1990 दी अमरीका फेरी समें मैनूं हालीवुड्ड `च यूनीवरसल सटूडीओ वेखण दा मौका मिलिआ। उथे बड़ा कुझ्झ अदभुत्त ते हैरान करन वाला सी। मसनूई मींह, शूकदीआं हनहेरीआं, गरजदे बद्दल ते भुचाल सभ कुझ्झ सी। किसे पासे कच्चे कोठे सन ते किसे पासे आलीशान महल्ल। विचे भूतवाड़े सन ते विचे वसदीआं नगरीआं। इक्क जगहा पुराणे अख़बार संभाले होए सन। गाईड कहि रिहा सी, “एथे तुसीं आपणे जनम दिन दा अख़बार वेख सकदे ओ।” कुझ्झ सैलानी आपणीआं जनम तारीखां दे अख़बार पहिलां ही खोल्ही बैठे सन। मैं वी आपणे जनम दिन दा अख़बार लभ्भ लिआ जिस दी मोटी सुरख़ी सी-हिटलर दीआं फौजां होर अग्गे। उह अख़बार दूजी विशव जंग दीआं ख़बरां नाल भरिआ होइआ सी।

आपणी पंजाह साल दी उमर विच्च मैनूं पहिली वार अहिसास होइआ कि मैं दूजी विशव जंग दे दिनां विच्च जंमिआ सां। मैं सोचण लग्गा, “जे मेरा बाप फौजी हुंदा तां संभव सी उह बसरे दी लाम `ते गिआ हुंदा। मेरे जंमण दा पता नहीं उहनूं कदों पता लग्गदा? पता नहीं उह लोहड़ी तक मुड़ सकदा जां नां। परदेसां दी जंग विच्च की पता उहदे नाल की भाणा वरतदा? की पता साडे पिंड दे कुझ्झ होर फौजीआं वांग उह वी आज़ाद हिंद फौज दा सिपाही बण जांदा ते जेल्हां दे तसीहे झल्लदा। की पता …?”

हुण मैं अठहाट सालां तों उते हो गिआ हां। मां बाप कई वरहे पहिलां पूरे हो चुक्के नें। अग्गों पोते पोतीआं नें जनम लै लिआ है। इनहां सालां दौरान बहुत कुझ्झ बदल गिआ है। धरती इक्क वड्डा पिंड बण गई है। महांदीप उस दे अगवाड़ लगदे हन अते मुलक महल्ले ते पत्तीआं बण गए हन। धरती दे किसे कोने विच्च वापरी वारदात दा उसे वेले सारी दुनीआं नूं पता लग्ग जांदा है। पहिलां नाल दे पिंड दी किसे गल्ल दा पिंड नूं वी एनी छेती पता नहीं सी लग्गदा। हुण तां लाहौर दीआं बांगां लंडन सुणदीआं हन ते अंम्रितसर दे जैकारे टोरांटो तक गूंजदे हन। कदे लुधिआणा ई वलाइत लग्गदा सी पर हुण कैनेडा-अमरीका मोगा-जगरावां बणे पए हन।

मैनूं पिंड तों परदेसां तक निक्के वड्डे सफ़र करन दे अनेकां मौके मिले हन। देश विदेश दे अनेकां खेड मेले वेखे हन अते अनेकां खिडारीआं ते लोकां नूं मिलिआ हां। अख्खां नें काफी कुझ्झ वेख लिआ है पर इह रज्जीआं नहीं। इसे लई मैं आपणे इक्क सफ़रनामे दा नां ‘अख्खीं वेख नां रज्जीआं’ रख्खिआ सी। लेखक जिवें दुनीआं नूं वेखदे हन उसे तरहां उह होरनां नूं विखाउण दी कोशिश करदे हन। मेरी वी कोशिश है कि मैं जीवन दा सफ़र करदिआं जो कुझ्झ जिवें वेखिआ उह आपणे पाठकां नूं उसे तरहां विखावां। नां वाधू विखावा करां ते नां लकोअ छपोअ `च पवां।

जदों मैं पिछ्छलझात मारदा हां तां मेरा चेता मैनूं पैरां `च पाए सगलिआं तक लै जांदा है। मैं तपदे विहड़े विच्च निक्के-निक्के कदम पुट्टदा रो रिहा सां ते मेरे सगले छणक रहे सन। घर दीआं त्रीमतां थोहड़ी दूर खूही कोल बैठीआं मैनूं `वाज़ां मार रहीआं सन। उतों दुपहिर दी धुप्प पै रही सी। खूही कोल छतड़े दी छां सी जिथे रौणक लग्गी रहिंदी सी। घर दे विहड़े तों खूही तक जाणा मेरे चेते दा पहिला पैंडा सी जिस दी तपश ते सगलिआं दी छणकार मैनूं हालां तक महिसूस हुंदी ते सुणाई दिंदी है।

पिंड दे चौकीदार नें मेरी जनम तारीख़ 8 जुलाई 1940 दी दरज कराई सी। मेरे मापे मेरा जनम हाहड़ दे पिछले पख्ख दा दस्सदे सन। जनम तारीख़ दरज कराउण लग्गिआं दो चार दिन एधर ओधर हो जाणे मामूली गल्ल है। सकूल दे दाखले वेले मेरी जनम मिती 20 जून 1940 लिखी गई सी जो मेरे पहड़ाई दे सरटीफिकेटां ते नौकरी लई वरती जांदी रही। मैनूं लग्गदा है कि मेरा जनम 20 जून तों 8 जुलाई दे विचकार किसे दिन होइआ होवेगा।

उनहां दिनां विच्च जरमनी दे डिकटेटर हिटलर दीआं फौजां अग्गे तों अग्गे वध रहीआं सन। हिंदुसतान विच्च अंगरेज़ां दा राज सी ते उहनां नें हिटलर दीआं फौजां दा मुकाबला करन लई बसरे दी लाम लाई होई सी। अंगरेज़ां दी फौज विचों ही आज़ाद हिंद फौज बण रही सी ते सुतंतरता संगराम जारी सी। महातमा गांधी, सुभाश चंदर बोस ते जवाहर लाल नहिरू वड्डे लीडर सन। करतार सिंघ सराभा ते भगत सिंघ शहीद हो चुक्के सन। सिख्खां दा नेता मासटर तारा सिंघ सी। गिआनी करतार सिंघ ते बलदेव सन। मुहंमद अली जिनाह मुसलमानां दा लीडर सी। साडी बीही विच्च मुसलमानां दे वी घर सन। जुलाहिआं ते मिरासीआं दे मुंडे मेरे पहिले आड़ी बणे सन। बच्चिआं दीआं उह आलीआं भोलीआं आड़ीआं पाकिसतान बणन नाल टुट्टीआं।

जदों मैं तुरन जोगा होइआ तां विहड़े `चों बीही विच्च जाण लग्गा। मेरे तड़ागी पाई हुंदी सी जीहदे `च मणके वी सन। कछ्छी मेरे पाई नहीं सी हुंदी ते नंग ढकण नूं `कल्ला झग्गा ई हुंदा सी। हुण तां मेरे पोतिआं दे जंमण तों ई डाइपर लग्गदे रहे हन। मैनूं याद है मैं पैरों नंगा, सिर `ते जूड़ी ते उतों दी पाए झग्गे नाल घरों बाहर निकलिआ। उदों होवांगा कोई पंजां छेआं सालां दा। समझ लओ उह मेरे जीवन दे सफ़र दी शुरूआत सी। बीही दे मोड़ उते मुसलमानां दे घर सन। उनहां दा कोई दिन दिहार सी ते उह मिठ्ठे चौल वरताअ रहे सन। मैं वी हाणीआं दी ढाणी `च बहि गिआ ते चौल झोली `च पुआ के खाण लग्गा।

चौल बड़े मिठ्ठे सन ते आड़ीआं नाल रल के खाण दा सुआद वी आ रिहा सी कि अचानक बिज्ज पै गई। घरां `चों लग्गदे इक्क बाबे नें मैनूं बाहों फड़ के घड़ीस लिआ ते साडे घर लै आइआ। मैं रोस विच्च रो रिहा सां ते बाबा घर वालिआं नूं उलांभे दे रिहा सी, “मुंडे दा तुसीं धिआन नी रख्खदे। इह मुसलमानां दे चौल खा आइआ। भिट्टिआ गिआ इह छोहर। लिआओ हुण गंगा जल ते बणाओ इहनूं मुड़ के सिख्ख!”

उसे वेले किसे दे घरों गंगा जल लिआंदा गिआ ते उहदी इक्क घुट्ट पिआ के मेरी भिट्ट हटाई गई। मिठ्ठे चौल खाण पिछों मैनूं लग्गदा सी कि गंगा जल चौलां तों वी सुआदी होवेगा पर बोतल दा उह फिक्का पाणी मैं मसां संघों लंघाइआ।

फिर मैं सकूल पहड़न ते डंगरां मगर जाण लग्ग पिआ जिस नाल घरों बाहरली दुनीआं दे दरशन होण लग्गे। सकूल पिंड दे गुरदुआरे विच्च ही सी जिथे असीं गुरमुखी दा बाल उपदेश ते उरदू दे काइदे नाल पंज ग्रंथी पहड़दे, शबद गाउंदे ते अग्गों पिछों कौडी बाडी खेडदे। कदे बोहड़ `ते चहड़ जांदे ते टाहणिआं नाल लंगूरां वांग झूटदे। गुरूघर दा सकूल होण दे बावजूद सानूं उरदू वी पहड़ाइआ जांदा सी जो मैं पाकिसतान बणन तक पहड़िआ। गुरदुआरे `च मस्सिआ, संगरांद जां गुरपुरब समें प्रशाद वंडिआ जांदा तां असीं चलाकी नाल दो तिंन वार थोहड़ा बहुता लै जांदे। इक्क चलाकी तां आम ही चलदी सी कि पहिला प्रशाद खा के थिंधे हत्थ झग्गे नाल पूंझ लैंदे ते मुड़ के भाई जी अग्गे जा अड्डदे। दूजी चलाकी घर दे किसे वडेरे दी बिमारी दा बहाना ला के भोग घर लै जाण दी वरत लईदी सी। उनहां चलाकीआं दी सज़ा हुण भुगत रिहां जदों तिंन मेल दे प्रशाद दा पहिला गफ्फा ही मूंह मोड़ दिंदै। प्रशाद घट्ट तों घट्ट लैण लई पहिलां ही कहिणा पैंदै, “भाई जी, सवाइआ गफ्फा!”

अज्ज सोचदां कि इह चुसती चलाकी वी कमाल दी शैअ ए जिहड़ी बचपन विच्च ई करनी आ जांदी ए ते पिछ्छों सारी उमर पिछ्छा नहीं छड्डदी।

डंगरां मगर तुरे फिरदे असीं गंने भंन लैंदे ते छल्लीआं तोड़ लैंदे सां। फड़े जाण `ते कुट्ट वी पै जांदी सी। पर उदों कुट्टां-कट्टां दी कित्थे परवाह सी? दो पईआं विसर गईआं वाला हिसाब सी। तां ही तां चोरी दीआं रिओड़ीआं ते पकौड़ीआं खाण लई संत राम खत्तरी ते अमरी सुनिआरे दी हट्टी `च हत्थ मार आईदा सी। चोरी दा माल लग्गदा वी बड़ा सुआद सी। बचपन दीआं चोरीआं ते चलाकीआं मसूम जिहीआं सन पर उदों जापदा सी जिवें वड्डे माअहरके मार रहे होईए।

मेरा जनम पिंड चकर दा है जिस दी मोहड़ी मुकल चंद नां दे राजपूत नें गड्डी सी। बाबा फरीद दे आगमन तों कुझ्झ समां पहिलां उह जैसलमेर तों चल्लिआ ते इतिहासक नगर हठूर कोल वस गिआ। हठूर तों साडा पिंड सिरफ पंज किलोमीटर है ते महिदीआणे दे गुरदवारे तों वी एनी कु दूर ही पैंदा है। जगराओं शहिर ते कलेरां दा नानकसर ठाठ पिंडों वीह कु किलोमीटर हन। ढुड्डीके दा लाला लाजपत राए कालज वी एनी कु दूर ही है जिथे मैं तीह साल दे करीब पहड़ाइआ ते मेरे नां नाल ढुड्डीके जुड़ गिआ। हुण वी आम बंदे मैनूं ढुड्डीके दा ही समझदे हन।

अपरैल 2001 `च जदों असीं आलमी पंजाबी कानफरंस विच्च शामल होण लई लाहौर गए तां उथे राए अज़ीज़उल्ला खां नाल मेल होइआ। उनहां नें सानूं आपणे घर सद्दिआ। उनहां दे घरों जो दसतावेज़ मिले उनहां तों पता लग्गा कि साडा पिंड उनहां दे वडवडेरे नें बंनहिआ सी। मुकल चंद दी चौथी पीहड़ी दे मुखी दा नां तुलसी दास सी जिस नें इसलाम धरम धारन कीता ते उहदा नां शेख़ चक्कू रख्खिआ गिआ। संभव है चकर दा वसनीक होण कारन उहनूं शेख़ चकर दा नां दित्ता गिआ होवे ते उह घस के शेख़ चक्कू जां रोमन अख्खरां विच्च शेख़ चाचू बण गिआ होवे। राए साहिब आपणे वडवडेरे दा नां शेख़ चाचू ही लै रहे सन।

शेख़ दी सत्तवीं पीहड़ी विच्च राए कल्ल्हा पहिला पैदा होइआ जिस नूं शहिनशाह अलाउद्दीन नें राएकोट दी जगीर दित्ती ते ‘राए’ दा ख़िताब बख़शिआ। ‘राए’ राजपूत दा ही छोटा रूप है। चमकौर दी गहड़ी विचों निकल के गुरू गोबिंद सिंघ माछीवाड़े दे जंगल विच्च दी हुंदे होए जदों राएकोट दे इलाके विच्च दाखल होए तां उस समें राए कल्ल्हा तीजा उथों दा जगीरदार सी। उस नें मुग़ल बादशाह ते सूबा सरहंद दी परवाह नां करदिआं गुरू जी नूं टिकाणा दित्ता ते नूरे माही नूं उनहां दी टहिल सेवा सौंपी।

साखी प्रचलित है कि नूरे माही नें गुरू जी दे आदेश उते उहनां दे लोटानुमा बरतण गंगा सागर विच्च औसर झोटी दा दुध्ध चो के गुरू जी नूं पिआइआ। बाअद विच्च उही गंगा सागर गुरू जी नें राए कल्ल्हे नूं सौंप दित्ता। अनेकां छेकां ते निक्के ढक्कण वाला सुराही वरगा बरतण हुण राए कल्ल्हा दे वारस राए अज़ीज़उल्ला खां पास सुरख्खिअत है। उहदी बणतर ही अजिही है कि उहदे विचों रेत किर जांदी है पर दुध्ध नहीं डुल्हदा। सिख्ख संगतां बड़ी शरधा नाल पवित्तर गंगा सागर दे दरशन करदीआं हन। इह तत्थ अजे खोज दा मुथाज है कि उह सामी बणतर वाला पर ब्राहमणी नां वाला अदभुत बरतण गुरू गोबिंद सिंघ दे हत्थ किवें आइआ? की उह चमकौर दी गहड़ी `चों निकलण वेले वी उनहां पास सी जां रसते विच्च किसे नें भेट कीता? की उहो जिही बणतर वाला होर वी कोई बरतण है? किस नें ते किथों दे कारीगर नें उस नूं ढालिआ ते बणाइआ?

राए अज़ीज़उल्ला कहिंदे हन, “गंगा सागर साडे बज़ुरगां नूं गुरू गोबिंद सिंघ जी वल्लों बख़शिआ अनमोल तोहफ़ा है जो सानूं जिंद तों पिआरा है ते जिस दी संभाल असीं पुशतां तों पूरन शरधा नाल करदे आ रहे हां। इस नाल लख्खां लोकां दी शरधा जुड़ी होई है ते कोई वी नहीं चाहुंदा कि इस दी आम बरतण वांग निरख परख होवे।”>

गुरू गोबिंद सिंघ जी राएकोट लागे पिंड लंमे विखे विसराम कर रहे सन जदों नूरे माही नें सरहंद तों मुड़ के माता गुजरी ते छोटे साहिबज़ादिआं दे शहीद हो जाण दी दुख्ख भरी विथिआ सुणाई। दो वड्डे साहिबज़ादे गुरू जी दीआं अख्खां साहमणे ही चमकौर दे साके विच्च शहीद हो चुक्के सन। उस वेले गूरू जी दे मन उते जो बीती होवेगी संवेदनशील विअकती सहिजे ही उस दा अंदाज़ा ला सकदे हन। माता पिता ते चारे पुत्तरां दी शहीदी दा दुख्ख असहि सी। अजिहे मौके गुरू जी तुरक दे ज़ुलम दी जहड़ पुट्टण दी गल्ल नां करदे तां होर की करदे?

उथों उह महिदीआणे आए ते ढाब विच्च इशनान कीता। फिर साडे पिंड चकर आ रात कट्टी। मैं अकसर सोचदां, उस पोह माघ दी ठरी होई रात नूं गुरू जी नूं साडे पिंड नींद आई होवेगी जां नहीं? पर किथे! उस हालत विच्च कौण सौं सकदा है? वीह विसवे उनहां नें रात जागदिआं कट्टी होवेगी। उदों तां पिंड वी निक्का जिहा होवेगा। पता नहीं साडे पिंड वालिआं तों गुरू जी दी कोई टहिल सेवा हो सकी होवेगी जां नहीं? किसे नें दुख्ख वंडाइआ होवेगा जां नां? की सोचदे होणगे उह साडे पिंड बारे? संभव है किसे नें मंजा बिसतरा दे दित्ता होवे ते रोटी पाणी दी सेवा कीती होवे। पर इह सारा कुझ्झ हनहेरे विच्च है। जिथे उनहां नें रात कट्टी उह जगहा तां पिंड दे किले तों कुझ्झ हटवीं सी। उदों उथे वसों नहीं सी हो सकदी। बज़ुरग दस्सदे रहे हन कि जिथे हुण सरोवर है उथे गुरू जी दातण कर के तखतूपुरे हुंदे होए दीने कांगड़ चले गए सन जिथों औरंगज़ेब नूं ज़फ़रनामा लिखिआ।

गुरू हरगोबिंद साहिब वी लोपों तों चकर आ गए सन ते साडे पिंड दी मिट्टी नूं आपणे पवित्तर चरनां दी छोह बख़श गए सन। गुरू साहिबान दी याद विच्च साडे पिंड गुरदवारा गुरूसर बणिआ होइआ है। जिस कच्चे कोठे विच्च मेरा जनम होइआ गुरदवारे तों सौ कु करमां दी वित्थ `ते सी। उह कच्चा कोठा कदों दा ढहि चुक्का है ते हुण उथे चाचे चंद सिंघ दा घर है। मैं ख़ुशकिसमत हां कि जदों चाहां आपणा जनम सथान वेख सकदा हां। मेरा जनम लहिंदे पंजाब दे किसे पिंड विच्च होइआ हुंदा तां मैं आपणी जनम भोइं नूं वेखण लई तरसदा रहिंदा। बथेरे लोक हन जो आपणा जनम सथान वेखण लई झूरदे ते हंझू वगाउंदे रहिंदे हन।

जद मैं छे कु सालां दा होइआ तां आपणे निक्के निक्के कदमां नाल घर तों गुरूघर विचले सकूल तक चला जांदा ते फिर घर परत आउंदा। उही निक्के कदम उमर नाल वड्डे बण के मैनूं दिल्ली-दख्खण, लंडन-लाहौर ते अमरीका-कैनेडा तक घुमाई फिरे हन। ज़िल्हा लुधिआणे दे इक्क पछड़े होए पिंड चकर तों चल्ल के हुण मैं कैनेडा दे आधुनिक शहिर टोरांटो दा वसनीक बण गिआ हां ते इह सतरां इथे बैठा ई लिख रिहां। पहड़दिआं, पहड़ाउंदिआं अते देस परदेस दे खेड मेलिआं ते होरनां थांवां `ते जांदिआं आउंदिआं जिंना कु जगत तमाशा मैं वेख सकिआं उह मैं इस पुसतक दे अगले पंनिआं `ते विखाउण दी कोशिश कीती है।