घर वाले सारे अज्ज हौले फुल अनुभव कर रहे सन। विंकी मंगी गई सी।

मंगे जाण तों पहिलां घर उते कुड़ी नें इक छां जिही कीती होई सी। उस वेले इस तरहां लगदा सी कि इह छावां कदी नहीं हटदीआं। विंकी दे नकश ते भावें तिख्खे सन पर उस दा रंग कुझ पक्का जिहा सी ते मुंडे गोरा रंग मंगदे सन। इस पक्के रंग दी कदी किसे खुल्ह के गल्ल ते नहीं कीती सी, पर मुंडे उहनां दे हत्थों इस तरहां तिलक जांदे जिवें सजरीआं फड़ीआं मछ्छीआं। उहनां दे फबा के गल्ल करन तों पहिलां ही, पता नहीं किस तरहां मुंडिआं नूं सारी गल्ल दा पता लग जांदा। कईआं नें विंकी नूं वेखिआ हुंदा, कईआं नें उस दे रंग बारे सुण लिआ हुंदा ते फिर कोई होर बहाना पा के उहनां तों कंनी छुडा जांदे।

हुण ते उह किधरे गल्ल टोरदे वी डरन लग पए सन, किउंकि गल्ल कदी टुरदी ही नहीं सी। विंकी दी मां पहिले वेलिआं नूं याद करदी जदों उह आप काले रंग दी हुंदिआं होइआं वी सोहणे थां विआही गई सी। ‘‘अज्ज कल्ह दे मुंडे की नें-चुमिआर। बस चंम परखदे नें।’’ उह मुंडिआं दी रंग वेखण दी चाह बारे आखदी, पर इस गल्ल नाल एवें थोहड़ा जिहा कलेजा ठंडा हुंदा। कोई इस कटाखश तों डर के रंग परखणा छड नहीं दिंदा सी।

पर अज ते इह सभ कुझ ख़तम हो गिआ सी। कुड़ी मंगी गई सी।

पहिलां मुंडे दे पिओ नाल गल्ल होई सी। उह इह सुण के बड़ा ही प्रसंन होइआ सी कि कुड़ी दा पिता गज़टिड अफ़सर है, सारी उमर सकूल विच पहड़ाण पिछ्छों वी उह गज़टिड अफ़सर नहीं बण सकिआ सी। उस दा मुंडा तनख़ाह भावें ढाई सौ रुपए लैंदा सी पर उह है केवल असिसटैंट ही सी, अफ़सर नहीं से। जे गज़टिड दे घर विआहिआ जाए तां की माड़ा सी?

मुंडे नूं मनाणा इंना सौखा नहीं सी, भावें उस दा आपणा रंग वी काला सी ते शकल कुझ इंनी सोहणी नहीं सी, पर इह गल्ल उस दे आपणे जां किसे दे विचार विच कदी नहीं आई सी। कुड़ी ते उह इस तरहां दी चाहुंदा सी, जिहड़ी शिमले विच नाल टुरदी सोहणी लगे। सौहरा वी उह अफ़सर ही चाहुंदा सी। ते इह गल्ल हुण तक आए साकां विचों किसे विच नहीं सी, इस लई उह विंकी वाले साक नूं सुट नहीं पाणा चाहुंदा सी। इक दिन छुट्टी लै के उह उहनां दे शहिर गिआ ते चोरी चोरी उहनां दे मकान दवाले कई चक्कर लाए। उस नें उहनां दा घर वेखिआ, रहिणी सहिणी वेखी, बणी फब्बी, कालज पहड़ी युवती विंकी वी सोहणी लगदी सी, ते फिर आपणे घर आ के उस नें हां कर दिती।

इस साक कराण विच मेरा वी कुझ हत्थ सी। मुंडे दा पिओ मेरा जाणू सी ते मैं उस नूं जा के मिलिआ सां। उस नें आपणे सारे शंके मेरे कोलों ही नविरत कीते सन। कुड़ी किंनी कु चतुर सी, इमतिहानां विच किंने कु नंबर लैंदी सी? इहो जिहीआं गल्लां उह मेरे कोलों पुछ्छदा रिहा। सकूल मासटर होण कर के उहनूं कुझ इस तरहां दा माण सी कि बुधी नूं उह छटांकीआं तोले पा के तोल सकदा है। उस दा इह विचार सी कि जिंनी चतुर मां होवे ओनी चतुर अगों औलाद हुंदी है। विआह किस तरहां दा होवेगा? अज्ज कल्ल्ह बहुत बोदे विआहां दा रवाज चल पिआ सी। इह उस नूं पसंद नहीं सी, कुड़ी दे होर भैण भरा किथे विआहे होए नें? उहनां दे किंने किंने ते की की बच्चे हैन? इहनां सारीआं गल्लां बारे मैं उस दी तसल्ली करा दिती सी।

‘‘इह सारा कंम ते तुसां सिरे चाहड़िआ ए। असीं ते किंने चिर दे लगे ही होए सां, कुझ वी नहीं सी बणदा।’’ मेरे मित्तर दी सूझवान पतनी नें आपणा करज़ा लाहिआ।

‘‘धी पुत्तर दे आपणे संजोग हुंदे नें भाबी जी, इहदे विच करना कराणा की ए किसे नें।’’ मैं आपणा हिस्सा घटांदिआं होइआं किहा। उंज मैं बड़ा ख़ुश सां कि मैं उहनां दोहां दे फ़िकरां नूं मुका देण विच सहाई होइआ सां।

इस सारे चाअ रौले विच पता नहीं होर किसे दा धिआन विंकी वल गिआ कि नहीं पर मैनूं उह ख़ुश नहीं दिसदी सी। आम जुआन कुड़ीआं मापिआं दे घरीं डाढीआं अक्कीआं पईआं हुंदीआं नें ते विआह दीआं सोआं ते बड़ीआं ख़ुश हुंदीआं नें, पर विंकी नूं कोई चाअ नहीं सी।

‘‘नी कुड़ीए पसंद ए इह सिलसिला तैनूं कि नहीं?’’ मैं उस नूं रवाजी जिही पुछ्छिआ। मैं उस तों किसे जवाब दी उमीद नहीं करदा सां। असल विच मैं उस दे भावां नूं इस सवाल नाल छेड़ के उस दे मूड तों इस दा प्रतीकरम पहड़ना चाहुंदा सां। मैनूं कुझ डर जिहा लगा जदों मैं वेखिआ कि उस दे मूंह ते कोई लिशक नहीं आई सी।

‘‘मैं नहीं विआह कराउणा।’’ उस नें ठंडा जिहा पर द्रिहड़ जवाब दिता। मेरी घबराहट होर वी वध गई। पर इह सोच के मैं गल्ल ठप्प दिती कि होर भला की कहिंदी है।

उस दे पिता जी उमर विच भावें मैथों कुझ वडे सन पर मेरे बड़े गूहड़े मित्तर हन। मेरा उहनां दे घर रोज़ दा आउण जाण सी। बड़ी वेर विआह दी गल्ल वी होई। अजे तरीक मिथी जाणी सी ते इह कंम वी मेरे ज़ुंमे ही लगा। पहिलां असां अस्सू कत्ते दा कोई दिन किहा। इह उहनां नूं मनज़ूर नहीं सी। मुंडे दी भूआ दे लड़के शिमले अंगरेज़ी सकूल विच पहड़दे सन। इस लई मुंडे चाहुंदे सन कि विआह पोह माघ दा, जदों उहनां नूं छुट्टीआं होणीआं सन, रखिआ जावे। उहो जिही रुत्त विच साडे लई जंञ दा इंतज़ाम करना औखा सी। इस तरहां अगांह पैंदा पैंदा विआह विसाख ते जा पिआ ते इह महीना पक्का हो गिआ।

विआह पक्का होण ते नेड़े आउण नाल विंकी दा रवई्ईआ वधेरे निख्खर आइआ। पहिले जिथे उह साडे कीते होए इस विआह वलों अनगहिल जिही सी, हुण उह इस तों डरन लग पई सी। विआह दी गल्ल हर दूजे चौथे हुंदी रहिंदी। कुड़ीआं ही उस नूं छेड़न लई गल्ल छोह बहिंदीआं। पर जदों वी इह गल्ल आउंदी उह घबरा जांदी। उस दीआं अख्खां अड्डीआं जांदीआं ते उह सोचां विच पै जांदी। लोकां दीआं गल्लां विच घिरी होई उह आपणे आप नूं बे-आसरा समझदी। बहुती वेर विआह दी गल्ल छिड़न ते उह गुटका लै के पाठ करन लग जांदी ते किंना किंना चिर बैठी पाठ करदी रहिंदी। हौली हौली उस नूं अनुभव होइआ कि इस तरहां बिल्ली नूं वेख के अख्खां मीटिआं कबूतर दा छुटकारा नहीं। इस दा कुझ उपराला करना चाहीदा है। इस उपराले लई वी उस मैनूं ही चुणिआ।

इक दिन मैनूं आपणे कोल इकल्लिआं बैठा वेख के उस मैनूं काबू कर लिआ।

‘‘चाचा जी! तुसां मेरा विआह एडी छेती किउं रख दिता?’’

‘‘छेती ही रखणा सी पुत्तर उह मंगदे जू छेती सन।’’

‘‘तुसीं उहनां नूं कहिणा सी कि उस विआह नहीं कराणा।’’

इह गल्ल मेरे ’ते कोठे तों घड़ा डिगण वांग पई। इस वेले उस नूं किसे विखाले जां झूठी शरम दी लोड़ नहीं सी। उह दिलों बोल रही सी।

‘‘फिर मंगणी किउं कराई?’’ मैनूं मुंडे दे घर वालिआं नाल कीते आपणे बचनां दा वी ख़िआल सी।

‘‘मंगणी वी ते तुसीं ही कीती सी, मैं कदों किहा सी?’’

‘‘अछ्छा इह दस्स कि विआह उक्का ही नहीं कराणा, जां एथे नहीं कराणा?’’ हुण जदों इह नड़ा उधड़न ही लगा सी तां मैं सोचिआ, चलो सारा ही उधड़ लवे। सारी गल्ल दा पता लगे तां अगों ठीक चल सकीए।

‘‘विआह ते कराणा एं पर एथे नहीं कराणा।’’

‘‘इहो जिहा साक नहीं लभ्भणा फिर।’’ उहनूं ते मैनूं दोहां नूं पेश आईआं औकड़ां दा पता सी।

‘‘लभे नां लभे, तुसीं एथों खलासी करा दिओ।’’

इह गल्ल उस नें कुझ इस तरहां दे तरले नाल कही कि मैनूं उस दे नाल होणा ही पिआ।

‘‘एथों खलासी करा के तूं किथे विआह कराणा एं। जे चंगी थां होवे तां ही मैं तेरे नाल हो सकना वां नां!’’

भावें विंकी नें अज्ज गल्ल इक पासे लाण दा फ़ैसला कीता होइआ सी, इस सवाल दा जवाब देणा उस दे लई वी कुझ औखा सी। उह चुप्प हो गई पर उस दीआं अख्खां तों इह जापदा सी कि उस दे ढिड विच अजे करन लई होर गल्लां हैन। झट कु पिछों उह उठी ते अंदरों टैलीफ़ोन दी डाइरैकटरी फड़ लिआई। शहिर दे इक वकील दा टैलीफ़ोन नंबर कढ्ढ के उस उंगली चुकी तां मैं समझ गिआ। उस वकील दा इक मुंडा सदीप इंजीनीअरिंग कालज विच पहड़दा सी।

‘‘इह मुंडा तिआर ए तेरे नाल विआह कराण नूं?’’

उस बिना मूंहों बोले माण नाल हां विच सिर हिलाइआ।

‘‘ते वकील साहिब नूं पता ए इस गल्ल दा?’’

आख़िर मुंडे दे विआह लई मुंडे दे पिओ दी मनज़ूरी वी ते चाहीदी सी नां।

‘‘पता नहीं पापा जी नूं पता ए कि नहीं। मैनूं जिथे मिलदे नें मैं उनहां नूं सति स्री अकाल कहि देनी आं।’’

उह मुंडा आपणे पिता नूं पापा जी कहिंदा सी ते इस तरहां विंकी दा वी उह पापा जी ही लगण लग्ग पिआ सी। उह ते बिलकुल ओथे आपणा घर बणाई बैठी सी। मैं मंन गिआ कि उहनूं ओथों पुटणा बड़ा ज़ुलम होवेगा।

पर केवल मेरे मंनण नाल इह गल्ल सिरे नहीं चहड़ जांदी सी, जे उह मुंडा विआह कराण नूं तिआर वी सी तां वी अजे विंकी दे पिता जी ते वकील साहिब विचकार सन। इस लई बहुती आस दवाण नालों मैं घट आस दवाणी चंगी समझी।

‘‘इह तुहाडा कंम मुशकल ही बणेगा।’’

‘‘मुशकल बणेगा?’’ विंकी नें भरे होए गले विचों इह दो शबद पूरे कीते। उह सारा ज़ोर ला के रोणा डक्क रही सी।

‘‘हां!’’ सिध्धीआं गल्लां दा जवाब मैं सिध्धा ही देणा चाहुंदा सां।

दो तिंन वार उस दे बुल्ल्ह ते नासां कंबीआं। फिर दो कु हजोके उस दी छाती नें खाधे ते फिर उस दा सारा सरीर कंबण लग पिआ। उह बेवस मंजी ते लेट गई ते वडे वडे हौके भरन लग पई।

कुझ चिर मगरों असीं उस मुंडे दीआं गल्लां कर रहे सां। उस नूं चुप्प कराण दा इहो इक तरीका सी।

‘‘बई कमाल दी गल्ल ए, चाचा जी!’’ उह कहि रही सी, ‘‘सानूं इक दूजे नूं मिलणा ज़रा औखा नहीं, जदों मैं घरों उस नूं मिलण दा ख़िआल कर के टुरां ता उह ज़रूर मिल पैंदा ए। भावें ऐथे ही सड़क ते मिल पवे, भावें अगले चौंक विच जां फिर बाग़ दे नेड़े। चिठ्ठी नां लिखी होवे, सुनेहा नां घलिआ होवे, वकत नां मिथिआ होवे, उह ज़रूर मिल पैंदा ए। बस, मिलण दा ख़िआल होवे सही, ते जे नां ख़िआल होवे तां फिर कदी नहीं मिलदा। जदों मिलीए तां बहुती वेर ते असीं चुप्प कर के आपणे राह लंघ जांदे हां। कोई गल्ल नहीं करदे – गल्लां ते टैलीफ़ोन ते बथेरीआं कर लईदीआं नें। बस्स नंबर घुमाओ ; जे उह इकल्ला होवे तां कहेगा मैं सुदीप बोलदा वां, जे कोल कोई होवे तां फिर कहेगा मैं सिधू बोलदा वां। जे कोई होर बोले तां मैं टैलीफ़ोन ही बंद कर दिंदी हां।’’

उस नूं इस तरहां रील वांग उधड़दी वेख के मैनूं विशवास हो गिआ कि उस लई होर किधरे दिल जमाणा संभव नहीं होवेगा। इस पिआर दा रंग उस उते बहुत ही गूहड़ा सी।

आख़र मैं उस दे पिता नाल गल्ल कीती। उह बड़े खुल्हे दिल दे आदमी सन। मेरी उमीद तों उलट उनहां नां ते इस गल्ल दा बुरा मणाइआ ते नां ही इस नूं इज़्ज़त दा सवाल बणाइआ। उनहां एना ही किहा कि इक पासिओं गल्ल पक्की होए बिनां दूजे पासिउं तोड़नी सिआणप नहीं होवेगी। किंनी मुशकल नाल अगे साक लभ्भा है। कुड़ीआं लई साक किधरे रड़े ते नहीं पए होए। पहिलां इधरों गल्ल पक्की करन दा कोई सिलसिला बणाओ। इह पक्क वी विसाख तों पहिलां ही हो जाए तां ई, किउंकि विसाख नूं ते विआह रखिआ होइआ ए। जे ओदों तक कुझ नां बणिआ तां उथे ही विआह करना पवेगा।

इह गल्लां मैं विंकी नूं कहीआं। मुंडा ते विंकी नाल विआह कराण नूं बहुत काहला सी पर उस दे घर वालिआं तीकर अजे इह गल्ल नहीं अपड़ी सी। पिता दी मरज़ी तों बिनां मंगणी दे की अरथ? ते अजे पहड़दे ते घरों पैसे लैंदे होण करके सुदीप आपणे पिता नाल इह गल्ल वी नहीं कर सकदा सी, इस तरहां फसिआ होइआ महिसूस कर के ही उस नें विंकी नूं किहा सी कि तूं आपणे घर वालिआं नाल गल्ल कर दे।

विंकी नें हुण मेरे नाल गल्ल कर वी दिती सी पर इस नाल गल्ल कुझ अगांह नहीं टुरी सी। मंग ते मुंडे वालिआं वलों होणी चाहीदी सी, इस लई मैं विंकी नूं किहा कि उह सुदीप नूं आपणे वलों गल्ल टोरन लई पक्की करे, पर होइआ कुझ वी नां।

हुण फग्गण दा महीना चहड़ पिआ सी। विंकी दे विआह दी गल्ल घर विच आम सी ते इस ते टब्बर विच खुल्ही विचार हो सकदी सी। विआह दी तिआरी लई थोड़े ही दिन रहि गए सन। इस लई इह ज़रूरी सी कि किसे पासे फ़ैसला हो जाए। जदों मैं उनहां दे घर जांदा इह गल्ल टुर पैंदी। विंकी नूं सदा मैनूं वेख के बड़ा चाअ चहड़दा। उह मैनूं बाहरली दुनीआं लई आपणा इक वफ़ादार राजदूत समझदी सी।

अज्ज उस नें वड्डे वड्डे फुल्लां वाली कमीज़ पाई होई सी ते पहिले नालों बहुत धिआन खिच रही सी। इस तरहां लगदा सी जिवें आले दुआले दी सुंदरता इकठ्ठी हो के उस विचों प्रकाशमान हो रही होवे, जिस तरहां नेड़े दा पाणी इकठ्ठा हो के धरती विचों चशमा बण के फुट निकलदा है। असीं सारे इकठ्ठे हो के बैठ गए ते विंकी दी गुंझल खोल्हण दा राह लभ्भण लगे। राह सारिआं नूं इको ही सुझदा सी कि सुदीप दे घर वाले साथों आ के विंकी दा साक मंगण। आख़र जे मुंडे दा पिता अज्ज नहीं मंनदा सी तां कल दा वी की पता सी, जदों असीं नां इधर जोगे रहीए नां ओधर जोगे।

मैनूं इक करारी जिही गल्ल सुझी। विंकी झूठ मूठ सुदीप नूं कहे कि उह पंदरां दिनां तक आपणे घर वालिआं दी हां करा देवे, नहीं तां विंकी आपणे पहिले मंगेतर नाल ही विआह करवा लवेगी। इह दाबा मारन विच विंकी दा ही फ़ाइदा सी, किउं कि इस तरहां सुदीप नाल उस दा विआह छेती पक्का हो जाणा सी ते उह दूजे विआह तों बच सकदी सी। इह गल्ल सारिआं दे बहुत मन लगी। इको वार पूरा दबा पाण नाल गल्ल सिध्धी हो जाएगी। इस विच सारीआं धिरां दा फ़ाइदा सी। असीं सारे विंकी दे मूंह वल्ल वेखण लग पए कि एनी सुहणी तजवीज़ बारे उह की कहिंदी है।

उहनूं जवाब देण विच इक पल वी नां लगा। ‘‘जिहड़ी गल्ल मैं असल विच करनी नहीं, उह मैं कहि किवें सकदी हां।’’

हैरानी विच असीं सारे चतुर दुनीआदार विंकी दे मूंह वल वेखण लग पए। साडे ते उस दे सोचण दे पध्धर वखो वखरे सन।

(राहीं: चरन गिल्ल)