(देश-वंड दे दरद ते आम लोकां दी आपसी सांझ दा बिआन करदा इक बिरतांत होर हाज़र है। इह दो वार दे एशीअन जेतू ते 16 वार दे विशव वैटरन जेतू पहिलवान ते मेरे गिराईं करतार दी मेरे वल्लों लिखी जीवनी 'कुशती दा धरू तारा' दा इक अधिआइ है। इस पुसतक दी तीजी ऐडीशन संगम पबलीकेशनज़ समाणा वल्लों छापी गई है। - वरिआम सिंघ संधू)

**********

आपणे ही जिसम नूं विचकारों चीर के बणे वाघिओं पारले पंजाब नाल साडी लहू अते रूह दी सांझ है। साडे वरगे भावुक लोकां दे मनां विच सांझ दा इह अहिसास जिंना डूंघा है, ओनी ही उस खित्ते दे थावां अते लोकां नूं मिलण ते जानण दी रीझ गूहड़ी है। अध्धा कट्टिआ धड़ किसे चुंबकी खिच्च सदका कट्टे होए बाकी अध्धे धड़ नाल मिलण लई विलकदा रहिंदा है। इहो विलकणी किधरे धुर अंदर बैठी होण करके जदों वी कोई ओधरले पंजाब दी गल्ल करदा है; उथों हो के आउण तों पिछ्छो आपणे अनुभव सुणाउंदा जां लिखदा है तां मेरी उस विच पहिली दिलचसपी हुंदी है। कहे गए शबदां दी उंगल फड़ के मैं कदी लाहौर दीआं गलीआं बज़ारां विच घुंम रिहा हुंदा हां, कदी ननकाणे दे उहनां खेतां विच, जिथे बाल नानक दे कदमां दी पद-चाप अजे वी सुणाई दिंदी है। मेरी छाती दुआले कस्सी होई बारडर दी पट्टी कुझ ढिल्ली हो जांदी है ते मैं खुल्ही हवा विच डूंघा साह भर के डाढी सौख महिसूस करदा हां।

करतार सिंघ दा जनम 1947 तों पिछ्छो होइआ होण करके उस नूं सांझे पंजाब दे हिंदू-सिख्ख-मुसलिम भाईचारे दीआं आपसी रांगलीआं सांझां दा उह डूंघा अनुभव नहीं; जो 47 तों पहिलां पैदा होए जां पछ्छमी पंजाब विचों आए लोकां दा है। उसनूं तां आपणे बचपन अते चहड़दी जुआनी विच पाकिसतान नाल लड़ीआं गईआं 1965 अते 1971 दीआं ख़ूंख़ार लड़ाईआं दा वधेरे चेता है।

सरहद्द तों तिंन चार मील दी वित्थ उपर सथित पिंड सुर सिंघ दे लोकां नें, इनहां भारत-पाकि जंगां विच वध्ध चहड़ के भारती फ़ौजां दी मद्दद कीती। बाबा सोहण सिंघ बिधीचंदीए आपणे सिंघां नाल, जिनहां विच कई वार लछमण सिंघ अते करनैल सिंघ वी शामल हुंदे, धुर अगले मोरचिआं तक्क फ़ौजां लई दुध्ध, दहीं, मख्खण अते प्रशादे पहुंचाउंदे रहे। इंज ईचोगिल नहिर तक्क पुज्जे फ़ौजीआं नूं आतमिक बल वी मिलदा। भख़े होए माहौल विच देश-भगती दा जज़बा कुझ वधेरे तीख़ण रूप विच उभर आउंदा है। इनहां जंगां नें पुराणे बंदिआं दे मनां विच वसदे मुहब्बत अते सांझ दे अहिसास नूं वी धुंदला कर दित्ता सी।

दोहां जंगां दे समें ही तोपां दे गोलिआं दी गड़गड़ाहट सुर सिंघ दीआं कंधां नूं हिला दिंदी रही। जंगी जहाज़ पलां विच ही टिड्डी दल वांग सुर सिंघ दी छत्त उतों गुज़रदे; इक दूजे दा पिछ्छा करदे होए, घूकरां छड्डदे होए, धरती कंबाउंदे होए। करतार हुरीं वी कोठिआं दीआं छत्तां 'ते चहड़ के 'औह मार लिआ ई' दा रौला पाउंदे। इक दिन इक पाकिसतानी हवाई जहाज़ वार वार सुर सिंघ उपरों चक्कर कढ्ढदा होइआ कदी ऐन नींवा हो जावे अते कदी फिर उच्चा निकल जावे। धड़कदे दिलां नाल लोक वेखण लग्गे। 'हुणे डिग्गा बंब सुर सिंघ दे सिर 'ते'। पर इस समें वी लोक लुके नहीं- छत्तां 'ते चहड़े जहाज़ दीआं कलाबाज़ीआं वेखदे रहे। तद ही जहाज़ नें 'डाईव' मारी- ते औह सड़क उपर जा रहीआं भारती गड्डीआं विचला बारूद भड़ाका मार के ठाह-ठाह करके मच्च उठ्ठिआ।

उधरों जहाज़ बंब सुट्ट के दौड़िआ अते इधरों सुरसिंघीए पैदल अते साइकलां उपर सड़दीआं गड्डीआं नूं वेखण लई दौड़ उठ्ठे। सकूल पहड़दा करतार घरदिआं दे रोकदिआं रोकदिआं उधर दौड़ पिआ। सुरसिंघीआं दी चमड़ी विच तां जिवें ख़ौफ़ ही नहीं सी कोई। भारती फ़ौजां दी बरकी उपर चहड़ाई करतार हुरां नूं हुलारा दिंदी सी अते छेती ही लाहौर नूं मार लैण दा ख़िआल उनहां नूं खेड़ जांदा सी।

1971 विच होई भारत-पाकिसतान जंग विच सरहद्दी पिंड छीना बिधी चंद उपर पाकिसतान नें कबज़ा कर लिआ। छीनिआं तों उरले पासे सुर सिंघ दी ज़मीन जा लगदी है। इसे पासे ही करतार हुरां दे खेत हन। लड़ाई सुर सिंघ दीआं कंधां तक्क आ गई सी। भावें लड़ाई दा बहुता ज़ोर पूरबी पाकिसतान अथवा बणन वाले 'बंगला देश' वल्ल सी ते पंजाब दे मुहाज़ उत्ते 'यथासथिती' बणाई रख्खणा ही दोहां धिरां नें मिथिआ होइआ सी पर छीना बिधी चंद पाकिसतान दे कबज़े हेठां आ जाण कर के सुर सिंघ तोपां दी मार विच आ गिआ सी। इक दिन इक गोला सुर सिंघ उतों दी लंघ के बस्स अड्डे दे नज़दीक डिग्गा- पर फट नां सकिआ। लोकां नें इसनूं पिंड उत्ते 'गुरू महाराज' दी मिहर समझिआ।

अगले दिन फेर इक गोला गूंजदा होइआ आइआ, पर इह पिंड दे सिर उपरों नहीं लंघिआ - सगों पिंड दे विचकार संघणी वसों वाले घरां विच डिग्गा। इस गोले दे फटण दी आवाज़ वी नहीं आई। लोक उस दिशा वल्ल दौड़े - जिधर गोला डिग्गा सी। इह इको इक गोला सी जो दो जंगां विचों सुर सिंघ दे सिर उप्पर डिग्गा सी।

जिस घर विच गोला डिग्गा सी, उत्थे लोकां दी भीड़ इकठ्ठी हो गई सी। इह तां करतार हुरां दा घर सी। माकोवाल दी कच्ची मिट्टी नाल लिंबे पोचे घर दे चौंतरे दे आलिआं विच इह गोला फसिआ पिआ सी। बेवस होइआ कुझ वी नां कर सकण जोगा। इह गोला वी फट नहीं सी सकिआ।

बाबा लछमण सिंघ अते करनैल सिंघ इकठ्ठी होई भीड़ दे विचारां नाल संमती प्रगट करदे होए; 'महांपुरखां दी सुर सिंघ उप्पर मिहर' नूं इस बचाओ दा कारन मंन रहे सन।

अजिहे पिछोकड़ दे बावजूद जदों 1981 दी दूजी एशीआई कुशती चैंपीअनशिप लई करतार हुरां नें लाहौर नूं चाले पाए तां वी उहनां दे मन विच लाहौर नूं वेखण अते उत्थों दे लोकां नूं जानण समझण दी रीझ करवटां लैण लग्गी। आख़िर इह लाहौर शहिर कदी उहनां दे आपणे पिंड दा ज़िल्हा होइआ करदा सी। इह उह शानां-मत्ता लाहौर सी - जिस बारे करतार आपणे बचपन विच बज़ुरगां तों सुणदा आइआ सी।

''जिसने लाहौर नहीं वेखिआ उह जंमिआ ही नहीं''

लाहौर पंजाबी लोक चेतना विच एना डूंघा लत्थ चुक्का सी कि कई वार वड्डी उमर दे बंदे आपणे किसे हाणी नूं मख़ौल करदिआं, किसे खेड रहे छोटे बच्चे नूं आवाज़ मार के आखदे, ''चल ओए बिट्टू! अग्गों झग्गा चुक्क के आह आपणे चाचे नूं लाहौर विखा दे..''

लाहौर विखे कुशतीआं लड़न अते लाहौर वेखण नालों वी इक होर डूंघी तलब सी करतार दे मन विच। पंजाबी किस्सा-कावि अते लोक-कहाणीआं विच पहिली नज़र दी मुहब्बत दा ज़िकर वार वार होइआ है। पर कई कहाणीआं अजिहीआं वी हन जिनहां विच इक दूजे नूं बिनहां वेखिआं, इक दूजे दीआं गल्लां सुणदिआं ही मुहब्बत भरे दिल इक दूजे नूं मिलण दी तांघ लई अंगड़ाईआं भरदे रहिंदे सन। अजिही मुहब्बत दा रिशता आम तौर उत्ते बहादर ते सोहणे नौजुआन अते सोहणी मुटिआर दरमिआन हुंदा सी।

करतार दे संबंध विच वी गल्ल तां कुझ इस तरहां दी ही सी। उह वी लाहौर विच रहिंदे आपणे अणदेखे सज्जण नूं मिलण लई काहला सी पर उह सज्जण कोई ख़ूबसूरत मुटिआर नहीं सी। उह तां लाहौर शहिर दा प्रसिध्ध टरांसपोरटर अते भलवान सी। जिसनूं लोक 'वही भलवान' आख के बुलाउंदे सन। करतार दा इक दोसत बलबीर भलवान इंगलैंड विच रहिंदा सी। उत्थे ही उसदा 'वही भलवान' नाल मेल होइआ । 'वही भलवान' नूं वेखदिआं ही बलबीर हैरान हो गिआ। उह तां निरहा-पुरा करतार सी। उस तरहां ही सोहणा सूतरिआ मन मोंहदा जानदार सरीर। ओना ही उच्चा लंमा कद्द-बुत्त। उंज ही इक दूजे नाल मिलदा जुलदा चिहरा अते नैण-नकश। बिलकुल करतार दी कारबन कापी।

''तुसीं तां भलवान जी - निरहे करतार लग्गदे ओ.. समूलचे ही..हद्द हो गई..'' बलबीर नें वही भलवान नूं किहा।

''हला'' भलवानी दा शौक रख्खण वाला वही करतार नूं उसदे नां अते प्रापतीआं तों तां चंगी तरहां जाणदा ही सी, पर कदी मिलिआ नहीं सी उसनूं।

''मैं किहा ऐन फोटो कापी जे तुसीं इक दूजे दी.. जिवें सक्के भरा होवो... इको मां दे जंमे जाए।''

वही नूं लग्गा; करतार सच्चीं मुच्ची उसदा भरा सी जो किधरे बचपन विच्च उस तों वख्ख हो गिआ सी। बिलकुल हिंदी फिलमां दी कहाणी वांग। उह दिल दीआं धुर - डुंघाणां तों करतार नूं वेखण ते मिलण लई लोचण लग्गा। उसने बलबीर कोलों करतार दा पता अते फ़ोन नंबर लै लिआ।

जदों वही भलवान नाल आपणे मिलाप दी गल्ल बलबीर नें करतार नूं दस्सी ते इह वी दस्सिआ कि वही करतार नूं मिलण लई बड़ा उतावला है तां कुदरती ही करतार दे मन अंदर वी वही लई दिलचसपी जाग पई।

ते फिर दोहां नें आपस विच टैलीफ़ोन 'ते संपरक कर लिआ। इक दूजे नूं पुछ्छिआ, जाणिआ। इक दूजे दे फ़ोन आउंदे जांदे रहिंदे... पिआर ते सांझ दे रंग होर गूहड़े हुंदे गए। पर कदी मिल बैठण दा सबब्ब अजे तक्क नहीं सी बणिआ।

ते हुण तां लाहौर ही कुशतीआं होणीआं सन। वही दा फ़ोन आइआ:

''वीर मेरिआ! तूं इक वार आ सही लाहौर.. सारा शहिर लाहौर बाहवां खोल्ह के तेरे इसतकबाल लई खलोता होऊ..''

जाण तों पहिलां सारी भारती कुशती टीम नें गोल बाग़ अंम्रितसर विच इकठ्ठे होण दा प्रोगराम बणाइआ। पूरा टोला आपणे समान समेत रेल गड्डी 'ते सवार होइआ अते छुक छुक करदी गड्डी छिहरटा, खासा, लाहौरी मल्ल, घरिंडा, काउंके लंघदी होई अटारी बारडर 'ते जा पहुंची। पिछ्छों कुझ ही मिंटां 'च उह वाघे जा पहुंचे। 'नो मैनज़ लैंड' दे परले दरवाज़े दी बुरजी नाल पाकिसतान दा चंद वाला सबज़-झंडा लहिरा रिहा सी। उरले पासे गेट नाल तिरंगा फराटे भरदा पिआ सी। दोहीं पासीं छे छे फुट्टे जुआन बड़ी मुसतहिदी नाल खड़ोड़े सन। दोहां फाटकां दरमिआन थोहड़ी कु थां सी जिहड़ी किसे दी वी नहीं सी। इह थां जिहड़ी 'किसे दी वी नहीं सी' इसने दोहां देशां विचले मित्तर पिआरिआं नूं विछोड़ रख्खिआ सी। इह वाकिआ ही 'किसे दी वी नहीं सी बणी।'

भलवान हैरान सन कि इको धरती, इको जिहे लोक, इको जिहीआं फ़सलां, इको जिहे रुख्ख-बूटे पर विच हिक्क ताण के खलोती इह वाघे दी लकीर; जिसनूं मनुख्ख, बिनां दोहां देशां दी आगिआ दे उलंघ नहीं सी सकदा। भलवान नें वेखिआ इक घुग्गीआं दा जोड़ा उपरों उड्डदा होइआ आइआ ते इधरले रुख्खां 'ते आ के बैठ गिआ। औह तिरंगे वाले पोल तों इक मासूम जिही चिड़ी उड्डी अते सबज़ झंडे वाले पोल ते बैठ के 'चीं चीं' करन लग्गी।

हद्द पार करन लई रसमीं कारवाई तों विहले हो के जदों भलवान नो मैनज़ लैंड उप्पर पहुंचे तां पहिलवान जगमिंदर नें 'चीं चीं' करदी चिड़ी वल्ल वेखिआ, जिहड़ी जदों चाहे देशां दीआं हद्दां नूं पार करन दी समरत्था रख्खदी सी। चिड़ी दा चैलिंज कबूल करदिआं ही जगमिंदर नें आपणीआं लत्तां चौड़ीआं करके पसार लईआं उस विचली चिट्टी लकीर दे आर-पार अते जेतू अंदाज़ विच मुसकराइआ।

''लओ मैं इस वेले दोहां देशां विच खड़ोता 'जे..''

अग्गे गए तां प्रबंधकां नें भलवानां नूं लैण लई बस्स भेजी होई सी। सड़क दे इक पासे गड्डी लाई पठाणी सलवार कमीज़ विच फब्ब फब्ब पैंदा 'वही भलवान' खड़ोता सी। करतार नें वेखदिआं ही पछाण लिआ। नज़रां नाल मुसकराउंदीआं नज़रां मिलीआं तां 'वही' नें भलवानां दी भीड़ विचों करतार दा गोरा मुख आपणे दिल विच बैठे करतार नाल मिला के वेख लिआ।

दूजे पल दोवें जणें इक दूजे दी गलवक्कड़ी विच घुट्टे होए सन। सालां तों विछड़े भरा जिवें मिल पए होण। इह कैसी मुहब्बत सी! जिवें उमरां दी आपसी जाण-पछाण होवे।

''भा करतार सिअहां! साडीआं तां 'डीक' डीक अख्खां पक्क गईआं नें..'' वही दे बोलां 'चों मोह वहि रिहा सी।

उसने करतार नूं आपणी गड्डी विच बिठाइआ। इक दो होर भलवान नाल बिठाए अते लाहौर नूं चल्ल पिआ। बाकी टोला प्रबंधकां दी बस्स राहीं निशचित निवास असथान ते पहुंचा दित्ता। पर वही करतार हुरां नूं आपणे डेरे लै गिआ। कदी खाण लई सुक्के मेवे आउण ते कदी भुज्जिआ होइआ कबाब, कदी पीण लई जूस आवे ते कदी सूप। उह करतार हुरां नूं आपणे तनों मनों रजा देणा चाहुंदा सी। रज्जे होए भलवान हत्थ खड़े कर रहे सन पर वही नूं अजे वी रज्ज नहीं सी आउंदा। उहने भलवानां नूं गड्डी विच बिठाइआ ते लाहौर दा कोना कोना विखाउण लग्गा। 10 वजे तों लै के शाम तक्क वही उहनां नूं लै के उडिआ फिरदा रिहा। आख़िर उह अगले दिन मिलण दा वाअदा करके उहनां नूं उस होटल विच छड्ड गिआ, जित्थे सारी टीम ठहिरी होई सी अते जित्थे रात रहिणा उहनां लई लाज़मी सी।

अगले दिन चैंपीअनशिप शुरू हो रही सी। करतार इस तों पहिलां वी पाकिसतान जा आइआ सी। ओदों पाकिसतान वल्लों मुहंमद अली जिनाह दे नां उपर 'काइदे-आज़म अंतर राशटरी रैसलिंग टूरनामैंट' करवाइआ गिआ सी। इस टूरनामैंट विच करतार, जगमिंदर, अशोक कुमार, ईशवर लाल, राजिंदर चांद ते जगदीश कुमार नें भाग लिआ सी। करतार दा नां पहिलां ही पाकिसतान विच प्रसिध्ध हो चुक्का सी। उसने पिछले समें विच भारत ते पाकिसतान विचों किसे वी भलवान नाल घुलण दा चैलिंज कीता होइआ सी। इस लई कराची विच होए इस मुकाबले विच करतार सभ दीआं नज़रां दा धुरा सी। इत्थे करतार नें कर वी कमाल दित्ती सी। करतार दा आपणे वज़न विच दो इराकी अते इक पाकिसतानी भलवान नाल मुकाबला होइआ। करतार नें तिंनहां ही भलवानां नूं खंघण नां दित्ता अते वारी वारी सभ नूं पहिले ही राऊंड विच चित्त कर दित्ता। सारे पाकिसतान विच करतार दीआं धुंमां पै गईआं। ओदों करतार दे नाल जगमिंदर अते अशोक नें वी सोने दे तमग़े जित्ते।

हुण पाकिसतानी दरशकां दीआं नज़रां करतार उत्ते टिकीआं होईआं सन। करतार दी पहिली कुशती जपानी भलवान नाल होई अते करतार नें थोहड़े ही समें विच पंज अंक हासल कर लए। जपानी नें लाल घेरे तों बाहर दो वार ढाक मारी ते तिंन तिंन अंक हासल कर लए। करतार नूं लग्गा कि नेमां मुताबक लाल घेरे तों बाहर ढाक मारन दे इह ठीक अंक नहीं मिले। पर रैफ़रीआं दा फ़ैसला सिर मत्थे! करतार नें खिड़े मत्थे इसनूं प्रवान कर लिआ अते 6-5 नाल आपणी हार तसलीम कर लई। रऊं रऊं करना उसनूं चंगा नहीं सी लग्गदा। करतार दी दूसरी कुशती इंडोनेशीआ दे भलवान नाल होई। जपानी नाल होई कुशती दी हार नें उहदा अंदर ताइआ होइआ सी। अजे लोक कुशती वेखण लई धौणां ही सिध्धीआं कर रहे सन कि करतार नें विरोधी भलवान नूं ढाक मारके हेठां सुट्ट लिआ अते पंदरां सकिंटां दे अंदर-अंदर 'अली-अली' करदा मैट उप्पर जेतू हो के बुहड़कण लग्गा।

अगले दिन करतार दा मुकाबला पाकिसतानी भलवान नाल सी। लाहौर दे दरशकां दे इस मुकाबले नूं वेखण लई चित्त काहले पए होए सन। जपानी नाल ज़ोरदार कुशती कारन करतार दा जिसम आकड़िआ पिआ सी।

''करतार! मैं तेरा इलाज करदां। तूं फ़िकर नां कर।'' वही भलवान नें आखिआ।

उसने विशेश प्रकार दा तेल मंगवाइआ। करतार नें पहिलां इह तेल नहीं सी वेखिआ।

''काहदा तेल ऐ इह?''

''इह जैतून दा तेल है। लिआ मैं तेरी इहदे नाल मालिश करदा हां। इह बड़ा गरम हुंदै। सरीर नूं फुल्ल वांग कर दऊ..''

उह कप्पड़े लाह के करतार दी मालिश करन लग्गा। ''धप्प!धप्प!'' उह तलीआं नाल मालिश कर रिहा सी अते करतार दा सरीर खुल्ल्हणा शुरू हो गिआ सी। जदों करतार दी तसल्ली हो गई तां उसने तेल वाले हत्थ साफ़ करदिआं आपणी रीझ प्रगटाई:

''साडे भरा नूं फ़तिह नसीब होएगी.. इनशा अल्ला..''

दूजे पासे पाकिसतानी भलवान सी हम-मजहब अते हम-देश पर वही भलवान दा 'भरा' करतार ही सी।

कुशती समें लाहौरीए जिवें सटेडीअम वल्ल धाह के आ पए होण। दोवें पंजाबी भलवान सन... पर वख्ख-वख्ख देशां दे। करतार वी उहनां लई ओपरा नहीं सी। उह वी उहनां नूं आपणा ख़ून ही लग्गदा सी। पहिलां तां पाकिसतानी दरशक पाकिसतानी भलवान नूं हल्लाशेरी दे रहे सन पर जदों करतार उस उत्ते हट हट के वार करन लग्गा अते इक तों बाद इक अंक बटोरन लग्गा तां दरशकां नें उसनूं हौंसला देणा शुरू कर दित्ता। 'वही भलवान' दी आवाज़ सभ तों उच्ची सुणींदी सी। पाकिसतानी भलवान मसां इक अंक ही प्रापत कर सकिआ। जद कि करतार नें 12 अंक हासल कर लए सन। इंज करतार वड्डी जित्त हासल करके मैट तों उतरिआ।

उतरदिआं ही उस दुआले लोकां दी भीड़ इकठ्ठी हो गई। इक्क पाकिसतानी भलवान नें पुछ्छिआ,

''भलवान जी! कदी पट्टी गए ओ?''

करतार हस्स पिआ।

''पट्टी तां साडी तसील ऐ.. जांदे ई रहीदा.. किउं की गल्ल ऐ..?''

''मेरी जंमण-भों ऐ पट्टी.. किंज दी लग्गदी ऐ पट्टी? भलवान जी किधरे पट्टी विखा दिओ नां... तुहाडा मुरीद बण जावां।... पट्टी.. आसलां दी जट्टी... जिन शहिर वसाइआ पट्टी.. कदी पट्टी दे बज़ार विचों दी लंघे ओ... वाह नी मेरी पट्टीए... किहो जिही है हुण साडी पट्टी साडे वड्डे वडेरिआं दा सोहणा शहिर !...'' ढलदी उमर दे भलवान दीआं अख्खां 'च पाणी सिंम आइआ सी। उहदा गच्च भर गिआ सी। उस तों अग्गे बोलिआ नां जा सकिआ।

लाहौर विच घुंमदिआं ते लोकां नूं मिलदिआं करतार नूं बड़े ही सुखावें अनुभव होए। वख्ख वख्ख लोक अग्गे हो हो के उसनूं मिलदे रहे। जदों लोकां नूं पता लग्गा कि करतार दा ज़िल्हा अंम्रितसर ते पिंड सुर सिंघ है तां आसे पासे दे पिंडां तों उजड़ के आए लोक उसनूं मिलण लग्गे। आपणे पुराणे वतन अते पिंडां दीआं यादां सांझीआं करन लग्गे। सुर सिंघ तों उठ्ठ के गिआ इक बज़ुरग मुसलमान करतार नूं जफ्फी पा के मिलिआ ते फिर उहदे सिर 'ते पुत्तां वांग पिआर दे के पुछ्छण लग्गा,

''आपणे पिंड लहीआं दी पत्ती दा सोहण सूंह सी.. इक करनैल सौंह.. माणा की पत्ती दा कुंनण सुंह कालीआ हुंदा सी... भाई गुरचरन सिहुं हुंदा सी बाबिआं 'चों इक.. बड़ा आला डमाक सी उहदा... की हाल ऐ उहनां मेरे भरावां दा... ते बलवंत सुंह ज़ैलदार... बड़ी तूती बोलदी सी उहदे नां दी उदों... मासटर लाल सुंह जोशी दी सुणा.. किवें ऐं हुण?...''

उह सारे दा सारा पिंड ते उत्थों दे लोक इको वारी आपणे गल नाल ला लैणा चाहुंदा सी।

करतार पुछ्छे गए बंदिआं बारे बणदी सरदी जाणकारी दे रिहा सी। बज़ुरग बोली जा रिहा सी।

''सुर सुंह पिंड दे कोई लेखे सी जट्टा। आपणा शीरी भलवान हुंदा सी सुरसिंघीआ। सारे पहारे विच उहदे नां दा झंडा झुलदा सी। सुर सिंघ दीआं उह उच्चीआं घाटीआं.... विंग वलेवें खांदीआं गलीआं... जित्थे असीं अध्धी रात तक्क लुकण मीटी खेडदे रहिंदे सां...''

बज़ुरग मुसलमान करतार दीआं अख्खां विचों दिसदे सुर सिंघ नूं नज़रां ही नज़रां राहीं आपणे अंदर उलद्द लैणा चाहुंदा सी। गल्लां करदे करदे दा उहदा गच्च भर आइआ।

''हाइ! इह लीडरां दीआं करतूतां... इक लीक नाल चीर के रख्ख ता भरावां नूं अड्ड अड्ड करके... अज्ज वी रात नूं सुफ़ना आवे तां सुर सुंह दे खेतां बंनिआं 'ते तुरिआं फिरीदा.. पर साडी किसमत 'च कित्थे हुण सुर सिंघ दे दरशन!... मर जावांगे एदां ही आपणी जंमण भों नूं वेखण लई विलकदे होए..''

बज़ुरग दी सज्जी अख्ख 'चों इक हंझू किरिआ 'ते उहदी गल्ल्ह 'ते तिलक आइआ।

''हौंसला कर बाबा!'' वही भलवान नें उहदे मोढे 'ते हत्थ रख्खिआ।

एने नूं इक होर जणा अग्गे वधिआ।

''भलवाना, भिख्खीविंड वी कदी गिऐं ?''

''बड़ी वार, नाल ही तां ऐ। तिंन कु मील दूर..''

''साडा पिंड आ उह...''

''फिर तां तूं साडा मामा होइओं।''

करतार नें आखिआ। उसदे नानके भिख्खीविंड जू हन। सारे हासा पै गिआ।

''भाणजिआ! किधर नानके सी तेरे?''

''केसर सुंह संधू हुरां वळ्ळ.''

''तूं बीबी प्रीतो दा काका एं...''

कमाल हो गई सी। 'मामा भणेवां' गलवक्कड़ी विच कस्से गए सन।

अगला दिन वापसी दा दिन सी। उस दिन सवेर तों ही वही भलवान उहनां नूं आपणी कार विच्च बिठा के घुंमाउंदा फिरिआ... पिआरे शहिर लाहौर विच। उह इस दिन नूं खिच्च के वध्ध तों वध्ध लंमा कर लैणा चाहुंदा सी। पर इह संभव नहीं सी। विछड़न दीआं घड़ीआं नेड़े आ रहीआं सन। उह इक बहुत वड्डी दुकान विच वड़िआ जित्थों उसने करतार दे नांह नांह करदिआं वी दो पठाणी सूट (सलवार ते कमीज़) करतार लई ख़रीदे अते इक सुनहिरी तिल्ले वाली शानदार चप्पल। उह कहिंदा सी जदों करतार इह कप्पड़े पाइआ करेगा तां उसनूं उहदी याद आवेगी।

तुरन दा समां हो गिआ सी।

वही भलवान वाघे तक्क नाल आइआ। जदों उहदी गड्डी तों उतर के करतार नें भारत दी हद्द वल्ल वधण तों पहिलां वही नाल हत्थ मिला के उसनूं गल नाल लाइआ तां दोहां दीआं धाहीं निकल गईआं। उह बच्चिआं वांग विलक विलक के रोण लग्गे। एने वड्ड-आकारी जानदार भलवान, वेखण नूं लोहे दी लठ्ठ वांग मज़बूत। इह उहनां नूं की हो गिआ सी! पर इह तां होणा ही सी। मुहब्बत दे रिशते 'च विछड़न लग्गिआ इंज ही हुंदा है। जदों लोहा वी पाणी बण जांदा है।

इधर आ के जदों करतार उह पठाणी सूट अते तिल्ले वाली सुनहिरी चप्पल पाके बाहर निकलदा तां उहदी फब्ब फब्ब पैंदी दिख वल्ल देख के लोकां अते विशेश करके भलवानां विच अजिहे सूट सुआउण पाउण दा तां इक तरहां फैशन ही चल्ल पिआ सी।

भारत-पाकि संबंधां बारे चरचा करदिआं मैं किते लिखिआ सी कि असीं दोहां धिरां नें इक दूजे दीआं बथेरी वार बाहवां भंन के वेख लईआं हन इस लई आओ! हुण बाहवां इक दूजे दे गले विच्च वी पा के वेखीए।

('कुशती दा धरू-तारा करतार’ विच्चों)