-1-

पारक दा दूसरा चक्कर शुरू करदिआं ही राम नाथ नूं घरों सुनेहा आ गिआ। माइआ नगर तों फ़ोन आइआ सी। नीलम भैण दे घर डाका पिआ सी। सारा टब्बर ज़ख़मी सी। सैर विचे छड्डो। घरे आओ, तुरंत माइआ नगर जाणा सी।

तेज़ तुरन कारन राम नाथ दा साह पहिलां ही चहड़िआ होइआ सी। डाके दी ख़बर सुणके दिल दी धड़कन वी तेज़ हो गई। अख्खां अग्गे भंबू तारे नच्चण लग्गे।

आपणे आप नूं संभालण दा यतन करदा राम नाथ घाह उपर बैठ गिआ। बूट लाहे। पसीने दीआं बूंदां पूंझीआं। पाणी पीता। अख्खां ते छिट्टे मारे। मन कुझ्झ ठिकाणे आइआ। घर जाण लई उह बेटी दे मोपड पिछ्छे बैठ गिआ।

घर गए नूं पतनी संगीता नें होई घटना दा विसतार दस्सिआ।

डाके नालों वी वध्ध चिंता वाली गल्ल इह सी कि फ़ोन नीलम दे किसे गुआंढी दे घरों आइआ सी। नीलम दे जेठ मोहन लाल दे परिवार दे किसे मैंबर नें उनहां नूं सूचित किउं नहीं कीता?

मोहन दा परिवार साधारन परिवार नहीं सी। उह माइआ नगर दे चुणवें घरां विचों इक्क गिणिआ जांदा सी। उनहां दा चंगा कारोबार सी। सरकारे दरबारे पहुंच सी। सारे शहिर विच्च जाण पहिचाण सी। की उनहां विचों कोई मौके वाली थां ते नहीं सी पुज्जा? जे हां तां किउं नहीं?

शहिर जाण दी तिआरी विच्च रुझ्झी पतनी दी सहाइता करदा राम नाथ इस गुत्थी नूं सुलझाउण दा यतन करन लग्गा।

इह प्रशन राम नाथ दे मन विच्च बिनां वजहा नहीं सी उठ्ठ रिहा। इस दे पिछ्छे वड्डा पिछोकड़ सी।

कुझ्झ देर तों दोहां परिवारां विचकार खिच्चोताण चल्ल रही सी। जाइदाद दा झगड़ा परिवारक सालसां दे हत्थों निकल के कचहिरी तक अप्पड़ गिआ सी।

आपस विच्च मूंह मोटे सन अते बोलचाल बंद सी।

राम नाथ दा मत्था ठनक रिहा सी। किधरे इह वारदात उसे परिवार नें नां कराई होवे?

उस परिवार उपर वी राम नाथ बे वजहा शक्क नहीं सी कर रिहा।

किसे होर वल्लों नहीं, अजिही वारदात दी चितावनी खुद नीलम दी जठानी कोलों मिली सी। चाचे भतीजिआं विचकार सौ मन मुटाव होइआ होवे। माइआ देवी लई वेद अते उसदा परिवार पहिलां वांग आपणा सी। मोहन दे जिऊंदे होर गल्ल सी। हुण मुंडे आप हुदरे होए फिरदे सन। उनहां दे चाले ठीक नहीं सन। दारू पींदे मुंडिआं नूं कई वार माइआ देवी नें भैड़े मनसूबे घड़दे सुणिआ सी। कदे उह आखदे सन चाचे वेद नूं आपणे डउलिआं ’ते माण है। जवानी विच्च पहिलवानी करदे नें उस नें डउले बणाए सन। उह वेद दे डउलिआं दा चूरमा बणा देणगे। नीलम नूं आपणी अकल उपर हंकार सी। उह उसदे दिमाग़ दी खख्खड़ी खख्खड़ी कर देणगे। नेहा विचारी नें कदे किसे दा कुझ्झ नहीं सी विगाड़िआ। उह आपणी छोटी भैण नूं भरे बज़ार नंगा करन दी सोच रहे सन। वेद दा इको इक्क वारिस कमल उनहां दीआं अख्खां विच्च वध्ध रड़कदा सी।

कदे कदे उह उस दा कंडा कढ्ढण दी बक बक करिआ करदे सन।

हमदरदी वजों माइआ देवी नें वेद नूं सुझाअ दित्ता सी। लै दे करके मुंडिआं नाल समझौता कर लओ। कल्ल्ह नूं कोई भाणा वरत गिआ तां उस नूं उलांभा नां दिओ।

राम नाथ नूं इस ताड़ना दी ख़बर मिली सी, पर उसने इस वल्ल बहुता धिआन नहीं सी दित्ता। कानूंन दी पहड़ाई करदे समें उनहां नूं अपराध विगिआन पहड़ाइआ जांदा सी। इस विगिआन दे इक्क पाठ दा अधिऐन करदे उस नें पहड़िआ सी कि सभिअक जमातां सरीरक हिंसा दा सहारा नहीं लैंदीआं। ख़ून खराबे दी थां उह कानूंनी लड़ाई लड़न विच्च विशवास रख्खदीआं हन। इह केवल सिधांत ही नहीं सी। इस सिधांत नूं सच्च दी कसवट्टी ’ते पूरा उतरदे राम नाथ नित देखदा सी। इक्क भईआ दूसरे भईए दा पंजाह रुपए दे झगड़े कारन गळ वढ्ढ दिंदा सी। पर माइआ नगर विच्च लोकां दे मुकद्दमे वी चल्लदे सन अते सांझे कारोबार वी। पती पतनी तलाक लै के वी इक्क दूजे दे घर रात कट्ट जांदे सन।

इसे सिधांत ’ते अमल करदिआं राम नाथ नें वेद नूं इस चितावनी उपर धिआन नां देण दी सलाह दित्ती सी। हुण उस नूं आपणी इस सलाह ’ते पछतावा हो रिहा सी।

माइआ नगर विच्च जाण लई राम नाथ नें टैकसी मंगवा लई। टरैकसूट लाह के कुड़ता पजामा पा लिआ। अलमारी विच्च हत्थ मारिआ। दस हज़ार रुपिआ पिआ सी। चुक्क के बोझे पा लिआ।

छोटे भरा मंगत नूं बुला के सारी सथिती तों जाणू कराइआ। बच्चिआं दी देखभाल करन दी ज़िंमेवारी लाई। वीह हज़ार दा चैक्क कट्ट के उसनूं फड़ाइआ।

दिने उह बैंक विचों पैसे कढवा लए। माइआ नगर जांदिआं ही उह फ़ोन करेगा।

मसला गंभीर नां होइआ तां शाम तक वापस आ जाएगा। लोड़ पई तां मंगत नूं बुला लएगा।

राम नाथ दे शहिर तों माइआ नगर दा रसता इक्क घंटे दा सी। अग्गे इह पैंडा अख्ख झपकदिआं निकल जांदा सी। अज्ज हर पल जिवें जुगां जिड्डा लंबा हो गिआ सी। उसदा मन काहला पै रिहा सी। उसनूं नीलम दे परिवार दी चिंता खा रही सी। फ़ोन ’ते कदे सच्च नहीं दस्सिआ जांदा। बहुत कुझ्झ छुपा लिआ लगदा सी। रब्ब खैर करे। मन ही मन उह प्रारथना कर रिहा सी।

इह वारदात किस नें कीती होएगी?

कार दे माइआ नगर दे राह पैंदिआं ही राम नाथ दा ज़िहन प्रशनां नाल भरन लग्गा।

अज्ज कल्ल्ह काले कछ्छिआं वाले अजिहीआं वारदातां विच्च रुझ्झे होए हन।

हो सकदा है इह वारदात अजिहे किसे गरोह नें कीती होवे?

दूसरे ही पल उसने काले कछ्छिआं वालिआं दे इस वारदात विच्च शामल होण नूं नकार दित्ता। इह गरोह अजिही वारदात शहिरां जां पिंडां दे बाहरवार वस्से घरां विच्च करदा सी। नीलम दा घर शहिर दे पचग्ग विच्च सी। गली दे दोहीं पासीं लोहे दे वड्डे गेट सन। पहिरेदार सारी रात पहिरा दिंदा सी।

इह वारदात किसे गिणी मिथी साज़िश तहित होई जापदी सी।

राम नाथ दी हदाइत उपर डराईवर नें गड्डी सौ दी सपीड उपर छड्ड दित्ती। उसे रफ़तार नाल राम नाथ खिआली घोड़े दौड़ा दौड़ा अते टुट्टीआं तंदां जोड़ जोड़ घटना दी तहि तक जाण दा यतन करन लग्गा।

राम नाथ नूं मोहन दे मुंडिआं ’ते शक्क हो रिहा सी। पर उह वेद दे परिवार दे खून दे पिआसे बण जाणगे, इह सच्चाई उस तों निगली नहीं सी जा रही।

मोहन वड्डा भरा सी। वेद छोटा सी। पर दोहां विचकार रिशता पिओ पुत्तरां वरगा सी। मोहन उमर विच्च वेद नालों केवल दस साल वड्डा सी, पर रुतबे विच्च सौ गुणा वड्डा सी।

वेद हाले तीसरी विच्च पहड़दा सी, जदों मोहन सिवल इंजीनीअरिंग दी पहड़ाई करन लई माइआ नगर दे मशहूर इंजीनीअरिंग कालज विच्च दाख़ल होइआ सी। उस समें इस कालज विच्च दाख़ला चुणवें विदिआरथीआं नूं मिलदा सी।

डिगरी हासल करदिआं ही उसनूं नौकरी मिल गई। पी.डबलयू.डी.वरगा महिकमा मिल गिआ अते ऐस.डी.ओ.दा रुतबा। बठिंडे वरगे शहिर विच्च नियुकती हो गई, जिहड़ा ओहनीं दिनीं तरक्की दीआं मंज़लां छालीं तैअ कर रिहा सी। किधरे थरमल पलांट उसर रिहा सी, किधरे खाद फैकटरी। किधरे फौजी छाउणी दा विसथार हो रिहा सी, किधरे होटल सिनमे उसर रहे सन।

आवाजाई नूं सौखा बनाउण लई सरकार सड़कां दा जाल विछा रही सी।

सरकारी इमारतां धरती दी हिक्क ’ते खुंभां वांग उग्ग रहीआं सन।

मोहन लाल हत्थीं कंम करके खाण वाले परिवार विचों आइआ सी। सरीरक मिहनत करन दी उस दी पहिले दिनों आदत सी। दिमाग़ देण विच्च कुदरत नें खुल्ल्ह वरती सी। दोहां दे सुमेल नाल मोहन दे कंम दीआं चारे पासे धुंमां पै गईआं। हर सड़क, हर इमारत मिथे टीचे तों पहिलां तिआर कराउण लई उह मशहूर हो गिआ।

नां दे नाल नाल मोहन नें रज्जवां धन वी कमाइआ। लेबर दे ठेकेदार तों लै के लुक्क सीमिंट दे ठेकेदार तक उसनूं कमिशन देणा पैंदा सी। हौली हौली उस नें ठेकेदारां नाल दोसती पा लई। कमिशन दी थां उनहां नाल हिस्सेदारी कर लई।

शहिर दे इक्क सिरकढ्ढ ठेकेदार नें उस दी प्रतिभा नूं पहिचाण के उसनूं आपणा जवाई बणा लिआ। बठिंडे शहिर विच्च उसदे पैर होर पक्के हो गए।

मोहन लाल नें आपणी सथिती मज़बूत करके घर दे सुधार वल्ल धिआन दित्ता। कच्चे पक्के मकान दी थां दो मंज़ली इमारत उसार दित्ती। बाप नूं करिआने दी दुकान तों उठा के कप्पड़े दे आलीशान शोअ रूम उपर बैठा दित्ता।

मोहन नें बहुत कोशिश कीती। वेद दो अख्खर पहड़के कोई चंगी लाईन अख़तिआर कर लए। डाकटर बणे जां इंजीनीअर। पर वेद दा धिआन पहड़ाई वल्ल घट्ट, खेडां वल्ल ज़िआदा सी। पहिलवानी उसदा पहलिा शौक सी। उह सारा दिन डंड बैठकां कढ्ढण विच्च बिता दिंदा सी।

अज्ज कल्ल्ह दे दिन हुंदे तां मोहन उस नूं डोनेशन दे के किधरे दाख़ला लै दिंदा। ओहनीं दिनीं नंबरां दी पुछ्छ पैंदी सी अते नंबर वेद दे पल्ले नहीं सन पैंदे।

डिगदे ढहिंदे वेद नें जिउं ही बी.ए.पास कीती मोहन लाल नें मिउंसीपल कमेटी दे प्रधान नाल गंढ तुप्प करके उसनूं कलरक भरती करवा दित्ता। नाल प्रधान तों वाअदा लिआ, जिउं ही चुंगी जां टैकस इंसपैकटर दी आसामी खाली होई उह झट्ट वेद नूं उत्थे अड़ा देवेगा।

मोहन लाल दे रुतबे नूं धिआन विच्च रख्खदिआं राम नाथ दे बाप नें आपणी सभ तों सोहणी अते बी.ए.पास धी नूं उस दे लड़ ला दित्ता।

सभ पासिउं संतुशट वेद ढोले गाउण लग्गा।

पंज साल दी मिआद पूरी होण ते जदों मोहन लाल दे अफ़सर दी बदली पटिआले दी होई, उह मोहन लाल नूं बदलवा के पटिआले लै गिआ। मोहन नें पटिआले दा मूंह मत्था संवार दित्ता। नाल आपणी तजौरी भर लई।

तरक्की लै के अफ़सर माइआ नगर चला गिआ। मोहन लाल दी तरक्की होण वाली सी। तरक्की विच्च कोई विघन नां पए इस लई मोहन लाल नूं अफ़सर दे खंभां दी ज़रूरत सी।

अफ़सर नें मोहन लाल दी बेनती झट्ट परवान कर लई। अज्ज कल्ल्ह मिहनती अते वफ़ादार अफ़सरां दी कमी हुंदी जा रही सी। मोहन विच्च इह दोवें गुण सन। उह झट्ट उसनूं माइआ नगर लै गिआ।

माइआ नगर विच्च मोहन वरगे कई मिहनती अफ़सर बैठे सन। उह वफ़ादार भावें घट्ट सन पर जुगाड़ीए वध्ध सन।

मोहन लाल अफ़सरां दी भीड़ विच्च गुआच गिआ।

पर दरिआवां दे वहाअ ठल्ल्हे नहीं रहिंदे। मोहन लाल नें महिकमे दा खहिड़ा छड्ड के माइआ नगर दीआं विउपारक संभावनावां दा जाइज़ा लैणा शुरू कर दित्ता।

सड़कां ’ते लुक्क विछाउण दा रवाइती तरीका महिंगा वी पै रिहा सी अते कंम वी वधीआ नहीं सी हो रिहा। सरकार नें सारे फाइदे नुकसान विचार के मिकस पलांटां विच्च तिआर कीते माल नूं सड़कां ’ते विछाउण दी योजना नूं मनज़ूरी दे दित्ती। झट्ट मोहन लाल नें आपणे तजरबे तों फ़ाइदा उठाउण दा मन बणा लिआ।

जिस जिस अफ़सर नें मिकस पलांट चल्लण विच्च मददगार साबत होणा सी, उनहां दे हिस्से पत्तीआं रख्ख के दिनां विच्च मिकस पलांट गड्ड दित्ता।

ओना माल सड़कां ’ते नहीं सी पैंदा जिंना बच रहिंदा सी। ओनी कमाई सड़कां ते माल विछाअ के नहीं सी हुंदी, जिंनी बचे माल नूं वेच के हुंदी सी।

पलांट दा खरचा दो साल विच्च निकल गिआ। जदों तक मिकस पलांट विचों हुंदी कमाई दी समझ होर विउपारीआं नूं लगदी, उदों तक मोहन लाल कई करोड़ रुपिआ कमा चुक्का सी।

इस कमाई विचों उह शहिर दी हद्द ’ते चलदे दो भठ्ठे अते इक्क शैलर खरीद चुक्का सी। कोइले दी दलाली विचों चंगा पैसा बण रिहा सी। विचे इस विउपार विच्च नहुं अटका लिआ।

वधीआ इट्ट माइआ नगर दे विउपारी लै जांदे। पिल्ली इट्ट वधीआ इट्ट दे भाअ सरकार दीआं सड़कां अते इमारतां विच्च खप जांदी। कोइले दे नाल नाल मोहन लाल नें सरकार नूं लुक्क सपलाई करन दे ठेके लै लए। चौथा हिस्सा कोलतार माइआ नगर पुज्जदी। तिंन चौथाई मथुरा विच्च ही विक जांदी सी।

मींह वांग बरसदे पैसे नूं मोहन लाल किथे संभाले?

दोसतां मित्तरां नें सलाह दित्ती। बलैक मनी नूं जाइदाद विच्च खपाओ।

माइआ नगर विच्च पलाटां दी कीमत पंजाह पंजाह लख्ख रुपए तक सी। इक्क नंबर दे लख्ख नाल वीह लख्ख छप जांदा सी।

इस धंदे विच्च सभ तों वध्ध लुट्ट सी। पलाटां दी ख़रीदो फरोख़त छड्ड के उस नें कालोनीआं कट्टणीआं शुरू कर दित्तीआं।

मरिआं खपिआं अते लवारसां दी ज़मीन मिट्टी दे मुल्ल मिलदी सी। माल महिकमे अते पुलिस दे अफ़सरां नाल मिल के मिट्टी सोने विच्च बदल जांदी सी।

कालोनी दे धंदे नें इक्क होर फ़ाइदा कीता। अफ़सरां, शाहूकारां अते विउपारीआं नाल वाह पैण लग्गा। सिआसी बंदिआं दा काला धन खपाउण दा मौका मिलण लग्गा। उसदी जाण पहिचाण दा घेरा बहुत विशाल हो गिआ।

सारे अड़े कंम चुटकी च होण लग्गे।

दोसतां दे नाल नाल दुशमणां दी गिणती वी वधण लग्गी। कदे इनकमटैकस वालिआं नें छापे मारे अते कदे विजीलैंस वालिआं नें। उसदी जाइदाद दी पड़ताल होई, परचे दरज होए अते मुकद्दमे चल्लण लग्गे।

सरकारी नौकरी उह छड्डणी नहीं सी चाहुंदा। उसदा रुतबा वड्डा सी।

सरकार विच्च पुछ्छ बणी होई सी। आपणे रुतबे दे आधार ’ते उह अफसरां नूं आसानी नाल मिल सकदा सी। कलब्बां होटलां विच्च जा सकदा सी।

अफ़सरी दे नालो नाल विउपार चलाउणा मुशकल हुंदा जा रिहा सी। बच्चे हाले छोटे सन। पतनी बहुती हुशिआर नहीं सी। माइआ नगर विच्च होर सभ कुझ्झ सी, पर वफ़ादारी दा नां निशान नहीं सी। किहड़ा कदों ठग्गी मार जाए, कोई भरोसा नहीं सी। जिहड़े बंदिआं नूं मोहन नें दिहाड़ीदारां तों ठेकेदार बणाइआ सी, लोड़ पैण ’ते उहो उस नूं ठिब्बी पा रहे सन।

मोहन लाल भरोसा करे तां किस ’ते? इस समस्सिआ दा हल्ल उसदी पतनी माइआ नें सुझाइआ सी।

"साडे नौकर चाकर कोठीआं फैकटरीआं दे मालक बण गए। वेद नूं शहिर किउं नहीं बुला लैंदे! उह चार पैसे बणा लएगा तां घर विच्च तां रहिणगे।

भरा भरा दी बांह हुंदा है। अड़े थुड़े बराबर खड़ेगा।”

पहिलां वेद नें जको तक्की कीती। वेद दा आपणे शहिर विच्च वधीआ गुज़ारा हो रिहा सी। उसदा दिल लग्गा होइआ सी। उसनूं माइआ दी बहुती भुख्ख नहीं सी।

पर नीलम नूं जदों इस पेशकश दा पता लग्गा उसदे मूंह विच्च पाणी आ गिआ। माइआ नगर नूं भारत दा मानचैसटर आखिआ जांदा सी। बच्चे कारोबार चलाउण वाले होण तां भावें करोड़पती बण जाण। पहड़ना होवे तां घर बैठे डाकटर बण सकदे सन, इंजीनीअर बण सकदे सन। उच्च कोटी दे होर कोरसां लई यूनीवरसिटी सी। उत्तरी भारत दे सभ तों वध्ध माहिर डाकटर इसे शहिर विच्च रहिंदे सन। मनोरंजन लई होटल सन, कलब्ब सन। ख़रीदो फ़रोखत लई दुनीआं भर दे शोअ रूम।

नीळम दी आर तों तंग आ के वेद नें आपणा मन बदल लिआ। बच्चिआं दे भविख्ख लई उह कुझ्झ वी करन नूं तिआर सी।

राम नाथ दी टैकसी माइआ नगर वल्ल दौड़ रही सी, पर राम नाथ समें नूं पिछांह वल्ल मोड़ना चाहुंदा सी।

चंगा हुंदा जे वेद आपणा शहिर नां छड्डदा। चंगा हुंदा जे उस नें मोहन दी तजवीज़ ठुकरा दित्ती हुंदी। अज्ज इह दिन नां वेखणा पैंदा।

उस समें किसे नूं की पता सी राम लकशमन वाला पिआर सुगरीव बाली विच्च बदल जाएगा।

जदों तक विउपारक सांझ मोहन अते वेद विचकार रही सभ अछ्छा हुंदा रिहा। मोहन वेद नूं जो ज़िंमेवारी सौंपदा उह उस नूं पूरी ईमानदारी नाल सिरे चहड़ाउंदा रिहा। मोहन जिथे आखदा, वेद अख्खां मीच के दसतख़त कर दिंदा रिहा। बदले विच्च मोहन उस नूं हिस्से आउंदा मुनाफ़ा बिनां किसे घाट वाध दे दिंदा रिहा।

जदों वेद माइआ नगर आइआ सी उस दा सारा समान इको फोर वीलर विच्च आ गिआ सी।

हुण वेद कोल सभ कुझ्झ सी। पोश कालोनी विच्च पंज सौ गज़ दी कोठी सी।

दो होर पलाट उस दे नां सन। मोहन दीआं कई फरमां विच्च उह हिस्सेदार सी।

प्रापरटी डीलर दा उसदा आपणा वख्खरा कंम सी। उसदा दफ़तर एअर कंडीशन सी। उस कोल एअर कंडीशन कार सी। पतनी कोल किलो दे लगपग सोना सी।

दोहां बच्चिआं दे नां वड्डे वड्डे फिकस डिपाज़िट सन। वेद दी शराफ़त कारन आपणे कारोबारा विच्च उस दा नां इज़्ज़त नाल लिआ जांदा सी।

नीलम चंगे खिआलां दी धारनी सी। आंढ गुआंढ विच्च उसदी चंगी पुछ्छगिछ्छ सी।

दोवें परिवार रंगां विच्च वस्सदे सन।

राम नाथ दी कार सिवल लाईन विच्च प्रवेश कर गई। जिउं जिउं घर नेड़े आ रिहा सी, उस दे दिल दी धड़कन तेज़ हुंदी जा रही सी। पता नहीं अग्गों की सुनेहा मिलण वाला है? गंभीर रूप विच्च ज़खमी होइआ कोई मैंबर दम वी तोड़ सकदा सी।

मौत दा ख़िआल आउंदे ही राम नाथ दे मत्थे ’ते तरेली आ गई। दिमाग़ नूं घुमेर चहड़ी। खब्बी बांह विच्च दरद होइआ।

राम नाथ दी घबराहट होर वध गई। इह सभ हारट अटैक दीआं निशानीआं सन।

हारट अटैक दा खिआल आउंदे ही राम नाथ नूं फेर मोहन लाल दी याद आ गई।

इह मोहन नूं होई हारट अटैक दी बिमारी ही सी जिस नें दोहां परिवारां दी सांझी कंध विच्च तरेड़ पाई सी।

पहिला अटैक उस नूं दस साल पहिलां होइआ सी। उदों मोहन दी उमर पंजाह साल सी। बाईपास सरजरी करवा के उह नौ बर नौ हो गिआ सी। सगों पहिलां नालों वध्ध जवान महिसूस करन लग्गा सी।

साल भर मोहन लाल डाकटरां दीआं हदाइतां ’ते अमल करदा रिहा।

लंबीआं सैरां अते खाण पीण दा परहेज़ करदा रिहा।

वधदे कारोबार नाल दोसतां दा घेरा विशाल हुंदा गिआ। विउपारक गंढां नूं पीडा करन लई मजबूरन होटलां कलब्बां विच्च जाणा पिआ।

मोहन इकल्ला नहीं सी जिस दी बाईपास सरजरी होई सी। इथे अध्धिआं नालों वध्ध विउपारी सीना चिरवाई फिरदे सन। कोई डाकटरां दी सलाह दी बहुती परवाह नहीं सी करदा। खाधे पीते बिनां मानसिक तनाअ दूर होण वाला नहीं सी। उह भुख्खे रहिण नालों खांदे पींदे मरन नूं तरजीह दिंदे सन।

रीसो रीस मोहन नें पहिलां इक्क पैग्ग लैणा शुरू कीता, फेर दो अते अख़ीर तिंन।

जे विउपार वध रिहा सी तां उमर वी वध रही सी।

उधर उसदे साथीआं वल्लों घुटाले करन दी गिणती वध्ध रही सी। कई वार नेड़ला दोसत ही हत्थ ’ते हत्थ मार जांदा सी। गिला करन ते आखदा सी “विउपार विच्च सभ चलदा है।”

घाटिआं वाधिआं अते खिच्चोताण कारन मोहन लाल दा मानसिक तनाउ वधण लग्गा। पहिलां शूगर होई, फेर ख़ून दा दबाअ हेठ उत्ते होण लग्गा।

डाकटरां नें ख़तरे दी घंटी खड़काई। परहेज रख्खो। ख़ून गाहड़ा हुंदा जा रिहा सी। गाहड़ा ख़ून दिल ’ते असर कर रिहा सी। दोबारा सरजरी नहीं होणी।

दोबारा होइआ अटैक जान लेवा साबत होणा है।

डाकटरां दी चितावनी दे बावजूद दूसरा अटैक हो गिआ।

फौरी तौर ’ते उस अटैक दा असर मोहन लाल ’ते नहीं सी होइआ। पर राम नाथ नूं लगदा सी उस अटैक दा असर हुण वेद परिवार उपर होइआ सी।

दूसरे अटैक बाअद डाकटरां नें मोहन लाल नूं पूरी तरहां बिसतर उपर लिटा दित्ता। हुण समां मानसिक तनाअ तों दूर रहिण दा सी। मानसिक तनाअ तों खहिड़ा छुडाउण लई विउपार तों खहिड़ा छुडाउणा ज़रूरी सी।

मोहन लाल नें आपणी सथिती भांप लई। उसदा कोई वी दिन आख़री दिन हो सकदा सी।

लालच वस्स पहिलां उह ग़लती कर बैठा सी। उसने सिहत दी परवाह नहीं सी कीती। उह दोबारा ग़लती करन वाला नहीं सी। हुण हालात बदले होए सन। हुण कोठीआं, कारां, कारख़ाने, सोना, चांदी सभ वाधू होइआ पिआ सी। इह संभल जाए उहो बहुत सी।

मुंडे कारोबार संभालण योग हो गए सन।

वड्डा पंकज अमरीका तों ऐम.बी.ए.कर आइआ सी। छोटे नीरज नें मकैनीकल इंजीनीअरिंग रुड़की तों कीती सी। दोहां विच्च लोड़ींदी काबलीअत है सी।

मोहन नें पैसा बथेरा कमाइआ सी पर रुल खुल के। कदे सड़कां ’ते खड़ो के धूड़ां फक्क के, अते कदे सड़दी लुक्क दे धूंए नाल फेफड़े गाल के। कदे दफ़तरां दी खाक छाणी, कदे अफ़सरां दे हुक्के भरे।

मोहन चाहुंदा सी उसदे बच्चे इस इतिहास नूं नां दुहराउण। उह उनहां लई कोई वड्डा उदयोग सथापत करना चाहुंदा सी।

मोहन दे दोसतां मित्तरां नें राए दित्ती। इनही दिनीं लोहे दे विउपार दी चहड़त सी। लोहे दीआं मिल्लां सोने दीआं सिल्लां ढाल रहीआं सन।

इह राए मोहन दे मन लग्ग गई। उह लोहे दी मिल्ल दे सुपने देखण लग्गा।

दो एकड़ दा पलाट। चारे पासे उच्ची उच्ची दीवार। पलाट दे विचकार वड्डा सारा पलांट। इक्क पासे वड्डा सारा एअर कंडीशन दफ़तर। दूजे पासे नौकरां दे कुआटरां दी कतार। चार चार गेट। हर गेट ’ते पहिरा। वड्डीआं वड्डीआं कारां, नोट, मालक, सलूट।

कुझ्झ दिन सोच विचार के मोहन नें लोहे दी मिल्ल लाउण दा ऐलान कर दित्ता। हैवी इंडसटरी। सारा काला धन इक्क थां खपा दिओ।

करोड़ां रुपए दे इस खलजगण विच्च वेद पैणा नहीं सी चाहुंदा। मिल्ल दे पलांट दी कीमत पंजाह लख्ख सी। मशीन दी कीमत दो करोड़। करोड़ रुपिआ कोलों लगणा सी। कई करोड़ दा सरकार कोलों करज़ा लैणा सी। वेद सी अनपहड़ गवार।

इह पेचीदा कंम उसदे वस्स दा नहीं सी।

नीलम इक्क वार फेर वेद नूं झुकाउण विच्च कामयाब हो गई सी।

वेद सहिमत ज़रूर हो गिआ सी पर आपणे अंदरों उस नूं ख़तरे दीआं घंटीआं सुणाई देण लग्गीआं सन। मोहन नाल सांझेदारी करन विच्च होर गल्ल सी। भतीजिआं नाल सांझेदारी निभेगी जां नहीं? इस बारे वेद नूं यकीन नहीं सी। उह पहड़े लिखे सन। कारोबार नवें ढंग दा सी। वेद उनहां नाल किस तरहां भिड़ेगा? उस दी समझों बाहर सी।

दीप नगर मुहल्ले वल्ल जांदे राम नाथ नूं अज्ज वेद दी अकल दी समझ आई सी। वेद दी सोच ठीक सी। नीलम गलत सी। चंगा हुंदा जे वेद नीलम दी सलाह नूं नकारण दा दम रख्खदा हुंदा। अज्ज उनहां नूं इह दिन नां देखणे पैंदे।

वेद नूं इस कारोबार दी कदे समझ नहीं सी आई। मोहन नें आपणी सारी पूंजी इस कारोबार विच्च ला दित्ती सी। उस दे पिछ्छे लग्ग के वेद नें आपणा सारा निक्क सुक्क मोहन नूं फड़ा दित्ता। होर वेद नूं कुझ्झ पता नहीं सी। पैसा किथों आइआ, कित्थे गिआ? लोन किथों लिआ गिआ? किहड़ी जाइदाद गहिणे टिकी?

वफ़ादार सिपाही वांग उह जित्थे आखदे दसतख़त करदा रिहा।

सिर मुनाउंदे ही औले पैण वाली कहावत मोहन लाल दे इस कारोबार उपर सही सिध्ध होई सी।

केंदर विच्च सरकार बदल गई। नवीं सरकार नें सख़ती कर दित्ती। नवें करज़िआं दीआं शरतां सख़त हो गईआं। सब सिडीआं घट गईआं। टैकसां विच्च मिलदीआं छोटां बंद हो गईआं। आमद दरामद दीआं शरतां ढिल्लीआं हो गईआं। बाहरों आउंदा माल ससता पैण लग्गा। कच्चे माल अते बिजली दीआं दरां वध गईआं। हेरा फेरीआं दे रसते बंद हो गए।

मिल्ल नूं मिलण वाली मनज़ूरी विच्च देर होण लग्गी। खरचे वधण लग्गे।

बजट हिचकोले खाण लग्गा।

दूजे पासे मोहन दी बिमारी वध गई। पंकज होरां दी इक्क टंग फैकटरी हुंदी, दूजी दिल्ली।

वेद नूं कुझ्झ पता नहीं सी। सारा कारोबार मुलाज़म देख रहे सन।

कई लख्ख रुपए कागज़ पत्तर तिआर करन अते रिशवत देण विच्च खरच हो चुक्के सन। पलाट दीआं किशतां भरीआं जा चुक्कीआं सन। मशीनरी लई ऐडवांस भेजिआ जा चुक्किआ सी। इस पड़ाअ ’ते पुज्ज के पिछ्छे नहीं सी हटिआ जा सकदा।

माहिरां नें सलाह दित्ती। औखे सौखे मिल्ल चालू करो। कदे वी हालात सुखावें हो सकदे सन। मुकाबला सख़त हो चलिआ सी। मुकाबले कारन माड़ीआं इकाईआं नें फेल्ह हो जाणा सी। पिछ्छे बचीआं इकाईआं नें फेर कारोबार ’ते भारू हो जाणा सी।

इसे खिच्चोताण विच्च मिल्ल दा शुरू होणा दो साल पछ्छड़ गिआ।

इक्क पासे मशीनरी दी कीमत वध गई। दूजे पासे करज़े दीआं बाकी रहिंदीआं किशतां रुक गईआं। करज़ा मिल्ल दी उसारी दे हिसाब नाल मिलणा सी। मुलाज़मां दा खरचा बोझ नूं होर बोझल करन लग्गा।

मोहन लाल दा तुरना फिरना बंद हो गिआ। उस दी हालत नूं धिआन विच्च रख्खदे होए फैकटरी विच्च पैण वाले घाटे दी गल्ल उस तों छुपाई गई सी।

पर बिल्ली नूं किंना चिर बोरे विच्च छुपा के रख्खिआ जा सकदा है? मुछ्छां दाहड़ी नालों वध्ध चल्लीआं सन। मिल्ल दैंत दा रूप धार गई सी। उह सारे पैसे खा गई सी पर ढिड्ड हाले वी नहीं सी भरिआ।

अख़ीर कौड़ा घुट्ट भरिआ गिआ। मिल्ल दी उसारी रोक के उस नूं विकरी ते लगा दित्ता गिआ।

दोहां परिवारां दा बहुत कुझ्झ इस मिल्ल नें निगल लिआ सी। नीरज अते पंकज दे हत्थीं सभ कुझ्झ वापरिआ सी। इस लई उनहां नूं पए घाटे दीआं बारीकीआं दा पता सी। वेद नूं आपणे भतीजिआं ते विशवास सी, उसने सबर कर लिआ सी।

पर नीलम नूं इंना घाटा किवें पिआ? इह समझ नहीं सी आ रही। मोहन लाल ’ते भरोसा कीता जा सकदा सी। पर माइआ नगर दी आबो हवा विच्च पले भतीजिआं उप्पर अंनही शरधा नहीं सी रख्खी जा सकदी।

नीलम दे दूर दे रिशते विचों लगदे इक्क भाणजे दी मिल्ल गोबिंदगहड़ चलदी सी। उह पिछ्छे जिहे उस नूं इक्क विआह विच्च मिलिआ सी। उह मिल्ल मुनाफ़ा कमा रही सी।

वेद नें नीलम नूं समझाइआ। उह मिल्ल पुराणी सी। पलाट अते मशीनरी पुराणे भाअ विच्च खरीदे होए सन। ‘गुड विल्ल’ बणी होई सी। आई चलाई चल्ल रही होएगी।

पर नीलम उस नाल सहिमत नहीं सी। उह सवेरे शाम वेद नूं तुंनण लगदी। उह भतीजिआं कोलों हिसाब तां लवे। पता तां लगे घाटा कित्थे पिआ सी? मन नूं तसल्ली तां होवे।

पर वेद दी नां हिसाब मंगण दी हिंमत सी, नां उस नें हिसाब मंगिआ।

पए घाटे अते वेद दी ज़िद्द तों तंग आई नीलम नें गुस्से दा इज़हार आपणे ढंग नाल करना शुरू कर दित्ता।

भतीजिआं दी हेरा फेरी दी शिकाइत पहिलां उसने दूर दे रिशतेदारां कोल कीती। फेर नेड़े दे दोसतां मित्तरां कोल। इशक मुशक वांग उड्डदी उड्डदी गल्ल मोहन तक अप्पड़दी रही। भरा दी गलती ’ते परदा पाउण लई उह गल्ल आई गई करदा रिहा। “चुगली होई है” आख के गल्ल टालदा रिहा।

पर जदों इह गल्ल पंकज दे सहुरिआं तक अप्पड़ी अते फेर सहुरिआं राहीं पंकज कोल तां मसला मोहन लाल दे हत्थों निकल गिआ।

कुझ्झ दिन घर विच्च घुसर मुसर होई। मोहन लाल नें गल्ल आई गई करन दा यतन कीता। पर मुंडे इको ज़िद्द फड़ के बैठ गए। इकठ्ठ करो। हिसाब किताब मूंह ’ते मारो। सांझे कारोबार बंद करो।

नीलम दी गलती अते मुंडिआं दे फैसले नें मोहन लाल दे मानसिक तनाअ नूं सिखर ’ते पहुंचा दित्ता। पहिलां उसदा शूगर वधिआ। फेर दिल दी धड़कण।

फेर उसनूं तीसरा अटैक होइआ अते दिल दी धड़कण बंद हो गई।

“बच्चिओ, मौत दा समां अते सथान पहिलां तों निशचित है। मौत दा कोई बहाना बनणा हुंदा है। इस विच्च किसे दा कोई दोश नहीं है।”

घर दे बज़ुरगां, पंडतां अते साध संतां नें पंकज होरां नूं बहुत समझाइआ।

पर उह आपणे बाप दी बेवकती मौत दा ज़िंमेवार वेद परिवार नूं ठहिराउण तों बाज नां आए।

मिल्ल विच्च पए घाटे, लग्गी तुहमत अते बाप दी बेवकती मौत नें दोहां भरावां दे मनां नूं ज़हिर नाल भर दित्ता। सारा दिन उह इको नुकते ’ते सोचदे रहिंदे। वेद परिवार नूं नीवां किस तरहां दिखाइआ जावे?

मोहन लाल दे भोग ते होए रिशतेदारां दे इकठ्ठ विच्च हिसाब किताब पेश कीता गिआ। पहिलां पंकज होरां नें कोई हेरा फेरी नहीं सी कीती। फेर वाधा घाटा करके पिआ घाटा दुगणा दिखाइआ गिआ। पहिलां पए घाटे दी वंड नहीं सी होई। हुण पाई पाई दा भुगतान मंगिआ गिआ। मिल्ल विच्च वेद दा वीह लख्ख चलदा सी। उस वल्ल पंज लख्ख होर निकलदा सी। उस दा भुगतान तिंन महीने दे अंदर अंदर मंगिआ गिआ।

बिमारी दे दिनां विच्च मोहन नें आपणे कारोबार अते जाइदाद दा वेरवा आपणे दोहां बेटिआं नूं समझा दित्ता सी। अजिहीआं बे नामी जाइदादां दी लिसट लंबी सी जिनहां दा असली मालक मोहन सी पर कागज़ीं पत्तरीं वेद दा नां बोलदा सी।

अजिहे कुझ्झ लैण देण अमन अमान नाल निबड़ गए। कुझ्झ विच्च थोहड़ा वाधा घाटा होइआ। किते किते तकरार होइआ। इक्क दो थाईं गुत्थी सालसां नें सुलझाई।

नगर सुधार टरस्सट वल्लों गुरदेव नगर वरगी पौश कलोनी विच्च अलाट होए इक्क हज़ार गज़ दे पलाट दा नबेड़ा जदों किसे तरहां वी नां होइआ तां दोहां धिरां विचकार गाली गलोच होइआ, जानों मारन अते घरों उजाड़न दीआं धमकीआं दित्तीआं गईआं।

वेद आखदा सी उसने इह पलाट आपणे बलबूते उपर अलाट करवाइआ सी। सारी कीमत उसने आपणे खाते विचों चुकता कीती सी। टरस्सट दा चेअरमैन मोहन लाल दा वाकिफ़ सी। यारी निभाउण लई पलाट दी लाटरी वेद दे नां, हेरा फेरी नाल कढ्ढी गई सी, इह गल्ल दरुसत सी। पर मोहन दी इस पलाट विच्च हिस्सा रख्खण दी कोई नीअत नहीं सी।

पंकज दा अखाण सी कि उस समें इस कालोनी विच्च ज़मीन दा भाअ सत्त हज़ार रुपए गज़ सी। पलाट सत्त सौ रुपए गज़ दे हिसाब नाल अलाट होइआ सी। वेद उनहीं दिनीं मोहन दे मुनशी दे तौर ’ते जाणिआ जांदा सी। चेअरमैन दा सिर नहीं सी भविआं कि उह सत्तर लख्ख दा पलाट सत्तर हज़ार विच्च किसे करिंदे दे नां अलाट करदा। इह पलाट उनहां दे बाप दा सी। इस उपर उनहां दा हक्क सी।

वेद मोहन दे अहिसान कारन अध्धा पलाट छड्डण नूं तिआर हो गिआ।

पूरा पलाट छड्ड के उसदे आपणे सुपने खेरूं खेरूं हो जाणे सन। इहो पलाट उसदी धरोहर सी। अध्धे पलाट विच्च उस नें कमल दी कोठी उसारन दा सुपना लिआ सी अते अध्धा वेच के नेहा दा शानदार विआह करन दा।

राम नाथ नूं बुला के वेद नें पलाट दे कागज़ पत्तर दिखाए। उस तों कानूंनी राए लई।

कानूंनी नुकते वेद दे हक्क विच्च सन। अलाटमैंट होई नूं अठ्ठ साल हो गए सन। अलाटमैंट लई दित्ती दरख़ासत तों लै के रजिसटरी तक वेद दा नां बोलदा सी। सारीआं किशतां वेद नें चैकां राहीं भुगताईआं सन। देश दी कोई अदालत पलाट विच्च मोहन दा हिस्सा बहाल नहीं सी कर सकदी।

राम नाथ नूं आपणी इस कानूंनी राए ते अज्ज पछतावा हो रिहा सी। चंगा हुंदा जे उह विच्च पै के, लै दे कर के झगड़ा निपटा दिंदा। बाकी सभ झगड़े निबड़ गए सन। अड्ड विड्ड हो के कोई रुख्खी खांदा कोई चोपड़ी खांदा, किसे नूं किसे नाल वासता नहीं सी रहिणा।

खिझे पंकज नें अदालत विच्च मुकद्दमा ठोक दित्ता। गाहे बगाहे धमकीआं दिंदा रहिंदा।

“पलाट मैं लै के रहिणा है। अदालत राहीं नां मिलिआ उंझ लै लैणा है।”

राम नाथ दा तजरबा आख रिहा सी पंकज नें इह चंन ‘उंझ’ पलाट लैण लई चाहड़िआ सी।

 

-2-

 

नीलम दी कोठी दीप नगर दी गली नंबर चार विच्च पैंदी सी।

जिउं ही राम नाथ दी कार गली दे मोड़ कोल पुज्जी लाल बत्ती वाली पुलिस दी इक्क जिपसी हूटर मारदी उनहां दे कोल दी लंघी।

इह जिपसी किसे सीनीअर पुलिस अफ़सर दी सी। इह पुलिस कपतान दी वी हो सकदी सी अते डी.आई.जी.दी वी। एडा सीनीअर अफ़सर केवल होए कतल दा मौका देखण आउंदा है।

राम नाथ दा मत्था ठणकिआ। कोई भाणा वरत गिआ लगदा सी। उसने निकलण वाली भुब्ब नूं तां काबू कर लिआ पर हउके नूं नां ठल्ल्ह सकिआ।

‘रब्बा सुख्ख रख्खीं!’ मन विच्च दुआवां करदा राम नाथ वारदात वाली थां ‘ते पुज्जण लई काहला पैण लग्गा।

नीलम दी कोठी गली दे अध्ध विचकार सी। सारी गली लोकां नाल भरी पई सी। कुझ्झ लोक इधर उधर भज्ज नठ्ठ रहे सन। कुझ्झ छोटीआं छोटीआं टोलीआं बणाई गल्लीं रुझे होए सन।

पुलिस दीआं दो तिंन गड्डीआं नें कोठी दे गेट अते उसदे अग्गे पिछ्छे वाली जगहा घेरी होई सी।

राम नाथ नें आपणी गड्डी पिछ्छे ही रुकवा लई। उह अते संगीता भैड़ी तों भैड़ी ख़बर सुणन लई आपणे आप नूं तिआर करदे, तेज़ी नाल कोठी वल्ल वधण लग्गे।

कुझ्झ गुआंढी राम नाथ नूं जाणदे सन। राम नाथ नूं आइआ देख के उह उस वल्ल हो लए।

“वकील साहिब बहुत माड़ा होइआ।” जिस गुआंढी नें राम नाथ दे घर फ़ोन कीता सी सभ तों पहिलां उस नें हाअ दा नाअरा मारिआ।

“सुख्ख तां है?” राम नाथ नूं लुट्टे गए समान नालों रिशतेदारां दा वध्ध फिकर सी। उह उनहां दी तंदरुसती दी ख़बर झट्टपट्ट सुनणा चाहुंदा सी।

“बाकी सभ ठीक हन, पर कमल … ।” राम नाथ दे गल लग्ग के गुआंढी इउं भुब्बां मारन लग्गा जिवें कमल आपणा पुत्तर होवे।

“बाकी तां ज़िंदा हन?” बड़े नरदईआं वांग राम नाथ नें गुआंढीआं कोलों पुछ्छिआ।

“हां। उंझ ठीक नें। पर हसपताल विच्च नें।” इक्क होर गुआंढी नें राम नाथ दा हत्थ फड़ के ढारस बंनहाउंदिआं आखिआ।

पुलिस मौके दा मुआइना कर रही सी। कोई सबूत नां मिट जाए इस लई बाहरले बंदे नूं कोठी अंदर जाण दी इजाज़त नहीं सी।

राम नाथ आम लोकां वांग कोठी दे गेट कोल जा के रुक गिआ।

गेट ते पहिरा दे रहे इक्क सिपाही नूं इक्क गुआंढी नें सूचित कीता। “इह वकील साहिब हन अते वेद दे साला साहिब हन।” थाणेदार नूं इनहां दी उडीक सी।

थाणेदार दी इजाज़त दी कोई लोड़ नहीं सी। सिपाही राम नाथ नूं कोठी अंदर लै गिआ।

संगीता नूं बाहर रोक दित्ता गिआ। अंदरला द्रिश भिआनक सी। औरतां नूं अंदर जाण दी इजाज़त नहीं सी।

ख़ून दे धब्बे कोठी दे गेट तक पहुंचे होए सन। जिउं जिउं राम नाथ अग्गे वध्ध रिहा सी तिउं तिउं धब्बिआं दे अकार अते गिणती वधदी जा रही सी।

लाबी वाले दरवाज़े कोल ख़ून इंझ डुल्हिआ पिआ सी, जिवें कोई ख़ून दी होली खेड के हटिआ होवे।

लाबी अंदरला द्रिश होर वी भिआनक सी।

लाबी विचला सारा फरनीचर बिखरिआ पिआ सी। टुकड़े टुकड़े होए शोअपीस आपणी हड्ड बीती सुणा रहे सन। सैंटरल टेबल दे शीशे दे हज़ार टुकड़े होए पए सन। अलमारीआं अते पेटीआं दा समान इधर उधर खिलरिआ पिआ सी। समान दी लुट्ट खसुट्ट ही नहीं, तोड़ भंन वी रज्ज के होई सी।

सभ तों भिआनक द्रिश सी नेहा दे बैडरूम दे दरवाज़े कोल दा, जिथे कमल दी ख़ून विच्च लत्थ पत्थ लाश पई सी।

कमल दा चिहरा कद्दू वांग फिसिआ पिआ सी। अख्खां बाहर निकलीआं होईआं सन। मूंह अड्डिआ होइआ सी। वालां दा रंग काले दी थां लाल होइआ होइआ सी। उसदे ढिड्ड च वज्जे चाकूआं नें उस दीआं आंदरां बाहर कढ्ढ दित्तीआं सन। उह हाले तक उसे तरहां धरती ’ते विछीआं पईआं सन। उसदी बनैण फटी होई सी। कुड़ते पजामे दा रंग सूहा होइआ होइआ सी।

पुलिस हुणे पुज्जी सी। सभ तों पहिलां मौका पुलिस कपतान नें देखिआ सी।

उसदा हुकम सी वारदात वाले द्रिश विच्च इंच भर वी तबदीली नां कीती जावे। कपतान नें आपणी हाज़री विच्च फोटोआं खिचवाईआं सन अते वीडीओ फ़िलम तिआर करवाई सी। हाले होर माहिरां नें आउणा सी। सबूत इकठ्ठे करने सन। कपतान हुणे हुणे गिआ सी। बाकी दी कारवाई मुख्ख अफ़सर नें करनी सी।

कमल दी लाश ढक्कण लई उसने गुआंढीआं कोलों कप्पड़ा मंगिआ सी।

पर किसे गुआंढी नें पहिल नहीं सी कीती। इस लई लाश मजबूरन नंगी रख्खणी पई सी।

राम नाथ दे आ जाण ’ते थाणेदार नूं आपणी ग़लती दा अहिसास होइआ।

उसने कमल दे बैडरूम विच्च पई इक्क चादर चुक्की अते ख़ुद ही कमल उपर ओड़ दित्ती।

राम नाथ सभ कुझ्झ चुप्पचाप देख रिहा सी। उस दीआं गिआन इंदरीआं जिवें सुंन हो गईआं सन। जिवें उनहां दा दिमाग़ नालों संपरक टुट्ट गिआ सी।

इसे लई इंने भिआनक द्रिश नूं उह आसानी नाल देख रिहा सी। कोई प्रतीकरम नहीं सी हो रिहा। राम नाथ नूं आपणे इस वरतारे दा अहिसास वी हो रिहा सी पर पता नहीं फेर वी किउं उह पत्थर दा बुत्त बणिआ खहड़ा सी।

पुलिस मुलाज़म दोशीआं वल्लों छड्डे सबूत इकठ्ठे करन दा यतन कर रहे सन। कोई उंगलां दे निशान लभ्भ रिहा सी। कोई हथिआरां दी खोज कर रिहा सी। इक्क टीम कुत्तिआं दी मदद नाल दोशीआं दा पिछ्छा करन दा यतन कर रही सी।

“बवा माड़ा होइआ वकील साहिब!” हत्थले कंम नूं सहाइक दे हवाले करके मुख्ख अफ़सर नें राम नाथ कोल आ के हमदरदी जिताई।

“इह किस तरहां होइआ है?” इह पहिली वार सी जदों राम नाथ दे गले विचों कुझ्झ शबद अते अख्खां विचों कुझ्झ अत्थरू निकले सन।

“सानूं इह काले कछ्छिआं वाले गरोह दी कीती वारदात लगदी है। इनहीं दिनीं उह इस इलाके विच्च सरगरम हन। तरीका वारदात उहो है। तुहानूं किसे ’ते शक्क है तां दस्सो?”

हमदरदी जिताउण दा फरज़ निभाअ के मुख्ख अफ़सर असल मुद्दे ’ते आइआ।

वारदात भिआनक सी। इक्क कतल होइआ सी। दो बंदिआं दे गंभीर चोटां लग्गीआं सन। लड़की दी इज़्ज़त लुट्टी गई सी। लुट्टे समान दी लिसट बहुत लंबी सी। मुलज़मां बारे कोई सुराग़ नहीं सी लभ्भ रिहा। बलाईंड केस सी।

मुकद्दमा दरज करन विच्च मुख्ख अफ़सर नूं दिक्कत पेश आउणी सी। पत्तरकार इल्लां वांग मंडरा रहे सन। अफ़सर अलग्ग कंन खा रहे सन। मुख्ख मंतरी तक नूं सूचना जाणी सी।

लाश दा पोसट मारटम कराउणा सी। मज़रूबां दीआं सट्टां बारे डाकटरां तों रिपोरटां हासल करनीआं सन। कुड़ी जे होश विच्च होई उसदा बिआन कलमबंद करना सी। अग्गे कंम ही कंम सन। थाणेदार कोल बहुतीआं हमदरदीआं जिताउण दा वकत नहीं सी।

“मेरे भैण भणोईए तों पुछ्छणा सी, उहो कुझ्झ दस्स सकदे हन।”

राम नाथ नूं पंकज होरां उपर पक्का शक्क सी। पर भैण भणोईए दी राए बिनां उह किसे दा नां नहीं सी लै सकदा।

“उह हसपताल विच्च पए हन। सट्टां काफ़ी हन। डाकटर नें बेहोशी दा टीका ला दित्ता होएगा। सानूं हाले कुझ्झ समां मुआइना करन ’ते लग्गेगा। तुसीं हसपताल जा के उनहां नाल राए कर लओ। जिस तरहां कहोगे परचा दरज कर लवांगे।”

वैसे थाणेदार दी मुढ्ढली तफ़तीश तों वारदात काले कछ्छिआं वाले गरोह वल्लों कीती पाई गई सी। दोशीआं उपर डकैती अते डकैती दौरान होए कतल दी दफ़ा लग्गणी सी।

राम नाथ कानूंन जाणदा सी। इस लई थाणेदार नें दरज होण वाले परचे दा मज़मून अते लगदीआं धारावां वल्ल इशारा कर दित्ता सी। अग्गे उह ख़ुद सिआणा सी।

परिवार दे जीआं नूं मिले बिनां राम नाथ कुझ्झ नहीं सी आख सकदा।

वैसे वी मुकद्दमे नालों वध्ध ज़रूरी ज़ख़मीआं दी सांभ संभाल सी। इथे संगीता दे करन वाला कुझ्झ नहीं सी।

संगीता अते इक्क गुआंढी नूं नाल लै के राम नाथ हसपताल लई रवाना हो गिआ।

रसते विच्च गुआंढी राम नाथ नूं होई वारदात दा वेरवा देण लग्गा।

उह अते वेद सवेरे चार वजे सैर करन जाइआ करदे सन। जे वेद पहिलां जाग पए उह जै नराइण दी बैल्ल खड़का दिंदा सी। नहीं तां जै नराइण वेद नूं उठा लैंदा सी।

अज्ज सवेरे जदों साढे चार वजे तक वेद दी उघ्घ सुघ्घ नां निकली तां नियम अनुसार उस नें वेद दी बैल्ल खड़काई। जदों बैल्ल नां खड़की, उसनूं हैरानी होई। बिजली है सी। फेर बैल्ल किउं नहीं खड़की? सोचिआ ख़राब हो गई होवेगी।

रात दस वजे तक उह इकठ्ठे सन। वेद दे बाहर जाण दी कोई संभावना नहीं सी। गेट दे होड़े वल्ल नज़र मारी तां लग्गा, जिवें गेट खुल्ल्हा पिआ सी।

गेट खोल्ह के उह अंदर चला गिआ। हो सकदा है वेद बाथरूम विच्च होवे। इसे लई जवाब नां दे रिहा होवे। चार कदम अग्गे जा के जै नराइण नूं ख़ून दे धब्बे नज़र आए। इड्डा वाकिआ हो गिआ सी, इह फेर वी जै नराइण दे ज़िहन विच्च नहीं सी आइआ। जदों अगांह पोरच विच्च ख़ून ही ख़ून नज़र आइआ तां उसनूं कांबा छिड़ गिआ। उह ओहनीं पैरीं वापस मुड़ आइआ। गली विच्च खहड़ के शोर मचाइआ।

गुआंढ विच्च भगदड़ पै गई।

सौ नंबर ’ते पुलिस कंटरोल रूम नूं फ़ोन कीता।

अध्धा घंटा बीत जाण ’ते वी जदों पुलिस दा सिपाही तक मौके ’ते नां पुज्जा तां कुझ्झ गुआंढी भज्ज के थाणे गए।

सवेर दा समां सी। संतरी अते मुनशी तों सिवा थाणे कोई नहीं सी। कोई जंगल पाणी गिआ सी, कोई दातण कुरला कर रिहा सी। भाजड़ गुआंढीआं नूं पई सी पुलिस नूं नहीं। कुआटरां विच्च जा जा मसां सिपाही खहड़े कीते। फ़ोन कर कर थाणेदार बुलाए। चार पुलिस वालिआं नूं इकठ्ठे हुंदिआं नूं घंटा लग गिआ।

दो घंटिआं बाअद पुलिस मौके ’ते पुज्जी। डरदा गुआंढी कोई अंदर नहीं सी वड़िआ। पुलिस दे नाल उह कोठी अंदर गए। कमल दा सरीर ठंढा होइआ पिआ सी। बाकी तिंने बेहोश सन। कमल दे सरीर विचों बहुत ख़ून वहि चुक्का सी। वारदात पता नहीं किस वकत होई सी। जे पुलिस समें सिर पुज्ज जांदी, शाइद उह बच जांदा।

पुलिस नें आपणी ऐंबूलैंस बुलाई। मज़रूबां नूं हसपताल पहुंचाइआ।

चार गुआंढी देखभाल लई नाल गए।

जै नराइण नें मोहन लाल दे घर फ़ोन कीता। पता लग्गा मुंडे बाहर गए होए सन।

परिवार दे सारे जीअ फट्टड़ हो गए सन। बहुत सारे अहिम फैसले करने सन। परचा कटवाउणा सी। ज़ख़मीआं नूं किस हसपताल विच्च दाख़ल करवाइआ जाए? इह सोचणा सी। इह फैसले घर दे किसे मैंबर दुआरा कीते जाणे सन।

कुदरती जै नराइण नूं राम नाथ दे नां पते वाला कारड लभ्भ गिआ।

उसने झट्ट राम नाथ नूं फ़ोन खड़का दित्ता।

वैसे मोहन लाल दा मैनेजर आइआ सी। माइआ देवी नाल आई सी।

उह थाणेदार नूं मिल गिआ सी। शाइद चाह पाणी दे गिआ सी।

माइआ देवी तों इह द्रिश देखिआ नहीं सी गिआ। उस नूं खोह पैण लग्गी सी। गुआंढीआं नें तुरंत उसनूं घर मोड़ दित्ता।

चंगा सी राम नाथ आ गिआ सी। उह वकील सी। उसने सभ संभाल लैणा सी।

 

-3-

 

माइआ नगर दे कुझ्झ हसपताल आधुनिक डाकटरी सहूलतां कारन उत्तरी भारत दे चुणे हसपतालां विचों गिणे जांदे सन। इनहां हसपतालां विच्च दोसतां अते रिशतेदारां दी ख़बर लैण राम नाथ कई वार माइआ नगर आइआ सी।

इथों दे सिवल हसपताल आउण दा इह उसदा पहिला मौका सी।

कानूंन, सरकारी डाकटरां दी राए नूं, प्राईवेट डाकटरां नालों वध्ध तरजीह दिंदा सी। तरक इह सी कि सरकारी मुलाज़म झूठ नहीं बोलदे। इसे मजबूरीव ् स लड़ाई झगड़िआं जां हादसिआं विच्च ज़ख़मी होए लोकां नूं सरकारी हसपतालां विच्च दाख़ल होणा पैंदा सी। सरकारी डाकटर, फट्टड़ दीआं सट्टां दा मुआइना करदे सन। लग्गीआं सट्टां दी रिपोरट तिआर करके पुलिस नूं दिदे सन। पुलिस उस रिपोरट दे आधार ’ते मुकद्दमे दा मूंह मत्था घड़दी सी।

कानूंन दी इसे लोड़ दा ढिड्ड भरन लई वेद होरां नूं सिवल हसपताल दाख़ल कराइआ गिआ सी।

राम नाथ नूं जिंनी उतसुकता आपणे साक संबंधीआं दी सिहत दी जाणकारी लैण दी सी ओनी काहल उसनूं मरीज़ां नूं सिवल हसपताल विचों कढ्ढ लिजाण दी सी।

हसपताल दे आम वारडां दे खुल्हण दा समां सवेरे अठ्ठ वजे दा सी।

ऐमरजैंसी वारड चौवी घंटे खुल्हा रहिंदा सी। वेद होरां नूं सत्त वजे दे करीब हसपताल लिआंदा गिआ सी। समां जे अठ्ठ वजे दे बाअद दा वी हुंदा तां वी अजिहे मरीज़ां नूं पहिलां ऐमरजैंसी वारड विच्च ही दाख़ल करवाइआ जाणा सी। ऐमरजैंसी डिऊटी ते ताइनात डाकटरां नें उनहां दीआं सट्टां दा मुआइना करना सी। रिपोरट तिआर करनी सी। फेर संबंधित वारडां विच्च इलाज लई भेजणा सी।

सिवल हसपताल दे कंम काज दा तजरबा होण कारन राम नाथ नें डराईवर नूं इशारा कीता। उह गड्डी सिध्धी ऐमरजैंसी वारड अग्गे ला देवे।

वेद होरां दे कुझ्झ पड़ोसी ऐमरजैंसी वारड दे बाहर खहड़े सन। उनहां विचों इक्क राम नाथ नूं जाणदा सी। दूजे गुआंढीआं नूं नाल लै के उह राम नाथ वल्ल दौड़िआ।

अख्ख झपकदे ही राम नाथ अते संगीता नूं पड़ोसीआं नें घेर लिआ।

“की हाल है मेरे भैण भणोईए दा? नेहा दा?” इथे वी कोई भाणा नां वरत गिआ होवे? तौखला दूर करन लई राम नाथ नें सभ तों पहिलां इहो प्रशन पुछ्छिआ।

“सभ ठीक हन। बहुती चिंता वाली गल्ल नहीं है।” इक्क पड़ोसी नें ढारस बंनहाई।

“भैण जी नूं किसे होर हसपताल विच्च लिजाणा चाहीदा है। उस दे सिर विच्च सट्ट है। दिमाग़ दीआं बिमारीआं दा माहिर डाकटर इस हसपताल विच्च है नहीं।” इक्क पड़ोसण नें, जिहड़ी हुण तक नीलम कोल बैठी रही सी सथिती सपश्शट कीती।

“किधर नें सारे?”

“नेहा ठीक है। उसनूं जनाना वारड विच्च भेज दित्ता है। वेद दीआं लत्तां बाहां ’ते सट्टां हन। उस नूं हड्डीआं वाले वारड विच्च भेज दित्ता गिआ है।

भैण जी इधर हन।”

पड़ोसण नें ऐमरजैंसी वारड दे बंद दरवाज़े वल्ल इशारा करके, उस अंदर नीलम दे पए होण बारे दस्सिआ।

“ठहिरो बाबू जी। तुसीं कौण हो?” दरवाज़ा खोल्ह के अंदर वड़दे राम नाथ नूं, किधरों अचानक आ टपके हसपताल दे सेवादार नें रोकिआ।

“मैं मरीज़ दा भरा हां। राम नाथ ऐडवोकेट।”

‘ऐडवोकेट’ शबद सुण के सेवादार दे तेवर कुझ्झ ढिल्ले तां पए पर सड़ी रस्सी वांग उह वल छड्डण नूं तिआर नहीं सी।

“बिनां इजाज़त अंदर जाणा मनहां है। तुसीं पहिलां डाकटर साहिब नूं मिलो।”

सेवादार नें ‘मिलो’ शबद ’ते ज़िआदा ज़ोर दिंदिआं राम नाथ नूं डाकटर नूं मिलण दी सलाह दित्ती।

राम नाथ सेवादार दा इशारा समझ गिआ। उह फौजदारी वकील सी।

आपणे साइलां दे हित्तां दी राखी करन लई उसनूं आपणे शहिर दे सिवल हसपताल जाणा पैंदा सी। डाकटरां नूं ‘मिल’ के मरज़ी दी इंजरी रिपोरट तिआर करवाई जा सकदी सी। राम नाथ उहो करन जांदा सी। जे उह दोशीआं दा वकील हुंदा तां सट्टां दी गिणती अते उनहां दी गंभीरता घटवा लैंदा। जे मुदई दा वकील हुंदा तां सबूतीआं हड्डीआं नूं टुट्टीआं बणवा लैंदा। सोटीआं नाल वज्जीआं सट्टां नूं गंडासिआं नाल मारीआं लिखा लैंदा। इसे मकसद दा इशारा सेवादार राम नाथ नूं कर रिहा सी।

“मिलदां डाकटर नूं वी। पहिलां मरीज़ नूं मिल लवां।”

पिछ्छे खहड़ी संगीता दी बांह फड़ के राम नाथ नें उसनूं नाल रला लिआ।

बिनां सेवादार दी परवाह करे, उसने दरवाज़ा खोल्हिआ अते उह कमरे अंदर वड़ गए।

कमरे विच्च करीब चार फुट्ट उच्चा, आदमी दे कद्द जिंना लंबा तख़तपोशनुमा इक्क मेज पिआ सी। मेज़ उपर घसी पिटी इक्क पलासटक दी चादर विछी होई सी। उस उपर ख़ून दे नवें पुराणे सैंकड़े धब्बे सन। उस मेज़ उप्पर पई नीलम तड़प रही सी।

नीलम दे सिर उपर पट्टी बझ्झी होई सी। पट्टी हेठ रख्खी रूं विचों ख़ून सिमसिम पट्टी तक आ चुक्का सी। उसदी ठोडी, गरदन अते कंनां कोल ख़ून जंमिआ होइआ सी। उसदे सारे कप्पड़े ख़ून नाल लत्थ पत्थ सन। सिर दी सट्ट कारन उसदा सारा सरीर कंब रिहा सी। इक्क अध्ध मिंट दे वकफ़े बाअद उस नूं मिरगी दे दौरे वरगा दौरा पैंदा सी। उसदे मूंह विचों झग्ग निकलण लगदी सी, उसदे हत्थ पैर मुड़ जांदे सन अते अख्खां बाहर नूं निकल आउंदीआं सन। इक्क वड्डे जिगरे वाली पड़ोसण उसदे तड़पदे सरीर नूं काबू करन दा यतन कर रही सी।

“मैं नीलम दा भरा हां। की कहिंदे नें डाकटर?” आपणी जाण पहिचाण करा के राम नाथ नें पड़ोसण तों नीलम दा हाल पुछ्छिआ।

संगीता नीलम नूं संभालण लग्गी।

संगीता दी हाज़री ’ते कुझ्झ राहत महिसूस करदी पड़ोसण राम नाथ दे कंन कोल मूंह करके कहिण लग्गी:

“किसे नें कुझ्झ नहीं कीता। इक्क जमांदार जिहा आइआ सी। वाल कट्ट के, ख़ून पूंझ के पट्टी कर गिआ। कहिंदा पहिलां डाकटर सट्टां दी गिणती अते मिणती करेगा। फेर इलाज शुरू होऊ। भाई कुझ्झ करो। इथे इह मरजू विचारी।”

शाइद बाहर डाकटर नूं सेवादार नें वकील दे आउण दी सूचना दे दित्ती सी। आपणा ‘फसट एड’ वाला बकसा लै के डाकटर उथे आ धमकिआ।

सिर ’ते लपेटी पट्टी खोल्हदा उह राम नाथ नूं मरीज़ दी हालत बारे दस्सण लग्गा: “इनहां दे सिर विच्च सट्ट है। ज़ख़म गहिरा है। मैं केस रैफ़र कर दिंदा हां। तुसीं किसे चंगे हसपताल विच्च लै जाओ।”

“हुण तक तुसीं इसनूं इथे की दवाई बूटी दित्ती है?” राम नाथ नें घड़ी वल्ल वेखदिआं डाकटर कोलों पुछ्छिआ।

घड़ी ते नौ वज्ज चुक्के सन। घड़ी वल्ल देख के उह डाकटर नूं अहिसास कराउणा चाहुंदा सी कि दो घंटे दा कीमती समां लंघ जाण उपर वी उनहां कुझ्झ नहीं कीता।

“मुढ्ढली सहाइता दित्ती जा चुक्की है। रेल हेठ आ के इक्क कुली दी बांह कट्टी गई। उसनूं संभालदे कुझ्झ देर लग गई। कोई गल्ल नहीं। तुसीं मरीज़ नूं लिजाणा चाहुंदे हो लै जाओ। लिखा पहड़ी कर लवांगे। तुसीं वकील हो। मैनूं तुहाडे नाल हमदरदी है।”

राम नाथ समझ रिहा सी। हमदरदी नां उसनूं वकील नाल सी नां मरीज़ नाल। हमदरदी उस नूं आपणी नौकरी नाल सी। उस नें ज़िंदगी मौत दी लड़ाई लड़दे मरीज़ नूं पूरे दो घंटे तों रब्ब दे रहिमो करम ’ते छड्ड रख्खिआ सी। राम नाथ दे आउण ते उस नूं आपणी गलती दा अहिसास होइआ सी। उह इक्क वकील नाल उलझण तों डरदा मिठ्ठीआं गल्लां नाल उसनूं भरमा रिहा सी।

राम नाथ सबर दा घुट्ट पीण तों सिवा कुझ्झ नहीं सी कर सकदा।

“किरपा करके इनहां नूं दयानंद हसपताल पुज्जण तक दी डाकटरी सहाइता दे दिओ। बाकी देखी जाएगी।”

भरे गले नाल राम नाथ नें डाकटर अग्गे तरला लिआ।

राम नाथ दे गुस्से नूं ठंढा करन लई डाकटर सरिंजां विच्च दवाई भरन लग्गा।

संगीता नूं नीलम कोल छड्ड के राम नाथ दूजे मरीज़ां वल्ल दौड़िआ।

हड्डीआं दे वारड तों पहिलां जनाना वारड पैंदा सी। उह उधर नूं हो गिआ।

जनाना वारड भां भां कर रिहा सी। वारड दे वीह बिसतरिआं विचों अठारां खाली पए सन। इक्क बिसतरे उपर नेहा पई सी अते दूसरे उपर कोई बिहारन। बिहारन दी देखभाल लई इक्क भईआ बैठा सी जिसने बीड़ी सुलघाई होई सी। धूंएं दी कुड़त्तण नें उनहां दा सवागत कीता।

नेहा दे बिसतरे कोल पए सटूल उपर नेहा दी सहेली पलवी बैठी सी।

दो तिंन बंदिआं नूं नेहा वल्ल वद्दे देखके उह समझ गई उह नेहा दे वाकिफ सन। उह उठ्ठ के खड़ो गई।

“की हाल ए नेहा बेटी दा?”

घट्टो घट्ट समें विच्च वध्धो वध्ध जाणकारी लैण दी नीअत नाल इक्क पासे राम नाथ नें नेहा दी सहेली तों पुछ्छिआ अते दूजे पासे नेहा दे नंगे चिहरे तों हालात भांपण लग्गा।

चिहरे तों इलावा नेहा दा सारा सरीर इक्क हरे रंग दी चादर नाल ढक्किआ होइआ सी। बेहोशी दे टीके कारन सरीर भावें सिथल सी, पर चिहरे दे हाव भाव तों उसदी पीड़ दा अंदाज़ा लग्ग रिहा सी। उसदे मत्थे ’ते गुस्से अते नफ़रत दी झलक सी। दोहां गल्ल्हां उपर दंदीआं दे निशान सन, जिनहां विचों ख़ून सिंम रिहा सी। गरदन अते ठोडी उपरले नहुंदरां दे निशानां विचों वी लाल भाह मार रही सी। अख्खां बहि चुक्के हंझूआं कारन सुज्जीआं होईआं सन।

नक्क वगे पाणी कारन डब्बखड़ब्बा होइआ पिआ सी। कंनां विचों वालीआं धूह के खिच्चीआं गईआं सन। इसे कारन कंनां दीआं गलीआं उचड़ीआं होईआं सन।

“अंकल ख़तरे वाली कोई गल्ल नहीं। बेहोशी दा टीका लग्गिआ होइआ है। पर डाकटर कोई नहीं आई। नेहा दे पेट अते … विच्च दरद है। ख़ून सिम रिहा है। सारे कप्पड़े खराब होए पए हन। मैं घरों आपणा सूट मंगवाइआ सी।

नरस कपड़े बदलण नहीं दिंदी। कहिंदी है डाकटर नें इह कप्पड़े कबज़े विच्च लैणे हन। ज़ख़मां उप्पर पट्टी नहीं कीती, कहिंदी पहिलां डाकटर देख लए।”

पलवी नूं जिंना कु पता सी ओना कु उसने सपश्शट अते इशारे नाल समझा दित्ता।

राम नाथ सभ कुझ्झ समझ गिआ। नेहा नाल बलातकार होइआ सी। उसने खिझ के मत्थे ’ते हत्थ मारिआ।

“बोलदी चालदी तां है?”

“हां ठीक है। मैं घंटे तों इथे बैठी हां। पहिलां उह कदे कदे बड़ाउण लगदी सी। कहिंदी सी उनहां नें कमल नूं मार दित्ता। मेरी इज़्ज़त बचाउंदा उह शहीद हो गिआ। मेरी इज़्ज़त लुट्टी गई। मैनूं ज़हिर दे के मार दिओ!”

“किस नें कीता इह सभ कुझ्झ? कुझ्झ दस्सदी सी?”

“नहीं! मैं पुछ्छिआ सी। कुझ्झ नहीं दस्सिआ। शाइद उस नूं उनहां बारे पता नहीं।”

“लेडी डाकटर किउं नहीं आई?”

“इथे इक्क बाबू जिहा फिरदा सी। कहिंदा सी उह साईकल सटैंड दा ठेकेदार है। कहिंदा सी डाकटर दस वजे राऊंड ’ते आएगी। कहिंदा सी पहिलां बुलाउणी है तां दस्सो? पुछ्छदा सी कोई नेहा दा वारिस नहीं? आइआ है तां मिलाओ। इस लड़की दी कहिंदा रिपोरट बनणी है। किस तरहां बनाउणी है? मैं आख दित्ता सी, जदों कोई आइआ भेज दिआंगी। भरा जी उस बंदे नूं मिल के डाकटर नूं बुलाओ। मत्था डमहो भैड़ी डाकटरनी दा। फुल्ल वरगी कुड़ी मुरझाई पई है।”

इक्क पड़ोसण नें जिहड़ी कुझ्झ देर पहिलां नेहा कोलों उठ के गई सी डाकटर दी ग़ैर हाज़री दा कारन दस्सिआ।

“अंकल मैं नरस नूं पुछ्छिआ सी कि डाकटर किउं नहीं आउंदी। उह कहिंदी डाकटर किसे मंतरी दी नूंह है। उसनूं किसे दा डर नहीं। जदों दिल कीता आएगी। पलीज़ कुझ्झ करो। मेरी सहेली मर जाएगी।”

अख्खां विच्च हंझू भर के पलवी नें आपणा तजरबा राम नाथ नाल सांझा कीता।

“इसे लई वारड खाली पिआ है,” मन ही मन सोचदे राम नाथ नूं समझ नहीं सी आ रही उह डाकटर नूं किस तरहां डिऊटी ’ते हाज़र कराए? हालात अजिहे सन कि किसे दी शिकाइत नहीं सी कीती जा सकदी, किसे नाल लड़िआ नहीं सी जा सकदा। कानूंन दे असल मकसद दा मज़ाक उडाइआ जा रिहा सी। कानूंन दे नां ते मरीज़ नूं डाकटरी सहाइता तों वांझा रख्खिआ जा रिहा सी।

मरीज़ दे ज़खम सड़दे जा रहे सन, ख़ून वहि रिहा सी, कप्पड़े गंदे सन, ज़खमां विच्च मिट्टी घट्टा पै जाण कारन ‘इनफैकशन’ दा डर सी। इंजरी रिपोरट दे बहाने मरीज़ नूं मौत दे मूंह वल्ल धक्किआ जा रिहा सी।

राम नाथ नें आले दुआले दा जाइज़ा लिआ। नज़दीकी रिशतेदारां विचों कोई उस नूं नज़र नहीं सी आ रिहा। फ़ोन उह बहुत थाईं करवा चुक्का सी।

कोई आए अते राम नाथ दी ज़िंमेवारी वंडाए। उह आपणे आप नूं इकल्ला महिसूस कर रिहा सी।

राम नाथ दे आ जाण नाल पड़ोसी आपणे आप नूं भार मुकत समझण लग पए। इक्क इक्क कर के उह घर नूं मुड़न लग्गे। किसे नें दफ़तर जाणा सी, किसे दे बच्चे सकूलों लेट हो रहे सन। किसे नें दुकान खोल्हणी सी, किसे नें बस्स चहड़ना सी।

राम नाम नूं नेहा दी असली हालत दा पूरा जाइज़ा नहीं सी हो रिहा।

मामे भाणजी वाली अख्खां दी शरम दी कोई महत्तता नहीं सी रहि गई। सारे समाजक रिशते छिक्के टंग के राम नाथ नें नेहा दे सरीर ’ते पई चादर उपर चुक्कणी शुरू कीती। उह कुड़ी दे सरीर दी हालत अख्खीं देखणा चाहुंदा सी।

नेहा दे सारे कप्पड़े लीरो लीर अते ख़ून नाल लत्थ पत्थ सन। बाहां, हिक्क अते ढिड्ड उपर नेहा अते बलातकारी विचकार होई जद्दो-जहिद दे निशान सन।

इहो हाल पट्टां अते लत्तां दा सी।

राम नाथ नें इक्क इक्क अंग हिला के, टोह के देखिआ। शुकर सी सभ अंग सबूते सन।

नेहा नूं सरीरक नालों मानसिक नुकसान वध्ध होइआ सी। कुझ्झ कु राहत महिसूस करके राम नाथ नूं वेद दी चिंता खाण लग्गी।

“मैं करदां कोई इंतज़ाम, बस्स पंजां मिंटां विच्च मैं आइआ” पलवी दे सिर ’ते हत्थ रख्ख के उस नूं विशवास दिवाउंदा राम नाथ हड्डीआं दे वारड वल्ल हो लिआ।

सट्टां वज्जीआं नूं पंज छे घंटे हो गए सन। मरीज़ां नूं हाले तक डाकटरां नें छूहिआ तक नहीं सी। डाकटरां दी इह अणगहिली मरीज़ां लई मुलज़मां नालों वध्ध घातक सिध्ध हो रही सी।

पर राम नाथ किस नाल टक्कर मारे?

इक्क मिंट लई उसदे ज़िहन विच्च साईकल सटैंड दे ठेकेदार दा नां घुंमिआ। राम नाथ उसदे मुहांदरे दी कलपना करन लग्गा। कोई मोटे ढिड्ड वाला, खरबड़ी दाहड़ी वाला, काला कलोटा जिहा। कुड़ते पजामे अते मोढे ते रख्खे परने वाला। सिवल हसपतालां विच्च मिलदे आम टाऊटां वरगा उह टाऊट होएगा।

नेहा वाला केस उसनूं आम बलातकार वरगा केस लग्गा होएगा। दलाल डाकटर दी फ़ीस दा जुगाड़ करन विच्च रुझ्झा होएगा।

पर इह मुकद्दमा आपणी किसम दा सी। असल मामला चोरी डकैती दा सी। अजिहे केसां विच्च अकसर मुलज़म पुलिस दे हत्थ नहीं आउंदे। आउण तां साल छे महीने पिछों आउंदे हन। उदों तक इंनी देर हो चुक्की हुंदी है कि सारे सबूत मिट चुक्के हुंदे हन। कानूंन दोशीआं दी पिठ्ठ पलोसदा है। शक्क दा फ़ाइदा दे के बरी कर दिंदा है।

इस केस दा इहो हशर होण वाला सी। राम नाथ नूं हुणे सैंकड़े कमज़ोरीआं नज़र आ रहीआं सन। थोहड़ी देर बाअद पुलिस नें भा दी मचा देणी सी। परचा कटवाओ। कानूंन कहिंदा सी, परचे विच्च होई वारदात दी हर बरीकी दरज कराओ। दोशीआं दे नां, पते, हुलीए। किस दोशी कोल किहड़ा हथिआर सी, उस हथिआर नाल उस नें किस किस बंदे दे कित्थे कित्थे सट्ट मारी। इह सभ सपश्शट दस्सिआ जावे। किधरे कोताही रहि गई तां कहाणी नूं शक्की गिणिआ जाणा सी। शक्क दा फ़ाइदा दोशीआं नूं मिलणा सी।

घटना वाली थां ’ते मौजूद चार बंदिआं विचों इक्क सदा दी नींद सौं चुक्का सी। बाकी दे तिंनां नूं आपणी होश नहीं सी। दोशीआं दी गिणती, हुलीआ अते घटनाक्रम दा वेरवा कौण देवेगा?

इह वारदात साधारन बंदिआं वल्लों नहीं सी कीती गई। दोशी आदी मुजरम जापदे सन। उह कानूंनी नुकतिआं तों जाणू होणगे। उह हत्थां उपर दसताने चहड़ा के, मूंह सिर ढक्क के अते पिंडे उपर इतर छिड़क के आए होणगे।

उनहां नें वेद होरां नूं सुत्तिआं नूं नप्प लिआ होवेगा। की हो रिहा है? इह समझण दा किसे नूं मौका ही नहीं मिलिआ होणा। घर दे किसे मैंबर तों दोशीआं दी पहिचाण नहीं होणी। शक्क दा लाभ फेर दोशीआं नूं मिलेगा।

फेर डाकटरां दा घर किउं भरिआ जावे?

इस मसले ते विचार करदे राम नाथ नूं पता नहीं सी लग्गा कदों उह हड्डीआं दे वारड पुज्ज गिआ।

हड्डीआं वाला वारड खाली पिआ सी, इथे इक्क वी मरीज़ नहीं सी।

वेद नूं वारड विच्च नां देख के राम नाथ दे दिल दी धड़कण तेज़ हो गई।

शाइद वेद चल्ल वस्सिआ सी।

“वेद जी नूं मिलणा है? आओ मेरे नाल। उह ऐकसरे विभाग विच्च हन।”

इह बाबू जै नराइण अते राम नाथ दोहां लई ओपरा सी। नां उह वेद दा पड़ोसी सी नां रिशतेदार।

“की हाल है वेद जी दा?” राम नाथ दा उहो उतसुकता भरिआ सवाल इस वार इस अजनबी बाबू नूं सी।

“ख़तरे तों पूरी तरहां बाहर नें। लत्तां बाहां टुट्टीआं नें। ऐकसरे होणे नें,”

बाबू दे मूंहों इंनी गल्ल सुण के राम नाथ दे साह विच्च साह आइआ।

“तुसीं?” जै नराइण नें बाबू तों उसदी पहिचाण पुछ्छी।

“मैं ठेकेदार हां। सोहण लाल मेरा नां है।” सोने दीआं तिंन मुंदरीआं वाले सज्जे हत्थ नूं हिक्क ’ते रख्ख के बाबू नें आपणा नां अते कित्ता दस्सिआ।

जै नराइण अते राम नाथ बाकी दा किस्सा आपे समझ गए।

“इह वारड खाली किउं पिआ है?” टाइम पास करन लई रसते विच्च जै नराइण नें ठेकेदार तों पुछ्छिआ।

“इस वारड दे डाकटर दी तरक्की हो गई है। इस हसपताल दा इह सभ तों अहिम वारड है। लड़ाई झगड़े विच्च हड्ड तुड़ा के लोक इसे वारड विच्च आउंदे हन। डाकटर दोहां पासिआं तों पैसे झाड़दे हन। कई डाकटर इथे आउण लई भज्ज नठ्ठ कर रहे हन। इक्क जांदा है आपणे आरडर करवा लैंदा है। दूजा उस तों वड्डा बरीफ़ केस लै जांदा है। उह पहिले आरडर कैंसल करवा के आपणे आरडर करवा लैंदा है। दो महीने विच्च पंज बदलीआं हो गईआं।

इसे चक्कर कारन थां खाली पई है। बिनां डाकटर तों मरीज़ां नें इथे आ के की करना है?”

“फेर साडे मरीज़ दा इलाज कौण करेगा?”

“किसे नें नहीं। ऐकसरे कराओ। मनमरज़ी दी रिपोरट लओ। फेर जिहड़े मरज़ी चंगे हसपताल विच्च चले जाओ।”

हसपताल दी सथिती तों जाणू करवाउंदा ठेकेदार उनहां नूं ऐकसरे विभाग कोल लै आइआ।

ऐकसरे विभाग अग्गे मरीज़ां दी भीड़ लग्गी होई सी।

इक्क अठ्ठ साल दी कुड़ी दी साईकल सिख्खदिआं लत्त टुट्ट गई। उह दरद नाल कराह रही सी। उसदे मां बाप उसनूं चुप्प कराउण दा यतन कर रहे सन।

फैकटरी दी उसारी चलदे समें पैड़ हिल्ल जाण कारन इक्क मज़दूर ज़मीन ते डिग्ग पिआ सी। उसदा मोढा टुट्ट गिआ सी। कुझ्झ मज़दूर नेता उस नूं हसपताल लै के आए सन। रिपोरट लै के उनहां नें मालक ते कलेम दा मुकद्दमा ठोकणा सी।

सभ तों पहिलां नंबर वेद दा सी। उह आइआ वी सभ तों पहिलां सी अते उस दीआं सट्टां वी गंभीर सन। उसदे नाल इक्क हौलदार खड़ा सी, जिस नूं हुणे हुणे मरीज़ां दा मुआइना कराउण लई हसपताल भेजिआ गिआ सी।

वेद सटरैचर उपर बेहोश पिआ सी। कुझ्झ बंदे उसनूं घेरा पाई खड़े सन।

इह कौण सन अते की कर रहे सन? इनहां प्रशनां दे उत्तर जानण लई राम नाथ तेज़ी नाल वेद वल्ल वधिआ।

आपणे जीजे सरदारी लाल नूं वेद कोल खहड़ा देख के राम नाथ नें सुख्ख दा साह लिआ। हुण उह इक्क अते इक्क गिआरां हो गए सन।

सरदारी लाल नाल उस दा दोसत डाकटर देव वी सी। डाकटर देव वेद दा मुआइना कर रिहा सी।

मुआइना मुकंमल करके डाकटर राम नाथ अते सरदारी लाल नूं इक्क पासे लै गिआ।

वेद दीआं दोहें बाहां अते दोहें लत्तां कई कई थावां तों टुट्टीआं होईआं सन। इकल्ले पलस्सतर नाल कंम नहीं सी चल्लणा। राड पाउणे पैणे सन। जुबाड़े दी इक्क हड्डी वी टुट्टी लगदी सी। उह हड्डी दी सही हालत सकैन बाअद पता चल्लणी सी। जान नूं कोई खतरा नहीं सी पर फौरी संभाल ज़रूरी सी।

सरदारी लाल नूं ऐकसरे वाले डाकटर दी ग़ैर हाज़री दा कारन पता लग चुक्का सी। इस डाकटर दी दयानंद हसपताल दे बाहर आपणी ऐकसरे करन दी कलीनिक सी, जिहड़ी उसने आपणी पतनी दे नां खोल्ही होई सी।

हसपताल उह घंटे दो घंटे लई आउंदा सी। बारां इक्क वजे दे करीब जदों सारे मरीज़ इकठ्ठे हो जांदे सन उह इक्क दो ऐकसरे करदा सी जिस विच्च फ़ीस मिलदी सी। बाकीआं लई इको बहाना सी, फिलमां ख़तम हन। रोंदे कुरलांदे मरीज़ वापस चले जांदे सन।

अज्ज उह अदालत विच्च शहादत देण गिआ होइआ सी। पता नहीं कदों शहादत होवे अते कदों उह मुड़े। कदे कदे शहादत शाम दे चार वजे तक नहीं सी हुंदी। अजिही सूरत विच्च फरमासिसटां नूं मरीज़ां कोलों मुआफ़ी मंगणी पैंदी सी।

राम नाथ नूं डाकटर दे इस बहाने ते गुस्सा आइआ। उह कोरा झूठ बोल रिहा सी। डाकटर गिआरां साढे गिआरां वजे अदालत आउंदे हन। जज्ज उनहां नूं पहिल दिंदे सन। सारे कंम रोक के उनहां दी गवाही हुंदी है। मकसद इहो है। मरीज़ रुलदे नां रहिण। इह शहादत दे बहाने आपणी कलीनिक चला रिहा सी।

“हुण की करीए? डाकटर नूं उडीकीए जां किधरे होर चल्लीए? कानूंनी नज़रीए तों की करना चाहीदा है?”

सरदारी लाल नें सारी ज़िंमेवारी राम नाथ दे मोढिआं उप्पर सुट्ट दित्ती।

“तुसीं मैनूं दस्सो की समस्सिआ है? आखो तां डाकटर नूं हुणे बुला दिआं?

मेरे कोल उसदे मोबाइल फ़ोन दा नंबर है।”

मरीज़ दे वारिसां नूं शशोपंज विच्च पिआ देखके ठेकेदार नें आपणा उल्लू सिध्धा करन दा इह ठीक मौका समझिआ।

“नाले तुसीं आखदे हो उह शहादत ते गए नें?”

“ओ छड्डो! अदालत नूं बेनती कर देणगे। आख देणगे ऐमरजैंसी केस आ गिआ।”

जेब विचों मोबाइल फ़ोन कढ्ढ के ठेकेदार उनहां दे हुंगारे दा इंतज़ार करन लग्गा।

“बुला फेर! देर किउं कीती है?” डाकटर देव नें ठेकेदार दी हां विच्च हां भरी।

“पहिलां फ़ीस तैअ करो। कुझ्झ अडवांस दिओ। फेर ही डाकटर आएगा?”

दस्सदे हां तैनूं, इक्क मिंट रुक।” आख के डाकटर राम नाथ अते सरदारी लाल नूं इक्क पासे लै गिआ।

“इथे जिंनी देर होएगी मरीज़ां दी जान नूं उना खतरा वधदा जाएगा।

मेरे विचार विच्च सानूं इनहां नूं इथों फौरन शिफ़ट कर देणा चाहीदा है। पर कानूंन की कहिंदा है? इह तुसीं देखो।” डाकटर देव नें डाकटरी नज़रीए तों राए दित्ती।

“केस दे सिरे चहड़न दी कोई आस नहीं। भठ्ठ पए कानूंन अते मुलज़म।

सानूं मरीज़ां नूं बचाउणा चाहीदा है।”

इह कानूंनी राए सी।

“फेर ठीक है। छुट्टी कराओ अते चल्लो। बहुता सोचण दा वकत नहीं है।”

डाकटर देव नें तुरंत फैसला कर दित्ता।

इसे दौरान इक्क हौलदार हत्थीं कोठीउं सुनेहा आ गिआ। पुलिस कपतान दो वार कोठी दा चक्कर ला चुक्का सी। किसे मंतरी नें मौका देखण आउणा सी।

मंतरी दे पुज्जण तों पहिलां परचा दरज होणा ज़रूरी सी। पत्तरकार अते टी.वी. चैनलां दे कैमरामैन काहले पए होए सन। उनहां आपणीआं रिपोरटां फाईल करनीआं सन। मंतरी जी नें प्रैस कानफरंस बुलाई सी। उनहां नें तत्थां दी जाणकारी दे के कुझ्झ ऐलान करने सन। इह सभ कुझ्झ परचा दरज नां होण कारन रुकिआ होइआ सी। वकील साहिब मौके ’ते पुज्जण अते कानूंनी कारवाई मुकंमल होण विच्च पुलिस दी सहाइता करन।

राम नाथ पुलिस दी मजबूरी नूं समझ रिहा सी। पत्तरकारां जां मंतरी दी उस नूं परवाह नहीं सी। उस नूं फिकर सी रुल रही कमल दी लाश दा। ससकार तों पहिलां उसदा पोसट मारटम होणा सी, पोसट मारटम तों पहिलां परचा दरज होणा सी।

परचा दरज तां होणा सी, जे राम नाथ नूं मुलज़मां बारे कुझ्झ पता होवे।

राम नाथ परचे विच्च लिखाए तां की?

नीलम अते वेद दे होश विच्च आउण विच्च कुझ्झ दिन लगणे सन। वारदात बारे जाणकारी केवल नेहा कोलों मिल सकदी सी।

बेहोशी उतरनी शुरू हो गई होई सी। घंटे अध्धे घंटे बाअद उह बोलण दे योग हो सकदी सी।

“तुसीं हसपताल रहो। नेहा दी मल्हम पट्टी करवा के घर लै जाओ। पुलिस कारवाई मुकंमल कराओ। पोसट मारटम अते ससकार दी तिआरी कराओ। असीं दोहां मरीज़ां नूं दयानंद लै के जांदे हां।” सरदारी लाल नूं इहो उचित लग्गिआ सी।

“ठीक है।” आख के राम नाथ आपणे पजामे दी चोर जेब टटोलण लग्गा।

इस जेब विच्च राम नाथ नें रुपए पाए सन।

नीलम उसदी भैण सी अते वेद भनोईआ। सरदारी लाल वी उसदा जीजा लगदा सी। समाजिक कानूंन मुताबक बिमारी दा खरचा चुक्कण दी ज़िंमेवारी राम नाथ दी सी। इसे ज़िंमेवारी नूं निभाउण लई उह जेब विचों पैसे कढ्ढ रिहा सी।

“जीजा जी! तुसीं आह पैसे रख्ख लओ। दोहां दी अडमिशन करवा देणा।

इंने विच्च मंगत आ जाएगा। घर जो सी, मैं चुक्क लिआइआ।”

जेब विचों दस हज़ार कढ्ढ के सरदारी लाल नूं फड़ाउंदा राम नाथ गुनाहगारां वांग घट्ट पैसिआं दी सफ़ाई देण लग्गा।

“मैं बथेरे पैसे लै के आइआ हां। फारमैलटी विच्च नां पै। मौका संभाल।

बाअद विच्च देख लवांगे।”

सरदारी लाल नें नोटां नाल भरिआ बैग राम नाथ नूं दिखाइआ अते उसदे पैसे उस नूं मोड़ दित्ते।

जनाना वारड तक उह इकठ्ठे आए।

उथों सरदारी लाल अते डाकटर ऐमरजैंसी वारड नूं मुड़ गए। राम नाथ जनाना वारड वल्ल हो गिआ।

 

-4-

 

ऐमरजैंसी डिऊटी ’ते ताइनात डाकटर सथिती दी गंभीरता नूं भांप चुक्का सी।

दिन दे गिआरां वज्ज चुक्के सन। हाले तक मरीज़ां नूं मुढ्ढली सहाइता तक नहीं सी दित्ती गई।

मरीज़ां दे वारिस हसपताल पुज्जणे शुरू हो गए सन। उनहां विचों इक्क वकील सी अते इक्क डाकटर। उह डाकटरां दी अणगहिली ’ते किंतू प्रंतू कर रहे सन।

किसे कोल कोई तसल्लीबखश जवाब नहीं सी।

पत्तरकार गेड़े मार रहे सन। कुझ्झ मज़रूबां दीआं फोटो उतार के लै गए सन।

बाकी दे डाकटरां तों जानणा चाहुंदे सन कि मज़रूबां दी हालत किहो जिही है?

ख़तरे विच्च हन जां ख़तरे तों बाहर?

भाईचारे दे नाते पुलिस वालिआं नें डाकटरां नूं सुचेत कर दित्ता सी।

सथिती नाज़ुक हुंदी जा रही सी। शहिर विच्च इस वारदात कारन गुस्सा अते घबराहट फैल रही सी। ग्रहि मंतरी शहिर दा दौरा करन आ रिहा सी। उह मज़रूबां दा हाल चाल पुछ्छण हसपताल वी आएगा। डाकटरां नूं हालात अनुसार ढल जाणा चाहीदा सी।

आपणा फरज़ समझ के ऐमरजैंसी डाकटर नें फ़ोन कर कर सारे डाकटरां नूं सूचित कर दित्ता सी। ऐकसरे वाले डाकटर अते लेडी डाकटर शरनजीत नूं उसने ताड़िआ वी सी। नज़ला उनहां ’ते झड़ सकदा सी।

ठेकेदार आपणी रिपोरट दे चुक्का सी। इनहां तिलां विच्च तेल नहीं सी।

मुफ़त विच्च मुआइने करने पैणे सन। डा.नसीब मित्तल नूं कोई परवाह नहीं सी। उह शहादत देण अदालत गिआ सी। अदालत नाल सहियोग करना हर शहिरी दा पहिला फरज़ सी। उसने अदालत कोलों आपणे हाज़र होण बारे सरटीफिकेट लै लिआ सी। हुण उसनूं मंतरी दा कोई डर नहीं सी। उसने आपणे फारमासिसट नूं आख दित्ता सी। उह मरीज़ां नूं कल्ल्ह दा टाईम दे देवे।

डा.शरनजीत कोल अजिहा कोई बहाना नहीं सी। इस लई उसने आपणी नरस नूं तिआर रहिण दा सुनेहा भेज दित्ता सी। आउंदिआं ही उसने पहिलां नेहा दा डाकटरी मुलाहज़ा करना सी। बाकी मरीज़ां नूं फेर देखणा सी।

राम नाथ जदों जनाना वारड विच्च पुज्जा, उस समें नेहा दा डाकटरी मुलाहज़ा हो रिहा सी।

उसदे ज़ख़मां ते मल्हम पट्टी हो चुक्की सी। फटे अते ख़ून नाल लिबड़े कप्पड़े कबज़े विच्च लए जा चुक्के सन। नरस उनहां नूं सफ़ैद थैली विच्च पा के उनहां दा पारसल बणा रही सी।

संगीता आपणी नणद सीमा नूं नीलम कोल बैठा के नेहा कोल आ गई सी। संगीता अते पलवी डाकटर दी डाकटरी मुआइने विच्च सहाइता कर रहीआं सन। नेहा निढाल पई सी। लगदा सी हाले उस नूं होश नहीं सी आई।

राम नाथ नूं वारड विच्च आइआ देख के संगीता वेद दी हालत जानण लई उस कोल आ गई।

राम नाथ संगीता नूं इक्क पासे लै गिआ। संगीता नें नेहा दा मुआइना हुंदा देखिआ सी। उस नाल की बीती सी? राम नाथ विसथार नाल जानणा चाहुंदा सी। इह जाणकारी उसनूं परचा दरज कराउण लई चाहीदी सी।

कुड़ी दा भैड़ा हाल सी। जापदा सी बलातकारी हट्टा कट्टा सी। कुड़ी नूं भेड़ीए वांग पिआ सी। नाज़ुक कुड़ी दा अंग अंग चूंडिआ पिआ सी। कुड़ी नूं संभलण लई कई दिन लग्गणे सन।

नेहा गहिरे सदमे विच्च सी। थोहड़ी जिही होश परतदे ही खूह खाता गंदा करन लई आखण लगदी सी।

“उह कुझ्झ वारदात बारे दस्स सकदी है?”

राम नाथ दा धिआन इको नुकते ’ते अटकिआ होइआ सी।

“लोक ठीक आखदे हन। वकीलां दे सीने विच्च दिल नहीं हुंदा। उह शरम दी मारी आतम हत्तिआ करन नूं फिरदी है। तुसीं उस तों वारदात दे वेरवे पुछ्छदे हो? गल्ल छेड़ के उस दे अल्ले ज़ख़मां ’ते लूण नां छिड़क देणा। मेरी फुल्लां वरगी बेटी नूं बखशो!”

संगीता राम नाथ दे मोढे ’ते सिर रख्ख के अत्थरूआं राहीं मन दी भड़ास कढ्ढण लग्गी।

“परचा दरज कराउणा ज़रूरी है। हुण मैं परचे विच्च दस्स की लिखावां?”

संगीता नूं रोंदे देख के राम नाथ दा मन भर आइआ। पर उसने आपणे हंझू अख्खां विच्च रोकी रख्खे। कुझ्झ देर खामोश रहि के मन नूं ढारस दित्ती अते जदों संगीता संभली, उसने आपणी चिंता उस नाल सांझी कीती।

“भठ्ठ विच्च पए तुहाडा केस! पता नहीं किहो जिहे खूंखार मुलज़म होणगे?

कौण दिऊ उनहां विरुध्ध गवाही? तुसीं इनहां नूं संभालो।”

“देखदे हां।”

“इक गल्ल होर सुणो। किधरे परचे विच्च नेहा नाल होए बलातकार दा ज़िकर नां कर देणा। जे बलातकार दी कहाणी पा दित्ती कुड़ी दा भविख्ख तबाह हो जाएगा।”

इक्क औरत दा दरद इक्क औरत समझ सकदी सी। इह समझ उह राम नाथ नूं देणा चाहुंदी सी।

राम नाथ नूं पहिली वार आपणे पत्थर दिल होण दा अहिसास होइआ।

सबूतां दे चक्कर नें उस दी संवेदनशीलता अते दूरदरशता नूं निगल लिआ सी। उसनूं अफ़सोस होइआ। उस नूं इह गल्ल ख़ुद नूं किउं नहीं सुझ्झी? इक्क वकील होण दे नाते उसनूं बलातकार दे भविख्खमुखी प्रभावां दा पता होणा चाहीदा सी।

हाले डुल्ल्हे बेरां दा कुझ्झ नहीं सी विगड़िआ। परचे विच्च उह बलातकार दा उक्का ज़िकर नहीं करेगा।

उस नूं बलातकार दे सबूत हुण तों मिटाउणे शुरू कर देणे चाहीदे हन।

डा.शरनजीत इंजरी रिपोरट तिआर कर रही सी। राम नाथ नूं डाकटर नूं मिलणा चाहीदा सी। उसनूं बेनती करनी चाहीदी सी। उह बलातकार वाले तत्थ नूं उक्का छुपा लए। केवल सट्टां दा ज़िकर करे।

राम नाथ नूं आस सी कि औरत होण दे नाते डाकटर नेहा दीआं मजबूरीआं नूं समझेगी। फेर जदों मुदई धिर नूं इस जुरम नूं छिपाउण विच्च कोई इतराज नहीं सी तां डाकटर नूं की उजर हो सकदा सी। इह मंग जे मुलज़म करदे फेर होर गल्ल सी।

“तुसीं कमाल करदे हो वकील साहिब! इड्डी वड्डी गल्ल नूं मैं किवें छुपा लवां? मैं नौकरी करनी है। किसे नें इसदा मैडीकल किधरों होर कराउण दी दरख़ासत दे दित्ती मेरा की बणू?”

“होर किसे नूं डाकटरी कराउण विच्च की दिलचसपी है? मुलज़म दा पता नहीं कौण हन? मैं लड़की दा मामा हां। वकील हां। उसदे बुरे भले दा मैनूं अहिसास है। इसदे मां बाप मरन किनारे हन। बच्ची दे भविख्ख दा सवाल है।

मैं जो आखो, लिख के देण नूं तिआर हां।”

राम नाथ नें उह सभ तरले लए, जो इक्क औरत दा दिल पसीजण लई लए जा सकदे सन।

पर उह पता नहीं किस मिट्टी दी बणी होई सी। राम नाथ दीआं अख्खां विच्च भरे हंझू उसनूं खारे पाणी तों वध्ध कुझ्झ नहीं सन लग्ग रहे।

राम नाथ नें होर मिंनत कीती तां उह वढ्ढ खाणिआं वांग पई।

“पलीज़! मेरा टाइम खराब नां करो। मैनूं आपणा कंम करन दिउ।”

दाल नां गलदी देखके राम नाथ उस दे दफ़तरों बाहर आ गिआ।

“अंकल तुसीं उस ठेकेदार नूं मिलो। देखणा उह कंम करवा देवेगा।” पलवी नूं ठेकेदार भुल्ला नहीं सी। उसने राम नाथ नूं उसदी याद दिवाई।

राम नाथ नूं इक्क वार फेर आपणी अकल ’ते गुस्सा आइआ। अज्ज जिवें उस अंदरला चुसत वकील मर चुक्का सी। उसनूं नवें विचार किथों सुझणे सन।

उसदी पकड़ विच्च साधारन विचार नहीं सन आ रहे। शाइद इस दा कारन सिर ’ते पई भीड़ सी।

ठेकेदार नें पहिलां नखरा कीता। सवेर दा उह मिंनतां कर रिहा सी, किसे नें उसदी गल्ल नहीं सुणी।

फेर उह मंन गिआ। साधारन केसां विच्च डाकटर दी फ़ीस पंज हज़ार रुपए सी। इथे कोई दूसरी धिर नहीं सी। फेर कुड़ी दी इज़्ज़त दा मामला सी। इस लई उसने गल्ल चार हज़ार तों शुरू कर के दो ’ते नबेड़ दित्ती।

राम नाथ नें शुकर कीता। कुड़ी जग्ग वस्सदी रहि गई।

इक्क समस्सिआ हल्ल होई तां दूजी अग्गे आ खड़ी।

कुझ्झ घंटिआं बाअद नेहा नूं होश आ जाणी सी। फेर उसनूं छुट्टी हो जाणी सी। छुट्टी करवा के उसनूं कित्थे लिजाइआ जावे?

राम नाथ अते संगीता नें आपणे आपणे दिमाग़ां दे घोड़े दौड़ाए। दोहां दे घोड़े पच्ची लख्ख दी आबादी वाले शहिर विच्च दौड़ दौड़ हंभ गए। उनहां नूं इक्क घर वी अजिहा नहीं सी लभ्भा जित्थे कुड़ी नूं कुझ्झ दिनां लई ठहिराइआ जा सके।

इक्क वार फेर पलवी उनहां लई सोन परी बणके बहुड़ी।

इह समस्सिआ उह पहिलां ही भांपी खहड़ी सी।

नेहा नूं लैण उसदे मां बाप हसपताल आ रहे सन। पूरी तरहां ठीक हो जाण तक नेहा उनहां दे घर रहेगी।

घरों फेर पुलिस दा सुनेगा आइआ। पुलिस होर इंतज़ार नहीं सी कर सकदी।

हुण देर करन दा कोई कारन वी नहीं सी।

राम नाथ नें संगीतां नूं हदाइत कीती। छुट्टी होण तक उह हसपताल रहे। फेर दयानंद हसपताल पुज्ज जावे।

खुद उह परचा दरज कराउण घर जा रिहा सी।

 

-5-

 

वारदात दी ख़बर तेज़ी नाल फैल रही सी। परिवारां दे चारां जीआं दे वाकफकारां दा आपणा आपणा घेरा सी। जिस नूं जिउं ही पता चल्लदा उह हत्थला कंम विचे छड्ड के उनहां दी कोठी वल्ल दौड़ पैंदा।

हसपतालों विहला हो के राम नाथ दे घर मुड़न तक कोठी अग्गे बहुत वड्डी भीड़ जुड़ चुक्की सी।

मौका मुलाहज़ा करन दी कारवाई पुलिस मुकंमल कर चुक्की सी। वारदात बहुत सुलझे ढंग नाल कीती गई सी। दोशीआं नें बहुते सबत पिछ्छे नहीं सन छड्डे। मौके तों इक्क राड जिस नाल सट्टां मारीआं गईआं सन अते इक्क बैग, जिस विच्च दोशी पेचकस, चाबीआं पा के लिआए सन, मिलिआ सी। हत्थां पैरां दे निशान बहुत धुंदले सन। होर सबूत इकठ्ठे करन लई होर माहिरां नें आउणा सी। इस लई कोठी दे मुख्ख हिस्से नूं, जिस सथिती विच्च उह सी, उसे विच्च रख्ख के, सरब मोहर कर दित्ता गिआ सी।

पत्तरकार पुलिस दी चुप्प ’ते खिझे होए सन। पुलिस पता नहीं किउं मूंह नहीं सी खोल्हदी। उह आपणे सूतरां राहीं लीर लीर जोड़ के पजामा सिउण दा यतन कर रहे सन। पुलिस उनहां नूं लोकां दीआं इंटरविऊ लैण तों कई वार रोक चुक्की सी। गुआंढीआं नूं कुझ्झ पता नहीं सी। गलत तत्थ छाप के केस दा भठ्ठा नां बिठा देणा। जिंना चिर पुलिस, प्रैस नोट जारी नहीं करदी, ओना चिर उह सबर दा घुट्ट भरी रख्खण।

राम नाथ दे कोठी पुज्जदिआं ही सारी पुलिस उस दुआले हो गई। वेद दे रिशतेदारां नें सारी ज़िंमेवारी उसे उपर सुट्टी सी। उह वकील सी। इक्क वकील तों वध्ध होर किसे नूं की पता हो सकदा है कि परचा किवें दरज कराउणा है?

उह जो करेगा, सभ नूं मनज़ूर होएगा।

राम नाथ परचे दी अहिमीअत नूं जाणदा सी। सारे मुकद्दमे दा आधार इसे परचे नें बनणा सी। परचा सही घटना ’ते आधारत होणा चाहीदा सी।

राम नाथ नूं होई वारदात बारे कख्ख नहीं सी पता। दोशी दो सन, चार, दस जां बारां? उह छोटी उमर दे सन, अध्धखड़ जां वडेरी उमर दे? उह कंध टप्प के अंदर आए सन जां बैल्ल खड़का के? उनहां कोल चाकू सन, राड सन, छुरे सन जां सोटीआं? उनहां नें किहो जिहे कपड़े पाए होए सन? पाए सन जां नंगे धड़ सन? उह केसाधारी सन, मोने जां मौलवी कट्ट। पहिलां हमला किस उपर होइआ?

कमल दा कतल करन वाला कौण सी? नेहा नाल बलातकार किस नें कीता?

इक्क नें कीता जां वध्ध नें? नीलम अते वेद नूं सट्टां किस किस नें मारीआं?

इनहां विचों इक्क वी सवाल दा जवाब राम नाथ कोल नहीं सी। कोरी कलपना दे आधार ’ते परचा दरज कराउणा घातक सिध्ध हो सकदा सी। कदे नां कदे दोशीआं नें फड़े जाणा सी। उनहां नें होई वारदात दा वेरवा आपणे वकीलां नूं दस्स देणा सी। मुदई धिर अते सफ़ाई धिर दे कथनां विच्च ज़मीन असमान दा फ़रक होणा सी। दोहां कथनां विच्च तालमेल बैठाउणा असंभव होणा सी।

नतीजन दोशीआं नूं शक्क दा फ़ाइदा होणा सी।

राम नाथ नूं कुझ्झ नहीं सी सुझ्झ रिहा। भज्ज नठ्ठ, मानसिक तनाअ अते भुख्ख पिआस कारन उह दिमाग़ी अते जिसमानी दोहां तरहां नाल थक्क चुक्का सी। अजिहे मौकिआं ’ते उह वध्ध पत्ती वाली चाह पी के ताज़ा दम होइआ करदा सी। इनहां हालातां विच्च चाह नसीब नहीं सी हो रही।

थाणेदार राम नाथ दी मजबूरी नूं भांप गिआ। राए मशवरे लई उह राम नाथ नूं इक्क पासे लै गिआ।

“घर विच्च इक्क नौकर वी है?” थाणेदार नें राम नाथ तों पुछ्छिआ।

राम नाथ थाणेदार दा मतलब समझ गिआ।

हुण घरेलू नौकर पहिलां वरगे नहीं सन रहे। पिछले इक्क साल विच्च माइआ नगर विच्च लगातार कई घटनावां घटीआं सन, जिनहां विच्च घरेलू नौकरां दा हत्थ सी। थाणेदार नें आपणी गल्ल समझाउण लई इक्क ताज़ी उदाहरण दित्ती।

पिछले हफ़ते इक्क बैंक मैनेजर दे नौकर नें रात दे खाणे विच्च बेहोशी वाली दवाई मिला दित्ती। जदों सारा टब्बर गूहड़ी नींद सौं गिआ, नौकर नें कोठी दा गेट साथीआं लई खोल्ह दित्ता। बड़े अराम नाल उनहां नें घर दा निक्क सुक्क चुक्किआ अते फरार हो गए। अज्ज तक्क नां नौकर दी उघ्घ सुघ्घ मिली सी, नां उसदे साथीआं दी।

पर वेद होरां दा नौकर अजिहा नहीं सी। सत्त साल दे नूं उसदा चाचा उसनूं पंजाब लै आइआ सी। दो साल उसने किसे होर दी कोठी कंम कीता।

पंज साल तों उह वेद कोल सी। नां कदे उह पिंड जांदा सी, नां कोई उसनूं मिलण आउंदा सी। साल बाअद उसदा चाचा आउंदा सी। तनख़ाह फड़ के लै जांदा सी। वेद नें नौकर नूं पुत्तर वांग रख्खिआ होइआ सी।

राम नाथ उस ’ते अजिही वारदात दा शक्क नहीं सी कर सकदा।

नौकर दी परिवार नाल नेड़ता थाणेदार दे शक्क नूं होर पक्का करन लग्गी।

पैसा धेला कित्थे है? नौकर नूं सभ पता सी। हालात बदलदे देर नहीं लगदी।   बंदा कदों भैड़ी सुहबत विच्च पै जावे कुझ्झ नहीं आखिआ जा सकदा। टी.वी. अते फ़िलमां चोरी डाके अते बलातकार ही तां सिखाउंदीआं हन। विहले नौकर सारा दिन टी.वी.अग्गे बैठे रहिंदे हन। कदे किसे फ़िलम तों जलदी अमीर बणन दी प्रेरना मिल गई होवे? इस बारे कुझ्झ नहीं सी आखिआ जा सकदा।

रामू नूं टी.वी.दा शौक सी। थाणेदार दी इह गल्ल सच्ची सी। दो महीने पहिलां ही वेद नें आपणे दफ़तर दा टी.वी.बदलिआ सी। दफ़तर वाला टी.वी.पुराणे माडल दा सी। वेचण दी गल्ल चल्ली तां कोई दो हज़ार तों वध्ध देण नूं तिआर नां होइआ। मिट्टी दे भाअ सुट्टण नालों वेद नें टी.वी.घर लिआ के नौकर दे कमरे विच्च लगवा दित्ता। नाले नौकर दा मन परचिआ रहू, नाल बच्चिआं विच्च बैठ के टी.वी.देखण दी लत्त जांदी रहू।

“नौकर है कित्थे?” रामू दे हक्क ’च जां विरुध्ध बोलण तों पहिलां राम नाथ नें मुख अफ़सर तों नौकर बारे पुछ्छिआ।

“उह पुलिस दी नज़र हेठ है। पर उसदा वरतारा अजीब है।” मुख्ख अफ़सर रामू कोलों घटना संबंधी मिले वेरविआं बारे राम नाथ नूं दस्सण लग्गा।

पुलिस दे पुज्जण तक्क उह आपणे कमरे विच्च घूक सुत्ता होइआ सी। उसदा टी.वी.चल्ल रिहा सी।

घर विच्च इडी वारदात हो गई सी। घर दे सारे मैंबरां दी मुलज़मां नाल हत्थोपाई होई सी। चीक चिहाड़ा पिआ होणा है। समान दी टुट्ट भज्ज होई सी।

बहुत सारा समान बाहर गिआ सी। घर दे नौकर नूं कोई उघ्घ सुघ्घ नहीं लग्गी।

पुलिस दे पुछ्छण ते उसने गल्ल टाल दित्ती सी। रात देर तक उह घर दा कंम करदा रिहा सी। टी.वी.उपर अमिताब बचन दी फ़िलम आउण लग्गी।

देर तक उह फ़िलम देखदा रिहा। फ़िलम देखदे देखदे पता नहीं कदों उस नूं नींद आ गई। उह पुलिस दे जगाउण ते जागिआ सी।

मुढ्ढली पुछ्छ पड़ताल ’ते नौकर नें पैरां ’ते पाणी नहीं सी पैण दित्ता। करड़ी पुछ्छ पड़ताल दी लोड़ सी। हाले समां सख़ती करन दा नहीं सी। पर खुल्ही छुट्टी वी नहीं सी दित्ती जा सकदी। उसनूं पुचकार के रख्खणा सी अते भज्ज जाण दा मौका नहीं सी देणा।

इक्क हौलदार नौकर उपर नज़र रख्ख रिहा सी। उसनूं उसदी बरादरी दा कौण कौण मिलदा है? मिलदा है ता की गल्ल करदा है? उह डरिआ होइआ है जां सधारन सथिती विच्च है? तफतीश दे किसे राह पैण तक पुलिस दी अख्ख उस उपर रहिणी सी। पुलिस नूं राम नाथ दे सहियोग दी ज़रूरत सी।

राम नाथ नूं नौकर नाल कोई हमदरदी नहीं सी। पर उह घर दे मैंबरां वांग सी। पक्के सबूतां बिनां उसदे कुटापा नां चाहड़िआ जावे। उसदी इहो बेनती सी।

इस मसले नूं फेर नजिठ्ठ लिआ जाएगा। हाले समस्सिआ इह सी कि परचा किस दे खिलाफ अते किस दे बिआन ’ते दरज कीता जावे?

जे नौकर ’ते शक्क नां हुंदा तां परचा उसदे बिआन दे आधार ’ते दरज हो सकदा सी। उसनूं चशमदीद गवाह बणाइआ जा सकदा सी।

पर थाणेदार इस नाल सहिमत नहीं सी। नौकर दे हत्थ मुकद्दमे दी वागडोर नहीं सी फड़ाई जा सकदी। की पता है कातल कौण निकल आवे? अजिहे गवाह नें कौडीआं दे भाअ विक जाणा सी।

घट्टो घट्ट परचा कटाउण वाला गवाह घर दा होणा चाहीदा है।

फेर परचा केवल नेहा दे बिआन दे आधार ’ते दरज हो सकदा सी। डाकटर नें वी उसनूं बिआन देण दे योग कहि दित्ता सी।

थाणेदार अते वकील इको सिट्टे ’ते पुज्जे। नेहा दे बिआन दे आधार ’ते परचा दरज कर दित्ता जावे। दसतख़तां नूं कौण पुछ्छदा है? उसदे दसतख़त राम नाथ झरीट देवे। थाणेदार तसदीक कर देवेगा। सप्प वी मर जाएगा अते लाठी वी नहीं टुट्टेगी। नेहा नूं तकलीफ़ देण दी ज़रूरत नहीं पएगी। परचा वी दरज हो जाएगा।

हुण मसला इह सी कि परचा किस दे ख़िलाफ़ दरज करवाइआ जावे।

मुख्ख अफ़सर दी तफ़तीश आखदी सी कि वारदात काले कछ्छिआं वाले गरोह नें कीती सी। राम नाथ नूं किसे होर ’ते शक्क होवे उस बारे सोच विचार हो सकदी सी।

जे माइआ देवी वल्लों मुंडिआं दे दस्से गए मनसूबिआं नूं मज़रूबां दे लग्गीआं सट्टां नाल मिला के देखिआ जावे तां वारदात कराउण वाले बंदिआं दी पहिचाण सपश्शट सी। साज़शीआं नें असल मुलज़मां दे नां आपे दस्स देणे सन।

राम नाथ नें दोहां परिवारां विचकार चल्लदे झगड़े अते पंकज होरां वल्लों मिलदीआं धमकीआं दा वेरवा मुख्ख अफ़सर नाल सांझा कीता।

थाणेदार नें इनहां वेरविआं नूं आपणी डेअरी विच्च नोट तां कीता, पर अजिहे मामूली झगड़िआं उपर कतल वरगी वारदात उस दे मन नां लग्गी।

शक्क दे आधार ’ते भाई भतीजिआं नूं घड़ीसणा वी उस नूं ठीक नहीं सी लग्गा।

कोई सबूत मिलण ’ते उनहां नूं पिछों मुलज़म बणाइआ जा सकदा सी। परचे विच्च नां देणे सिआणप नहीं सी।

मुख्ख अफ़सर नें इह नेक सलाह कई कारनां करके दित्ती सी।

पहिला कारन इह सी कि हुण तक दी तफतीश तों जापदा सी इह साधारन चोरी डकैती दी घटना सी। किसे रज्जे पुज्जे परिवार वल्लों अजिहीआं घटीआ साज़िशां नहीं घड़ीआं जांदीआं। अमीर अते पहुंच वाले बंदिआं दा नां परचे विच्च पा के थाणेदार नें भरिंडां दे छत्ते विच्च हत्थ पा लैणा सी। उसनूं डंगां तों सिवा कुझ्झ नहीं सी लभ्भणा।

दूसरा कारन नमक हरामी होण दा डर सी। पंकज दा मैनेजर हाले हुण उस नूं दस हज़र रुपए दे के गिआ सी। मैनेजर नूं इस आशो लई पंकज दा दिल्लीउं फ़ोन आइआ सी। भरावां दे झगड़े कचहिरी तक सीमत सन। नंहुआं नालों मास अलग्ग नहीं हुंदे। थाणेदार पूरी तन देही नाल तफ़तीश करे। दोशी हर हाल विच्च फड़े जाण। पंकज नूं खरचे दी कोई परवाह नहीं सी। जिहड़ी पारटी वधीआ तफ़तीश कराउण लई थाणेदार नूं दस हज़ार रुपए दे रही सी, उह ख़ुद कातल किवें हो सकदी सी? थाणेदार तों इह सच्च निगलिआ नहीं सी जा रिहा।

तीसरा अते अहिम कारन इह सी कि राम नाथ दे इस इशारे कारन पुलिस नूं पंकज होरां नूं धमकाउण दा मौका मिल जाणा सी। मुदई धिर तों थाणेदार नूं कुझ्झ पल्ले पैंदा नज़र नहीं सी आउंदा। मुलज़मां नें पता नहीं कदों फड़े जाणा सी। मुख्ख अफ़सर दी जेब पंकज कोलों गरम होणी सी।

राम नाथ नूं थाणेदार दी राए नाल सहिमत होणा पिआ। बिनां भैण भनोईए दी सलाह दे इह कदम उस लई बदनामी दा टिक्का बण सकदा सी।

होर विचारन वाला कुझ्झ नहीं सी।

नेहा दा फरज़ी बिआन कलमबंद कीता गिआ।

रात दे दो तिंन वजे उह आपणे कमरे विच्च पहड़ रही सी। कोठी दी बैल्ल खड़की। उसने आपणे पापा नूं जगाइआ। पापे दे नाल ही मंमी जाग पई।

पापा गेट ’ते गए। दो कमांडो वरदी वाले बंदे गेट ते खहड़े सन। पुलिस वाले समझ के वेद नें गेट खोल्ह दित्ता। दोशीआं नें काले कप्पड़े पाए होए सन। मूंहां 'ते काले मड़ासे बंनहे सन। अख्खां ’ते कालीआं ऐनकां सन। उनहां नें आखिआ, उह पुलिस वाले हन। उनहां दी कोठी विच्च इक्क चोर छुपिआ है। कोठी दी तलाशी लैणी है। इस बहाने उह कोठी अंदर आ गए। उनहां वरगे तिंन होर बंदे उनहां दे पिछ्छे पिछ्छे कोठी अंदर आ गए। कुझ्झ लाबी विच्च आ गए कुझ्झ बाहर खहड़ गए। लाबी विच्च आ के उह वेद तों नगदी अते गहिणा मंगण लग्गे। अलमारी दीआं चाबीआं मंगण लग्गे। इस शोर शराबे विच्च कमल जाग पिआ। उह लाबी विच्च आ गिआ। मुलज़मां नाल हत्थोपाई हो गिआ। हुंदी लड़ाई देख के बाहरले दोशी अंदर आ गए। किसे दे हत्थ विच्च राड सी अते किसे दे छुरा। हत्थोपाई विच्च उनहां दे मूंहां उत्तों कप्पड़े लहि गए। साहमणे आउण ’ते उह उनहां नूं पहिचाण सकदी है। इक्क नें कमल दे ढिड्ड विच्च छुरा मार दित्ता। इक्क नें नीलम दे अते इक्क नें वेद दे सट्टां मार दित्तीआं। नेहा नूं धूह के उनहां नें कमरे विच्च बंद कर दित्ता। जांदे होए उह घर दा सारा समान चुक्क के लै गए। घर दे सारे मैंबर बेहोश हो गए। पिछ्छों की होइआ, उसनूं कुझ्झ पता नहीं सी।

नेहा दे दसतख़त राम नाथ तों करवा के मुख्ख अफ़सर नें राहत महिसूस कीती। बला टली।

परचा दरज हुंदिआं ही इकठ्ठ खिंडण लग्गा।

दो सिपाही कमल दी लाश लै के हसपताल वल्ल तुर पए।

बाकी दी पुलिस थाणे नूं तुर पई। बहुत लिखत पहड़त करन वाली पई सी।

पत्तरकार आपणे दफ़तरां वल्ल दौड़े।

तमाशबीन घरां नूं मुड़ गए।

गमग़ीन रिशतेदारां नें गली विच्च दरीआं विछा लईआं।

बेसबरी नाल उह कमल दी लाश दा इंतज़ार करन लग्गे।

कदों उह वापस आए, कदों उह ससकार करके उसदी मिट्टी समेटण। कककक

 

-6-

 

सरदारी लाल अते संगीता तों इलावा मंगत राए वी कमल दे ससकार विच्च शामल होणों रहि गिआ।

उह वेद अते नीलम दी देखभाल लई दयानंद हसपताल फसे बैठे सन।

दोवें मरीज़ां दी जान ख़तरे विच्च सी। डाकटर मरीज़ां नूं बचाउण लई सिरतोड़ यतन कर रहे सन। पैर पैर ’ते डाकटरां नूं वारिसां दी लोड़ पै रही सी।

नीलम निउरो वारड दी ऐमरजैंसी विच्च दाख़ल सी। सरदारी लाल, संगीता अते सीमा इस वारड दे बाहर खहड़े हन। उह नीलम दे डाकटरां दीआं लोड़ां पूरीआं कर रहे सन।

इह वारड हसपताल दी पंजवीं मंज़ल उपर सी।

वेद हड्डीआं वाले वारड दी ऐमरजैंसी विच्च सी। मंगत राए, उसदी पतनी सुजाता अते संगीता दा भरा पवन इस वारड अग्गे खड़ोते सन।

इह वारड हसपताल दी पहिली मंज़िल उपर सी।

डाकटर देव दोहां वारडां विचकार चक्कर ला रिहा सी। हसपताल दे डाकटर वारिसां दे कुझ्झ पल्ले नहीं सन पा रहे। ऐमरजैंसी विच्च जाण दी डाकटर नूं वी इजाज़त नहीं सी। पर उह मरीज़ां दे टैसटां दीआं रिपोरटां दे आधार 'ते मरीज़ां दी हालत दा अंदाज़ा ला रिहा सी।

जिउं ही उसनूं कुझ्झ पता लगदा उह झट्ट बाहर आ के वारिसां नूं मरीज़ां दी ताज़ा सथिती बारे दस्सदा। नीलम दे दिमाग़ दी सट्ट ख़तरनाक सी। उसदे दिमाग़ विच्च कुझ्झ थाईं ख़ून जंम गिआ सी। उह ‘कोमा’ विच्च सी। दिमाग़ सरीर दे किसे वी अंग नूं कंटरोल नहीं सी कर रिहा। बलड्ड प्रैशर प्रेशान कर रिहा सी। कदे चहड़ जांदा सी अते कदे गिर जांदा सी। नबज़ धीमी चल्ल रही सी।

दिल दी हालत वी सथिर नहीं सी। दिमाग़ दा फौरी अपरेशन होणा चाहीदा सी। पर डाकटर हाले इह फैसला नहीं सी कर पा रहे कि मरीज़ अपरेशन कराउण दे योग सी जां नहीं। उनहां नें ख़ून, शूगर, दिल, गुरदे अते पित्ते दे टैसट लए सन। रिपोरटां आउण बाअद अंतम फैसला होणा सी। कुल मिला के सथिती चिंताजनक सी।

वेद दी हालत नीलम नाल मिलदी जुलदी सी। उस दीआं लत्तां अते बाहां दा उहो हाल सी जो नीलम दे दिमाग़ दा। जबाड़े दी टुट्टी हड्डी सभ तों वध्ध समस्सिआ खहड़ी कर रही सी। नां इथे पलेट पैणी सी, नां पलस्सतर होणा सी।

नक्क अते मूंह राहीं तारां पा के हड्डीआं नूं कस्सिआ जाणा सी। तारां दा कसा बहुत दरदनाक सी। जिंना चिर तारां नें रहिणा सी ओना चिर उसनूं बेहोश रख्खिआ जाणा सी। सट्टां दे दरद कारन अते इलाज विच्च होई देरी कारन मरीज़ दे दिल ’ते असर होइआ सी। दिल दी धड़कण तेज़ी नाल वध्ध घट्ट रही सी। बलड्डप्रैशर वध गिआ सी अते शूगर घट गई सी। लत्तां दीआं हड्डीआं दे इंने टुकड़े हो गए सन कि उनहां नूं जोड़न दी संभावना घट्ट नज़र आउंदी सी। मरीज़ दी जान बचाउण लई किसे टंग दे कट्टे जाण तक दी नौबत आ सकदी सी। जान नूं वी ख़तरा हो सकदा सी।

वारिसां लई मरीज़ां दी हालत दे नाल नाल अपरेशनां उपर होण वाला खरचा वी चिंता दा विशा बणिआ होइआ सी।

दोहां मरीज़ां नूं सरदारी लाल नें हसपताल विच्च दाख़ल करवाइआ सी।

इक्क मरीज़ दी दाख़ला फ़ीस पंज हज़ार रुपए सी। दोहां उप्पर दस हज़ार लग गिआ सी। सरदारी लाल घरों पंजाह हज़ार रुपए लै के आइआ सी। बाकी बचदे चाली हज़ार नीलम दीआं दवाईआं, औज़ारां अते टैसटां दे बिल्लां नें निगल लिआ सी। उस कोल मसां दो तिंन हज़ार बचदा सी।

मंगत राए नें वीह हज़ार रुपए राम नाथ दे खाते विचों कढवाइआ सी।

तीह हज़ार उह आपणे कोलों लै के आइआ सी। तुरदे समें उस नूं नहीं सी पता कि पैसा इस तरहां पाणी वांग वहेगा। पता लग्ग वी जांदा तां वी उह इस तों वध्ध रकम तिआर नहीं सी कर सकदा। इधरों उधरों रकम फड़न ’ते समां लग्गणा सी।

मंगत राए पंदरां कु हज़ार ऐम.आर.आई., सकैन अते ऐकसरे उपर ख़रच कर चुक्का सी। पंज कु हज़ार दीआं दवाईआं अते गरम पट्टीआं आ चुक्कीआं सन। उस कोल तीह हज़ार बाकी सी। इस रकम दीआं पलेटां आउणीआं सन।

बाकी पैसा किथों आएगा? मंगत राए नूं इह चिंता लग्गी होई सी।

पंज छे घंटे हसपताल रहि के वारिसां नें भांप लिआ सी। फ़ीस मरीज़ां दे अपरेशन थीएटर जाण तों पहिलां भराई जाणी सी।

नीलम दे अपरेशन दी फ़ीस तीह हज़ार रुपए सी। वीह हज़ार दवाईआं अते टीकिआं ’ते लग्गणा सी।

वेद दे अपरेशन दी फ़ीस वीह हज़ार रुपए सी। उस दीआं टंगां, बाहां विच्च चार पलेटां पैणीआं सन। देसी पलेटां दी कीमत दस हज़ार फी पलेट सी।

कोई विदेशी पलेट पवाउणी पई तां कीमत डेढी तों दुगणी हो जाणी सी।

कुल्ल मिला के इक्क लख्ख रुपए दी ज़रूरत सी। इधर वारिस रुपए इकठ्ठे करन दीआं योजनावां सोचण ल गे। उधर डाकटर रिपोरटां घोखण लग्गे।

डाकटरां नूं खुशी होई। छे घंटे दी सख़त मिहनत बाअद उह मरीज़ां दे शूगर अते बलड्ड प्रैशर नूं काबू करन विच्च कामयाब हो गए सन।

डाकटरां वल्लों हरी झंडी मिलदिआं ही मरीज़ां दे वारिसां नूं लाऊड सपीकर ते अवाज़ां पैण लग्गीआं। वारिस काऊंटर ते आ के फ़ीस जमहां कराउण अते काग़ज़ां पत्तरां उपर दसतख़त करन।

काऊंटर उप्पर जाण दी थां सारे रिशतेदार इक्क थां इकठ्ठे हो गए।

सरदारी लाल नें आपणी सथिती सपश्शट कीती। उह जो रकम लै के आइआ सी उह ख़रच हो चुक्की सी। सबूत वजों उस नें संभाल के रख्खीआं रसीदां मंगत नूं फड़ा दित्तीआं। माइआ नगर विच्च उसदी कोई जाण पहिचाण नहीं सी।

उह बैंक खुल्हण तों बाअद इंनी कु रकम पिंडों मंगवा सकदा सी। होर लोड़ पई तां उस नूं किधरों उधार मंगणा पैणा सी।

मंगत राए नें वी आपणी जेब विचला तीह हज़ार रिशतेदारां अग्गे रख्ख दित्ता। इस समें होर पैसे किधरों लै आउण दा उस कोल वी कोई साधन नहीं सी।

बाकी दी रकम दा प्रबंध राम नाथ दे मशवरे नाल हो सकदा सी।

मजबूरी वस उह राम नाथ दा इंतज़ार करन लग्गे।

 

-7-

 

पंडत, रिशतेदार अते आंढी गुआंढी राम नाथ उपर ज़ोर पा रहे सन।

पोसट मारटम जलदी कराओ। सूरज छिपण तों पहिलां पहिलां ससकार होणा ज़रूरी सी। जे सूरज छिप गिआ तां ससकार अगले दिन ’ते पै जाणा सी। लाश दी हालत भैड़ी सी। लाश नूं रात भर संभाल के नहीं सी रख्खिआ जा सकदा।

राम नाथ इस मजबूरी नूं समझ रिहा सी। उह समें सिर लाश प्रापत करन दा हर यतन कर रिहा सी।

संबंधित अधिकारी दुखी परिवार नाल पूरी हमदरदी जिता रहे सन। किसे पासिउं कोई अड़चन नहीं सी पै रही। कानूंनी कारवाईआं ही इंनीआं सन कि मल्लो मल्ली देर हो रही सी। पुलिस नें आपणी लिखा पहड़ी पोसट मारटम तों पहिलां मुकंमल करनी सी। डाकटरां नें उस तों वध्ध कारवाई पोसट मारटम तों बाअद करनी सी। कतल दा मामला सी। छोटी जिही कुताही दोशीआं दे बरी होण दा कारन बण सकदी सी। राम नाथ इनहां पेचीदगीआं नूं समझदा सी।

इस लई उह कारवाई अधूरी छड्डण लई वी नहीं सी आख सकदा।

मरन वाले दे बाहरों आए साक संबंधीआं दीआं मुशकलां नूं धिआन विच्च रख्खदिआं पुलिस अते डाकटरां नें मोटी मोटी कारवाई करके लाश वारिसां दे हवाले कर दित्ती। रिशतेदार आपणीआं रसमां अदा करन। बाकी लिखा पहड़ी पिछों हुंदी रहेगी।

मोहतबर बंदिआं नें राम नाथ नूं सलाह दित्ती। लाश नूं घर लिजाण दा कोई फ़ाइदा नहीं सी। कोठी भूत बंगला बणी होई सी। परिवार दे बाकी मैंबर ज़िंदगी मौत दी लड़ाई लड़ रहे सन। ’तेरा भाणा मीठा लागे’ दे वाक अनुसार सबर कर लैणा चाहीदा सी। समें दी बचत करके बाकी जीआं दे बचाअ वल्ल धिआन देणा चाहीदा सी।

लाश नूं सिध्धा शमशानघाट लिजाइआ गिआ।

ससकार दी रसम चुप्पचाप हुंदी रही। रिशतेदार जिवें जिऊंदीआं लाशां बण गए सन। किसे विच्च रोण धोण जां बोलण दी हिंमत नहीं सी।

जिनहां बाहरों आए रिशतेदारां नूं वहिम सी, उह शमशानघाटों ही घरां नूं मुड़ गए। जिनहां नूं वहिमां भरमां विच्च विशवास नहीं सी जां जिनहां नूं वहिमांभरमां दी उलंघणा करन नाल होण वाले नुकसान नालों आपणे रिशतेदार पिआरे सन उह सिध्धे हसपताल नूं हो लए।

कमल दीआं आखरी रसमां पूरीआं करदे राम नाथ नूं शमशानघाट विच्च कुझ्झ देर लग्ग गई।

राम नाथ नूं हसपतालों सुनेहे ’ते सुनेहा आउण लग्गा। मरीज़ां दी हालत गंभीर सी। डाकटर फौरी तौर ’ते अपरेशन करना चाहुंदे सन। मरीज़ां दी जान नूं खतरा सी। खतरा मुल्ल लैण तों पहिलां डाकटर वारिसां तों सहिमती लैणी चाहंदे सन। सहिमती कागज़ां उपर राम नाथ दे दसतख़त होणे ज़रूरी सन।

उह तुरंत हसपताल पुज्जे।

राम नाथ मरीज़ां दा इकल्ला वारिस नहीं सी। उस वरगे बथेरे रिशतेदार हसपताल विच्च मौजूद सन। इस सुनेहे विचों उसनूं होर रमज़ां आउंदीआं महिसूस होण लग्गीआं।

हत्थले कंम विचे छड्ड के राम नाथ हसपताल वल्ल दौड़ पिआ।

रिशतेदार पहिली मंज़ल उपर इकठ्ठे होए बैठे सन।

राम नाथ नूं पौड़ीआं चहड़दे दिक्कत महिसूस होण लग्गी। उसनूं आपणीआं टंगां हज़ारां मण भारीआं लग्गण लग्गीआं। उस दा साह चहड़ गिआ। अख्खां फुल्ल गईआं। राम नाथ नें समझ लिआ इह बलड्ड प्रैशर वधण दी निशानी सी।

दो कदम होर तुर के राम नाथ नूं घुमेर चहड़न लग्गी। शराबीआं वांग उसदे कदम इथे दी थां उथे टिकण लग्गे। डिग्गण लगे राम नाथ नूं संगीता नें बचा लिआ। आपणे मोढिआं दा सहारा दे के उसने राम नाथ नूं कुरसी उपर बिठा दित्ता।

सरदारी लाल झट्ट पाणी वाली बोतल फड़ लिआइआ। पाणी दा गलास भर के उस नें राम नाथ दे मूंह नूं ला दित्ता। राम नाथ नें पागलां वांग सारा गलास इको साह अंदर सुट्ट लिआ। सरदारी लाल नें इक्क होर गलास उसनूं फड़ाइआ। राम नाथ नें उह वी अंदर सुट्ट लिआ। पिछले पंदरां सोलां घंटिआं विच्च इह पहिली वार सी जदों राम नाथ नूं पाणी दा घुट्ट नसीब होइआ सी।

ठंडे पाणी नें असर विखाइआ। अख्खां अग्गे छाइआ हनहेरा छटण लग्गा।

साह सथिर होण लग्गा।

पवन सथिती समझ गिआ। राम नाथ दी इह दुरदशा भुख्ख पिआस कारन होई सी। जदों दा पवन माइआ नगर आइआ सी उह देख रिहा सी, राम नाथ दे अंदर खिल तक नहीं सी गई। कई वार पवन नें उसनूं कुझ्झ खवाउण पिआउण दा यतन कीता सी, पर हर वार उस नें उसदा हत्थ झटक दित्ता सी।

संगीता दी हालत वी राम नाथ वरगी सी। उसदा फाका भावें राम नाथ जिंना सख़त ते नहीं सी पर भुख्ख नाल उह वी बेहाल सी।

उनहां वरगे होर वी कई रिशतेदार होणगे, जिहड़े शरमों शरमी भुख्खे तिहाए बैठे होणगे।

जो भाणा वरतणा सी वरत चुक्का सी। भुख्खिआं रहि के गिआं नें मुड़ नहीं सी आउणा। जो बच गए सन उनहां नूं संभालणा ज़रूरी सी। उनहां दी संभाल लई उपरलिआं दा रिशट पुशट होणा ज़रूरी सी। राम नाथ सारी कारवाई दा धुरा सी। उस नूं कुझ्झ हो गिआ तां सारी खेड समापत हो जाणी सी।

इह सोच के पवन हसपताल दी कंटीन विच्च गिआ। चाह दा जग्ग अते पलासटक दे गलास चुक्क लिआइआ।

इक्क गलास भर के उसने राम नाथ नूं फड़ा दित्ता।

राम नाथ दा सरीर मिट्टी होइआ पिआ सी। नांह करन दी उसदी हिंमत नां पई। माण वजों पहिला गलास फड़ के उसने आपणे जीजे सरदारी लाल नूं फड़ा दित्ता। सरदारी लाल नूं वी चाह दी तलब सी। पर उसने शिशटाचार वजों गलास संगीता नूं फड़ा दित्ता। पवन गलास भरदा रिहा अते रिशतेदार उस तों फड़ फड़ इक्क तों अग्गे दूजे नूं फड़ाउंदे रहे।

जदों सारे चाह पीण लग पए पवन दी हिंमत वध गई। उह चुपके जिहे चार पंज पैकट बरैड फड़ लिआइआ। चाह दे नाल नाल उह पीस वरताउण लग्गा।

भुख्ख सभ नूं तड़पा रही सी। देखो देखी सभ नें चाह अते बरैड फड़ लई।

भुख्ख मिटदिआं ही राम नाथ दी बिमारी खंभ ला के उड्ड गई। उह ताज़ा दम महिसूस करन लग्गा।

मौका ताड़ के डाकटर देव नें दोहां मरीज़ां दी ताज़ा सथिती राम नाथ अते पिछ्छों आए होर रिशतेदारां नूं समझा दित्ती। इह वी समझा दित्ता कि अपरेशनां विच्च देर ख़तरनाक सिध्ध हो सकदी सी। झट्टपट्ट कागज़ी कारवाई मुकंमल करके डाकटरां नूं अपरेशन करन दी इजाज़त दे देणी चाहीदी सी।

राम नाथ नूं समझ नहीं सी आ रही। जे अपरेशन इंने ज़रूरी सन तां हुण तक मंगत राए नें कागज़ां उपर दसतखत किउं नां कीते? मंगत अते राम नाथ विच्च कोई फ़रक नहीं सी।

कारन समझाउण लई मंगत राम नाथ नूं इक्क पासे लै गिआ। हो चुक्के खरचे दा वेरवा दित्ता। मंगी जा रही रकम दा ज़िकर कीता।

पैसिआं दी कमी दी भिणक पवन दे कंनीं पै गई। उह धनाढ तां नहीं सी। इक्क सकूटर मकैनिक सी। वारदात दी ख़बर सुण के उह आपणी दुकान नूं जिंदा ला के इधर नूं भज्ज पिआ सी। पता सी पैसे दी लोड़ पएगी। आपणे अते आपणे गुआंढीआं दे गल्लिआं विच्च जो पिआ सी उह चुक्क लिआइआ सी। हज़ार पंदरां सौ खरच हो चुक्का सी। अठ्ठ नौं हज़ार बचदा सी।

उह रकम उसने संगीता नूं फड़ा दित्ती।

पवन दी इस हल्लाशेरी नें बाकीआं लई राह खोल्ह दित्ता। अजिहे मौकिआं ते पैसिआं दी ज़रूरत पैंदी है, इह अहिसास हर रिशतेदार नूं सी। हर कोई आपणी हैसीअत अनुसार कुझ्झ नां कुझ्झ लै के आइआ सी।

रिशतेदारां नें आपणे तिल फुल्ल भेंट करने शुरू कर दित्ते।

राम नाथ नें मंगत राए नूं इशारा कीता। उह दिआलू रिशतेदारां दे नां अते आई रकम नोट कर लए। नां राम नाथ कोल पैसे दी घाट सी नां उसदे भैण भणवईए कोल। सभ दे पैसे धंनवाद सहित वापिस कीते जाणगे।

नां अते रकम नोट हुंदी देख के सहाइता दी राशी अते सहाइता करन वालिआं दी गिणती कई गुणा वध गई।

इकठ्ठी होई रकम दोहां मरीज़ां दा खरचा भरन लई काफ़ी सी।

मंगत वाधू रकम वापस करना चाहुंदा सी। डाकटर देव नें उसनूं रोक दित्ता। खरचे खतम थोहड़ा हो गए सन। पता नहीं कदों किस दवाई वाली परची अंदरों आ जावे? कदों किसे महिंगे टैसट दी ज़रूरत पै जावे। हाल दी घड़ी रकम संभाल लैणी चाहीदी सी।

मरीज़ां दे अपरेशन थीएटर जाण बाअद बाकी रिशतेदारां नूं हत्थ बंनह के बेनती कीती गई।

हुण उह घरो घरीं जा के आराम करन।

नज़दीकी रिशतेदार हसपताल दी इक्क नुक्करे बैठ के मरीज़ां दे सही सलामत अपरेशन थीएटर विचों बाहर आउण दा इंतज़ार करन लग्गे।

 

-8-

 

सारी रात पुलिस अफ़सरां विचकार बैठकां हुंदीआं रहीआं।

अजिहीआं इक्कड़ दुक्कड़ घटनावां पहिलां होईआं ज़रूर सन, पर उह इंनीआं भिआनक नहीं सन। बलातकार पहिली वार होइआ सी। पहिलां लोड़ पैण ’ते घर दे मैंबरां नूं सट्टां मारीआं जांदीआं सन। इस वार लगदा सी सट्टां जाण बुझ्झ के मारीआं जांदीआं सन।

कमल यूनीवरसिटी विच्च ऐम.बी.ए.दा विदिआरथी सी। यूनीअन दा सरगरम मैंबर सी। विदिआरथी आगूआं नें कल्ल्ह तों अणमित्थे समें लई हड़ताल दा ऐलान कर दित्ता सी। विदिआरथी कातलां नूं तुरंत फड़े जाण दी मंग कर रहे सन।

नेहा नें पत्तरकारी दा डिपलोमा कीता होइआ सी। हुण उह इंगलिश दी ऐम.ए.कर रही सी। शौक दे तौर ’ते उह ‘प्रैस टरस्सट आफ़ इंडीआ’ लई बतौर ‘फरी लांसर’ कंम कर रही सी। सागर नां दे प्रसिध्ध पत्तरकार नाल उसदे प्रेमसंबंध सन। दोहां दी सगाई होण वाली सी। सागर कारन शहिर दे पत्तरकारां लई इह वकारी केस बण गिआ सी। कल्ल्ह तों हर नुकते नें अख़बारां विच्च उछलणा सी।

खुफ़ीआ विभाग दे दोहां फ़ैसलिआं दी सूचना उच्च अधिकारीआं राहीं मुख्ख मंतरी तक अप्पड़दी कर दित्ती सी। मुड़वीं कारवाई दे तौर ’ते हर अधिकारी पुलिस कपतान दी खिचाई कर रिहा सी। मुख्ख मंतरी नें प्रैस कानफरंस बुला के ऐलान कर दित्ता सी। “तफ़तीश कपतान नूं दे दित्ती गई सी। पंदरां दिनां दे अंदर अंदर जे कपतान नें कातल नां फड़े तां उसनूं बदल दित्ता जाएगा।”

विरोधी धिर मुख्ख मंतरी नूं कई फरंटां ’ते घेरी बैठी सी। विगड़ रही कानूंन विवसथा दे नाज़ुक मसले उपर विरोधी धिर नूं उस विरुध्ध ढंडोरा पिट्टण दा मौका मिल जाणा सी। मुख्ख मंतरी आपणी दाहड़ी विरोधी धिर नूं नहीं सी फड़ा सकदा।

पुलिस कपतान नूं इस ऐलान कारन हत्थां पैरां दी पई होई सी। जे पंदरां दिनां दे अंदर अंदर मुलज़म नां फड़े गए तां कपतान नें बली दा बक्करा बण जाणा सी।

मुख्ख मंतरी दे हुकम ’ते फुल्ल चहड़ाउण दे यतन होण लग्गे। कपतान नें आपणे हेठ कंम करदीआं सारीआं इकाईआं नूं सुचेत कर दित्ता। थां थां छापे पैण लग्गे। मुलज़मां दे खुरे खोजे जाण लग्गे।

पुलिस कपतान दीआं अख्खां विच्च नौकर कण वांग रड़क रिहा सी। उस दी पुछ्छगिछ्छ बिनां तफ़तीश अग्गे किस तरहां तुर सकदी सी? उह नौकर नूं ख़ुद ‘इनटैरोगेट’ करना चाहुंदा सी।

कल्ल्ह मुख्ख अफ़सर नें नौकर नूं छड्ड के ठीक कीता सी। माहौल गरम सी।

लोकां नूं नौकर दी वफ़ादारी ते यकीन सी।

हुण हालात बदल चुक्के सन। हुण नौकर दी किसे नूं परवाह नहीं सी।

पता नहीं उह कित्थे सुत्ता सी। किधरे खिसक गिआ तां कपतान दा मूंह काला होणा सी।

सारी रात कपतान नौकर ’ते कचीचीआं वट्टदा रिहा।

सवेर हुंदिआं ही कपतान नें इकल्लिआं मौका दोबारा देखण दा ऐलान कीता। मुलाहज़े विच्च राम नाथ अते नौकर नूं शामल होण दी इजाज़त दित्ती गई।

रात रामू गुआंढीआं दे सुत्ता सी। गुआंढी नें दस्सिआ सी उह बहुत डरिआ होइआ सी। सारी रात उह उसलवट्टे लैंदा रिहा सी। उसने इक्क रोटी मसां अंदर लंघाई सी। उह आपणे चाचे कोल जाण दी ज़िद्द कर रिहा सी।

रामू दी इह बेचैनी कपतान लई खुशी भरिआ संदेश सी। घबराहट दस्सदी सी, उह कुझ्झ छुपा रिहा सी।

ख़ाकी वरदी विच्च कस्से कपतान नें जदों अख्खां सूहीआं करके रामू दीआं अख्खां विच्च तक्किआ रामू धुर अंदर तक हिल्ल गिआ। “देख बेटा! मुझे मुहल्ले के चौकीदार नें सब कुझ्झ बता दीआ है। चोर दीवार कूद कर कोठी में आए थे!

तुमने उन को कोठी में घुसते देखा था।”

कपतान शबद मिठ्ठे बोल रिहा सी पर उनहां विचों कुड़त्तण अते ताड़ना साफ़ झलक रही सी।

“जी साहिब!”

“किआ साहिब?” कपतान दा झूठ इंनी जलदी रंग लिआएगा इह उसनूं उका आस नहीं सी।

“शाबाश! आगे किआ देखा। सभ कुझ्झ बताओ। तुमें इनाम दीआ जाएगा।

तुम इक्क वफ़ादार नौकर हो। मालक तुमारी बहुत तारीफ़ करते हैं। तेरे छोटे मालक को मार दीआ गिआ है। बड़े मालक और बीबी को बुरी तरहां पीटा गिआ है। सच्च बताओ किआ हूआ? तुम किस किस को जानते हो?”

“बता रहा हूं साहिब!” कंबदा नौकर देखी घटना दा वेरवा देण लग्गा।

आपणे कमरे विच्च बैठा रामू टी.वी.देख रिहा सी। कोठी दा गेट टप्प के अंदर आउंदे इक्क चोर तों गेट हिल्ल गिआ। खड़का सुण के रामू कमरे विचों छत्त ’ते आइआ। छत्त ’ते खहड़ के गेट वल्ल झाती मारी। उस समें तक अंदर आ चुक्के चोर नें कोठी दा गेट खोल्ह दित्ता सी। उस दे तिंन चार साथी कोठी अंदर प्रवेश कर चुक्के सन। उनहां दीआं कालीआं वरदीआं अते डराउणीआं शकलां देख के रामू डर गिआ सी। डरिआ सहिमिआ उह आपणे कमरे विच्च आ गिआ।

टी.वी.बंद करके सौण दा यतन करन लग्गा।

कुझ्झ देर बाअद कोठी अंदर चीक चिहाड़ा पै गिआ। की हो गिआ? इह देखण लई रामू दबवें पैरीं पौड़ीआं विच्च खड़ो के लाबी वल्ल देखण लग्गा। उस समें इक्क चोर कमल दे ढिड्ड विच्च छुरा खोभ रिहा सी। किसे पासिउं नीलम अते नेहा दे रोण दी आवाज़ आ रही सी। रामू नें जदों गहु नाल तक्किआ तां उथे उनहां दे देश दा ठेकेदार राम लुभाइआ वी खहड़ा सी। ठेकेदार नें तां भावें काले कप्पड़े पाए होए सन, पर रामू नें उसनूं पहिचाण लिआ सी।

राम लुभाइआ बड़ा ख़तरनाक आदमी सी। जे उसने रामू नूं खहड़ा देख लिआ तां उसने रामू नूं मार देणा सी। डरदा उह आपणे कमरे विच्च मुड़ आइआ सी।

हिंमत बटोर के कुझ्झ देर बाअद जदों उसने फेर लाबी वल्ल तक्किआ तां सारी लाबी ख़ून नाल लत्थ पत्थ होई पई सी। कमल मर चुक्का सी। बाकी दे मैंबर सहिक रहे सन।

मालकां दी इह हालत देख के उह होर घबरा गिआ। आपणे कमरे विच्च आ के उसने टी.वी.चला लिआ अते सौण दा यतन करन लग्गा।

इक्क दोशी दी शनाखत हो जाण ’ते कपतान नें कुझ्झ राहत महिसूस कीती।

राम लुभाइआ कौण है? कपतान दा मन उसदा पिछोकड़ जानण लई काहला पैण लग्गा।

उह रामू दे ज़िल्हे दा रहिण वाला सी। रामू दे जनम तों पहिलां दा माइआ नगर आ के वस्सिआ होइआ सी। आपणे देश दे बहुत बंदिआं नूं उह इधर लै के आइआ सी। जिहड़े उसदी ईन विच्च रहिंदे सन, उनहां नूं उह मौज कराउंदा सी। जिहड़े बागी होण दा यतन करदे सन उनहां ’ते उह कुटापा चाहड़दा सी। पुलिस नाल मिलके झूठे मुकद्दमिआं विच्च फसा दिंदा सी। उसदे देश विच्च इह गल्ल फैली होई सी कि राम लुभाए नें कई जिऊंदे मज़दूरां नूं कारखानिआं दीआं भठ्ठीआं विच्च साड़िआ सी। डरदा कोई उस अग्गे साह नहीं सी कढ्ढदा।

ठेकेदार दीआं इह कहाणीआं रामू नूं उसदे चाचे नें सुणाईआं सन। होली ‘ते रामू जदों छुट्टी लै के आपणे चाचे कोल जांदा सी तां उसदी बसती विच्च रहिंदा सी। राम लुभाइआ रामू दे चाचे नूं पंजाब लै के आइआ सी। इस लई चाचा उसदा अहिसानमंद सी।

“शाबाश बेटा! तूंने बड़ा नेक काम कीआ है?” उपरों कपतान नें रामू दी पिठ्ठ थापड़ी। मन ही मन उस नें आपणी लिआकत नाल गुत्थी सुलझा लई सी।

“वकील साहिब आपणे बुल्ल्ह सीती रख्खणा। किधरे बणी खेड विगाड़ नां देणा।” जांदा कपतान राम नाथ दा मूंह बंनह गिआ।

रसते विच्च कपतान नूं भुलेखा पैण लग्गा। रामू नूं राम लुभाइआ पछानण विच्च टपला नां लग्गा होवे। डरदा किधरे उह झूठ नां बोल गिआ होवे।

जिंना चिर राम लुभाइआ हत्थ नहीं सी आउंदा ओना चिर रामू दी गल्ल ‘ते इतबार नहीं सी कीता जा सकदा।

रामू नूं राम लुभाइआ दी बसती दा पता नहीं सी। चाचा कित्थे है? उसदे पते ठिकाणे दा वी उस नूं पता नहीं सी।

ठेकेदार दे फड़े जाण तक रामू दी सुरख्खिआ ज़रूरी सी। रामू अते कपतान दी मिलणी दी सूह वी बाहर नहीं सी निकलणी चाहीदी।

सोच समझ के कपतान नें अगला कदम पुध्धटिआ।

दफ़तर पुज्जदिआं ही उसने खुफ़ीआ विभाग दे दो सिपाही सादे कप्पड़िआं विच्च वेद दी कोठी पहुंचा दित्ते।

घंटा कु उनहां नें कोठी रहिणा सी। फेर नौकर नूं रिकशे विच्च बैठा के कपतान दी दस्सी थां उपर लिजाणा सी।

 

-9-

 

पच्ची लख्ख दी अबादी वाले इस माइआ नगर विच्च परवासीआं दी गिणती छे तों सत्त लख्ख विचकार अंदी जांदी सी। इनहां विचों पंज लख्ख परवासी इकल्ले बिहार अते उत्तर प्रदेश तों आ के वस्से सन। शहिर दे बाहर हर पासे इनहां परवासीआं दीआं कालोनीआं सन। फोकल पुआइंट वाली दिशा मिंनी बिहार जापदी सी। इनहां कालोनीआं दे दुकानदार वी भईए सन अते मुहल्लिआं दे प्रधान वी। कुझ्झ हिंमती अते पहिलां आए भईए मज़दूरी छड्ड के ठेकेदार बणे बैठे सन।

राम लुभाइआ वरगे सैंकड़े ठेकेदार इस नगर विच्च वस्सदे सन। कपतान किस राम लुभाए नूं फड़े?

कपतान नें माइआ नगर दी खुफ़ीआ शाख़ा नूं ‘रैड अलरट’ जारी कीता।

रामू दे चाचे दा खुरा खोजिआ जावे। जिथे मिले उस नूं चुक्क लिआ जावे। उस तों राम लुभाइआ दा थां ठिकाणा उगला के कपतान नूं सूचित कीता जावे।

ठीक इतलाह देण वाले नूं नकद इनाम अते तरक्की दित्ती जावेगी।

हनेरा पैण तों पहिलां पहिलां खुफ़ीआ विभाग नें पूरी जाणकारी हासल कर लई। राम लुभाइआ दे हुण तक दे कारनामिआं दी पूरी जाणकारी कपतान अग्गे पेश कीती गई।

राम लुभाइआ वीह साल पहिलां पंजाब आइआ सी। उसदे पिंड दा इक्क मिसतरी उस नूं इधर लै के आइआ सी। पंजाब विच्च ओनहीं दिनीं मिसतरीआं दी दिहाड़ी असमान छोंहदी सी। उसताद मिसतरी नें राम लुभाए तों पहिलां मज़दूरी करवाई अते साल विच्च मिसतरीपुणा सिखा दित्ता।

राम लुभाइआ सरीर दा हट्टा कट्टा सी अते दिमाग़ दा तेज़। अठ्ठ दी थां बारां घंटे कंम करके उह दुगणे पैसे कमाउण लग्गा। दो साल बाअद पिंड जा के आपणे चाचे दे दो मुंडिआं नूं इधर लै आइआ। उसताद नूं छड्ड के आपणी टीम बणा लई। साल विच्च उह मिसतरी बण गए। राम लुभाइआ पिंड तों होर बंदे लै आइआ। छे सत्त साल विच्च उस दा बड़ा वड्डा जुगाड़ खहड़ा हो गिआ।

उसताद तों पहिलां इक्क कोठी दे पलस्सतर दा ठेका लिआ। ठेकेदारी दी समझ आई तां पूरी कोठी दी उसारी दा ठेका लै लिआ। चार पैसे बणे तां तिंन तिंन चार चार कोठीआं इकठ्ठीआं फड़नीआं शुरू कर दित्तीआं।

मोटर साईकल सिख्ख लिआ। पहिलां पुराणा मोटर साईकल लिआ फेर नवां खरीद लिआ। पिंडों बाल बच्चे लै आइआ। पतनी कोठीआं विच्च सफ़ाई करके कमाई विच्च वाधा करन लग्गी।

पहिलां मकान किराए ’ते लिआ। फेर छोटा जिहा बणिआ बणाइआ घर ख़रीद लिआ।

चार पैसे वाधू होए तां उसने दो सौ गज़ दा इक्क पलाट खेतां विच्च ख़रीद लिआ। पुराणा मलबा लिआ के चार कमरे खहड़े कर लए। कमरिआं विच्च भईए भर लए।

इस विहड़े नें उसनूं डाढा फ़ाइदा पहुंचाइआ। लेबर हत्थ हेठ रहिण लग्गी। कराइआ आउण लग्गा। वड्डे मुंडे नूं उसने करिआने दी दुकान खोल्ह दित्ती। गेड़ा कढ्ढ के मज़दूरां दी सारी कमाई उसे दे बोझे पैण लग्गी।

होर तरक्की करके उह कोठीआं दी थां फैकटरीआं दी उसारी करन लग्गा।

सनअतकारां नाल वाह पिआ तां उसनूं फैकटरीआं विच्च मज़दूर भरती कराउण दा वल्ल आ गिआ। उसारी दी ठेकेदारी दे नाल नाल उह फैकटरीआं नूं लेबर सपलाई करन लग्गा।

नाल दा पलाट लै के होर कमरे उसार लए। दो तिंन सौ मज़दूरां दी कालोनी उसदी रिआसत बण गई। इस कालोनी दे बहुते वसनीक उस नें बिहार तों लिआंदे सन। उनहां नूं उसने कंम सिखाइआ सी अते फेर कंम ’ते लाइआ सी।

उह आपणी बदली किसमत दा सिहरा राम लुभाइआ सिर बंनहदे सन। उस दे इशारे ’ते जान देण तक जांदे सन।

वोटां वेले राम लुभाइआ दी कीमत कई गुणां वध जांदी सी। सारीआं राजसी पारटीआं उसदे अग्गे पिछ्छे फिरदीआं सन।

कांगरस वालिआं नें उस नूं आपणा सरगरम मैंबर बणा लिआ। कालोनी दा प्रधान थाप के उसनूं आपणीआं विशेश मीटिंगां विच्च बुलाउण लग्गे।

माइआ नगर विच्च होण वालीआं रैलीआं दा उस नूं इंचारज बणा दित्ता।

बस्सां, टरक्क, कारां अते दारू उसदी परची ’ते उपलबध होण लग्गे।

लड़ण झगड़ण अते छोटे मोटे जुरम करन दी पैदाइशी आदत इधर आए भईआ विच्च वी सी। आए दिन पुलिस उसदी कालोनी विच्च चक्कर मारदी सी।

लै दे करके उह आपणी कालोनी दे बंदिआं नूं छुडा दिंदा। पुलिस उस दी कदर करन लग्गी। पुलिस उसदी सिफारश ’ते फुल्ल चहड़ाउण लग्गी।

फैकटरीआं दे मालक अते मज़दूर राम लुभाइआ नूं गुंडा समझदे सन।

राम लुभाइआ आपणे आप नूं गुंडा नहीं सी समझदा। छोटीआं मोटीआं लड़ाईआं झगड़े, मारकुटाई अते चोरी यारी उनहां दी बरादरी दा खासा सी । शहिर दे पक्के बशिंदिआं नाल उसने कदे पंगा नहीं सी लिआ। उसदे आपणे देश वासीआं दा की सी( मिट्टी दे डलिआं वरगे सन। जदों मरज़ी कट्ट लओ । सवेर नूं आ के पैर फड़ लैंदे सन। जच उह छोटा मोटा लीडर सी तां आपणी बरादरी दा सी।

उसदी बसती विच चोरीआं, खोहां करन वाले कुझ भईए वी रहिंदे सन।

राम लुभाइआ नूं उनहां दीआं कारवाईआं दा पता तां सी पर उह कदे उनहां दा हिस्सेदार नहीं सी बणिआ।

मुजरमाना वारदात करन दा इह उस दा पहिला मौका सी।

इह वाका उस नें आपणे भतीजे पंडित दीआं गल्लां विच आ के कीता सी।

नशे दी लत्त नें पंडित नूं भैड़ी संगत विच पा दित्ता सी। नशा खरीदण लई पहिलां उसने छोटीआं मोटीआं चोरीआं कीतीआं। चोरीआं विच मिली कामयाबी तों उतशाहित हो के उह रात बराते सड़कां ‘ते खड़ो के खोहां करन लग्गा। इक दो वार फड़िआ गिआ। ठेकेदार दा नां लै के छुट्टदा रिहा। पिछले कुझ अरसे तों उसने बटूए खोहण अते चैनीआं झपटण दा कंम फड़िआ होइआ सी। शहिर विच दहिशत फैली होई सी। पुलिस नूं चिंता लग्गी होई सी।

राम लुभाइआ नूं उसदे इस कारनामे दा पता उस समें लग्गा जदों गुंडा सटाफ़ वाले उस नूं चुक्क के लै गए। उसने कई वारदातां मंनीआं अते कई सुनिआरे फड़ाए।

चार महीने दी कैद कट्ट के उह हुणे बाहर आइआ सी। सुधरन दी थां जेल्ह जा के विगड़ गिआ सी। पेशेवर मुजरमां नाल उसदा संबंध हो गिआ सी।

जेल्ह बैठे किसे उसताद नें उस लई इस सुपारी दा प्रबंध कीता सी। राम लुभाइआ नूं इस ठेके दा कोई पता नहीं सी लगणा जे मालिक किसे ठोस विचोले दी मंग नां करदे। उनहां नें इस कंम दा इक लख्ख रुपइआ देणा सी।

इंनी रकम किसे चोर उचक्के नूं नहीं सी दित्ती जा सकदी। पैसे उनहां नें किसे भरोसेयोग बंदे नूं देणे सन। इक शरत उनहां दी होर सी। उनहां नें मुलज़मां नूं नां आपणी शकल दिखाउणी सी नां नां पता दस्सणा सी। इह जाणकारी केवल विचोले कोल होणी चाहीदी सी।

भतीजे दे कारनामिआं तों चाचा अते चाचे दी टोक टकाई तों भतीजा दुखी सी। भतीजे नें चाचे नाल वाअदा कीता। उसनूं चोखी रकम मिलण वाली सी। रकम लै के उसने बंबे वाली गड्डी चहड़ जाणा सी। मुड़ उसने माइआ नगर वल्ल मूंह नहीं सी करना।

चाचा कई दिन सोचदा रिहा। फाइदे नुकसान विचारदा रिहा। ठेकेदार नूं इक्क फ़ाइदा इह होणा सी कि उसदा नित्त दे कलेश तों खहिड़ा छुट्ट जाणा सी।

दूसरा फ़ाइदा भतीजे दा होणा सी। शाइद उह सुधर जावे। इक्क वार जे उह सुख्ख सांद नाल शहिरों बाहर निकल गिआ तां मुड़ के पुलिस नूं उसदा सुराग़ नहीं सी लभ्भणा। हज़ारां नवें मज़दूर इथे आउंदे सन अते हज़ारां जांदे सन। किसे दा पक्का ठिकाणा नहीं सी। जिथे कंम मिल गिआ उहो उसदा देश। इक्क वार घर छड्ड के गए मज़दूर दा थां ठिकाणा सके संबंधीआं नूं पता नहीं चल्लदा। पुलिस नूं किथों पता लग्गणा सी। अजिहे बथेरे भईआं बारे ठेकेदार नूं पता सी, जिहड़े लुट्टां खोहां करके अते कुड़ीआं भजा के देश मुड़ गए सन। पुलिस नें कदे उनहां दे पिंडां वल्ल मूंह नहीं सी कीता। इथे डंडा खड़का के मुड़ जाइआ करदे सन। कुझ्झ देर लटक के मामला रफ़ा दफ़ा हो जांदा सी।

हां करन तों पहिलां ठेकेदार नें पंडित नूं शिव दवाले लिजा के सहुं चुकाई। मुड़ के नां उह कोई जुरम करेगा अते नां मुड़ माइआ नगर वल्ल मूंह करेगा।

पक्के पैरीं हो के ठेकेदार नें मालकां नाल गल्ल कीती।

मालकां नें कीते जाण वाले जुरमां अते उस बदले दित्ती जाण वाली रकम दा वेरवा दित्ता। मुलज़मां नूं इक्क लख्ख रुपिआ मिहनताना अते पंज हज़ार रुपिआ वारदात समें वरते जाण वाले समान नूं खरीदण लई मिलणा सी।

फेर चाचे भतीजे नें आपस विच्च शरतां तैअ कीतीआं।

बाकी दे साथीआं दा प्रबंध भतीजे नें करना सी।

भतीजे दे दो साथीआं नूं सुपारी वाली रकम विचों वीह वीह हज़ार मिलणा सी। कोठी विचों मिलण वाली नकदी अते सोने विचों तीजा हिस्सा। बाकी बचदे सठ्ठ हज़ार विचों तीह चाचे दा अते तीह भतीजे दा। लुट्ट दे बाकी बचे समान विचों अध्धा चाचे दा अते अध्धा भतीजे दा।

असल योजना तहित ठेकेदार दा कंम मालकां अते मुलज़मां विचकार कड़ी बनणा सी। नां उसदे मौके वाली थां ’ते जाणा सी, नां वारदात विच्च हिस्सा लैणा सी।

ठेकेदार दी माइआ नगर विच्च चंगी सरदारी सी। हुण उह इस शहिर दा बाशिंदा बण गिआ सी। बच्चे सकूल पहड़न पै गए सन। घर, पलाट, मोटर साईकल अते फ़ोन सभ सहूलतां उस कोल सन। पिछ्छे पिंड उह चौधरी अते शाहूकार अखवाउण लग्गा सी। कोलिआं दी दलाली तों उसने की लैणा सी।

पर भतीजे दे ज़ोर देण ’ते जदों उस नें वारदात वाली कोठी दा जाइज़ा लिआ तां उसदे मूंह विच्च पाणी आ गिआ। कोठी चंगे सेठ दी सी। चंगा माल हत्थ लग्गण दी संभावना सी। जुरम बहुते संगीन नहीं सन कीते जाणे। घर दे मैंबरां नूं थोहड़ी कुट्ट चाहड़नी सी। कुड़ी दी बेइज़ती करनी सी।

ठेकेदार बहुत अजिहे भईआं नूं जाणदा सी जिहड़े काले कछ्छिआं वाले बण के लुट्टां खोहां करदे सन। सौ चों मसां पंज चार फड़े जांदे सन। बाकी केस रफ़ा दफ़ा हो जांदे सन।

डोलदे मन नाल चाचे नें भतीजे दी इह ज़िद्द वी पुगा दित्ती।

आख़री वकत तक ठेकेदार दा कोठी अंदर जाण दा कोई इरादा नहीं सी। उसने बाहर रहि के ख़तरिआं नूं भांपना सी अते लोड़ पैण ’ते अंदरलिआं नूं सूचित करना सी।

उसदा दूसरा कंम वारदात तों बाअद माल अते बंदिआं नूं सही थां पुज्जदे करना सी।

राम लुभाइआ नूं हथिआर, बैग, दसताने, काले कप्पड़े अते कालीआं ऐनकां खरीदण लई पंज हज़ार रुपए मिले सन। कप्पड़े वारदात बाअद साड़ दित्ते जाणे सन। फेर नवें किउं खरीदे जाण? उसने कबाड़ी दी दुकान तों पुराणे कप्पड़े खरीद लए। चाकू, छुटे खरीदण दी ज़रूरत नहीं सी। किसे दा कतल थोहड़ा करना सी। भंन तोड़ लई दो लोहे दे राड बथेरे सन। राड अते बैग उह मालकां दी फैकटरीउं चुक्क लिआइआ। पंज हज़ार विचों पंज सौ खरच होइआ। पंताली सौ बच गिआ। इस शुभ महूरत ’ते राम लुभाइआ डाढा खुश होइआ सी।

भतीजे दे साथीआं नूं मिल के चाचे दे पैरां हेठों ज़मीन खिसकण लग्गी।

इह ते खूंखार मुलज़म सन। आउणा दो नें सी, आए तिंन सन। इक्क छोटी उमर दा सी। कहिंदे उह नवां चेला मुंनिआ सी। पहिली वार कंम ’ते आइआ सी।

ठेकेदार दा मत्था ठणकिआ। भतीजा आपणे उसताद दी चाल विच्च फस गिआ सी। भतीजे नें उनहां नूं नाल नहीं सी रलाइआ। उनहां नें भतीजे नूं नाल रलाइआ सी। सुपारी दीआं शरतां मुताबक घर वालिआं नूं मामूली सट्टां मारीआं जाणीआं सन। पर पंडित दे साथी कतल दी तिआरी करके आए सन।

उनहां कोल दो हत्थ लंबे छुरे अते तेज़धार चाकू सन। पलास, पेचकस अते होर निक सुक तों इलावा उनहां कोल सेफ़ अते अलमारीआं दे जिंदे खोल्हण वाली मासटर की वी सी।

राम लुभाइआ दा मन उसनूं लाहनतां पाउण लग्गा। उसनूं लग्गा उह अते उसदा भतीजा किसे गहिरी साज़श दा शिकार हो गए हन। हत्थकड़ीआं लग्गण ही वालीआं सन। पर हुण पिछ्छे वी नहीं सी हटिआ जा सकदा।

मजबूरी वस्स उसनूं वी कोठी दी कंध टप्पणी पै गई।

अंदर उहो होइआ जिसदा राम लुभाइआ नूं डर सी।

अलमारी दीआं चाबीआं देण तों थोहड़ी जिही नांह नुकर करन उपर ही पंडित नें मालकण दे सिर विच्च राड जड़ दित्ती। उह भुआटणी खा के ज़मीन ‘ते डिग्ग पई।

घरवाली दी दुरदशा देख के जदों मालक सभ कुझ्झ हवाले करन लई सहिमत हो गिआ सी फेर उस दीआं टंगां बाहां तोड़न दी की ज़रूरत सी?

समान लुट्टण दी थां दीना कुड़ी दे बैडरूम विच्च घुस गिआ। छोटे कप्पड़िआं विच्च अध्धनंगी पई कुड़ी देख के उसदा मन मचल गिआ। उह उस उपर कुत्तिआं वांग झप्पट पिआ।

भैण दा चीक चिहाड़ा सुण के भरा दी अख्ख खुल्ल्ह गई। उह कुड़ी दे बैडरूम विच्च जा के दीने नूं धूहण लग्गा।

पंचम नें उस नूं घड़ीस के लाबी विच्च लै आंदा। ठेकेदार दे रोकदे रोकदे छुरा उसदे ढिड्ड विच्च खोभ दित्ता।

राम लुभाइआ उनहां दीआं मिंनतां करदा रिहा। पहिलां मालकां नूं नाल लै के सोना चांदी लै लवो। किसे नें उसदी इक्क नां सुणी। लगदा सी उनहां नूं पैसे धेले विच्च घट्ट अते कुट्टमार विच्च ज़िआदा दिलचसपी सी।

जदों सारे मैंबर बेहोश हो गए तां बहुत कुझ्झ पल्ले वी नां पिआ। जो जिस दे हत्थ आइआ लै के दौड़ पिआ।

कालीए नें इक्क रंगदार टी.वी.चादर विच्च लपेट लिआ। दीने नें टेपरिकारडर अते वी.सी.आर.समेट लिआ। पंडित नें इक्क अलमारी विच्च पईआं साहड़ीआं, सूट अते होर निक्क सुक्क नूं इकठ्ठा कीता अते गठड़ी विच्च बंनह लिआ। कुझ्झ नकदी अते गहिणे राम लुभाइआ दे हत्थ लग गए।

आपणे हिस्से दा समान लै के पंडित दे साथी मौके वाली थां तों ही आपणे राह पै गए। पंडित आपणे कुआटर चला गिआ।

सारा दिन राम लुभाइआ आपणे घर छुपिआ रिहा। कदे उस नूं ग्रिफ़तार होण दा डर लगदा। कदे हत्थ लग्गे माल नूं देख के खुशी हुंदी।

ठेकेदार सोच रिहा सी। भतीजे दे साथी मौके ’ते ही छाईं माईं हो गए सन। भतीजा कदों दा बंबे वाली गड्डी चहड़ चुक्का होणा है। राम लुभाइआ दा नां किस नें लैणा है?

डर अते खुशी दी खिचोताण विच्च फसिआ राम लुभाइआ सवेर तों अंगरेज़ी शराब पी रिहा सी। उह शराब गम गलत करन लई पी रिहा सी जां खुशी मनाउण लई, इसदी सूह सूहीआं नूं नहीं सी मिल सकी।

सादे कप्पड़िआं विच्च खुफ़ीआ विभाग दे करमचारीआं नें उसदे घर नूं घेरा पाइआ होइआ सी। उनहां नूं पुलिस कपतान दे अगले हुकमां दी उडीक सी।

खुफ़ीआ विभाग दी कारगुज़ारी ’ते कपतान दा मन गदगद हो गिआ।

मन ही मन खुफ़ीआ विभाग दे जवानां नूं सलूट मारके कपतान नें उनहां दे कंम दी शलाघा कीती।

“हुण उडीक किसदी है? तुरंत कारवाई करो।”

खुशी च झूमदे कपतान नें जवानां नूं हुकम सुणाइआ।

इक्क ताड़ना वी कीती। राम लुभाइआ दी ग्रिफ़तारी दा असल कारन गुपत रख्खिआ जावे।