हत्थली लिखत दा मकसद, लेखक जां लेखक दी लिखत सबंधी कोई होर नवीं परिभाशा लभ्भण-घड़न दा नहीं है सगों लेखक दीआं हां पख्खी रुच्चीआं दी संभावना बारे संकेत दे के लेखक अते लिख्खत सबंधी विचार नूं कुझ होर अगहां तोरन दा यतन करना है। बहुमुल्ले समें दी सही ढंग नाल वरतों नां कर सकण दी सज़ा तां अकसर लेखक नूं भुगतणी ही पैंदी है पर इसदे नाल ही नाल जेकर इक्क लेखक आपणे दिल अते दिमाग दी गल्ल पुरी खुल्हदिली नाल नां कर सके तां उसदी मार लई वी ‘लेखक अते लिखत’ नूं ही तिआर रहिणा पैंदा है। इसे ही संदरभ विच ‘लेखक अते लिखत’ नूं इक्क होर ढंग नाल विचारना बणदा है।

पहिलां वी आखिआ गिआ है अते हुण फिर इसदी पुशटी करनी बणदी है कि लेखक, लिखदा है, इस लई ही लेखक हुंदा है। लेखक किउंकि लिखदा है इस लई इह अंदाज़ा लगाउणा वी ग़लत नहीं होवेगा कि लेखक नूं ‘लिखण’ नाल पिआर है। इस पिआर कारन ही उह लिखदा है। लेखक नूं आपणी लेखणी उते भरोसा हुंदा है कि उसने लिखणा ही है अते इस डूंघे भरोसे कारन उह लिखदा है। पर हर उह बंदा जिहड़ा कि कुझ लिखदा है, लिख सकदा है अते जिसदा लिखिआ दिलचसपी वाला नां होवे, ‘लेखक’ जां ‘लिखत’ दी किसे वी बझ्झही जाण वाली परिभाशां अधीन नहीं आ सकदा। उंझ हां, जेकर दूजे विअकती तुहानूं लिखण लई प्रेरदिआं तुहाथों उही कुझ लिखवांदे नें जो कि उह चाहुंदे हन तां इह कारज-खेतर, इक लेखक जां इक लेखक बणन दे चाहवान नूं ‘लिखण दी सथिती’ दे नेड़े लै जांदा है। हुण इस मगरों जेकर ‘लेखक’ नें आपणा धिआन अते सोच आपणीआं दिलचसपीआं वल लगा लई है तां समझ लिआ जाणा चाहीदा है कि लिखण दी समस्सिआ नूं हल्ल करन सबंधी विचार बण गई है। इस मगरों निसचै ही ‘लिखण’ सबंधी अगले कदम वी पुट्टे ही जाणगे।

”ऐनौटमी आफ़ ऐन इलनिस अते हीलंिग हारट’ दे करता नारमन कज़निज़’ नें मनुख्खी नसल नूं ‘हां पख्खी’ अते ‘नांह पख्खी’ लोकां विच वंडिआ है। लेखक वी मनुख्ख होण देे नाते इस वंड दी मार हेठ आउंदे हन। लेखक वी हां पख्खी अते नांह पख्खी हुंदे हन, हो सकदे हन। हां पख्खी लोकीं चमतकारी कारज करदे हन अते उहनां विच जीवन नूं, जीवन दी सिखर तक्क जीउण दी सिक्क, लालसा अते शकती हुंदी है। नांह पख्खी लोक जीवन नूं ठेडे खांदिआं ही बिताउंदे हन अते उह रज्जके पिछां-खिचू अते बेतरतीबे हुंदे हन। अजिहे नांह पख्खी लेखक सबंधी किआस वी नहीं कीता जा सकदा।

‘कैनिथ ऐटचिटी’ नें मनुख्खी नसल दी इक होर ढंग नाल वंड कीती है। उसने मनुख्खी नसल नूं ‘सारथक उतपादक’ अते ‘निरारथक उतपादक’ दे रूप विच वंडिआ है। इक्क उह जो सारथक कारज कर सकण दी शकती अते योगता रख्खदे हन अते दूजे उह जिहड़े बहुता समां जां सारा समां निरारथक कंमां विच ही लंघा दिंदे हन। हुण जेकर ‘नसल’ सबंधी कीतीआं गईआं दोहां ही वंडां नूं जोड़ लिआ जावे तां असीं कहि सकदे हां: हां पख्खी सारथक उतपादक अते नांह पख्खी सारथक उतपादक। जां इंझ वी कहि सकदे हां कि इक्क उह जिहड़े कारज कर सकदे हन अते दूजे उह जिहड़े केवल कारज करन, कर सकण जां नां कर सकण दीआं गल्लां ही करदे रहिंदे हन।

सारथक कारज कर सकण दी योगता अते शकती रख्खदे, हां पख्खी लोकीं आपणे हिस्से आए समें नाल पिआर करदे हन। उह ‘समें’ पासों दूजिआं दे मुकाबले ज़िआदा परापत करदे हन। उहनां नूं समझ पै चुक्की हुंदी है कि निरारथक कारज करन वाले नांह पख्खी लोकां दे मुकाबले समें दी ठीक वरतों किवें करनी है। इसतों वी वध्ध उह इह वी जाणदे हन कि समें नूं निरारथक तौर ते लंघाउणा पैण ते वी, बाकी बच्चदे समें विच किवें करतारी अते सिरजणातमिक कारजां नूं नेपरे चाहड़ना है।

इत्थे इक्क उदाहरण दे के सारथक ते निरारथक नूं सपशट करन दा इक्क होर यतन है। अमरीका विच जौहन पी. बौडी हैरिंगटन नां दा इक्क सुप्रसिध्ध ऐंथरोपौलेजिसट होइआ है। जदों उसदी मौत होई, उस समें तक्क, उस वलों लए गए विवरण, दरजणां खोतिआं उते लद्दे जाण जोगे सन। उसदे खरड़े रख्खण अते संभालण नूं थां नहीं सी लभ्भ रही। उसदे लए गए विउरिआं अते खरड़िआं नाल वाशिंगटन डीसी दे समिथसोनीअन इंनसटीटिऊशन दी बेसमैंट भर गई। इहो ही नहीं, उसदे बाकी बच्चदे खरड़िआं नूं संभालण लई कई होर वेअर-हाऊस किराए उते लैणे पए। हैरिंगटन दी जीवनी लिखण वाली लेखिका कैरोि्िबथ लेअरड नें, हैरिंगटन नूं आपणे समें दा सभ तों वड्डा समां गुआऊ आखिआ है। तुसीं शाइद जाण ही लिआ होवेगा कि किउं?

योजना-बध्ध जीवन वांग ही योजना-बध्ध कारज कुशलता अते योजना-बध्ध ‘लेखणी’ दा महत्तव है। नहीं तां ऐवें हवा विच सोटे ही मारन वाली गल्ल है। अरसतू नें तां इक्क कदम होर अग्गे पुट्टदिआं किहा सी कि मनुख्खी वरतारा ही जीवन दी विउंतबंदी है पर हैरानी अते दुख्ख दी गल्ल है कि किवें बहुत थोड़े लोकीं ही ‘योजना-बध्ध’ जीवन नूं गंभीरता अते सारथकता नाल लैंदे हन।

बिनां शक्क, अजिहे लोक, जिहड़े कि सत्थ विच विछीआं दरीआं दे कोणिआं हेठ ही गुआच नहीं जांदे, समें नूं सारथक कारज लई वरतदिआं जेकर संसार दा हर कोणा नहीं तां घट्टो-घट्ट आपणे हिस्से आइआ कोणा तां ज़रूर ही उजला बणा दिंदे हन। चमका दिंदे हन। यूनानीआं नें वी पलानिंग दी महत्तता नूं समझदिआं जीवन नूं सत्त-सत्त वरिੵआं दे खंडां विच वंड लिआ तां जो फैसले लए जा सकण कि इस समें विच की की जां की कुझ करना अते परापत करन लई यतन करना है। पर कई आहंदे सुणदे हां कि योजना-बध्ध जीण लई समां ही कित्थे है?

अते आउ वेखीए, लेखक दे विहड़े समें नूं। समां तां सभ पास अते सभ लई इक्को जिहा ही हुंदा है। इह नहीं कि साडे लई समां घट्ट है अते किसे दूसरे पास समां वध्ध। साडे पास, हां साडे पास समें दी घाट नहीं सगों जेकर घाट है तां योजना-बध्ध विउंतबंदी दी। इतालवीआं दा विचार है कि मनुख्ख पास जीवन नालों वी वध्ध समां है। उहनां दा विचार है कि हर इक्क पास, हर कारज करन लई समां मिल सकदा है बशरते कि मनुख्ख ठीक ढंग नाल समें दी वंड कर सके तां।

इस लई लेखक जां लेखक बणन दी इछ्छा रख्खण वालिआं नूं अज्ज ही आपणे लिखण-जीवन दा नींह-पत्थर रख्ख देणा चाहीदा है। तुहाडी तसल्ली, लिखण सबंधी सोच नाल ही समापत नहीं होणी चाहीदी सगों ‘लिखण’ दे कारज नाल होणी चाहीदी है। बणीआं, सथापत, रचित लिखतां-वसतां सबंधी ही नां सोची जावो सगों बनाउण, सथापत करन अते रचण सबंधी वी सोचो।

इह दरुसत अते समझ आ सकण वाली गल्ल है कि किसे वी योजना जां विउंतबंदी दा आरंभ सदा ही इक्क सुपने नाल हुंदा है। लेखक दी लिखत दा अरंभ वी तां इक्क सुपना ही हुंदा है। पर ज़रूरी गल्ल इह है कि इह सुपना बहुत ही तंदरुसत, तक्कड़ा, गंभीर अते सुंदरता रलिआ होणा चाहीदा है। अजिहा समरथ सुपना, फिर लेखक दे सिर विच, इक्क बच्चे दे जनम-बीज वांग पलणा आरंभ हुंदा है। अते फिर इस सुपने दा पलेठा जनम काग़ज़ उते इक्क खाके दे रूप विच आउंदा है। इसनूं पहिला खरड़ा वी किहा जा सकदा है। इस उपरंत इस ‘उपज’ नूं दूरों खड़ो के देखण दी लोड़ ंपैंदी है। इस मगरों फिर दुहराउ, कांट-छांट अते सोध-सुधाई दी वारी आउंदी है।

दरअसल, मनुख्खी जीवन दी सही तरजमानी आसान कंम नहीं। मनुख्ख दी सिरजणा विच सच्च दी थां है। पर सिरजणातमिक कला दीआं सिख्खरां छोहण लई, लेखक नूं आपणा आपा पहिचानण मगरों सच्च नूं बड़ी मज़बूती नाल पकड़ना पैंदा है। इक्क लेखक बनण दे इछुक्क नें आपणे आप दा किहो जिहा खाका बणाके रख्खिआ होइआ है उसनूं बाहर आउण देण दी लोड़ है। अजिहे ‘आपे दे खाके’ नूं आपणे निज्ज दे ‘लुकवें पुछ्छ पड़ताल दे केंदर’ विच तक्को, विचारो, परखो, घोखो अते परीखिआ लै के आपणे आप नूं पुछ्छो कि की तुहाडी पहुंच योग है? की इह यथारथ दे नेड़े है? अजिहे टीचे जां निशाने जिहड़े पहुंच तों बहुत ही उच्चे होण, लाहेवंद नहीं हुंदे। इसदे उलट, अजिहे टीचे जिहड़े बहुत ही हेठले दरजे दे होण उहनां सबंधी तां विचार करनी ही ग़लत होवेगी। फिर जदों तुसीं आपणे दिमाग विच इसदे आकार जां रूप उते टिक्कटिकी लगा रख्खी होवे तां आपणे आप नूं पुछ्छो कि इस सुपनमई आकार नूं सच्च बनाउण लई किहड़े किहड़े कदम चुक्कणे ज़रूरी हन। बच्चा, मनुख्ख बनण लई जिवें सिख्खदा है तुसीं वी इसदी सफ़लता लई सारे ही पुट्टे जाण वाले कदमां सबंधी सिखण लई तिआर होवो। नकल करके सिख्खो, सवै-विदिआ परापत करो, सकूल, कालज, टैकनीकल कालज, यूनीवरसिटी, लाइबरेरी जाके पहड़ो, गुहड़ो। इह विद्दिआ/सिख्खिआ केवल अकादमिक ही होवे इंझ नहीं है। अकादमकि विदिआ हासल हो सके तां चंगी गल्ल है। पर गिआन परापती लई सभ दरवाज़े खुल्हे हन। जित्थों वी, जिवें वी लेखक दा दिमाग गिआन दा भंडारा हासल कर सके करदा रहे।

लेखक दी लिखत दी सफ़लता लई ही नहीं सगो जीवन दी हर सफ़लता दी गारंटी दा निरभर क्रमवार अगहां दरज कुझ गल्लां उते वी है:

(1) उद्दम, यतन, अणथक्क मिहनत अते द्रिड़ता दी रुची दा होणा बेहद्द ज़रूरी है।

(2) इस पिछ्छों वारी आउंदी है तुहाडे सबंधां दी, मेल-जोल दी, संपरक दी। तुसीं की हो जां की करन दे योग हो तों बाअद तुहाडे संपरक किहो जिहे हन, बहुत महत्तता रख्खदे हन।

(3) की लेखक नूं लिखण दी चाह है? की उस नुं लिखण विच परसंनता मिलदी है?

(4) प्रतिभा, योगता, निपुंनता, लिआकत चौथे थां दी गल्ल है।

संसार भर दे लेखक इस गल्ले सहिमत हन कि उप्पर दित्तीआं चारे गल्लां इक्क लेखक अते उसदी लिखत दी सफ़लता लई बेहद्द ज़रूरी हन। लेखक दी सफ़लता दा निरभर उसदे उद्दम भाव लिखण विच है, लिख्ख के छप्पण लई भेजण विच है अते लिखणा जारी रख्खण विच है कि उसदी लिखत नूं परवानगी मिले। जेकर लेखक दी लिखत नूं पहिलां पहिल परवानगी नां मिले तां अपरवानगी तों बिलकुल ही घबराउण दी लोड़ नहीं (मंदेभागीं पंजाबी विच तां जो मरजी लिखी जावो सभ परवान ही परवान है)। पूरा धिआन लगा के लिखणा अते लिख्ख के भेजदे रहिणा चाहीदा है। लिख्ख लिख्ख के लेखक लई इह पता लगा सकण दी योगता पैदा कर लैणी ज़रूरी है कि उह हठीली, दंभी, बे-असूली अते विघन पाउण वाली लिखत अते सिरजणातमिक (करतारी) लिखत दे अंतर नूं समझ सके। लेखक नूं चाहीदा है कि उह इक्क बार फैसला लै लवे कि उसने किहो जिहा लिखणा है अते इस मगरों फिर दलेरी नाल लिखदे जाण दी लोड़ है। अजिहा फैसला लै चुक्के लेखक दी लिखत, केवल सवै-विशवाश अते अनुसाशन जां नियम-पालणा दी घाट कारन ही असफ़ल होण दी संभावना रख्खेगी नहीं तां सदा ही सफ़लता दीआं पौड़ीआं ही चहड़दी जावेगी।

पाठकां नें देखिआ होवेगा कि प्रतिभा नूं चौथी थां ते रख्खिआ गिआ है। दरअसल इह गल्ल नहीं कि लेखक जां उसदी लिखत विच प्रतिभा दा कोई दख़ल नहीं हुंदा। प्रतिभा दी थां है पर इह इंनी दरकारी नहीं जिंनी कि अनुसाशन अते नियम-बध्ध लिखण दी जुगत दी पालणा करनी। अनुसाशन लई, सवै-विशवास तों वी वध्ध द्रिड़ता दी लोड़ है। लेखक दे सुपने दी पूरती दा दारोमदार उसदे द्रिड़ता नाल कीते गए अणथक्क यतनां सदका उपजी लिखत उते ही है।

अकसर कई चिंतक, प्रतिभा, प्रेरना जां प्रोतसाहन नुं सुरसवती दे वरदान नाल वी जोड़दे हन। सच्च जानणा, लेखक लई किसे सुरसवती देवी दी लोड़ नहीं। सगों सुरसवती दा पिछ्छा छड्ड के, लेखक जी! अनुसाशण दी पकड़-जकड़ हेठ आउ। अनुसाशण नाल ही उतपादिकता हुंदी है। उपज हुंदी है। जेकर सुरसवती दे वरदान दी ही उडीक कीती जांदी रही तां इह लिखत तुहाडी नहीं होवेगी, सुरसवती देवी दी होवेगी। पर जेकर लेखक, आपणे वलों बणाई अते निरधारित कीती गई समें दी वंड प्रणाली अनुसार लिखणा आरंभेगा तां पहिलां तां सुरसवती लेखक नूंं अख्खां कढ्ढ के दिखावेगी अते फिर उह आपणे आप ही तुहाडी लगन नूं देखदिआं तुहाडे लिखण टेबल उते बैठी तुहाडे साहमणे मुसकाएगी।

लेखक दी लिखत भाव लिखे होए शबदां नूं किसे उतपादक वसतूआं दा दरजा देणा शाइद पाठकां नूं जचिआ नां होवे। पर सही अरथां विच लेखक दा उतपादन है उसदी लिखत। थोड़ा जां बहुत, पाठक लेखक दे उतपादन दा मुल्ल पाउंदे हन। पाउंदे हन जां नहीं पर लेखक दी लिखत छप्पण उपरंत लेखक अजिहा किआस तां सकदा है। बस लेखक दे हत्थ इक्क तसल्ली ही आउंदी है होर कुझ नहीं।

हत्थली विचार नूं होर अगहां तोरन दी लालसा विच कुझ टिप्पणीआं हाज़र हन। विचार कर देखणा:

* गोगोल आखदा है: लेखक नूं आपणी कलम दी उसे तरहां ही लगातार वरतों करनी चाहीदी है जिवें चितरकार आपणे बुरश दी करदा है। उसनूं रोज़ ही कुझ नां कुझ लिखणा चाहीदा है। हत्थ नूं, हत्थ विच फड़ी कलम नूं, विचारां दी पूरी अधीनगी विच कंम करना सिख्खणा चाहीदा है।

* कहाणीकार राम सरूप अण्णखी कूकदा है: साहित रचना कोई शुगल नहीं ते नां ही कोई मज़बूरी है।

* प्रो: हमदरवीर नौशहिरवी कहिंदा है: लिखणा कोई मनोरंजन नहीं, कोई तफरीह नहीं। लिखणा इक्क साधना है — इक्क किरत है।

* इक होर विदवान अनुसार इस विच 99 प्रतीशत प्रतिभा हुंदी है अते 99 प्रतीशत मिहनत।

तुसीं दसो, तुसीं की करना है? प्रतिभा दी भाल करनी है कि मिहनत।