शिवालक दीआं नीलीआं पहाड़ीआं दे पिछे बरफ़ां नाल ढकीआं चोटीआं दी इक कतार है जिहड़ी जनवरी दे महीने विखाई दिंदी है। धौलीधार नां दी इह बाही उत्तर दे दिसहद्दे 'ते इक जादू वांग पोह दे महीने विच उजागर हुंदी है अते विसाख दे महीने फेर धूड़ ते धुंद विच अलोप हो जांदी है। शिवालक दीआं नीलीआं पहाड़ीआं दे पिछोकड़ विच इह अति सुंदर मलूम हुंदी है ते एदां जापदी है जिवें इह पंजाब दे मैदानां दा ताज होवे।

हुशिआरपुर ज़िले विच आपणे पिंड घर दी छत्त 'ते खलोता मैं कई वार इस बरफ़ दी धार वेख के सोचां विच डुब्ब जांदा सां। मेरे उते इस दा हमेशां जादू वरगा असर हुंदा, ते मैं इस नूं सतिकार ते चावां भरपूर दिल नाल वेखदा रहिंदा। फेर मैं इस बरफ़ दी धार दा द्रिश बनखंडी दे इकांतमई बंगले तों वेखिआ, जिहड़ा हुशिआरपुर तों ऊना जाण वाली पहाड़ी सड़क 'ते बणिआ होइआ है। मैनूं जापिआ जिवें इह बंगला शिवालक दीआं पहाड़ीआं विच किसे बाज़ दा आल्हणा है, ते इथों मैं धौलीधार दी अदुत्ती छब्ब नूं माणदा नहीं सी थकदा। चिंतपुरनी दे मंदर तों मैं इस बरफ़ानी पहाड़ दा द्रिश होर नेड़िउं तकिआ, ते मैनूं चुंबक वांग आपणे वल्ल खिच्चदा महिसूस होइआ। सूरज दी रौशनी विच इह इंज चमक रही सी जिवें चांदी दी डली होवे, जां कोई हिमालीआ परबत दी सज्ज विआही राणी किसे डूंघी उडीक विच गुआची होवे।

कांगड़े दी वादी आपणे इलाके दी कोमल सुंदरता लई बहुत मशहूर है मधरीआं मधरीआं पहाड़ीआं, ते निक्के निक्के घरां, कोठिआं, हवेलीआं ते मंदरां विचकार पौड़ीदार खेतां दे लहिरां वरगे फैलरे होए बंनिआं विचों बरफ़ दे ठंडे ठार मोतीआं वरगे सवछ्छ पाणी दीआं अनगिणत कूल्हां कारन इह वादी बड़ी ही मनमोहणी लगदी है इस वादी दी नसवानी सुंदरता दे उलट धौलीधार दे हिम नाल डके, आकाश नाल गल्लां कर रहे पहाड़ सन, जिनहां विचों बरफ़ानी नदीआं नच्चदीआं गाउंदीआं लंघदीआं हन। इस दे चील्ह दे जंगलां अते मैदानां उते चुप्प ते शांती दा राज है। किसे देश दी सुंदरता उस दे कुदरती नज़ारिआं करके ही नहीं हुंदी सगों उस दे लोकां करके वी हुंदी है। कांगड़े दी वादी विच प्रक्रिती दा सुहप्पण उथों दे वस्सण वाले लोकां दी सुंदरता नाल होर वी चमक उठदा है। धौलीधार दे संघणे जंगलां विच गद्दी नौजवान ते सुंदर गद्दणां घुंमदीआं फिरदीआं हन। उनहां दा जीवन निरोल पेंडू सादगी दा जीवन है।वादी दीआं छंनां विच राजपूत ते ब्राहमण सुंदरीआं आपणी सुंदरता नूं लख्ख शरमां नाल, लख्ख संकोचां नाल लुकांदीआं फिरदीआं हन—लक्कां 'ते पिआरे पिआरे घग्गरे, नक्क विच नवेलीआं नत्थां, अते सिर उते चमकदे चौंक। इस वादी विच सानूं कांगड़े दी अती सुंदर कला दे नमूने वी मिलदे हन, जिस विच पिआर दे जज़बे नूं रंगां ते लीकां दे अतिअंत कोमल मेल नें अमर कर दिता। हुण दो सदीआं गुज़र जाण तों बाअद वी उस कला विच दरसाए पातर जिवें जिउंदे जागदे, हस्सदे खेडदे विखाई दिंदे हन। मेरे दिल विच आई कि मैं कांगड़े दी इस अदुत्ती वादी नूं होर नेड़िउं तक्कां ते माणां।

घुग्गीआं दी घूं-घूं नाल हवा गूंज रही सी, ते मोर मसती विच आ के कोठिआं दीआं छत्तां उते पैलां पा रहे सन। खंभ फुला के फड़फड़ाउंदे होए आपणे चमकदे पंख विखा के उह मोरनीआं दा दिल मोह रहे सन। पुंगरे दी रुत्त सी। तूतां दे कूले कूले पत्ते खुल्ल्ह रहे सन ते टाहलीआं, जिहड़ीआं इक हफ़ता होइआ सुक्के छापिआं वांग दिसदीआं सन, उनहां विच वी हरे रंग दी भाह पै रही सी। पत्तिआं दीआं लख्खां पपीसीआं खुल्हण दीआं तिआरीआं कर रहीआं सन। अंबां दे बाग़ां दी उदासी वी मुक रही सी। सारे ब्रिछ हलके पीले बूर नाल लद्दे होए सन। रात नूं बंबीहे दी ‘पी कहां’‘पी कहां’ दा राग खूब रौणक ला रिहा सी, ते दिन विच कोइलां दी ‘तूं हो’ ‘तूं हो' बाग़ां दी रौणक नूं वधा रही सी। मेरे साहमणे धौलीधार दी चिट्टी कंध बरफ़ नाल भरी होई विखाई दे रही सी, ते उसदे हेठां शिवालक दीआं नीलीआं पहाड़ीआं होर वी सुंदर मालूम हो रहीआं सन।

कांगड़े दी वादी दे पहाड़ां, दरिआवां, उथों दे लोकां ते उनहां दी कला दी सुंदरता दी भाल मैं मारच 1951 विच आरंभ कीती। कांगड़ा बिआस दरिआ दी वादी है। इथे बिआस विच होर वी कई नदीआं मिलदीआं हन। असीं बिआस दरिआ नूं मीरथल ते नवें बणे पुल राहीं पार कीता। मुकेरीआं पठानकोट सड़क पंजाब दी सभ तों रमणीक सड़क है। पहाड़ीआं दे पैरां विच इह सड़क अंबां दे बाग़ां विचों लंघदी कई चोआं नूं उलांघदी है, जिनहां उते थां थां 'ते पुल बणाए गए हन।मीरथल दा पुल इंजीनीअर विगिआन दा इक वधीआ नमूना है। जदों असीं इस इलाके विचों लंघे तां अंबां दे बूटिआं उते हलका पीला बूर आइआ होइआ सी जिस नाल हवा विच सुगंधां खिलरीआं होईआ सन। खेतां विच चहुं-पासीं हरिआवल सी ते कणक दीआं पैलीआं सवेर दी शीतल पौण नाल झूम रहीआं सन। अठ्ठ मील मोटर चलाउण तों बाअद असीं डमठाल दे आशरम 'ते पुज गए। इह आशरम शिवालक दी गोदी विच बणिआ होइआ है। आशरम तक पुजण तों पहिले असीं इक अति संघणे बोहड़ां दे झुंड विचों लंघे। बोहड़ां दे इह ब्रिछ सानूं इंज लगे जिवें हरे रंग दे मंदरां दे झुरमुट होण। इनहां दी ठंढी मिठ्ठी छां हेठां जातरी सौं जांदे हन, ते इनहां दे संघणे घेरिआं विचों सूरज दीआं किरनां कदी कदाईं ही हेठ पुज्ज सकदीआं हन, ते हमेशा हनेरा हनेरा रहिंदा है।

बोहड़ ते ब्रिछां दीआं लटक रहीआं हवाई जहड़ां किसे हिमालिआ 'ते तपस्सवी दीआं गुंदीआं होईआं जट्टां वांग जापदीआं हन। असीं इक अति पुराणे, अति पवित्तर ते बेमिसाल आशरम विच परवेश कर रहे सां। आशरम दे अंदर इक ख़ूबसूरत डिउढी विचों हो के जाईदा है, जिहड़ी राजपूतां दी भवन उसारू कला दे आधार 'ते बणाई गई है। बाहर ते वडे दरवाज़े 'ते इक बहुत वडा डूमणा लगा होइआ सी। इस तों बाअद महंतां दीआं समाधां बणीआं होइआं सन। इह आशरम तोता राम ते पुत्तर नराइण दा वसाइआ होइआ है, जो गुरदासपुर ज़िले दे काहनूंवाण नां दे पिंड दा ब्राहमण सी। नराइण दी करामाती शकती बारे कई किस्से मशहूर हन। किहा जांदा है कि डमठाल कोलों इक सौदागर गुज़रिआ सी जिस कोल खच्चरां उते खंड दीआं बोरीआं लद्दीआं होईआं सन। खेड रहे कुछ मुंडिआं नें सौदागर तों पुछिआ, “बोरीआं विच की ए ?” सौदागर नें किहा, “खंड”। मुंडिआं विचों नराइण नां दे इक मुंडे नें किहा, “बोरीआं विच ते रेत ए।” सौदागर नें मुंडे दी गल्ल वल्ल कोई धिआन नां दिता पर मंज़ल 'ते पुज के उहने वेखिआ बोरीआं विच सच्च मुच्च रेत ही सी। मुड़दिआं सौदागर नूं फेर डमठाल विच मुंडिआं नाल खेड रिहा नराइण मिलिआ। इस वारी नराइण नें किहा, “बोरीआं विच ते खंड ए।” ते इह वेख के सौदागर दी ख़ुशी दी हद्द नां रही कि बोरीआं सच्च मुच्च खंड दीआं भरीआं होईआ सन। इस गल्ल तों बाअद मशहूर हो गिआ कि ब्राहमणां दे उस मुंडे विच कोई रब्बी ताकत है। एसे तरहां दी कहाणी, शेख़ फ़रीद बारे वी मशहूर है। तां ही उनहां नूं फ़रीद शकरगंज किहा जांदा है ।

कुझ चिर बाअद नराइण नूं मुग़ल बादशाह जहांगीर नें शाहदरे बुलवाइआ ते उहदी करामात नूं अज़माण लई उस नूं छे पिआले ज़हिर दे दिते। नराइण सारे दे सारे पिआले हस्सदा खेडदा पी गिआ। इह वेखण लई कि उह ज़हिर वी सी कि नहीं, सतवां पिआला इक हाथी नूं पिआइआ गिआ। हाथी अख्ख दे फोर विच ही ढेरी हो गिआ। इस करामात दी कथा मंदर दे अंदर कंध 'ते बणे इक चित्तर विच दरसाई गई है जिस विच नराइण ज़हिर दा पिआला गटा-गट पी रिहा है, ते उस दे पिछे उस दी कंड उते उस दे गुरू भगवान दे दोवें हत्थ इस नूं उस औखी घाटी तों पार उतार रहे हन।

किहा जांदा है कि डमठाल विच पाणी दी बड़ी तंगी सी। इस कारन पिंड वासीआं नूं बड़ी मुशकल पैंदी सी। नराइण इक वार मंदर दे पिछे जंगल विच तपस्सिआ कर रिहा सी ते अचानक ही उस नें धरती विच चिमटा मारिआ, ते विचों पाणी दा चशमा फुट्ट पिआ। इस चशमे उते हुण पक्का तलाअ बणा दिता गिआ है। इहदे इक पासे इक गुफ़ा है जिस विच नराइण तपस्सिआ करदा हुंदा सी।

इस आदरश दा मंदर नूरपूर वाले राजे जगत सिंग नें 1646 ईसवी विच बणवाइआ सी। उनहां दिनां विच शाह जहान दा राज सी। इस मंदर दी कथा-शाला दीआं दीवारां नूं कांगड़ा कला दे चित्तरां नाल सजाइआ होइआ है। जदों असीं गए इस दी छत्त ढहिण ढहिण कर रही सी ते सारे दे सारे मंदर विच धमोड़ीआं दा जिवें राज सी। हर कमरे विच उनहां धावा बोलिआ होइआ सी।

नराइण दे चित्तरां तों छुट बाकी कंध -चित्तर महां भारत ते रमाइण दे कई द्रिश पेश करदे हन। किते क्रिशन गोपीआं नाल खेड रहे है, किते स्री राम चंदर दा विआह हो रिहा है। इसे मंदर विच पहाड़ी राजे, जदों कदी वी उनहां उते कोई औकड़ आउंदी, आ के ओट लिआ करदे सन। किहा जांदा है राजा बीर सिंघ नूरपुरीआ जद महाराजा रणजीत सिंघ दे डर तों दौड़िआं तां उस नें इथे आ के पनाह लई सी। इस नुक्कर विच इक तीवीं हिरन कोल खलोती इक ब्रिछ हेठ तूंबा वजा रही है। कांगड़े दी कला विच इह द्रिश बार बार आउंदा है। इस चित्तर दा विशा बिरहनी नाइका है, जो आपणी पती दी याद विच डुब्बी होई काले मिरग नाल पिआर कर रही है। इस भाव नूं इस मिसरे विच बिआन कीता गिआ है।

“पी मिलन दी चाह चित,

खड़ी बजावत तार।”

आशरम दो मंज़ला है। चुबारे विच इक कमरा है जिस नूं रंग महिल कहिंदे हन। इह 1850 ईसवी विच बणाइआ गिआ सी। इक कमरे दे कंध-चित्तर सिख्ख कला दीआं लीहां उते बणाए गए सन। अकसर मूरतां दीआं बीबीआं दाहड़ीआं हन ते सुंदर साफ़िआं विच मोती ते हीरे लगे होए हन। कुझ चित्तर रामाइण दे वी उकरे हन। इक चित्तर विच इक फ़रंगी आपणी त्रीमत नाल घोड़ी बघ्घी विच बैठा विखाइआ गिआ है। घोड़ा बघ्घी नूं चार घोड़े खिच्च रहे हन। इस तों परगट हुंदा है कि इह चित्तर सिख्खां दे राज तों बाअद अंगरेज़ी हकूमत समें चितरे गए होणगे। आशरम दे महंता दीआं वी कई तसवीरां हन जिनहां नूं गेरूआं ते होर शोख रंगां नाल सजाइआ गिआ है।

हरी दास जो इस आशरम दा 1934-35 विच महंत सी, कांगड़े दी कला दे चित्तरां दा मशहूर संग्रहि आपणे नाल ही लै गिआ सी। अज्ज कल्ह दे महंत कोल केवल दुरगा दे चित्तरां दा इक सैट है जिस नूं 1947 विच इक जट्ट फ़ौजी अफ़सर नें पिशावर दे कि मंदर विचों लिआंदा सी। उस अफ़सर नें आपणे नाल गंधारा दी मूरती कला दे वी कई नमूने लिआंदे, जिस विच कुझ महातमा बुध दीआं मूरतीआं दे सीस हन। इक मूरती रिशी मारकंडे दी वी है। लछमन दास नें रिशी मारकंडे दी मूरती आपणे कमरे विच रख्खी होई है। ते अजीब गल्ल इह है कि इह मूरती महंत लछमन दास नाल बहुत ज़िआदा मुशाबहत रखदी है।

महंत होरीं सानूं बड़े आदर भाअ नाल मिले। इस तों बाअद असीं आशरम ते पिछोकड़ जंगल विच चले गए। इस विच तूतां ते अंबां दे बेशुमार दरख़्ख़त हन। हवा विच कामनी ते बसूहटी दे फुल्लां दी महिक खिलरी होई सी, ते धरती 'ते नीले फुल्लां दा विछौणा विछिआ होइआ सी। इक टिल्ले 'ते इक गद्दी आपणे इज्जड़ नूं चरा रिहा सी। आशरम दी इकांत ते शांती नूं जी भर के माण के असीं महंत तों छुटी लई, ते उस नूं कंध चित्तरां दा ख़िआल रखण लई किहा। इंज जापदा सी, उस नूं इनहां चित्तरां दे मुल्ल दा गिआन बिलकुल नहीं ।

डमठाल दे आशरम तों शाम नूं छुटी पा के असीं ‘चक्की’ नां दा दरिआ पार कीता। सड़क दे ढालिआं विच मिट्टी ते रेत दीआं कई तहिआं विखाई दिंदीआं हन जिनहां विच हर तरहां दे गोल वट्टे जड़े होए दिस्सदे हन। इह रेतड़, इह मिट्टी गीटे ते पत्थर असल विच शिवालक दरिआ दी यादगार हन, जिस नूं इंडो-ब्रहम दा महान दरिआ वी कहिंदे हन। इस विच ब्रहमपुत्तर, गंगा ते सिंध, तिंनां दरिआवां दा पाणी वहिंदा सी। ते शिवालक दा इह दरिआ पंजाब ते सिंध दे माईओसीन नां दे सागर विच जा के ख़तम हुंदा सी, जो टीवंश महां सागर दा इक हिस्सा सी। कोई दस्स लख्ख साल होए जदों धरती दी शकल विच उथल्ल पुत्थल होई ते पछ्छमी पंजाब विच पोठोहार दी पत्थरीली सतह उते उभर आई, उदों ही शिवालक दरिआ दा वहा वी बंद हो गिआ। शिमले दे पछ्छम वल हिमालिआ पहाड़ां ते पाणी दा वहिण चनाब रावी, बिआस ते सतलुज वल हो गिआ, ते शिमले दे पूरब वल दा वहिण गंगा जमना आदि दरिआवां दे पुराणे वहावां राहीं बंगाल दी खाड़ी तीक पुज्जण लग्ग पिआ। इनहां दे रुख़ बदलण दा सभ तों वड्डा सबूत इह है कि इह सारे दे सारे आपणे वहा दे दौरान अंगरेज़ी अख्खर ‘वी’ दी शकल अख़तिआर कर जांदे हन, ते इनहां दे सिरे उत्तर पछ्छम वल हुंदे हन। शिवालक दरिआ दे टिबे, पत्थर गीटे, रेत ते मिट्टी इक वारी फेर उभरी ते शिवालक दे पहाड़ां दा रूप धारन कर गई। सो असल विच शिवालक दे पहाड़ पुराणे शिवालक दरिआ दी रहिंद खूंहद दा नवां रूप हन।

इस गल्ल दा इक होर सबूत दरिआई जानवरां दी वंड विच वी मिलदा है। जो जानवर सिंध दरिआ विच मिलदे हन, उहो गंगा विच मिलदे हन, ते उहो ब्रहमपुत्तर विच। दूर दख्खणी भारत दी महां नदी विच नहीं मिलदे। कई तरहां दीआं जलपातरां सिंध ते गंगां विच सांझीआं हन, ते इंज ही कई होर पाणी दे जानवर । इह बड़ा वड्डा सबूत है कि सिंध ते गंगा किसे ज़माने विच रल के वहिंदे सन। इह दरिआई जानवर ख़ुशकी उते हज़ारां मील तुर के इक दरिआ तों दूजे दरिआ विच नहीं सन जा सकदे। इह तों इह सिध्ध हुंदा है कि इह तिंन दरिआ किसे ज़माने विच इको ही वहिण दी शकल विच वहिंदे सन।

भारत दे दरिआवां दी आवारागरदी बड़ी मशहूर है। सिंध ते गंगा दे दरिआवां विच कोई ख़ास उच्ची पहाड़ी नहीं, ते धरती दे पध्धर विच मामूली जिहा फ़रक इक दरिआ दे पाणी नूं दूजे नाल मिला सकदा है। पहिले पहिल इंडो-ब्रहम नां दा दरिआ अरब सागर विच जा के डिगदा सी, पर धरती दे उचा हो जाण करके इह इक दरिआ दो वहिणां विच वंडिआ गिआ—इक अरब सागर वल्ल सिंध दे रूप विच ते दूजा बंगाल दी खाड़ी विच गंगा ते ब्रहमपुत्तर दी शकल विच। भूगोल दे माहिरां दी राइ अनुसार इह वंड होइआं ज़िआदा समां नहीं होइआ। अरब सागर विच पैण वाले दरिआवां दा वहा हौली हौली बंगाल दी खाड़ी वल्ल हुंदा रिहा होवेगा, ते इस दी आख़री कड़ी गंगा ते जमना दा अड्ड अड्ड होणा शाइद इतहासक ज़माने विच ही किते होइआ होवे। इस तों पहिले जमना दा पाणी पछ्छम वल्ल वहिंदा होवेगा, ते फिर कदी गंगा विच, कदी सिंध विच, जां फिर सुक चुके उस दरिआ विच जा रलदा होवेगा जिस दे निशान अजे वी राजपूताने विच मिलदे हन। दिल्ली दे उत्तर विच किते करनाल दे कोल जमना दरिआ ते अज्ज कल्ह दा घगर दरिआ किसे ज़माने विच उत्तरी बीकानेर दे शहिर सूरतगहड़ दे नेड़े रल के वहिंदे सन, ते हाकड़ा नां नाल बहावलपुर विचों हो के सिंध विच जा मिलदे सन। हाकड़ा जां छोटे घगर दा सुक्का तल अज वी किते किते वेखण विच आउंदा है, ते उत्तरी राजपूताने दे दख्खणी पंजाब दे नकशिआं विच विखाइआ होइआ हुंदा है। जमना नें हुण आपणा तल मैदानां तों बहुत डूंघा कर लिआ है, ते हुण इहदा रुख होर नहीं बदल सकदा, ते मजबूरन इह गंगा दी इक उप नदी ही बणी रहेगी।

शिवालक दे पुराणे जानवरां दीआं हड्डीआं अज्ज कल्ह दे शिवालक पहाड़ां दी मिट्टी विच पत्थराईआं होईआं मिलदीआं हन। कोई दस लख्ख साल होए शिवालक दे जंगलां दे दलदलां विच कई तरहां दे जानवर हुंदे सन। कोई 30 किसम दे हाथी, घोड़े, ऊठ, बारा सिंगे, जिराफ़, गैंडे ते होर कई जानवरां दीआं पत्थराईआं हड्डीआं शिवालक दे पहाड़ां विच मिलदीआं हन। जिराफ़ ते हिपोपोटामस अफ़रीका दे जंगलां विचों भारत विच इक धरती दे पुल राहीं आए सन, जिहड़ा बाअद विच ग़रक हो गिआ। सिवाथीरीअम नां दा इक अति अजीब जानवर, जिहड़ा गैंडे तों वी वड्डा ते जिस दे चार सिंग ते इक थौथणी हुंदी सी, शिवालक दे जंगलां विच पाइआ जांदा सी। इह जानवर हुण मर मिट गिआ है। मनुख्खां वांग चलदे फिरदे बांदर वी इनहां जंगलां विच हुंदे सन जिहड़े आदमी नाल बहुत ज़िआदा मुशाबहत रखदे सन। सो शिवालक जिनहां दा हेतड़ हुशिआरपुर दे किसानां दी मुसीबत बणिआ होइआ है, किसे ज़माने विच इक दरिआ दा तल सी ते अज्ज कल्ह हिमाला दीआं पहाड़ीआं दी सभ तों छोटी लड़ी है।

('पत्ते पत्ते गोबिंद बैठा' विच्चों)