, इह वी पता नहीं सी लग्ग सकिआ कि कातल किथों आए, बंटी नूं किथों चुक्किआ अते किथे रख्खिआ गिआ? चिठ्ठीआं कौण लिखदा अते पोसट करदा रिहा? बंटी नूं किथे रख्खिआ अते किथे मारिआ गिआ?

जदों दसां दिनां विच्च कुझ्झ पल्ले नहीं सी पिआ तां चौवी घंटिआं विच्च किहड़ा जादू वज्ज जाणा सी? किसे तों पुछ्छ-पड़ताल करनी वी बाकी नहीं सी। कातलां बारे अकाशबाणी तां होणों रही।

पुलिस कपतान बिआन ’ते बिआन दाग़ रिहा सी। मुजरमां दी शनाख़त होण अते उहनां नूं ग्रिफ़तार करन लई रवाना होईआं पुलिस पारटीआं दी ख़बर अज्ज दे अख़बार विच्च छपी सी।

उसे रिपोरटां दे आधार ’ते मुख्ख मंतरी वी हिक्क ठोक के आख रिहा सी कि मुजरम हर हालत विच्च भोग तों पहिलां-पहिलां फड़े जाणगे।

इथे कातलां दी वाई-धाई वी नहीं सी।

थाणा ख़ाली पिआ सी। कुझ्झ वरंट अफ़सर छुडा के लै गिआ, बाकी उहनां आप छड्ड दित्ते।

जुझारू जथेबंदी तों लाल सिंघ नूं डर लग्गण लग्गा। हाई कोरट दे मुकद्दमे नूं उह भुगत लएगा। जे जुझारूआं दी ‘हाई कोरट’ दे वरंट आ गए तां जान लुकाणी मुशकिल हो जाएगी। जोश-जोश विच्च उस तों ज़िआदती वी ज़िआदा ही हो गई सी। उह तां सारा कुनबा ही तबाह करनगे।

सिर सुट्टी बैठा लाल सिंघ इस मुसीबत ’चों निकलण दा राह सोचदा रिहा।

उस नूं इको राह नज़र आ रिहा सी। नाले सप्प वी मर जाणा सी, नाले लाठी वी बच रहिणी सी। मुख्ख मंतरी दे वचन वी पूरे हो जाणे सन अते पुलिस दी वी वाहवा- वाहवा हो जाणी सी।

आपणे मन नाल पक्का फ़ैसला कर के लाल सिंघ नें हमाइती पुलिस अफ़सरां दी मीटिंग बुलाई। सारे उस नाल इक्क दम सहिमत हो गए। आपणी नौकरी बचाउण दा इहो इक्क हल्ल सी।

किसे नूं शक्क वी नहीं हो सकदा। दोवें पुराणे बी.सी.सन।

ख़ुश होइआ लाल सिंघ पुलिस अफ़सरां नूं डिऊटीआं लाउण लग्गा।

हौलदार रातो-रात पाले अते मीते लई चिट्टे दुध्ध वरगे कुड़तिआं पजामिआं दा इंतज़ाम करे। नवीआं तिल्लेदार जुत्तीआं, कालीआं पग्गां अते लाल फिफटीआं वी ख़रीदीआं जाण।

बलवंत नें उहनां दीआं उंगलां दे निशान सरीए, शीशीआं अते बोतलां ’ते लै लए। फेर इहनां चीज़ां नूं सूए लागले खेत विच्च बड़ी सावधानी नाल दबा दित्ता जावे। पिछ्छों पबलिक दे साहमणे इह चीज़ां बरामद कराईआं जाणगीआं।

उहनां दे हत्थां पैरां दे निशान उहनां चीज़ां ’ते वी लए जाण, जिनहां ’ते मौका देखण लाए माहिरां नें लए सन।

रेता मंगवा के उस उपर पाले अते मीते नूं तोरिआ जावे। फेर पहिलां दी तरहां मोलड तिआर कीते जाण।

नाज़र नूं हुकम सी कि उह हुणे उंगलां दे निशान वालीआं चीज़ां दी थां इह रख्ख आवे। लबारटरी वाले इस गल्ल तों ढिल्ल-मठ्ठ करन तां उहनां दी साहिब नाल गल्ल करा दित्ती जावे। साहिब आपे उहनां नूं समझा देवेगा। साहिब लाल सिंघ दी योजना नाल सहिमती प्रगटा चुक्का सी।

मीते नूं तां काला अख्खर मझ्झ बराबर सी। पाला माड़ी-मोटी पंजाबी लिख सकदा सी। उस तों उहो जिहीआं चिठ्ठीआं लिखवाईआं गईआं, जिहो जिहीआं बंटी दे कातलां नें भेजीआं सन। असल चिठ्ठीआं नूं मिसल नालों लाह के फूक दित्ता गिआ अते इह चिठ्ठीआं मिसल नाल नत्थी कर दित्तीआं गईआं।

पिछलीआं तरीकां विच्च सबूत इकठ्ठे कर के उहनां मुकाबले दी तिआरी शुरू कीती।

सवेरे चार कु वजे सीटीआं मारदी पुलिस अते हारन मारदीआं गड्डीआं सारे शहिर विच्च भजाईआं गईआं।

पुछ्छण वालिआं नूं दस्सिआ गिआ कि सेम नाले ’ते कातलां नाल पुलिस दा मुकाबला हो रिहा है।

फेर ख़बर आई कि मुकाबले विच्च भारी फ़ाइरिंग हो रही है। सारा इलाका सील कर दित्ता गिआ है। उधर जाण वालीआं बस्सां-कारां नूं दूजे रसते जाण दा हुकम होइआ।

फेर ख़बर आई कि कुझ्झ सिपाही अते इक्क हौलदार फट्टड़ हो गए हन। कातलां कोल पता नहीं किंना कु असला है। ख़तम होण विच्च ही नहीं आउंदा।

जदों डिपटी आपणी फ़ोरस लै के मौके ’ते पुज्जा तां किते जा के घेरा मज़बूत होइआ।

उहनां नूं काबू करन लई घंटा डिपटी नूं वी जूझणा पिआ।

शुकर सी कि मुजरम जिंदा हत्थ लग्ग गए सन। नहीं तां पुछ्छ-गिछ्छ नहीं सी हो सकणी।

पुलिस दे योधिआं नूं थाणे मुड़दिआं दुपहिर हो गई। शेरां वरगे दो कातल उहनां दीआं बुलेट परूफ़ कारां विच्च बंद सन।

सारे थाणे दे आले-दुआले अते छत्त ’ते बी.ऐस.ऐफ़.दा पहिरा ला दित्ता गिआ। उहनां नूं छुडाउण लई किसे वी समें थाणे ’ते हमला हो सकदा सी।

किसे नूं वी थाणे दे नेड़े नहीं सी ढुकण दित्ता जा रिहा। किसे वी तरहां दी माड़ी घटना वापर सकदी सी।

प्रैस रिपोरटर खहिड़ा नहीं सी छड्ड रहे। कई अंगरेज़ी अख़बारां नें आपणे विशेश प्रतीनिध भेजे सन। पुलिस किसे दे पल्ले कुझ्झ नहीं सी पा रही। पुलिस दे वी हाले कुझ्झ पल्ले नहीं सी पिआ। मुजरम नां नहीं सी दस्स रहे।

फ़ोटोआं लैण दी वी इजाज़त नहीं सी। मुजरमां दे मूंह ढकाए गए सन। उहनां नूं कचहिरी विच्च इस तरहां ही पेश कीता जाणा सी तां जो गवाहां तों उहनां दी शनाख़त कराई जा सके। कानूंन उहनां दे मूंह शनाख़ती परेड तों पहिलां नंगे करन दी इजाज़त नहीं सी दिंदा। हुणे फ़ोटोआं खिच्च लईआं गईआं तां मुजरम इस गल्ल तों बरी हो जाणे सन। हां, उहनां नें गवाहां कोलों आपणी शनाख़त कराउण तों नांह कर दित्ती तां फ़ोटोग्राफ़र जी सदके फ़ोटोआं खिच्च लैण।

इस लई प्रैस वालिआं नूं ओना चिर सबर करना पैणा सी, जिंना चिर मुजरमां नूं अदालत विच्च पेश नहीं सी कीता जांदा।

मुजरमां नूं कदों अदालत विच्च पेश करना सी, इस बारे कोई कुझ्झ नहीं सी दस्स रिहा।

 

 

33

मुख्ख मंतरी दे रुझेविआं नूं धिआन विच्च रख्खदे होए बंटी दे भोग दीआं रसमां इक्क घंटे लई लेट कर दित्तीआं गईआं।

मुख्ख मंतरी नें बाअद दुपहिर आउणा सी। आउणा सी जां नहीं, इह वी पक्का पता नहीं सी। उहनां दे शहिर आउण दे प्रोगराम तां वीह वार बणदे हन। आप कदे ही पहुंचदे हन। ऐन वकत सिर उहनां दी थां उहनां दा कोई ख़ास वज़ीर जां ज़िल्हे दा कोई उच्च-अधिकारी मौके ’ते पहुंचदा है। मुख्ख मंतरी दे रुझेविआं दा किस्सा सुणा के उहनां कोलों मुआफ़ी मंगदा है। मुख्ख मंतरी दे फ़रज़ निभा के तुरदा बणदा है।

जिस हिसाब नाल करड़े सुरख्खिआ प्रबंध कीते गए सन, उस तों लग्गदा सी, मुख्ख मंतरी ज़रूर पहुंचणगे।

सारे शहिर विच्च गशत तेज़ हो गई सी। शहिर दे बाहरले चौकां विच्च ट्रैफ़िक पुलिस तों इलावा इक्क-इक्क हौलदार अते चार-चार सिपाही वी ताइनात कीते गए सन। साईकल अते सकूटर तों बिनां किसे वी गड्डी नूं शहिर ’च प्रवेश करन दी आगिआ नहीं सी। सकूटरां दे वी नंबर नोट कीते जा रहे सन। उहनां दीआं डिग्गीआं दी वी चंगी तरहां तलाशी हो रही सी।

थाणे तों कचहिरी तक दे दो मील दे रसते ’ते ख़ास तवज्जो दित्ती गई सी। इस रसते ’ते पैंदी हर गली दे मोड़ ’ते इक्क-इक्क सिपाही खड़ा कीता गिआ सी। उह बड़ी हुशिआरी नाल आला-दुआला घोख रिहा सी।

शहिर वासीआं दे दिल धड़क रहे सन। शहिर विच्च एनी पुलिस पहिलां कदे नहीं देखी गई। पुलिस नूं किसे मंदी घटना वापरन दी सूह लग्गी होएगी। कईआं नें राशन ख़रीद के अंदर रख्ख लए। दूर पहड़ाउण जांदीआं अधिआपकावां नें छुट्टीआं भेज दित्तीआं। वापस मुड़दीआं नूं करफ़िऊ लग्ग गिआ तां बच्चिआं दा की बणेगा? करफ़िऊ दा सुआद उह कई वार चख्ख चुक्कीआं सन।

शहिर विचले सख़त सुरख्खिआ प्रबंधां दी तां लोकां नूं समझ आ रही सी पर कचहिरी नूं किउं घेरिआ गिआ है, इह समझों बाहर सी। गेट तों कोरट-रूम तक कदम-कदम ’ते सिपाही खड़ा सी। वकीलां दे खोखिआं, साईकल शैडां, अरज़ी नवीसां दे तख़तपोशां अते हर उस जगहा ’ते जिथे चार बंदे इकठ्ठे खड़े होए सन, कोल चिट्टे कप्पड़िआं वाले सूहीए कंन लाई खड़े सन।

वकीलां विच्च घुसर-मुसर शुरू हो गई सी। ज़रूर कोई ख़तरा सी। नहीं तां अग्गे कदे कचहिरीआं दीआं छत्तां ’ते बी.ऐस.ऐफ़.दे जवानां नें पुज़ीशनां नहीं सी लईआं। उह मोरचे बणा के सटेनगंनां अते ऐल.ऐम.जी.इउं ताणी खड़े सन, जिवें किसे वी समें जंग दा बिगल वज्जण वाला होवे।

कदे-कदे मुख्ख मंतरी वकीलां नूं मिलण आउंदा सी। उस समें कचहिरीआं विच्च कुझ्झ सुरख्खिआ प्रबंध ज़रूर कीते जांदे सन। प्रधान नूं उहनां दे इथे आउण दी कोई सूचना नहीं सी। मुख्ख मंतरी दे नज़दीकी वकील वी कचहिरीउं ग़ाइब सन। उहनां नें उथे डेरा जा लाइआ होणा है, जिथे मुख्ख मंतरी नें ठहिर करनी होएगी। नहीं तां उह इथे मेले ’च गुआची गां वांग हरल-हरल करदे फिरदे रहिंदे।

इस सुरख्खिआ दा इको-इक्क कारन किसे बहुत ही ख़तरनाक दहिशतगरद दा अदालत विच्च पेश होणा हो सकदा सी। मुजरमां नूं पुलिस कोलों छुडा लैण दीआं वारदातां आम हो रहीआं सन। भीड़-भड़क्किआं वालीआं कचहिरीआं विच्च अजिहे मौके असानी नाल मिल जांदे हन

जज्जां दे चिहरे वी पीले भूक होए-होए सन। हर इक्क नूं लग्गदा सी जिवें बंब उसे दी कचहिरी विच्च फटणा सी। कोरट-रूम विच्च दाख़ल हुंदे साइलां दी तलाशी तां जाइज़ सी। किसे हद्द तक मुनशीआं दी तलाशी ’ते वी इतराज़ नहीं सी कीता जा सकदा, पर अज्ज तां वकीलां नूं वी नहीं सी बख़शिआ जा रिहा। तलाशी वी सरसरी नहीं सी हो रही। चंगी तरहां घोख-पड़ताल हुंदी सी।

पुलिस दे इस रवई्ईए ’ते वकील हड़ताल करना चाहुंदे सन, पर आला-दुआला इंना रहस्समई हो गिआ सी कि किसे दी मीटिंग बुलाउण दी हिंमत नहीं सी पै रही। एुह कंम-कार कर के खोखिआं विच्च जा बैठे।

जज्ज वी आउण वाले ख़तरे दा मुकाबला करन लई कचहिरीआं छड्ड के रिटाइरिंग रूम विच्च चले गए। मुकद्दमिआं दी कारवाई शांत-चित्त ही हो सकदी सी। जदों साइल ही नहीं, वकील ही नहीं, जज्ज वी डरे होए होण तां इनसाफ़ किवें हो सकदा है?

वकील सरकारी वकीलां दे दफ़तरां दे चक्कर कट्टण लग्गे। शाइद उहनां नूं कुझ्झ पता होवे पर उह वी लोकां वांग कोरे ही सन। बस्स इंना कु पता सी कि इक्क माड़चू जिहा सिपाही उहनां दे दफ़तर अग्गे पहिरा देण लई आ गिआ सी।

गुरमीत सिंघ नूं थाणे विचों सुनेहा आइआ सी कि उह किधरे नां जाए। पुलिस बहुत ही ख़ौफ़नाक मुजरमां नूं अदालत विच्च पेश करन वाली है। पूरे चौदां दिनां दा रिमांड चाहीदा है। तिआरी कर लैण।

इस ख़बर नाल लोकां नूं कुझ्झ राहत मिली।

इह ख़ौफ़नाक मुजरम किहड़े सन, इह हाले वी पहेली ही सी। मुजरमां दा थहु-पता कढ्ढण लई वकील इक्क वार फेर सरकारी वकीलां वल्ल आउण लग्गे।

इस सवाल दा वी सरकारी वकीलां कोल कोई जवाब नहीं सी। मुजरमां दे नां-पते गुपत रख्खे गए सन। सुरख्खिआ प्रबंध इंने सख़त हन तां उह ज़रूर ख़तरनाक होणगे। पूरा इलम मिसल आउण ’ते ही होएगा।

कचहिरी विच्च युवा संघ दे वरकरां दी भीड़ वधदी जा रही सी। इस तों वकीलां नें अनुमान ला लिआ कि बंटी दे कातल ही ख़ौफ़नाक मुजरम सन। कल्ल्ह उहनां नूं फड़ तां लिआ गिआ सी पर नां-पता तसदीक नहीं सी हो रिहा।

प्रैस वाले वी मुजरमां दी सूह नहीं सी कढ्ढ सके। उह पुलिस अफ़सरां दी इंटरविऊ कर-कर हंभ गए सन, जिनहां नें मुजरमां नूं फड़िआ सी पर किसे दे पल्ले कुझ्झ नहीं सी पाइआ।

सारा बज़ार पुलिस दे गुण गा रिहा सी। विउपार मंडल दे प्रधान नें रात ही मीटिंग बुला लई सी। बज़ार वाले आपणे वाअदे अनुसार पुलिस दा सनमान करन दी तिआरी करन। सेठां नें दिल खोल्ह के ऐलान कीते। बजाजी वाले सिंगले नें टैरीकाट दी इक्क-इक्क वरदी, भांडिआं वाले भापे नें इक्क-इक्क टिफ़न, बसाती वाले बाबू राम नें इक्क-इक्क बरीफ़केस अते करिआने वाले सरदार नें चार-चार किल्लो वाली देसी घिओ दी इक्क-इक्क पीपी देण दा ऐलान कीता।

सवेर नूं जदों पुलिस दे सनमान दी गल्ल शहिर विच्च फैली तां सनमान करन वालिआं दी लिसट होर लंबी हो गई। धागा मिल्ल वाले, पोलटरी फ़ारम वाले अते शैलरां वाले इक्क-दूजे तों चहड़-चहड़ के ऐलान करन लग्गे।

युवा संघ नें सनमान करन लई शाम नूं ही नहिरू पारक विच्च रैली रख्ख लही। मुख्ख मंतरी दी हाज़री विच्च ही सनमान होएगा। उहनां इनाम देण वालीआं सारीआं संसथावां नूं बेनती कीती कि उह आपणीआं-आपणीआं चीज़ां लै के समें सिर नहिरू पारक पुज्ज जाण।

संघ मुख्ख मंतरी ’ते वी ज़ोर पाएगा कि उह पुलिस मुलाज़मां नूं तरक्की देण दा वाअदा तुरंत पूरा कर के जाण। कातलां नूं ग्रिफ़तार करवाउण दा वाअदा निभा के तां उह शहिर ’ते अहिसान कर ही चुक्के सन।

युवा संघ चाहुंदा सी कि कातलां दा मूंह काला कर के उहनां दा जलूस कढ्ढिआ जावे।

इंसपैकटर नें इस दी इजाज़त नां दित्ती। नां कानूंनी पख्खों अते नां ही सुरख्खिआ पख्खों इह संभव सी।

संघ दी दूजी मंग वी उह परवान नहीं सी कर सकदा। मुजरमां नूं खुल्ल्ही जीप विच्च बिठा के वी कचहिरी नहीं सी लिजाइआ जा सकदा। मुजरमां दे समरथक किसे वी समें कोई वी कारवाई करन दे समरत्थ सन। पुलिस कोई ख़तरा मुल्ल नहीं लै सकदी।

पुलिस दा भगत बणिआ संघ सिर झुका के पुलिस दी हर गल्ल मंनदा रिहा। कातलां नूं फड़ के उहनां संघ दा मन जो मोह लिआ सी।

मुजरमां नूं लै के थाणिओं निकली जीप देख के संघ दे वरकरां दा जोश ठाठां मारन लग्गा। उह पूरे जोश नाल पुलिस दे हक्क विच्च नाअरे मारन लग्गे।

बज़ार विच्च इंनी भीड़ हो गई सी कि पुलिस नूं जीपां तोरनीआं मुशकिल हो गईआं। धक्के मार-मार लोक इक्क-दूजे तों अग्गे होण दा यतन कर रहे सन। हर कोई अड्डीआं चुक्क-चुक्क के कातलां दी मनहूस शकल देखणा चाहुंदा सी।

पतले-दुबले सरीरां, चिट्टे कुड़ते-पजामिआं, कालीआं पग्गां अते तिल्लेदार जुत्तीआं तों बिनां कुझ्झ वी नज़र नहीं सी आ रिहा। मुजरमां दे पुठ्ठीआं हत्थकड़ीआं लाईआं गईआं सन। पैरां विच्च भारीआं-भारीआं बेड़ीआं सन। चिहरे पग्गां नाल ढक्के होए सन। बस्स ख़ौफ़नाक अख्खां ही दिखाई दे रहीआं सन, जिहड़ीआं वार-वार लोकां नूं घूर रहीआं सन।

कचहिरी तक अप्पड़दिआं पुलिस नूं तिंन घंटे लग्ग गए। जीपां दे पिछ्छे बहुत वड्डी भीड़ तुर रही सी।

लोकां नूं कचहिरी विच्च दाख़ल होण दी मनाही सी। भीड़ नूं गेट उत्ते रोक दित्ता गिआ।

संघ लई इह वधीआ मौका सी। जिंना चिर पुलिस रिमांड हासल कर के वापस नहीं आउंदी, उह लोकां नूं आपणे संघरश दी कहाणी सुणा सकदे सन।

कुझ्झ जोशीले नौजवानां नें अरज़ी-नवीसां दे तख़तपोश चुक्क लए। इक्क-दूजे ’ते रख्ख के तख़तपोशां दी उच्ची सारी सटेज बणा लई। संघ दे नेता वारो-वारी लोकां दे रौंगटे खड़े करन लग्गे।

अंदर आपणे कमरे विच्च कैद होइआ गुरमीत बेसबरी नाल मिसल उडीक रिहा सी, मसला गंभीर सी। कचहिरी विच्च होण वाली कारवाई सुणन अते उस कारवाई नूं आपणे-आपणे अख़बारां नूं भेजण लई प्रैस रिपोरटर कचहिरी विच्च कुरसीआं मल्ली बैठे सन। सरकारी वकील दी लिआकत दी परख दी घड़ी सी।

ख़तरनाक मुजरम वकील वी तकड़ा करदे हन। घट्ट तां गुरमीत वी नहीं। फेर वी मुजरमां दे ख़िलाफ़ बोलण लई पुलिस दी मिसल पहड़नी ज़रूरी सी। तफ़तीश दा हर तत्थ उस नूं ज़बानी याद होणा चाहीदा सी। सफ़ाई दे वकील नूं माल पाउण लई किसे किताब दी ज़रूरत वी पै सकदी सी।

मिसल मंगवाउण लई गुरमीत कई वार थाणे फ़ोन कर चुक्का सी। हर वार इको जवाब आउंदा, मिसल इंसपैकटर दे बैग विच्च है। इंसपैकटर मुजरमां दे नाल है। मुजरम आए वी तां सिध्धे कचहिरी लिजा खड़े कीते। इक्क टुट्टिआ जिहा सिपाही गुरमीत नूं बुलाउण आ गिआ।

बिनां मिसल पहड़े उह अंदर जा के की बहिस करेगा? गुरमीत दा पारा चहड़न लग्गा।

“ख़ाली हत्थ मैं कचहिरी ’च डुगडुगी वजाऊं।” बुलाउण आए सिपाही नूं गुरमीत नें उहनीं पैरीं वापस भेज दित्ता। पुलिस नूं जे सरकारी वकील दी ज़रूरत है तां पहिलां इंसपैकटर इथे आ के नाले सारे हालात समझाए, नाले मिसल पहड़ाए।

बाहर हुंदी नाअरेबाज़ी नूं धिआन विच्च रख्खदिआं अते हो रही देरी तों डरदिआं इंसपैकटर नूं दफ़तर आउणा पिआ।

मिसल हाले वी उस कोल नहीं सी।

इंसपैकटर तों ख़ुशी सांभी नहीं सी जा रही। पुलिस हिसटरी विच्च शाइद इह पहिली वार सी कि सारा शहिर पुलिस दे हक्क विच्च नाअरे मार रिहा सी। नहीं तां नाअरे पुलिस दे ख़िलाफ़ ही लग्गदे हन। ख़ुशी ’च कमला होइआ उह मिसल लिआउणा ही भुल्ल गिआ।

“तुसीं अंदर चल्लो, तुसीं खड़े ही रहिणा है। असीं फ़ोन ’ते जज्ज नाल गल्ल कर लई सी। पूरे चौदां दिनां दा रिमांड मिल जाएगा। मुजरमां नूं वकील नहीं करन दित्ता गिआ। शनाख़त कराउण तों वी उह नांह करनगे। मुजरमां नूं सभ कुझ्झ समझा दित्तै। तुसीं फ़िकर नां करो।”

“जे इहो गल्ल है तां मैथों की कराउणा है? आपे पेश कर दिओ। अग्गे किहड़ा करदे नहीं। मैनूं नाल लिजाणा है तां मिसल दिखाउणी ही पएगी।” महिज़ रबड़ दी मोहर बणना गुरमीत दी आदत नहीं सी।

इह तां अजिहा मुकद्दमा सी, जिस विच्च गुरमीत दी लिआकत दी परख होणी सी। उह तां छोटी तों छोटी गल्ल नूं वी गंभीरता नाल लैंदा सी। इह उस दी सुहिरदता ही सी, जिहड़ी उस नूं इथे तक लै आई सी। नवीं ज़िंदगी दी शुरूआत तां कोई चंगी नहीं सी होई।

बाप पटवारी ज़रूर सी, पर लोकां दी छिल्ल नां लाह सकिआ। पटवारी तों जमां- बंदीआं अते गरदावरीआं विच्च हेरा-फेरीआं कर के नां ज़मीन आपणे नां लगा होई नां कोठीआं बणीआं। उस दी सारी उमर दी कमाई सी, इक्क कच्चा-पिल्ला घर। उह वी शहिर दी सभ तों घटीआ समझी जांदी बसती विच्च। शमशान घाट दे साहमणे अते चूहड़िआं दे विहड़े। दोसतां-मित्तरां अते रिशतेदारां नें बथेरा वरजिआ। थां लैणी है तां किसे चंगे गली-मुहल्ले विच्च लए। इथे भैड़ी संगत ’च पै के बच्चिआं नें विगड़ जाणा सी। बाप कोल सुझावां नूं इक्क कंन पा के दूजे कंन कढ्ढण तों सिवा कोई चारा नहीं सी। शहिर रहि के बच्चिआं नूं पहड़ाउणा उस दे बाप दा सुफ़ना सी। घट्ट पूंजी नाल अजिही बसती विच्च ही मकान ख़रीदिआ जा सकदा सी।

लोकां दीआं गल्लां सच्चीआं होण लग्गीआं। गुरमीत विगड़न लग्गा। उस दे हाण दा कोई वी तां सकूल नहीं सी जांदा। कोई मौजां नाल कुछ्छड़ ’च झाड़ू देई सड़कां सुंभरन जा रिहै। कोई टट्टीआं साफ़ करन जा रही मां नाल हत्थ वटाउण तुर गिऐ। रहिंदे-खूंहदे मोढिआं ’ते पीपे धर गलीआं बज़ारां ’चों डक्के-डउले चुक्कण तुर जांदे। दुपहिर तक्क विहले हो के सारा दिन खेडदे रहिंदे। इकल्ला गुरमीत ही सी, जिस नूं भारी बसता चुक्क के सकूल जाणा पैंदा सी। घर आ के वी ढेर सारी पहड़ाई करनी पैंदी। उस दा बाप ख़ुद उस नूं पहड़ाउंदा सी। उह वी सख़ती नाल। पहड़ाई तों टाला मारन दी कोई गुंजाइश नहीं सी हुंदी।

साथीआं दी पंछीआं वरगी आज़ाद ज़िंदगी गुरमीत नूं आपणे वल्ल धूहण लग्गदी। पहिलां उह छुट्टी वाले दिन उहनां नाल जाण लग्गा। फेर सकूलों टल के। दोसत कंमीं कारीं रुझ्झे रहिंदे, गुरमीत नाल-नाल फिरदा रहिंदा। कदे-कदे कंम विच्च हत्थ वी वटाउंदा। साथी हक्क नहीं सी रख्खदे। किसे घरों जे कोई चीज़ खाण नूं मिलदी, गुरमीत नाल वंड के खांदे।

गुरमीत नूं जे दोसतां वाले कंम कारन दी इजाज़त हुंदी तां उह वी बसते नूं सलूट मार दिंदा। उह जट्टां दा मुंडा सी। सकूल जाण तों सिवा कोई चारा नहीं सी। सकूल जांदा रिहा, पहड़दा रिहा।

घर अग्गों पक्की सड़क निकलदे ही विहड़ा खेरूं-खेरूं हो गिआ। इक्क ख़ानदानी वैद नूं याद आइआ, जमांदारां दे अध्धे घर तां उस दी ज़मीन ’ते उसरे होए सन। जदों ज़मीन दा कोई मुल्ल नहीं सी, उस नें इस दी परवाह नहीं सी कीती। कीमतां वधण लग्गीआं तां उस दा दिल वी धड़कण लग्गा। इहनां दा की वसाह है? कबज़ा कर के ही बैठ जाण। कईआं नूं डरा के, कईआं नूं पुचकार के अते बाकीआं नूं थोहड़े-बहुत पैसे दे के उस नें सारा अहाता ख़ाली करा लिआ। सड़क दे नाल-नाल पलाट कट्टे दिनां विच्च इक्क नवीं बसती उसर गई।

जगहा दी कीमत इंनी वध गई कि चूहड़िआं दे जद्दी घर वी लालच ’च आ गए। मूंह-मंगे पैसे लै के उह शहिर दे बाहर बणी अनाज मंड दे परले पासे वगदे गंदे नाले कोल जा वस्से। उंझ वी इस बसती विच्च उहनां दा दम घुटण लग्गा सी। आपणी ही जगहा ’ते उह दुरकारे जाण लग्गे सन।

बदले माहौल विच्च गुरमीत वी बदल गिआ। उस दे साथी बदल गए। नवें साथी सकूल जांदे सन। दिल ला के पहड़दे सन। वधीआ-वधीआ खेडां खेडदे सन।

मां-बाप ख़ुश रहिण लग्गे। मुंडा सुधर रिहा सी।

गुरमीत बदलिआ तां सही पर बचपन दे दोसतां नें उस दा साथ नां छड्डिआ। अज्ज तक उह उस दी सोच दा अंग बणे होए सन। उस नूं हुण पता लग्गा सी कि जिस ज़िंदगी नूं उह सवरग समझदा सी, असल विच्च उह नरकां नालों वी भैड़ी सी। समें नें उहनां आज़ाद पंछीआं दे खंभ कदों दे कट्ट सुट्टे सन। कईआं नूं बीमारीआं नें निगल लिआ सी। कईआं नूं कारख़ानिआं दीआं मशीनां नें। जिहड़े बच गए सन, उह मरिआं नालों वी औखे सन। कोई टी.बी.दा शिकार, कोई दमे दा अते कोई मिरगी दा। किसे दी लत्त-बांह कट्टी जा चुक्की सी अते कोई अंनहा हो गिआ सी। उहो ख़ानदानी पेशे अपणाउण लई मजबूर। दाहड़ी-केस चिट्टे, जाबहां अंदर नूं धसीआं होईआं। हड्डीआं दे ढांचे। गुरमीत आपणे दोसतां नूं पछाणन विच्च अकसर धोखा खा जांदा सी।

अजिहा किउं हुंदा है, इस दी समझ उस नूं कालज जा के आउण लग्गी। उहनीं दिनीं प्रगतीवादी लहिर ज़ोरां ’ते सी। नौजवानां दा ख़ून उबल रिहा सी। उह हथिआरबंद *ती लई तिआरी कर रहे सन। होसटल विच्च मीटिंगां हुंदीआं, साहित वंडिआ जांदा। गुरमीत वी उधर नूं झुक गिआ।

कोरस दीआं किताबां छड्ड के उह विगिआनक सोच वालीआं किताबां पहड़न लग्गा। गुरमीत अंदर पैदा हुंदे हर प्रशन दा जवाब उहनां किताबां विच्च दरज सी। बचपन दे दोसतां दी लुट्ट दे कारन अते उस दा हल्ल गुरमीत नूं समझ आ गिआ सी।

इस तों पहिलां कि गुरमीत वी घरों निकल जांदा, सारी लहिर खेरूं-खेरूं हो गई। कई दोसत मारे गए, बाकीआं नूं जेल्ह विच्च तुंन दित्ता गिआ।

लहिर नहीं रही तां की? गुरमीत अंदर जगी जोत उसे तरहां काइम सी। ज़िंदगी दे हर मोड़ ’ते उह विगिआनक सोच लागू करन दे यतन करदा सी।

नौकरी उह कर तां रिहा सी, पर रास नहीं सी आ रही। पुलिस वाले उस नूं पुलिस विरोधी आखदे सन। सरकारी वकील दा फ़रज़ हुंदा है, पुलिस दा पख्ख पूरना। कई केसां विच्च उह पुलिस दे ख़िलाफ़ ही बोल जांदा सी।

जज्ज वी औखे सन। उह उहनां नाल घुल-मिल के नहीं रहिंदा। नां आप कुझ्झ करदा नां उहनां नूं करन दिंदा। जिहड़े माड़े मंगतिआं दी गुरमीत मदद करदा सी, उहनां तों जज्जां नूं की मिलणा सी? जिनहां दी जज्ज मदद करना चाहुंदे सन, उहनां पिछ्छे हत्थ धो के पै जांदा। कानूंन दीआं अजीब-अजीब परिभाशावां देण लग्गदा।

आपणा महिकमा वी औखा सी। गुरमीत मरज़ी दा मालक सी। डरदे कोई कारवाई नहीं सी करदे। माड़े बंदिआं नाल संबंध रख्खदा है। जिथे वी जांदा है, पहिलां वरगिआं नाल दोसती गंढदा है।

इहो कुझ्झ हुण वापर रिहा सी।

इंसपैकटर दे रवई्ईए तों गुरमीत नूं लग्ग रिहा सी जिवें उह गुरमीत दी होंद तों मुनकर हो रिहा सी।

गुरमीत दी अड़ी अग्गे इंसपैकटर नूं झुकणा पिआ। रिमांड सरकारी वकील तों बिनां वी मिल जाणा सी, पर उह बिनां मतलब जोख़म लैणा ठीक नहीं सी समझदा। कल्ल्ह नूं इहो छोटी जिही गल्ल पहाड़ बण सकदी सी।

मिसल लै के गुरमीत ज़िमनीआं फोलण लग्गा।

“इह हाले लिखणीआं हन?”

“वकत ही नहीं लग्गा … ।” गुरमीत वल्लों फड़ी ग़लती ’ते इंसपैकटर घबराइआ।

“जे जज्ज नें ज़िमनीआं ’ते दसतख़त करने होए तां?” गुरमीत दा ग़ुस्सा हाले ठंढा नहीं सी होइआ। उह इंसपैकटर नूं ज़लील करन ’ते तुलिआ होइआ सी।

‘मैं आखिआ तां है कि जज्ज नाल गल्ल हो चुक्की है। कोई होर नहीं देखण लग्गा ज़िमनीआं। जदों मुजरमां दा कोई वकील ही नहीं, इतराज़ किस नें करना है?” गुरमीत दी नुकताचीनी इंसपैकटर नूं चुभ्भण लग्गी। उस दे बोल कुरख़्ख़त होण लग्गे।

मिसल दा जाइज़ा लै के गुरमीत नें रिमांड पेपरां ’ते नज़र मारी। मुजरमां दे नां पहड़ के उस दे हथ कंब गए। पैन्न उंगलां विचों खिसक के हेठां गिर गिआ।

“पाला सिंघ … मीता सिंघ … उहो जेब-कतरा … चोर … जिहड़ा आपणे थाणे दे बी.सी.रहे हन?” धड़कदे दिल नाल हेठों पैन्न चुक्कदे गुरमीत नें मुजरमां बारे तसल्ली करन लई इंसपैकटर तों पुछ्छिआ।

“जी … जी … उहो नें हरामज़ादे … देख लौ किड्डा लोहड़ा मारिआ सालिआं नें … ।” इंसपैकटर दी आवाज़ विच्च पहिलां वाला जोश नहीं सी रिहा। उस नूं इउं महिसूस होण लग्गा सी जिवें चोर रंगे हत्थीं फड़िआ गिआ सी।

“इह तां दसां दिनां तों थाणे बैठे सी … मैं आप देखे नें … । इक्क नूं तां मैं आप पेश कीता सी।”

“नहीं, नहीं, तुहानूं भुलेखा लग्गा होणा है।” इंसपैकटर गुरमीत दे सवालां तों उवें घबरा रिहा सी जिवें मुजरम पुलिस दे सवालां तों घबराउंदा है। उह काहला पै रिहा सी कि गुरमीत जलदी देणे काग़ज़ां ’ते दसतख़त करे अते उस दा खहिड़ा छड्डे।

“इहनां ग़रीबां लई एडा अडंबर रचण दी की लोड़ सी? घड़िआं दीआं इहनां मछ्छीआं नें किथे भज्ज जाणा सी? नां इहनां नूं कोई छुडाउण वाले … ।” बिनां दसतख़त करे पैन्न जेब ’च पाउंदे गुरमीत दा ग़ुस्सा काबू तों बाहर हो रिहा सी।

“तुसीं हुण उठो वी … बाकी सवाल फेर कर लिओ … ।” खिझिआ इंसपैकटर मिसल समेटदा कुरसी तों उठ्ठ खलोता।

गुरमीत दीआं नज़रां इंसपैकटर दे झुरड़ीआं वाले मत्थे ’ते टिक गईआं। हर झुरड़ी विचों उस नूं बीसीआं मासूमां दे फांसी लटकण दे अकसां दे झउले पैण लग्गे।

काग़ज़ां विचों आउंदी इक्क अजीब जिही बू गुरमीत दे नक्क नूं चहड़न लग्गी। सड़ रहे मास जिही, गंदगी दे ढेर जिही अते ताज़े वहे ख़ून जिही।

बाहर युवा संघ दे नाअरे उच्ची हुंदे जा रहे सन। बंटी दे कातलां नूं फाहे लाउण दी मंग ज़ोर फड़दी जा रही सी।

भीड़ दे नाअरिआं नें इंसपैकटर नूं राहत बख़शी। उह गुरमीत दा धिआन भीड़ दे ग़ुस्से वल्ल दिवाउणा चाहुंदा सी।

गुरमीत इस तरहां दी भीड़ तों डरन वाला नहीं सी।

गुरमीत दे ज़िहन विच्च इस मुकद्दमे दा भूत, वरतमान अते भविख्ख घुंमण लग्गा। अग्गों की होएगा, उस नूं साफ़ दिखाई दे रिहा सी।

बंटी दा कतल … पुलिस दी हरकत … मुख्ख मंतरी दा ऐलान … पाले अते मीते ’ते चहड़ी साहड़सती … गुरमीत दे साथीआं दे दो नवें रूप … पुलिस रिमांड अते तशद्दद। इह सी इस कतल दा भूतकाल। वरतमान विच्च नाअरे वज्ज रहे सन। जज्जां नूं प्रभावित कीता जा रिहा सी। ख़बरां छप रहीआं सन। पुलिस दी बहादरी दे गुण गाण हो रहे सन। भविख्ख विच्च इस भिआनक कांड संबंधी असैंबली अते पारलीमैंट विच्च बहिसां होणगीआं। सैशन जज्ज दी कचहिरी विच्च बाहर कातलां नूं फाहे लाउण दे नाअरे लग्गणगे। झूठे गवाह भुगतणगे। वकीलां दी धूआं-धार बहिस होएगी। डरदा जज्ज फांसी दा हुकम सुणाएगा। इस सारे डरामे दा इक्क पातर गुरमीत वी होएगा।

नहीं। गुरमीत पाले अते मीते नाल ग़दारी नहीं करेगा। ग़दारी कर-कर उह हंभ चुक्का सी। झूठीआं तफ़तीशां ’ते उह होर दसतख़त नहीं करेगा।

“मैं इस झूठ के पुलंदे ’ते दसतख़त नहीं करने। किसे होर सरकारी वकील तों दसतख़त करा लै।” इंसपैकटर नूं कोरा जवाब दे के गुरमीत हलका-फुलका महिसूस करन लग्गा।

काफ़ी देर तों कोई नाअरा सुणाई नहीं दित्ता। लग्गदा सी भीड़ दा जोश मठ्ठा पै गिआ सी।

कारन जाणन लई गुरमीत ताकी कोल जा खड़ोता।

युवा संघ दे खब्बे पासे संघरश संमती नें वी आपणी सटेज ला लई सी। भावें हाले संमती वालिआं नूं सुणन वालिआं दी गिणती मुठ्ठी भर ही सी, फेर वी उहनां दे करारे-करारे भाशण संघ दे नेतावां दे हौसले पसत कर रहे सन। संमती वालिआं नूं बंटी दे अखौती कातलां दा नां पता लग्ग चुक्का सी। इह वी कि उह दसां दिनां तों थाणे बैठे सन। थाणिउं छुट्ट के आए संमती दे कारकुन इस दी तसदीक कर रहे सन।

सच्चाई जाणन लई भीड़ संघ नालों टुट्ट-टुट्ट के संमती वल्ल आ रही सी। इस लई पुलिस दे हक्क विच्च लग्गदे नाअरे मठ्ठे पै रहे सन।

संमती दे कामिआं दीआं तकरीरां गुरमीत दे डोलदे मन नूं बल बख़शण लग्गीआं। उहनां नूं इह वी पता लग्ग चुक्का सी कि गुरमीत नें काग़ज़ां ’ते दसतख़त करनों नांह कर दित्ती सी। उह गुरमीत दी इस दलेरी दी तारीफ़ कर रहे सन। लोकां नूं इस नांह दा कारन समझा रहे सन।

गुरमीत अंदर पैदा होइआ जोश ठाठां मारन लग्गा। उस नूं आपणे फ़ैसले ’ते फ़ख़र होण लग्गा। ग़लत फ़ैसले लैण वाला उह किहड़ा कोई लल्लू-पंजू वकील सी। उह देश दी सभ तों वधीआ यूनीवरसिटी दा लाअ ग्रैजूएट सी। सारे सरकारी वकीलां विचों इको-इक्क गोलड मैडलिसट सी। नौकर भरती नां होइआ हुंदा तां चोणवें वकीलां विचों होणा सी।

ताकी ’च खड़ा गुरमीत आपणी दस सालां दी नौकरी दा लेखा-जोखा करन लग्गा। आख़िर उस दी लिआकत किस दे कंम आ रही सी?

गुरमीत नें तां सोचिआ सी, सरकारी वकील बण के उह पाले वरगिआं नूं बचा लिआ करेगा। वड्डे-वड्डे समग्गलरां नूं जेल्हां ’च सड़न लई मजबूर करेगा, पर अजिहा कुझ्झ वी नहीं सी हो रिहा। उस दे ज़िहन विच्च इक्क वी अजिहा केस नहीं सी आ रिहा, जिस विच्च उह आपणी पुगा सकिआ होवे।

फेर चंद छिल्लड़ां लई हर समां बरबाद करन दा की लाभ सी?

सरकार नूं तां उस दी लिआकत तों चिड़ सी। उस दी लोड़ तां पाले अते मीते वरगे हज़ारां मासूमां नूं सी। गुरमीत नूं तां उहनां दा वकील बणना चाहीदा सी।

संमती दुआले जुड़ रहे लोकां दी गिणती वधदी जा रही सी। संघ वाले किधरे नज़र नहीं सी आ रहे। उह बोरीआ-बिसतरा गोल कर के जा चुक्के सन।

उतशाह नाल भरे गुरमीत नें काग़ज़ चुक्किआ, असतीफ़ा लिखिआ अते लिफ़ाफ़ा पोसट करन लई नाइब कोरट नूं डाकख़ाने भेज के उह छोटे-छोटे कदम पुट्टदा संमती दे जलसे वल्ल वधण लग्गा।

गुरमीत ख़ुश सी। आख़िर उह लोक संघरश वाले उस अंम्रित-कुंड दे राह पै ही गिआ सी, जिस नें लोकां नूं इस भैड़े निज़ाम तों मुकती दिवाउणी सी।