पंजाबी कहाणी दे इतिहास विच्च जित्थे विधा पख्खों जटिल-बिरतांत वाली लंमी कहाणी लिखणा मेरी विशेशता गिणी गई ओथे किरसाणी जीवन दे प्रमाणिक चितर पेश करन अते राजनीतक चेतना दी कहाणी लिखण दे नाल ‘पंजाब संकट’ बारे लिखी कहाणी नें वी मैनूं विशेश पछाण दित्ती। मेरीआं इहनां कहाणीआं दी भावें कुझ्झ कु ‘कमिऊनिसट हलकिआं’ वल्लों पहिलां-पहिलां, कुझ-कुझ आलोचना वी होई पर पाठकां दी मिली बहुत वड्डी परसंसा नें मेरी कहाणी दे नाल नाल मेरा कद्द वी उच्चा कर दित्ता। इह कहाणीआं मैं आपणे लहू नूं कशीद करके लिखीआं सन। मैं हर साह नाल उस दौर दे आतंक अते भैअ दे नाल नाल तुरिआ सां। इहनां कहाणीआं विच्च वापरन वाला सभ कुझ्झ मेरे आस पास ही वापर रिहा सी। मेरी शाह-रग़ तों वी नेड़े।

मेरा इलाका अते मेरा पिंड दो-पासड़ काले आतंक दा डंगिआ होइआ सी। है तां विडंबनां ही कि कदी महान देश-भगत सूरबीरां नूं जनम देण वाला अते पंजाब दे किसे वी पिंड नालों गिणती विच्च सभ तों वध्ध सूरमे ग़दर-लहिर नूं समरपित करन वाला इह पिंड इस दौर विच्च पंजाब दे किसे वी होर पिंड नालों वध्ध ‘सटेनधारी’ पैदा करन विच्च वी ‘बाज़ी’ लै गिआ। इह तत्थ समाजशाशतरीआं वल्लों बाअद विच्च कीते अधिऐनां तों पता चल्ले हन। सी आर पी दा निरंतर पहिरा होण दे बावजूद कोई दिन अजिहा नहीं सी हुंदा जिस दिन पिंड वालिआं नें कदी ‘मुंडिआं’ दी गोली दी आवाज़ नां सुणी होवे।

जदों जीअ करदा पुलिस ते सी आर पी वाले सारे पिंड दे पग्ग-बंनह बंदे कई कई घंटे पिंडों बाहर खुल्हे मैदानां विच्च बिठा छड्डदे ते पिंड विच्च ‘अत्तवादीआं’ नूं लभ्भण लई तलाशीआं लैंदे रहिंदे। काले शीशिआं वाली किसे कार विच्च बैठे सूहीए दीआं नज़रां अग्गों सारे पिंड दे लोकां नूं कतारां बंनह के लंघाउंदे। ‘मुंडे’ तां पिंड विच्च आउंदे ते फिरदे ही रहिंदे सन। लोकां नूं मिलदे वी सन। काले शीशिआं वाली कार अग्गों लंघदिआं हर किसे दा साह सूतिआ हुंदा कि पता नहीं कौण अंदर बैठा होइआ है ते उसने कदों उसदा नां लै देणा है! नां लैण लई किसे कोल रात कट्टी होण, रोटी खाधी होण तों इलावा उस नाल ‘सिरफ़ साहिब-सलाम’ होई होण दा गुनाह ही काफ़ी सी। बाहर मरद सूली ते टंगे हुंदे ते घरां विच्च औरतां ते बच्चे-बच्चीआं। उहनां नूं आपणी जान ते इज़्ज़त दोवां दा ख़तरा बणिआं रहिंदा।

इक्क वार मैं जलंधरों बाअद-दुपहिर पिंड अप्पड़िआ। बस्स अड्डे ‘ते उत्तर के वेखिआ पिंड दे लोक पिंडों बाहरवार सकूल दी गराऊंड विच्च भेडां-बक्करीआं वांग इकठ्ठे कर के बिठाए होए सन। सारे पिंड नूं पुलिस नें घेरा पाइआ होइआ सी। पिंड विच्च पुलिस ते सी आर पी तलाशी लै रही सी। उहनां नूं पिंड विच्च अत्तवादीआं दे होण दी ‘उचेची’ सूह मिली सी। बस्सां तों उत्तरन वालीआं पिंड दीआं मेरे वरगीआं सवारीआं पहिलां वांग ही कुझ्झ घंटिआं पिछ्छों घेरा चुक्के जाण ते घर जाण दी आस विच्च बैठीआं हालात-ए-हाज़िरा ‘ते टिप्पणीआं कर रहीआं सन। कुझ्झ कु बंदे अजिहे वी सन जिहड़े घेरा पाउण तों कुझ्झ चिर पहिलां बाहर निकल आए सन। खेतां तों घरां नूं मुड़न वाले वी साडे नाल ही टंगे होए सन।

एसे वेले पिंड विच्च गोलीआं चल्लण दा ज़बरदसत खड़ाक होइआ ते फिर किनहा चिर गोलीआं चल्लदीआं रहीआं। उठ्ठदे धूड़ ते धूंए नूं वेख के हर कोई गोली चल्लण वाले थां दा अनुमान लाउण लग्गा। मैनूं जापिआ गोली मेरे घर दे आस पास ही किधरे चल्ली सी। एसे वेले ‘घोसीआं’ दा तारी आखण लग्गा, “छिंदू हुरीं मारे गए! मैं अजे उहनां नूं मिल के ही आइआ सां। मैनूं लग्गदै उह ओथे ही लुके काबू आ गए नें, घेरे ‘चों निकल नहीं सके।”

उह ठीक ही कहि रिहा सी शाइद। जित्थे उह इक्क उजाड़ मकान विच्च उहनां नूं मिलण दी गल्ल करदा सी, उह मेरे घर तों पंज-दस मकान ही परहां सी। शाम उत्तर रही सी ते हुण नहीं सी लग्गदा कि घेरा चुक्किआ जावेगा ते सानूं घरो-घरी जाण दी इजाज़त मिल सकेगी। किसे नें सी आर पी दे हवाले नाल इह वी आ दस्सिआ कि सारे लोकां नूं पुलिस आपणे पहिरे विच्च पिंड दे छाउणी साहिब वाले गुरदवारे विच्च रात कट्टण लई लै के जाण लग्गी है। किसे नूं नहीं सी पता कि पिंड दी तलाशी सारी रात जारी रहेगी जां घेरा मज़बूत कर के तलाशी दा कंम सवेर तक्क मुलतवी कर दित्ता जावेगा। सारे लोक आपणे जाणकारां दीआं बहिकां ‘ते रात कट्टण लई आपो आपणा जुगाड़ करन दी सोचण लग्गे। उत्तों बद्दल वी घिर आए सन ते विच्च विच्च कदी कदी भूर जिही वी पैण लग्गी सी।

मैं वी सोचिआ बाहर खेतां विच्च बीबी हुरां कोल चले जांदा हां। एसे वेले किसे नें दस्सिआ कि मेरा लड़का सुपनदीप वी पिंड दे सकूल विच्च इकठ्ठी कीती भीड़ विच्च शामल सी। मैं हैरान होइआ कि उसनूं की लोड़ सी बाहर आउण दी? उह घर किउं नां रिहा? उह तां अजे दसां सालां दा वी नहीं सी होइआ! मैं बाहर बहिक ‘ते जाण दा इरादा तरक कर दित्ता अते आप सकूल विच्च घेरे विच्च घिरे बैठे लोकां वल्ल तुर पिआ। छोटे जिहे बच्चे नूं भीड़ विच्च इकल्ला महिसूस करके मैं चिंतातुर हो गिआ। सुपन बारे मैं अजे आपणे आंढ-गुआंढ दे लोकां नूं पुछ्छ ही रिहा सां कि ताइआ लाभ चंद कहिंदा, “फोरसां वालिआं नें लाऊड सपीकर ‘च आखिआ कि दस-बारां साल तों वध्ध दे सारे मरद घरां ‘चों बाहर आ जाण। निक्का काका कहिंदा सी कि मैं वी जाणै। मैं दसां सालां दा हो गिआं। ऐथे ही किते फिरदा सी।”

एने चिर विच्च सुपन वी पता लग्गण ‘ते भीड़ दीआं लत्तां विचों थां बणाउंदा मेरे कोल आण पुज्जा। सारे पिंड वासी कतारां बणा के गुरदवारे दे अहाते विच्च लिजाए गए। बारां पत्तीआं वाले पिंड दे एने लोकां दी भीड़ लई सिर लुकाउण वासते गुरदवारे दी इमारत ते होर थां थोहड़ी सी। बाबे बिधी चंदीआं नें लंगर तां नां थुड़न दित्ता पर लोड़ अनुसार कमरे अते बरांडे थुड़ गए सन। तिंन-चार हज़ार बंदिआं लई रजाईआं वी कित्थे पूरीआं आउणीआं सन! जित्थे अड़तला लभ्भा, लोक थां मल्ल के बहि गए। कईआं नें खुल्ल्हे मैदान विच्च पई पराली दे ढेरां ‘ते डेरे ला लए। रजाईआं दी थां आपणे उत्ते पराली दे थब्बे सुट्ट लए। उत्तों कुदरत दी करोपी इह होई कि कदी मींह वरहन लग्ग पैंदा ते कदी रुक जांदा। लोकां नें सारी रात बुरे हालीं कट्टी।

दिन चहड़िआ तां गुरदवारे दे लंगर विच्च तिआर होई चाह नें निघ्घ दित्ता। लोक कल्ल्ह तों हुण तक्क वापर रही होणी बारे गल्लां कर रहे सन। सारे आपणे घरां ते बाल-बच्चिआं बारे फ़िकरमंद सन। ओधर घर विच्च रहि गए जीआं नूं आपणे बंदिआं दी चिंता सी। पिंड विच्च कल्ल्ह दुपहिर तों लै के करफ़िऊ वाली हालत बणी होई सी। बारां कु वजे पिंड विचों फिर गोलीआं दी गड़गड़ाहट दी लंमी आवाज़ आई। कोई भाणा वापर गिआ सी।

शाम तक्क सानूं घर जाण दी आगिआ मिली। सुपनदीप ते मैनूं वेख के रजवंत दा साह विच्च साह आइआ। इस घेरे विच्च पिंड दे दो मुंडे रातीं ते तिंन सवेरे मारे गए सन। मैनूं इह जाण के हैरानी होई कि साडे घर दे पिछवाड़े रहिंदे धिआन सिंघ निहंग दा अणदाहड़ीआ मुंडा शबेगा वी मारिआ गिआ सी। उह कदों कु दा इहनां नाल तुरिआ होइआ सी! उह तां बड़ा भोला-भाला ते सिध्धड़ जिहा सी! उसनूं चल्ल रही इस सिआसत दा तां शाइद इक्क अख्खर वी नहीं सी आउंदा! जदों उह निक्का जिहा बाल सी तां साडे घर रोज़ सवेरे लवाइआ दुध्ध देण आउंदा सी। मैं गुआंढ-मत्था होण करके अफ़सोस करन जाणा ही सी। किसे नें घरदिआं नाल अफसोस करदिआं किहा, “छोटी उमर विच्च तुर जाणा गल्ल तां बड़े दुख्ख दी है पर कौम तों कुरबान होणा वी किसे करमां वाले दे नसीबां विच्च ही हुंदा है! शहीदी जाम पी के शबेग सुंह आपणा ते कौम दा नां रोशन कर गिआ!”

शबेगे दे ताए गिआन सिंघ नें वड्डी सारी गाल्ह कढ्ढी, “उहनूं की पता कौम की हुंदी आ ते कुरबानी की ए? जिसनूं बहुता शौक ऐ आप कुरबानी कर के वेख लवे जां आपणा मुंडा मरवा के वेखे। उह तां चाह पीण आ वड़े भैं-दे ढहे चहड़ गिआ। सटेन हत्थ ‘च फहड़ के कमला हो गिआ। कहिंदा मैं तुहाडे नाल जाणैं। मैं वी रोकिआ, धिआन सुंह वी रोकिआ। आखण लग्गा दो कु दिन बदाम खा के आ जाऊं। नां अग्गों नां पिछ्छों, आह चौथ दी गल्ल ई, ओदण उहनां नाल तुर गिआ।”

उस साधारन किरसाण दे बोलां विच्च बच्चे दे तुर जाण दा दरद वी बोल रिहा सी ते लईआं ते दित्तीआं जा रहीआं ‘कुरबानीआं’ बारे द्रिशटीकोन वी परगट हो रिहा सी।

घेरा टुटण तों अगले दिन बाअद दुपहिर तिंन लाशां दा ससकार पिंड दे चहड़दे पासे ते दो दा लहिंदे पासे होइआ। ओसे रात उहनां दीआं बलदीआं चितावां ‘ते मुंडिआं नें आ के फिर दड़ा-दड़ अध्धा घंटा गोलीआं चला के आपणे ‘जिऊंदे होण’ दी ख़बर दे दित्ती।

इक दिन साडे खेतां दे नेड़े ‘मुकाबला’ होइआ ते तिंन मुंडे मारे गए। मैं अगले अगलेरे दिन खेतां विच्च गिआ तां आपणे भरा नूं पुछ्छिआ कि मुकाबले विच्च मारे जाण वाले कौण सन? उसने दस्सिआ कि ‘फलाणे’ हुरीं इथों साडे कोलों ही ऐधर सूए वल्ल लंघे सन। अग्गे सी आर पी वालिआं दा नाका सी। उहनां नें फाइरिंग खोल्ह दित्ती ते मुंडे मारे गए। उसने इह दस्स के मैनूं हैरान कर दित्ता, “चौथ जिहड़ा फरंदीपुरीआं दा समध्धर जिहा मुंडा आपणी बासमती झंबा रिहा सी। उह कंजर ऐवें ही शौक शौक विच्च उहनां नाल तुर गिआ ते भंग दे भाड़े मारिआ गिआ। आखदा सी, दो कु दिन बाबिआं दे रंग-तमाशे वी वेख आईए!”

इहनां विच्च ‘भंग दे भाड़े’ मारे जाण वाले मुंडे वी हुंदे ते आपणी सोच दी प्रतीबध्धता लई मारे जाण वाले वी। मेरीआं पैलीआं दे नेड़े ही इक्क दिन साडी गुआंढी बहिक वालिआं दा मुंडा ते मेरा शागिरद ‘लैफ़टीनैंट जनरल’ हरजिंदर सहिवन ही सी आर पी वालिआं दे खेतां विच्च मारे गेड़े समें बंबी तों निकल के आपणे बचा लई दौड़िआ। उह साडे परिवार दे जीआं दे साहमणे चल्लीआं गोलीआं दे वटांदरे विच्च मारिआ गिआ।

इस घटना नूं होए कुझ्झ दिन ही बीते सन कि ‘मुंडिआं’ नें इक्क परिवार दे चार जीअ मार दित्ते। कुझ दिनां बाद पता लग्गा कि दसवीं पास करके गिआ मेरा इक्क होर शागिरद परमजीत, जो ‘ओधर’ तुर पिआ सी, सी आर पी वालिआं दे काबू आ गिआ। सी आर पी दे इंसपैकटर नें उसनूं छड्डण दा तिंन दिनां दे विच्च विच्च लख्ख रुपईआ लैणा मंगिआ। उसदे गरीब मापे फड़-फड़ा के मसां तीह हज़ार ही इकठ्ठा कर सके। इंसपैकटर कोल जा के अरज़ गुज़ारी कि उह एने पैसे लै के मुंडा छड्ड देवे; उह हर हालत विच्च अगले दिनां विच्च ‘उसदा’ लख्ख रुपईआ पूरा कर देणगे। उसने अग्गों इनकार करदिआं इक्क दिन विच्च ही लख्ख रुपईआ देण दी मंग करड़ाई नाल दुहरा दित्ती। इक्क दिन विच्च उह विचारे लख्ख रुपईआं कित्थों लै के आउंदे! जे लिआ सकदे हुंदे तां पहिलां नां लै के जांदे! तीजे दिन मुंडे दे ‘पुलिस मुकाबले’ विच्च मारे जाण दी ख़बर आ गई।

इंज ही मेरा होर शागिरद परगट बाबा बुढ्ढा साहिब दी बीड़ वल्ल, पिंड दी टराली विच्च, होरनां नाल मेला वेखण जांदा पुलिस नें टराली विचों लाह लिआ। फेर उसदी कोई उघ्घ-सुघ्घ पता नां चल्ली। कुझ्झ दिन होर ते मुंडिआं नें फिर किसे टब्बर दे पंज जीअ मार दित्ते। इक्क होर दिन: मेरे जमाती रहे किरपाल (इह उहो किरपाल सी जो कदी सी आई डी विच्च हुंदा सी ते बाअद विच्च नौकरी छड्डके पिंड दी सिआसत विच्च सरगरमी नाल कंम कर रिहा सी) नूं पिंड दे ही मुंडिआं नें इस करके मार दित्ता किउंकि उह होण वालीआं पंचाइत-चोणां दी अवाई सुण के सरपंच खलोण दी इछ्छा रख्खदा सी!

इह तां ऐवें चल्लदिआं चल्लदिआं ‘गिणती कराउण वाली गल्ल’ है। सच्ची गल्ल तां इह है कि मेरे पिंड नें इक्क दिन विच्च कई कई लाशां दे ससकार हुंदे वेखे। चिट्टे लीड़े पा के साडे पिंड अफ़सोस लई आउण अते दूजे पिंडां विच्च अफ़सोस करन लई जाण वालिआं दीआं भरीआं टरालीआं दुख्ख दा बोझ झल्लणो असमरत्थ हो गईआं जापदीआं सन। जिहड़े लोकां दी मौत दा ज़िकर कीता है इह सारे ‘सिख्ख’ सन; मरन वाले वी ते मारन वाले वी। इह कैसी, ‘सिख्खां दे हितां ते आज़ादी दी लड़ाई’ लड़ी जा रही सी! पुलिस वल्लों मारे गए वी सारे दोशी नहीं सन ते मुंडिआं वल्लों मारे जाण वालिआं दा वी अजिहा कोई कसूर नहीं सी कि उहनां नें ‘लड़े जा रहे संघरश’ विच्च कोई रुकावट पाई होवे जां किसे प्रकार दी कोई मुख़बरी कीती होवे। उहनां दा कसूर तां सिरफ़ एना कु ही हुंदा सी कि उहनां दी पिंड दे ही किसे होर शरीक नाल लाग-डाट हुंदी सी। ‘मुंडिआं’ नाल जुड़ी दूजी धिर इस निज्जी परिवारक रंजिश नूं ‘कौम नाल कीते जांदे किसे ध्रोह नाल जोड़ दिंदी सी’ ते अगलिआं दे परिवार दा घाण-बच्चा-घाण कर दित्ता जांदा सी।

इक्क वार तां मैं ते मेरा परिवार वी एसे ज़ाती रंजिश दा शिकार हो चल्लिआ सी। इह बलू सटार आप्रेशन तों कुझ्झ महीने पहिलां दी गल्ल है। मेरे सकूल दा पी टी अधिआपक बारडर ‘ते रहिण वाले वड्डे समगलर परिवार दा मुंडा सी। बड़ा ही मिलणसार ते मिठबोलड़ा। उंज वी उसदे पैसे, उनहां दे परिवार दी सरदारी ते अज्ज-कल्ल्ह भिंडरांवाले संत नाल उहनां दी नज़दीकी करके सारे अधिआपक ते विदिआरथी उसदी पैंठ मंनदे सन। मेरे नाल उह बड़े आदर नाल पेश आउंदा।

पर इक्क वार साडी दोवां दी ठण गई।

उह सवेर तों लै के अध्धी दिहाड़ी तक्क मुंडिआं नूं कबड्डी खिडाई जांदा। कुझ्झ मुंडे खेड रहे हुंदे, बाकी तमाशबीन बण के वेखदे रहिंदे। हैड्डमासटर उसनूं कुझ्झ कहिण जोगा नहीं सी। बाकी अधिआपकां नूं इतराज़ कोई नहीं सी। इतराज़ सी तां मैनूं कि उहदी कबड्डी खिडाउण दे समें विच्च मेरी जमात दा पीरीअड रोज़ अंजाईं चला जांदा सी। मैं दो कु दिन मुंडिआं नूं समझाइआ कि मेरी जमात लग्गण तक्क उह कबड्डी तों विहले हो के आ जाइआ करन। पर पी टी उहनां नूं आउण नहीं सी दिंदा। तीजे कु दिन तां उसने उहनां नूं इह वी कहि दित्ता कि उह निरसंकोच हो के खेडदे रहिण, उसदे हुंदिआं उहनां नूं कोई कुझ्झ नहीं आख सकदा! हो सकदा है उसने मेरे ‘ते माण जां अधिकार समझदे होए ही इह किहा होवे पर मैनूं उसदी इह गल्ल लड़ गई। अगले दिन उहदी हाज़री विच्च कौडी खेडदिआं मुंडिआं नूं कप्पड़े पवा के ते अग्गे तों ‘बंदे दे पुत्त’ बणन लई आख के मैं जमात वल्ल तोर लिआ तां उह गुस्से विच्च मेरे वल्ल वेखदा ही रहि गिआ। उसनूं लग्गा मैं उसदी मुछ्छ नीवीं कर दित्ती है!

ओसे रात उहनां दे घर खाड़कू आए। उसने उहनां नूं मेरे बारे किहा कि ‘मैं संतां दा बड़ा वड्डा निंदक ते दोखी हां अते उसदे वार वार समझाउंदे रहिण ‘ते वी मैं आपणी करतूत तों बाज़ नहीं आउंदा! मेरे वरगे ‘पंथ-दोखी’ नूं जिंनी छेती सोधा लाइआ जावे ओना ही ‘पंथ दे भले दी गल्ल’ है।’

अग्गों उहनां नें मैनूं हफ़ते दे विच्च विच्च परिवार-समेत सोध देण दा वचन दित्ता।

अगले दिन पी टी नें आपणे दोसत-अधिआपक दरशन नूं मेरे सोधे जाण दे फ़ैसले दी ख़बर सुणा दित्ती। दरशन मेरा बी ऐड्ड दा जमाती रहि चुक्का सी। उसने उसनूं इह पाप करनों रोकिआ। साडी सुल्हा-सफ़ाई वी करवा दित्ती गई। पर जिहड़ा तीर छुट्ट चुक्का सी उसदा की कीता जावे! दरशन मैनूं तां कुझ्झ नां दस्सिआ पर ओसे वेले पी टी दे ही पिंड दे अते पी टी दे रहि चुक्के सतिकारयोग अधिआपक काहन सिंघ नूं इह गल्ल जा दस्सी। पी टी दा अधिआपक काहन सिंघ मेरा नज़दीकी मित्तर सी ते उहदे करके ही पी टी मैनूं वी अधिआपकां वरगा आदर दिंदा रिहा सी। काहन सिंघ ते दरशन नें पी टी नूं उहदी करतूत लई शरमिंदा कीता ते उह तिंने जणे दो दिन लगातार इक्क पिंड तों दूजे पिंड खाड़कूआं दीआं ठाहरां लभ्भदे रहे ताकि लिआ गिआ मारू फ़ैसला बदलिआ जा सके।

तीजे दिन उहनां तिंनां नें इक्क बहिक ‘ते खाड़कूआं नूं जा लभ्भिआ। उहनां नूं वेखदिआं ही उहनां दे आगू नें किहा, “मासटर जी नूं साडे ते यकीन नहीं लग्गदा। कल्ल्ह रात नूं तुहाडे मन दी मुराद पूरी हो जाऊ अते उह पंथ-दोखी समेत परिवार नरकां विच्च पहुंच जाऊ। इह दो दिन वी तां कर के लग्ग गए कि असीं उहदे टिकाणे दा पूरा पता लाउंदे रहे आं। नहीं इतबार तां सुणों! असल विच्च उहनां दा घर बाज़ार विच्च होण करके सवेरे तां ओथे सी आर पी फिरदी रहिंदी है। इह कंम रात नूं होण वाला है। इकल्ले दी गल्ल हुंदी तां असीं सकूले जा के ही सोध देणा सी पर हुण सणे टब्बर कल्ल्ह रात नूं घरे ही ‘गड़ गड़’ होऊ। जे साडे ‘ते नहीं यकीन तां अग्गे सुणों, उहनां दे घर दी साहमणी अते पासे दी बाज़ार वाली बाही तों टप्प के घर अंदर जाइआ जा सकदा है। कंधां मसां दस दस फुट्ट ही उच्चीआं नें। उह सारा टब्बर बाहर विहड़े विच्च पख्खा ला के सौंदे नें। हुण है कोई बेइतबारी? कल्ल्ह नूं इह कंम होइआ लओ। हुण कोई होर सेवा दस्सो।”

उसदा ख़ौफ़नाक हासा सुणके काहन सिंघ बोलिआ, “जथेदार जी! असीं होर सेवा की दस्सणी एं। असीं तां दोवें हत्थ जोड़ के तरला करन आए आं कि इहदे कोलों उस मासटर बारे आपस विच्च होए मामूली जिहे झगड़े करके होए रोसे कारन तुहानूं इह सारा कुझ्झ गलती नाल आखिआ गिआ। किरपा करके उसनूं सोधण दा आपणा फ़ैसला बदल लओ। उस मासटर विचारे दा कोई कसूर नहीं। बख़श दिओ उसनूं। तुसीं नां मिलदे तां इहनां दी आपसी ग़लतफ़हिमी दी निक्की जिही लड़ाई दा किड्डा वधाण वध जाणा सी ते इक्क असलो बेकसूर टब्बर मारिआ जाणा सी! इह तां दोवें अगले दिन तों फेर घिओ-खिचड़ी होए फिरदे नें!”

जथेदार अग्गों आखण लग्गा, ‘उह संतां नूं अबा-तबा बोलदा है। कामरेड आ। कामरेड नूं तां असां हुण नहीं छड्डणा।’

उहनां फिर हत्थ जोड़े। पी टी नें किहा, ‘बाबा जी मैथों ही गुस्से विच्च भुल्ल हो गई। कामरेड कूमरेड कोई नहीं विचारा! उह तां हीरा बंदा है। हत्थ बंनह के बेनती है कि भाणा नां वरताइओ।”

इह सारा बिरतांत मैनूं उस घटना तों डेढ दहाका बाअद काहन सिंघ नें सुणाइआ जिसदा पी टी अते ‘बाबिआं’ नूं समझाउण विच्च मुख रोल सी। पी टी तां इस घटना तों कुझ्झ चिर पिछों परिवार दे किसे वड्डे जीअ वल्लों उसदी हउमैं नूं ज़ख़मी कीते जाण करके ख़ुदकुशी कर गिआ सी। साडा दूजा अधिआपक साथी दरशन वी किसे हादसे विच्च कुझ्झ साल पिछ्छों चलाणा कर गिआ। उस मिहरबान मित्तर नें वी आपणे जिऊंदे जी मैनूं कदी नहीं सी जताइआ कि मेरी ते मेरे परिवार दी जान बचाउण विच्च उसदा किंनां वड्डा रोल रिहा सी। जे डेढ दहाके बाअद ऐवें गल्लां गल्लां विच्च काहन सिंघ इह सारा वेरवा मैनूं नां दस्सदा तां इस भिअनाक रहस्स ‘ते परदा ही पिआ रहिणा सी।

पर मेरे परिवार नाल वापरदी वापरदी रहि गई दुरघटना उस वेले होर कई परिवारां नाल वापर रही सी अते निज्जी किड़ां कढ्ढण लई बेदोशे लोकां दा घाण होई जा रिहा सी। सारे मेरे जिंने ख़ुश-किसमत नहीं सन कि उहनां दा बचा हो जांदा!

रात समें मुंडिआं दा राज हुंदा अते दिने पुलिस ते सी आर पी वालिआं दा। दोवां धिरां दी इस लड़ाई विच्च मेरे पिंड दे घट्टो-घट्ट चार कु दरजन बंदे मारे गए होणगे; कुझ्झ पुलिस दी गोली नाल ते कुझ्झ ‘मुंडिआं’ दी गोली नाल। इहनां विच्च दरजन कु तां मेरे विदिआरथी सन जिहड़े मेरे कोलों पहड़ के गए सन अते जिनहां विचों बहुतिआं नूं सकूल विच्च साऊ लड़के करके जाणिआं जांदा सी। पता नहीं हालात दी कैसी खिच्च सी कि मुंडे रोकदिआं वी ‘ओधर’ भज्जे जांदे सन! सकूल दे वड्डीआं जमातां दे विदिआरथी दिने सकूल विच्च हाज़र हुंदे ते रातीं आपणे घरां विच्च आए ‘खाड़कूआं’ दी सेवा विच्च रुझ्झे रहिंदे। कुझ्झ इक्क तां दो-दो दिन उहनां नाल बाहर वी ला आउंदे। इह सारी सूचना मैनूं मुंडिआं कोलों ही मिलदी रहिंदी सी।

इक्क दिन दसवीं जमात दा बहुत ही साऊ मुंडा सकूल दे अहाते विच्च बैठे अधिआपकां दे आले दवाले साईकल चलाउण लग्गा। हैडमासटर नें रोकणा चाहिआ तां उह उसदे गल पैण नूं आइआ। असीं हैरान कि इसनूं की हो गिआ है? ख़ैर- उसनूं मैं उठ्ठ के ते समझा-बुझा के साईकल चलाउणो तां रोक दित्ता पर जदों दूजे मुंडिआं नूं भरोसे विच्च लै के पुछ्छिआ कि इस विच्च अज्ज किहड़ा जिंन आ वड़िआ सी तां उहनां दस्सिआ कि रातीं बाहर इहनां दी बहिक ‘ते ‘सिंघ’ आए सन ते इहदे विचों अज्ज ‘उह’ बोल रहे सन!

इलाके विच्च किते नां किते झूठा-सच्चा मुकाबला होइआ रहिंदा। मुंडे मारे जांदे ते उहनां दे भोग तक्क बंद आ ऐलान हो जांदा। सकूल, दुकानां, बैंक, टरांसपोरट ते होर अदारे ओने दिन खुल्ल्ह नां सकदे। कोई महीना इहो जिहा नां हुंदा जदों लोकां नूं बंदां दा साहमणा नां करना पिआ होवे। लोक इस माहौल तों पुर पुर दुखी सन। पर कर कुझ्झ नहीं सन सकदे। दूजे पासे डिओूटी ‘ते आउण वाले मुलाज़मां नूं होण वाले ‘बंदां’ कारन ‘छुट्टी’ मानण दीआं मौजां हो जांदीआं। इक्क दिन तां अजिहा वी होइआ कि साडे सकूल दी अंम्रितसरों आउण वाली इक्क अधिआपका खुशी विच्च डुल्ल्हदी आखण लग्गी, “अज्ज बस्स विच्च पता लग्गै कि भुच्चर पिंड विच्च ‘मुकाबला’ चल्ल रिहै ते कुझ्झ मुंडे मारे वी गए नें। भा जी, जे किते इहनां मुंडिआं विच्च तुहाडे पिंड दा वी कोई मुंडा होइआ तां मौजां बण जाणगीआं! भोग वाले दिन तक्क तां फिर सकूल नहीं लग्गण लग्गा!” बंदे दी जान नालों ‘छुट्टी’ दा मुल्ल वध गिआ सी। किथों तक्क डिग पिआ सी बंदे दी जान दा मुल्ल!

विदिआ दा तां असलों बुरा हाल हो गिआ सी। सकूल दे विदिआरथी सकूल लग्गे ‘ते भज्जे फिरदे। जदों जी करदा सकूलों निकल के बाहर रौड़ विच्च खेडदे रहिंदे, रेहड़ीआं दुआले भीड़ जमहां कीती रख्खदे। बाज़ार विच्च बेमुहार घुंमदे रहिंदे। ताश वालिआं दी ढाणी पिछ्छे खलो के पत्ते वेखदे रहिंदे। बलैक बोरड ‘ते नाअरहे लिखे हुंदे, ‘ख़ालिसतान कमांडो फ़ोरस-ज़िंदाबाद!’, ‘भिंडरावाला टाईगर फ़ोरस-ज़िंदाबाद’। किसे अधिआपक-अधिआपका दी हिंमत नां हुंदी कि बोरड ‘ते लिखे नाअहरे मिटा के आपणे मज़मून नाल संबंधत कोई टिप्पणी बोरड उत्ते लिख सके! अधिआपक जदों जी करदा सकूल आउंदे, जदों जी करदा फरलो मार लैंदे। शहिरों आउण वाले अधिआपक-अधिआपकावां सकूल समें तों अध्धा-पौणा घंटा पहिलां छुट्टी करके शहिर वल्ल भज्जण दी करदे। सवेरे मन-मरज़ी नाल लेट आउंदे। जमात विच्च जाणा जां नां जाणा वी उहनां दी मरज़ी ‘ते निरभर हुंदा। हैड्डमासटर किसे नूं कहिण जोगा नहीं सी रहि गिआ। ‘हिंदू’ सी नां विचारा!

इह उहो हैड्डमासटर सी जिसने दस कु साल पहिलां आ के इस सकूल दी काइआ पलट दित्ती सी। सकूल दा अनुशासन सुधर गिआ सी। पहड़ाई दा पध्धर उच्चा हो गिआ सी। पर अज्ज उह हालात दे हत्थों लाचार सी। जिहड़े मुंडे दा जी करदा, उस अग्गे आकड़ जांदा। हुण तां सकूल दे चौकीदार-माली जगन नाथ तों इह वी पता लग्गा सी कि ओपरे मुंडे छुट्टी तों बाअद इक-दो वार सकूल दा गेड़ा कढ्ढ के सारे कमरिआं दा जाइज़ा वी लै के गए सन। उहनां नें हैड्डमासटर दा हुलीआ वी पुछ्छिआ सी।

इह सुण के हैड्डमासटर दा डरना सुभाविक सी। जान किसनूं पिआरी नहीं हुंदी! उसने मैनूं सकूल दा इनचारज बणा के लंमी छुट्टी ‘ते जाण दा निरणा कर लिआ। सनिआरटी विच्च दूजे नंबर ‘ते मासटर मदन मोहन सी। उह वी शहिरों आउंदा सी। उह कहिंदा सी, उसनूं वी तां आपणी जान दी लोड़ है! तीजे नंबर ‘ते मैं सां। हैड्डमासटर समेत सारे अधिआपक-अधिआपकावां मैनूं ही सक਼ूल संभालण ‘ते ज़ोर दे रहे सन। सभ नूं, शाइद, मेरी जान ही वाधू लग्गदी सी। मैं सभ दी इछ्छा अग्गे इह वचन लै के सिर झुका लिआ कि उह सकूल नूं सांझी ज़िंमेवारी नाल चलाउण विच्च मेरा साथ देणगे।

होइआ वी इंज ही। सभ जणिआं नें मेरा साथ दित्ता। मैं उहनां नूं बेनती कीती कि लोड़ मुताबक जदों किसे दा जी करे उह छुट्टी जां फ़रलो लै के जा सकदा है पर जिंनां चिर डिऊटी ‘ते होवे आपणी ज़मीर अग्गे जवाब-देही समझ के जमातां विच्च ज़रूर जावे अते सक਼ूल अनुशासन नूं बणाई रख्खण विच्च दिलों मनो सहाई होवे। विदिआरथीआं दी हरेक जमात दी पंचाइत बणा दित्ती ते सारीआं जमातां विचों चोणवें मुंडे लै के इक्क सुपर-पंचाइत बणा दित्ती। इहनां पंचाइतां विच्च उह मुंडे वी लए जिनहां दे भरा-भाई ‘जरनैल’ बण के खाड़कूआं विच्च विचर रहे सन। उहनां नूं समझाइआ कि सच्ची सिख्खी ग़लत दे ख़िलाफ़ ते चंगिआई दे हक्क विच्च लड़ाई लड़न दी सिखिआ दिंदी है। सच्ची सिख्खी वड्डिआं ते अधिआपकां दा आदर करना सिखाउंदी है, उहनां दी पत लाहुण दा सबक नहीं दिंदी! विदिआ-प्रापत करना ते सकूल नियमां दा पालण करना उहनां दी आपणी ज़िंमेवारी है किउंकि सकूल उहनां दा है अते विदिआ लैण जां नां लैण नाल होण वाले फ़ाइदे-नुकसान नाल उहनां दी आपणी ज़िंदगी जुड़ी होई है, किसे अधिआपक दी नहीं। सिख्खी रवाइत दी प्रेरना दे के किहा कि पंजां विच्च प्रमेशर हुंदा है अते पंचाइत दा हुकम गुरू जी नें वी नहीं सी मोड़िआ। इस लई विदिआरथीआं दे नियम तोड़न जां ग़लती करन ‘ते फ़ैसला जमात दी पंचाइत नें ही करना है ते फ़ैसला करदिआं इह वी धिआन रख्खणा है कि सच्च-झूठ दा नितारा करदिआं गुरू वी तुहाडे अंग-संग खलोता है! जे उहनां तों फ़ैसला नां हो रिहा होवे तां उह सांझी सुपर-पंचाइत कोल जा सकदे हन। ‘मुकद्दमे’ दी सूचना मैनूं ज़रूर नाल दे नाल दित्ती जावे। लोड़ पैण ‘ते मैं वी पंचाइत विच्च बैठांगा पर अंतम फ़ैसला पंचाइतां ही करनगीआं। असलों ही सिरों लंघ जाण वाली गल्ल दा फ़ैसला मैं आप करांगा।

इस नाल विदिआरथीआं नूं महिसूस होण लग्गा कि उह जिवें आपणे घर दा प्रबंध ही संभाल रहे होण। कुझ्झ ही दिनां विच्च सकूल बाकाइदा लग्गण लग्गा। अधिआपकां ते विदिआरथीआं दे सांझे ताल-मेल नाल पहड़ाई वी होण लग्गी ते अनुशसान वी काइम हो गिआ। मैं उहनां अंदरला सच्चा सिख्ख जगा दित्ता सी। मेरी इनचारजी दे उस सारे दौर विच्च विदिआरथीआं विच्च होए झगड़िआं दे सारे फ़ैसले मेरी हाज़री विच्च पंचाइतां दी मरज़ी नाल हुंदे रहे। मैं इह समझाइआ होइआ सी कि जे कोई विदिआरथी आपणी ग़लती मंन लवे तां उसनूं मुआफ़ी दे के झगड़ा मुका देणा चाहीदा है किउंकि सिख्खी बख़शण-हार है! इसतों वध्ध उस दौर विच्च होर कीता वी की जा सकदा सी! इसदा चमतकारी असर होइआ। छोटे झगड़े तां पंचाइतां आप ही नजिठ्ठ लैंदीआं पर वड्डे झगड़े मेरी हाज़री विच्च वड्डी पंचाइत नजिठ्ठ लैंदी।

आगू मुंडे एने सच्चे-सुच्चे हो गए कि किसे नाल वी पख्ख-पात नां करदे। उह सदा ग़लत नूं ग़लत कहिंदे। जदों मैं ग़लती करन वाले दी ज़मीर नूं टुंबदा तां उह ग़लती मंनण लई तिआर हो जांदा। इक्क वार मेरी ग़ैरहाज़री विच्च इक्क गभ्भरू मुंडा किसे अधिआपक दे गल पैण नूं तिआर हो गिआ। सारे अधिआपक निराश हो गए। जे इसतरहां ही उहनां दी बेइज़ती होणी है तां उह काहदे लई खपदे फिरन! मैं वी चिंतातुर हो गिआ। बणी खेड विगड़ चल्ली सी। जमात विच्च जा के पंचाइत इकठ्ठी कीती। पंचाइत नें मुंडे नूं कसूरवार दस्सिआ। उस मुंडे दा पिउ बलू सटार आप्रेशन वेले संत भिडरांवाले दा साथी रिहा सी। मैं उस अंदरले सिख्ख नूं संबोधन हो के पुछ्छिआ कि की आप बणाए नियम तोड़ के ते अधिआपक दी बेइज़ती कर के उसने सच्चे सिख्ख वाला फ़रज़ अदा कीता है!

उसने ग़लती मंन के अधिआपक कोलों मुआफ़ी मंग लई। कुझ्झ दिनां पिछ्छों ही आप्रेशन बलैक थंडर समें दरबार साहिब कंपलैकस विचों उसदी ग्रिफ़तारी दी सूचना मिलण ‘ते सभ दे साह सूते गए। असल विच्च उसदा तां कई चिर तों दरबार साहिब विच्च रहिंदे खाड़कूआं नाल संपरक सी ते उह ओथे अकसर ही आउंदा जांदा सी। उसतों सकूल विच्च किसे तरहां दी वी गड़बड़ जां दुरघटना कीते जाण दी संभावना नूं ख़ारज नहीं सी कीता जा सकदा। पर इह सिख्खी सपिरट वाले पंचाइती राज दी शुध भावना उस अंदर जगा दित्ते जाण दी करामात सी कि उह आपणी ग़लती मंन के अधिआपक कोलों मुआफ़ी मंग गिआ सी।

इस तजरबे तों मैं सोचण लग्गा कि जे साडे आगूआं नें पहिलां आपणे अंदर ते फिर आपणे पिछ्छे लग्गण वाले लोकां अंदर सच्ची सिख्खी नूं जगाउण दा कदी कोई चारा कीता हुंदा तां असीं कदी वी इहो जिहे माड़े हालात विचों नां गुज़रदे।

इस हालात विच्च मैं खुद वी मरदा मरदा बचिआ। इक्क दिन मैं सकूल दे मेन गेट दे नाल बणे शैड्ड विच्च जमात लाई होई सी कि बाहर मोटर साईकल दा खड़ाक सुणिआं। दरवाज़े नूं मैं ताला मरवा कर रख्खदा सां। किसे मुंडे नूं बाहर वेखण लई किहा तां मोटर साईकल वालिआं नें उस कोलों हैड्डमासटर बारे पुछ्छिआ। “ऐथे ई नें” मुंडे नें उहनां नूं आख के मैनूं दस्सिआ, “तुहानूं बुलाउंदे नें।”

पिछले कई महीनिआं तों हैड्डमासटर तां सकूल नहीं सी आ रिहा। पिंड वाले ते सकूल दे मुंडे वी हुण मैनूं ही ‘हैड्डमासटर’ समझण लग्गे सन। दरवाज़े अग्गे हो के वेखिआ; पिछली सीट ‘ते बैठे मुंडे नें सटेन गंन दी नाली लोई दी बुक्कल विचों बाहर कढ्ढ के सिध्धी मेरे वल्ल ताणी होई सी। मैनूं वेख के उह थोड़े हैरान होए। पिछले नें अगले दे कूहणी मार के कुझ्झ पुछ्छणा चाहिआ। अगले नें किहा, “असीं दसवीं जमात दे --–मुंडे नूं मिलणै।”

कोल खलोते मुंडे नूं दसवीं विच्च पहड़दे मुंडे नूं बुलाउण लई आख के मैं आप दरवाज़े तों ओहले हो के जमात विच्च जा खलोता। उहनां नें ‘दसवीं विच्च पहड़दे मुंडे’ दी कोई उडीक नां कीती किउंकि उस नां दा कोई मुंडा दसवीं विच्च पहड़दा ही नहीं सी। उह ओसे वेले मोटरसाईकल नूं किक्क मार के ‘हरन’ हो गए। असल विच्च उह आए तां असली हैडमासटर नूं ‘मिलण’ सन पर अग्गे मैनूं वेख के शशोपंज विच्च पै गए। मेरी किसमत चंगी सी कि पिछले नें सटेन दा घोड़ा तुरत नहीं सी दब्ब दित्ता। नहीं तां इहो जिहे मौके ते हरफ़ली काहली विच्च होण करके अगलिआं कोल बहुती पुछ्छ-गिछ्छ करन दा जां सही शिकार जानण दा समां ही नहीं हुंदा। इह तां कुदरत मेरे हक्क विच्च नेड़िओं हो के भुगती सी जो उस मुंडे नें इशारे नाल अगले तों पुछ्छ लिआ सी कि इह तां होर बंदा लग्गदा है; इसनूं मारिआ जावे जां नां?

आतंक अते भैअ दे हर पल सिर ‘ते छाए प्रछाविआं हेठां ही मेरीआं ‘पंजाब संकट’ नाल संबंधत कहाणीआं ‘भज्जीआं बाहीं’, ‘चौथी कूट’, ‘प्रछावें’, ‘मैं हुण ठीक ठाक हां’ अते ‘छुट्टी’ सिरजणा दे अमल विचों लंघ के मुकंमल होईआं।

‘भज्जीआं बाहीं’ कहाणी दा मूल सरोत तां मेरे गुआंढ विच्च ही पिआ सी। छे अकतूबर 1984 दा दिन सी। शाम दे घुसमुसे विच्च कुझ्झ अणपछाते बंदे घुग्ग वस्सदे बाज़ार विच्च इक्क पासिओं शुरू कर के दूजे पासे तक्क अंधा-धुंद गोलीआं चलाउंदे बच के निकल गए सन। उहनां नें मेरे घर दे ऐन साहमणे चुबारिआं विच्च वस्सदे गोपाल चंद दे लड़के मंगे नूं, जिसदी उसदे घर तों इक्क दुकान छड्ड के दहीं-पकौड़िआं दी दुकान सी, गोलीआं नाल भुंन दित्ता सी। सारे बाज़ार विच्च चौदां बंदिआं नूं गोलीआं लग्गीआं सन। साडी बैठक दी खब्बी कंध नाल लग्गदी दुकान करम चंद दे लड़के ते मेरे बचपन दे यार ‘लाल’ डाकटर दी सी। उसदे चिहरे उत्ते लग्गी गोली गले विच्च जा फसी सी। उह पीड़ नाल कराह रिहा सी।

उहनां दे घर सुनेहा भेज के उसदे घरदिआं नूं बुलाइआ। उहदी पतनी ते बच्चिआं नूं आपणे घर रख्खिआ। उसदे छोटे भरा नूं नाल लै के ‘लाल’ नूं पिंड दे प्राइमरी हैलथ सैंटर विच्च लै के गए, जित्थे दूजे ज़ख़मीआं नूं उहनां दे वारिस लै के पहुंच गए सन। असीं मुढली सहाइता दिवा के अते सी आर पी वालिआं ‘ते दबाओ पा के ओसे वेले ज़खमीआं नूं अंम्रितसर लै जाण दा बंदोबसत कर लिआ। फ़लसरूप सारे ज़ख़मी बच गए। गोपाल चंद दे मंगे दी तां थां ‘ते ही मौत हो गई सी।

कुझ दिनां बाअद मैनूं पुलिस एसे गोली-कांड विच्च फहड़ के लै गई ते मंगे दा कतळ मेरे उत्ते पा के ऐलान कर दित्ता कि गोली चलाउण वालिआं विच्च मैं खुद आप सां। इह वी किहा कि इह मैं ही साबत करना है कि मैं गोली चलाई सी जां नहीं! मेरे पिंड अते इलाके दे लोकां अते मेरे अधिआपक साथीआं दे भरपूर दबाओ नें थाणा मुखी नूं अहिसास करवा दित्ता कि मैनूं इस केस विच्च झूठा फसाइआ जा रिहा सी! उसने ऐस्स ऐस्स पी दे लगातार दबाओ बणाई रख्खण दे बावजूद बहुत ही ‘सखत पुछ्छ-गिछ्छ’ करन दे हुकम नूं अणगौलिआं कर के मेरी उचेची मदद कीती अते कुझ्झ दिनां बाअद मैनूं रिहाअ कर दित्ता। मेरे उत्ते कतल दा केस पाए जाण कर के मेरी पतनी दा ओने दिन जो हाल रिहा, उसदी कलपना कीती जा सकदी है।

रिहाअ हो के आए नूं अजे इक्क-अध्धा दिन ही होइआ सी कि साडे गुआंढ गोपाल चंद हुरां दे घर विचों लड़ाई दे रौले दीआं आवाज़ां आउण लग्गीआं। पता लग्गा कि मंगे दे मरन ‘ते जिहड़ी सहाइता राशी मंगे दी पतनी नूं मिलणी सी, उह मंगे दे भरावां नें उसदे नां नहीं सी करवाई। मंगे दी विधवा दे मापे उह पैसे उसदी पतनी दे नां करन लई ज़ोर पा रहे सन जद कि मंगे दे भरा इस लई राज़ी नहीं सन। इस गल्ल ‘ते दोवां धिरां विच्च बोल-बुलारा शुरू हो गिआ सी ते हुण दोवें धिरां बाज़ार विच्च शरेआम इक्क दूजे ‘ते दूशण ला के गाल्ह-मंदा कर रहीआं सन।

उहनां दे इस झगड़े तों ही मेरी कहाणी ‘भज्जीआं बाहीं’ दा महूरत होइआ। फिर मैनूं मंगे नाल भरावां वल्लों होईआं ते उस वल्लों मैनूं समें समें दस्सीआं वधीकीआं चेते आईआं। परिवार विच्च तकड़े भरावां वल्लों माड़े नाल हुंदीआं वधीकीआं नूं आधार बणा के मैं इसनूं देश दी एकता ते आखंडता दे बाहरी दिखावे दे अखाउती भरम नाल जोड़िआ। ‘जे इक्क उंगल नूं भंन दिओगे ते आखोगे कि मुठ्ठी मीची वी रहे तां वी भज्जी उंगल मुठ्ठी नाल तां जुड़नों रही!’ मैनूं इह वी लग्गा कि जे इक्क परिवार दे भरावां विच्च मां-पिओ वी तकड़े-माड़े दा वितकरा पाउंदे नें तां जिहड़े लोक ‘धरम आधारित देश जां परिवार’ विच्च रहिण दी लड़ाई लड़दे नें की ओथे उहनां दी आरथक वितकरे दी लड़ाई ख़तम हो जाएगी! असली वितकरा तां जमातां विच्च पए पाड़े वाला है। पकौड़े वेचण वाले दुकानदार अते ज़मीन गहिणे करन वाले ग़रीब किरसाण दी आपस विच्च काहदी दुशमणी? इक्को जमात दे होण करके धारमिक दिख अलग्ग होण दे बावजूद उहनां दोवां दे आपसी हित सांझे हन। उहनां दे दुशमण तां उहनां दा शोशन करन वाले उहनां दे आपणे ही धरम दे भरा-भाई हन। जे असल लड़ाई जमाती लड़ाई ही है तां फिर जमाती लड़ाई लड़न वाले कमिऊनिसटां दे हुंदिआं सुंदिआं फिरकू लोक किवें माहौल उत्ते छा गए अते कमिऊनिसट किउं प्रसंगहीण हो के रहि गए? इह ते इसतरहां दे होर मसले मैं कहाणी विच्च छोहण दी कोशिश करदिआं मनुख्खी सुभा दे बदलदे संदरभां ते रिशतिआं दी अरथहीणता नूं वी नज़र गोचरे रख्खिआ।

जलंधर दे हरदिआल नगर विच्च प्रेम सिंघ चठ्ठा दे घर कहाणी गोशटी होई। मंने-परमंने लेखकां दी हाज़री विच्च ‘भज्जीआं बाहीं’ अते रघबीर ढंड दी कहाणी ‘शाने-पंजाब’ बारे चरचा होई। प्रबंधकां वल्लों पाठकां दीआं प्रापत चिठ्ठीआं दे आधार ‘ते इह दो कहाणीआं पिछले साल दीआं बिहतरीन कहाणीआं मंनीआं गईआं सन। इस गोशटी विच्च पंजाब दे कहाणीकारां ते विदवानां तों इलावा गुरदिआल सिंघ ते संतोख सिंघ धीर वरगे वड्डे लेखक वी शामल सन। गोशटी दा करता धरता प्रेम प्रकाश सी।

‘भज्जीआं बाहीं’ बारे ‘बहिस दी शुरूआत’ करदिआं भूशन नें परचा पहड़िआ। उसने जित्थे कहाणी दी प्रसंसा कीती ओथे इह सवाल वी उठाइआ कि इस कहाणी विच्च पंजाब विचली घट्ट-गिणती दे लोक हौली ते घट्ट बोलदे हन जद कि भारू फ़िरके दे लोक उच्ची अते वधेरे बोलदे हन! कहाणी बारे होई चरचा विच्च जित्थे कहाणी दी तारीफ़ होई ओथे संतोख सिंघ धीर ते ‘लोक-लहिर’ दे संपादक सुहेल सिंघ नें उच्ची आवाज़ विच्च कहाणी नूं ‘कमिऊनिसट-विरोधी’ ऐलानिआं। उहनां नूं कहाणी सिख्खां जां अत्तवादीआं दे हक्क विच्च भुगतदी लग्गदी सी। मेरे मित्तर साधू सिंघ नूं वी अजिहा ही लग्गदा सी! सुहेल नें तां लोक-लहिर विच्च कहाणी दे ख़िलाफ़ संपादकी वी लिखिआ।

कहाणी बारे गल्ल करदिआं मैं किहा कि कहाणी विच्च कोई पातर उच्ची बोलण नाल ही निआइयुकत नहीं हो जांदा। नां ही किसे पातर दे हौली जां थोड़ा बोलण दा इह मतलब हुंदा है कि उसदे विचारां दा महत्तव घट गिआ है। वेखण वाली गल्ल तां इह है कि उहनां धिरां नूं ‘बुलाउण’ वाले लेखक दी द्रिशटी की है? इस कहाणी विच्च उच्ची बोलण वाले पातरां दा गुस्सा ‘उस’ धिर नाल होए धक्के प्रती रोस दा प्रगटावा है ते घट्ट बोलण वाले पातरां दा सहिम उहनां दी ततकालीन सहिमी अते भै-भीत होण वाली सथिती वल्ल संकेत है। इस कहाणी विच्च सभ तों घट्ट बोलण वालिआं विचों इक्क पातर धंना सिंघ दरज़ी है पर उसदे बोल लेखक दी विचारधारा नूं प्रतीबिंबत करन वाले हन। कहाणी विच्च कमिऊनिसटां दे विरोध दा भरम पैणा वी लेखक दी रचना-द्रिशटी नूं डूंघाई विच्च जाके नां समझण दा ही फ़ल है। समुच्ची कहाणी विचों ‘खामोश-आवाज़’ तां इह आउंदी है कि असली लड़ाई धरम जां ज़ात दी नहीं सगों जमात दी है ते जमाती लड़ाई दी गल्ल कमिऊनिसटां तों वध्ध भला किस नें करनी होई! पर दुख्ख दी गल्ल है कि कमिऊनिसटां तों इह लड़ाई भली-भांत लड़ी नहीं जा सकी। उह लोकां नूं आपणे नाल जोड़नों असमरत्थ रहे ते इतिहास उहनां दे हत्थों तिलक गिआ। इस उत्ते फ़िरकू ताकतां दा ग़लबा हो गिआ। कहाणी तां इह असिध्धा हाउका भरदी है कि काश! इतिहास दी वाग डोर कमिऊनिसटां दे हत्थ विच्च रहिंदी! कहाणी विच्च ‘सिख्खां’ दी गल्ल करन दी शिकाइत वी वाजब नहीं। जे घट्ट-गिणती दे लोक उहनां नाल हुंदे अनिआइ लई हमदरदी दे हक्कदार हन तां बहु-गिणती दी पीड़ित धिर दा ज़िकर करना सिरफ़ इस करके ही इतराज़योग नहीं हो जांदा कि उस भाईचारे दा इक्क बहुत ही छोटा हिस्सा ग़लत कारवाईआं विच्च रुझ्झिआ होइआ है।

मेरे अंदरला लेखक कमिऊनिसटां नूं आपणी धिर समझ के उहनां दी वाजब कमज़ोरी ‘ते उंगली रख्ख रिहा सी। पर कुझ्झ कमिऊनिसटां नूं आपणी वाजब आलोचना वी पसंद नहीं सी। उह तां उस वेले दी फिरकू धिर दी ‘बेकिरक’ आलोचना करन विच्च विशवास रख्खदे सन ते उसदे वाजब गुस्से अते नाराज़गी नूं असलों घटा के वेखदे ते उसदा गल घुट्टणा चाहुंदे सन। पर साहित दा कंम ‘बेकिरक’ आलोचना करना नहीं सगों सभ धिरां दे दुख्ख नूं उसदे नेड़े हो के सुणना ते उसदे हिस्से दी पीड़ लई बणदा हाउका भरना हुंदा है। मैं इहो ही कंम कीता सी। सिआणे कमिऊनिसटां नें मेरे इस नुकते नुं समझिआ। उहनां दी मेरे वल्लों कहाणी दी कीती विआखिआ नाल संमती सी। ‘सिरजणा’ दे अगले अंकां विच्च भूशन दा लेख वी छपिआ ते पाठकां दे पत्तर वी। कहाणी बारे उठ्ठे विरोध दी धुंद छट गई सी। सिआणे पाठकां दी लगातार चल्लदी बहिस नें कहाणी दी आतमा दे मरम नूं पछाण लिआ सी। इहनां दिनां विच्च मैं कामरेड सुहेल सिंघ नूं दो तिंन चिठ्ठीआं लिखीआं कि उह ‘लोक-लहिर’ विच्च कहाणी दे ख़िलाफ़ लिखे संपादकी दी कापी मैनूं भेज देवे ताकि मैं उस वल्लों पेश कीते नुकतिआं नूं ठीक तरहां समझ सकां। उसने नां संपादकी लेख दी कापी भेजी ते नां ही कोई जवाब दित्ता। पिछ्छों किसे मिलणी समें उस कोलों इस ख़ामोशी दा कारन पुछ्छिआ तां उसने किहा, “मेरी कहाणी बारे राइ बदल गई है। उदों मैं कहाणी नूं ठीक नहीं सां समझिआ। कहाणी किसे वी तरहां कमिऊनिसटां दे ख़िलाफ़ नहीं।”

मैनूं उसदी सपशटता, सादगी ते सुहिरदता नें मोह लिआ। मेरी कहाणी दा कट्टड़ विरोधी मेरी कहाणी दा प्रसंसक बण गिआ सी। इह करामात उहनां आलोचकां-पाठकां दी सी जिनहां नें कहाणी नूं रिड़क रिड़क के उसदे सच्च नूं नितार के उप्पर लै आंदा सी।

जलंधर वाली गोशटी तों इलावा ‘भज्जीआं बाहीं’ कहाणी बारे कई गोशटीआं होईआं। इहनां विचों ‘ढिलवां’ विच्च सवरनजीत सवी, आसी ते विशाल हुरां दे मित्तर-मंडल वल्लों ते दूजी साहित सभा मुकेरीआं ते होर सभावां दे आपसी सहियोग नाल मुकेरीआं विखे करवाई गोशटी दा ज़िकर कीता जा सकदा है। ढिलवां वाली गोशटी तां कुझ्झ इक्क दोसतां वल्लों कहाणी संबंधी मेरे नाल कीते सिध्धे सवालां-जवाबां ‘ते आधारित सी जद कि मुकेरीआं वाली गोशटी दा ज़िकर इक्क होर प्रसंग विच्च वी कीता जाणा बणदा है।

इह 1987 दे दिन सन। दहिशत ते आतंक दा भरवां बोल-बाला सी। सिआली दिन दी निघ्घी धुप्प विच्च ख़ालसा हाई सकूल मुकेरीआं दी खुल्ल्ही गराऊंड विच्च बणी सटेज उत्ते प्रिंसीपल सुजान सिंघ दी प्रधानगी विच्च प्रधानगी-मंडल सज्जिआ बैठा सी ते साहमणे कुरसीआं उत्ते गुरदासपुर, मुकेरीआं, दसूहा, गहड़दी वाला, टांडा, तलवाड़ा ते हुशिआरपुर दीआं साहित-सभावां दे सरोते कहाणी-पाठ सुणन लई बैठे सन। कहाणी भावें सारिआं नें पहिलां ही पहड़ी होई सी पर उहनां दी इछ्छा सी कि कहाणी बारे चरचा छेड़न लई कहाणी नूं इक्क वार सरोतआं साहमणे फिर तों पहड़िआ जाणा चाहीदा है।

मैं कहाणी पहड़न लई माईक साहमणे खलोता। कहाणी लंमी सी ते इसनूं पहड़न लई दो कु घंटे दा समां लोड़ीदा सी। कहाणी पहड़नी शुरू कीती तां सपीकर राहीं उसदी आवाज़ दूर दूर ताईं पहुंचण लग्गी। कुझ्झ पैरे ही पहड़े सन कि की वेखदा हां दूर साहमणे चाह वाली रेहड़ी ‘ते चाह दे घुट्ट भरदे बंदे मेरे वल्ल मूंह करके कहाणी सुणन लग्गे। इक्क पैरा होर पहड़िआ तां उहनां दे कदम पंडाल वल्ल वधणे शुरू हो गए। किआरीआं गोडदा माली रंबा रख्ख के हत्थ झाड़दा एधर नूं तुर आइआ। सकूल दी बाऊंडरी वाल दी मुरंमत करदे राज-मिसतरी ते मज़दूर कंम छड्डके खलो गए। नेड़ले नहिरी कुआटरां दीआं छत्तां ‘ते धुप्प सेकदे नहिर महिकमे दे छोटे-वड्डे करमचारी छत्तां तों हेठां उत्तर आए। कहाणी-मंडप दे आले-दुआले मजमे वांग भीड़ जुड़न लग्गी। शाइद उहनां नूं लग्गदा सी कि इह उहनां दे आपणे दिल दी गल्ल हो रही है। सारे कहाणी विचली हकीकत नाल अंदरों जुड़े होए महिसूस कर रहे सन। पूरे दो घंटे उहनां नें इक्क चित्त हो के कहाणी सुणी। कहाणी ख़तम होण ‘ते उहनां दीआं ताड़ीआं दी गड़गड़ाहट नें मेरे अंदर एनी ताकत भर दित्ती कि मैनूं जापण लग्गा इस कहाणी दे महत्तव नूं सवीकार करवाउण लई मैनूं हुण किसे आलोचक जां विदवान दी ‘सहाइता’ दी लोड़ नहीं। इस घटना तों बाअद मैनूं इह वी अहिसास होइआ कि जिहड़े लेखक आम-लोकां दे दुखा-सुखां दी बात पाउण दा दाअवा करदे हन उहनां नूं आम लोकां दे अजिहे इकठ्ठां विच्च वी आपणीआं रचनावां पहड़न दा तजरबा करना चाहीदा है अते उहनां दीआं सादा टिप्पणीआं विचों आपणी कला दे महत्तव दा अनुमान लाउण दी कोशिश वी करनी चाहीदी है।

कवीआं नूं तां अजिही लोक-परसंसा कवी दरबारां विच्च मिलदी ही रहिंदी है पर गलप-लेखकां लई अजिहा आम तौर ‘ते संभव नहीं हुंदा। गलप किउंकि पहड़न वाली चीज़ है इस लई इसदे पाठकां दे मन विचों रचना नूं पहड़ के उठ्ठी परसंसा दी लहिर उसदे अंदर ही किधरे उमड उछ्छल के सौं जांदी है; उह लेखक तक्क पहुंचदी नहीं। ‘भज्जीआं बाहीं’ दे पहड़े जाण दा तजरबा बड़ा विलख्खण ते आनंद-दाइक सी। अजिहा ही रलदा मिलदा अनुभव मैनूं आपणी कहाणी ‘चौथी कूट’ दे पाठ उपरंत होइआ। अजीत कौर वल्लों 1988 विच्च दिल्ली विखे ‘पंजाबी अकादमी दिल्ली’ दे सहियोग नाल करवाए कहाणी दरबार विच्च पहिले सैशन विच्च तां तिंन पाकिसतानी कहाणीकारां नें आपणीआं कहाणीआं पहड़ीआं। दूजे सैशन विच्च पहिलां मनमोहन सिंघ आई ए ऐस्स ते प्रेम प्रकाश नें आपणीआं कहाणीआं पहड़ीआं। उस सैशन दी तीजी ते अंतिम कहाणी मेरी सी। प्रधानगी एथे वी प्रिंसीपल सुजान सिंघ दी सी।

इह कहाणी वी पंजाब दे आतंक नाल संबंधत सी। इस विच्च दो हिंदू पातर चंडीगहड़ तों अंम्रितसर नूं जा रहे हन। उहनां नें बस्स तक्क जलंधर पहुंचणा है अते उथों आख़री रेल-गड्डी लै के अंम्रितसर जाणा है। हनेरा हुंदे सार उहनां दे मन विच्च भैअ उतरना शुरू हो जांदा है। उहनां नूं किसे वेले वी बस्स नूं अगवा कर लए जाण ते मारे जाण दा ख़तरा बणिआं होइआ है। पिछ्छल-झात राहीं कहाणी उहनां दे भैअ नूं वी गूहड़िआं करदी जांदी है अते उहनां दे निज्जी अनुभव दे वेरविआं राहीं दोवां भाईचारिआं दे मुहब्बत ते नफ़रत दे तणाओशील रिशते दीआं पिड़ीआं वी उधेड़ी जा रही है। जलंधर पहुंचदे करदे उहनां दी आख़री टरेन वी निकल जांदी है। उहनां दिनां विच्च इक्क निसचित समें तों बाअद अंम्रितसर नूं टरेनां दा जाणा बंद कर दित्ता गिआ सी। उहनां दे बैठिआं इक्क होर टरेन आउंदी है। इस टरेन नें सवारीआं उतारन तों बाअद खाली ही अंम्रितसर नूं जाणा है। दोवें नौजवान ते अधखड़ उमर दा सरदार गारड दा तरला करके उसदे डब्बे विच्च बैठ जांदे हन। डब्बे विच्च दो कु रेलवे दे बंदिआं तों इलावा दो सिख्ख नौजवान वी बैठे होए हन। उहनां दी चुप्प ते उहनां नौजवानां प्रती हिंदू गारड दे नरम रवई्ईए तों उहनां नूं महिसूस हुंदा है कि इह दोवें नौजवान ज़रूर अत्तवादी हन। किसे वेले वी मारे जाण दा ख़तरा उहनां दे सिर ‘ते कूकदा लग्गदा है। अंम्रितसर दे बाहरवार ही जदों गारड टरेन हौली होण ‘ते खेतां विच्च ही उहनां नूं उत्तर जाण दा संकेत दिंदा है तां उहनां नूं लग्गदा है कि हुण तां उह नौजवान हनेरे विच्च उहनां दी जान लै के ही रहिणगे। गड्डी तों उत्तरदिआं ही उहनां सिख्ख नौजवानां तों बचण लई उह दौड़न ही वाले हन कि पिछ्छों आई नौजवान दी आवाज़ उहनां दा त्राह कढ्ढ दिंदी है। डर नाल उहनां दे पैर थां ‘ते ही जंम गए।

“तुसीं तां भज्ज ई उठ्ठे। सानूं नाल ई नहीं लिआ।” वड्डा नौजवान कहिण लग्गा, “असल विच्च मेरी चाची, इहदी छोटे दी मदर दी डैत्थ अज्ज शमीं तिंन कु वजे हो गई सी। मैं इहनूं लैण गिआ सां जलंधरों। जांदिआं आउंदिआं कुवेला हो गिआ। गारड विचारे नूं बेनती कीती ते उह मंन गिआ। असल विच्च गल्ल इह है कि असीं दोवें डरदे आं कि किते सी आर पी जां पुलिस ‘चों किसे वेख लिआ तां सानूं शकलों सिख्ख वेख के गोली नां मार देण। अज्ज-कल्ल्ह बंदा मारन लग्गिआं पुछ्छ-गिछ्छ कौण करदा ऐ जी। तुसीं नाल होवोगे तां कोई मिलिआ वी तां तुहाडे कर के साडा बचाअ हो जावेगा।”

कहाणी विचले आतंक नें सरोतिआं नूं जकड़ के रख्खिआ होइआ सी। अगले पल कुझ्झ वापर जाण दी होणी नें उहनां दे साह सूते होए सन ते मनुख्खी रिशतिआं दीआं महीन नफ़रती ते मुहब्बती तंदां नें उहनां नूं आपणे कस्स विच्च लिआ होइआ सी।

कहाणी मुका के थल्ले उत्तरिआ तां लोक वधाईआं देण लग्गे। दूजी कतार विचों बलवंत गारगी उठ्ठ के खलो गिआ ते मेरे नाल हत्थ मिलाउण लई अग्गे आइआ। भापा प्रीतम सिंघ नें किहा, “आरसी विच्च कहाणी छपिआं तां बहुत देर हो गई है। इह मैनूं फड़ा छड्डो।” पूनम नें तारीफ़ करदिआं ‘प्रीत-लड़ी’ लई कहाणी मंग लई। पिछ्छों गगन गिल्ल नें रुक्का भेजिआ कि मैं इसनूं हिंदी विच्च अनुवाद करना है। दो कु होर संपादकां नें वी मेरे ‘ते हक्क जताइआ। सभ तों वड्डी गल्ल सी कहाणी दी चंगी कविता वांग भरपूर दाद मिलणा। इसतों बाअद चाह दा सैशन सी। मेरी पिठ्ठ थापड़न वालिआं दी लड़ी नहीं सी टुट्ट रही। इस परसंसा दा नशा मैनूं कई चिर रिहा।

कहाणी विचला रेल दा सफ़र मेरे सकूल दे कलरक अमर नाथ नें कीता सी ते उसने ही दस्सिआ सी कि असीं हिंदू होण करके उहनां मुंडिआं तों डरदे सां ते उह सिख्ख होण करके पुलिस वालिआं वल्लों मारे जाण तों डरदे सन। मैं इस ख़िआल नूं आधार बणा के कहाणी लिखी कि पंजाब दा भला दोवां भाईचारिआं दे वख्खरे होण विच्च नहीं। वख्खरे होइआं किसे धिर दी वी मौत पंजाबीअत दी मौत दा संकेत है। दोवें धिरां इक्क दूजे दे विरोधी नां हो के इक्क दूजे दीआं पूरक हन। इक्क दी जान नूं दूजे दी सुरख्खिआ दी लोड़ है। पंजाब दे जिऊंदे रहिण लई इक्क धिर नूं दूजी धिर दी सुरख्खिआ दी बुक्कल हर वेले लोड़ींदी है।

‘चौथी कूट’ कहाणी विच्च किउंकि घट्ट-गिणती फ़िरके दे पातरां नूं माधिअम बणा के लिखी गई सी ते उहनां नूं आपणे ख़तरिआं ते फ़िकरां नूं बिआन करन लई मुकंमल ज़बान मिली सी, इस लई इसदी किसे किसम दी आलोचना नां होई। पर इसतों अगली कहाणी ‘प्रछावें’ बारे कुझ्झ हलकिआं वल्लों फिर सवाल उठाइआ गिआ। सच्ची गल्ल तां इह सी कि पंजाब संकट नाल हरेक बंदा बहुत नेड़िओं जुड़िआ होइआ सी ते हर इक्क नें इस बारे आपणी निसचित राइ वी बणाई होई सी। उस समें संतुलन विच्च रहिणा डाढा औखा सी। इस लई हरेक पाठक कहणी दी आतमां नूं समझण दी थां आपणा उलार वी उस विच्च शामल कर लैंदा सी।

‘प्रछावें’ कहाणी विच्च पंजाब दे ततकालीन दुखांत नूं संताली दे दुखांत नाल जोड़ के पेश कीता गिआ। लुकवां सुनेहा इह वी सी कि जिवें असीं हुण संताली दे कतले-आम लई शरमिंदे हां; कल्ल्ह नूं हुण वाले कतले-आम लई शरमिंदा होवांगे। सानूं वार वार अजिहीआं शरमसारीआं दा साहमणा किउं करना पवे!

गुरदिआल सिंघ नावलकार ते टी आर विनोद उदों रिजनल सैंटर बठिंडा विच्च पहड़ाउंदे सन। उहनां नें मैनूं आपणे विदिआरथीआं नाल गल्ल-बात करन लई सद्दिआ। मेरे बोलण तों बाअद किसे प्रोफ़ैसर नें सवाल कीता कि कहाणी विच्च इक्क द्रिश विच्च मैं हिंदूआं नूं भरा कहि के उहनां नूं हौंसला देण वाले खाड़कूआं नूं ‘चंगे’ विखा के की कातल-धिर दी हमाइत तां नहीं कीती? अजिहा ही सवाल मैनूं हरभजन हुंदल नें वी पत्तर लिख के कीता सी। मैं आपणा द्रिशटीकोन इसतरहां पेश कीता:

‘परछावें’ कहाणी विच्च हिंदूआं नूं भरा कहि के उहनां नूं हौंसला देण वाले तथा-कथित लोकां दे इक्क द्रिश नूं तुसीं जां कुझ्झ पाठक/आलोचकां वल्लों विसथार नाल चित्रण कर के मैनूं कातिल-धिर दा हमाइती समझणा बड़ी वड्डी भुल्ल है। इह मेरी रचना-जुगत अते रचना-द्रिशटी नूं डूंघे जा के नां समझण विच्चों पैदा होइआ भुलेखा है। कोई पातर किसे कहाणी विच्च ज़िआदा बोलदा है जां ज़िआदा समां ‘मंच’ उत्ते रहिंदा है तां इसदा भाव इह नहीं कि उह लेखक दा प्रतीनिध पातर हो गिआ। इस प्रसंग विच्च मैं सिख्ख इतिहास नाल जुड़े नाटकां दा हवाला देणा चाहुंदा हां। साडी विशेश मरियादा अनुसार गुरू साहिबान सटेज ‘ते नहीं दिखाए जांदे, केवल उहनां दा ज़िकर होरनां पातरां राहीं आउंदा है। पर उहनां दी विचारधारा उहनां वल्लों ख़ुद मंच ‘ते ग़ैर-हाज़र रहि के वी समुच्ची रचना दी रूह विच्च समाई हुंदी है। नांह-वाचक किरदार सगों बहुता समां द्रिश उत्ते रहिंदे हन पर इस नाल इह रचना दी हां-मुखी आतमा नहीं बण जांदे। सो मसला कहाणी विच्च ज़िआदा जां घट्ट समां सीन उत्ते रहिण दा नहीं। मसला है लेखक दी रचना-द्रिशटी नूं समझण दा। इस अनुसार जे मेरी कहाणी नूं वेखो तां इस विच्च नांह-वाचक धिर पहिले भाग विच्च बलबीर सिंघ दे रूप विच्च मंच ‘ते रहिंदी है। पर बाअद दे समिआं वाली नांह-वाचक धिर ग़ैर-हाज़र हो के वी आपणे कुकरमां सदका सदा हाज़र रहिंदी है। कहाणी दा प्रतीनिध सच्च 1947 तों 1984 तक्क फ़ैली फ़िरकू नफ़रत दे विरुध्ध मानवी भाईचारे दे हक्क विच्च आवाज़ बुलंद करन वाला है। सारी कहाणी अजेही अमानवी हिंसा दे विरुध्ध नफ़रत नाल भरी पई है। पाठक जे गहिरा उत्तर के पहड़े तां इस सवाल दा जवाब लभ्भण लई वी अहुलदा है कि संताली वाला बलबीर सिंघ अजे वी किउं ‘जिऊंदा’ है! इस ‘बलबीर सिंघ’ दी फ़िरकू नफ़रत, अंनही हिंसा दा विरोध तां कहाणी दे आर-पार फ़ैलिआ होइआ है। हिंदूआं नूं ‘भरा’ कहि के हौंसला देण वाले भावें कहाणी दे मंच ‘ते आउंदे वी हन, पर उह प्रतीनिध धिर बण के नहीं उभ्भरदे; उह तां किसे ‘अंशिक सच्च’ नूं मूरतीमान करदे हो सकदे हन। प्रतीनिध सच्च तां अंनही दहिशतगरदी अते फ़िरकू नफ़रत दा पिछले पंजाह सालां तों कहाणी विच्च फ़ैलिआ पसारा है। इस लई पाठकां/आलोचकां नूं इस प्रतीनिध सच्च वल्ल वेखणा चाहीदा है। जिनहां नूं कुझ्झ पलां लई मंच ‘ते आए ‘चंगे जापदे’ खाड़कूआं ‘ते इतराज़ है उहनां नूं इह समझणा चाहीदा है कि इह वी समुच्ची हकीकत दा ‘अंशिक सच्च है’

लेखक नें केवल प्रतीनिध सच्च नूं ही नहीं, अंशिक सच्च नूं वी चित्रणा हुंदा है। इस अंशिक सच्च वाले लोक वी मेरे निज्जी मुशहादे दा हिस्सा नें। उहनां विच्चों किधरे कोई विरले जां बहुत विरले कुझ्झ चंगे वी जापदे सन तां उहनां नूं वी किओं नां चितरिआ जावे? मैं उहनां राहीं फ़िरकू ज़हिरीआं ‘ते सिख्खी दे प्रतीनिधां विच्च वी सूख़म जिहा निखेड़ा करना चाहिआ है। अंशिक तौर ‘ते उहनां विच्च वी चंगे बंदे सन। जे उहनां दा ज़िकर वी आ गिआ तां इस नाल तसवीर मुकंमल ही हुंदी है। पर कुझ्झ पलां लई मंच ‘ते आए इह लोक छोटे हिस्से दा सच्च बणन दे बावजूद समुच्ची दहिशतगरद लहिर दे प्रतीनिध नहीं बण जांदे। उहनां नूं ‘विसथार नाल’ चित्रण दा भाव इह हरग़िज़ नहीं बण जांदा कि कहाणीकार दहिशगरद जां फ़िरकू लहिर दा प्रशंसक बण गिआ। इस दा विरोध तां समुच्ची कहाणी दे गठन विच्च फ़ैलिआ होइआ है। नफ़रत ते हिंसा दे इहनां ‘प्रछाविआं’ तों असीं अध्धी सदी तक्क मुकत नहीं हो सके! कई तां इह वी कहिंदे हन कि मैं कहाणी दे अंत उत्ते ‘उह कौण सन?” कहि के बात मुका दित्ती है।

‘उह कौण हन’ इहनां दी ही तां सारी कहाणी विच्च बात पाई है। 1947 तों 1984 तक्क ‘जिऊंदे’ बलबीर सिंघ दी ही तां बात है इह कहाणी। जदों छोटी बच्ची इह सुआल करदी है कि गोली चलाउण वालिआं विच्च ‘बलबीर सिंघ’ वी सी? तां इह गल्ल मुकाउणा ही नहीं, गल्ल दस्सणा वी है कि असीं ‘सिआणे’ तां एने सहिम गए सां कि डरदे कातल जां ज़ालम नूं कातल जां ज़ालम कहि वी नहीं सां सकदे! पर कहाणी तां कातलां नूं कातल अते ज़ालमां नूं ज़ालम कहिंदी है।

हिंदूआं नूं ‘भरा’ कहि के टिके रहिण अते दुकानां खोल्ह के रख्खण लई कहिण वाले खाड़कूआं नूं मैं आप आपणे पिंड दे बाज़ार विच्च वेखिआ। जिवें कहाणी विच्च है, इवें ही वापरिआ। रोज़ ही मासूमां दा कतल करन वाली ते सटेनां दे ज़ोर नाल पैसे खोहण वाली धिर विच्च ‘इहो जिहे बंदे वी सन!’ भावें उह इलाके दे मुंडे सन अते इलाके दी उस सांझ विच्चों ही शाइद उह इसतरहां दी ‘छोट’ दे रहे होण। हो सकदा है किसे दूजे इलाके विच्च उह वी दूजिआं वांग ही मार-धाड़ करदे होण। करदे ही होणगे, नहीं तां कप्पड़िआं लई अते चाह-जलेबीआं लई दित्ते पैसे किहड़े बैंक ‘चों कढवाए सन उहनां नें! पर उहनां दे विहार विच्चों मैनूं अंशिक तौर ‘ते प्रंपरिक सिख्खी दी झलक मिली। मैं कहाणी लिखदिआं सोचिआ इहनां लोकां नूं वी किओं नां पेश करां? उहनां नूं पेश करना उहनां दी ही बहुत वड्डी बेकिरक, अनपहड़ अते ज़ालम धिर दे मूंह ‘ते चपेड़ मारना सी अते कलामतक अंदाज़ विच्च दस्सणा सी कि कहाणी दे आर-पार फ़ैले उह फ़िरकू अते हिंसक लोक सिख्खी दे प्रतीनिध किवें हो सकदे हन जिनहां दा नाम सुणदिआं ही लोकां दे साह सूते जांदे हन!

जदों इह कहाणी लिख लई तां पहड़ के मैनूं वी ख़िआल आइआ कि मेरी रचना-द्रिशटी अते रचना-जुगत नूं डूंघाई नाल नां समझण वाले लोक इह समझ लैणगे कि मैं इंज खाड़कूआं दी वकालत करन लग्ग पिआं। इसे आलोचनातमक भैअ विच्चों मैं कहाणी दे इस भाग नूं कट्ट देण दा निरणा कर लिआ तां मेरी पतनी नें किहा कि मैनूं अजेहा नहीं करना चाहीदा। इस नूं कट्टणा हकीकत बिआनी तों मूंह मोड़ना है। सच्च नूं वेख के ते जाण बुझ्झ के उस तों अख्ख मोड़नी लेखक दी सुहरिदता नहीं। उसदे कहिण ‘ते इह भाग कहाणी विच्च जिओं दा तिओं रहिण दित्ता। मेरे अंदरले अते बाहरले दबाओ नें मैनूं लगभग ग़लत फ़ैसला लैण लई मजबूर कर ही दित्ता सी। पर मेरी पतनी नें मैनूं वरज दित्ता। हुण मैं समझदां कि उसदी गल्ल मंन के मैं ठीक ही कीता। मैं संतुलन बणा लिआ। जे उह भाग कट्ट देंदा तां मैं वी वकती दबाओ अधीन असंतुलित ते उलार हो जांदा।

शाइद मेरे एसे सपशटीकरन नूं धिआन विच्च रख्खदिआं ही जदों गुरदिआल सिंघ नें पंजाब यूनीवरसिटी दे बी ए दे कोरस लई पंजाबी कहाणीआं दा संग्रहि तिआर कीता तां उसने उस विच्च शामल करन लई ‘प्रछावें’ कहाणी नूं ही चुणिआं। ‘चौथी कूट’ वी दलीप कौर टिवाणा दी संपादना हेठ एसे यूनीवरसिटी दे पाठ-क्रम विच्च शामल कीती गई सी।

‘प्रछावें’ ते ‘मैं हुण ठीक ठाक हां’ कहाणीआं मैं जलंधर आण के लिखीआं।

‘मैं हुण ठीक ठाक हां’ लिखण दा सबब्ब कुझ्झ इसतरहां बणिआं।

जलंधरों आपणे पिंड खेतां विच्च बीबी हुरां नूं मिलण गिआ तां मैनूं राखी लई रख्खे दो लंडे कुत्ते इस वार किधरे दिखाई नां दित्ते। पहिलां तां उह मैनूं आइआ वेख के अग्गे पिछ्छे भौंदे रहिंदे सन। मेरे पुछ्छण ते बीबी नें दस्सिआ, “पिछ्छे जिहे भाऊ सुनेहा दे गए सी कि बहिकां ‘ते बाहर बलब नां जगाओ ते आपणे कुत्ते मार दिओ। कुत्तिआं दे भौंकण नाल उहनां दे आउण दी सूह लग्ग जांदी है।” एनी कहि के उह चुप्प कर गई।

“कुत्ते मार ‘ते फिर तुसां?” मैं सुरिंदर वल्ल मूंह कीता।

उह झूठा जिहा हासा हस्सिआ, “की करदे! साडा तां मारन नूं जी नहीं सी करदा। हत्थीं पाले सी। पर जदों अगली वार उह घरे ही आ धमके तां मैं आखिआ, ‘दवाई नहीं सी लभ्भी। तुसीं ही कैपसूल दे दिओ। उहनां दो कैपसूल दित्ते। मैं दहीं ‘च रला के पा ‘ते। पल ‘च फुड़क गए विचारे!”

उह फिर शरमिंदिआं दे ताण रोंदा जिहा हासा हस्सिआ तां मेरे अंदर झरनाहट फिर गई।

“पुत्त, की करदे फेर? मन अवाजार तां बड़ा होइआ। औंतरे टब्बर दा जीअ सन। पर आपणी जान वी तां चाहीदी सी। उहनां मुंडिआं ‘च इक्क छूहका जिहा, मसां छटांकी कु जिड्डा होऊ, उहो ही नहीं सी माण। चपेड़ दी मार नहीं होणा। चांभलिआ होइआ सटेन चुक्क चुक्क वखावे। अखे: तुसीं हुकम किउं नहीं मंनिआं?” बीबी दा मन भरिआ होइआ सी।

मैनूं आपणी जवानी दे दिनां विच्च बड़े चाअ नाल पालिआ कुत्ता टौमी याद आइआ। उह बिलकुल इस कहाणी विचले टौमी वरगा सी। उसनूं किसे मरज़ तों बचाअ लई लवाइआ टीका ख़राब हो गिआ सी ते फिर ज़खम राज़ी होण विच्च ही नां आइआ। इक्क सवेरे जदों कहाणी विचली ‘मां’ वांग ही बीबी नें मैनूं जगा के के ‘टौमी’ दे मर जाण दी ख़बर सुणाई तां उसदी मुरदा देह कोल बैठण लग्गिआं मेरा अंदर टुट्ट गिआ। फुट्ट फुट्ट के मेरा रोण निकल गिआ। हुण वी मैं महिसूस कर रिहा सां कि कुत्तिआं नूं मारन लई परिवार नुं किहो जिही मानसिक पीड़ा विचों गुज़रना पिआ होवेगा! की कुत्ते मारनों इनकारी हो के मैं ख़ुद ‘उहनां’ दी नराज़गी सहेड़ सकदा सां! आपणे आप नूं घरदिआं दी थां रख्ख के वेखिआ तां जापिआ कि सदा सवै-माण नाल भरिआ मेरा अंदरला उस ‘छटांक’ कु मुंडे दी सटेन अग्गे मिट्टी हो गिआ सीे! मेरी अणख़ मैनूं गरक गई जापी। तरनतारन दी परिकरमा विच्च वंगार के आपणी बांह नीवीं करन दा ललकारा मारन वाले हंकारे जट्ट दी बांह मेरे दादे वल्लों भंने जाण दी कहाणी मैनूं शरमिंदा करन लग्गी। मैनूं लग्गा; मेरीआं आपणीआं बाहवां टुंडीआं हो गईआं सन! मेरा मन रोस नाल भर गिआ। मैं किउं नहीं सां कुझ्झ करन जोगा रहि गिआ? कित्थे सी उह बहादरी ते जवां-मरदी दीआं टाहरां मारन वाला पंजाब, जिहड़ा कहिंदे सन, किसे दी टैंअ नहीं सी मंनदा!

फिर मैनूं ख़िआल आइआ कि मैं एथे कुत्तिआं दे मरन नूं लै के दुखी हो रिहां, पर एथे तां हर रोज़ पता नहीं किंने लोक कुत्तिआं वांग मारे जा रहे हन! बंदिआं नूं कुत्तिआं वांग मारे जाण दीआं ख़बरां असीं बड़े सहिज हो के पहड़न गिझ्झ गए सां! साडी संवेदना सुंन हो गई सी। साडे अंदर दरद दा अहिसास मर गिआ सी। इह अहिसास उस दिन ही सानूं घड़ी पल लई चौकाउंदा सी जिस दिन मरन वालिआं दी गिणती रोज़ाना दीआं औसत मौतां नालों तिगणी-चौगुणी जां उसतों वी वधेरे होवे!

अचनचेत मैं निरणा लिआ कि अज्ज जदों बंदिआं नूं कुत्तिआं वांग मरदे वेख के साडीआं अख्खां दा पाणी सुक्क गिआ जापदा है, मैं अजिही कहाणी लिखांगा कि कुत्ते दे मरन ‘ते वी पहड़न वालिआं दीआं अख्खां विचों अत्थरू किरन लग्गण! ते इह कहाणी लिखी गई। कुत्ते मारन दी घटना नूं मैं समुच्चे पंजाब-संकट नाल जोड़ के जदों इह कहाणी लिखी तां इसदे छपण ‘ते अजिहा उतशाही प्रतीकरम होइआ जिसदी कदी कलपना वी नहीं सी कीती। गुरदिआल सिंघ नें परसंसा भरी लंमी चिठ्ठी लिखदिआं किहा कि कहाणी विच्च जित्थे कुत्ते नूं मारिआ जांदा है ओथे मेरा मन भर आइआ सी। सुरजीत पातर नें इसदी वडिआई करदिआं शाइराना अंदाज़ विच्च किहा कि इस कहाणी तों पंजाब संकट बारे लिखी सारी कविता वारी जा सकदी है। कनेडा दे इक्क साहितक समागम विच्च कहाणीकार अमनपाल सारा नें किहा कि उह कहाणी पहड़दिआं तिंन वार रोइआ। ‘सिरजणा’ विच्च छपी इस कहाणी दीआं परचा नां मिल सकण दी सूरत विच्च कहाणी दे प्रसंसकां नें फोटो कापीआं करवा करवा के वंडीआं। फोटो कापीआं करके वंडण वालिआं विच्च कहाणीकार गुरपाल लिट दे नौजवान पुत्तर तों लै के यूनीवरसिटी दे प्रोफ़ैसरां तक्क पाठक शामल सन। ‘सिरजणा’ विच्च इस बारे आरटीकल ते अनेकां परसंसा पत्तर छपे।

एनी विआपक परसंसा मिलण दे बावजूद किसे सज्जण नें आपणे बिआन विच्च आपणा अंदरला उलार जोड़दिआं किहा कि पहिली वार तां टौमी सटेनां वालिआं दे गल नहीं पिआ (किउंकि उसनूं घर दे मालकां नें अगलिआं तो डर के संगली पा के बंनह दित्ता सी) पर जदों पुलिस आउंदी है तां उह उहनां नूं भौंकदा, वढ्ढदा ते उहनां दी वरदी पाड़न नूं आउंदा है! उसने इस गल्ल विचों वी मेरी ‘अत्तिवादीआं’ प्रती ‘हमदरदी’ पहड़ लई सी!

मेरे समकाली कहाणीकारां विचों किसे किसे नें अजिही गल्ल वी कीती कि ततकाली लहिरां नाल जुड़े साहित दी उमर बहुती नहीं हुंदी किउंकि अजिहे समें कथाकार लई ‘साहितक वित्थ’ सथापत करनी औखी हुंदी है। लहिर दे मरन नाल अजिहा साहित वी मर जांदा है। कुझ्झ इक्क दी तां इह वी राइ सी कि पंजाब दा मसला भख़दा होण करके मैं अजिहीआं कहाणीआं केवल चरचा विच्च रहिण लई लिख रिहा सां।

पर मैं इस करके ‘पंजाब संकट’ नूं कहाणीआं दा विशा नहीं सी बणाइआ कि अजिहा करके चरचा विच्च रहिणा चाहुंदा सां। उस समें दा ख़ौफ़ ते दहिशत ही अजिही सी जो लगभग डेढ दहाका साडे मनां ‘ते छाई रही। कोई इक्क पल वी अजिहा नहीं सी हुंदा जदों किसे पंजाबी दा मन इस ख़ौफ़ दे भार तों मुकत होइआ होवे। इह कुझ्झ कु दिनां दा तरदा तरदा मसला नहीं सी सगों साडीआं रूहां ‘च उत्तर गिआ अजिहा पाला सी जो सानूं हर पल दंदोड़िक्का छेड़ी रख्खदा सी। अजिहे मसले ‘ते निरे शौक जां चरचा नूं मुख्ख रख्ख के नहीं सी लिखिआ जा सकदा। इस बारे लिखणा ‘मौत नूं मासी’ आखण वाली गल्ल सी। ख़ास तौर ‘ते माझे दे उस इलाके विच्च जित्थे मैं रहिंदा सां, दहिशगरदां विरुध्ध इक्क बोल बोलणा वी मौत नूं सद्दा देण वाली गल्ल सी। उस इलाके विच्च जिसनूं मैं ‘चौथी कूट’ आखदा सां ते जो दूजे देश-वासीआं लई वरजित इलाका बण गिआ सी। उस पिंड विच्च बहि के, जिस दे सभ तों वध्ध लोक इस दौर विच्च गोली दा शिकार हो गए होण ते जित्थे निक्की जिही झूठी-सच्ची गल्ल ‘ते बंदे नूं अगले जहान पहुंचा दित्ता जांदा होवे, केवल चरचा विच्च रहिण लई अजिहीआं कहाणीआं नहीं सन लिखीआं जा सकदीआं! इह तां आपणे मन ‘ते टिके हिमालीआ जिड्डे भार नूं कलम दी नोक नाल भोर भोर के भोरा-मासा हटाउण दा निमाणा जिहा यतन सन।