सत्थ विचों दो निआणे गुल्ली-डंडा चुक्की जांदे वेख के ताए नें उनहां नूं सैनत मारी।
उनहां विचों इक मूंह विच उंगल लै के संगदा संगदा ताए दे नेड़े आ गिआ, पर दूजा झग्गे हेठ गुल्ली लुका के अगांह नस्स गिआ।
“औह कहिंदा सी कुश उइ?” कोल आए मुंडे दी बांह फड़ के ताए नें पुछ्छिआ।
“उह, उह माघे का।”
“माघे का की उइ?”
“माघे काणे दा भतीजा।”
“घग्गे ढींडू दा मुंडा?”
मुंडे नें “हां’ विच सिर हला दित्ता। ताइआ आपणीआं संघणीआं मुछ्छां विचों मुसकराइआ ते मूंह मुंडे दे होर नेड़े कर के हौली जिही बोलिआ, “ ते तूं संते बुझड़ दैं नां? तेरे बाबे दा नां तैनूं पतै?”
मुंडे नें जीभ बाहर कढ्ढ के ताए तों बांह छुडांदिआं संग के मूंह पासे कर लिआ।
“दादी दिआ खसमा, आवदे बाबे दा नां नहीं पता? दस्स “किसू मुखतिआर ऐ कि फिड्डू रांझा?”
ताइआ उची सारी हस्सिआ, पर मुंडा मूंह विच उंगल पाई, गली दे अगले सिरे ’ते सहिमे खड़ोते, आपणे गुल्ली वाले बेली वल्ल झाकदा, बांह छुडाउण दा यतन करदा रिहा।
“चंगा चल्ल एहो दस्स बई पुत्त कीहदैं?”
“लालू दा।” मुंडे नें छेती देणी जुआब दित्ता।
“गुरमुख के लालू दा?”
“हूं!”
“लगदा ‘हूं’ दा! नानी दिआ यारा, नां बाबा, नां ताइआ, ‘हूं’ इह कीहने मत्त दित्ती ऐ उइ तैनूं?”
मुंडे दा संग ते सहिम नाल मूंह लाल हो गिआ। ताए दा भारा चिहरा वी भख गिआ। उस रता खरहवीं आवाज़ विच पुछ्छिआ, “मैं तेरा की लगदैं भला?”
मुंडा गुंम-सुंम खड़ोता रिहा।
“ओइ कुश तां बोल नानकिआं दिआ जंमिआं?”
ओवें सहिमे होए मुंडे दे मूंहों ‘ताइआ’ निकल गिआ।
“दुर फिटे मूंह तेरे जंमण दे। मैं तेरे पिउ दा वी ताइआ ते तेरा वी ताइआ?
इह सकीरी किधरों भाली ऐ उइ तैं? घरे तेरी कोई दादी, बेबे वी है मत्त देण वाली कि जंम के भूंडां दीआं गरोलीआं आंगूं रोहड़ ई छड्डे ओ?”
ताए नें बांह छड्ड के उहदे घोने सिर ’ते पोली जिही चुपेड़ मारी। मुंडा बांह छुट्टदिआं ई शूट वट्ट के आपणे बेली नाल जा रलिआ। उथों उह दोएं पिछांह मुड़ मुड़ झाकदे छप्पड़ वल्ल भज्ज गए। ताए नें इक वारी उनहां वल्ल वेखिआ ते गंभीर हो के आपणे खूंडे नूं पलोसण लग्ग पिआ।
तकड़ा दिन चहड़ गिआ सी, पर अजे ताईं ताए दा कोई सत्थ वाला बेली नहीं सी आइआ। चित्त काहला पैण लग्ग पिआ। गली विच वी सुंन-सरां ई लगदी सी। भुल्लरां दे घरों, इक बहू गोहे दा टोकरा लै के बाहर निकली सी, उस पिछ्छों कोई नहीं सी दिसिआ।
“की हुंदा जांदै जमाने नूं,” ताइआ आप मुहारा ई बोल पिआ। ते उस इक वार मुड़ आसे पासे निगहा मारी। “रामा वी पता नहीं मर गिआ कि जिउंदै। पुछ्छो तां आखू, ‘बहूआं सदेहां चाह नहीं कर के दिंदीआं।’ भला पुछ्छण आला होवे, ऐहो जीआं बहूआं नूं फाहे देणैं! इनहां नूं सहेड़ के किउं लिआंदा सी? एदूं तां…।”
पर कोई मंदा बोल बोलणों रुक के, ताइआ खूंडे दा आसरा लैंदिआं उठ खलोता।
इंदर कारीगर दे कारखाने वल्ल तुरदिआं फेर आप मुहारा बोलण लग्ग पिआ,
“अग्गे दिन चहड़दे नाल बुहड़िआं-ठेरिआं नें सत्थ विच आ बैठणा, घरे नूंहां धीआं नें सौ कंम करने होणे, बुहड़िआं तों पल्ले करदीआं फिरन कि गोहा-कूड़ा नबेड़न। नाले बंदे दा बुहड़ीआं कोले कंम की। पर हुण गुरमुख अरगे वी ठरके फिरदे, अखे बहूआं नूं घुंड कढ्ढण दी ज़रूरत ही किआ ऐ? “ आहो! नूंह सहुरे दी साली, बाबा पोतीआं दा मासड़! जे संग-छरम ई नां रही तां बंदे विच ते पशू विच फरक की होइआ ।”
“ओइ कीहदे नाल सुखमनी दे अरथ करदा आउंदैं बई?” इंदर नें बठ्ठल विच अग्ग ’ते सुक्के सक्क सुट्टदिआं, दूरों ई उहदा सुआगत कीता।
“अरथ कीहदे नाल करने ऐं इंदर सिआं, आवदे ई रोणे रोने ऐं।” खूंडे दे आसरे आपणे भारे सरीर नूं बोचदा उह इंदर दे साहमणे मुढ्ढी ’ते जा बैठा। धुखदे सक्कां दे निघ्घे धूंएं विच हत्थ पाउंदिआं उह फेर आप मुहारा ई बोलण लग्ग पिआ, “इंदर सिआं, तूं तां गिआन-बान पुरछ ऐं, इह दुनीआं नूं हुंदा की जांदै? मैं तड़के दा सत्थ विच आ के बैठां, कोई चिड़ी नहीं फड़की! खबरे घरीं बैठे लोक की गीता दा पाठ करदे ऐ? अग्गे टिक्की चहड़दी नाल मार रौणकां लग्ग जाणीआं। बुहड़िआं-ठेरिआं नें, मुंडिआं-खुंडिआं नूं मखौल करने। हुण अब्बल तां कोई आप ई कुस नहीं कहिंदा, जे कहि बैठे तां उधड़ के अग्गों गल पै जाणगे। भलिओ बंदिओ! इह तां सोचो बई जे पिंड विच ऐना ई सहिचार नां रिहा तां फेर इथे रहि के की करनैं, बाहर खेतीं नां जा के छप्पर पा लांगे? हैं बई इंदर सिआं?”
“पाई तां जांदे ऐ। हुण तेरे साहमणे तुल्ल्ही किआं नें, अरजण किआं नें, तोतू नमोलीए नें, सारिआं नें खेतीं जा कोठे पाए। जदों पुछ्छीए किमे ओं, आखणगे, ‘वीह ऐं भरावो, सिआपे ’चों निकले!’ लै, पिंड नूं ‘सिआपा’ ई दसदे ऐ!”
ताए नें गहु नाल इंदर दे मूंह वल्ल देखिआ ते उहदे मत्थे दीआं भारीआं तिउड़ीआं संघणीआं हो गईआं।
“दुर फ़िटे मूंह!’ घिरणा नाल ताए नें बठ्ठल विचों धुखदा सक्क चुक्क के, उस नालों मच्चिआ हिस्सा झाड़िआ ते आपणे पासीं खिलरे इंदर दे तिख्खे संदां वल्ल झाक के खरहवीं अवाज़ नाल बोलिआ, “इंदर सिआं कदे कदे तां ऐं जीअ करदै, बई आह जिहड़े अज्जकल्ल्ह दे मुंडे-बहूआं फ़ूं-फूं करदे फिरदे ऐ नां, इनहां दीआं फड़ के कुहाड़े नाल लत्तां छांग दिआं, ते।”
“मुंडे-बहूआं तैथों लत्तां छंगौणगे कि आपणीआं छांगणगे?” इंदर आपणी खोदी, करड़-बरड़ी दाहड़ी ’ते हत्थ फेरदिआं बोलिआ, “असल विच बाई समें दी गल्ल हुंदी ऐ, जिहो जी वा, ओहो जिआ ओहला। तेरे मेरे अरगिआं दे हुण ज़माने ई नहीं रहे।”
“छड्ड जार, की गल्लां करदैं, मैं तां दोहां नूं आखिआ विऐ, बई जे तां बंदे बण के चलोगे तां सभ कुझ थोडा। जे बहुती चीं-वीं कीती तां सालिओ, सारी ज़मीन कुड़ीआं दे नां लुआ दूं, तुरे फिरिओ डंडे वजौंदे! वेख लै कंन विच पाए नहीं रड़कदे। उह छोटी बहू माड़ा जिहा उची-नीवीं होण लग्गी सी, मैं इक दिन विहड़े विच खूंडा खड़का के ऐसी दबकाई, उदूं पिछों चाह पाणी नूं दिन नहीं चहड़न दिंदी। आपे पाणी तत्ता कर के धर जू, आपे।”
“तूं तां होइआ करमां आला जी!” इंदर नें ताए दी वडिआई करदिआं किहा,
“तेरी कोई रीस ऐ। नाले जदों वाहिगुरू नें उलाद सलग्ग दित्ती होवे तां सभ कुझ आपे रास आ जांदै।”
“उइ नहीं इंदर सिआं, बंदे विच आवदे विच साह-सत चाहीदै, बाकी सभ गल्लां आपे रास आ जांदीऐं। जदों आप ई लोकां दा अमान हल्लिआ फिरदै, तां उलाद की करू? अहु रामू नें नूंह की सहेड़ लिआंदी ऐ, सारा दिन उसे दीआं गल्लां ई करी जाऊ, “हमरी बहू घुंड नहीं कडती, उह दस जमातां पहड़ी होई ऐ।” मुंडा किते बाहर फिरदै, आप उहनूं साला इथे रख्खी बैठै। बई कंजर दिआ कंजरा, इहदा इत्थे की कंम? हुण दस्स, दुनीआं दा कोई हाल ऐ।”है बेड़ा गरकण ’ते आइआ कि नहीं?”
इंदर वी गंभीर हो गिआ सी। ताए नें कोई होर कथा छेड़ लई, पर परतापे का सीरी तापा कही तलपौण आ गिआ। इंदर नें कही फड़ के पासे रख्खदिआं कहि दित्ता, “बिंद कु नूं लै जीं, अजे बाई नाल गिआन गोशट करदे ऐं।
“तूं भरावा गिआन गोशटां फेर कर लीं, मैं तां जे बिंद कु नां गिआ, मेरी तां परतापे दा सज़ादा संघी घुट दू।”
“तैथों कुझ नहीं सरू ओइ कजाते।” ताए नें उस वल्ल हिरख के विंहदिआं किहा।
“ताइआ, घुग्गी की जाणे सतगुर कीआं बातां।” तापे नें पैरां भार बठ्ठल दे नेड़े हो के बहिंदिआं किहा, “तूं तां घरों ‘बेदखल’ होइआ फिरदैं। परतापे के मुंडे तां हुणे ऐडे चक्कमें होए फ़िरदे ऐ, अखे असमान साडा ई खहड़ाइआ खहड़ै। परतापे वेले तां कदे टुक्क दा भोरा वी मिल जांदा सी, हुण तां आखणगे, चाह वी घरों कर के लिआइआ करो। आह वेख, दुध्ध दा पऊआ, चाह ते गुड़ दी डली नाल लै के चल्लिऐं। डब्बा खेत रख्ख छड्डिऐ। जदों तलब होई, आपे कर के पीऊं, कोई बात नहीं पुछ्छदा।”
जदों तापे नें आपणे मूके दे पिछले लड़ नाल बंनहिआं निक्क-सुक्क विखाइआ तां ताइआ सच्चीं हैरान होइआ, पर इंदर नूं कोई हैरानी नां होई। उस आपणी गल्ल दुहरांदिआं किहा, “चंगा तूं अजे घरे गेड़ा मारिआ, फेर मुड़दा लै जीं। अजे तां जार हड्ड ई नहीं जुड़े, ठंढ तां वेख उतों किंनी पैंदी ऐ।”
“आहो चाचा, तैनूं ठंढ तां लग्गू ई!” तापा उठ के खहड़ा हुंदिआं कुझ विअंग नाल बोलिआ, “आवदे अड्डे ’ते बैठैं, किसे साले दी मीनमेख नहीं, जो आखों सत्त ऐ, चंगा फेर मैं हुणे आउनै”लै, चाचा बण के करादीं हुणे, चंगा?
ताइआ भोला तापे दी गल्ल सुण के उंज ई गुंम हो गिआ सी। अचानक उहनूं जापिआ जिवें उह किसे होर पिंडों आ के वसिआ होवे। इंझ सीरी बोतलां विच दुध्ध पाई, चाह दीआं पुड़ीआं, गुड़ पल्ले बंनही, उस ‘आपणे पिंड’ तां कदी नहीं सन वेखे। उनहां दे सीरी नूं तां हुण वी मुंडिआं दे नाल दी चाह मिलदी सी; नाल दी रोटी मिलदी सी; उह आप सारी उमर इवें करदा रिहा सी।
“चंगा बई इंदर सिआं, मैं वी चलदैं।” ताए नें उठदिआं किहा।
इंदर नें दो तिंन वार उहनूं बैठण लई किहा, पर ताइआ लंमा हउका भर के “वाखरू, वाखरू, तेरे रंग” कहिंदिआं बाहर निकल गिआ।
गली विच आ के उहने चहड़दे वेखिआ तां कुझ बंदे तुरे आउंदे दिसे। उह रुक के गहु नाल उधर ताड़न लग्ग पिआ, पर कोई पछाण नहीं आई। बंदे होर नेड़े आ गए, उह फेर वी नां पछाण सकिआ। जदों उह चार करमां दी वित्थ ’ते रहि गए, तां किते जा के संतोख ढिल्लों के सीरी दी पछाण आई। उस सिर उते वड्डा सारा बिसतरा चुक्किआ होइआ सी, पर नालदिआं नूं उहने अजे वी नहीं पछाणिआ। “ताइआ सति स्री अकाल! तकड़ैं?” सीरी दे मगर आउंदे गोरे नछोह गभ्भरू नें मुसकरांदिआं किहा ते कुछ्छड़ चुक्के मुंडे दे दोए हत्थ उतांह करदा बोलिआ, “बाबा जी को गुड्ड मारनिंग बोलो!”
पर भोला जिवें ठठंबर गिआ। उहनूं एनी कु गल्ल समझ आ गई कि उह संतोखे ढिल्लों दा मुंडा हो सकदा सी जिहड़ा हवाई जहाज़ां वाली फौज विच नौकर सी, पर उहदे कुछ्छड़ चुक्किआ, रबड़ दे बावे वरगा, लाल खट्टी कोटी ते पशम दे टोपे वाला निआणा ते उहदे मगर आउंदी लंमे लाल कोट वाली शहिरन कुड़ी दी, उहनूं कोई समझ नहीं सी आ रही कि उह कौण सी। उहनूं चंगी तरहां याद सी कि संतोखे दा इह मुंडा अजे विआहिआ नहीं सी। “किहड़ै?” भोले नें सति स्री अकाल दा जुआब दित्ते बिनां, उस दे मूंह वल्ल तकदिआं पुछ्छिआ।
“मैं संतोखे दा पीलू ऐं ताइआ, पछाणिआ नहीं?”
“पछाण तां लिआ, पर हाअ की”?” हर शबद हैरानी नाल ते लमका के बोलदिआं भोले नें किहा, ते चुप्प कर के, अध्ध नंगा सिर करी, हत्थ विच महिं दे लेवे वरगा काला झोला जिहा लमकाई, बोते दे पिछ्छे-पिछ्छे तुरी जांदी उस कुड़ी वल्ल इउं झाकण लग्ग पिआ जिवें उहनूं गल्ल ई भुल्ल गई होवे कि उस की पुछ्छणा सी।
पलविंदर उची सारी हस्स के, कुछ्छड़ चुक्के मुंडे नूं उतांह उगासदिआं बोलिआ,
“इह ताइआ तेरी नूंह ऐं!”
भोले दी जिवें जीभ ठाकी गई होवे। उह आपणी इस ‘नूंह’ नूं घूरदा रिहा।
“तैनूं तां ताइआ जिवें चौंधी ई लग्ग ’गी।” ताए दे मोढे उते हत्थ रख्खदिआं, ठहाका मार के पलविंदर नें फेर किहा, “तूं खूह दे डड्डू आंगूं सारी उमर तसीलों अगांह नहीं टप्पिआ, ताहीं एना हैरान होइआ खहड़ैं नां, दुनीआ तां ताइआ चंद ’ते अप्पड़गी!”
भोला कुझ नहीं बोलिआ। उह पलविंदर नूं कोई मोटी सारी गाल्ह कढ्ढणी चाहुंदा सी, पर सारे सरीर विच जिवें सत्तिआ ई नहीं सी। मुंडे नूं कुछ्छड़ चुक्की, उहनूं मुड़-मुड़ चुंमदा ते उस नाल ‘होर ई’ बोली विच गल्लां करदा पलविंदर ताए नूं दुपहिरे मिलण दा इकरार कर के जदों बोते दे मगर तुरी जांदी आपणी वहुटी नाल जा रलिआ तां ताइआ उथों ई फेर पिछांह मुड़ पिआ।
इंदर वी अछोपले बाहर आ खड़ोता सी। उस उहनूं मुड़दिआं वेख के विअंग नाल किहा, “किउं, वेखे दुनीआं दे रंग! इह सारा कुश बाहरों-बाहर ई कराई फिरदै। कहिंदै इह ओधरली कोई बंगालण असामण ऐं। आपे सलाह कर के विआह करा लिआ। ओथे ई जुआक जंम ले, है वधीआ कंम कि नहीं बई? नां हिंग लग्गे नां फटकड़ी, रंग ऐन केरां लाल बरंग।” पर ताइआ फेर वी कुझ नहीं बोलिआ। उस अग्ग वाले बठ्ठल दे कोल आउंदिआं, ढिल्ली आवाज़ ’च किहा, “इहदे ’ते सक्क-सुक्क पा चार, मेरे तां पैर ई बला ठरदे जांदे ऐ।”