किसे पुराणे चैंपीअन नाल मुलाकात करन दा आपणा अनंद है। ख़ास कर के बज़ुरग चैंपीअन नाल। उस दीआं गल्लां कई साल पहिलां दा समां अख्खां अग्गे लिआ दिंदीआं हन। मैं निक्का सिंघ दा नां सुणिआ होइआ सी। उस नें 1951 दीआं एशिआई खेडां विच्च 1500 मीटर दी दौड़ `चों सोने दा तमग़ा जित्तिआ सी। उथे ही छोटा सिंघ मैराथन दौड़ दा जेतू सी। निक्का सिंघ ते छोटा सिंघ इको अरथ देण वाले नां होण कारन मेरे ज़िहन विच्च हुण तक रलगड्ड हुंदे रहिंदे हन। कदे मैं निक्का सिंघ नूं मैराथन जेतू समझ बहिंदा हां ते कदे छोटा सिंघ नूं। उनहां दोहां `चों मेरी निक्का सिंघ नाल मुलाकात होई जद कि छोटा सिंघ नूं मिलण लई तांघदा रिहा। मैनूं नहीं पता हुण उह हैगे वी जां नहीं। साडे कई चैंपीअन अणगौले चलाणा कर जांदे हन। मैनूं जीहदा जीहदा पता लग्गदा है शरधांजली वजों कुझ्झ लिख दिंदा हां।

कुझ साल पहिलां मैं किला राइपुर दीआं खेल्हां वेखण गिआ तां गुरभजन गिल्ल नें दस्सिआ कि ऐतकीं एशीआ दा पुराणा चैंपीअन निक्का सिंघ वी आइआ है। गरेवाल सपोरटस ऐसोसीएशन उहदा माण सनमान कर रही है। निक्का सिंघ ते उहदे तिंन चार साथी साथों रता कु लांभे कुरसीआं उते बैठे सन। निक्का सिंघ दी दाहड़ी बग्गी होई पई सी, रंग सांवला सी ते फौजीआं वाली पोचवीं पग्ग बंनही होई सी। उहदे इंडीआ दे कल्लर वाला सुरमई कोट पाइआ होइआ सी। मैं उहदे कोल जा के फतिह बुलाई तां उहने रता कु उठ के हत्थ मिलाइआ। हत्थ मिलणी विच्च निघ्घ सी। मैं आपणी खेड लेखक होण दी जाण पछाण दे के कुझ्झ गल्लां बातां पुछ्छण दी तमंना ज़ाहर कीती तां उहने इक्क कुरसी खाली करवा के मैनूं आपणे नाल बिठा लिआ ते आखण लग्गा, “धंनभाग जे कोई साडीआं गल्लां वी सुणे। आपां विहले आं जो मरज़ी पुछ्छो गल्लां।”

उहदे बोलां `च करार सी ते अख्खां `च मघ्घदी लोअ। इह वख्खरी गल्ल सी कि चिहरे `ते झुरड़ीआं पै गईआं सन। उहदे पैरीं गुरगाबी ते तेड़ भूरे जिहे रंग दी पतलूण पाई होई सी। हत्थ विच्च कड़ा सी। मैं उहदे जनम ते बचपन बारे पुछ्छिआ। उहने दस्सणा शुरू कीता, “ऐस वखत मेरी उमर पैहंट सालां दी होऊ। मैं 3 जुलाई 1939 नूं फौज `च भरती होइआ सी। ओदों मेरी उमर अठारां वीह साल दे लवे होऊगी। बाहली होई तां इक्की बाई साल दी होऊ। साडा पिंड संगरूर दे लवे भिंडरां ऐं। मेरे पिता दा नां आसा राम सी। असीं जट्ट बाहमण हुंने आं। उस वखत साडी ढाई विघ्घे जमीन सी। गुज़ारा मुशकल सी। मैं आखिआ किउं किसे दा सीरी रलणां? घर दी तंगी करके मैं फौज `च भरती होइआ।”

मैं पुछ्छिआ, “तुहाडी जनम तरीक की लिखां?” निक्का सिंघ नें आखिआ, “कोई लिख लो, की फरक पैंदा?” “नां तां वी। भला तुसीं फौज `च किहड़ी जनम तरीक लिखाई सी?” उस नें गिच्ची खुरकदिआं किहा, “हुण पक्की तां याद नी। मैं उणताली `च भरती होइआ सी। वीह साल कढ्ढ के उन्नी लिख लो। नाले हुण किहड़ा भरती होणां? जां फेर सिध्धी वीह लिख लो। तिंन जुलाई उनी सौ वीह।” “तुसीं किंनीआं जमातां पहड़े?” निक्का सिंघ नें मिनहा मुसक्रांदिआं किहा, “मैं शाही अणपहड़ आं। मैं हाले बारां साल दी उमर दा सी जदों मेरे बाप दीआं दोहां अख्खां दी जोत चली गई। भैण भरावां `च सारिआं तों वड्डा होण करके घर दी कबीलदारी दा भार मेरे उते आण पिआ। मैनूं निक्के हुंदे नूं ई खेतां `च सखत मिहनत करनी पई।”

“तुसीं फौज `च किवें भरती होए?” “जनरल गुरबख़श सिंघ साडे पिंड विआहिआ होइआ सी। उह जदों पिंड आइआ तां असीं उहनूं भरती करन नूं किहा। उह पुछ्छण लग्गा, दौड़ भज्ज वी लैनां? मैं आखिआ, छालां छूलां जीआं तां लाउंदे रहीदा। भज्ज वी लऊं। उह कहिण लग्गा, तड़के ई आ जीं फेर संगरूर। लओ जी मैं तड़के ई वग गिआ संगरूरीं। जरनैल दी सिफारश सी ते उहनां नें मैनूं भरती कर लिआ। ओदण सत्तवें महीने दी तिंन तरीक सी ते संन सी उन्नी सौं उणताली।” मैं हैरान सां कि जनम तरीक उस नूं याद नहीं सी पर भरती होण दी तरीक भुलदी नहीं सी।

मैं पुछ्छिआ, “तुहानूं याद होवेगा ओदों किंनी तनखाह सी?” निक्का सिंघ नें वेरवे नाल दस्सिआ, “लै याद किउं नी। भला तनखाह वी कदे भुल्ली आ? भरती होण वेले मेरी तनखाह नौं रुपए महीना सी। इक्क विचों दुध्ध दा कट्ट लैंदे सी, इक्क जमहां हुंदा सी ते सत्त रुपईए नकद मिलदे सी। उहनां सत्तां नाल टब्बर दा गुज़ारा तुरदा सी।”

निक्का सिंघ दे नाल बैठा इक्क होर रिटाइर फौजी बोलिआ, “ओदों दे नौं ई हुण दे नौं सौ वरगे सी। इक्क आने `च फौजी कप्प दुध्ध दा भरा लईदा सी ते इक्क रुपईए दा सेर घिओ आ जांदा सी। हुण तां सहुरे नोटां `च जान ई नी रही। ओदों असीं छेती कीतिआं रुपईआ तुड़ाउंदे नी सी हुंदे बई टुट्टिआ तां बहिंदे खुर-जू। बझ्झवां ई रख्खदे सी बई बचिआ रहू। साडे नाल दे नपालीआं नें रुपईआ मुठ्ठी `च घुट्टी रख्खणा ते बज़ारां `च गेड़े देई जाणे। मुठ्ठी `च घुट्टे रुपईए नूं मुहड़का आ जाणा तां उहनां नें मुठ्ठी खोल्ह के हवा लुआउणी ते आखणा, साले रोता किओं हैं? मैं तुमें खरचूंगा नहीं!”

मैं पुछ्छिआ, “हुण पैनशन किंनी मिलदी ऐ?” निक्का सिंघ नें पूरा वेरवा दित्ता, “मैं खेल्हां जीआं करके 1942 `च हौलदार बण गिआ सी। पहड़िआ नां होण करके `गाहां तरक्की नां मिली ते मैं उन्नी साल हौलदार ई रिहा। मारच 1961 `च रिटैर होइआ। ओदों मेरी पैनशन 38 रुपईए सी ते हुण वधदी वधदी 221 इक्की रुपए आ। एशीआ दा चैंपीअन होण करके डूढ सौ मैनूं पंजाब सपोरटस कौंसल दी पैनशन लग्गी आ। इह पैनशन मैं मसां लवाई। इक्क तां सरटीफिकेट देणा सी बई मेरी उमर सठ्ठ साल तों उते आ ते दूजा ऐस्स.डी.ऐम्म.तों कागज़ बणवा के देणा सी बई मेरी साल दी आमदन 3600 तों घट्ट आ। कलर्रक मैनूं टालदे रहे बई तूं तां पहिलां ई पैनशन लई जानां। मैं आखां उह 3600 तों घट्ट आ। फेर मैं इंडीआ दे कल्लर वाला कोट पा के ऐस्स.डी.ऐम्म.नूं मिलिआ। उह भला बंदा सी। मेरा कल्लर देख के कुरसी तों उठ खहड़ा होइआ बई इह तां बंदा ई बड़ा वड्डा। उहने मेरी पैनशन मनज़ूर कराई।”

मैं आखिआ, “खेडां वल्ल आउण दी सटोरी वी सुणाओ।” निक्का सिंघ नें निक्का जिहा खंघूरा मारदिआं सटोरी तोरी, “जदों मैं खेडां दी दुनीआं `च आइआ ओदों खेडां दी कोई खास कदर नहीं सी। खिडारी दी वी कोई कीमत नहीं सी। नां ही गराऊंड हुंदे सी ते नां कोई कोचिंग देण आला सी। नां ई खेडण दा समां मिलदा सी। खुराक वी कोई खास नी सी हुंदी। बस्स `कल्ले पटिआले आले महाराजे नूं ईं खिडारी पालण दा शौंक सी। मेरी रंगरूटी संगरूर `च होई। फेर मैं परोजपुर छाउणी दौड़न गिआ। 1940 विच। ओथे मैं पहिली वार 800 ते 1500 मीटर दौड़िआ ते जुआनां `च पहिले नंबर `ते आइआ। 1941 `च मैं पटिआले 800 मीटर दौड़िआ। पटिआले दे जुआन तकड़े सी ते मैं तीजे नंबर `ते आ सकिआ। फेर मैनूं लड़ाई `च जाणा पै गिआ ते दौड़ां बंद हो गीआं। चार साल लड़ाई `च नंघे। एना शुकर आ बई बचिआ रिहा। 1947 `च रौले पैगे। 1948 `च सारे इंडीआ दीआं खेडां कलकत्ते होईआं। ओथे मैं 800 मीटर दी दौड़ 2 मिंट 2 सकिंट `च ला के इंडीआ दा चैंपीअन बणिआं। फेर दिल्ली `च नैशनल गेमां होईआं। दिल्ली मैं 800 मीटर दौड़ 2 मिंट 1 सकिंट ते 1500 मीटर 3 मिंट 52 सकिंट `च दौड़ के जित्ती। ओदों मैं ऐन चहड़िआ होइआ सी।”

1500 मीटर दी दौड़ दा समां 3.52 मिंट सुण के मैं हैरान होइआ किउंकि उनहां दिनां `च एने समें वाला दौड़ाक तां ओलंपिकस नूं पै सकदा सी। बाअद विच्च मैं रिकारड दी पड़ताल कीती तां पता कीता कि निक्का सिंघ आपणा समां दस्सण विच्च सच्चमुच्च ई टपला खा गिआ सी। उस नें असल विच्च 4 मिंट 12 सकिंट `च दौड़ पूरी कीती सी। मैं उस दे कद्द काठ ते सरीरक वज़न बारे पुछ्छिआ तां उहने दस्सिआ, “शुरू तों मेरा भार सवा मण ते डूढ मण दे विचाले रिहा। हुण 60-62 किल्लो आ, तुलिआं वीह गैल। कद्द भरती होण वेले 5 फुट्ट 9 इंच सी, हुण इक्क अध्धा इंच घट्ट गिआ होऊ!”

मैं आखिआ, “कद्द वी कदे घटिआ?” निक्का सिंघ मुसकराइआ ते कहिण लग्गा, “वड्डी उमर `च माड़ा मोटा कुब्ब पै जांदा नां। ऊं वी कहिंदे हड्ड सुंगड़ जांदे आ।”

पर कुब्ब निक्का सिंघ दे उदों तक कोई नहीं सी पिआ। उहदा सरीर शिकारीआं वरगा सी। अख्खां, कंन ते सरीर दे जोड़ सभ हरी काइम सन। हां, दंद ज़रूर नवें लवाउणे पए सन। जदों उह मुसकराउंदा तां ढालवें बुल्ल्हां हेठों नवें लवाए दंद लिशकां मारदे। चिहरा हसमुख्ख सी ते मुछ्छां विरलीआं। उस दा विआह 1945 विच्च होइआ सी। उहदे दो लड़कीआं ते तिंन लड़के सन। वड्डा लड़का फौज विच्च सी ते दूजा वाही करदा सी। निक्का सिंघ दा कंम डंगरां नूं पाणी पिआउणा ते खेत रोटी लै के जाणा सी। उहदा किसे नाल कोई कलेश नहीं सी। उदों परिवार `कठ्ठा ही सी। फौजी हुंदिआं उह अंगरेज़ी `च दसख़त करने सिख्ख गिआ सी पर पिछों उह पंजाबी `च दसख़त करदा सी।

मैं किहा, “एशीआ दा चैंपीअन बणन दी गल्ल वी सुणाओ। किवें जित्ती 1500 मीटर?”

निक्का सिंघ दस्सण लग्गा, “मैनूं महाराजा पटिआला जींद आले तों अएं मंग के लै जांदा सी जिवें दिहाड़ीआ लै जाईदा। उहनूं खेडां दा बहुत शौंक सी। पटिआले दे अथलीटां नाल मैं ज़िद ज़िद के प्रैकटिस करनी। पटिआले आला आवदे अथलीटां नूं पंज रुपईए दी खुराक दिंदा सी ते मैनूं ढाईआं दी मिलदी सी। जदों महाराजे नूं दस्सिआ तां उहने मेरी वी खुराक वधा `ती। पटिआलिओं मैं राज़ी हो के संगरूर मुड़दा सी। जदों मैं मुड़ना तां अफसरां नें आखणा, इहदी चंगी तरहां खल्ल लाहो इह विहलीआं खा के आइआ। ओदों एहो जिआ ई हिसाब किताब सी। किला राइपुर दा बरगेडीअर ज़ैल सिंघ मेरी मद्दत `ते हुंदा सी। उह आप वी अथलीट सी। 1950 विच्च नैशनल खेडां लुधिआणे होईआं। मेरा मुकाबला सोहण ते कुलवंत गिल्लां वाले नाल हुंदा सी। मैं ओथे 800 ते 1500 दोहें दौड़ां जित्त गिआ। ओदों मैं थक्कदा ई नही सी हुंदा।”

निक्का सिंघ दे नाल बैठा फौजी आखण लग्गा, “असीं एहनूं लगड़ कहिंदे हुंदे सी। इह मूहरे जांदे बंदे नूं लगड़ वांग पै जांदा सी। सी वी सिरे दा चीहड़ा। इह गा वी लैंदा सी ते असीं इहनूं दादा कहि के बुलाउंदे सी। जुआनां `च इहदी बहुत इज़्ज़त सी। ओनी इज़्ज़त उह अफसरां दी नी सी करदे। साडी पलटन दी खाहिश सी कि इह जे.सी.ओ.बणे पर किसमत नें साथ नां दित्ता।”

 

निक्का सिंघ अग्गे तुरिआ, “मेरा कुलवंत गिल्लां आले नाल बहुत पिआर सी। एशीअन गेमां `च मैं 800 मीटर दी दौड़ उहदे वासते छड्ड दित्ती। ऊं 800 मीटर मेरी बहुत तकड़ी सी। 1500 मीटर `च मेरा मुकाबला दो जपानीआं ते इक्क फिलपीने नाल सी। जपानी अख़ीरले चक्कर तक मेरे मूहरे दौड़िआ पर आख़री गुलाई `ते मैं उहनूं मार गिआ। मेरा टाईम सी 3 मिंट 48.7 सकिंट।”

इथे फेर निक्का सिंघ आपणा टाईम ग़लत दस्स बैठा। रिकारड दस्सण वालीआं लिखतां अनुसार निक्का सिंघ नें नवीं दिल्ली दीआं एशिआई खेडां विच्च 1500 मीटर दी दौड़ 4 मिंट 4.1 सकिंट विच्च ला के सोने दा तमग़ा जित्तिआ सी। मैं नोट कीता कि पुराणे खिडारी कई वार वधा चहड़ा के वी गल्लां कर जांदे हन। उह समझदे हन किहड़ा किसे नूं पता लग्गणै? वैसे उहनीं दिनीं 1500 मीटर दौड़ दा टाईम चार मिंट दे आस पास कढ्ढणा बड़ी वड्डी प्रापती सी। 1948 दीआं ओलंपिक खेडां समें सवीडन दे ऐरिकसन नें 1500 मीटर दी दौड़ 3 मिंट 49.8 सकिंट विच्च ला के सोने दा तमग़ा जित्तिआ सी। मैं पुछ्छिआ, “जदों तुसीं एशीआ दे चैंपीअन बणे तां किवें महिसूस कीता?” निक्का सिंघ आखण लग्गा, “महिसूस की करना सी। बस्स मैं कंबल दी बुक्कल मार के बहि गिआ। चित्त नूं बहुत ख़ुशी होई बई देस दी लाज रख्ख ली।”

मेरा अगला सुआल सी, “एशीआ दा गोलड मैडल जित्त के कोई तरक्की वी मिली?” निक्का सिंघ नें किहा, “नहीं। मैं हौलदार दा हौलदार ई रिहा।” “कोई इनाम सनमान?” “एशीअन खेडां वेले मैनूं पहिली वार टरैक सूट मिलिआ सी। सपाईकस मैं पंज रुपए दे खरीदे सी, काले रंग दे। ओही पा के मैं मीटां `ते दौड़दा रिहा। उह मेरे नाल अख़ीर तक निभे। उह सपाईकस मैं अजे तक वी संभाल के रख्खे होए आ।”

चंगा होवे जे उह सपाईकस पटिआले दी कौमी खेड संसथा दे खेड मिऊज़म विच्च मिलखा सिंघ दे सपाईकसां नाल रख्खे जाण। होर वी चंगा जे कौमांतरी पध्धर दे होरनां खिडारीआं दीआं यादगीरी निशानी वी संभाल लईआं जाण।