19 अप्रैल 2001 दी सवेर।

लाहौर नालों विछड़ण दा वकत आण पुज्जा। होटल नूं छड्डण दी पूरी तिआरी कर लैण तों पिछ्छों मैं जगतार नूं किहा, ‘‘इक मिंट ठहिरो। मैं लाहौर नूं अलविदा कहि लवां।’’

होटल दी पंजवीं मंज़िल ‘ते सथित आपणे कमरे ‘चों बाहर निकल के मैं टैरस ‘ते आण खड़ोता। सूरज अजे चहड़िआ नहीं सी ते शांत घसमैली रौशनी ‘चों लाहौर शहिर हौली हौली उदै हो रिहा सी। उहो उच्चे नीवें मकान ते इमारतां। मसजिदां दे गुंबद। आसमान ‘च तैरदीआं बद्दलां दीआं निक्कीआं टुकड़ीआं। मैं लाहौर दे आख़री दरशन आपणीआं अख्खां दीआं पुतलीआं ‘च सांभ लैणा चाहुंदा सां। जिवें कोई आपणे महिबूब तों आख़री वार विछड़ण समें उहनूं नज़रां ही नज़रां ‘च डीक ला के पी जाणा चाहुंदा होवे ते उस दे नकशां नूं आपणे चेतिआं विच सथिर कर लैणा चाहुंदा होवे।

‘‘अछ्छा! पिआरे लाहौर! अलविदा! असीं तां तेरे हां पर तूं हुण साडा नहीं।’’ मैं भावुक होए उलार आशक वांग बुड़बुड़ाइआ।

 

‘समझौता ऐकसपै्रस’ चल्लणी तां भावें अठ्ठ वजे सी, पर सटेशन उते सवेरे छे वजे पहंुचण दा ही प्रोगराम सी। कुझ मिंटां विच ही असीं लाहौर दे रेलवे सटेशन दी विशाल इमारत दे साहमणे खहड़े सां। इस वेले बहुती भीड़ नहीं सी। शाइद तुरत किसे गड्डी दे आउण जाण दा समां नहीं सी। इस लई रेलवे सटेशन दी विशाल इमारत वी आराम विच सुसता रही लग्गी।

लाल वरदी वाले कुलीआं दी चहिल-पहिल वधेरे सी। इक कुली नें जदों साडा चार जणिआं दा सामान पलेटफारम तक लै के जाण दे चार सौ रुपै मंगे तां उस दी नाजाइज़ मंग पहिलां तां मिरच वांग ही लड़ी पर असीं तुरत ही तिंन सौ रुपए देणा मंन गए।

दो जणिआं नें साडे चार अटैची ते चार बैग रेहड़ी उते रख्खे ते उहनूं रेहड़ के साडे अग्गे अग्गे तुर पए। साडे सारिआं कोल कुझ नां कुझ पाकिसतानी करंसी बची होई सी। भारत पुज्ज के असीं उहदा की करना सी। चल्लो कुली ख़ुश हो लैण। इहो ही असीं सोचिआ सी।

‘‘रुक उए! किंने पैसे लए नें सरदार होरां तों।’’ इक पुलसीए नें हत्थ विच फड़िआ डंडा अग्गे कीता।

‘‘जी…जी…’’ कुली अजे जवाब दे ही नहीं सी सकिआ कि पुलसीआ सानूं मुख़ातब होइआ, ‘‘किंने पैसे देणे कीते जे सरदार जी!’’

‘‘तिंन सौ।’’

‘‘हया करो उए कुछ! हया करो! किउं लुट्टण ‘ते लक्क बध्धा जे! महिमानां नाल एह सलूक करदे जे! इह की आखणगे उधर जा के तुहाडे बारे…’’ उस नें रेहड़ी नूं बैंत नाल ठकोरिआ।

दोहां कुलीआं कोल कोई जवाब नहीं सी।

‘‘तूं ऐथे खलो जा। इक जणा सामान छड्ड आओ।’’ उस नें दोहां कुलीआं ‘चों इक नूं आपणे कोल रोक लिआ। दूजे पुलसीए नूं कहि के उस नें दोहां कुलीआं दे मोढिआं ‘ते लग्गी नंबर-पट्टी उतरवा लई।

‘‘जाओ सरदार जी! इहनूं पंजाह रुपै तों वध्ध नहीं देणे।…इहनां नूं छड्ड के ऐथे आ जाह उए सिध्धा बंदे दा पुत्त बण के…’’

रेड़ी खिच्च रहे कुली नें पलेटफारम ‘ते पुज्ज के सिर झटकिआ, ‘‘जाओ सरदार जी, दस्सणा काहनूं सी!’’

‘‘सानूं पहिलां समझा लैणा सी।’’

‘‘हुण पता नहीं किंने पैसे लै के कंजर नें जान छड्डणी ए।’ उस नूं साडी सवेरे सवेरे दी बोहणी रास नहीं सी आई।

वाअदे मुताबक असीं उस नूं तिंन सौ रुपै ही दित्ते। उह साडा सामान उतार के नाख़ुश मन नाल वापस मुड़ गिआ। पलेटफ़ारम ‘ते साडे साथी हौली हौली पहुंच रहे सन। उनहां नूं विदा करन आए लाहौरीए इक दूजे नाल बग़लगीर हो रहे सन। राइ अज़ीज़ उला ते इलिआस घुंमण सानूं मिल के होर दोसतां नूं अलविदा कहि रहे सन। आपणी पसंद दा इक ख़ाली डब्बा वेख के असीं उस विच आपणा सामान टिका दित्ता। सानूं वेख के गुरभजन गिल्ल ते सिरसा वाला सुखदेव साडे डब्बे ‘च आ गए। गुरभजन गिल्ल नें बोकना पा के इक पौदे नूं गमले समेत चुक्किआ होइआ सी। उह इस नूं आपणे नाल भारत लिजा रिहा सी।

‘‘असीं कल्ल्ह गौरमिंट कालज लाहौर गए। जांदिआं जांदिआं मैं इक बूटा वेख के माली नूं किहा कि एह बड़ा वख्खरी तरहां दा बूटा है। बहुत वधीआ।‥’’ एना कहि के असीं कालज विच होण वाले समागम ‘च पुज्ज गए। वापस आ के कार विच बैठण लग्गे तां माली गमले विच उही बूटा लाई मैनूं देण वासते खलोता सी।

‘‘सरदार जी! तुहानूं इह चंगा लग्गिआ। इस नूं साडी याद वजों नाल लै जाओ।’’… उस नें आजज़ी विच हत्थ जोड़े होए सन।’’

गुरभजन नें बूटे नूं आराम नाल सुरख्खिअत जगहा ‘ते टिका दित्ता।

किसे आखिआ, ‘‘इक तों दूजे मुलक विच पौदा लै के जाणा वी समगलिंग ‘च शामल हुंदा है।’’

‘‘भाई सिख्खो! इह तां मुहब्बत दा बूटा है। इस नूं सरहद्द पार जाणों कौण रोकेगा।’’

उस दी गल्ल ठीक सी। मुहब्बत दी ख़ुशबू हद्दां दी गुलाम नहीं हुंदी।

‘‘वोह तो ख़ुशबू है हवाओं में बिख़र जाएगा।

मसला फूल का है फूल किधर जाएगा!

पाकिसतानी शाइरा परवीन शाकिर दा शिअर मेरे चेते ‘च बोलिआ।

डब्बे विच इस ख़ुशबू दीआं गल्लां शुरू हो गईआं। हरेक कोल दस्सण वासते कुझ नां कुझ है सी।

‘‘मैं मुशाइरे विच नज़म पहड़ी सी जिस दीआं पहिलीआं सतरां सन,

‘‘सच्च मुच्च यारा! जी नहीं लग्गदा,’’

सुखदेव नें गल्ल शुरू कीती। मुशाइरे तों बाअद इक मुसलमान औरत सुखदेव कोल आई ते कहिण लग्गी ‘तुसीं सच्च आखदे ओ सरदार जी! हुण जी की लग्गणा होइआ!’’

औरत दे हउके वरगे बोल सुण के ते लंमा हउका लै के सुखदेव चुप्प हो गिआ।

मैं बाहर पलेटफारम ‘ते वेखिआ। दलीप कौर टिवाणा, रमा रतन ते सुखविंदर अंम्रित साडे डब्बे कोलों लंघ रहीआं सन। मैं सुखदेव दी गल्ल सुण के मुशाइरे ‘चों बाहर निकल आइआ सां पर सुखविंदर अंम्रित नूं वेख के मैं फिर फ़लैटीज़ दे हाल विच पुज्ज गिआ। सुखविंदर अंम्रित आपणी ग़ज़ल दा पहिला मिसरा बोल रही सी।

‘‘तुसीं सभ फुल्ल चुक्क लैणे, असीं अंगिआर चुक्कांगे।’’

‘‘वाह! वाह!!’’ होई ते ताड़ीआं दी आवाज़ आई। हौसला फहड़ के चाअ विच भिज्ज के अंम्रित नें पूरा शेअर बोलिआ।

‘‘तुसीं सभ फुल्ल चुक्क लैणे, असीं अंगिआर चुक्कांगे’’

आपां मिल मिला के ज़िंदगी दा भार चुक्कांगे।

हाल किंना चिर ताड़ीआं दी गड़गड़ाहट विच गूंजदा रिहा ते फिर हरेक शेअर उते दाद ते ताड़ीआं…। उस नें मुशाइरा लुट्ट लिआ सी। हुण उस दे प्रसंसकां दी भीड़ उस नूं विदा करन आई होई सी।

की असीं दोवें मुलक इक दूजे दे राहां ‘च अंगिआर विछाउण दी थां फुल्ल नहीं विछा सकदे?

‘‘लै जाओ सरदार जी! बहुत कंम दी चीज़ ए…ससते ते लग्गे मुल्ल।’’ सामान वेचण वाले मुंडे नें सामान नाल भरिआ थैला गल विच पाइआ होइआ सी ते हत्थ विच इक छोटी जिही जेबी टेप-रिकारड फड़ी होई सी।

‘‘किंने दी दएंगा?’’ मैं शुगल शुगल विच पुछ्छिआ।

‘‘बारां सौ दी ए, पर तुहानूं अठ्ठ सौ रुपए विच दे दिआंगा।’’

‘‘दो सौ दी देणी ऊ?’’ आख के मैं हस्सिआ। असीं मुल्ल करना सिख लिआ सी।

मुंडा वी हस्सिआ, ‘‘सरदार जी लैण वाली गल्ल करो।’’

मैं उस दे हत्थों टेप-रिकारडर फड़ी ते बटन नप्प दित्ता। नसीबो लाल गा रही सी।

मुंडा कबूतर वरगा फड़िआ

पिआर दा जाणा पा के

‘‘चीज़ तां चंगी ऐं’’ किसे नें किहा। मैं टेप रिकारडर मुंडे दे हत्थ विच फड़ा दित्ती। मैं किहड़ा ख़रीदणी सी।

‘‘तीहां दी टेप, वीहां दे सैल्ल ते मिऊज़िक सुणन लई कंनां नूं लाउण वाला इह’’, उस नें निक्का जिहा वाकमैन विखा के किहा, ‘‘सौ तों उतों तां इहो ई नें।’’

‘‘किसे नहीं लैणी भरा। जाह तूं’’ किसे नें आखिआ पर मुंडा मेरे वल्ल वेखी जा रिहा सी।

‘‘दो सौ दी देणी तां गल्ल कर नहीं तां पैंडा खोटा नां कर।’’

साडी नीअत ताड़ के मुंडा तुर गिआ। उस नूं इनहां तिलां विच तेल नहीं सी जापदा। असीं वी आपणीआं गल्लां करनीआं सन।

गुरभजन गिल्ल ते सुखदेव हुरीं गुरभजन दे जाणू असलम नूं मिलण उस दे घर गए। गुरभजन दे असलम हुरां नाल नज़दीकी सबंध हन। तुरन लग्गे तां घर दी नौकराणी इक बज़ुरग औरत इनहां कोल आई ते मावां वांग सिर पलोस के बोली, ‘‘बड़ा चंगा हुंदा सी अमरीक सिंघ ; सरदार सारे ही बड़े चंगे हुंदे नें।’’ उह धुर अंदरों बोली ते फिर इनहां दे चिहरे ‘चों अमरीक सिंघ दा चिहरा लभ्भदी किंना चिर चुप्प-चाप कोल खलोती रही।

प्रचार माधिअमां राहीं पाकिसतानीआं दे मनां विच हिंदूआं प्रती इक उलार नफ़रत कुट्ट-कुट्ट के भरन दी कोशिश कीती गई जापदी सी। सिख्खां प्रती उलार हेज प्रगटाउणा उथों दी सरकारी नीती दा वी इक हिस्सा है। पैंहठ दी जंग समें नज़ामदीन लाहौर रेडीओ तों आखदा हुंदा सी, ‘‘चौधरी जी, आपां नूं आह अंबाले तक ही माड़ी मोटी औख ए। एथे आपणे सिख्ख भरा नें…, अग्गे दिल्ली तक्क तां आपां डी.डी.टी. ही छिड़की जाणी ए…।’’

पर साडा दोसत मोहन गंडीविंडीआ जदों पैंहठ दी जंग तों पिछों जथे नाल लाहौर गिआ सी तां लाहौर दे बाज़ार विच इक छोटे जिहे मुंडे नें उनहां कोल आ के उच्ची आवाज़ विच आखिआ सी, ‘‘सिख्ख! टके दा इक।’’ पर इह मुसलमान बीबी दे बोलां ‘च सरकार नहीं, उहदा आपणी ही दिल बोलदा सी।

मैं वी कौड़ी हकीकत तों पासा वट्ट के लंघणा चाहुंदा सां। इस कुड़त्तण नूं थुकणा चाहुंदा सां कि अचनचेत मेरे मूंह विच गनेरीआं दा सुआद घुलण लग्गा। रमा, ज़ोइआ, अफ़ज़ल साहिर, गुरभजन ते सुखदेव हुरीं शाह हुसैन दा मज़ार वेखण गए तां ठंडीआं मिठ्ठीआं गनेरीआं वेख के रमा दा जीअ ललचा गिआ। कार रोक के सारे जणे गनेरीआं चूपण लग्गे। कार दे नाल ही इक ख़रबूज़िआं दी रेहड़ी वी लग्गी होई सी। इक जणा आइआ ते पुछ्छण लग्गा, ‘‘सरदार जी, मैनूं वी दस्सो। मैं तुहाडी की ख़िदमत करां। करनी मैं ज़रूर ऐ।’’ उस नें शाइद तुरंत ही मन विच फ़ैसला कर लिआ। कार दा दरवाज़ा खोल्हिआ ते ख़रबूज़िआं दे रेहड़ी दरवाज़े कोल करके ख़रबूज़े कार विच सुट्टण लग्गा। सभ हैरान कि इह की करी जांदा ए। रेहड़ी वाला पुछ्छे, ‘‘की हो गिऐ? कमला हो गिऐं…।’’

‘‘आहो’’ ख़रबूज़े सुट्टण वाला कहि रिहा सी, ‘‘मरदा नां जा उए! तेरी सारी रेहड़ी दे पैसे मैं देऊंगा, साडे भरा आए नें।’’

टेप रिकारड वेचण वाला मुंडा फेर सिर ‘ते आण खड़ोता।

‘‘सरदार जी, लै लओ! पंजाह घट्ट दे दिओ…।’’

‘‘चल्ल तूं पंजाह वध्ध लै लै’’ मैं वी उस वांग ही किहा।

मुंडे नें नांह विच सिर हिलाइआ तां लागे बैठा दिल्ली तों आइआ इक डैलीगेट कहिंदा, ‘‘बहुती गल्ल ए तां तूं आह कंनां नूं लाउण वाला नां देईं। इहदी बचत हो जाऊ तैनूं।’’

उहदी खुल्ल्ही दाहड़ी वल्ल वेख के मुंडा आखण लग्गा, ‘‘बाबा! तैनूं इह छड्डण वाले लगदे नें, इनहां पहिलां इहो आखणै कि आह ऐथे रख्ख।’’

मुंडे दे बेबाक बोल सुणके सारे खिड़ खिड़ा के हस्स पए। ठठ्ठे मज़ाक विच अंदर दी गल्ल आख जाणी पंजाबीआं दा सुभाअ है। मुंडे दे बोलां ‘च पंजाबी सुभाअ दी इह विशेश परत पेश होई सी। अपणत्त भाव नाल पंजाबीआं वलों कीता मखौल अगले दे मन विच तलख़ी ते गुस्सा पैदा नहीं होण दिंदा। मुछ्छां नूं वट्ट दे के तिंन चार छल्ले बणाउण वाले इक सरदार नूं लाहौर दे बाज़ार विच रोक के इक वार नज़ामदीन नें पुछ्छिआ सी, ‘‘सरदार जी! मुछ्छां नूं वट्ट हत्थ नाल दित्ता जे कि संनही नाल।’’

दूजे पल दोवें खिड़-खिड़ा के हस्सदे होए इक दूजे दी गलवक्कड़ी विच घुट्टे गए सन। खुल्ल्ह दिले, जीअदार पंजाबी।

पर खुल्ल्हिआं संगीतक हासिआं विच इह रुदन ते शोर किउं आ वड़िआ सी। मैं धिआन धरिआ तां डा. जगतार पता नहीं किस प्रसंग विच आपणी गल्ल सुणा रिहा सी, ‘‘इक वार गाइका सवरन लता इक प्रोगराम ‘ते आई। अचनचेत उसे वेले उहदे नाल आइआ वाजे वाला बिमार हो गिआ। उह नूं हसपताल पुचाइआ गिआ। प्रोगराम वी करना सी। इक लोकल बंदा हारमोनीअम वजाउण वाला लभ्भा। सटेज उते आई सवरन लता नें उस नूं सुर समझाई ते आप नाच दी मुदरा ‘च सटेज दा चक्कर लाइआ। पर वाजे वाले तों गल्ल नहीं सी बण रही। सवरन लता चक्कर कट्ट के आवे ते आखे, ‘‘उसताद जी! कोई सुर तां फड़ाओ।’’ जदों दो तिंन वार उस नें इंज आखिआ तां उसताद नें खिझ अते गुस्से नाल पूरा हत्थ पटाक कर के सत्तां सुरां ‘ते मारिआ ते वाजे दीआं चीकां कढा दित्तीआं।’’

मैं इस दे आपणे ही अरथ कढ्ढ रिहा सां। सानूं, मुहब्बत दे गीत गाउण वालिआं नूं, दोहां मुलकां दे आगू कोई सुर नहीं सन फड़ा रहे सगों जदों जीअ करदा सी ‘सुरां’ ‘ते हत्थ मार के’, जंगां ला के, प्रमाणू धमाके करके ‘वाजे’ दीआं चीकां कढा दिंदे सन।

‘‘चलो कढ्ढो ढाई सौ रुपिआ’’, मुंडे नें सौदा मनज़ूर कर लिआ। मैं ढाई सौ रुपए कढ्ढ के उस नूं फड़ा के टेप लै लई। मेरे हत्थों टेप फड़ के उह दिल्ली वाला सरदार सुणन लग्गा, ‘आवाज़ इहदी बहुती उच्ची नहीं। कुझ मध्धम ए, वाघे तक जांदिआं ख़राब होई लै।’

‘‘होर ढाई सौ रुपए ‘च इह तुहानूं भाखड़ा डैम बंन दवे’, सुखदेव नें आखिआ ते मुंडे नूं बाहों फड़ के इक पासे करदिआं मेरा धिआन पलेटफ़ारम वल्ल कीता।

हिंदुसतान वापस परतण वाले आपणे मुसलमान रिशतेदार नूं गड्डी चहड़ाउण आइआ लाहौर दा ही इक मुसलमान परिवार पलेटफारम ‘ते खलोता सी। कदी इक जणा जाण वाले दे गल लग्ग के रोण लग्ग जांदा ते कदी दूजा जणा। इस वेेेले इक मुटिआर जाण वाले दे गल लग्गी अत्थरू केर रही सी। दूजे जणे कोल खलोते आपो आपणे अत्थरू पंूझ रहे सन। कोई कुझ नहीं सी बोल रिहा। इक होर नें उस दा इक हत्थ फड़िआ होइआ सी ते किसे होर नें उहदे मोढे ‘ते हत्थ रख्खिआ होइआ सी। रोंदी होई ख़ामोश मुटिआर उस दे गल लग्गी इधर उधर बच्चिआं वांग झूल रही सी। अंदरली बेचैनी ‘ते काबू पाउण दी कोशिश कर रही। ज़ुबानां गुंगीआं सन अते अत्थरू गल्लां कर रहे सन। इस दरदनाक द्रिश नूं वेख के मेरीआं अख्खां ‘च वी पाणी भर आइआ। लाहौर नूं छड्ड के जाण दा दरद तां सानूं वी सी पर उनहां दी दरद दी थाह कौण पा सकदा सी! मैं आपणे आप नूं सुणाइआ।

मेरी कहानी तेरी कहानी से मुख़तलिफ़ है।

जैसे आंख का पानी पानी से मुख़तलिफ़ है।

गड्डी नें चीक मारी। हौली हौली गलवक्कड़ी ‘चों निकल के, हत्थ छुडा के सभ नूं गले मिल के ‘जाण वाला’ डब्बे विच जा सवार होइआ। तुरदी गड्डी वल्ल नूं अत्थरूआं नाल डुब-डुब भरीआं अख्खां नाल निहारदे दे पिछे रहि गए लोकां दे हत्थ हवा विच लहिराए। लहिराउंदे रहे ते फिर जिवें बाहवां टुट्ट गईआं होण। डिग के दुहत्थड़ वांग पट्टां ‘ते आ वज्जीआं।

गड्डी पलेटफारम छड्ड चुक्की सी ते जगतार आपणी पिछली किसे फेरी दा प्रसंग सुणा रिहा सी।

जगतार नूं ‘सरधा’ फ़ल खाण विच बहुत सुआद लग्गदा है। उनहां नें कार रोकी ते रेहड़ी वाले नूं ‘सरधा’ खुआउण लई किहा।

रेहड़ी वाला सरधा पलेटां ‘च पा के देई जा रिहा सी ते पुछ्छ वी रिहा सी, ‘तुसीं उधर कित्थों ओ सरदार जी! मेरा पिछला ज़िला हुशिआरपुर है। शहिर वी हुशिआरपुर।’

‘‘मैं हुशिआरपुर दे गौरमिंट कालज विच ही पहड़ाउंदा।’’ जगतार नें दस्सिआ तां उस दीआं अख्खां जग पईआं। उह बड़े चाअ ते उतशाह नाल हुशिआरपुर बारे जाणकारी लैण लग्गा। तुरन लग्गा तां जगतार हुरां नें पुछ्छिआ, ‘‘किंने पैसे बणे।’’

जगतार दे बोल सुण के उह बंदा डौर-भौरा हो के जगतार वल्ल वेखण लग्गा ते फिर बड़े दुख नाल कहिण लग्गा, ‘‘पैसे पुछ्छण नालों सरदार जी तुसीं मेरे सिर विच जुत्तीआं मार लैंदे तां चंगा सी। तुसीं मेरे वतनीं। ते मैनूं पैसे पुछ्छदे हो! मैनूं एना ही गरक गिआ समझ लिआ जे, आपणे वतनीं नूं कि तुहाथों पैसे लै लवांगा।’’

आपणे आप नूं संभालण दा यतन करन दे बावजूद वी उह फुट-फुट के बालां वांग रोण लग्गा।

‘‘पैसे पुछ्छ के तुसीं मेरी हेठी कीती ए’’, उह हउके लै रिहा सी ते जगतार नें उस नूं गल नाल लाइआ होइआ सी।

भरे मन नाल जगतार हुरीं कार विच बैठ के तुरन लग्गे तां रेहड़ी वाला हुशिआरपुरीआ पिछ्छों आवाज़ां दिंदा दौड़िआ आ रिहा सी। उहने आपणीआं दोवां बाहवां विच ‘सरधे’ चुक्के होए सन। लिआ के कार विच ढेरी कर दित्ते।

‘‘लै जाओ! आपणे ग़रीब गराईं वलों, निक्का जिहा तोहफ़ा!’’

गड्डी मुग़लपुरा पिछे छड्ड आई सी। साडे होठां ‘ते ख़ामोशी सी। जिउं-जिउं गड्डी लाहौर नूं छड्ड के अग्गे वध रही सी, मैनूं लग्गदा सी तिउं-तिउं उह रेहड़ी वाला हुशिआरपुरीआ गड्डी दे पिछ्छे-पिछ्छे दौड़दा आ रिहा सी। तेज़-तेज़, साहो साह होइआ, हफिआ होइआ। फिर जिवें उह निराश हो के थक्क के खलो गिआ, उस परिवार कोल, जिहड़ा अजे वी आपणे पिआरे नूं गड्डी चाहड़ के अत्थरू पूंझदा, हउके भरदा पलेटफारम ‘ते खड़ोता सी। इह द्रिश इक ‘सटिल’ तसवीर वांग मेरे मन-मसतक ‘ते उकरिआ गिआ सी।

पता ही नां लग्गा, कदों वाहगा आ गिआ सी। कानफ़रंस दे डैलीगेटां लई वख्खरे काऊंटर ला के कारवाई भुगताई जा रही सी जद कि बाकी मुसलमान यातरी लंमीआं कतारां विच लग्गे होए सन। इह उह लोक सन जिनहां दीआं दोहां मुलकां विच नेड़लीआं रिशतेदारीआं सन। जिनहां दी रूह ते जिसम अध्ध विचकारों कट्टी होई सी।

वाहगे तों गड्डी तुरी।

हुणे ही दोहां मुलकां नूं वंडण वाली सरहद्द आ जाणी सी।

नो मैनज़ लैंड!

मंटो दी कहाणी ‘टोभा टेक सिंघ’ दा पातर बिशन सिंघ ‘नो मैनज़ लैंड’ उते खड़ोता अजे वी पुछ्छ रिहा सी, ‘टोभा टेक सिंघ कित्थे है? हिंदुसतान विच या पाकिसतान ‘च?’ उस लई हिंदुसतान ते पाकिसतान नालों वध्ध महत्तव आपणे पिंड ‘टोभा टेक सिंघ’ दा सी। उह हिंदुसतान जां पाकिसतान नहीं सी जाणा चाहुंदा। उह तां ‘टोभा टेक सिंघ’ जाणा चाहुंदा सी। अफ़सर वरचाउंदा है, टोभा टेक सिंघ पाकिसतान ‘च चला गिआ है पर जे तूं हिंदुसतान चला जाएंगा तां टोभा टेक सिंघ वी हिंदुसतान विच भेज दिआंगे।’ पर बिशन सिंघ नूं इह मनज़ूर नहीं। उह सुज्जीआं लत्तां नाल नो मैनज़ लैंड ‘ते डट के खलो जांदा है। शाम तक खड़ोता रहिंदा है ते फिर इक लंमी असमान चीरवीं चीक मार के धरती ‘ते डिग के प्राण दे दिंदा है। उह ‘टोभा टेक सिंघ’ पुज्ज जांदा है।

अज्ज वी बिशन सिंघ ‘नो मैनज़ लैंड’ ‘ते डिग्गा पिआ है। लख्खां करोड़ां लोकां दीआं जिऊदीआं मरीआं लाशां दा प्रतीनिध बण के। उस नाल मेरे आपे दा वी कुझ हिस्सा डिग्गा पिआ सी।

फिकर तौंसवी मुलक दी तकसीम तों पिछ्छों आपणे पाकिसतानी लेखक मित्तरां नूं मिलण वाघे गिआ। जी.टी. रोड दे दोहीं पासीं कतारां विच उग्गे होए दरख़त सिर चुक्की खलोते सन। कुझ हिंदुसतान विच, कुझ पाकिसतान विच। पर इक निंम दा दरख़त, दोहां मुलकां दीआं सरकारां तों बाग़ी जापदा सी उह किसे सरकार नाल वी नाता नहीं सी जोड़ना चाहुंदा।

उह ‘नो मैनज़ लैंड’ ‘ते खड़ोता सी ; बिशन सिंघ वांगू। फ़िकर तौसवी आखदा है, ‘‘की दोहां देशां दे आगूआं नूं इस रुख्ख बारे सूचना नहीं सी दित्ती गई जो इह अजे तक इथे खलोता है। इस नूं पुट्ट देणा चाहीदा सी हुण तक। सगों इंज किउं नहीं हो सकदा कि इस दे पत्ते अते टाहणीआं हिंदुसतान ते पाकिसतान आपस विच वंड लैण। इस रुख्ख नूं दस्स किउं नहीं दिंदे कि उहदे किहड़े पत्ते ते टाहणीआं हिंदू हन ते किहड़े मुसलमान?’’

अगली वार जदों उह बारडर ‘ते गिआ तां सच्चमुच उह निंम दा दरखत उथे नहीं सी। उस नें इक फौजी सिपाही नूं पुछ्छिआ, ‘‘की मैनूं दस्सण दी क्रिपा करोगे कि ऐथे जो निंम दा दरखत हुंदा सी, की उस नूं पुट्ट दित्ता है जां उह उंज ही डिग्ग पिआ?’’

सिपाही नें उस वल्ल संगीन सेध के घूरदिआं होइआ किहा, ‘‘तेरा कोई कंम नहीं सरकारां दे मामले ‘च लत्त अड़ाउण दा?’’

‘‘पिआरे! मैं किउं नां पुछ्छां उस रुख्ख बारे। आख़रकार मैं वी तां उस रुख्ख दी ही इक टाहणी हां।’’

गड्डी सरहद्द पार गई। उस कट्टे होए रुख्ख दीआं कुझ टाहणीआं मेरे नाल हिंदुसतान आ गईआं सन ते कुझ विलकदीआं होईआं पिछ्छे रहि गईआं सन।

मैं टेप रिकारडर विच आपणी इक कैसिट पाई। बटन नप्पिआ। महिदी हसन गा रिहा सी।

मुहब्बत करने वाले कम नां होंगे।

तेरी महिफिल में लेकिन हम नां होंगे।

दिलों की उलझने बहड़ती रहेंगी.

अगर कुछ मशवरे बा-हम नां होंगे।

अटारी सटेशन ‘ते पुज्ज चुक्की गड्डी ‘चों सामान उतारिआ जा रिहा सी। लोड़ींदी प्रकिरिआ ‘चों ग़ुज़र के असीं सटेशन ते तुर पए। महिदी हसन अजे वी मेरे कंनां ‘च सरग़ोशी कर रिहा है। मैनूं कहि रिहा है ; आपणे आगूआं नूं इह सुनेहा देह-

दिलों की उलझने बहड़ती रहेंगी,

अगर कुछ मशवरे बा-हम नां होंगे।

मैं उस नूं आखदा हां कि तूं वी आपणी सरकार नूं इहो सुनेहा दे। आपस विच गल्लबात कीतिआं ही मसले हल्ल होणे नें। नहीं तां दिलां दीआं उलझणां वधणगीआं ही।

पर दोहां मुलकां दे सिपाही साडे वल्ल संगीनां ताण के घूर रहे हन ते हदाइत दे रहे हन, ‘‘तुहाडा कोई कंम नहीं सरकारां दे मामले विच लत्त अड़ाउण दा।’’

असीं सहिम के ठिठक जांदे हां।

अंम्रितसर आ वी गिआ है! किंने दूर नें लाहौर ते अंम्रितसर! किंने नेड़े नें लाहौर ते अंम्रितसर! किंनी वित्थ है इक तों दूजे मुलक तक! किंना नेड़ है ‘घर’ तों ‘घर’ तक!।

शहिर लाहौरों अंबरसर दा!

किंना पैंडा घर तों घर दा!

असीं ‘घर’ तों ‘घर’ तक्क पुज्ज गए सां।