पुरातन ओलंपिक खेडां तों लै के हुण तक लख्खां दौड़ाक दौड़ मुकाबलिआं विच्च भाग लै चुक्के हन। कईआं दीआं दौड़ां अभुल्ल यादां बण गईआं हन। उनहां `चों कुझ्झ इकनां दा ज़िकर करना दिलचसपी तों खाली नहीं होवेगा। उंज तां घट्ट वध्ध दूरी दे अनेकां दौड़ मुकाबले हुंदे आ रहे हन पर इथे गल्ल केवल मैराथन दौड़ दी ही करदे हां।

490 पू.ई.विच्च परशीआ नें एथनज़ `ते हमला करन लई आपणी फौज सरहद्दी पिंड मैराथन दीआं जूहां विच्च उतारी सी। मैराथन यूनान दी राजधानी एथनज़ तों पच्ची कु मील दूर सी। यूनानी जरनैल नें यूनान दे ओलंपिक दौड़ाक फिडीपीडीस नूं सपारटा तों मदद लैण लई दौड़ाइआ। उह दौड़दा, तैरदा ते पहाड़ीआं दीआं चोटीआं चहड़दा सपारटा अप्पड़िआ। सुनेहा दे के वापस एथनज़ आइआ। बिनां आराम करे उस नूं यूनानी फौज नाल मैराथन वल्ल कूच करना पिआ। मैराथन दे मैदानां विच्च जंम के लड़ाई होई। आपणे वतन ते राजधानी एथनज़ दी राखी लई लड़दे यूनानी आख़र जित्त गए। पिछ्छे एथनज़ विच्च बच्चे, बिरधां ते औरतां दे साह सुक्के होए सन। उह छत्तां `ते चहड़ के आपणी होणी दा भविख्ख वेखण लई मैराथन वल्ल अख्खां लाई बैठे सन।

यूनानी जंग जित्त गए तां जेतू जरनैल नें जित्त दा समाचार तुरत एथनज़ पुचाउण लई थक्के टुट्टे फिडीपीडीस नूं मुड़ एथनज़ वल्ल दौड़ाइआ। दौड़दिआं पहाड़ी चटानां उते उहदे पैरां `चों खून सिम आइआ ते लहू दे चट्टाक पहाड़ी पत्थरां उते लग्गण लग्गे। फिडीपीडीस आपणे वतनीआं दी चिंता छेती तों छेती ख़तम करन लई ज़खमी पैरां नाल हंभिआ हुट्टिआ वी दौड़दा रिहा। एथनज़ वासीआं नूं दूरों ही आपणे महान दौड़ाक दा झाउला पिआ तां उह छत्तां तों उत्तर के लड़ाई दा समाचार सुणन लई अग्गे वधे। हंभे, हफ़े ते लहू लुहाण होए पैरां वाले सिरड़ी दौड़ाक नें आपणी सारी सत्तिआ `कठ्ठी कर के सिरफ़ इको बोल बोलिआ, “ख़ुशीआं मनाओ, आपां जित्त गए आं!”

एना कहिंदिआं उह एथनज़ दीआं बरूहां विच्च डिग्ग पिआ ते डिग्गदिआं ई परलोक सिधार गिआ।

उस योधे दौड़ाक दी याद विच्च पहिलीआं आधुनिक ओलंपिक खेडां समें पच्ची कु मील लंमी दौड़ दा मुकाबला होइआ जिस नां मैराथन दौड़ रख्खिआ गिआ। पहिलीआं नवीन ओलंपिक खेडां 1896 विच्च एथनज़ तों ही शुरू होईआं सन। यूनानीआं दी बड़ी रीझ सी कि उहनां दे वतनी दी याद विच्च रख्खी दौड़ कोई यूनानी दौड़ाक ही जित्ते। एथनज़ दे इक्क रईस नें ऐलान कीता कि कोई यूनानी इह दौड़ जित्त जावे तां उस दौड़ाक नूं दस लख्ख यूनानी सिक्किआं दे नाल आपणी धी दा डोला दे देवेगा। हलवाईआं तों लै के सुनिआरिआं तक अनेकां दुकानदारां नें दौड़ जित्तण वाले यूनानी नूं आपणीआं दुकानां दा मनभाउंदा माल देण दी पेशकश कीती। इक्क नाई नें किहा कि अजिहे दौड़ाक दी उह सारी उमर मुफ़त हज़ामत करेगा।

पहिलीआं ओलंपिक खेडां दी मैराथन दौड़ शुरू होई तां यूनानी दौड़ाक सपरिडन लूईस जो आजड़ी सी, सभ तों पिछ्छे रहि गिआ। पर उस नें दिल नां छड्डिआ ते लगातार दौड़दा रिहा। जदों अख़ीरले तिंन कु मील दी दूरी रहि गई तां उह सभ तों मूहरे निकल गिआ। यूनानी दरशकां विच्च ख़ुशी दी लहिर दौड़ गई। सपरिडन लूईस सभ तों पहिलां सटेडीअम विच्च दाखल होइआ तां सारे दरशक उतसुकता विच्च उठ्ठ खहड़े होए। यूनानी राजे दे दोवें शहिज़ादे जारज ते निकोलस ख़ुशी विच्च खीवे होए आपणे दौड़ाक नूं हल्लाशेरी दिंदिआं उहदे नालो नाल दौड़न लग्गे ते सपरिडन लूईस मैराथन दौड़ दा पहिला ओलंपिक जेतू बण गिआ। सारे यूनान नूं लालीआं चहड़ गईआं। ख़ुश होए यूनान दे बादशाह नें जेतू नूं वधाई दिंदिआं किहा, “मंग जो कुछ मंगणा।”

सिध्धे सादे आजड़ी नें मंग कीती, “मेरे कोल घोड़ा तां है पर घोड़ा-गड्डी नहीं। जे उह मिल जे तां मेरा कंम होर सुखाला हो जे!”

मगरों पता लग्गा क उह हर रोज़ दो वार घोड़े नाल दौड़दिआं एथनज़ जाइआ करदा सी ते मुड़दिआं घोड़े दी सवारी करिआ करदा सी। इंज उहदी हर रोज़ ई मैराथन लग्ग जांदी सी। घोड़ा-गड्डी तों बिनां उस नें आपणे परसंसकां दे कुझ्झ तोहफ़े तां लै लए पर रईस दी धी दा डोला नां लिआ किउंकि उह पहिलां ही विआहिआ होइआ सी।

1904 विच्च सेंट लूई दीआं तीजीआं ओलंपिक खेडां समें लग्गी मैराथन दौड़ वी बड़ी दिलचसप सी। किऊबा दे इक्क डाकीए फेलिकस करनाजल नें आपणे दोसतां कोल किते शेख़ी मार दित्ती कि उह ओलंपिक दी मैराथन दौड़ आराम नाल ही जित्त सकदा है। पर सीगा उह जोकरां वरगा। शेख़ी दे मारे उहने नौकरी तों असतीफ़ा दे दित्ता ते इधर उधर दौड़न लग्गा। खेडां नेड़े आईआं तां उहदे कोल सेंट लूई जाण जोगा किराइआ नहीं सी। उस नें तरकीब सोची ते हवाना दे चौंकां विच्च दौड़ के मजमे लाउंदिआं पैसे `कठ्ठे करन लग्गा। किराए जोगे पैसे हो गए तां उह सेंट लूई नूं रवाना हो गिआ पर राह विच्च ही जूआ खेड के पैसे हार बैठा। उह फिर नंग मलंग हो गिआ।

ख़ैर जुगाड़ करदे कराउंदे जदों उह सेंट लूई अपड़िआ तां मैराथन दौड़ लग्गण ही वाली सी। उह चोले वरगा कुड़ता ते ढिल्ली जिही पतलूण पाई मैराथन दौड़ लई लाई लकीर उते जा खहड़ा होइआ। मुकाबले विच्च दुनीआं दे मंने प्रमंने दौड़ाक खहड़े सन। डाकीए दा हुलीआ वेख के दरशकां दा हासा निकली जा रिहा सी।

अमरीका दे इक्क अथलीट शैरीडन नें कितों कैंची लिआंदी ते लकीर उते खहड़े खड़ोते फेलिकस दे कुड़ते नूं आसिओं पासिओं कट्ट के कंम चलाऊ बुनैण बणा दित्ती। इंज ई पतलूण वी गोडिआं उतों कट्ट दित्ती ते उह निक्कर बण गई। हुण उह आराम नाल दौड़ सकदा सी। दौड़दिआं उह राह विच्च सेब ते आड़ू तोड़ के खांदा गिआ ते दरशकां नाल हासा मखौल करदा गिआ। दौड़ मुक्की तां उह सैंती दौड़ाकां विचों चौथे थां सी। जे किधरे उह पहिलां ही मैराथन दौड़दा हुंदा तां संभव सी ओलंपिक चैंपीअन बण जांदा ते शेख़ी मारनी सच्ची सिध्ध हो जांदी।

1908 विच्च लंडन दीआं ओलंपिक खेडां दी मैराथन दौड़ 55 दौड़ाकां नें दौड़नी शुरू कीती। इटली दा दोरांदो पिएतरी तीजे थां दौड़ रिहा सी। दौड़ दे अंत समें जदों उहनूं सटेडीअम नज़रीं पिआ तां उह अंनहेवाह दौड़िआ। सटेडीअम `च उह सभ तों पहिलां दाखल होइआ पर उह भुलेखे नाल सटेडीअम दा चक्कर सज्जे पासे मुड़ के कट्टण दी थां खब्बे पासे मुड़ के कट्टण लग्ग पिआ। असल विच्च वधेरे ज़ोर लाउण कारन उस दे तौर उडे होए सन। लख्ख दे करीब दरशक जिथे ताड़ीआं मार के उहदा हौंसला वधा रहे सन उथे उस नूं सिध्धा चक्कर कट्टण लई वी पुकार रहे सन।

जदों पिएतरी नूं आपणी ग़लती दा पता लग्गा उदों तक उहदी बस्स हो चुक्की सी। उह लड़खड़ा के डिग्ग पिआ। सटेडीअम विच्च कुल खलकत दी हमदरदी उहदे नाल सी। दरशकां नें उहदी मंदी हालत वेख के हउका भरिआ। हमदरदी वस्स डिग्गे पए दोरांदो नूं सहारा दे के उठा दित्ता गिआ तां जो उह दौड़ पूरी कर सके। डिग्गदा डोलदा दोरांदो पिएतरी आख़रकार सभ तों पहिलां फीते नूं जा छोहिआ। दौड़ दे नतीजे दा ऐलान काफी देर बाअद कीता गिआ जिस नाल पिएतरी दा दिल तां टुट्टणा ई सी दरशकां नें वी बड़ा दुख्ख मंनिआ। किउंकि दौड़ दे नियमां अनुसार किसे दौड़ाक नूं सहारा देणा अयोग हुंदा है इस लई डिग्गे पए पिएतरी नूं उठाउण दी बेनियमी कारन उहदी दौड़ अयोग करार दे दित्ती गई ते उहदा कोई वी सथान नां गिणिआ गिआ।

1952 विच्च हैल्लसिंकी दीआं ओलंपिक खेडां चैकोसलोवाकीआ दे दौड़ाक ऐमिल ज़ैटोपिक दीआं खेडां कहीआं जांदीआं हन। उह कचीची वट्ट के दौड़दा घाइल होइआ लग्गदा सी। लग्गदा सी जिवें असहि पीड़ दा भंनिआ होवे। पहिलां उस नें दस हज़ार मीटर दी दौड़ जित्ती ते फिर पंज हज़ार मीटर नूं वी पै गिआ। तीजा गोलड मैडल उस दी घर वाली डाना ज़ैटोपिक नें जैवलिन सुट्टण विचों जित्तिआ। ऐमिल ज़ैटोपिक नें आखिआ, “हुण ज़ैटोपिक जोड़ी दा सकोर 2-1 है ते मैं कोशिश करांगा 3-1 करां।”

मैराथन दौड़ शुरू होई तां पहिले दो किलोमीटर ज़ैटोपिक सभ तों पिछ्छे रिहा। दसवें किलमीटर दे निशान `ते पुज्जदिआं उह सवीडन दे प्रसिध्ध दौड़ाक गुसताफ़ जैनसन दे मोढिआं `ते जा चहड़िआ। ओदूं अगांह बरतानीआं दा जिम पीटर ही सी। पंदरवें किलोमीटर `ते तिंने दौड़ाक बराबर हो गए। पच्चीवें किलोमीटर `ते ज़ैटोपिक सभ नूं पिछ्छे छड्ड गिआ ते फिर किसे नूं नाल नां रलण दित्ता। जदों उह सभ तों पहिलां भरे होए सटेडीअम विच्च दाखल होइआ तां दरशक ताड़ीआं मारदे होए उहदे कदमां नाल ज़ै-टो-पिक ज़ै-टो-पिक दा राग अलापण लग्गे। दौड़ पूरी हो गई पर ज़ै-टो-पिक दा राग काफी देर तक गूंजदा रिहा। हुण तक तिंने लंमीआं दौड़ां जित्तण दा हैट ट्रिक केवल चैकोसलवाकीआ दा ऐमिल ज़ैटोपिक ही मार सकिआ है।

1960 विच्च रोम दीआं ओलंपिक खेडां समें इथोपीआ दा अबेबे बकीला नंगे पैरीं दौड़िआ ते 2 घंटे 15 मिंट 16.2 सकिंट विच्च दौड़ पूरी कर के मैराथन दा ओलंपिक चैंपीअन बणिआ। 1964 विच्च टोकीओ ओलंपिकस `च उह फिर अव्वल रिहा। उदों उह टोकीओ दीआं सड़कां उते दौड़न वाले बूटां नाल नठ्ठिआ सी। टोकीओ विच्च उस नें 2 घंटे 12 मिंट 11.2 सकिंट विच्च इह दौड़ पूरी कीती। उदों तक बकीला तों बिनां किसे वी होर दौड़ाक नें ओलंपिक खेडां दी मैराथन दो वार नहीं सी जित्ती।

अबेबे बकीला शाही महिलां दा पहिरेदार सी। कुदरत दा भाणा वेखो कि जदों उह काली नसल दा दौड़ाक तीजी वार ओलंपिक खेडां दी मैराथन जित्तण लई तिआरी कर रिहा सी तां इक्क हादसे विच्च उहदीआं दोवें लत्तां मारीआं गईआं। बकीले दे मन `ते जो बीती उहदा दुख्ख उही जाणदा सी। उहदे दिल दीआं दिल विच्च ही रहि गईआं। जिहड़ीआं जंघां नाल उह लख्ख मील तों वी वध्ध दौड़ चुक्का सी उनहां नूं निकारीआं होईआं वेख के उह बहुता चिर जिऊंदा नां रहि सकिआ ते 1973 विच्च मर गिआ।

1896 तों 1924 तक दीआं ओलंपिक खेडां तक मैराथन दौड़ां दी दूरी इको जिंनी नहीं सी। इह चौवी तों सताई मील दे दरमिआन रही। 1924 विच्च पैरिस दीआं ओलंपिक खेडां तों मैराथन दौड़ां दी दूरी इको जिंनी रख्खणी तहि होई। हुण मैराथन दौड़ दी मिआरी मिणती 26 मील 385 गज़ है। 1908 विच्च लंडन दीआं ओलंपिक खेडां दी मैराथन 26 मील 385 गज़ दी सी। उदों बरतानीआं दी ओलंपिक कमेटी नें फैसला कीता कि मैराथन दौड़ शाही निवास तों शुरू करवा के सटेडीअम विच्च शाही महिमानां दीआं सीटां कोल समापत कीती जावे। इस लई विंडसर कासल तों दौड़ शुरू होई ते सटेडीअम विच्च राइल बाकस कोल ख़तम होई। फासला मिणिआं तां 26 मील 385 गज़ बणिआ। उदों बरतानीआं दा तप तेज़ सी ते इहो फासला मैराथन दौड़ लई मिआरी बणा दित्ता गिआ।

इह धारना ग़लत है कि फिडीपीडीस मैराथन तों एथनज़ तक 26 मील 385 गज़ दौड़ के शहीद होइआ सी। उस फासले दा पक्का परमाण नहीं। इह धारना वी सही नहीं कि मैराथन दौड़ जान लेवा हुंदी है। हुण तां निऊयारक, लंडन ते होरनां शहिरां विच्च हज़ारां दौड़ाकां दीआं मैराथन दौड़ां लग्गदीआं हन पर दौड़दिआं कोई नहीं मरदा। औरतां वी दौड़दीआं हन पर किसे दा वाल विंगा नहीं हुंदा। इथों तक कि नब्बे सालां तों टप्पिआ बाबा फौजा सिंघ वी कई वार मैराथन दौड़ चक्का है ते मशकरीआं करदा दौड़ पूरी करदा है। हुण उह 97 सालां दा हो चुक्कै। उस दा कहिणा है कि जे उह 98 साल दी उमर तक जींदा रिहा तां उस गोरे दौड़ाक दा रिकारड तोड़ेगा जिस नें 98 साल दी उमर विच्च मैराथन पूरी कीती है। आओ अरदास करीए कि पंजाबीआं दा बाबा फौजा सिंघ सौ साल तों वी वध्ध जीवे ते अजिहा रिकारड रख्खे जिहड़ा छेती कीतिआं होर किसे तों नां टुट्टे।